“AW HALLELUIAH, LALPA ROPUI BER” L. Kamlova (1901-1988)

Mi thenkhat chu, hla an phuah hnem avangin hriat an hlawh a, an hla phuahte a tha em em veka han tih tur a ni a, entirnan, Rokunga te ang te. Hla tam tak phuah, a hla phuah tam zawk tha, ‘Chumi zat chu a phuah’ tih vanga hla phuah teuh, a phuah luih ho erawh tha vak lo, turtu vanga an phuah erawh tha tak tak si an awm, Lalsangzuali Sailo te ang kha.

Tunlaiah hian, Hla phuah ve hrim hrim tum vanga phuah an awm a, Turtu leh nawrtu awm chuang loin, Tingtangah emaw, Keyboard emaw an han thutchilh a, a thluk nena peih ve leh mai thei zel an awm bawk a. An hming erawh sawi lang lo ila. Mi hriat hlawh fu fu an awm bawk a.

Hla tam tak phuah, mi hriat hlawh hleklo pawh ka hria. Tui ve em em, thiam chuang silo te.

CZ Huala khan hla a phuah tam lo a, Mizo Kristian hla phuahtu hmasa zinga mi a nih avang leh, a phuah chhunte a that em avanga hriat hawlh, hriat reng hlawh tur a ni a. Pu Zawnghuala khan, hla pasarih a phuah a, pakhat a letling.  Amah ai pawha hla phuah tlem zawk a la awm a, L. Kamlova a ni.

L. Kamlova khan hla 6 chauh a phuah a. Mi hriat a hlawhna erawh hla pakhat chauh a ni. Kha hla chauh pawh kha phuah se, Mi thinlungah a nung reng dawn tho tho a ni.

L. Kamlova hi 1901 khan Lenchim khuaah a piang a. Pawl thum thleng lehkha zir, Synod Preacher exam pass-a Thuhriltu puitling ni pha a ni. Khawtlang hruaitu pawimawh, Indopui pahnihna laia ‘Biate Sipai’ an tih mai pawha lo tang ve tawh, Politics lamah pawh lo tel ve nual tawh a ni.

Thupuan bung 22:16, ‘Davida Bulpui leh a thlah, Varparh, arsi eng tak chu ka ni’, tih lai hian a rilrua luah reng thin a. A thinlungah hla chi a lo tiak a, hemi chang behchhana hla a dawn chhoh mek lai hian, Khawbung pa, Patea, hla phuahtu langsar takin a lo siam khalh a.

“Aw Lalpa, Davida leh a thlah Arsi,

I felna ram atan nangin min buatsaih” tih kha a lo neih khalh ta a. Hemi Patea hla hi L. Kamlova hian a duh em em mai a. An zinna lama, Arro khuaa an han lut chu, lenkhawmnaa an han sa chu, a sa ve thei ta reng reng lo mai a, “An sak rei poh leh ka tap rei a ni mai a, he hla hi chuan min vel nasa a ni. Nikhat leh zankhat chu ka tanpui a ni” tiin a sawi.

Amah pawltu thlarau chuan a la chenchilh reng a, Patea hla ropui behchhan chuan, Pathian ropuina leh A nihna leh zahawmna puanchhuahna hla ropui, “Aw Halleluiah, Lalpa Ropui ber” tih hla kha, 1923 khan a phuah chhuah ta a ni.

He hla thukzia leh rilzia hi chu, chai fe tham a awm ang.

“Tui leh leilung reng an dinchhuah hmain,.

Hriat phakloh Pathian i lo ni,

Ni leh Thla leh Arsi te zawng zawng khian,

I zarah enna ropui an nei ve” han tih te hi, Creation Theory khaikhawmna fel tak mai a ni nghal a, a fiah em em mai bawk si a ni.

 

“Thuneihna ropui, Chawimawina Sang ber

Malsawmna nei tlak i ni e

Leilung pianlaia talh tawh beramna

A thisenin khawvel chhandam rawh se” tih lai chang te hi, Reformed Kohhran innghahna pakhat, Ruatlawk Thurin khaikhawmna fel tak a ni. A tir atang rengin Chhandamna kawng inhawnsa dan kha tawitein a sawi fiah then mai a ni.

A thluk a mawiin, a dam dap a. Hymn tak tak a tling a ni, a thu leh thluk inbelhkhawm hi.

L. Kamlova hian hla paruk a phuah a, a tha em em vek mai.

  1. Aw, Halleluiah Lalpa ropui ber
  2. Hrehawmnain a tuam vel
  3. Lung min len, ka thlir ning dawn lo
  4. Aw, Kalvari Thingchungah chuan
  5. Hringhniang nau ang a tap
  6. Suihlunglenin, Rinin han thlir ila

A hla zawng zawng hi tun thlenga sak hlawh tak tak vek an la ni, a tih theih awm e.

L. Kamlova hian 1930 hnu lamah hla a phuah tawh lo a. “Miin hla phuah thiamah min ngai a, phuahsak turtein min ngen thin a. Pathian min pek bak hi chu ka phuah thei lo a ni” tiin a sawi. Pu Zawnghuala hla phuah hun chhung pawh kha, 1921-1930 inkar a ni. Patea hla phuah hun chhung kha, 1920-1937 niin B. Lalthangaliana chuan a sawi bawk. (Mizo Literature p. 172).

1940 hmalamah khan, mizo kristian hla tha leh hlun ho hi an lo phuah tam zawk niin a lang. Mizoram kha ramthim tih theih kan la nih lai, Ringtu hmasa ten thil dang zawng aiin Pathian chauh an thlir lai leh Pathian thu buin a sawi ang chauh nun innghahna tura an ngaih hun lai, Bible thu zawm tum bur mai mi an nih hunlai (I ni min pek hi. p 13 by Rev. Zairema), harhna in thlipui ang maia nun a sawi bihbihleh hunlaia khan Mizo Hymn tih theih tur ang chu a chhuak tam ber niin a lang. 1920-1940 hi Golden age of Mizo Hymn emaw kawng danga sawi chuan, Mizo Lengkhawm zai hun rangkachak te pawh a tih theih ang.

Kan hla hmasa phuahtute kha chu, thlarauin a pawl a, Pathianin a hruai a, Fakna hla ropui leh chullo tur an phuah a. “Hla ka han phuah teh ang” tiin an inkhung hrang kher lo a, an riakkhawm lo a. Anmahniah Tinungtu thlarau khan eng a hmuh tir a, an hlate khan ram a la zau em em thin.

L. Kamlova hi 1930-1984 chhung khan chawlloin Sunday School zirtirtu-ah a tang a. 1944 khan Kohhran  Upa atan nemngheh a ni. 1968 khan Aizawl a lut a. 12th November, 1988 khan, a lung ti leng em em thintu, Rinna mita a han thlira a lo hmuh lawk thin, ‘Vanram ropui’ chu ITI veng, Aizawl atangin a pan ta a. “Tui leh leilung renga an dinchhuah hma atanga hriatphakloh Pathian’  hnenah a chawl kumkhua ta a ni.

L. Kamlova chu a thi tawh a. L. Kamlova chu a damreng ang. Vana arsite angin mawi takin Lalpa kiangah a eng kumkhua ta a ni.

 

Published by

admin

Ka hunawlah lehkha ka ziak thin.

One thought on ““AW HALLELUIAH, LALPA ROPUI BER” L. Kamlova (1901-1988)”

Leave a Reply

Your email address will not be published. Required fields are marked *