CHAPO TAKA TLAWM…

Mizo ten Social Media kan hman thiam loh thu kan sawi fo a, kan la hmangthiam tak tak chuang lo a nih hi.

Engemaw thil thleng leh issue hlekah, dengkhawng leh lei kuai thei berin thu kan han post pawp a. Huaisen leh dikna duh nihna emaw kan ti thin nite pawhin a lang a, thenkhat chuan lansarh an khelh vangte hi a ni thin. Tunlai phei chu Youtuber an pung nasa a, an tihlan(Content) tur an uluk si lo. Mipui, ngaihthlatu leh entute tana tha leh tangkai leh hnam tana him a ni em? tih lah an ngaihtuah si lo. Eizawnna awlsam tak nia ngaiin, an monetize a. Thu mak leh danglam emaw hmanga thlirtu hip an tum a. Kan hnam ngaihtuahna hi sumdawnna satliah anga ngaih a ni ta a. A tha lo tak zet.

A then lah, an saruak thlalak lo post te, an mipat hmeichhiatna hmang lai, FB lama lo live ta mai thlengin kan nei ta!

Phone leh hmanraw dang, medium tha kan neih tak avang hian, duh duh sawi ve theiah kan inngai a, kan sawi te chu miin ngai pawimawh hiam hiam turah te pawh kan ngai bawk niin a lang thin bawk a.

Ram hruaitute lo bei ngar ngar mai te, kohhran lo bei ve ngar ngar mai te, YMA leh khawtlang thatna duhtute lo bei ve ngar ngar mai mai te hi kan awm kum tluan a. Thudik tluantling lo deuhte hi uar deuhin kan han bawlphuan a. Kan sawi lo tuipui tawk te te hi chu kan hmu ve zel bawk a. Social Media khawvelah hian kan so ve bulh buh mai thin.

Mimal demna leh khawtlang hruaitute chet dan te leh Damdawi In thawkte chet dan etc demna han post hluai te hi huaisen leh dikna duh miin min tise tih vanga han post hluai ching hi kan awm a. Rin ang ngei ngeiin, FB ah te, Whats app-ah te, Chanchinbu-ah te Ngaihdam dilna an chhuah leh hna hna thin.

Ropuia kan inngaih ang ai hian kan ropui lo a. Keini aia Force chak leh lian zawk hi a lo awm zel a. Chapo tak hian kan tlawm leh zal zal thin a. A hma lawka Pa em em mai khan, “Ngaihdam” kan dil leh hna hna thin.

Dik lo kan hmu tak zet a nih chuan, a beihna tur dik zawk leh a siamthatna tur kawng mumal zawk hi a awm. Khawvel hi kan ngaihdan angin a kal vel dawn lo a. Kan ngaihdan lo anga thil thlengte hi a dik lo vek tihna lah a ni hek lo.

Nung ho tur chuan mi dangte kan mamawh a, Khawtlang inhruaina hnuaia kan kun te, sawrkar thu kan zawm te, kohhran kaihhruaina kan zah te hi a ngai thin.

Thu hnu dawn lek loin kan han phul ve chiam a, Ngaihdam dil leh hna hna hi a ngai thin. Mi an hlim em em laia lo thinrim em em mai, Mizote thiltih apianga phunna tur lo hmu ve zel mai te hi nih loh tur. Thih hnuah ruh a mawih chak bik thin.

Mihring hian discipline te hi kan mamawh a. Mi dangin min rawn discipline hi chu nghah loh tur, a zahthlakin a tlawm thlak a, inti pa tak maiin, chapo taka ngaihdam dil angai thin. Mahni in discipline mai hi a tha.

Social Mediaa kan tel ve vang te, Smart Phone kan hum a, whats app leh FB a mi lian leh mi ropui ber ber te kan pawl ve phak avang hian anmahni ang kan va ni ve ta e tihna a ni lo a. Tia pui en a han en a, mi lian tak nia kan inhriat chiah phei hi chuan, kan che sual thin. Chapo taka tlawm leh vawng vawng angai thin.

19th Century American Folk Hero Davy Crockett kha Tennessee lam mi a ni a.  Tennessee congressman te pawh a ni nghe nghe.

Texas in zalenna sual an tum tih a hriat khan Texas a pan a. Alamo indona hmunah khan a thi ta a ni.  Santa Anna chaw chhumin a sawi dan chuan,  Davy Crockett a ruang chu mexican sipai 16 ruangin a hual a,  mexican zinga pakhat ruangah chuan Davy Crockett a chemte a la invit bur va va bawk!

Davy Crockett hian a sawi uar deuh pakhat chu,  “Always be sure you are right and then go ahead” tih a ni!

Mizo social media hmangtute hian hei hi kan mamawh hle!  Sawi tawh angin, Tute emaw sawiselna te hi kan han post pung pung a,  a tawpah ngaihdam dilna kan han post leh a!

Kan dik ngei a ni tih tih chiana,  chumi zawhah kan tihtur tul tih hi chin thin a tha.  Social mediaah kan dik tih puan kher a tul vek lo bawk a.  Mi dik lohna pawh puan kher lah a tul lo thei bawk.

Dik inti em ema khawsak a ngai chuang lo a,  dik taka nun a tawk mai.

Bible in kan thinlung vengtha turin min ti a.  Kan thinlung kan ven that chuan,  kan lei leh kan kutzungtang kan thunun thei ang.  Kan sawi loh tur tam tak kan sawi thin hi kan sawi tawh lo ngei ang.  Kan tih loh tur tam tak kan tih thin hi kan ti tawh lo ngei ang.

“Sawi tur i hriat loh pawhin,  sawi loh tur tal hre rawh”

-Chinese Thufing.

REIEK KOHHRAN BUAI THU (1963-1964):

Kan tunlai boruak hrang hrangah hian, tun hma lama mihlim leh thlarau thil duh lutuk avanga kohhran lo buai tawh ka hre chhuak deuh uaih uaih hlawm  bik a. Reiek Kohhran lo buai tawhna ka han sawi teh ang. Zirtur a awmin ka hria.

Reiek khuaah hian mihlim hoten buaina tum hnih an siam tawh a, a hmasa zawk chu Reiek hlimna hmasa 1937-ah a ni a, hemi kum hian mualphona nasa tak a thleng tawh a. An Pastor Phawka leh Upa Chuauthangpuia ban an tum tawh a, Pastor Phawks sakramen semte an ei duh Io va, chutiang chu a nih tak avangs missionary E.L. Mendus leh Pastor Chhuahkhama chu July 2, 1937-ah Reiek khuaah an kal a, July ni 3,1937-ab Kohhran Committee member thlan thatna an neihpui a, hetah hian Upa Kingbawnga leh Upa Hrangchhinga te an tla a, an thelh thei ta hram a ni. Mihlim in 6 an pém chhuak nghal bawk.  

Hemi hnu hian, kum 1963-1964 chhungah khan Reiek Kohhran hi an buai leh a. An buai dan chu hetiang hi a ni. 1962 Krismas lai vél atangin hlimna a awm thar a. Inahte zaikhawmin inkhawmte pawh an tha thei hle thin a. Hetih lai hian mihlim Chhawnluaia a lo lang a, Biak Inah thusawia rawih a ni a.

Hapta hnih vél hnuah chuan mihlim khaw fang ho an lo thlen belh zél a, chung hote chuan Kohhran hruaitute bel lovin mihlim hruaitu upa pakhat an bel thin a. Mihlim ho chuan Kohhrana an Zalénna daitu nia an hriatte tihkiansak turin Kohhran Committee hmaah thu an theh lut a, an zalénna daltu nia an hriatte chu

Khuang vuak muan,

Solfa zai, te a ni a.

Khuang pu thlak a, a aiah mihlim khuang pu dahte an ngiat bawk. Kohhran Committee chuan an duh dante hriat thiampuiin an thil dil chu a phalsak a, mahse, duh tawk chin an nei ta lo va, Kohhran Upa lam nék thei tira an rin deuh mihlim pawh ni lém lo mi thenkhatte hruaituah an dah ta a.

Mihlim ho chuan pawl an dina, ‘Reiek Kohhran Vantlang pawl’ an invuah a. Chairman, Secretary leh Treasurer te invuahin suangtuah phak lohvin Kohhran an tibuai ta a ni.

Upa Chhinga, Primary zirtirtu solfa thiam tak leh khuangpu chu Reiek atanga hnawhchhuah an tum a, Kohhran committee-in a remtih loh avangin chutih laia an bialtu Rev. Challiana pawh chu sawn chhuah dan tur an rél a. Reiek khawperahte leh senior  missionary Pu Lloyd-a hnénahte an hék a, mahse Pu Lloyd-a hian a lo be duh lo a ni awm e.

January ni 8, 1964 (Nilai zan) inkhawm chu an tibuai ta a Chairman thutnaa thu Upa pakhat chu an pawt chhuak a, a aiah vantlang Chairman Pu Leisanga an thuttir a. Kohhran thunun lai, inngaihna suala tlute 1ak luhna ban an phartir a, Kohhran Upa leh Pastor hnawhchhuahna ban an phartir bawk. Reiek Kohhran chu vantlang aiawhte kutah a awm ta tih an puang bawk. Hemi zan hian Rev, Challiana hi a hritlan vangin a inkhawm thei lo. Heng avang hian Synod hmunpui atang pawhin Reiek khuaah hian mi an intir ta hial reng a ni.

January ni 11, 1964 (Inrinni zan)-ah chuan inkhawm tan hmain buaina siamtute chu Biak Inah chuan an kim thawkhat tawh a. Vantlang secretary Isaaka, MNF hruaitute zinga ny chuan inkhawm Chairman thutna a lo chang vang mai a. Rey Challiana chuan chair dang a la a, a bulah chuan a thu ve ta a. Synod Moderator mi tirhte Rev. C. Pazawna leh Rev. Lalngurauva Ralte te an lo luh veleh chuan Isaaka chuan, “Aizawla kan hruaitute kutah inkhawmna ka hlan e,” a ti a, mipui zingah chuan a thu ve ta a.

Rev. Pazawna leh Rev. Lalngurauva Ralte ten thu an sawi zawh chuan inkhawm chu tihtawp a ni ta a ni.

Héng buaina siamtute hian Kohhranah sawrkarna chan tumin theihtawpin an bei a, hun a loo kal zél a, Kohhran committee term te a lo tawp a, building committee thlan thatte a lo hun a. Kohhran Upa thlan tar hi khawpera miten a result hriat chakin Reiek khua an rawn pan sup sup mai a ni. Inthlan result chu hetiang hi a ni. Dan zawhkim 356 zingah mi 353-in vote an thlak a, Kohhran lam hian vote 265 an hmu a, buaina siamtu lam hian vote 88 an hmu a ni.

Hetih laia Reiek Kohhran dinhmun chu hetiang hi a ni – In 106, Dan zawhkim 356. Hetiang hi Kohhran dinhmun a nih avangin ngaiawh leh turin committee chuan theihtawp a chhuah a. Tichuan, buaina siamtute chuan thupha chawi sela thain an hria a, Presbytery Standing Committee hriatpuiin an thupha chawi dan tur buatsaih a ni ta a. An thil lo tihsual tawhah inchhirin Pathian leh Kohhran hmaah ngaihdam te dilin an  hotu lawk mi 7-te chuan hming an ziak ta a ni. Mahse mi tlém té chu U.P.C leh I.K.K-ah te an awm ta a, a tam berte erawh chu inchhirin Presbyterian Kohhranah an let leh a ni.

Kohhran hian chhan neiin administration fel tak a kal pui a. A hun taka thutlukna siam a nih loh chuan, a hnulama a nghawng te chinfel hna hi a hautakin, a hrehawm zawk fo. Thil pawi tak a thlen hmaa huaisen taka thutlukna siam ngam hi kohhran commitee tan a pawimawh fo dawn a ni. He kan thilsawi Reiek ‘incident’ hi uluk taka chik tan chuan, zirlai pawimawh tak zirtur a awmin ka hria. Chhiartu tin kutah ka dah e.