AUGUSTINE-A LEHKHABU ROPUI ‘CITY OF GOD’ THLIRNA

Kristian Sakhaw kaihhnawih lehkhabu ropui, Khawthlang Philosophy tam tak hring chhuaktu ni bawk, Augustine-a lhekhabu ropui ‘City of God against the Pagan’ tih bu thlirna tawite hi han ziak lawk teh ang.

A BU ZIAHCHHAN: Augustine-a Lehkhabu hming hi, ‘The City of God against the Pagan’ tih a ni a. Kum zabi pangana AD lai vela a ziah a ni. Kristianna avangin rome ram a tluchhia a ni, tia puhna a chhanletna a ni ber.

A BU CHHUNG THU TLANGPUI:
He lehkhabu hi Hlawm hnihah lian deuhin a then theih a. Chu chu hlawmte zawk 22-ah thendarh leh a ni. Khawvel sakhua leh an philosophy zirchianna leh sawisawpna te, Pathian Khawpui (Kristianna/Kohhran) leh Khawvel Khawpui (Kristiante nihna letling chaih ho) te inlaichinna chungchang te chai a ni bawk.

Visigoth hoin AD 410 khan, Rome khawpui an suasam chiam mai a. Chuta an tawrhna avang chuan, rom mi tam tak kha rilru na em emin an awm a. Roman sakhaua kalsan a, Krostianna an vawna avanga hremna niin mi tam tak chuan an ngai hial a ni. Heng ngaihdan chhanletna atan leh a hunlaia Kristiante thalmuantu atan. Augustine-a khan, “City of God” lehkhabu ropui tak mai kha a ziak ta a ni. Sakhaw dang aia Kristian sakhaw dik zawk zia sawi chhoin, Philosphy dangte aiin Kristian philosophy chu a chungnung zawk a. Kristianna chu, Rome khaw tawrhna chhan a ni lo a, a hlawhtlinna a ni zawk tihte a sawi bawk.Kristiante chu hnemin, Khawvel Lalte rorelna dinhmun chu engpawh nise, a tawpkhawkah chuan Pathian Khawpui (City of God) chu a dingchang zawk dawn a ni.

Augustine-a chuan vanlam a thlir tlat a. Kristianna chu, Rome ram-in official a sakhua atana a neih ni mah sela, khawvel pawlitik thil niloin, Pathian thu chauh an ngaihtuah zawk tur a ni a, ama thuchah ngei pawh chu thlarau lam thuchah liau liau a ni a ti a ni.

He lehkhabu hian, mihringte chanchin chu, Khawvel Khawpui leh pathian Khawpui indona/inbeihna a ni a ti a. A tawpkhawkah chuan, Pathian khawpui chuan chakna a chang dawn tho tho a ni a ti. Pathian Khawpui a tih chu, Pathian thutak pawh tura inpe pumhlum, kristiante an ni a, Khawvel khawpui a tih chu, he khawvel, reilotea ral mai tur thlahle zawktute awmna chu an ni.

Augustine-a chuan Pathian ram/Khawpui chu leia intan, famkim lo ni mah se Kohhran chu Pathian ram ze nei, vâna la famkim turah a ngai.kohhran hi kristiante awmkhawmna a nih avangin a lehkhabu, City of God a tih pawh hi Kohhran tia sawi theih a ni.

Augustine-a chuan, khawvel history hi Pathian leh Setana inbeihna a khat a ni a ti a. He khawvelah ngei hian, kristian ram leh Kristian ram lote ngei pawh hi an inep reng a. An inepin an indo zel dawn a ni, tiin a sawi.

Khawvelah hian, lei sawrkar danah leh thalaru thilah pawh Kristiante leh Khawvel hi kan indoin kan in ngur reng a. A tawpa hnehna chang tur chu, Kristiante kan ni tih hi Augustine-an ‘City of God’ tiha a thu khel laipui ber chu a ni.

He lehkhabu hian khawthlang philosophy pawimawh tak tak bul atan a ni deuh ber a. Heng mi dikte tawrhna tihte, Sual lo awm dan te, Duhthlanna leh Pathian thitihtheihna chungchangte, Sual bul chungchangte ang te hi.

A BU ZIAKTU CHANCHIN: Augustine-a hi Kohhran pate zinga mi a ni a. Africa ramah November ni 13, 354 khan a lo piang a. A pa hi a thih dawn chauha Kristiana inpe a ni a, a nu Monica-I erawh chu Kristian nu tha leh a fate tana tawngtai bangle a ni. A han lian chho a, khawvel nawmna umin a tlan a, hetih lai hian a nuin atana tawngtai a bang ngai lo. AD 386 August thla khan, Pathian lamah inhmu chhuakin, nun thar a lo nei ta a ni.

Pathian hnena a han kir leh chuan, a nu hnenah a kal vat a. a nu chu a lo lawm em em mai a. Kum 20 chhunga bang loa a tawngtaina chu chhanin a lo awm ta a ni. Bishop-ah te tang chhoin, Kum 430 khan a thi a. Rawng a bawl hun chhungin, Kristian Sakhaw humhimna leh chhanna (apologetics) lam lehkhabu tam tak a ziak. Kan lehkhabu sawitak pawh hi Kristian apologetics chhunga mi a ni.

Augustine-a Inpuanna tihbu kha Mizo Tawngin kan nei tawh a. Ka Pa Pro Pastor thin, Rev. Dr. Vanlalthlana’n, Dth a hmuhna kha Augustine-a Theology-ah hian a ni bawk.

MIZOTE TANA ZIRLAI

A hunlaiin Kristian sakhuain nasa gakin beih a tawk a. Augustine-a chuan a ringtu puite thlamuanna tur leh Kristian sakhaw humhimna atan a finna hmang tangkaiin lehkhabu ropui tak a ziak a. Mizo mifingte chu hnamin hun harsa a tawhlaiin an ngawi leh tlat thin. Kohhranin beih a tawh laiin an ngawi fo.

Dan Brown a novel ‘Inferno’ tirah chuan “The darkest places in hell are reserved for those who maintain their neutrality in times of moral crisis,” tih a awm a. “Hremhmuna hum hrehawm lai ber hi ngaihdan insual awm hunlaia tanna lam bik neilotevtana zuah a ni,” tihna a ni ber mai ang chu. Chu chu Florence khaw pa, Middle age hunlaia Italian poet ropui Dante Alighieri a epic poem ropui, Divine Comedy, Canto 3 Line 9 a mi a ni. President Kennedy pawh khan a sawi ngun hle. Mahse, a sawi sual ta thin a. The Hottest place tiin a sawi leh tlat thin.

Kan ram/kan hnam hian moral crisis a tawk a. Inpuhna tam tak karah kan then mai mai a, Mipui te kaihhruai thei tu tur kan mifingte an ngawi tlat si. Dante-an, ” The darkest places in hell are reserved for those who maintain their neutrality in times of moral crisis” a tih hi, tuna kan intellectual te tana a sawi hi ni hialin ka hria. Dante a hremhmuna a hrehawm lai ber chu a chhawng kuana a ni a, chu chu, “darkest place a ni”.

Ridley scott-a direct, Russel Crowe channa, Robin Hood film-ah khan, Kng Johna hnuaiah, France ram tana a ruka beitu pasaltha pakhat chuan, England ram a chawk buai vak a, baron te leh King John ate inkarah khi a siam a nih kha…Khami lai taka King Phillip-an England beih a tum a nih kha..Mahse, an milian te an tang ruala Robin Hood-a hoin, an lo bei let a, King Phillip-a pawhin, “This does not look like a country at war with itself” a ti a, France ramah a kir leh ta zawk a nih kha..An history a kan hmuh angin, Magna Carta pawh kha an sign tir ta nghe nghe a nih kha, King john kha.

Chutiang chuan, intellectual te hi an tan rual chuan he ram hi an beng harh thei a ni….Chutah chuan, kan insingsa thei chauh ang…Mipuite hi hrilh leh hruai ngai kan ni a. Hruaitu tha nei tlak tura siam theitu chu intellectual te an ni.

Kohhran tan chang nilo, kan ram leh hnam leh khawtlang tan kan finna hman a tul fo.

CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA

Kohhran Siamthatna kawnga thawhhlawk tawp thang, Kristian khawvela a hming hriat loh thianglo John Calvin-a khan, Lehkhabu ropui tak mai, “The Institute of Christian religion” tih a ziak a. A saptawng bu hi 2013 ni ta-in ka hria, OM Bookstore atangin ka lei.

He lehkhabu ropui hi tawitein I han thlir teh ang:
He lehkhabu 1536 khan Latin tawnga tih chhuah a ni a, 1541 khan French tawnga tih chhuah a ni.Hei hian, a hunlaia French literature khawvela an thuziah dan thuk takin a nghawng a ni. Tawng dang tam tak a lehlin a ni tawh a, Kristian khawvela lehkhabu chul theilo leh nep theilo a ni.

Institute hi bu liah then a ni a. Bung 80 a awm bawk. Siamtu, Tidamtu, Thlarau leh Kohhran tiin a then a. Pathian chungnunna, a khawngaihna leh Phulo misual a chhandamna chungchang a chai a ni ber tiin sawi ila a dik ang.

A BU TUM: Institue bu-a Calvin-a sawi hmasak ber hian, a bu thu hi a khaikhawm mai theih awm e. Mihring finna zawng zawng inthlunkhawmna chu, Pathian hriatna leh keimahni kan inhriatnaah hian a ni, tih hi. Pathian hriatna tak tak chu, Pathian thu chhiar leh zir atang chauhin kan nei thei a ni, tiin a sawi bawk.

THUPUI DANGTE: Pathian lehkhabu a thlir dan chu a chungah kan sawi tawh a. Pathian rorelna chungchang leh a kaihhruaina a sawi bawk a, Pathian chuan khawvel hi a enkawl a, kiltin a en vek a; Pathian hriatpui lohin engmah a thleng lo. Mihringte hian Pathian hnathawh dan hi kan hre fiah famkim tak tak ngai dawn lo. Mihring hian tha lam kawng a zawh emaw, sual lam kawng a zawh emaw, a tawpah chuan Pathian rorelna fing tak maiah chuan an lut tho tho dawn a ni a ti.

Adama avangin sual a lo awm a, sualin mihringte a bawhbet ta tlat a, chhandam ngai kan lo ni ta a, Lal Isua atang chauhin chhandamna hi kan nei thei a ni. Total DePravity-ah kan sawi zui ang.

Tlanna chungchang chu chipchiar zawkin Limted Atonement-ah kan sawi zui ang. Pre-destination pawh TULIP ah tawitein kan sawi zui ang.
Calvin-a hian Kohhran leh a rawngbawlna leh a thuneihna leh sakramen chungchang a chai bawk. Chip chiarin sawi lo ila, a hrilhfiahna leh thil dang chu, sakramen pahnih, Baptisma leh Lalpa zanriah a pawm tih sawi hram ila a tha awm e.

TULIP: Calvin-a zirtirna hi TULIP ti a khaikhawm thin a ni a, tawite tein kim chang lo takin lo sawi chhawng ila. Synod of Dort-in TULIP (Five points of Calvinism) hi a duan chhuah a ni a. Calvin-a zirtirna zawng zawng a ni lo a, a zirtirna tlangpui a ni, TULIP hian a ken.

TOTAL DEPRAVITY: Total Depravity hi chhe vek tawh, sual let der tihna ang deuh a ni. Calvin-a chuan a lehkhabu Insitute of Christian Religion chu “Pathianin a tira mihringa tha a dah/pêk chu sual avang chuan a chhia (corrupted) a, Amahin a thilpek (supernatural gift) pawh mihring atang chuan hlih fai leng (stripped) a ni” toon. “Supernatural gift hi rinna, felna, Pathian hmangaihna, thianghlim duhna te a ni a, hengte hi mihring chhungrilah hmuh tur a awm tawh lo a, a kuangbâng erawh tlêm a zawng a la awm hram a ni” tiin a sawi bawk. Finna leh thuthlukna siam kawngah pawh theihna tlem a la nei a, chungte pawh chu a chaklo em em mai a, thimah chiah a ni bawk. Mihring hriatthiamna te chu a chhe vek lo deuh a, tih chak loha a awm a, a then chu tihchhiat vek a ni, tiin Calvin-a hian a sawi bawk.A sawi zel dan chuan, Mihring duhthlan theihna chu tisa châknain a thunun a, mihringin a tha tihzawng tipuitling thei turin a chak tâwk tawh lo a ni, a ti bawk.

Bu  2-na, Bung 2-na, Then 6-naah chuan khawngaihnain mihring a pui a nih loh chuan chhia leh tha hriatna ringawt atangin mihringin thil tha a ti thei lo a ni, a ti a, thlante chuan khawngaihna bik (special grace) avangin siamtharna (regenaration) kaltlangin an ti thei a ni, a ti.

Continue reading CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA