KA NUN I TAN KA PE

Germany rama Dusseldorf khuah chuan, Art Gallery pakhatah Sternberg-a painting, ‘Ecce Homo’ chu an tar a. Juda Mipui leh pilata hmaa hling lukhum Khuma Lal Isua dinglai lem a ni. Chu lemziak mawngah chuan, “He’ng hi I tan ka tuar a, kan tan engnge I tuar ve le?” tih hi a inziak a!

Ecce Homo hi Christian Art-a painting lar tak a ni a. Hrad Strenberg-a ni lo pawh, mi dang tam takin an ziak bawk a. Pilata thusawi, “Enteh u! Mihringa hi” tihna mai a ni. Latin Vulgate Johana 19:5 kha behchhanah an hmang thin a ni.

Rev. William Henry Havergal-a fanu, Frances Havergal chu Dusseldorf khuaah hian lehkha zirin a awm a. Anmahni tak chu England ram mi an ni. Nikhat chu, Art Gallery chu an tlawh a. Ngunthlak taka ‘Ecce Homo’ lem ziak chu a en hnuin, pen leh lehkhapuan a la a. ‘Ka Nun I tan ka pe’ tih hla tun hnua kan hriat lar tak, a hla thu a ziak ta a. Ngaihven loin, a dahtha mai a. Hemi kum hi 1859 a ni.

Anmahni khua, Astley, Worcestershire, England-a a haw leh hnuin, a hla thu lo ziah nawk nawk tawh chu a hmu chhuak leh a. Poetry nawi tak, mi hmuha pholan tlak niin a hre ta lo a. A nuai hlawm a, meiah chuan a vawm luh a tum a. A inngaihtuah vang vang a. A lo nuai hlawm taw hang ang chuan, a ak tha leh ta zawk a. Chumi hnuah, a thian tha tak Pitart pakhat tlawhin a kal a. Ani chuan, a dan pangaiin Amah chhandamtu Lal Isua chungchangte chu a lo sawi leh a. Chu a hla thu lo izah tawh, a chhuan loh em em mai chu a chhiar chhuah sak a, ani lah chuan tha a lo ti em em mai a. A ziak chhuah tha leh ta hial a. A haw hnuin a pa hnenah a hmuh tir a. A pa chuan a thluk a lo sisam sak a. Kristian Hlabu 449-na thluk khatna hi a lo ni ta a ni. Apa pawh hi, Poet lar leh Rimawi lam thiam tak a ni tel ve bawk.

A hnulamah phei chuan mi dang pawhin a thluk an siam ta zel a ni. A thluk hrang hrang zingah chuan, American Musician ropui PP Bliss-a siam chu a lar ta ber a ni. PP Bliss-a hi Kristian Hlabuah pawh a hla phuah leh a thluk siam hmuh tur a awm nual. KHB no 52 na, “Ka Tlantu Fakin ka zai ang” tih hi a hla phuah hnuhnung ber a ni a, a thluk pawh a siam hman lo a, a thihsan ta a. James Mc Granahan-an a thluk hi a siam a ni.

KHB 449-naah dah a ni a. Thluk hnih dah a ni, Zotawnga lettu hi Zosapthara a ni.
December ni 14, 1836 khan a piang a. Hla phuah leh Rimawi lama pianpui talent nei tha tak a ni a. Lehkha a zir sangin, amah a ril bawk a. Linguistics leh Music lamah thuk takin a zir a. Mi zirsang leh mi thiamsang tak a ni chung, Pathianah a innghat tlat a, a chapo ngai lo. Hla a phuah dawn reng reng pawhin, tlartinah a tawngtai hnan ziah thin a ni.

KHB-ah hian a hla dang, Nunna hi Lalpa ka pe tih pawh a chuang a. KHB no 451-na hi. Thluk thum a awm a. Thluk khatna hi Composer ropui Wolfgang Mozart-a a siam a ni nghe nghe. Classical Era-a composer ropui Mozart-a hi, a dam reilo a, kum 35 chauh a dam a, Rimawi chi 600 vel zet a phuah hman thung a ni. A tuipui mi chuan, a kutchhuakte zingah hian, Requiem, The magic flute, Symphony no 40 leh Piano Sonanat no 11 te hi chu kan hre ve awm e.

Havergal-I hi Pathian tan a inserh thiang hlim tlat a, thlarau kaihhruaiin a damchhung zawng a nung a, kum 43 mi chauh niin 1879 khan Ama tana tuartu hnena chawl kumkhua turin a kal ta a ni.

2018-19 MIZORAM BUDGET

2018-19 Mizoram Budget chu Finance Minister Lalsawta chuan March ni 15, 2018 khan House-ah a pharh a. A tlangpuiin heti hian lo tarlang ila:-

I. Revenue Receipt
1. State sawrkar sum hmuhna pui ber te chu Tax Revenue leh NonTax Revenue te a ni. Kum 2018-19 chhung hian State puala Tax leh Non-Tax revenue aţanga sum hmuh beisei zat chu Rs. 807.19 crore a ni. Kum hmasa nen a khaikhinin 16.2% a pung tura ruahman a ni. Tax Revenue aţang hian Rs. 483.34 crore hmuh beisei a nih laiin, Non-Tax Revenue aţanga hmuh beisei zat hi Rs.323.85 crore a ni.

2. Fourteenth Finance Commission ruahmanna anga kum 2018-19
chhunga Devolution of Taxes & Duties aţanga sum hmuh beisei zat chu Rs. 3625.32 crore a ni a, hetah hian GST aţanga dawn tur pawh a tel a ni. Hemi bakah hian Post Devolution Revenue Deficit Grant aţangin Rs. 2588.00 crore hmuh beisei a ni a, State Disaster Response Fund aţangin Rs. 18.00 crore leh thildang aţangin Rs. 10.10 crore hmuh beisei a ni bawk. Urban Local Bodies Grant hnuaiah Rs. 27.41 crore hmuh beisei a ni a, Rs. 21.35 crore hi ULB-Basic Grant niin, Rs. 6.06 crore hi ULB-Performance Grant hnuaia dawn tur a ni
ang. ULB sum hi Municipal Corporation te hnathawh nan a hman tur
a nih angin, Aizawl Municipal Corporation hnuaia ruahmanna hrang
hrang hnathawh nana hman tur a ni.

3 . Sawrkar laipui aţanga ţanpuina, Grants for States/Union Territories hnuaia Block Grants aţangin Rs. 444.60 crore hmuh beisei a ni a, hei hian EAP te, NLCPR te, BADP te, NSAP te leh PMKSY hnuaia hmalakna tur hrang hrang te a huam. Central Road Fund, RKVY leh adangte aţangin Rs. 55.18 crore hmuh beisei a ni bawk.

4. Centrally Sponsored Scheme hnuaiah Ministry hrang hrang aţangin Rs. 1210.99 crore hmuh beisei a nih bakah, Schemes for NEC aţangin Rs.122.64 crore hmuh beisei a ni.

5. . Kum 2018-19 chhunga Revenue Receipt hnuaia sum hmuh tura beisei chu Rs. 8909.43 crore a ni. Heng sum hmuh tura beisei zinga ULB Grant te, SDRF te leh Block Grants aţanga sum hmuh beisei te hi a hmanna tur ruatlawk (tied-fund) a ni a. EAP te, NLCPR te, NEA te leh CSS aţanga sum hmuh beisei zat chiah chiah hi hmuh a ni kher lo ang.

II. Capital Receipts: Capital Receipt chuan State sawrkarin a hmalakna tur atana a sum puk te, sawrkar laipui aţanga Block loans a lak te leh State in loan a lo pekchhuah aţanga a rulhna sum tlingkhawm te a huam a. Kum 2018-19 chhunga Capital Receipt aţanga sum hmuh beisei zat chu Rs. 763.22 crore a ni a, hemi chhungah hian, Open Market Borrowings aţangin Rs. 550.00 crore te, NABARD hnuaia RIDF loans aţangin Rs. 150.00 crore te, NCDC aţangin Rs. 5.97 crore te leh RBI hnuaia W&MA aţangin Rs. 0.03 crore te beisei a ni.
Continue reading 2018-19 MIZORAM BUDGET

CRAZY HORSE-A LEH HNAM TANA TAN RAL RAIHNA

“We preferred our own way of living. We were no expense to the government. All we wanted was peace and to be left alone”
-Crazy Horse (1840-1877)

United States ram ropui tak hi, Min go ho an pem luh chiam hmain, kan hriat than tak Red Indian an tih thin, a hnua American Indian te an tih, tunah phei chuan Native American an tih takte hian an lo luah thin a.

Pem lutte nen an innek a. A tlem zawk, hmanrua nei tha lo zawk leh hnam dang zia hre tlem zawk Indian ho kha a tawm zawkah an tang a. Kum za tel erawh chu, mi ngo leh vun sen ho inkara in nekna kha a awm a ni. Native American te hian hruaitu ropui tak tak Red Cloud,Spotted Tail, Sitting Bull, Quannah Parker, Crazy Horse, man afaid of his horse leh Geronimo leh mi ropui tak tak an awm a.

Tun tumah chuan Crazy Horse-a chanchin hi tawitein kan sawi dawn a ni.
Crazy Horse-a hi Sioux indian hnam zinga mi, Oglala hnam peng a mi a ni a. A pian hun tak hi hriat chian ni lo mah sela, 1840 bawr vel ni a ngaih a ni.

Pa ze zawi awi tak mai a ni a. Oglala Sioux hnam hi zai leh lam ngaina tak an ni a, Crzay Horse a kha chu a damchhung zawngin a zai lai hreawm an awm reng reng lo a ni. Indona an hmachhawn dawn erawh chuan, a naute ti nuiin fiamthu a thawh thin a. Khuaa a awm chuan, naupang te reuh reuh te te bak a be ngailo a ni. Oglala pasaltha ropui berte zinga mi leh Indonaa hruaitu ropui a ni.

Battle of The Hundred in the hand (Fetterman Masacre), Wagon Box fight, Great Sioux war (1876-77)-ah te a meizang hlaptu leh hruaitu a ni a. A taka hmututen a huaisen zia an hrilh fak a ni. 1877-ah Sioux Hnamte hian amah chawimawinan Last Sun Dance an nei nghe nghe a ni.

A mite humhimna atan US army hnenah a in pe a. A inpek kum vek, 1877 September thla hian a inpekna hmun Fort Robinson-ah US Sipaite’n Indian hnamte US nena an inbeihnaa hruai tura a kir leh an hlauh avangin an tihlum ta a ni.
Native American Statesman tam tak, Red Cloud, Spotted Tail, Geronimo, American Horse leh mi dang tam tak chuan, US sawrkar do zel kha awmze awm dawna an hriat loh avangin, Inremna an siam pui thuai a. Mingo nun dan lain, hmun hrang hrangah an zin a, thusawiah sawm pawh an hlawh hle a ni.
Crazy Horse-a hi chu, a tawp thlengin a tang a. Min go nundan a la duh hauh lo a. A inpek chhan pawh, a hote hnam himna tura tha zawka a hriat avang chauh a ni. A inpe tak nain, ama thua inpe a ni a, Indonaah a damchhungin chaklohni a nei lo a ni. US Army chaktak pawh khan, an tukdawl zolo a ni.

“Leilung hi dimdawi takin hmang ang che u, Kan nu leh pate hnen atanga kan rochun a ni lo a, ka fate hnen atanga kan hawh a ni zawk”

“Mipuiten an ke nghah chhan atana an hman tawh ram chu mi tumahin an hralh tur a ni lo”

“Mi ngote hian vawi engzat nge an thutiam an bawhchhiat dawn?
Engang chiahinnge in hriatrengna hi a that loh a, an thutiam chu in pawm leh mai thin le.

Vawiina an thutiam hi nimina an thutiam nen danglamna eng awm?”

“Tawrhna karah leh, tawrhna piahlamah hian, vun sen hnam hi an lo la dingchhuak leh ang. Chu chu, Khawvel dam lo, thutiam bawhchhiatna khawvel, mahni hmasialna leh inthennaa khat, Eng thlahlel khawvel tan malsawmna a ni ang”

Tih sawitu hi khawvel pum huap pawha, hnam chaklo zawkte awpbet emaw awp beh tumtute beihletna kawnga entawn leh ngaihsan hlawh a ni.

US Sipaten an bayonet-a an chhun a, a lo thih dawn pawh khan, Min go khumah a mu duh lo a. Chhuatah a mu lui tlat a. Mingo sipaten an dinhual thap a, a hnukchah an nghak ta ringawt mai a ni. A han thih chuan, a ruang an khuhna kawmawl chu, a micanjou Indian thianpa, Fit sarih zeta sang, Touch the Clouds a chuan a kawk a, “Hei hi crazy horse a chawlh hahdamna chu a ni” a ti a.

Ian Frazier-a chuan Great Plains tih buah chuan heti hian a ziak a. “A chanchin tlangpui han thlir pawhin, a ropui zia a hriat a ni. A pian atanga a thih thlengin ‘Amah’ a ni reng a. A nihna a hloh hauh lo a ni. A in pe (surrendered) na a, vawikhat mah Indonaah chaklohni a nei lo a, Sipaite kutah thi mah se, a damchhung zawngin an man (capture) lo a ni. Hnam thar leh an nun dan lo (Civilization) lo kal a duhlohna te chu awm tak a ni. Khawvel hmun hrang hranga mi tam tak ang lo takin, mi ngo a hmuh khan, a inngaih hniam phahin, a inngaih tet phah hauh lo a ni” tiin a ziak a ni.

South Dakota-a Black Hills hmunah Carzy Horse a hriatrengna an siam a, an la siam zo lo na a, an siam zawh chuan Fit 563 a sang, Fit 641 a hlai a ni ang.

He’ng thu ka ziah lai hian, the Last resort tih hla, Eagles sak chu ka ngaithla a. Don Henley leh Glen Frey-a te phuah a ni a. Don Henley-a tha thawh a tam zawk a ni awm e. Eagles Album, December ni 8, 1976 a an release ‘Hotel california’-ah a tel a. A kum leha an album tih chhuah, Life in the fast lane side B-ah an telh leh bawk a ni.

Zan a rei ta, sana inkhawng ri chauh lo chu thawm dang a awm ta lo. Mizo hnam hmalam hun ka ngaihtuah a, He’ng thu hi ka ziak ta a nih hi.

She heard about a place people were smilin’
They spoke about the red man’s way,
how they loved the land
And they came from everywhere
to the Great Divide
Seeking a place to stand
or a place to hide

J. LALSANGZUALA LEH RAM LEH HNAM RAWNGBAWLNA

“Mizote hi a engzawnga ka thlir chuan, hnam ropui tak kan la ni thei ang tih ka pawm a, a thim zawnga ka thlir erawh chuan, chapo takin kan la ral mai dawn niin ka hmu” titu J. Lalsangzuala kha WWII Veteran a ni a, Battle of Kohima-a Japan sipaite hmachhawntu zingah a tel a. Sipai atanga a chawlh hnuin Politics a zawm a. Ch. Chhunga sawrkarah leh, Lalthanhawla Sawrkarah te, Co-Operation Minister te, Finance Minister te, Home Minister te, Industry Minister te pawh a ni thin a ni.

Politics chauh lo pawh vantlang rawngbawlna peng dangah pawh a inhmang a. Nihna leh chanvo pawimawh tak tak pawh a chelh thin a. Politics huang chhung atanga Public Office-a a thut chhunga a hnathawh leh ngaihtuahna thenkhatte kan thlir dawn a ni. Mi tam tak fak hlawh leh ngaihsan a ni a, a fakawm leh ngaihsan zia pawh kan sawi hran pa dawn lo. Zir tham ngaihtuahna nei a ni a, a sulhnu thenkhatte kan en mai dawn chauh a ni.

1. MIZORAM HMASAWN LOH CHHAN: Kum 1974 khan, Mizoram- Ram hmalam hun eng tih article- a ziak a. Chutah chuan Mizoram chu theihtawp chhuah ruahmanna tha nena kalpui a nih chuan, mahni intodelh ram, mipuite hlimna ram a nih a rinthu a ziak a. mahni Intodelhna tur kawng hrang hrangte a tarlang bawk a. Indopui rapthlak takin a sawi sak, Germany leh Japan ram te chu entawn atan a tarlang bawk a. A damchhungin a beisei ang Mizoram chu a hmu hman ta lo a. Chutiang a beisei ang Mizoram a hmuh hman lohna chhan chu, amah chuan, “Suangtuahna mumal lo leh ruahmanna tha lote, Thuneihna chelhtuten tumna tak tak an neih loh avangte a ni” tiin a sawi. A sawi hi a dik chiah a, Thuneihna chelhtuten tumna tak tak an neihna Singapore te chu hmuh theihin an danglam reng a ni.

2. SUM RENCHEM LEH HMAN THIAM: Finnace Minister a nih lai kha, mi tam takin an hriat lar leh zualna te pawh a ni awm e. A thupui ber pakhat chu, Mahni thawhchhuah mila khawsak leh neih ang chhun chhun hman tangkai a ni. 1993-a Union Finance Minister-in Mizoram a lo tlawh khan, Interest Free Loan Rs 25 lakhs an lo dil a. An Dilna chhan leh an mamawh dan te an han hrilh fiah a. Rs 30 lakhs loan an pe ta hial zawk a ni.

A hunlai khan, Financial Administration chu, awlsam leh felfai zawka kal dan neih tulin a hria a. State dang tih dan te pawh ama hoin an zir zak zak hman a. Nasa taka tih danglam erawh an nei hman ta chiah lo a. Chhinchhiah tlak tak erawh chu, Mi ngaihtuahna hmang mi a ni a. Ama chanpual hna tha taka thawk a, Mizoram inrelbawlna tura tha zawk tur ngaihtuaha zawng reng mi a ni tih kha a chiang em em a ni.

3. THINGPUI CHIN THU: Mizoram leilung awmdan, a lei that dan leh a san zawng leh a awmna hmun a chhutin, Thingpui ching ila tha dawn riauin a hre ta a. Kan thawnchhuak thei lo a nih pawhin, kan intodelh tal chuan, kan hnam tana that ur niin a ngai a ni.

Kum 1991-a ama hoa an chhut danin Thingpui Rs 3.5 Crore man zet mai kan inral angah ngaih a ni a. 99% zet chu pawn lam atanga lakluh a ni. Chumi avang chuan, sawrkarin hma lak tulin a hre ta a. Ruahmanna hrang hrang an siam a. Chhungkua a buaipui theih a, ram pawn atanga hnathawk tur lakluh ngai lo leh scientific taka chin a nihna turte, a sawngbawlna tur khaw sawrkarin a buaipui dan turte, Thingpui chingtute leh an thingpui chin buaipuitu pawl a awmna turte a ruahmanna saim chhoin, Thingpui lama thiamna neite rawn chhoin hma an la a. Industry Department-in an buaipuina turin cabinet Approval a hmu bawk a. Ngopa leh Biate-ah bul an tan a. Processing Unit-ah te pawh a lungphum a phum nghe nghe a ni.

He’ngah te hian, a thil chik ziate, Mizoram dinhmun mila kan thatpui tur thil a ngaihtuah ziate leh a zir peih ziate, a tih tawh lam Champion pui a tum dan te pawh kan hmu thei ang.

4. LEHKHAZIAK LEH CHHIAR MI: John Lalsangzuala hi lehkha ziak leh chhiar mi a ni a. Sulhnu engemaw zat min hnutchhiah a. A autobiography Mizoram_A land of Charm tih saptawnga a ziah chu a thih hnuin tih chhuah a ni a. Rev. Zairema leh Dr L Sangkima te nen 1995 khan, Mahatma Gandhi tih an inziah tawm a. Article chi hrang hrang belhchian dawl tak a ziak nual bawk.

Lehkha zir sang tak ni lo mah se, a inchhiar zau a, a tawnhriat a tam a, ram a hmu hnem a, a inzir peih a, angaihtuahna a seng a. Ram hruaina hna chelha public Office a a thut lai pawh khan zah leh ngainat a hlawh a ni.

TLANGKAWMNA: Kum 1924 khan a lo piang a, a pa chu VZ Biaka, Mizo te zinga Politik lama mit keu hmasa a ni a, vantlang thatna tur bei hmasa berte zingah a tel. June ni 9, 2009 khan a thi a, he khawvelah hian kum 85 a cheng ve a nih chu.

High School a kal laiin, Sipaiah a tang a, Jamader Clerk niin a pension a. 1962 khan, Mizo nu chhuanawm, Zokhumi nen an innei a, Rev. Zairema khan a inkutsuih tir a ni. Fa panga an nei a. a nupui hian a dawmhlum a ni.

Central YMA thleng pawha OB lo ni tawh thin a ni a, Cabinet Minister a nih lai, 1996-97 a Central YMA in ‘Zirna Uar kum” a puan pawh khan, Kum puan Committee chairman a ni nghe nghe.

John Lalsangzuala hi a phakar lo a, a dikin, a zahawm a. ram leh hnam hmasawnna atan a ngaihtuahna sengin, a inzir zau a, a ngaihtuahna sawr chhuak thin. Politics leh Politics lo a tang pawhin vantlang rawngbawlna kawng hrang hrangah a inhmang a. Hun rei tak Public office-a a thut chhung pawh khan, a hmingchhiatna han sawi tur hria an awm lo a ni.