R VANLAWMA KHA

Pu R. Vanlawma khan, Thu a ziak tamin, a taima khawp mai a. Thangthar tam zawk hi chuan, a thuziah tam zia erawh an hre kher lo ang. A kum a han tam chhoh hnu pawh khan, Sakeibaknei Chanchinbu-ah khan kartinin maiin a ziak thei deuh reng a ni.

A thil sawi tam tak kha chu ka han ngaihtuah let hian pawm chiah loh ka ngah khawp mai a. Chumi lam erawh chu ka sawi tum a ni lo a. Mahni indah pawimawh leh, mahni inngaihlu ve tak chu a ni ngeiin a lang a, a party din ngei atang pawhin, an pet chhuak leh mai thin a. “Mizoram hi kawihsapir-in ka kuai tang tanga, ka hneh lo tep a ni” te pawh ti ve hial a ni a, chu chuan, amah a inhmuh dan a tarlan rualin, Mizoram a hmangaih zia erawh a ti lang tel a. Zikpuii Pa a lo thih khan, a vuinaah, “Zikpuii Pa hian Thuziak a thiam khawp mai, mi dawttu a ni e” a ti a ni awm e.

Engpawhnise, chu lam chu ka sawi tum a ni lem lo a. Mizo Union atanga pet chhuah a han nih khan, Mizoram Independent te sawizuiin, Mizo Union Right Wing te han kalpui mah se, hriatzui a hlawh ta lem lo a. MNF dintute zingah telin, Secretary hmasa ber a ni a. Press leiin, an party thiltum, Indepedent sawimawinan, Zalenna chanchinbu te a ti chhuak a. MNF-ah pawh hian rei a tel leh ta lo a. 1962 khan, Mizo National Council te a din leh ta thuai a ni.

1989 vel khan, Aizawlah a ruka hriaua mi chiu hmang an awm tih thuthang a leng nasa hle a. Khawlaia kal leh bazara kal te pawh an hnunga kal ten an chiu ru a, an hmu hman der lo tihte a ni a. Hriau chiu tuara inngai thenkhatte phei chu damdawi Inah an lut hial a. Mipui an thlabar a. Aizawl New market ah phei chuan, han buai deuh/ralkhel deuh laih chang hi an nei fo a ni. Inven ngaihna pawh a awm lo a, an mangang thin hle, Pu Vanlawma leh hmanni lawka thi ta Pu J Lalthangaliana(sakeibaknei) te khan an chhui chiang ta a. Mi tam fe an interview-a, hriau chiu tuara inngai dawmdawi in amite pawh an kawm a, An thil hmuh chhuah chu Sakeibakneiah an ziak ta a. “Dawt a ni e” tih ziak miah silo khan, thiam takin an ziak a. Chutiang hlauhna chu a reh ta hmak mai a ni.

Kum 1990 khan, KS pakhat hian, “Silchar kawngah motor-in min phur a, amah chuan, Minister P.A a inti a” tiin, Supply Department officer pakhat chu a puh ta tlat mai a. Ani chu man a ni a, tan inah khung a ni. Chanchinbu mi thahnem tak chuan, KS chu an kawm a. A sawi a piang an chhuah chuai chuai mai bawk a. Pu Vanlawma ngaihdan a ni ta lo a…”A motor chuanna rawng leh a no sawi danglam fo thusawi chu enge kan chhuah kan chhuah le?” a ti a. Officer zawk chu Pu Vanlawma chuan a kawm ve ta a. Pu Vanlawma’n an inkawmna a han tih chhuah ve meuh chua, Officer chu a chhuakleh ta var a ni.

Hemi hnu pawh hian, Pu Vanlawma leh Pu J. Lalthangliana chuan, Officer leh mi fel deuh deuh pawhin, an rin em em mai, Chhingchhipa Bible hmanga pawisa ti pung thei nia insawi chu an chhui a, an hmuh dan an han ziah chuan, Chupa chu a tlan bo ta daih a. Inbumna pawh a reh ta a ni.

1914-ah a piang a. 1939-ah Matric kha First Division-ah a pass a. Bawrhsap Mc Call-a hnuaiah Circle Staff hna a thawk ta nghal a. Pu Vanlawma hian, “Young Mizo Employee Association” a din a. sawrkar Hnathawk atan Mizo ngei la turin an nawr thin a, Pu Vanlawma chu bawrhsap-in a hna atangin a ban phah hial a. A hmun ruak chu, Mizo tumahin dil loh tur an ti nghe nghe.
YMA (A hunlaia YLA) mutthlu an kai tho a. President atan Mizo Ngei an ti a, Pu Vanlawma ho hian, Rev. Chhuahkhama an thlang tling a ni.

Pu Vanlawma ropuina tak chu, A hunlaia mi thuhnuaia kuna, hahdam taka awm thei tur khan, “Mizo ngei” tia, a hnam hmangaihna avangin, a hna tha tak a chan a, thil dang tam tak pawh a chan a ni. A tlinlohna te chu a awm ngei mai a, chung te pawh chu a then chu kan sawi nghe nghe a, a tir lamah, Chuti chung chung chuan, Mizo hnam a hmangaihna te, a thahnemngaihna leh a hmahruaina te erawh chu, tu tan maha ngaihnep thiang a ni lo a. Pu Vanlawma hi kan theihnghilh thiang lo a ni.

(Lushai Scouts te leh Major RK Hranga chungchang ziah tum ka ni a, Pu Vanlawma chungchang hi ka ziak leh ta rih zawk a ni)