WORLD CUP LEH RUSSIA RAM

2018 FIFA World Cup thlengtu Russia ram khan, an World Cup thlen kha engang chiahin nge an hlawkpui? Tawitein i lo sawi zui teh ang.

 

Football World Cup hi khawvela infiamna inkhawmpui zingah chuan ngaihhlut leh ngaihven hlawh ber a ni hial awm e. Vladamir Putin-a hoin Russia ramin an thleng a. Inkhel chhehvel leh result te chu kan hriat tlangpui a nih avangin sawi kher tawh lo ilangin.

Russia hian US Dollar Tluklehdingawn 14 World Cup buaipui na atan hian an seng a. World Cup thlengtu tawh zawng zawngah an la inseng nasa ber a ni. 2014-a thlengtu Brazil-in a sen let thum zet an seng a ni.

Cold War a tawp a, USSR a han kehdarh a, Russia ramin economy lamah harsatna a han tawk chho a. International Relations lamah Russia a tlahniam em em a. Chu chu Putin-a hian a vei em em a. Tan pawh a la nasa a. Crimea ram, 2014 a Russia in an rama an rinluh te kha, khawvel ram hrang hrangin an hremna avangin kawng tam takah an la tuar bawk nen. Tun hnaiah pawh boruak hrang hrang, Syria kaihhnawihah te pawh kan hriat hi. US election thlengin, inrawlh anga sawikai a nih hi.

World Cup an thlenah pawh, an tum pakhat chu, khawvel mithmuha Russia ram pholan sarh thar leh, Economic lama hlawkna tel a ni ber.

2010 a World Cup thlen phalna an dawn atang kha, Official Budget pawh vawi 10 zet an siamtha a. An hlawkpuina hmasa ber erawh chu, Infrastructure lamah a ni thung.

World Cup kha, Russia ram khawpui 11-in an thleng a. Stadium 12 an sa thar. Transport leh infrastructure lamah hma an sawn phah a, tax revenue pawh an hmuh tam phah dawn a. Hmasawnna ruhrel tam taka tan Russia sawrkarin, insen zui angai dawn lo bawk a. Chutih rual chuan, St. Petersburg khawpui leh hmun thenkhatte chu a nghawng zui ve bawk a, a thalo zawngin.

Tourism lamah kawng a inhawn zau belhin, 2022 chuan tourist hi 4 pc tala world cup thlen hma aia ngah tawh zawk an inring a ni.

Economics lama mi thiamte sawi dan chuan, GDP hi WC zawh hnu kum hnih thleng chu, 5 PC in a san belh anga, chumi bak chu, economics lama hlawkna awm mang lo turah an ngai a. Russia ram tan, “Inchhuanna” a tling e tih lohah chuan, hlawkpuina lutuk tur a awm thui lo viau dawn niin an sawi. World Cup avang hian kum 10 lo la awm leh turah USD tluklehdingawn 31 hmuh belh tura an inchhut chu, tumahin an pawmsak lo. Invest, Tourism leh thil dang kaltlanga pung hluai turah an ngai a. A nih chiah loh hmel.

FIFA erawh chuan, World Cup lo inher chhuah leh hmain, USD Tluklehdingawn 6 zet hmu a, Dollar maktaduai 100 tal hlep thei turah an inngai a ni. World Cuyp buaipuina ngawr ngawr hi FIFA chuan a tum a, a thlengtu ramin, inkalpawhna leh infrastructure tul leh thildang an ngaihtuah thung.

Economics lam bikah chuan, an hlawkphah lutuk lo chu a ni a. Kawng danga an tan lakna leh, thlen an tum chhan pakhat chu, khawvel mithmuha Russia ram chu, ram him leh ram zalen an nihna lan tir chu a ni a. Khawvelin vawiin thlengin an la hmu mak ve deuh bawk nen, chumi paih chu an tum ber a ni a. Tutan pawh an ram chu a himin zinna leh khawsakna tlak a nih zia tarlan kha an tum ber a ni a. Police Co-operation cetre te dinin hma an la a, World Cup chhung hian, himna lam thilah harsatna lian tham an tawk lo a. Hemi kawnga an tum chu a hlawhtling khat a, khawvel mit hmuhah pawh Russia ram hi a lang mawi thawkhat viau a tih theih awm e.

Russia hi thlengtu atana thlan an nih khan, sawiselna a nasa a. An foreign Policy avang a ni bawk a. Ram 31 zet mai an han kal Khawm a. Official lal tak tak inkarah indawrna a lo awm lo thei lo a. A hawnna leh a kharnaa an ram hruaitu sawm zawng zawng nen, Russia ram leh khawvel ram dangte inlaichinna pawh tha sawt turah an ngai a. Hemi hi Russia pawhin World Cup thlen an Dilna chhan pakhat pawh kha niin a lang.

TI HIAN SAWI ANG:-
1. World Cup thlengtu ram reng rengin an dilchhan pakhat chu, economics lama hlawkna an neih belh theihna tur an zawn avang a ni.

Tourism avangte, Investment lo awm belh thei avangte etc.

2. Ram dang nena an inlaichinna siam that leh inkawmngeihna boruak siam thar nan.

3. An ram leh hnam hming tihmawina leh hmel tihthatna atan.

4. World Cup chauh nilo, International events hrim hrim, Olympics, etc te leh Regional events Euro, Copa America, Commonwealth Games, Asian Games, SAARC Games etc thleng pawhin kan sawi taka ng hlawkna hi an thlir vek a ni.

5. Khasi ho hian Kohhran inkhawmpui lian remchang hi thlen an tum hram hram zel a. Thingtlang khuaah an nghat tlangpui bawk a. Sawrkar a inrawlh lo thei lo a. Infrastructure- Kawng etc ah hlawkna an ngei ngei ngei a ni.

6. Keini pawh hian, inkhawmpui emaw, eng thil pawh, ramchhung huap thil a ni pawhin, fing zawk leh inhawng zawka thlen zel tum a tha zawkin a rinawm. India ram huap thil engemaw pawh thlen ve zel tum ila, rilru zau leh ngaihtuahna thleng thui tak neih a hun viau a ni.

JERUSALEM LAMAH TUKVERH I HAWNG EM?

“Hebrai mi sal thingthi kha I hmu em?
Zing, Chhun, Tlaia tawngtaia kha”

Joliet, Illonois-ah Tan in pakhatah P.P Bliss-a kha zaia rawngbawlna neiin a kal a. Chumi tum chuan, HG Spafford-a Chicago khuaa mi thusawi a tawiawm a ni. HG Spafford-a hi, “A pawilo” (It is well with my soul) tih hla phuahtu kha a ni. It is well with my soul hla thluk pawh hi ama siam a ni nghe nghe a

Hemi an inkhawm tum hian, tan in atangte ngaihthlak atan chuan Spafford-a chuan, Babulon-a Saltanga awm, Daniel-a chanchin kha a hmang a. A thusawi tihtawpnan chuan, zawhna pakhat a hmang a. Chu chu, “Jerusalem lamah tukverh I hawng em?” tih a ni. Bliss-a chuan, hla atan tha dawn riauin a hria a. A rilru chuan a vawng ta reng a..

A thih hma thlakhat velah Moody-a rawngbawlnaah PP Bliss-a hi a zai a. Chumi tum chuan, chawhma inkhawmah, “Jerusalem lamah tukverh I hawng em?” tih chu a vawikhatna atan nung takin a sa chhuak ta a. Chu inkhawmah chuan Pastor ngawt pawh sang chuang an tel a. Pastor pakhat chuan, lawm em emin, “Pu Bliss kha hla avang chuah pawh khan Lalpan nasa takin malsawma che rawh se” a ti chhuak ta hial a ni.

A zai lai chuan, a hmel chu a eng sur mai a. Ngaithlatu tam zawk mittui luan tirtu a ni ta a ni. Moody a meuh pawh a rilru a hneh ngang a ni ang, dawhkan bawhin a kun ta ngawt a. Chu chu, a a thian leh unaupa duhtak zai a ngaihthlak hnuhnun ber a ni ta a ni.

Hemi hnu thlakhat, December ni 29, 1876-a pacific Express train-a Bliss-a leh a nupui chuang chu, accident an tawk a. a nupui nen chuan, an thlir thin zion khawpuiah an kal ta a ni. An fate mipa naupang pahnih mi, Kum li mi leh kum khat mi an kalsan a ni.

An chetsualnaah chuan, a thingrem a kang tel ve lo hlauh mai a. Chutah chuan, a hlathu ziah pakhat, “Ka tlantu fakin ka zai ang” tih chu an hmu chhuak a. A thluk a siam hmain a kalsan tak avangin, Hla phuahtu leh Rimawi thiam ropui dang pakhat, James McGranahan-a khan, a thluk a siam ta a. Thomas Alva Edison-a hla record hmasak berte zinga mi a ni zui ta bawk. Edison-a hian, a ri (sound) record na hmuh chhuah, Phonograph hmangin a record a. A hnu lamah an siam danglam zel chu, Gramaphone an tih zui taka ng kha a ni a, UK lamah chuan 1940 atang khan, Record Player tiin an sawi mai thung.

An sawi dan chuan, Titanic lawng chetsualnaa damchhuak, Lawngte a hmun chhang ho khan, PP Bliss-a hla, “Pull for the shore” tih an sa a ni. He hla tak hi chu Mizo tawnga kan neih awm pawh ka hre lo.

July ni 9, 1838-ah a PP Bliss-a hi a piang a, sawi tawh angina Decmber ni 29, 1876-ah rel chetsualnaa thi zingah a nupui nen an tel ve a. Hla phuahtu ropui, zaipawl hruaitu leh Fakna hla satu ropui a tling a, a aw hi Bass-Baritone a ni.

Ira D Sankey-a khan, “Jerusalem lamah tukverh I hawng em? Tih hla hi chu, Moody-an Zawlnei Daniela behchhana sermon a sawi a piangin a puitu atan ka sa ve ziah a ni” tiin a sawi.

DL Moody-a hi kum zabi 19-na laia rawngbawltu ropui tak mai a ni a. Harhna tam tak thlentu a ni. Ira Sankey hi zaithiam leh hla phuahthiam, Moody-a rawngbawlna a pianga zaia tawiawm thintu a ni.

He hla zotawnga lettu hi Simeon Rynjah khasi pa a ni a. A chanchin sawi mai tur ka hre lo. Kan Kristian hla hmasa lam chu a ni awm e. KHB no 416-na a ni.

Pathian nung fate in ni, hlau suh u
Chhanchhuahna ni lawmin zai ru;
Zion khawpui lam chu thlir chung zelin,
Lal lo kal tur chu hmuak r’u.