LALPA I RAWNGBAWLA MIN KOH HI

Selet Thanga kha, 1920 June ni 9-ah a piang a. AG Mc Call-an, “He is an excellent man. I am confident that he will do everything excellently” a tih kha a ni a. Fel tak a ni. Royal Indian Army Service Corp-ah lutin, Indopui pahnihna lai kha, Sri Lanka-ah post a ni.

A lo chhuah hnuin, Tuna Govt Mizo Higher Secondary School-ah hian a thawk zui a. 1980 khan a pension.

Central YMA leh Central KTP-ah OB a ni thin a, CKTP-ah phei chuan, Pastor nilo zinga Leader ni thei awm chhun a ni. 1958 khan, Mission veng Kohhran Upa atan thlan a ni. Rawngbawlna chan vo hrang hrang a thawkin, a tlin thin hle.

Chutiang rawngbawltu fel chu a ni a. A chang chuan, a lo kal chak deuh thin a. Ama phurna um pawhin a lo kal thui hle. Chauh chang a nei ve tho a. A chauh chang chuan, peih lo lutuka ti tawk tawkin a rawngbawlna kha a kalpui thin a.

“Mi thenkhat chuan, Lal isua hi kan hma khalh thawt thawt thei a. A nih loh leh, amah hmu phaloin, a hnung feah kan kal fo” tiin, amah ngei hian a sawi. Amah leh a rawngbawlpuite harsatna kha a en a. Lal isua hnena dil makmawh an nei tih a hria a. Chu chu “Lal Isua ruala kal” kha a ni.

Rawngbawltu fel, Kristian Thalai Pawl rawngbawlnaa mi chhuanawm tawp tling, YMA ah pawh hotu lian ni pha, Kum naupangtea Kohhran Upa atana thlan tlaka mifel, Sellet Thanga khan, Kraws engah a inhmu chiang hle a.

1967 July thla khan,
” Lalpa, i rawngbawla min koh hi,
Hriaiin, sual, chaklohna phuar vel hi.
Hlau leh Khurin beiseinain
Tawkailo leh bawhhlawh puih ngai,
I chakna ring ka lo kal e” tiin, Mizo Kristian Hla ropui berte zinga mi, “Lalpa I rawngbawla min koh hi” tih kha a phuah ta a ni.

Mi chaklo, puih ngai a ni a, Pathianin rawngbawl turin a ko si a. Sualin thlem fo thin mah se, Pathian chakna puihnain a rawngbawlna a hlen ang tih beiseiin, Selet Thanga khan, rawngbawl tura kohna a dawn thin hrang hrang kha a chhang thin a ni.

Kalvaria luangchhuak Hmangaihna khan, Rawngbawlnaa a chauh chang a piangin a muan thin a. Lal Isua ruala kal loh chuan, Buaina chhum leh thlemna fawn te’n an chim changin, Khawvel hnehna a nei lo ang tih a inhre chiang hle.

Selet Thanga khan, a hmufiah em em,
“Chatuan kulh che rual lo inhung chu,
Tuarna zara ka ta a ni,
Zam tur reng ka lo nih hi” a ti hial a ni. Ringtute nun kawngah hian hrehawm tam tak a awm a. Tuar tur tam tak a awm a ni. CS Lewis-a khan, “Vanram chu hnehtute ta a ni” a ti a, Selet Thanga hian a hrechiang hle, “Ka kal zel ang aman min awmpui, khawvel hnehna chu ka ta a ni” a ti a nih kha.

1995 December ni 5 khan, Vohbik Chawimawina Lallukhum changa ding turin, Chatuan Famkimna hmunah chuan a lut ta a ni.

“Chatuan Famkimna hmun thlen hunin,
A va ropui dawn Krista zarah!
Riangvai, Chanhai hnehtu Lian chan,
vohbik, Chawimawina Lallukhum
Changa kei ka ding ve tur chu”

LEMZIAK ZIN KAWNG BUMBOH TAK KA ZAWH MEK HI THAWNTHUAH LO CHANG TAWH SE

Hei hi Tlangrokhuma chanchin a ni a. Kum 5 zet kal ta a kan ziah dun a ni. First Person narrative anga kan ziah a ni a. Tlangrokhuma taimak dan hi a ropui tak zet. A taimakna chu thuhran nise. Tun thlengin a la inzir reng a. Art chawisan a duh tak zet a, a “Inti Thiam” ngai lo a, Lemziak mi dangte kutchhuak a tuipuiin a hlut em em thin.

Kum 5 mi lek ka nih atangin meihawl leh lungno rawng chi hrang hrang hmangin lungdawh, chhuat, lungpherah leh lungpui awm zawng zawngah te chhun pachang ah bawkkhupin milem ka ziak thin a. Kan sumhmun leh chhuatah te, kan chhekin bang ah te milem ka ziak khat vek thin a ni.
Chung hun chu kum 58 zet liam ta kha a ni. Khatih hun lai khan engngatinge drawing (lemziak) nachang ka hriat tih ka sawi thei tawh lo. Ka pu khan lehkhapuanah phengphehlep lem a ziak hi ka hmu a, lemziak hrim hrim ka hmuh hmasak ber a ni ang. Kha ngei mai kha tunthlenga ka kalkawng tur min kaihruaia min kawhhmuhtu a nih ka ring.

Naupan lai hun inkaihhruaina tha neih hi a lo pawimawh hle mai ka tihphah hial. Puitlin kawng kan zawh theih nan kan nu leh pa te theuhvin kan awm dan tur min rel sak a, a tam ber chu lehkha zirna lamah min kaltir mek a nih hi. India phai khawpui hrang hrangah kan nu leh pate’n an remhriat dan ang angin min dah a, hetah tak hian zirlai ten lehkha zir kan atchilh lo palh ang tih a hlauhawm ka ti thin. Min hmuh phak loha kan awmdan hi a video in rawn hmu thei dawn ta sela, kan huphurh ang em ka inti fo thin.

MANDALAY LAM PANIN: Lemziak hi zir theih a ni tih ka hriat lai khan kum 19 chiah ka ni a, Lemziak zirna Mandalay- ah a awm an tih a vangin pan ve ngawt ka tum thut a. Ka pa chuan ka mit takah min en kalh mai a, ka tum a ruh tih a hriat avangin min hnial lova mittui nen ke a ka kal liam hnak hnak lai chu min thlir liam ta zawk a. Min ngaihtuah hle tih a hriat mai.

Mizorambuai kha lo thleng ta lo se lemziakmi ka nih ka inring lova; Sipai officer nih kha ka tum thin a, Kum 1968-1970 thleng khan Mizoram buai laiin Mizo National Army (MNA) za chuang lai mai chu Kalemyo tan in-ah kum 2 zet kan tang . Hetah hian a nia Mandalay ah lemziak zirna a awm tih ka hriat na chu. Kum 1970 ah min chhuah leh ta a, hetih lai hian Guwahati- ah leh Imphal ah art College a awm tih Mizote’n kan la hre lo a ni ang.

Mandalay chu kaihruaitu nei hauh lovin keimah ngawtin ka pan ding ta a. Ke in ka kal ngar ngar a, remchang hmasa berah motor ka man ve tawp a. Chindwin lui Boat lawng chawlhna ka pawh ta a, tawng ka thiam loh avangin lawngpu te nen pawh kan inbe thei lo. A zankhatnaah chuan ka riak ve phawt mai a, a tuk zingah lawng chu a kal ta a, Hemi ni hi May ni 28, 1971 a ni. Khatih laia ka phur dan em em kha aw! Ka thil tih tumah ka chiang viau a ni ang. Vaukam hla tak tak a lang a, lui lian leh zau tak la hmu ngai hek lo i, water colour in vaukam lem ka ziak zela, ni 3 chhung chuan ka ziak nual hman a ni. Lawngpu ten lemziak kha neih an duh avangin tukthuan leh zanriah te, chhun thingpui leh chhang te a thlawnin min khilai vek thung a, ka hlim hle.
Mungyua khuaah chhuk rawh an ti a, ka chhuk a. Heta tang hian Train man tur ka ni a,a khua a lian tham si a, tawng ka thiam bawk si lo, ka che thei tawh lo. An kawhna zawn ka pan a, ka bo ta a. Hemi ni hi ni 30.5.1971 a ni a. Rel kawng thir phah awm phei zui ka hmu a, hei ngei hi a nih hi ka ti a, mihring pakhatmah hmuh tur an awm si lo, ka hmuh chhun chu kawl ek khawro chauh a ni mai. Rail station awm dan la hre hek lo i le, rel lo kal tur nghahna hmun hluiah chuan chaw pawh ei lovin thosi tam tak karah chuan ka riak ta a ni. Hei hi khaw dai pawn a ni. Rail kawnghlui ah ka riak tih a tukah kawlpain min hrilh a ni berin ka hria a, kei chuan ‘mandalay’ ka tifiak thak ve bawk a, a kut a thing a, ka zui ta a. Rail station chu ka thleng ta a, mi an lo awm nual mai a ka lut ve tawp tawh mai. Heta tang hian Mandalay chu 84-miles a ni a, a chuan man chu Burma pawisa Chiat 2/- a ni. Tichuan Mandalay chu 31.5.1971 ah ka thleng ta a. Methodist Church ka zawng tawp mai, ka pawh ta a. Mizo chowkidar a lo awma, chu chuan ka thlenna tur a Mizo awm ve te min biakrem sak a, Pu C. Khuanga, Atomic Scientist inah ka thleng ta a. (C. Khuanga nupui Zothanmawii chu Mizoram Footballer lar K. Kawla farnu a lo ni reng a)

INTERVIEW HMACHHAWN A NGAI TA TLAT: Huiha! Mandalay ka luh ni chawhnu herah chuan Zirlai pakhat, Ruata chuan lemziak zirna sikulah chuan min kalpui ta a, June ni 3 leh ni 4 -ah entrance exam tur a nih thu min lo hrilh a. Interview hun a lo thlen chuan keimahin ka kal ve tawh mai. (ka lo huai ngawt mai) Hnamdang karah Mizo hnahthlak rim nam pakhatte mah awm lohna ah ngawi rengin ka han ziak ve a, chawhnu leh chawhma a ziak tur te chu ka ziak zo ve mai a.

A Ni hnihnaah chuan PERSONAL INTERVIEW a ni a, board ka hmachhawn ve ta a ni. Zawhna chhang chi ka nih loh avangin ka lemziak sa pasarih ka tawngpawng ken ve mai mai kha ka phawrh a, ziak tha min ti a nih ka ring, Board ho chu an phur tawh khawp mai a, an inbia a, ka ziak te kha an inpechhawng a min chelh rei ta em em mai a, an chelh rei ber ka nih takah chuan ka chhuak leh midang chuan mengphawk zetin min en huai huai a ka ngaih a tha viau mai. Bible chhunga mi lem ka ziak a; Tirhkoh Paula lawng chungah a ding lai te, Isua leh Petera te lem te, chuti ang lem ziak sa kha ken nachang ka hre hlauh mai a, kha khan ‘art is international language’ an tih kha a ti dik a ni ber awm e.Chu art rau chuan Board ho chu a man ta a, ka sawi ai a sawi a result chhuanawm ber Upper Burma District 36 zing atangin he entrance beitu hi 143 kan ni a 18 thlan tur a ni a, Pakhatna ka nih phah ta a ni..Kei chu mawlaik Dist. ah i awm an ti. Hostelah chuan ka lut ve pawp mai a, senior zawk ten min lo chhaih a ka hrethiam lova ka tap a. Midangin min rawn chhaih leha tawng ka thiam bawk si lo ka tap leh ringawt thin. Engmah ka sawithiam ve si lo. A then chuan an lo khap ve bawk.

Hostela lut theia ka awm zan a ka hlimruk zia leh mahse lehlamah senior ten min chhaih a hrehawm ka tihzia kha mizo keimah chauhva awm ka ni bawk a tu hnenahmah zualkona tur ka nei si lo. Tichuan, sikul lamah chuan Kawl hming pu turin min nawr a khata tang chiah khan Mizo Hnamah hian tun thlengin ka chian phah, kan chhungkuaah hnam dang hming pu kan awm tur a ni lo tih hi.

Heti teh nuaih hian lemziah zinkawng hi bul ka tan a ni.

KA MI NGAIHSAN TE:
MF Hussain-a kha Ka ngaisang lo thei lo. Ani kha a boruak a kaltluang tlat mai. A signature kha miten neih an duh a, amah khan mi te duh zat siamchhuak zo lovin mual a liamsan ta a nih kha. Kum engemaw zat liamta ah khan Mizoram Chief minister fanu pakhat hian “MF Husain chu hmuh ve reng reng kan duh a Mumbai-a a in kan zawng ta a, security chhah tak karah kan lut thei a ti, amah tak chu a lo awm lova a fapa in min dawngsawng a,’ Vairam a mimal In ka hmuh tawh zinga la turu ber leh la ropui ber a la ni e’ ” tiin min hrilh. MF hussain hi a thawkrim hle a National Academy of Art hian Lalit Kala Ratna leh Lalit Kala Bhusan an lo hlan tawh a ni. A larna hian India artist te a tiphur bik tlat kha ka ngaihsan chhan a ni.India pum a artist lar ber ber top 20 zing ami a ni nghe nghe.

Ka ngaihsan em em leh ka zah em em dangleh, rilrua a ruk tak pawh a ka entawn ruk ka han sawi leh anga, Vincent Vangogh kha a ni leh tlat mai. A nunkawng a bumboha a kalkawng a khirh a, a tui em em bawk si lai kha ka ngaihtuah chhuak thin. Drawing leh painting kha kum 10 chhung lekin Singkhat vel a tlin hman a, a rapthlak zawk!! Kum 10 chhungin a painting pakhat chiah a hralh a, a tawpah a inkaphlum a nih kha, ka khawngaih lutuk. Art material chu a naute nupa in an tum sak vek a, an u Vincent a kha an hmangaih a a hralh loh avang khan an mawhchhiat ngai lo a ni.

LEMZIAH CHU CHAW A HAWNG LO: Ka dinhmun hi a khirh rei tawh lutuk ka ti! Vincent-a hi ka in tehruk chang a awm fo thin. Amah hi keima tawka ka chak loh lai ber pawh a ka chakna a ni. Mizoram Art organisation-ah kum 1987-2010 chhung khan kum 15 chhung President hna ka chelh a, ka chelh loh tumin post dangah ka awm leh tho bawk. Pawl khan hma lah kan sawnpui em em bawk si lo. Kan chhungkua lamin kan lo tlakchhiat phah em em bawk si nen, ka hlawkpui lo lutuk leh vawiin thlenga lukhawng tel tur nei lova, Eizawng tura New Delhi ka pan phah leh te hi min lawmpuite an lo awm a nih pawhin thil vanduaithlak tak a nih ve nalai pawh a awm thoin ka hria. Kan ramkhawpui a mi hausa tawntaw ve tak tak te khan art hi an ngaihven miah lova, an hma chiah an en kar mai si a; kan khawpuiah pawh a chen hleih theih tawh loh a nih hi.

A mak hle mai. Ka phurna lamah hlawhtlinna reng a la awm lo. Mizo artist zawng zawng chu a ruktein kan bei a dawng a, department lam lah hian min buaipui peih der si lo. A khat tawkin a rundal ah programe awmsa ah min teltir mai mai kha a ni a, kan tan budget a awm ve loh thu min hrilh chamchi reng bawk. Kum 1977 atng khan Champhaia kan awm lai kha chuan lem ziak hi hnapuia neih tham a nih loh avang khan Thlalatu angin miin min hria. Aizawl a kan pem hnu kum 1990 thleng khan thla ka la a ni. Lemziak lamah kan mihausa te an lo awm lova bazar lamah an lo awm vek mai si, lemziak pakhat 500 atanga sangnga ang vel chuan inchawm a har khawp mai.

Hetia kan hlawkpui lem loh lai kum 1991 khan Dingdi Art gallery ka siam ve tawp mai a, min hawnsak turin Pu Lal Thanhawla CM ka sawmchhuak ve hlawl mai. Pu Vannneihtluanga Chairperson a ni a,phurawm tak angin a kaihruai thiam a, Art & Culture Director pu Darchhawna kha intineitu takin khualzahawm a ni bawk. A hawnni a ka thusawi kha a pawimawh ve hlein ka la hria a, ka la hre reng “Art gallery hi mihausa te siam chi a ni tih ka hria. Kei mi In luah chawp mai mai hian kum 3 bak ka tinung thei dawn lo tih ka puang e . He Art gallery ka buatsaih chhan leh ka rilru ber zawk chu; pakhatna; Mizoram sawrkarin Art Gallery buatsaih duhna a neih tak hlauhvin, a pahnihna; Mihausa te leh kan Officer lian Pension tawh ten an pindan an luahsen loh hmun khat lekah pawh private art Gallery an siam duh nana a chotu ang lekin ka han buatsaih ve a ni” tiin ka sawi a, ka thusawi hi Audio leh vedio recordingin ka la kawl vek nghe nghe a ni. Hemi tum hian CM leh Director te chuan huaisen min tih hle thu an sawi ve ve.

‘Tichuan leh, Art gallery chu kan nei ve ta phawt. Painting thar rawn dah zel turin artist ho chu ka tlawn kual chiam chiam reng mai a, Telephone ka nei lova, lirthei ka nei bawk hek lo. Gallery rawn tlawh tura sawmna te hi ke a kal kual ngat ngatin Office hrang hrangah sawmna ka sem thin a. Kum 3 chhung lehkha ka sem , ka ziak reng bawk gallery enkawltu ka ni bawk. Tun ang hian mobile phone te leh laneline te han nei ila ka hah a dam deuh ang maw le. Kum 3 a lo nih chuan ka sawilawk angin a luah man pawh petla thei lovin cheng Singthum lai ba chungin gallery chu ka thiat ta. Ka vanneiha siamin Pathianin min khawngaih a ni ang, kan hralh theih loh painting chu ka inluah atangin man man zawkin kan hralh leh ta vak vak mai a kar loah gallery luahman pawh kan rul leh thei ta. Ka lawmdan kha! Dawr neitu PB Rosanga (ex minister) te chhung dawhtheih zia kha, vawikhatmah min thing lovin min nghak chhuak thei nia. Ka inbuatsaih kum nen kum 4-chhung khan zankhatah darkar 4 chiah zel ka mu hman. Han thau hman chi hi ka ni lo a ni. Dingdi Art Gallery chu 1994 favang laiin a lo tawp ta a. Pawnlamah ka la tang sauh sauh zel a, painting te kha hralh ve nual angin lang thin mah ila a man kha a hniam lutuk a ei tur tak tak a awm lo. Midang painting atang khan 15% ka ei ve a CHAW A HAWNG THAM LO.
Kum 1999 a lo herchhuaka, ka awmdan tur tihdanglam ngai hian ka hria a. Delhi lamah kal mai ka rilruk leh ta tlat mai a, Aizawlah eng ka ni dawn lo tih ka hre si a. Delhi -ah ka chhuk dawn tih ka puang leh ta rup mai. Sum kan nei der si lo, ka chhungte chuan min en reng ringawt a, Mandalaya lemziak zir tura ka kal dawna ka pain min chelh hreh si, khatia min en ang khan kan fate pawh an ngawi thup tawh mai. Ka inbuatsaih ta a, a kumthumna November 2001 ah New Delhi ah kalin mi inluah dan leh a luah man te zawt kualin ni 5 chamin ka cham a. A then chuan sangthum an ti a, zirlai 3 in kan inluahtawm a 3800 an ti bawk a. Chhungkaw thenkhat chuan Sangnga te Sangsarih man te an luah a ni. Kei chu ka bei hi a dawng ta em em mai a, 4000 man pawh ni se engtinge a luah man hi ka rulh ang ka ti a, ka haw rang khawp mai. Keimahin meikhupin Train in ka haw.

Delhi pem ka ngam leh tak lohah chuan ka khawvel hi a zim ta hle a hriatna ka nei ta a. Ka dam chhung tawite ah hian rotling tur ni si, awmze nei a mi tana tangkai theih dan tur lampang ka ngaihtuah leh tan ta. Ka thih hnu thleng pawha tawp mai mai lo tur chu engnge ni ta ang ka tia, ka hui ha pap pap ta mai. Tichuan, TNT hotupa pu Sangthankima saw ka mitthlaah lianpuiin a lo lang a. “TNT-ah lemziak lam talent neitha te chherchhuah a, eizawnna tlak khawpa chhuah inhuamin kum 10 chhung a thlawna thawk turin inpe ta ila, tichuan pawl 10 pass hmasa apiang art college ah kan kaltir ang a, kar loah mi 10 zet chuan Bachelor of Fine Arts (B.F.A.) Degree in an lo chhuak anga, kan school chu sawrkar kan laktir anga, Mizoramain Art College a nei anga mitin an lut thei tawh ang” tih ka duang ta a. TNT hotute nen kan sawi ho a a copy pawh ka hlan ta a. Tichuan 24-May 2004 khan kan MP zahawm tak pu Lalhminghliana hian Press mi tam tak hriatpuiin “TNT School of Fine Art” chu min hawn sak ta a ni. Ka va han buai thei em aw!! Awm-awl deuh lah chu ka thiam der tawh si lo. Tichuan, he school- ah hian a tir chuan naupang 132 ka zirtir ta a. Kan thlifim zel a, kan thlifim leh thin a, a tawpah chuan a misa zual 50 vel chu ka kalpui ta a ni. Kan han beia an tui khawp mai. Mahse, a kumhnuhna an chuan art material leina tur sum lamah harsatna kan nei reng mai a, pencil satliah pawh kan inhmanchhawk hial ta a, budget a awm der si lo, sumfai ka nei bik si lo, ka neih chhunin ka lo leisak ve zel bawk si. Lemziak zir a kalmuang ta. Mi pathum chu Guwahati art college lamah kan tirliam hman ve tlat. Entrance-ah an tling lo vek na a, ka ngena avangin Board chuan min pawmsak ta veka ka van lawm em !! a kalpuitu TNT teacher ten Guahati atanga min call dan chuan “College Board chuan pu Tlangrokhuma mihmingtha hi amah chawimawi nan kan pawm che u” min ti an ti nghe nghe. Thla 27 chhung a thlawnin ka inpe hman chauhva anmahni lamah remchan lohna te a lo awm ve bawk a kan titawp ta lo thei lova. Ka ui khawp mai. Ka kal na petrol senso mahni intumchawp vek a Maruti car in ka inkhalhchhuak reng chungin a tawp kan thleng zo ta lova ka inseng thlawn leh ta. Kha kha ka tuar ta lutuk a kumkhua atan a ka hawisan hnu New Delhi lam hawi a ngai leh tho a nih hi tichungin ka inbuatsaih leh nghal a, a karah Setana a leng tur a ni lo tiin Delhi lam chu khawng tawpkhawkin ka tinzawn tha leh a, Pathian hnenah ka hlan ve ta mai a..

Chuti chuan, kum 1991-94 a Dingdi Art gallery ka siam lai a khawnvartui leh meihawl nena eirawng kan bawl lai leh Zozial zuar a kan inhlawh tak tak a, kan harsat tluk khan Delhi lam ka tinzawn leh si avang hian kan harsa zual leh sauh dawn tih chu ka nupui fanau te nen kan hrethiam tawh khawp mai. Kan thutlukna hi a takin ka bawhzui vak thin tih hretu an ni a, Harsatna tawk thang kan ni tlat.

Kum 2001 a delhi a inluah tur ka zawn a ka tlanchhiat lai tak khan 44th National exhibition 2001 khan select ka ni a, 5291 ah 293 an thlan zingah ka tel hlauh. Tichuan, Eligible artist ka lo ni ta a. 46th National exhibition 2003 khan intihsiakah ka tel leh a . Mi 7300 chuangah 318 an thlang a ka tel leh a, Voter Recognised artist (V artist an ti) ka lo ni ta a, Election Commission of India siam National Artist Electoral roll ah ka hming a awm ve tlat. He roll hi ka nei thlap bawk.

North East ah khian kum 1954 atanga chhiarin voter 40 pawh kan la awm lo.Kan dam chuan hei aia sang ah a la invawrhkai theih a ni. Mizo ram leh Hnam hi khawvelah a lo awm ve a ni tih hnam te hnenah Art hmanga puanchhuah hi ka duh angin, tupawhin kan hmazawn theuhah kan ram leh hnam miin min hre lo lutuk hi thiltha hmangin puanchhuah i tum theuh ang u. Ka reh vawng vawng chuan tum nei ranin tha tetein hna ka thawk a ni tihna a ni thin….