LALPA BERAM HOTE CHU (The Ninety and Nine)

KHB 183-na tluka Pathian Khawngaihna leh ngaihdamna sawifiahtu hla hi a awm angem? He hla chheh vel hi i han thlir teh ang.

GEORGE CLAPHANE, ZU NGAWL VEI: Fergus, Ontario, Canada-ah chuan thlan khawhar tak pakhat a awm a, chutah chuan George Claphane a ruang chu zalh a ni.

1842-ah George Claphane-a hi Canada-ah a pem a, Lo zau tak a nei a, hmalam hun thlirin theih tawp chhuahin a bei a. Mahse, a lo neihna kawngah chuan nasa takin a hlawh chham a, a beidawng chuan nasa takin zu a in phah a, a zu in chu a thih pui ta nge nge a.

A unaunu pawh, George a thihna hian a khawih hle a. Elizabeth Claphane-I chuan, poem pakhat a phuaha, chu chu Pathian mi pakhat suala tlu Pathianin a zawn chhuah leh tak thu a ni, Chu chu, Lalpa beram hote tia kan hriat tak hi a ni a. A thih hnuah chauh khawvel hriatin a lar chhuak thung a ni.

A poem phuah chu, The Children Hour-ah tih chhuah hmasak ber a ni a, chanchinbu hrang hrangah tih chhuah leh chhawn a ni.

BERAMPU MOODY LEH SANKEY:

Moody
DL Moody

Kum zabi 19-naa Evangelism chanchinah chuan, DL Moody-a leh IRA.D. SANKEY-a hi an langsar ber awm e. DL Moody a crusade neihna a piangah IRA SANKEY hi a zai thin a ni. Sankey hi zaithiam a ni satliah mai lo a, hla phuah thiam a ni a, rimawi tum thiam em em a ni bawk.
He hla thu lo pian dan chu a chungah kan sawi tawh a, Sankey-a ka ngei atangin, Hla a lo nih tak zet dan I lo ngai thla teh ang.

sankey
Sankey

“Kum 1874 Khan , “The Ninety and Nine,” tih hla hril chu hmuh chhuah a ni a, a thluk siam a niin, khawvel pum huapa rawngbawlna kawnga hmanraw tangkai tak a lo ni ta a ni. A hlathu hmuh chhuah dan hi tih palh thilthu liau liau chu a ang na a, Pathian hnen atanga lo thleng a ni, ka ti lo thei lo.. Pu Moody-an Glasgow khuaah hetih hun lai hian Pathian thu hrilin hun enge maw chen a hmang a, zaia rawngbawlin keiin ka lo pui ve char char bawk a. Edinburgh pan turin Glasgow rel chawlhhmunah kan awm a, Hetah hian Rawngbawltu rual hoin Nithum chhung inkhawm an buatsaiha tel tur kan ni a, chumi zawh chuan Scotland ram ril zawk kan pan dawn a ni.

Glasgow-ah hian thla li zet rawng kan bawl a, chumi hma thla thum chhung chu Edinburh-ah hian rawngbawlin hun kan lo hmang tawh tho a. Rel chhung kan luh dawn chuan, Kartin Chanchinbu pakhat hi ka lei a. Rela kan chuan hian Second class-ah emaw, Third Class-ah emaw kan chuang tlang pui a. hemi tum erawh hi chuan Glasgow-a kan rawngbawlnaah kan lo chau deuh bawk a, chawlh handam pah kan duh a, First Class ah kan chuang a, hun thawl reh deuh reih rawih kan duh vang a ni. America ram chanchin tharte a awm takin tiin phur takin ka chanchinbu lei thar chu ka chhiar ta a, ka beisei ang reng reng erawh ka hmu ta lo a, ka ram ngaih em em lam hawi awm chhun euh chu, Henry Ward Beecher-a sermon an dah chu a ni deuh mai.

Chanchinbu chu ka chhiar zui ta lem lo a, Edinburgh kan luh dawnah chuan Advertisement lam enge maw ka en duh vanagin kan bih nawn leh a. Kil khatah chuan Hla hril pakhat hi a lo awm ve ran a, uluk deuha ka chhiar chuan rawng bawlna kawngah hla tha tak a ni thei dawnin ka hria a, THLUK a neih chuan. Pu Moody-a pawh chu ka hrilh nghe nghe a, a ni chuan han chhiar ri teh a ti a. Ka theih tawpa uluk leh mawia ka chhiar hnu chuan ka thianpa hmel chu ka han en a, ani chuan, a lehkha thawn dawn chu a lo bih nget nget mai a, ka thu chhiar reng reng chu a lo ngaihsak lo a. Ka lungawi lo lek lek a. Ka hlahril hmuh chu ka chep thla a, hla lam pang thil ka bel khawmna lehkhabuah chuan ka bel ta a, he lehkhabu hi khawvel hriata hla lar tak tak lo pian chhhuahna bulpui a ni.

Einnburgh Inkhawmpui a ni hnihna chhunlaiah chuan, Pu Moody-a leh thusawitu dangte chuan Berampu tha ih thupui hmangin thu an sawi hlawm a, Moody-an thu a sawi zawh chuan Dr. Bonar a chu thu tawite sawi turin a sawm a. A sawi reilo na a, a sawi thiamin a sawi nung bawk a, mipui thinlung pawh a khawih khawp mai. A sawi zawh chiah chuan Pu Moody-a chuan ka lam a lo hawi a, “He thu mil tur hla hi, inkhawm ban dawna sak turin I nei mial lo maw?” a ti a, chutiang awm ka hre mai si lo a, ka ngaihtuahna a buai khawp mai a. Sam 23-na hla kha ka rilruah chuan a lo awm a, mahse, he hla hi chu kan sa zing tawh bawk si a. Scot pachal inkhawma lo tel zawng zawng chuan chu hla chu san gat ila chu min lo zawm thei vek dawn tih ka hria a, chuvang chuan, solo chuan chu hla chu sak a rem chiah loin ka hria a. Chutih lai chuan, aw hian, “Rel a i hla hmuh kha sa rawh” rawn ti hian ka hria a. Mahse, chu hla chu sak ngawt chi a ni lo a, a thluk a la awm lo hrim hrim si a. Ka ngaihtuahnaa thil dang lo awm leh chu, khang hla thu mawi tak kha ka sa ngei ngei tur a ni, tih hi a ni bawk si a. Organ-ah chuan ka lehkha them chu ka dah a, Pathian hnenah tawngtaiin, min pui turin ka ngen a, mipuite tana thlarau lama hlawkna leh thatpuina a thlen ngeina tura Pathian puihna chu ka dil ta a. Tichuan, A flat key ka hmet a, ka zai ve ta ngawt mai a ni.

Tichuan, a tlar tin chu a thluk ka dawng chawp chilh zel a, ka sa ta mawp mawp mai a, chuta ka hla sak thluk ang chiah chuan tun thleng hian tih danglam lohin a awm ta zel a ni. Ka zai zawh chuan, mipui rilru pawh a khawih hle tih ka hre thei a. Pu Moody a rilru pawh a hneh ngang mai. Pulpit atang chuan a lo chhuk a, ka thutna lamah chuan a lo kal a, Organ chu bawhin, “Sankey, kha hla kha khawia I hmuh nge? Khatiang hla ropui kha ka dam chhung hian ka la ngaithla ngai lo reng reng” a tit a hial a. A mittui a parawl hial a ni. Moody-a hnenah chuan, “ Nimina ka chhiar sak che kha a nia, I ngaithla si lo a lawm” ka ti a. Tichuan, Pu Moody a chuan a ban a phar a, Malsawm tawngtaina a sawi a, inkhawm kan bang ta a. Chu chu, “Lalpa beram hote” tih hla lo pian dan chu a ni.”

Pathianin he hla hi khawvel hmun hrang hrangah nasa takin a hmang a, Mi tam takin Pathian an hmuh phah a ni. Chung te chu sankey-a hian a lehkhabu, 1907-a tih chhuahah a ziak vek a ni.