DAMCHHUNG NI CHIAR DAN 3

JANUARY NI 11
VANDUAINA CHUNGA RILRU PUTDAN DIK

Thomas Alva Edison kha khawvela scientist ropui leh thil hmuchhuaktu/siamchhuaktu ropui berte zinga mi a ni a. A thawk rim em em thin.

Dec 10, 1914 tlai lam dar 5:30 chuan, Edison-a thilsiamna hmunah chuan kangmei nasa tak mai a chhuak ta a. A fapa Charles Edison kum 24 chuan, beidawng takin a thlir a. A pa putar, kum 67 mi chu a ngaihtuah hle bawk. Chutia a din lai chuan a pa chuan a rawn ko a, “I nu leh a thiante zawng zawng kha va ko vek rawh, an damchhungin hetianga kangmei nasa hi an hmu leh tawh ngailo ang” a rawn ti dam dap a. A han hnial deuh dawn pawhin, “A ho lutuk, thil tangkai lo tam tak ti hian thenfaiin a awm a lawm” a ti et a.

Hetih laia a hmuna awmve New York Times Reporter hnenah chuan, “Kum 67 zet chu ka ni tawh na a, naktukah bul ka tan tha nghal ang” tiin a hrilh a, An buaina lama a chauh tehreng nen, a tukah bul a tan tha leh nghal a. A hnathawkte tumah a ban lo bawk.

Edison-a kha lungngaia indawmkun a, inngaihtuah lungpuam a, tap thei a ni a. Chutiang nilo chuan, a hlimawm zawngin a thlir a, a fapa pawh a hlimawm zawnga thlir thei turin a hrilh a ni. Thil ropui tak ti thei tur chuan, van duaina te, harsatna te hi kan tuar thei tur a ni a, kan tuar thiam tur a ni.

Kan thiltih/kan hna te hi kan tuipui tur a ni a, a ken tel, a chhia leh tha zawng zawng pawh kan pawm angai. Thil thleng engah pawh hlimna hmuh thiam a ngai a ni.

He a vanduainaa a chan hi an han chhut a, US dollar $919,788 a ni a, Tunah chuan $23 million vel a ni. Insurance lahin hmun thum a thena hmun khat chauh a cover a. Henry Ford a hnen atangin pawisa a puk a, a hna a tan leh nghal a. Kum 4 hnu chuan, US dollar maktaduaih 10 zet help an nei leh hman a ni.

Harsatna leh vanduaina kan tawh hian, kan tih danglam theih loh a ni tih pawm ila. Edison-a ang hian, “kan tihsual zawng zawngte chu a kang ral ta. A tharin bul ka tan leh thei e” ti ve ilangin. Harsatna kan tawhte kan hneh hian, Mi tha zawk, mi chak zawkah kan chhuak thei dawn a ni. Ghengzin Khan-a pawhin, “Ka tlanchhiat san theih loh thil te ka hlau tawh ngai Lo” a tih theih atang chiahin hnehtu a ni thei a ni.

Harsatna leh vanduaina kan tawh hian, vanduai bik riauah in ngai lo ila, mi tha zawk kan nih theihna tura min chhertu-ah I pawm ang u.

JANUARY NI 12
MIHRING HLUTNA DIKTAK

Vanhnuailiana Fapa, Lalburha kha, Mizo Lal ropui leh danglam tak a ni a. Mizoram rawn hneha rawn awptu sap ho te kha, hlauh leh tlawn a hnehin, a chung tlak mah mah fo a, sap ho khan an haw ngam ngai miah lo.
“Engatinge min kah?” tia an chhuah chhal pawhin, “kan kap ang che u chu, kan Indo a lawm, Mipa kan nia lawm” ti ngal ngal ngam a ni. “Lalburha’n thu a han sawi chuan, Engvang nge ni kan hre lo, Bawrhsap hian a thu kan paih ngailo fo” an ti thin.

1929-a CGH Helme-an a khua a tlawh tumin, Lalina a han lut kha, Nunau khan an en tuau mai a, Hlau thaw dep depa Bawrhsap viltu rahsi khan, rimchhia a ti ang tih hlauin han hnawhchhuah an tum a. Lalburh-a chuan, “Hnawtchhuak suh u. Lal leh lal kan in be dawn a, anhmu ve duh ang” a lo ti mai a. Mizo Tawng hrethiam ruai ruai Helme-a khan, engtinmah a ti zui ngam bik miah lo.

“Sapa. Ka vaibel lo keng the” titein bawrhsap kha a dawr mai mai thin. Mizo Lal pakhatin Lalburha tih chu a lo thik a, “Ka thian” tiin bawrhsap kha a lo ko a, lei a chawi thelh a ni.

Amah kha, Military Commander ropui tak a ni nghe nghe a. RB MC Cabe-a, Lal Man sap an tih mai khan, Kuli turin Lalburha khuate chu a phut a. Ani chuan a lo zawm duh lo nasa mai a. Sesawngah Sipai 400 hruaiin an han kal a, February 1892-ah a ni nghe nghe. Kuli chu sawiloh, a lo be duh hlek mai a. Mc Cabe-a te pawh chuan, sesawng daiah tanhmun an khuar a. Lalburha khua lak tum chuan sesawng chu an hual ta a. Lalburha te nen chuan an in bei ta vak a. Mc Call-a te chu Aizawlah lamah him damin an insaseng ta nghe nghe a. April, 1892-ah Lalburha kap tur hian Mc Call-a te hi sipai tam zawk nen an han thawk tha leh ta a ni.

Sesawnga a Lal laiin, a khuate chu Lal In sa-in an hnatlang a. A upa te’n, “Ka pu, enganga thain nge sa ila I duh?” tiin an zawt a. “E, in duh duhin sa rawh u. Nangmahni sak tur tho a ni a. In duh leh aidu buk pawhin sa ula, ni a sata ka hlim a, ruah a sura ka hul phawt chuan a pawi lo, aidu buk pawh nisela, a chhungah kei ka awm takah, Lal in a ni tho tho” tiin a chhang a ni.

Lalburha hian a nihna a hria a, tuma lakah a in phah hnuai ngai lo a. A inti thei chuang lo a. Lal a nihna angina ro a rel a, a khua leh tui a chhan em em a. A khua leh tuiten puak an phurh ai chuan inkah mai a thlang a. Mizoram awptu British sawrkar hotute thlengin an zah a kai a ni.

Mi tam tak chuan, mi nihna kan hmu a. Kan awt ve thin a. Kan nihna anga lan hi kan hreh em em a. Kan nih mekin titura min phut pawh kan ti lo hial thin. Kan phu tawk aia tha In neih kan tum a, kan phu tawk aia tha motor neih kan tum a, kan phu tawk aia tha thawmhnaw inbel kan tum a, kan phu tawk aia sangin khawsak kan tum thin a. Sual tam tak a lo thlen phah fo.

Mihring hlutna tak tak chu mahni nihna hriat chian a, mahni nihna anga lan chhuah a, mahni nihna ang zawna a tha thei ber anga thiltiha nun chhuah tum tur a ni. Mahni nihloh pui anga lan chuan, a tlo lo a, kan mualpho thin a ni.

JANUARY NI 13
HUN HARSA HMAN TANGKAI

Jack Reacher-a channa Novel hrang hrang te hi a lar hlawm khawp mai a. Khawvel hmun hrang hrangah minute 4 dan zelah hetiang novel te hi an lei thin niin an sawi hial.

Jack Reacher-a siamtu leh ziaktu Lee Child-a hi Lehkhabu ziah tum ren run a ni ngai lem lo a. British Telivision Company pakhat Manchester khuaa awm, Granada Televsion-ah a thawk thin a. Kum 18 zet a thawh hnuah, kum 40 a nih kumin a thawhna atang chuan an ban ta a. Hna a nei ta lo.

Mi tam tak chuan, Harsatna lian tak tawkah an inngai thin a. Kum 40 ni a hnathar han zawn a, bul han tan that leh te hi thil peihawm zawk zawk a ni ngai lem lo a. Harsatna tawkah inngai a, nun hloh phah hial an awm thin.

Lee Child-a chuan, chute ang rilru chu a pu lem lo a. Ban a han nih takah khan, Pound ruk man paper a lei a. A lo tum ngai lem loh, Novel a ziak ta a. The Killing floor tih chu a Novel hmasa ber a ni. A hlawhtling em em a. Novel tha hnem tak a ziak tawh a. Jack reacher-a channa vek a ni nghe nghe a. Movie pahnih laiah an siam tawh a, Tom Cruise a chang ve ve a ni.

USA-ah te, Britain leh France ramah te in a nei a. Khawvela lehkhabu ziaktu hausa berte zinga mi a lo ni ta a. A bul tanna chu, Hna atanga ban a nih vang chauh a ni.

Kan hna atanga ban pawh kan tawk thei, harsatna kan hriat ngai lem loh hrang hrang kan tawk thei a, hun harsa chi hrang hrang kan tawk thei bawk. Hetiangah hian, Mahni inkhawngaihnaa lut mai loin, chhuanlam atana hmanga zu in leh thil danga kal mai loin, Lee Child-a ang hian kan hun harsa te awmze neiin, a hlawk zawkin hmang ila, Hun tha zawk, nun tha zawk kan neih theihna tur kawng lo inhawng a lo ni daih thei zawk a ni.

Hun harsa kan tawh hian, indawm kun mai loin, kan dinhmun a zira thil tangkai, ngaihtuahna tangkai leh hrisel neih hram hram tuk zawk tur a ni.

JANUARY NI 14

HMUHSITNA LEH DAHHNIAMNA HMAN TANGKAI

Tun hma chuan, China hi tun anga ropui a ni lem lo a. Deng Xiaoping-a khan, 1960 chhoah siamthat hna a han thawk chho a. Chuta a hmalak dan chu, Mao Zedong-a duhloh zawng a nih avangin, Mao Zedong-a chuan, Deng-a chu a thuneihna a chhuhsak a. 1969 chuan, Xintiang County Tractor factory-ah “manual Labour” hna a thawh tir a. Kum li chhung chu zing tinin dar 6:30-ah an kai tho a, Mao-a thuziak an chhiar luih tir a. An chenna hmun atangin Tractor repair station-ah an nupain kein an kal a. Hna an thawk thin a ni. Heta dah bo a nih chhung hian, Maoism a a thalo lai azir chiangin, a hmufiah a. Eng siamthatna nge China ram tan tha be rang tih a hmuhfiah phah ta zawk a. 1973-ah Mao Zedong-an a ko kir a. A hnu lama China ram hotu ber a han nih chhoh hnuah, China chuan hma a sawn ta duai duai a. Vawiina hetiang a lo nih theihna chhan chu Deng Xiaoping-a vang liau liau hi a ni.

Dinhmun sang tak atangin paihthlakin a awm a. Hna hniam te thawh luih tir a ni a, zingah kaih thawh luih a ni a, Mao-a thuziak an chhiar luih tir a. Tractor repair hna thawh luih tir a ni bawk. Chung zawng zawng pawh chu a tuar tang tang a. A tuar chhuah hnua a lo kir leh meuh chuan, Mi tha zawkah a chhuak a. Deng Xiaoping-a, hmuhsitna leh dahhniamna tawk, dah bo tawk tawh chu, China zawkin a mamawh leh si avangin, an ko kir a. China ramah an hotu ber a ni leh mai a ni lo a, China ram hmel a thlak danglam dawrh mai a ni.

Kan Nitin nunah te, chhungkuaah, Khawtlanga, Kan sikulah, pawl hoah, kan rawngbawlpuite zingah, Kan hnathawhnaah, Kan thian hoah, Kan Party-ah, Hmuhsitna, endawngna, dah hniamna, dahbona kan tawh huna a awm thei. Kan kaisanna, kan thlensanna, chawimawina kan dawnna, hlep kan neih vena tura min dal char char, min bei char char, min dah hniam tum ngar ngar an awm thei a, chutiang hun chu kan tawk thei. Chutiang hun a lo thleng a nih chuan, Deng Xiaoping-a hi kan hre reng tur a ni ang.

Mi tha zawk ni tura inzirna hun atan hmang ila, Kan quality tih that belhna hun atan hmang ila, kan hriatna, kan thiamna, kan theihna tih punna hunah kan hmang ve daih tur a ni ang. Chutiang kan tih ngat chuan, mamawha kan awm hun a lo la thleng leh ngei ngei dawn. Min hmusittu, min dah hniamtu, min rapbettu te hi min tahawhtu an la ni zawk thei a ni.
Continue reading DAMCHHUNG NI CHIAR DAN 3

DAMCHHUNG NI CHHIAR DAN 2

JANUARY NI 6
MI DANG CHUNGA THATCHHUAH
Khawvel chanchina lal ropui leh ralhrat hmingthang ber chu Mongol lal ropui Genghiz Khan-a kha a ni awm e. Mongol hnam, Tribal pem pem mai te kha suihkhawmin hnam ropui tak, Lal ram ropui takah a chhuah thei a ni.

Genghiz Khan-a hian a hunlaia an khawvel hriat chanve zet chu a la hman niin an sawi thin a. A hnu daiha India awptu Mughal Lal te chu a thlahte zinga mi an ni. Samuel Taylor Coleridge-a Poem hmingthang tak, “Kubla Khan” tiha Kubla Khan-a ber khan, Genghiz Khan-a tupa a ni. He Poem hi a poem dang pahnih The Rime of ancient Mariner leh Christabel te nen a poem ropui pathumah an chhiar a ni.

Mongol ho hruaitu a han nih tirh khan, Mongol ho nun dan chu a ho em em mai a. An hmanlai nun dan tha te a hloh tial tial a. Mongol ho siamthat leh suihkhawm a tum ta a, “A tul chuan, Mongol hnam chanve pawh ka that mai ang” tiin, Mongol hnam dinchhuahna turin a rilru a siam a. Mongol hnam te chuan, an zawm ngei ngei tur dan a siam a. “Hmeichhia leh Naupang thah ngailoh tur. Mahni thutiam tih hlawhtlin tur ba rulh ngei ngei bawk tur,lal te phatsan loh bawk tur a ni” tihte hi a ni. 1206-ah Mongol zawng zawng chunga Thuneituah an siam a, Temujin-a chu Ghenghiz Khan a lo ni ta a. “Ghenghiz Khan of the Greta steppe” tiin an sawi thin.

Naupangte a nih laiin Harsatna tam tak a tawk a. Tangut Lalin Ghengiz Khan-a chu a man a. A tan tir a. A tan tir lai hian, Buddhist puithiam pakhat hian, Tangut Lal hnenah Genghiz Khan-a chunga that chhuah turin a ngen thin a. Puithiam chuan, Ghenghiz Khan-a hnenah, nakin lama an monastery chu zuah turin a ngen nghe nghe a.

Mi tang Temujin (Ghenghis Khan-a pianpui hming) chuan, Puithiam hnenah chuan, A nupui Borte-I zawng chhuak a, saruh pe turin a ngen a. A nupui chuan a la dam tih a hre thei dawn a ni. Chumi a tih sak chuan, an monastery chu a zuah ang tih a tiam a. Puithiam chuan, harsa takin Ghenghiz Khan-a nupui chu a zawng chhuak a. saruh chu a pe ta a. Puithiam hi a thizui ta nghe nghe a. Borte-I chuan, Ghenghiz Khan-a hi a rawn zawng chhuakin, an tlanbo dun thei a. A hnu lamah, Mongol hotu a lo nih a, ram zauh tura Indonaa a pen chhuaha a beih hmasak ber chu, Tangut Lal ram chu a ni a. Lei atangin chu Lal ram chu a nuai bo hmiah a. Buddhist Puithiamte chenna (Monastery) pakhat chu a zuah thung a. Chu chu tunthlengin a la ding niin an sawi thin.

Puithiam tlawm tak Pakhat khan, Saltang pakhat chungah that a lo chhuah avangin, Buddhist Puithiamte chenna hmun chu a hmelma te chunga nunrawng tak Genghis Khan-a pawhin a zuah phah a ni. Chu chu Midangte chunga that chhuahnain a nghawng chu a ni.

Mi tu pawh ni se, Mi dangte chungah hian that chhuah ila. Kan beisei loh hunah tanpuina kan hmu a. Kan rinlohna lam atangin malsawmna kan dawng anga. Kan vela mite an tah laiin, kan lawm fo ang.
*Mi dangte chunga thatchhuah theihnghilh suh*.


 

JANUARY NI 7
MAHNI HNUAIA MITE CHUNGA THATCHHUAH
Sipai huaisen chawimawina Military Cross dawng pha, Indonaa hnehtu anih avanga Field Marshal nihna an pek, Sam Manekshaw kha, India sipai ropui ber a ni hial awm e. Prime Minister hrohrang na, Indira Gandhi pawh, “Sweety” tia ko ngam ngat a ni.

Sipai General ropui tak leh mi huaisen a sawi tling a ni a. Mi ho Khawm thiam. A hote Gorkha regiment ho phei chuan, an ngainat em em mai, “Sam Bahadur” tia an koh hial a ni.

India ram Khawmual Sipai lal ber a nih laiin, 1971 Indona-ah Pakistan a hneh a. Chu chuan a hming a ti mawi leh zual a ni.

Chutiang sipai chu ni mah se, a hnuaia mite tana tha tak mai a ni a. Sipai hotu tam tak chu, an lal leh lutuk a ni mai lo a, a sual mange aw tih tur khawp hi an ni fo. An hotena an tih hlum tak mai, Tihpalh thilthu anga lang site pawh hi a awm fo a ni. Lushai Scouts ho chanchinah pawh chutiang chu a awm nghe nghe a ni.
Sam Manekshaw-a erawh hi chu, a hnuaia mite tan a tha a. A ardali(orderly) te chungah pawh a tha a, a hmusit lo a, a ti duhdah lo a. chutiang avang chuan a tan pawh an nunna an chan huam hial thin.

Indopui pahnihna laiah khan Captain a ni a. Pagoda Hill-a an inkahnaah, LMG in an kap fuh a, a pumah mu sarih lai a lut a. Thi ngei turah an ngai a ni. Amah lo hmutu Major General David Cowan-a chuan, a damchhuah a rin loh avangin, ama Military Cross Ribbon chu Manekshaw kawrawmah a kilh bet a. “Mitthi tawh hnenah Military Cross hlan theih a ni si lo a” a ti. A hnu lamah, Official takin Manekshaw a Medal dawn hi an puang leh a ni.

Indona silaimu sur karah hian, a orderly Sher Singh-a chuan, a nunna thapin, a pu chu hmun him lamah a hruai a. Australian medical Team ho bulah ke ngata puin a hruai thleng a. Thi ngei tura ngaih Capt. Sam Manekshaw chu a dam chhuak ta a ni.

Australian Surgeon hnena a Singh-a hian a pu ava hruai thlen tirh hian, a lo enkawl duhlo a. A na lutuk a, a thi tho dawn, buai lo law law ang a lo ti deuh a. Sam Manekshaw Oderly Ser Singh-a hian, Doctor chu a pu enkawl turin a ti lui a, a enkawl ta chauh a ni. Thichhawnga a let reng chu a lo harh leh hnu chuan, “Engtia chutiang chu tawk thei nge?” tih doctor chuan a zawh chuan, Manekshaw chhanna chu, “sabengtungin min kheng a lawm” tih a ni.. Doctor nuih chu a za khawp mai a. A zai ta a. A taksa atangin silaimu pasarih a la chuak a. Thla tam a ral hmain, sipai ho zinga Manekshaw hi a awm leh ta nghe nghe a ni.

Manekshaw hi a orderly chungah hian mi tam tak angina lo sualin, lo tiduhdah se, sal ang maiin lo enkawl se chu a pu hmun hima hruai tur hian ama nunna a thap hauh lo ang le. Thi se, pawi a ti hauh lo ang. Manekshaw-a chu a chunga a lo that thin a vangin, a nunna thap pawhin a pu nunna chu chhan a tum ta a ni.
Keini pawh hi. Kan hnuaia thawk, kan peon, kan staff, kan orderly, kan in satu, kan huan samtu, kan huan enkawltu, kan bawnghnute sem, kan dawr nghak. Kan awmpui, kan nau awmtu, kan thawmhnaw sutu etc. te chungah hian that chhuah ila, mihring, mi puitling an nihna angina zahawm takin en ila, kan hnuaia thawk kher lo, kan aia dinhmun chhiate, endawngin, hmusit lo ila, malsawmna ropui tak kan dawng zawk anga. Kan hnuaia mite chunga kan that leh ngilneihna man, kan aia dinhmun chhiate kan lainatna man chu, leiah hian kan dawng let em em ang. Kan beiseilohna hmunah leh hunah kan thatna hi rulh letin a awm em em ang, Gen. Sam Manekshaw ang hian.

*Heng mite ber chungah intih hi ka chunga ti inni*-Isua Krista

JANUARY NI 8
INNGAIHTLAWMNA

Thuziaktu ropui Thomas Hardy kha, a hmingthan vanglai ber khan, chanchinbu te hian a thuziah vangin pawisa tam tak an pe thin a. Engemaw chang chuan, a thuziak leh hlaphuah te kha Chanchinbu Editorte hnena a thawn hian, Envelope ruak, a ma hming leh address inziahna sa, Stamp inbelsa thlap hi a thawn tel thin a; a thuziak chu Editor ten an lo chhuah duhloh hlauh chuan an thawn kir lehna turin a ti a ni. A ropui vanglai ber pawhin a kutchhuak chu an chhuah duhlo mai ang ti khawpin a inngaitlawm a ni.
Continue reading DAMCHHUNG NI CHHIAR DAN 2

DAMCHHUNG NI CHHIAR DAN

Thuhma: Thianho awmkhawmna, Whats app group thenkhata post atan kumin chu nitin, thu tangkai, ngaihnawm tel si, ngaihtuahna kaihhruai thei, Pathian thu ngun ni silo, kristian zirtirnaa innghat si hi ka post thin teh ang ka ti a.Ka la ti hlawhtling thei zel a. Chuta tang chuan, January ni 1-January ni 5 chhunga ka post tawh te ka rawn pho chhua
k a ni e.

January ni 1
ZIRNA NGAIH PAWIMAWH

Mi tupawh an tuinaah kal se a tawk mai, lehkha zir zir angai lo e kan ti thin a. Kan ti sual zel ang.

Miin eng thil pawh tise, lehkha zir hi chu a ngaihthah thiang lo a ni.
Ander Herrera hi, Man U TV in an interview naah chuan, footballer nih tum sikul la kal mekte tan fuihna thu hnuchhiah turin an ti a, chut a sawi chu
“Ka sawi duh chu, mi tlem te chauh footballa eizawnna tak tak hmu an awm. Chu chu an hriat angai. Chuvangin, lehkha zirah thahnem an ngaih angai a, nasa taka an zir angai a ni. A chhan chu, dam chhung hun thui tak atan an inbuatsaih angai a ni. Professional footballer nih hi thil awiai a ni lo, i thiam a i tha a nih chuan, bei fat fat rawh. Amaherawhchu, a hmasa zawk chu zirna a ni. Chu chu a pawimawh ber a ni” tiin.

Zirna hi hna hmuhna degree/certificate mai a ni lo. Nun thiamna min petu, khawvel hmachhawn thiamna min petu a ni.

January ni 2
HLAWHTLIN DAN THIAM

Movie/TV star lar tak, Hotshot, Two and a half man a chang thin Charlie Sheen-a hian, _”Hlawhtlina awm dan kan inzirtir thin lo a. Hei hi a pawi hle. Hlawhchhama awm dan chu kan inzitir a. ‘Bei la, bei nawn rawh,’ te kan ti a”_ a ti. Amah hi, hlawhtlina awm dan thiam lo ber pawl a ni awm e. Tunah phei chuan AIDS a vei ta hial a.

Mizo te pawh hian hlawhtlina awm dan kan inzirtir viau hi angai awm mange ka ti thin. Continue reading DAMCHHUNG NI CHHIAR DAN