ISUA THIANAH KA CHHAR TA

1878 khan Salisbury hmuna Salvation Army a mite, leirawhchan rema hna an thawk thin chu, mi chi hrang hrangin hmusitin an diriam thin a. Chu Chu William Charles Fry-a chuan thalo a ti hle a. Salvation army hotute hnenah chuan, an body guard atan an inpe ta a ni. A tukah chuan, an tawtawrawt te nen hnathawhna hmunah chuan an rawn kal a. Salvation army hnathawk lai tibuaitute an hnawh sawn kar lakah chuan, rimawi an tum ta thin a. Chu chu Salvation army brass band hmasa ber nia sawi a ni bawk. An rimawi tum ngaithla tur chuan, mipui an lo pungkhawm bawk a. Thuhriltute chuan Pathian thu an lo sawi pah bawk.

1881-a William Booth-a thuchah sawi thuken leh Bible-a “Lily parmawi ka ni” tih behchhan chuan, Lal Isua leh ringtu inkara inzawmna thutak chungchang hi hlaah a phuah ta a. A hnu lawkah chanchinbuah tih chhuah a ni a. 1885 khan Hlabuah a chuang a. Fry-a chuan a hla thu ziak mah se, a thluk siamtu tunge an hre mai lo a. A hnu lamah chuan William Shakespeare tih hming puin a thluk hi a siam a ni tih an hre chhuak ta a ni

A hnuah Ira D. Sankey-an The Little old log cabin thluk behchhanin a hla thluk hi a siam rem leh ta a. Hei hi a lar ber chu a ni ta a ni.

Mizo te pawhin a sap hla leh Mizo hla pawhin kan hmelhriat tha hle. 1963-64 a Kerala zaipawl zin khan he hla hi an sa nasa a. Hemi zaipawl hi a tira conductor chu CL Rema, IAS a ni a. An kal hma ni emaw lawkin sawrkar thil avangin a hmanlo ta thut a, Tv. Lal Rinmawian a hruai zui ta a ni. Hemi tum hian Upa Chawngzika, Mission Veng te pawh kha bass sain an kal ve a ni. CL Rema hian IAS hna bansanin missionary atan a inpe ta daih nghe nghe. An hunlai khan IAS pathum emaw bak an la awm lo a. An zinga pakhat chu zaipawl an hruai tir thin tihna a nih chu. An inpekna leh inngaihtlawmna kha a chhinchhiah tlak hle.

Mizo Tawnga lettu hi R. Vanlalzawma a ni a.

R. Vanlalzawma hi 1942-ah Kulikawnah a piang a. 1995 khan a thi. Thiamna lamah MA (english) a ni a. Synod High School, Aizawl College leh T. Romana College-ah a thawk thin a. Rambuai lai khan Shillong-ah a chhuk a, AG office ah hun reife a thawk a. Shillong-a a awm lai hian A hmangaihna Faktute zingah a tel.

A hunawl hi hla lamah a hmang zo a. Aman a phuah a, sap hla tha tak tak a letling a, mi hla engemas zat a harmonise sak bawk.

Zaipawl hruaitu tha a ni a, thalaitena hla an zir theihna tur a nih chuan ui a nei ngai lo. 1977-a NEICC buatsaiha shillong Hnam hrang hrang atanga thlankhawm zaipawlin south india an fan tumin conductor a ni. Mizorama a chhoh leh hnuah pawh kulikawn kohhran zaipawl hruaitu hlun a ni.

A hla lehlin thenkhatte chu

  1. Chhandamna a rawn thlen ta
  2. Chhandamtu hnenah kunin tawngtai la
  3. Jordan lui thuk ralah ka in a awm
  4. Kan pel thuai dawn
  5. Kan tho vang
  6. Nakinah khua var hunah chuan
  7. Samsona leh Delili
  8. I thu (zai ru, zairu, fakin zai rawh u)
  9. Isua khawngaihna mak tak
  10. Isua i chawimawi ang
  11. Isua thianah ka chharta
  12. Isu ka rawn pan che
  13. I thlir ang kalvari (chu zan khawharah)
  14. I awmna apiangah eng rawh
  15. Hringnun khawvela kan khualzin kawng hi
  16. Misual vanram i chan ang
  17. Kawng awlsam a nilo
  18. Aw nang Chatuan lungpui rinawm

“Isua thianah ka chhar ta” tih hian ka lung a ti leng em em thin a. Ka thla a ti muang bawk a. Khawvel hian min hnungchhawn mah se, Isuan min kalsan ngai dawn silo tih min hrilh nawn avangin huai takin hringnun hi ka hmachhawn ngam thin a ni.

A PHUTE CHAWIMAWINA


1974 bawr khan, khawvel huap pawha thuziakthiam hmingthang tak tak, Vladamir Nobokov, Graham Greene te leh Saul Bellow te an awm a. Nobel Prize pawh dawng ngei tura mitinin an ngaih theuh an ni. Anni hian dawng ta lo chuan, mi hriat lar hlawh lo tak, ram pawn lamah phei chuan hriat hlawh lo, Eyvind Johnson leh Harry Martinson te chuan an dawng ta daih! Anni hnu hian, Mi pakhat aia tamin Literature huang chhungah Nobel Prize an dawng leh ta ngailo bawk.

Kum zabi 20-an chhunga ziaktu ropui berte zinga an ngaih Graham Greene-a khan, Kum 67 chhung lehkha a ziak a. Novel 25 a ziak. Vladamir Nobok0v-a pawh, USA-ah a pem a. Khawvel pum hriat a hlawh ta bawk. A novel te zinga pahnih, Pale Fire leh Lolita phei chu, kum zabi 20-na chhunga novel ropui berte zinga chhiar a ni a, Speak, memoir tih ama chanchin a ziahna phei chu, kum zabi 20-na chhunga non-finction ropui berte zinga mi a ni bawk. Saul Bellow-a pawh anmahni tluk bawka hlawhtling a ni a. Ani phei chu, 1976 khan an pe leh ta tho a.Graham Greene-a leh Vladamir Nobokov-a phei chuan, an dawng ta lo a ni.

Khawvel huapa ziaktu langsar leh ropui hi dawnglo an awm nual a. dawngtu thenkhat pawh sawisel hlawh an awm nual bawk. Graham Greene-a te pathum dawn loh dan leh, an aia dawng Eyvind Johnson leh Harry Martinson te dawn dan hi chu a awm ang lo ve deuh bawk a. Johnson leh Martinson hi Swedish thuziaktu an ni a, Sweden pawnlamah chuan hriat an hlawh lo hle. Nobel Prize an dawn lai hian, Swedish Academy member nilai an ni a. Swedish Academy hi Literature huanga Nobel Prize dawngtu tur thlangtu an ni. Johnson-a te thian dun hian, anmahni an in rawtin dawn ngei tumin tan an la tih pawh hriatchhuah a ni leh ta bawk!

A phu ngei te’n chawimawina leh fakna an dawn hi chu tuma tan thik chi a ni lo a. An lawmpuiawm a, an chhuanawm a, an entawn tlak.

Mi thenkhat, an phu loh tawp chawimawina dawng, an phu loh tawp fakna dawng an awm thin. Chutiang mite chuan, awm dan tur an thiam a, mahni inpholan dan an hria a, a hun tak hi an man em em ve bawk a. Mi thawhrim raha par an awm a, a par hun an hre em em bawk.

Mahni phuloh chawimawina leh fakna dawng tura mahni inrawt ta mai chi te, mahni inhma theh ta mai chite hi an pung tual tual emaw tih tur a ni ta. Chawimawina dawn dan ngawt zawngte pawh an awm a. lansarh khel ngar ngar te pawh hi a awm theih a ni.

A phute chawimawina tur dang chat a, a phulo zawk te lansarh tir a, chawimawi zawkna thin hi hnam tan a tha lo a, kan khawtlang pawhin a tuar a. Mihring rilru thianghlim a ti nu zo thin. A phu ngeia te hi chawimawi ila, fak ila, hnam tha zawk ni turin ke I pen zel ang u.