Titi Khawchang

Bangladesh indan hma khan, Pakistan chuan, East Pakistan-ah lal a hrawt vak mai a. India ramah ral tlan tam tak an lo lut ta a. Chu chu India ram tan chuan, manganthlak tak a ni. 1971 khan, chumi avang chuan Prime Minister Indira Gandhi chuan, Cabinet Meeting a ko ta a ni. Foreign Minister, Sardar Swaran Singh, Defence Minister, Jagjivan Ram, Agriculture Minister, Mr. Fakhruddin Ali Ahmed, leh Finance Minister, Yashwant Rao te bakah, Commander in Chief General Sam Manekshaw chu hrilh a nih angina cabinet-ah chuan a tel ve bawk a.

General Sam hian a tia lawm, Field Marshall nihna leh, ban nihna inkar chu zimte a ni a ti. Prime Minister-in thinrim zetin, West Bengal, Assam leh Tripura CM lehkhathawn a chhiar a. Chu an lehkhathawnah chuan, Raltlan an tam lutuk avanga tih ngaihna an hriat loh thu a ni a.General Sam-a lama chu Prime Minister chuan a hawi a, “Engemaw ti turin ka duh che a ni” a ti ta a. General chuan, “Enge ti tura min duh?’
“East Pakistan luhchilh rawh”
“chumi nghawng chu indona a ni tih I hria em?”
“Indona pawh nise, a pawi ka ti lo e”
General Sam-a chuan, “Prime Minister, Bible I chhiar ngai em?” a ti ta khawl a. Foreign Minister Swaran Singh-a chuan, “Bible nen kan boruak hi engnge a inzawmna awm?” a lo ti a. Sam Chuan, “ Bible bu hmasa ber, Bung hmasa ber, Para Hmasa ber, sentence hmasa berah khan, Pathian chuan, “eng lo awm rawh se” a ti a, eng a lo awm. Nang pawhin, “indona a ni mai” I tih chuan, Indona kan hmachhawn ang? Han Ngaihtuah teh. Indo turin in inpeih em? Hei hi ka hrilh ang che u, April ni 28 hian, Himalayan Tlang kal khan te a inhawng leh taw hang. China hoin, indo an rawn puan vai chuah, Hmun hnihah Indona ka hmachhawn dawn a ni” a ti a.

Swaran Singh-a vawk chuan, “China chuan, Thutawp an siam angem?” a ti a, General chuan, “Foreign Minister I ni a lawm. Min han hrilh teh “ a tih zawh chuan, PM lam chu a hawi leh a, “Prime Minister, nikum khan West Bengalah inthlan I duh a, kan inthlang a. Communists ho chaklo se I duh avangin, khawtin leh kawtthler tinah sipai ka duty tir a. Tun thlengin an la awm a. Anmahni awmna hmun pangaia awm a, indo inpeih tur chuan, Thlahnih tal hun ka mamawh. Assam-a awm mek ka nei a. Andra-ah division-a awm mek an awm a. Jhanshi-Babhina hmunah Armoured Division an awm mek bawk. An awmna tur hmun dik taka awm tur chuan, thlakhat tal hun ka mamawh bawk. Kawng tinah, rel tin, truck tin, Wagon tin an chetsawnan ka mamawh bawk. Punjab, Harayana leh UP-ah Buh kan seng mek a, chung buhseng te chu in phur sawn theih hauh lo ang”

General chu Agriculture Minister lamah a hawi a, “ Tam tla vaih se, nangmah a nia an dem dawn che kei ni lo” tih a sawi zawh chuan, “Ka armoured division chuan Tank hman tlak sawm pathum chiah a nei” a tih zawm a. FM chuan, “engatinge 13 chauh?” a lo ti a. Ani chuan, “Finance Minister I ni a, Kumkhat leh a chanve kal ta atang khan Pawisa kan dil thin che a. Pawisa a awmlo I ti zel a nih kha” a ti a. PM hnenah chuan, “Prime Minister, East Pakistan a lut tura ka in peih meuh chuan, Monsoon a intan tawh ang. Ruah a sur hian, a sur satliah lo, A buakin a bua. Lui te chu Tuifinriat ang mai an lo ni a. Luikam lehlama I awmin, lehlam I hmu pha lo ang. Motor Kawngpui chiah ka hmang thei dawn a. Airforce-in min pui thei dawn lo. East Pakistan lut tura min duh chuan, za a za chaklohna ka tiam a che” a ti ta a.

“Sawrkar chu I ni a. Thupek chu min pe dawn em?” General chuan a ti khawl a.

General Sam-a hian a tia lawm, “Chutiang em ema hmeichhe thinrim chu ka la hmu ngai lo, ka nupuiah ngei pawh. A hmai a sen vek mai. ‘Cabinet dar 4-ah kan inhmu leh ang, chhuak rawh u’ a ti ta a”. Cabinet minister ho an chhuak sa sap a, ka chhuak hnuhnung ber dawn a. “Chief, Thufual lawk teh” a ti a. “Prime minister, I ka I an hmain, Rilru emaw taksa hrisel lohna chhuanlama banna thehlut turin min duh em, a engzawkin nge?” ka tih chuan, “Nilo, Sam. Thu teh. I sawi zawng zawng ka thudik a ni em?” a ti a. “Ni e, Thudik hrilh che hi ka hna a ni. Ka hna chu Indo leh chak a ni a, chakloh ka hna a ni lo” ka ti a. “A tha e, Sam, ka duh I hria e. engtikah nge I in peih ang?” a ti ta a, Kei chuan, “ka sawi thei lo. Ka kutah dah vek la. Ka duh ang thlapa ka kalpui chuan, hnehna pumhlum ka tiam a che” a ti a. Prime Minister chuan, General Sam-a kutah a dah a. 1971 Indonaah India a chak a, Bangladesh ram a lo piang ta a ni.

1962 Indona thlen dawn khan, Nehru-a thu chu Commander in chief in a hnial ngam loh avangin India a mualpho a ni.

Mi tam tak chuan, kan hna tha taka thawka, sawi tul sawi ngam khawin rilru huaisenna kan nei lo thin, Kan chunga mi te tihlawm loh hlau hlau reng rengin kan khawsa a. Kan chunga mite thu hi chu zawm tur chu a ni ngei mai. Mahse, dan hnuaiah, ziaka awm thlap a nihin. Ziaka a awmlo a nih pawhin, ziaka dah tir leh theih leh dah tir leh ngam chu zawm tur a ni. An sawi apiang mai, diklo leh chaklohna, chhiatna leh mualphona thlen tir thei tih kan hriat rengah pawh hnial ngam lohna hian min ti buai thin. Sam Manekshaw ang hian, Prime Minister leh cabinet Minister rual pawh nise, kan hnain min phut ang sawi ngam leh ti ngama kan awm loh chuan, kan ram leh hnam, khawtlang leh chhungkuain a tuar zel zawk dawn a ni.

-C Ṭhuamluaia (1922-1959)

(He blog/website ka siam chhan pakhat chu Interneta mizo thu leh hla tha chhiar tur awm lo leh hmuh tur awm lo thin hi a ni a. Zoram Nipui Essay hi Trend setter a tling a. Kum 70 vel zet kal ta a ziah tawh a ni bawk a, a hlu hle a ni. )

Kum khata hun li ṭhente zingah hian nipui lai hi hun nuam ber a nih ka ring. Fùr lai hi chu ruahtui a tam ṭhin em a, khawlai len leh ram chhuah te a nuam lo va, Zofate tan phei chuan chuan hlo thlova ṭul em em hunlai a ni a, sawi lohah lo lum ta ila. Favang hun rei lote tih mai loh chu hun nghahhlelh em em dang kan nei lo. Thlasik lai hian thil pawimawh tak tak leh ṭhenkhatte phei chu hriat reng tur, khual anga khël lo, naupang tan sikul chhuṭi leh thang kama dai vah hun, nu leh pa tan kum tluana an thawh rah, buh seng, kan vaia tan Krismas leh kum thar; hengte hian thil dang awm hlek lo mah se thlasik hun lai hi an tipawimawh a, an tithlakhlelhawm a ni. Nimahsela, keini American wool te, English flannel te leh Cownpore wollen mill siam chhuah kawrlum ṭhate nei ve zo lo tan chuan khaw lo lum ṭan deuh ngawt mai pawh kan lawm em em a, kan thla a muang ṭhin. Sap_ho pawh hian spring an tih hi (kan nipui a ni a) an nghakhlel em em a, hun mawi a ni a, thil ṭha leh hlimna zawng zawng a entir a ni ang; Shelley pawhin mangang takin,

‘O’ wind,
If winter comes,
Can spring be far behind?’

a tih lawm lawm kha.

Hmanlai pi leh pu aṭang tawhin nipui hi hun lar leh hlaah te pawh chuang nasa ber a ni. Fùr khaw hnàwm a lo reh a, favang nun nuam tak a lo thleng a, mahse a ral leh thuai a, thlasik a lo ni a, ‘a reh leh dawn nange maw aw!’ tih tura rei a rawn awh a. Mahse January thla a lo thleng a, chhun khaw thiangah khua han thlir ila thlaphanna zawng zawng a bo ta a ni. Romei chhum a lo zam ṭan den den a, chu chuan nipui a hla tawh lo tih kan pi leh pute a lo hrilh tawh ṭhin a, keini pawh min hrilh a ni a; ṭhang leh thar zel pawh a la rawn hrilh ṭhin dawn a ni. Ni e, lungngai suh, ṭuahpui leh vau zawng an lo la vul leh ngei dawn e.

Thlasik khaw vawtin a hmeh thlak thing hnah hluite kha mawi em emin an lo chawr no leh a. Ruah tui kangna a rei tawh a, luite tam tak leh luipui hnar pawh an lo kang ṭan ta a, tlang tin mai hi tlang kan chuanna tawkin Zoramah chuan a sang ṭheuh si a, romei chhum lo zam paw chûk mai kara khaw han hawi vel te hi lunglenna vawng vawng a ni. Mi tin mai hi han inen ila, kan retheih leh kan thawh rim te kan hre chang lo va, kan mitah lungawina a lang a ni. Thing hnah tla kawlhte kha tumahin an hãl lo va, an hãl bo sëng lo va, ruah tui len botu tur leh chiah zawptu tur lah chu thla li danah tuifinriat aṭangin a lo la thawk dawn chauh a ni si a, lungngaihna reng reng a tel lo. Ram han chhuak ila, hnahthel ro kan rap ri riap riap a. Han hawi vel ila thing hnah nò lai chàng a lo ni lo, pangpar mawi tak tak vul hun lai a lo ni a, ‘Kan tlang ram par vulna’ tih hlate hi i chhiar i chhiar duh loh pawhin, ṭuahpui leh vau zawng i hnar lo vang. Nauban par vul chûk te i hmu ang a, phunchawng te, pâng te, herhse, ngiau, senhri, dingdi te zawng nen, par lo reng reng an awm lo tih tur a ni. Hmingthang em emin, mak leh chapo lutukin, ka rei! Thlado lerah chawnpui a lo par ang a, tuar har ti lo nau reng reng hi he lei, van hnuaiah hian an awm ka ring lo.

Par hò tak sawi hmaih ka la nei a, i hria em? Hman kum nipui lai khan ka ṭhian pakhatin min hrilh a; “Kei zawng, kawldai parte tak ngial pawh hian riang min ti!” a ti.

Ṭhianzahote nen sangha vuaa kal i duh chuan a aia nuam a awm chuang lo. Lo vah hun lai tih theih zawng a ni na a, pho ro hun lai a nih zual ber avangin mi tam tak an ãwl a, mi tinin dai vah an chak. Nula te, tleirawl te, nu leh pitar thlengin thing phur tura kal i hmu ṭhin ang. Mi tinin nun hlui kan ngai a, ngaih tur nei vak lote pawh, thihna angin nipui chuan min chawk rual a, kan kiu ruai ruai ṭheuh ṭhin. Romani an ti a ni lawm ni kha, thing phur a,

‘Tlang tin ṭuahpui leh vau an vul, khua a ṭhal,
Ka hawi ngam lo raltiang romei zing riai karah;
Suihlung rual sirva leng an nui hiau ve, par tlànin,
Khawthlang sirva hnehin aw…..

ti vawng vawng a,

‘Riang hlei nau ang ka tlei thei lo,’

titu kha? A ni, amah vëk chuan a ni, nipui lai hi a tuar thiam ngang ṭhin lo va, vanduai taka duh ngawih ngawihte chân a ni ang. Nipui lo thleng chu a hmu reng a, thing te a lo chawr no hlep hlep a, a hmu a; sirva par tlante chu hlim em emin an chiar leh neuh neuh va, a hre reng a. Romei leh lelthang kiu vel karah chuan tuar zawh loh thil a nei tlat ṭhin a;

‘Ṭhal awiin lelte pa’n lenbuang a nghak,
Ṭhal tui ang kan nghah chu kumsul vei leh lunglen.
Dài lëm ang maw, thinlai a zing riai e, nang ngaih chu,
Zùn lëng zãm leh hnutiang, aw,
Nang ngaih lunglen a nëm thei lo!’

tih hlate hi a phuah ta a ni.

Nì, mawi tak maiin romei a lo zam a, lung tileng takin ngur lènna tlang tawh phawt chu an rawn bàwm a (thliar bik reng reng an nei si lo va), hmel duh tawng lo zawng chu….. nì, lo haw tlai deuh mah se ngai thiam hram ang che!

Hengte hi i tih duh lohva, awmhar run nghah i tum bawk si loh chuan chem tùm nen, a nih loh leh engmah kah tum lovin laiphir nen chhuak mai rawh. Kal la, ràl leh lamah ramar pa te chu khuang ëk ëk mah se bengkhawn suh. Thing buk hlim hnuaiah ṭhut san la, vaibel i zuk ngai loh chuan lehkhazial tui tak zu la, khawvel mak zia te, ropui zia te dãwn vel la, Siamtu, chung Pathian pawh i lam a nih chuan i chhut thei ang. Ramar pa tuai tir, hèl lai nei, khawvel nun la thlahlel tak mai te chu lo awm ve mai mai ang hmiang; khawvel a mawi nuam a, Zoram ngeiah i chèn alawm! Sava ṭhenkhatte chu pahnih lekin, khawhar ve awm takin an thlawk lep lep ṭhin ang a, mahse an te em a, chhung tlai an tling lo va, i kap dawn si lo. Tho la, fang zel la, chul hlui lam te va fang teh. Pu Rokunga’n ‘láwmrual’ a phuahna chang tawp ber kha engmah lo mai maiah a siam hlei nem. Dik takin, dik kumkhua zel mai turin ‘tùk ram chul hnu’ an lo chang a, a lo ro rìm rèm ang a, vaṭhu thlawk velte i hmu ang a, khawiah nge an fuk tih i mitin i han chhui ang a, vauva thing kung pakhat ṭang rovah an fù ang a, hràm chungin an her liai liai ang a, hawi hrek hrek chung zelin an han ‘mim-sir-i-kùt’ ang a, tichuan i buai mangang, “A ni tak, Láwmi, an chul zo ta,” i ti dawn a ni. Aw, Thanghniang, a va pawi dik tak em!

‘En teh, khu maw-
Kan ṭuanna chul hnu
Mimsirikut ṭhuvate’n zaiin an àwi!’

Tin, kan hla phuah thiam neih zawng zawngte pawh hi danglam bik pakhat mah awm lovin, lelte nena piang a, nipui lai àwi tih vek tur an ni. An lunglen zual lai ber chu nipui a ni fo, lunglen hun aia hlawk hla phuah thiam tan a awm si lo. Hla tam tak (tam tak mai) chu nipui laia siam a ni a, thlasik lai pawhin lo la thleng lo nipuiah chuan an han lêng lâwk thei a; Hausiampa pawhin advance_in,

‘Kum sul veia romei zam leh tur reng hi,
Ka suihlung mu ang a lêng lãwk e,’

a ti an tih kha.

A nì, lelte te, uleuh te, ngirtling te rengchal te leh dàwlrëm te pawh zai vàwrna tlang ramah hian hla ti mite chuan tù dang mah an chhùn ang tih rin tur a ni lo. An piang rual a, ṭhal lai ngei hian; tin, an ṭhang tlang a, pangpar vul tinreng leh rim tui tak takte zingah leng velin an hla mawi ber berte a lo chhuak a ni. Chapchar kut hmingthang em em pawh hi fùrah chuan lo ni se la, heti em em hian pi leh pute’n chèn nasain an sawi lo vang a, heti khawp hian nu leh pate’n an thlahlel lo vang a, heti fakau hian ṭhangtharte’n kan hloh mai theih hi kan hlau lo tur. Muang taka khuangpui ri chhut chhut kara seki inkhawng buk buk zawng romei zâm karah chauh lo chuan hriat phal a ni tawh lo.

Heng zawng zawng thlen hun lai hi hlim em em, rîk chël chûl hun lai ni awm a ni. Hlim em em hun lai a ni a, mahse kan ri chël chul chiah em le?

Kan lènna khawvel hi a lo zau em a, kan bengchheng hle emaw kan tih pawh a lo la nasa tawk lo a ni. Mahse thawm nasata hlimna hi teh a ni lo va, bengchheng nasata teh mi lah a ni hek lo. Chu chu a ṭha zawk fe a ni nghe nghe ang.

A chhan zàwng ka hre lo. Pu Rokunga vëkin ‘Chite lui’_ah khan thiam takin a sawi leh kha. Han chhiar ila, bengchheng ri chël chul kan hre lo va, luipui luang ri huau huau lah kan hre hek lo. Chite lui, nipui laia luang, luang dam diai chauh kan hmu.

‘Fiara tui thiangte luang del del,
Lëngi nena luia lengngha kan chhaina;
I sirah thing leh maurua an zing riai e,
Luang dem dem rawh, piallei a ral hma loh chuan,’

tih a thunawn hian Mizoram nipui hun lai a entir a ni.

A mawi zual lai ber phei chu nipui lai sawina liau liau a ni a, han chhiar leh teh, i duh chuan:

‘Ṭhal rùm laiin va tin rengin an dawn ṭhin,
Lungrualpui nen suara lengngha kan danna!
Kan thlawh sawmfang kan zawh tluang kàina nuamah,
Luang reng rawh, lungrualpui nena ruang bualna,’

tih hi han chhiar la, a mawi tawk hle tawh a. ‘Lungrualpui nen suara lengngha kan danna’ han ti leh teh. Kan Mizo ṭawng zawng zawngah hian a mawi ber mai lo maw…..?

Sap leh hnam dang chanchin kan chhiar thin a. A ngaihnawm pawh a ngaihnawm na rawh e. Mizopa chanchin hi a ngaihnawm erawh ka ti fo mai. Kan hmel ang puin, kan thisen ang neia leia lo piang, kan hnam thatna tur theihtawp chhuah thinte, Pathian ram zauna atana an thatlai huna, a rem leh rem loh huna theihtawp chhuah thinte chanchin kha a ngaihnawm ka ti thin.

British lo luh hma khan Mizo hnam hi tu thuhnuaiah mah kan kun ngai lo a. Kan duhlo chung British-in min awp a. Khawvel Politics inher zelah British-in India ram a chhuahsan tumin, India ramah kan bet zui ta zel a. Ngaihsak kan hlawh lo e mem mai bawk!

British-in min awp hunlai ata tawha zalenna duhna chi nung lo tiak tawh chu a lo thanglian a. 1966-ah chuan par a lo chhuang ta a. Kan hnam zalenna tura bei turin mizo tlangval tam tak an chhuak a. Hnam zalenna thupuan chhuaha hming ziaktute pawh kha thalai tak tak an la ni hlawm. Chung zingah chuan, Pastor Fehtea fapa, Tlangval hmeltha leh lian zuai mai L. Malsawma Colney kha a tel ve a. Hun lo kal zelah phei chuan, Mizoram independent sawrkar President te pawh a ni ta hial!

L. Malsawma Colney ngaihtuahna, a thurilfun, a khawvel thlirna leh thil dang te, a titite kha a ngaihnawm em emnain sawi ka tum lo a. Pathian ring bur mai, engtik lai pawha Bible keng thin Malsawm Kawlnia chanchin kha a ni sawi ka tum ni. Chanchin ngaihnawm leh ropui tak mai a niin ka hrethin.

An lehkhazir lai khan Bible a keng reng mai a. An rammut lai pawhin a keng reng mai. Ramhnuai a tanga a lo chhuah a, awm pangaia a awm chhoh pawhin a keng deuh reng mai a. “A chhiar pawh I chhiar hman em ni?…Engah nge hetia I ken reng ni?” tia an zawh chuan
“CRP in hmu ngai em?”
“Hmu ngai e”
“Silai an pai thin em?”
“Pai thin e”
“An kap reng em?”…A chhang thiam khawp mai. Khawi ilo kalnaa Bible keng ngai miah lo kan ni fur zawk ang.

“Bible hi ka inhumhimna ber ania sin” titu Malsawma Colney khan Bible a ngaina a, A thlamuanpui e mem mai. March ni 1, 1966-a zalenna sual bul an han tan dawn khan, zanlaiah an inhmu khawm a. Boruak a ralmuang lo hle, An silai thuhrukte pawh jeep-ah an hlang a. Laipuitlangah chabi an han lak angai leh ta tlat mai a. Ngurkunga leh L. Malsawma Colney te chu kal tur an ni a. An chhuak tur chu, Defence Minister R. Zamawia chuan, “Silai ken ngai in tie m?” tia a han zawh chuan, Ngurkunga chuan, “Aw, sten gun kha kan ken gang” a lo ti var a. Malsawma Colney chuan, a kut vei lama Bible lek kang v ava chung cuan, “Angai lo. Hei, Bible ka keng” a ti a. Laipuitlang pan chuan an chhuak ta a ni. Chutiang hun hlauhthawnawm karah chuan, Bible ka keng tiin a kal ngam a ni. R. Zamawia sawi dan chuan, inkahna hmunah pawh a keng zel tho a ni awm e.

Zalenna sual tirh khan, kum 35 mi a ni a. A hunlaia lehkhathiam, BA a ni. Sipai lal ni tura inziak tling a ni a. A nu thu a awih avangin a hna a zawm ta lo nghe nghe. Nu leh Pa thuawih leh Pathian tihmi, Pathiana thlamuanna famkim nei a ni a. Ramhnuaiah inkahna a hmachhawn ve fo a. A him tluan chhuak a. Kum 80 chuang a dam a ni. “I palian si a, I langsar si a. I him tlat thin mai hi engnge a chhan ni ang?” tiin, Rochamlianan a zawt a. Malsawma Colney chuan, a tette a tanga a thu a lo zawm thin Pathianin a ven him avang a ni tiin a sawi!

Bangladesh rama Canada mi missionary jay walsh-a khan lehkhabu a ziak a. Against all odds tih a ni a. Bangladesh ramah hian kum 35 lai an thawk a. L. Malsawma Colney te nen hian an lo intawng nghe nghe a. Chumi an intawnna chanchin a lehkhabuah hian a ziak a.

“Nikhat chu kan Hospitalah mi pakhat hi missionary hmu duh hi a lo lang hlawl a. Hospital vengtu chuan tlangmi a nih avangin kan inah a rawn hruai lut ta nghe nghe a. Lungi a veng a, a chau a, a paw rem em bawk. Tlangmi dang ang loin a palianin asang hle a, a ngo vuah mai bawk. A hmel land an reng rengah pawh pa danglam tak a ni.

Bengali tawnga ‘Tanpui theihna che ka nei em?’ ka lo tih chuan, Bengali tawng vek hian, pai fe mai hian, ‘ Tlangram hla tak atangin ka lo kal a. Zanina riahna tur ka mamawh a. A theih chuan, naktukah ka ha hi en tir ka duh bawk. Chubakah, a fala inkawmna hun neih ka duh bawk’ a ti a.

Theih anga tanpui ka intiam hnuah a riahna tur pindanah kan inhruai a, a tuka inhmu leh tur chuan kan inthen ta a.
A tuk zinga a lo lan leh chuan, lungi lam chu a inthuamna a ni ta lo. Suit leh necktie nen a rawn induang ta zaih thung a. Bengali chibai inbuk danin, “namaskar” kan inti a. Chumi hnu chuan, saptawng nalh tak maiin imkawm fal a duh thu min hrilh ta a. Mi zahawm tak tu emaw chu a ni ngei ang tih chu ka ring nghet nghal mai a.

Ka ring dik kher mai! Mizoram Kristian sawrkara ‘senator’ a ni tih chu a inpuang ta a ni. India lakah independence an sual dan chanchin a sawi chu darkar tam fe ka ngaithla a. Krista a lo hmuh dan chu sawiin, India mite tana Kristian thuziak tam tawk sem tur a mamawh thute a sawi a. A sawizel dan chuan, zalenna an sualnaah Silai aiin Bible an mamawh zawk a. India hi chanchin tha avanga Krista lam an lo hawi chauhin hneh theih an ni a. Heta tan hian Pathian thuziak leh chanchin tha hril chu a pawimawh ber a ni tih thu a sawi”

Jay Walsh-a hian senator a nih dan vel a zawh chhunzawm a. “India milem be hoin an awp avangin an thin a rim a, Milem be sawrkar paih a. Kristian sawrkar din kan tum a ni” tiin Malsawma colney hian a chhang a ni.

Jay Walsh-a nena an titinaa thil chhinchhiah tlak tak mai chu, Malsawma Colney hian Bible a dah san zia te, chanchin tha a dah ropui ziate a hmuh theih a. Zalenna suala, silai cheleka ramhnuaia a chhuak chung khan, India hneh theihna tur tak tak chu, Chanchintha leh Bible hmang chauhin a ni a han tihte hian a rilru puthmang chu a chiang mai awm e.

Ramhnuai sawrkarin Kristianna leh chanchintha hrilna lama an hmalak dan te, harhna an chan dan te chu sawizui tur tam awm mah se, chai zui ta lo ila. Ka ngaihtuah fo thin chu, kan kum ang rual bawr a nih, thalai a nih lai pawhin Chanchintha leh Bible kha a nun laipuiah a dah a. Malsawma khan Lal Isua a zahpui ngai lo. Keini khawsak dan hi chu chumi letling hlawk chu a ni hian ka hre thin.

L. Malsawma Colney chuan, kum 88 mi niin, a lo zawn thin zalenna chu a famkima changturin a hmangaih Krista hnenah Ni 27.1.2019 tlai dar 4:50 khan a chawl hahdam ta a ni.

Ni 19.2.2020-ah Mizoram Sawrkar Pawisa kum thar lo awm tur atana pawisa hman tur chu. Mizoram Chief Minister, Finance Minister ni bawkin a pharh ta a. Tawitein I han chai ve teh ang.

BUDGET PUMPUI: kum 2020-21 chhunga Sum hmuh leh hmanna tura ruahman chu Rs. 10,081.01 crore (Cheng Vaibelchhe Singkhat leh Sawmriat Pakhat leh Nuai Khat) a ni a, kum 2019-20 chhunga sum indaihlohna phuhrukna atan Rs. 3398.13 crore (Cheng Vaibelchhe Sangthum Zathum Sawmkua Pariat leh Nuai Sawmpathum) a dil belh pah bawk.

HMUH BEISEINA
Revenue Receipts:

1. Kan thawhchhuah ve tur: Kan State chhung bika chhiah hrang hrang atanga hmuh beisei chu Rs. 661.69 crore a ni a, 15.34% in a pung a. Hei bakah hian Non- Tax Revenue atangin ` 583.07 crore hmuh kan inbeisei a, chu chu 26.95% zetin a pung dawn a ni. Tichuan, State’s Own Tax leh Non-Tax hnuaia sum hmuh tur belhkhawm chu Rs. 1244.76 crore a ni dawn a, a punna chu 20.50% a lo ni ang.
2. Tax Devolution:Sorkar laipuiin nakum 2020-21 chhunga Sawrkar laipuiin kan hmuh tura a rawn tarlan chu Rs. 3967.96 crore a ni a, 2.13% in a pung a. State sawrkar chuan 10% a sânga a pun an beisei a. An beisei a phalo hle a ni.
3. Grants-in-Aid: Fifteenth Finance Commission-in kan State Sorkar tana Grants a ruahman chu Rs. 1968.00 crore a ni a, kum kal mêka kan sum hmuh tur aiin Rs. 748.00 crore lain a hniam a ni. “Hei hi Finance Commission hmasa in a lo recommend ai pawha a hniam zawk ngial avangin beisei loh dan tak a ni a, Mizoram tan chuan thil lawmawm lo tak a ni,” tih tawngkam Finance Minister hian a hmang a ni. Kan rin ai hian, central lam atang hian thil a awlai lo a ni. Hei bakah hian Grants dang dang atangin Rs. 185.00 crore hmuh a ni bawk ang.
4. Centrally Sponsored Schemes (CSS) leh Externally Aided Projects (EAPs): Centrally Sponsored Schemes leh Externally Aided Project atanga pawisa hmuh beisei zawng zawng chu Rs. 2033.39 crore a ni a. Tin, NLCPR, NEC, ST Welfare Grants leh Central Road Funds atangin Rs. 385.85 crore beisei bawk a ni.

Tichuan kum 2020-21 chhunga Revenue Receipt hmuh tura ruahman zat chu ` 9784.96 crore a ni.
Capital Receipts:

1. Internal Debts: Hmun hrang hranga atanga sum pûk tur ruahman zat chu Rs. 875.03 crore a ni. He Internal Debts hian a huam te chu – Market Loans atanga beisei Rs. 680.00 crore; NABARD Loan Rs. 170.00 crore; National Co-operative Development Corporation (NCDC) Loan Rs.10.00 crore; Rural Electrification Corporation (REC) atanga pûk tur Rs. 5.00 crore leh Power Financing Corporation (PFC) loan Rs. 10.00 crore te an ni.
2. Loans and Advances: External Aided Projects (EAP) loan portion leh kawng dang atangin Rs. 13.85 crore hmuh kan beisei.
3. Recovery of Loans and Advances: Sorkar hnathawkte leh Co-operative Societies te’n loan an rulhna atangin ` 41.16 crore an beisei bawk a ni.

Capital Receipt atana hmuh beisei zawng zawng chu Rs. 930.04 crore a ni a, 10.02% in a pung.

SUM HMUH TUR ZAWNG ZAWNG: Revenue Receipt leh Capital Receipt atanga sum hmuh beisei zawng zawng chu Rs. 10715.00 crore a ni a. 2019-20 aiin Rs. 22.70 crore in a sang a ni.

REVENUE AND CAPITAL EXPENDITURES:
Revenue Expenditure:

1. Revenue expenditure han tih chuan Sorkar hnathawk hlawh te, pension senso te, Interest payment te bakah sector lian tak tak Education te, Sports te, kawngpui enkawlna te, power leina te, tui supply-na te, buhfai leina te, District administration te, Secretariat enkawlna te, Police te, Jail enkawlna te bakah State-in hmasawnna ruhrel (infrastructure) a lo din leh siam tawhte enkawlna te a huam vek a ni.
2. Revenue expenditure atana sum hman tura ruahman zawng zawng chu Rs. 9021.85 crore a ni a, chu chu Budget estimate pumpui atanga 84.20% a ni.
   Capital Expenditure:
3. Capital expenditure hi a tlangpuiin mipui tana hmasawnna ruhrel dinna hrang hrang – land and building te, kawng leh lei te, infiamna atana hmunhma siam leh hmanraw tha chhawpchhuah te, tui lakna lama hmalakna te leh bungraw lian tham leina atana hmante hi a huam a
4. Capital expenditure atana sum ruahman zawng zawng chu Rs. 1693.15 crore a ni a, chu chu Budget estimate pumpui atanga 15.80% a ni.
   Tichuan, kum 2020-21 atana Revenue leh Capital huamchhunga atana sum hman tura ruahman zawng zawng chu Rs. 10715.00 crore a ni.
   Sum sem sawmna:
5. Sum sem sawmna tura am ruahmanna chipchiar chu tarlang lo mai ila. Social Services Sector kan tih. Education, Health. Water supply , sanitation, District Council leh Social welfare te insem turin Rs 3659.07 crore an dah a, chu chu Budget pum pui a\anga 34.15% a ni. Education leh health hian an chan tam vak hmel loh viau mai.
6. SEDP atan Rs 51,300.00 lakh an ruahman.
7. SEDP hnuaiah Kawng siam leh enkawlna turin kum tharah Rs. 8,000.00 lakh ruahman a ni. SEDP hnuaia road maintenance atana sum an dah bakah a tul anga kawng enkawl nan leh tihhmasawn nan PWD hnuaia Road Fund Board in an hman atan Rs. 4,000.00 lakh chu ruahman a ni.
8. Mizoram Sate Healh Care Scheme atan Rs. 2,000.00 lakh chu an dah.
9. Youth developments atan Rs. 300.00 lakh leh Sports tihhmasawn nan Rs. 500.00 lakh ruahman a ni.
10. Ruihhlo-in a tihbuaite enkawl nan Rs. 500.00 lakh ruahman a ni.
11. Parking House Support Scheme (PAHOSS) chhunzawm nan Rs. 1000.00 lakh dah tura ruahman a ni.
12. Autonomous District Council pathumte tan hian Rs. 45,106.59 lakh ruahman a ni a, a punna rate chu 12.47% a ni. Finanance Minister hian “Hei hi State Sorkar Budget punna rate atanga chhût chuan a sang hle a ni. “ a ti a . “Mizoram sawrkar sum dinhmuna thalo chungin” ti sia Engvanga tipung chiam nge a ni tih chu ka va hre mai tawh bik lo. Hei bakah hian Sinlung Hills Council leh Sialkal Range Development Council-te tan Rs. 785.83 lakh ruahman a ni bawk

THU KHARNA

1. Kumin Budget atanga thil lang chiang chu, Sawrkar laipui atanga kan sum hmuh tur a tlahniam vak. Finance Minister pawh a hnual. State-in theih tawp a chhuah angai dawn. State sawrkar sum dinhmun a that loh thu pawh a sawi nghe nghe.
2. Mipuiin chhiah kan pek a pung dawn a nih hmel.
3. Budget sawi ni khuaa sawi dan dik tawk lo awm thin chu, Revenue exopenditure sang hi sawisel a ni thin a. A sawi uar zual chuan, sawrkar hnathawk hlawha ti zat hi kal thin anginan sawi biah biah thin. Sawrkar hnathawk hlawh vek a nilo. A chunga kan sawi tawh ang khian, Sawrkarin a in sak, hmasawnna tura a siam pawh a enkawl zuina atan revenue expenditure hi hman a ni thin. Capital assests kan neih te enkawl zuina hi a ni thin, A sang lo theilo ve bawk. Kan in sak, kan contract inpekna hna tam tak hi, state in sum a hmuh lehna, sum chang thei hmalakna a ni em? Tih zawhna inzawh zawk tur a ni.
4. Tin, tun hnai deuh atang khan Centrally Sponsored Scheme hrang hrang hnuaia Staff-te hlawh an pekna thin thenkhat chu Central Sorkar-in a titawp a, chungte chu State Sorkar-in an lo tumsak vek rih avangin Revenue expenditure pawh hi a san phah hle bawk a ni.
5. Kawng erawh an ngai pawimawh viau mai a. Kum khat chhunga kawng enkawl leh buaipuina tura an dah a sang viau. Hei hi chu thil lawmawm tak a ni. A nihna ang takin kawng hi siam a ni turah ngai ila.

Sawi zui leh chip zui chu chakawm viau mah se, Budget hi mipui nawlpuiin kan hrethiam vak thin lo a. Hriat thiam awl zawng deuh turin ka han sawi mai mai a ni. A la fiah lutuk lo mai thei e. Critical review chu mahni theuh kutah ka dah e.

Pu Kapkima Sikul kan ti mai thin a, Govt Middle School-1 Bilkhawthlir, kum thum ka kal a. A nuam kan va han ti thin tak.

Khatih laia kan zirtirtu tam zawk kha an pension tawh a, a then phei chuan, Lui ral min kaisan tawh a ni awm e, ka hmuhlohna leh a chin ka hriat lohna a rei tawh em mai a.

Pu Kapkima, Pu Rk Malsawma, Pi Ruati, Pu Sanghmingthanga, Pu Liantluanga , Pu Mawia , Pu Sawma te ho kha Min zirtirtu an ni a. Pi Ruati kha kum thum kan kal chhungin, vawi hnih a rai a, Hindi hi ka thiam tur angin ka thiam loh phah vek niin ka hre thin a. Chuti chung chung chuan, Hindi ziah leh chhiar kha chu ka thiam em em a, Kum tam tak a liam hnuah, NEPA a Basic Course kan training pawhin Hindi subject-ah chuan Full Mark 50-ah 49 ka la hmu pha a ni. Pi Ruati min zirtirna vang liau liau kha ni.

Pu Sanga khan English a la thin a. Grammar min han zirtir a. Board Examah Letter ka hmu pha hial nghe nghe. Pa thinchhe tak anga kan ngaih, ngainatawm fu si kha a ni a. A ngaihawm ta mai mai ngawt mai.

Pu Malsawma, kha a titi a ngaihnawm a. Bilkhawpui chanchinbu kha a enkawl pah thin a, sikulah khan a chhu fo mai a. Khatih lai atang khan thuziah ka ching tan a, thu min ziah tir a, a chhutna hmunah min awm tir ve a, a hnen atang khan thil tam ka zir a ni. A fapa Lalvena nen kan inkawm thin a. An chengkek huanah te pawh khan ka kal fo nghe nghe. “Til leh Hnap a inbuk tawk chiah” tih kha a sawi thin.

Kan Peon kha, Pu Ranga a ni a. Sipai pension, ’71 war veteran a ni. Min duat thin khawp a. Chhun chawlhah an inah min hruai a. Thingpui leh eitur min pe thin a. A sipai discipline ngai kha a vawng reng thung a. Engvanga min duhsak em em nge a nih kha ka hre lo na a, Pa fel tak chu a ni ngei e. Ka hre reng ang.

Pawl 5-ah Lalbeiseia nen kan thu dun thin a. A hnu lamah chuan, a nau Zopuia nen kan thu dun leh a, Terema kha kan tlarah a thu thin bawk a. Zopuia chu sipaiah a tang ta a, ka hmu zui ta ngai lo.

Zirtirtute khan min hrem fo. Lungawilohna leh lunglohah kan la lem lo. Min hrem zo a, min hremni a liam a, kan theih nghilh leh mai. Kan zirtirtute kha huatna kan nei lem lo a. Min hremnaah khan hremnawn nih tawhloh kan tum mai a. Kan nu leh pate pawhin min hrem tih pawh an hre ngai lem lo. Mipa fa ngang kan ni a, min han hrem ve pawh khan, a turah ngaihna chen kan nei niin kan hria. TIn, hrem han nih chhak kha pa riaua hriatna kha kan nei ve bawk a ni.

Vawikhat chu, Tuitha Venga mi niin ka hria, Valpuia khan, Lalhungchhungi lehkha a thawn tur kha min ken tir a, Mikado phekah khan a ziak a, a thlep tein, a lehkhaah tho khan a bilh lut leh tat a. Lalhungchhungi hnenah khan tha tak khan ka pe ve mai bawk a. A chhungah khan enge a ziah ang tih kha chu hre thiam mah ila, ka chhiar lem lo a. Ngawi rengin, a thawnnu kha ka pe ve mai. “A hmasaiin zing ni chhuak hi ka chibai bukna che ni sela” tih hunlai kha a ni a, khangte kha chu a ziak tel ngei ang.

Pawl 7 kan nih khan, kan zirlai kan zir zo tawh si, Revision kan nei sek a, ka ngaithla ning thin khawp a. “Ngaithla peih tawh lo in awm em, pawnah lo va break mai rawh u”, Pu Sanga khan a ti a. Lawm deuhin ka chhuak a. Pu Sawma Craft Teacher khan min lo hmu a, Thingzai pu tura kal tur kha a ni a. Phur fein ka zui ta a. Vengchep leh Dawrveng inrinna lai vela Thingzai khawl nei teinah kan han kal a. Anni kha an hming ka hre tawh lo. Kan han pu vang vang a ni.

Zirtawpni tlai a piang khan Game period a ni a, kan inkhel tak tak ziah a, a nuam kan va han ti tak. GSA khan, Sub Junior tournament a siam thin a. kan team Halkey Football Club kha kan chhuak ve thin. Bilkhawthlir Police Outpost a 2 OC Pu Zuia, ASI khan kan senso tur te kha min tum sak thin. Jersey sen kan ha thin a, khawia mi nge mawni kan hawh thin kha ni.

Hnathawhni kha a awm a, hna kha kan thawk tak tak thin a, lehkha zir ai khan a nuam fe zawk reng bawk a. Kan Sikul kha tlangah a awm a. A hnuai kha Bilkhawthlir Playground kha a ni nghal a. Game Ni te, Hnathawhni te khan, kan inkhel tak tak a, hna kan thawk tak tak bawk. Khangte kha kan thanchhoh zelnaa kawng pawimawh tak a lo ni reng mai.

Pawl rualpuitea a naupang pawl kha kan ni thin a. A kum ang zawng phei chuan, ka lo naupang ber hial thin angem aw, te ka ti leh ta mai mai. Kan pawl rualpui emaw, kan chung chiah te emaw kha chu an nulain, an tlangval riau khan ka hre mai thin a. Football Tournament khelh ni khua pawha Senior teama tel pha kha an ni nawk thin.

Tam tak kha chuan, ngaihzawng an nei tawh a. A hunlai thlir let khan,a awm lohna em em pawh a awm chuang lo a. Tleirawl chho uk uk kha an ni tawh thin a. A ngaihna hre ve chiah lo tawk kha kan lo tei ve mai mai bawk a.

Mi aiawha rawn kal thin, U Mapiana kha a fel thin khawp a. thil min tihpui peih a, a taima si a. Sikul chawlhah te khan a inhlawhnaah min hruai a. Chhang ur te khan a inhlawh pah a. kan kal ve zel a. Chhang urnaah khan cheng 5 vel hlawh te khan eng engemawni kha kan va ti ve thin a ni.

Kan Hindi Zirtirtu Pi Ruati te huanah Kuhva tla kan chhar thin a. Anmahni vek khan min leisak leh a. Pathum cheng khatin ni tain ka hria, min leisak thin kha. Mahni duhzawng engemaw leina khawp kha chu, kuhva chhar te, Tuichawite khan kan inhlawh thin a. Pu Ruati bawk khan kan tuichawi te kha a lei a. Ka ngaihtuah let a. Khang zawng zawng kha a mamawhna awm reng reng hi ka hre ta hauh lo. Mi Naupang mai kha kan ni a, hnathawha hlawh neihna tur kha min siam sak thin a ni ta maiin ka hria.

Kan headmaster Pu kapkima te khan lehkhabu an nei teuh mai a. An inah min hruai a. Min chhiar tir thin a. A Nupui, Nu Engtei lehkhabu, MnB zawng zawng nen khan ka chhiar a.

Ka sikul kalpui thin, ka classmate te, classmate chiah lo, a hunlaia kal ve thin te kha engtin awm ta zel ang maw. A lo rei ve ta. Kan sikul te, Bilkhawthlir te, khang hunlaia ka thiante kha ka hmuhlohna a lo rei ta e.

Hetiang thilte hi, ka hriatna ata an kalbo mai lohna atana ziakin ka han dahtha a nih hi. Nakinah ka faten kan sikul kallai chanchin hi an lo la hriat ve nan.

UNION BUDGET 2020-21

February Ni 1, 2020 a ni a. Union Finance Minister-in Union Budget a pharh a. Indian Economy chhiat em em lai a ni a. He budget hian engangin nge a nghawng ang tih chu sawi fe tur a awm ang a. Kan sawi thui hmain Middle Class te mil tura budget hi siam a ni tih han sawi ta ila.

Kumin budget kan sawilan hmain Budget kaihhnawiha kan hriattur tul leh a kaihhnawih thil pawimawh han sawi hmasa ta ila.

1. EXPENDITURES AND RECEIPTS: Budget-ah hian hlawm hnih pawimawh tak a awm a. Chu chu Expenditure leh Receipts a ni. Plan leh Non-Plan Expenditure head a then thin kha, September, 2016 a Cabinet Meeting-in tih tawp a rel a, 2017 Budget atang kha chuan hman zui a ni ta lo a ni. Railway Budget a hranga pharh thin pawh, nikum atang khan tih tawp a ni bawk a, kum 92 zet an lo kalpui tawh chu an ti tawp a ni.

Expenditure hi Capital Expenditure leh Revenue Expenditure-ah then a ni a. Capital Expenditure chu ro tling thil kawng siamna te leh Loan puk rulhna atan te a hman a ni a. Revenue expenditure chu, Inrelbawlna leh Hlawh atana hman a ni thin.

Receipts pawh hi Capital Receipts leh Revenue Receipts-ah tho then a ni thin a. Capital Receipts chuan, ramchhung leh ram pawn atanga pawisa pukte, State sawrkarin an leiba an rulhna te, Sawrkarin Company a enkawl thinna a sumsen a tih tlem/tih bo (disinvestment) te te a huam a. Revenue Receipts chuan, chhiah atanga sum hmuhte, sawrkar enkawl company atanga a sum hmuh te leh Telecom license fee atanga a sum hmuh te (service provider ho atangin percentage bituk awmin chhiah lak a ni thin. Eg:-Airtel atangin an sum hmuh help atangin cheng chute zah chu an pe ang etc)

Heng hi Full Budget-a hmuh tur awm chin a ni a. 2018 Union Budget hi tun NDA sawrkara Full Budget hnuhnung ber a ni ang. Election kumah chuan, Election hmaa hman turin sum ruahmanna an pharh a, Vote on Account a pass a ni thin a. Sum hmuhna telloin a hmanna tur chauh pass a ni thin a ni.

1. FISCAL DEFICIT TARGET: Budget-ah hian thil pawimawh tak pakhat awm chu Fiscal Deficit target a ni a, Gross Domestic Product atangin za zelah (in percentage)-a chhut a ni thin.

Fiscal Deficit tih awmzia chu, Sawrkar sum hmuh leh hmanna inthlauhna a ni. Hetah hian Puk atanga sum hmuhna an chhiar tello thung.

1. BUDGET PHARH HUN: 2016 thleng kha chu, Budget an pharh hian, February chawlhkar hnuhnung berah an pharh thin a. 2017 atang chuan, Fenruary thla ni hmasa berah an pharh ta thin a ni.

Tun hma chuan, Tlai dar 5-ah Budget hi an pharh thin a. Yashwant Sinha hunlai atangin chawhma dar 11-ah Budget hi pharh a ni ta thin a ni.

February thla khera Budget an pharhna chhan chu, Sawrkar kum thar April thla atanga harsatna awm miahloa lo in peih hman a nih theihna turin a ni.

1. BUDGET RUAHMAN A NIH DAN: Budget Ruahmannaah hian a buaipuitu ber chu Finance Ministry an ni a, pa chanchang a an buaipui angai a ni. Sawrkar kumthar a lo thlen hma thla 6 velah, September-October thla velah Administrative Ministry hrang hrang (Home, HRD, Defence etc) hnenah Kum thara an sum hmantur ruahmanna te thehlut turin an ti a. An niin uluk ataka an lo ruahmana an thlir hnuah, Finance Minsitry-ah an theh lut a. An niin uluk takin an lo thlir a, administrative Ministry te nena ngaihdan inang lo an lo neih chuan Administrative Ministry lampang hian Union Cabinet-ah an theh lut a, anni thutlukna chu thu tawp a ni. Chumi hnu chuan, Finance Ministry chuan, sum hmanna tur chungchanga ruahmanna tawp an siam ta a. Sum hmanna tur mil hian hmuhna tur an ruahman leh a. Chhiah kaihhnawih thil a nih chuan, chhiah lam pang buaipuitute Central Board of Direct Taxes etc te nen an inrawn tlang thin. Budget an peih fel hnuah Cabinet hmaah an pharh a. Cabinet-in an pawm hnuin, Parliament-ah Budget hi pharh a ni ta thin a ni.
2. BUDGET HMAN THEIH A NIHNA TUR A KALKAWNG: Finance Minister chuan Budget a pharh rikngawt hian a hman nghal theih ngawt lo a. Paltlang tur tam tak a la nei a ni.

Finance Minister-in a pharh a a. Chumi hnuah sawi ho a ni. Parliament in hnihah sawi ho a ni a. hemi hian ni li ni nga chu a awh a. Chumi hnuah an han chawl a. An chawlh chhungin Parliamentary standing Committee hrang hrangin ministry hrang hrang sum hman duhdante chu an han thlir lehin, an zir chiang a. An thlirna chu an ziak a. Parliament in hnihah an thlen leh a. Parliamentary Standing Committee hi 17 a awm.

Departmental Standing Committee thlirna eng atang chuan, Demand for Grants (Sum hman phalna leh hman zat tur) chungchangah Vote an thlak ta thin a. Hemi Vote thlakna hi chu Lok Sabha chanpual liau liau a ni a, Rajya Sabha chuan an ti ve thei lo a, an sawiho ringawt thei a ni. Demand tin hi sawi ho a ni a. Sum hman tur ti tlem tur pawhin member ten an phut thei a. Chu chu ‘Cut Motion’ an ti. Cut Motion hi chi thum a awm leh a. Disapproval of Policy Cut Motion, Economy Cut Motion leh Token Cut Motion te.

Demand for Grants atana vote pek hun chhung hi ni 26 a ni.

Appropriation Bill pass leh a la ngai a, sum hman phalna tihna a ni mai. President-in a hming a sign hnuin, appropriation act a lo ni thin. Hemi hnu hian Finance Bill angina a kal leh a. Chu chu an pass hnuin Budget chu hman theih a lo ni ta a ni. Appropriation Bill hi chu sum hman phalna tiin sawi ila, Finance Bill hi chu hmuhna tura hmalak phalna tiin sawi ila a fiah mai awm e.

1. BUDGET TOBUL: Saptawng thumal hlui, ‘Bougett’ tih atanga lo kal a ni a. British Chancellor of Exchequer-in sawrkar kum thar lo awm tur atana pawisa hman tur ruahmanna a siamna lehkha khainan savun Ip a hmang thin a. Chumi sawina chu a ni a. Sum hman tur ruahmanna ziahna lehkha sawinana hman a ni chho ta a ni. 2020-21 Budget chu

CHHIAH:

1) Income Tax rate tih hniam a ni. Mizorama miten kan pek ve lem loh avangin Tarlang lo mai ila.

2) Companies ten Dividend Distribution Tax (DDT) an pek angai tawh lo ang.

3) Aadhaar card hmanna tur thil an sawi leh nual bawk.

ECONOMY AND FINANCE

1) Bank deposit insurance chu ₹1 lakh atangin ₹5 lakh-ah pawisa dahtu(depositor)pakhat zel tan tihpun a ni.

2) Companies Act siam that tum a ni.

3) LIC a sawrkar chanvo thenkhat chu hralh tum a ni.

AGRICULTURE:

1) Agriculture kaihhnawiha hman turin ₹2.83 lakh crore dah hran a ni.

2) 2022 chuan lo neitute sum lakluh chu a leta tihpun hman tum a ni.

3) Tui harsa zual district 100 puihna tur ruahman a ni.

4) loneitu nuai 20 vel kawlphetha etc tur ruahman sak an ni.

5) Thingtlang khuaah Vantlang buhzem siam a ni anga. Hmeichhe self Help group ten an enkawl ang.

HEALTH LAM

1) ₹69,000 crore dah a ni.

2) Swachh Bharat agan ₹12,300 crore.

3) Khawpui thenkhatah PPP modein private hospital siam a ni ang.

EDUCATION

1) ₹99,300 crore chu education sector atan dah a ni.

2) ₹3,000 chu skill development atan.

3) online education lam hmasawnna tur ruahmana a awm.

4) National police university leh national forensic science university siam tum a ni.

INFRASTRUCTURE

Inkalpawhna tha zawk siamna turin ₹1.7 lakh crore for dah hran a ni.

National Logistics Policy pho chhuah thuai a ni ang.

Indian Railways tan ni zung chakna hmanga kawlpetha siamchhuahna lian zawk siamtum a ni.

Bengaluru suburban rail project ₹18,600 crore senna tur ruahman a ni.

national highways 12 zet chu 2024-ah chuan sum siamna atana hman tawh tum a ni.

2024-ah Airport 100 dang puitlin hman tum a ni.

KHARNA

Economist ho beisei a phalo ang reng hle niin a lang a. A thatna emaw, thatlohna emaw lam chu sawi ve vaklo ila. Indian Union Budget thleng hian kan ngaihven a, kan inzir a. Kan politik khawthlir ken tel zingah tel tir ve ila a tha awm e.

Phurthut leh kan la sawi ve leh mahna.

Kohhrana mi hmasa biru leh tangkaite tih bu hi synod Literature and Publication Board chuan a ti chhuak a. Mizoram Presbyterian Kohhrana mi langsar ber ni lem lo, kohhran tana tangkai em em site leh kohhran ban pawimawh tak tak chanchin an ziak khawm a ni.

Upa K. Saibela, Upa Lalrammawia Lungen, Upa CL Thansanga, Upa HK Dohnuna, Upa K Malsawma leh mi dang engemawzah chanchin an ziak a ni. Upa Lalrammawia Lungen tak hi chu ka hriatna a rei tawh a. Siamkima khan, zalenna Ram kha Upa Lalrammawia Lungen tan hian a hlan a. “Who encouraged me to write this book” a tiin ka hre ta. A bu hi ke keu peih chiah tawh lo.

Ruantlanga kan awm laia kan upa senior Upa Lalawia pawh a lo awm vang mai. Upa Lalawia hi Pathian tana a inserhhranna leh kohhran a hmangaihna te hi ropui tak a ni.

Kohhranah hian mi langsar lem lo, ban pawimawh tak tak an awm a. Mi langsar tak tak ai pawha kohhran tana tangkai leh thawhhlawk te pawh an ni fo zawk.

Kohhranah chang lo, khawtlang leh ram rawngbawlnaah pawh mi buru tak tak, mahse,ban pawimawh an awm thin. Heng mite hi kan innghahna leh kan chakna an ni fo thin.

Mi thenkhat chu hriatlar an hlawh a. An langsar em em a. Thenkhat chuan, langsar lo tein hna an thawk a. Khawtlang tan, kohhran tan leh ram tan hna ropui tak an thawk thin.

Khawtlang leh kohhrana rawngbawlna te, ram tana rawngbawlna te hi a langsar leh ni hup hup, mi chibai luai luai hlawh lo zawng hi a awm ve treuh mai. YMA ah a ni emaw, KTP ah a ni emaw, kohhran thalaiah te pawh OB chelh lem lo a, mi tangkai tak tak an awm thin. Mi thenkhat kohhran upa ni ngai lem lo, leh ni ngai lem lo tur kohhran ban pawimawh tak tak an awm fo. Rawngbawlnaah hian a kila lungtangkai nih te pawh a tul fo a ni.

Chanvo ropui an chelh loh avangte, ram pum huapa lam chhuah an hlawh ngai lem loh avangin mi hi an hlu lo tihna a ni lo. An hlu em em zawk a ni.

Mi thenkhat hi chuan chanvo am khel fo emaw tih tur a ni a. An duhzawng ang nih loh chuan an lawm lo fo bawk.

Leadership ah hian Leading from the back tih hi a awm a. Chinghne rual awmdan hi chutiang chuan an sawi fo thin. Chinghne zinga a chaklo leh tar zual hi a hma berah an kal tir thin a. An hnung chiahah an zinga a chak leh huai hote hi an kal tir a. An hmaa mite kha an vengin an chhan thin a, an hnungah chuan mi dang ho an kal leh a. Chinghne rual pangai an ni. An hnung lehah chuan chinghne huai leh chak rual an kal leh a. A laia mite chu engti kawng zawng pawhin an veng vek hrim hrim tihna a nih chu. A hnung berah an hruaitu ber a kal thin a. Tumah an kalsan lohna turin theih tawp a chhuah a. Khawihmunah pawh rawn bei se, an beihna lai zawnah a tlan thuai thin a ni. Mi thenkhat chu an pawl hruai ngaihtuah lek loa kal fal, mahni himna leh lansarhna ngawt um an awm thin a ni.

Nelson Mandela khan, hruaitu nihna chu hetiang hian a sawi bawk. Ramin hun harsa a tawh laiin theih tawp chhuaha bei a, ramin hun hahdam a tawn chuan amah a intarlang ngai lo tiin. Hun nuam leh hahdama tlar hma chuha , hun hrehawm biru thin mihring a awm theih thin.

Upa Lalrammawia Lungen te ho chanchin ka chhiar khan hetiang te hi ka rilruah a rawn awm a. Ka han ziak chhuak ta a ni.

Mi biru entawn tlakte hi kan ngaihsan a, an hlutna kan hriatsak fo a pawimawh.

World War I veteran, Oxford chhuak, London School of Economics-a zirtirtu lo ni tawh, British Prime minister hlui Clement Atlee kha pa ngawi chawi leh inngaitlawm tak mai a ni a.

Indopui pahnihna lai khan Tangrual sawrkarah Churchill-a prime minister na hnuaiah deputy prime minister a ni a. Indopui pahnihna a lo tawp hnua inthlanna hmasa berah chuan prime minister a ni a. Hemi terma prime minister a nih lai hun hi miin an han thlir kir a. Tam tak chuan, Prime Minister ropui berah an ngai a. Mi thiam 139 in kum zabi 20-na chhunga British prime minister hlawhtling berah an thlang ta nghe nghe a ni. Winston Churchill te, Margaret Thatcher te pawh kum zabi 20-na chhunga Britain PM an ni.

A PM hunlai aiin tun hnu hian an ngaisang daih tawh zawk a ni.

A damchhung hun leh Politics a khelh lai hun kha chuan pa inngaitlawm leh thawmzawi, mahni intarlang lo mi, mipui chawimawina leh fakna zawng lo a, mahni hna tha taka thawk ngar ngar mai a ni a. An hriat larna ber pawh, mi inngaitlawm leh mipuia intihlar tumlo tih a ni.

A PM hunlaia a hnathawh dan pawh, Commitee Chairman ang hi a ni a, an ti. Chuvang chuan, a tha em em reng a ni, an ti. Lang lo lamah, commitee a thil ngaihtuahnaah te, a hriatna riltak mai te, a ngaihtuahna fim leh a ze damthlup mai te, a thil thlir thiamna te chu a pawimawh em em thin a ni.

Britain chu welfare state-a a hruailuh dan te, Labour Party a kaihhruai dan te leh Cold War hunlaia stalin-a a ep dan te chu tun hnu hian ngaihsan a hlawh leh zual. Tunlai Britain hi ama siam a ni, tiin an sawi thin.

Lehkhabu 8 a ziak a. Pakhat chu, memoirs niin As it happened tih a ni.

Maragaret Thatcher pawh khan Atlee a ngaihsan thu chu heti hian a ziak a, ” Clement Atlee erawh ka ngaihsang hle. Mi tak tak a ni a. Ram leh hnam hmangaihtu a ni. 1990 chhoa Politician te nen chuan danh tak a ni, mahni inpholang leh tarlang mi a ni lo a, hna tak tak thawk mi a ni” tiin.

Mizote pawh hian, Mipui khel chi kan ngah hle. Mipui khel chite hi chuan hna thawh tha mang an nei lo fo zawk. Kan mi ngaihsan tam tak hi mi ngaihsan leh fak hlawh tuma hman hlel an ni fo. An hnathawh han en a, chuti teh lua lo an ni fo.

Clement Atlee chu a rei tual tual a, a hlutna leh ropuina a lo lang thuk tial tial a ni.

Kumthar chibai ule…