KAN MAMAWH LAND REFORM


Vietnam ramah hian 1975 hnulam khan Land Reform an kalpui a. Mi pakhat tan sq metre 360 zel an pe a. Chhungkaw member an tam deuh leh an nei tam a ni mai.

Chu ram chu kum 20 an enkawl a. An enkawl that leh kum 20 dang atan an renew leh thin. Tumah ram nei zau fal an awm lo a ni.

Khawvela buh thar chhuak hnem ber dawttu an ni a. Kumkhat vawihnih buh an seng a. Vaimim vawikhat an seng bawk. Tun hnaiah kumkhatah vawi thum thar theih buh an ching tan.

Vietnam lama an kalpui dan leh an hlawkpui dan kan sawi a. Vietnam tih dan kha i entawn ang u kan ti a ni lo a, Land reform mumal taka kalpuiin rah tha a chhuah theih thu kan sawina a mai a ni.

India ramah hian tun hma chuan Mi tlemtein ram zau pui pui mai an nei a. An ramah chuan mi tam takin hna an thawk hlawh chhe tete an nei thin a ni.

India ram a lo zalen hnu khan Land reform an han kalpui mai chu, A dan a dang ta kawk kawk mai a ni. Hei hi, Mizoram nen a inlet ling thawk a. Tunah chuan, Mizoram chu mi tlemte kutah ram zau pui pui a awm ta. Lal ban an nih a, VC te kuta khawtlang rorelna a tluk luh khan, hma thlir thui lohna hmalakna a awm nual. Chu chuan, vawiin thleng hian min la nghawng a, chumi zingah chuan ram theh, neih leh LSC thlengin a nghawng ta a ni. VC te ram pek,ram theh leh LSC chungchang pawh thui tak sawi tur a awm anga. Hre zawkten an la sawi, zir zel turah ngai ila. Administrative system inthlakin kan hnam a nghawng dan hi thui tak sawi leh zir tur a awm ang. Kan research scholar te pawhin an la khawih tam lutuk loh (virgin areas) deuhte pawh a nih hmel ka ti. An lo zir fe tawh mai thei bawk a, ka hriat a tlem thin em mai!

Land Ceiling Act an siam a. Mi pakhatin dan phal baka a neih theih chin aia tam a lo neih chuan an chhuh sak zel a. Hmasanga an thlahtute ta an rochun pawh an ta a ni zui thei lo. An ram tura phal zat chin aia tam chu a nei thiang lo a ni.

Hemi chungchanga Maharashtra leh Gujarat in an kalpui dan hi ngaihnawm tak a awm a.  Sawi thui lo mai ila. An dan (Act) hnuaia Tribunal thutlukna chu Judicial court-ah khin theih a ni lo.

 “Ka zinkawng” tih buah khan Ch. Saprawnga khan, Bawrhsap McDonald-a hoa District Conference an neih chungchang kha a ziak a. 1946 khan District Conference an nei a. Chutah chuan, kalkhawmte chu Bawrhsap khan, zawhna pakhat a zawt a. “Mizoram leilung hi tu ta nge?” tiin a zawt a. Chhan dan an hre mai lo a. “Lal ta” emaw, “Sawrkar ta” emaw tia chhang an awm a. Bawrhsap chuan, “A chhunga chengte ta a ni” tiin a chhang zui a.

Mizoram chhunga cheng ni mah ila, “Kan ta” tih tur neilo kan tam ta hle mai. Ram han lei ve duh pawh ni ila, Kan ram enkawl danin a zir lo a. Mi naran tan ram pawh lei mai mai theih a ni lo. A to lutuk! Nghawng thalo tam tak chu chuan a nei ang.

In khaw thenawm ram awl emaw intih te kha han zawt chiang teh u, Mi hausa tute ta emaw a lo ni fur tawh ang. Land Reform kan mamawh tak zet, kan harh a hun a ni.

 He lam

Land Reform tulna leh kan mamawhna hi kan hrethiam phalo nge, tuna kan kal dan diklo tak ang hian vanneih thut kan inbeisei zawk ni ang aw, ka ti thin! Land Reform awm tur hi chuan a man pek erawh angai.

Prime Minister Narasimha Rao kha brahmin a ni a. Ram acre 1200 chuang a nei a. Amaherawhchu, land reform a tuipui em em a. Andra Pradesh CM a  lo nih khan, Land Reform Act chu a passed luih pui a. Amah ngei pawhin, ram acre 1000 a chan a. Landlord hoin Land reform Act chu an duhlo em em a. Indira Gandhi hnenah an hek a. CM atan paih a ni zui ta thung.Amah chuan, “Aman engzah pawh pek ngai se, ka kaltlang pui ang” tiin a lo sawi tawh sa reng a ni.

Mizoramah chuan ram nei zau em em an awm a. Ram nei lo an awm teuh bawk a. Inhmun thlengin a to em em a, rapthlak tham khawpin a to a ni.

Kan ram hian Land Reform kan mamawh tak zet mai. Civil society, Land reform lama hmala tu tal hi awm sela aw.

National Treasure film tawpah khan, FBI Agent Sadusky-a khan, “The Templars and the Freemasons believed that the treasure was too great for any one man to have, not even a king. That’s why they went to such lengths to keep it hidden” tih kha a sawi a. Ka ngaihtuah nawn fo thin. Mi pakhat tan ram zau lutuk neih te hi a tha lo a. Sawrkar tan pawh a him lo a. Tu emaw hausa fal lutuk awmte thleng hian a him lo thei.

Hei hi ka thunawn a ni fo ang,Ram zau lutuk leh hausakna ropui lutuk hi mi pakhat kutah a awm hi a tha ngailo a ni.

2021-AH HIAN

  1. 2021-ah hian khawvel hian engnge a rawn her chhuahpui anga, engtin nge kan awm dawn kan hre lo a.Mihring chuan ruahmanna siam thiang a ni a. Duhthusam neih theih a ni a, tum neih theih a ni.
  2. 2021 hian mumal takin lehkha chhiar i tum ang aw. Lehkha chhiar thatna, hlawkna hi kan sawi thin a. A chhiartute pawhin kan tawng vek tawh ang, mimal tak pawhin sawi tur kan hria. Sim chi a ni lo a. Uar telh telh chi a ni.

Hnam anga dinchhuahnan te, Khawtlang nun siamthatnan te lehkhabu chhiar uar hi thui takin a pawimawh.

  1. Diary ziak theuh ang u. Memory tih changtlunna, tih nghehnan pawh a tha. Chumai a ni lo, a hunlaia kan ngaihtuahna te dahthatnan a tha.

Social mediaah kan opinion dengkhawng tak tak kan dah fo mai hi diary-ah ziak lut daih ila. Kan khawtlang, kan hnam, kan rama thil thleng hi chhinchhiah ila. A tul huna referencre a tan. Public Memory is short tih a ni a. Tuten emaw mipui min bum leh mai thin. News-in a sawi bak a hunlaia kan rilru puthmang hi record a tha.

US President paruka John Qyincy Adams khan kum 77 chhung a diary a ziak a. Tun hnu hian a buin an ti chhuak a. America History pawimawh tak pakhat a ni zui ta a ni. Ronald Reagan-a diary pawh a buin a chhuak. Anne Frank-i dairy pawhin khawvel a nghawng hi.

I diary ziak la, mi chhinchhiah loh, i nun, i chhungte nun, in khawtlang nun, in ram nun kha chhinchhiah teh.

  1. In ‘settle’ ila. Eizawnna nghelnghet nei sa kan awm anga, eizawnna nghelnghet la neilo, neih hun tawh si a awm theih bawk ang. Eizawnna nghelnghet neilo pawn nghet taka engemaw vawn tan kumah hmang ila. Kan vawn ngheh theih hmasak a piang vawn ngheh hi a pawimawh.

Hna hniam deuha lang hmusit tlat chite hi kan awm fo a. Hnam hniam leh sang hi zahawmna a ni lo a. A thawktu rilru leh a thawktu thawhdan a zirte hi a ni a. Bultanna sanga bultan hi chu mi tlemte zawk an ni.

Kan thawh theih ang thawh hmasak hi rahbi hmasa, sang zawk kalna tur ke penna hmasa a ni thin.

  1. Kohhran leh khawtlangah nasa leh zual zawkin tel teh ang u. Mahni tan ngawta nun hman hi hlimna a ni vaklo. Mi dangte tana enna thlenturin kohhran leh khawtlangah inhmang vaklo pawhin thahnem ngai leh zual zawkin i tel ve tawh ang u.

Kan khawtlang hi nuam se kan tih chuan, mi tihah dah loin, kan mawhphurhnaah i ngai ang u.

Lehkha kan zir zawhah, hna kan hmuh vek hnuah kohhranah inhmang chauh ila, khawtlangah te hian tel ve chauh ila.

Mizo hnam hi tu kutah nge a awm ang le!

Tunah phei chuan Mahni eizawnna thulh hi kan sawisel nasa si a. Kan eizawnna a kan hun hman zawhah chauh mi dangte tan leh kohhran leh khawtlang tan kan hun hi pe bawk chauh dawn bawk ila.

Eng hnamah tak chuan chhuak ang i maw..

Hnam hlim lo tak, hnam him lo tak, hnam inkawm ngeih lo tak, hnam mahni hmasial tak kan ni leh zual ngei ang.

Tunah hian kan tha em em lem lo a. Chutianga kan awm chuan, tun ai hian kan thasawt chuang hek lo ang.

Politics te hi mi dang kutah kan dah tlat a, mi dangte siamthatturah kan dah a. A chhunga lutte ring bawk silo, lut tharte ngaisang chuang silo, mahni luhtum bawk siloin kan awm a. Tu tih atan nge ni kan tih thin ni?!

Mi dangte tana hun hmang a, Pathian biakna hun insiam a, kohhrana rawngbawlna a te tangkai tum ila, kan hnaah theih tawp chhuah bawk ila. Hnam tana hun hmang theiin hun hmang bawkin, khawtlang tana tangkai thei tangkai bawk sela…

Hnam duhawm zawk kan nih ka ring e…

THINGSERH THLIRNA TAWI

-Ramlawt Dinpuia

Kum liam ta kha kum ṭha lo leh kum malsawm lo niin kan ngai tak nain, a ṭha zawnga chhinchhiahna tur erawh a awm ve nual a. Mizo hnam anga a ṭha zawnga kum pawimawh a nih theihna tur lian ber pakhat chu hripui leng vanga thil dang tih theih loh kara lehkhabu chhiar leh ziah lama hma kan sawn viau hi niin ka ring. Lehkhabu tlangzarh inkhawm a awm hlei thei lo chungin lehkhabu ṭha tak tak a chhuak nual a. Chu’ng zingah chuan kum tawp dawn te tak taka chhuak, ‘Thingserh, Ram leh Hnam din chhuahna’ F. Vanlalrochana ziah, Fraser Media and Publication-in an chhuah hi a ṭha ber zinga mi a ni ang.

Vawiinah khan ka order a lo thleng ve a, tlai lam aṭanga chhiar ṭanin khup mai mai a lo harsa deuh hlek a, ka chhiar zo thuai. A chhung thu luh chilh hma hauh aṭanga mi hip zar thei lehkhabu hi Mizo ṭawnga chhuak tawh lehkhabu ka chhiar ve phak chin zingah chuan a class ber pawl a nih rih ka ring – ka la chhiar tlem em mai pawh a!

Ram leh Hnam din chhuahna tih a nih ruih avang hian lehkhabu puithu run, chhiar har zet ang kha mitthla lo ula. ‘…khawthlir leh hmathlir min siamsak thei tur chi, tha thar min pe thei tur chi ni mah se inzirtirna lam erawh a ni lo a, “Ti rawh, ti suh” tia infuihna bu a ni lo. A ziaktu hian a chhiartute min fuih fawk fawk lo a, min zilh khur khur lo. Zirlaibu ang maia hlu, zirlaibu anga khawng si lo hi a ni a, rilru sukthlek dik neih theihna tur khawp, ṭang ṭeuha chhiar ngai ni si lo a ni.’ tia duhsakna thuhma ziaktu Lalhruaitluanga Chawngte sawi hian a tichiang.

Lehkhabu chhiar hrim hrim hi a ṭha a, lehkhabu ṭha chhiar phei chu a ṭha leh zual. He Thingserh hi lehkhabu ṭha zinga khung loh theih loh chi a ni a, mi zawng zawngin chhiar thei ila tia duhthusam khum tlak a ni bawk. Kan uar mah mah ti an awm a nih pawhin, keimahah chuan mahni chauha chhiar atan chuan a uiawm ka ti a, duhsak zawngte kawhhmuh leh present chi a ni ka ti.

Famkim lohna khawvelah kan la awm miau avang erawh chuan a famkim bik hauh lo a. Chhut sual palh a awm zeuh zeuh hi, a lehkhabu paper, kawm etc ṭhatzia ngaihtuahin a awm ang lo a, mit a tikham zual! Mi ropui tak tak chanchin a lam chhuah zinga Bobby Kennedy chanchin kim chang deuh zawk a awm ve lo hi ka lo ui. A thusawi ropui chungchang erawh a awm tho a.

Ka vawi khat chhiarnaa min hneh ber lai chu Mizo Sipaite Football Final khelh thu hi a ni a, Mizo hnam hming tiṭha tura kan pute’n ‘Mahni bi tum chhuah loh tur. Tihtluk reng reng tur’ tih thuvawn nei chunga thih ngama football final an khelh chanchin hian hnuk a tiulh thei! Kha khelmual kha Mizo hnam tana indona mual a ni miau a.

Pu H.K Bawihchhuaka chungchang a sawina ‘A Pathian thu awihna chu politics field-ah pu lutin, Politics field-ah a takin a ringtu nihna a tilang a. Biak inah a sawi ṭhin thung.’ tih hi a va han tawk tak. ‘Western values-a kan inchawm nasat poh leh kan hnam chu kan buai zawk.’ tih thu pawh hi ngaihtuah zui ngai tak a ni bawk.

Chutiang chanchin ngaihnawm leh mi cho thei tak tak te, khawvel ram ropuite din chhuah dan ngaihnawm tak tak te, hnam tana inhlan ral mi hmingṭha tak takte chanchin leh kan hnam tana zir tur zirlai, thiam leh ngaihnawm taka sawina lehkhabu hi chhiar a, zir tluk tluk tham a ni.

PUITLINNA TUR KAWNG HNIH

Mizote hi kan hnam a la naupan ang aiin khawvel tukverhah kan dak hmain, kan thlir zau viau a. Kan hnam la naupang tak tih dan kalpui la nei rei lo leh kan khawhmuh zau insual chuan kan hnam nun thui takin a nghawng niin a lang.

Intehnana kan hman hnamte chu kum 900 vel kal tawha in ropui tak tak lo sa thei, chung an insakte chu vawiin thlenga la dingte a la ni hlawm a.

Kan kalpelh tawh sulhnu hi a inthlau lutuk deuh hret a ni.

Mimal emaw, hnam ang emawa puitlinna tur hian kawng zawh tur tam tak kan nei a. Kawng hnih chauh i han sawi teh ang.

  1. Chhuah vah tam: Kan chhuak vak tam lo. Mahni veng sakei kan tam.

Section YMA ah kan inhmang a.Hruaitu kan ni a.Mahni vengah, kohhranah kan inhmang a. Kum tluana veng dangah zan khat pawh riak lo hi kan tam viau ang.Kan ngaihtuahna hian kan veng a pel tam lo thin.

Zin chhuaha mi chi hrang hrang tawn loh chuan hriat belh a tam lo duh ang reng. Mi fing, thluak nel leh fim kan tih reng reng hi. Zin tam emaw, hmun danga hnathawk tam, hna ngai pat nilo, hna nihphung nei hran thawkmi an ni duh fu.

Chutiang mi emaw, inhmanna diverse deuh hlek mi, mi chi hrang interact pui tam emaw an ni fo thin.

Thut hmun atanga khawvel rorel tum hi chu, a khirh mah mah.

Ka pa khan, Kohhran, Kohhran thalai, YMA a inhmang lo pawh Sports associationah tal inhmang rawh se a ti thin. A lo dik khawp mai. Inhmanna neilo, mahni room atanga khawvel thlir thinte an pun hnu hian kan heti zo ta a nih hi.

Mahni veng atanga hnathawh tum, awmna ngaia awma,hmuh ngai hlir hmu, che chhuak loah chuan thanna (growth) hi a awm mawh.

Aizawla mi hausa hlun pawh hi an khua atanga chhuk tawp, Burma rama chumi han phur tihte an ni thin. A awmsa ei tum leh kawng awmsa zawh ngawtah chuan kan kang thei lo.

Changkan tum na leh class ringawt khelhna hian engmah min nih tir thin lo

Khawvela hnam daih rei ho hi en ula…explorers, adventurers, sea fairer etc an nih vek hi. America ram an daidar chhoh dan pawh jedidiah smith…Kit carson etc ten mingo ho daidar loh ram an daidar a…journal an ziak a…lehkhabu an ti chhuak a…an hnung a lo kal leh zel tur tan kawng an siala. Charlie Goodnight-a bawng khalh kawng vanga sumdawnna lo inhawng zaua ram lo thrang ta te, Goodnight-loving trail (texas atanga colorado/denver/wyoming) kawng an sah hawn zawha bawngvulha sumdawnna lo thrangin american economy a chawisan dan etc sawi tur leh chhiar tur, a tam ang.

Ka’n sawi chhan chu, hnam anga kan than a thutna chu mahni inchhung lum kan lawm em mai, experience a zau thei lo a, finna tam tak kan chan bawk.

Kan thawnthu paw’n chhawrthlapui eng hnuaia tlangval lungleng stage a pelh mawh em hi.

2. Lehkha chhiar:

A dang leh chu, lehkha kan chhiar tlem em em a ni

Ngaihdan tlemte kan nei a. Thil tlemte kan hria a. Kan hriat bak hi dikloah kan ngai fo. Kan la hmuh loh chu awm lo, kan la hriat loh chu dikloa ngai hi kan tam. A ni lo nasa si.

Lehkha chhiar tam hi a tha a. Miin lehkha ka chhiar hman lo an tih hian ka awih lo thin. Ka pawm vaklo. Tum chuan a chhiar theih. Thil dang pawh a tih theih vek. Chhiar tam dan hi chu kan chhiar chak dan (reading speed) a zir a ni.

Lehkhabu hi civilization lungphum pawimawh tak a ni a. Lehkhabu chhiar uar hnam hi hnam damrei leh hnam daih rei an ni. Ram ropui hruaitu ropuite hi lehkha ziakmi leh chhiar mi an ni thin. Egypt ram ropui taka siamtu Ptolemy-a khan Alexandria hmunah library ropui tak a siam a. Lehkhabu pawh a lehlin tir teuh a nih kha. Septuagint te thlengin. Vawiinah Bible kan lo neih phahna kawng pawimawh tak a lo ni ta a ni. Julius Ceaser-a pawhin Gaul rama a campaign (indona) chanchinte pawh a ziak a, a ngaihnawm viau nghe nghe.

Hnam puitling leh hnam damkhawchhuak ni turin lehkha i chhiar uar ang u.

“Often I hear people say they do not have time to read. That’s absolute nonsense. In the one year during which I kept that kind of record, I read twenty-five books while waiting for people. In offices, applying for jobs, waiting to see a dentist, waiting in a restaurant for friends, many such places. I read on buses, trains, and planes. If one really wants to learn, one has to decide what is important. Spending an evening on the town? Attending a ball game? Or learning something that can be with you your life long?”-Louis L’Amour