BOOK REVIEW LEH MIZOTE

‘Criticism’ hi literature peng pawimawh tak a ni a. Literature peng dang te nawr kaltu leh ti hmasawntu a ni. Eng hnam pawh criticism-a an san chuan an literature hi a ropuiin a zirtlak thin.

Criticism-ah chuan peng hrang hrang a la awm leh a, chu’ng a peng hrang hrangte erawh chu chhu zui  lo mai ila. Chu’ng Criticism zingah chuan Book Review hi a lar leh tlangtla pawl tak a ni awm e. Mizote hian kum 1970 chho vela tang khan Book Review hi kan uar  tan niin a lang. Prof. Siamkima chuan kum 1973 January thla chhuak MZP Chanchinbu-a R. Vanlawma lehkhabu Ka ram leh Kei a review-na chu Mizote zinga Book Review hmasa ber niin a sawi. Amaherawhchu, hemi hma deuh hian Didakhe lamah Rev. Beiseia chuan lehkhabu bihchianna pariat lai a lo ziak daih tawh a. 1972 January thla a chhuak tan, Didakhe hian a chhuah tirh phat atangin Book Review huang meuh siamin an lo buaipui tawh a ni. Kan Theologian te hi lehkhazir san leh thukna (Scholarship) lama kan neih that hmasak te an ni a, hetih kawnga hma an lo hruai hi a awm lo lem lo.  Engpawhnise, mizote zinga book review tilar tu leh criticism chawinungtu ber chu Prof. Siamkima kha a ni chiang mai! Kan theihnghilh thiang lo a ni.

Prof.  Siamkima inhman vanglai hian book Review chu a rawn alh chho a. MZP Chanchinbu leh Thu leh Hla lamah te lehkhabu thlirna chi hrang hrang te a lo lang chho nawk a nih kha. Lehkhabu Thlirna lama kut kan thlak uar chhoh tirh leh khatih hunlaia boruak thenkhatte kha chu a ngaihnawm khawp mai a. Criticism lama kan la hniam zia pawha  ti lang bawk awm e!  Peter Lianhleia’n James Dokhuama Novel ‘Thlahlei Nga zan’ a review-na chu amah James Dokhuma khan a la na khawp mai a, ‘Kan ti leh ngam dawn em ni?’ ti hialin a thawm a rawn chhuah ve bawk a. Kha kha James Dokhuma tihsual nia ka hmuh ve thung a ni a. Peter Lianhleia kha a sawi ang kha sawi tir mai se, James Dokhuma kha chuan khatiang khan rawn ri ve loin a ziah ngai kha ziak zel mai se tha ni mai tur! Lehkha ziaktu an awm anga, review tu an awm ang a. A ziaktuin insiam thatna a mamawh a nih chuan, a insiam tha mai tur a ni.

Book Review hmasa thenkhatte a standard a san viau lain a then erawh a standard a hniam hle thung. Mimal inbeihna kawk lek lek te, inhmuhsitna rawng kai lek lek te a awm zauh zauh a. Chu erawh chu, critic a zir kha a ni a. A ziaktu te chuan a ziak ve zel mai tur a ni. John Keats-a pawh kha a rilru a na viau a nih kha. A hunlaia Critic te khan an lo beina deuh thin a ni mai thei. Byron-a phei chuan khatih laia critic te kha Keats-a thattu ang hialin a sawi a nih kha!

Mathew Arnold-a pawhin Victorian hunlai khan critic tha an mamawh a ni tih a sawi chhuak a. Lehkhabu tha em em lo leh fahrah te te kha a lar em em a. Ziaktu talent nei chhe zawkte’n fak an hlawh a, an lar hluai a. Ziaktu tha leh thuziak ropui zawkte an hlu lo zawk kha critic ten an tha an thawhloh vangin a ngai a. Literature khalh kal hna chu critic te’n an thawh torah a ngai a nih kha. Tunlai Mzioram nen pawh hian a inang awm hle mai.

Keivom-a book review thenkhatte kha tha tih deuh deuh ka nei a. Mafa-a pawhin book review chhuanawm tak tak anei nual a. Periodal ang chiah Lalhruaitluanga Chawngtein kutthlak tah deuh deuha  nei nual a. Zikpuii pa book review , B. Lalthangliana lehkhabu ‘Ka lungkham’ a review na kha mizo book review-ah chuan a standard sang ber pawl a ni awm e. Kha kha Book Review ziak tura mi cho chhuak tu a ni.

Book Review ziah dan hi chi hnih a awmin ka hre ve a, chutiang a ziah ve ve chang chu ka nei a. Ziah dan chi khat chu, Periodical vela chhuak chi, a lehkhabu chhuah tirha a lehkhabu tih larna leh mipui nawlpui hmelhriatna tura thehna leh , literary review tak tak tling pha deuh a ziah hi a awmin ka hria a. Lalrammawia Ngente lehkhabu ‘Hringnun Hlimthla-2 chhuah tirh October 7, 2005-a  Aizawl Post chanchinbua  a review na ka ziah kha, review dan kawng khatna angchi,  lehkhabu tihlarna leh tlangtlakna tur zawnga ziah a ni  chu niin ka hria a.  Ka review na dang amah Lalrammawia Lehkhabu tho ‘Thlaler pangpar’ te, C. Lalnunchanga ‘Pasalthate NI hnuhnung’ ka review-na te erawh hi chu Literary Review pangai ang chi, review dan chi hnihna ka tih ve te chua ni.

Khawvel pum huap ang chuan New York Tim es chanchinbu-a review chhuak thin chu ngaihsan hlawh em em mai a ni a. Reviewer te pawhin mi zah an kai. Mizoramah chuan Sabereka Khuangkaih chanchinbu hi book review chawinungtu leh kalpui tha ber a ni hialin a rinawm. Mizo Academy of Letters-ah hian Book Review a chuang zauh zauh bawk a. Duh aiin a chuan zinna ber torah hian a lang tlem a. Tin,Book review  standard sanna ber chanchinbu niawm tak si hi book review chuang zauh zauh thin te hi a srandard  a sang tawk lo fo.

A tlangpuia thlir chuan, mizote hian book review hi kan uar ang huin kan tawng chin a la hniam hlein a lang a. A lehkhabu chhung ril zu luhchilh leh zirchianna tak tak hi kan thleng mawh khawp mai a. Kan book review na kawngah  hian ‘Critical reading’ kan tlachhamin a lang a. Tan kan lak leh deuh pawh a tul ang. Tin, kan duh ang kan sawi chhuak ngam tawk lo a. Literary Circle hrim hrimah pawh ‘Critic’ te hi kan la dawngsawnmg thiam tawk loin a lang a. Mipui nawlpui phei chuan kan la hrethiam lo hle niin a hriat. Kan mithiamte’n tih tur an nei thuk hle.

Mizo Literature chanchin hi chik leh zuala kan zirchiante pawh a tha tawhin a lang. Thu kan ziah tanna pawh kumza a inbang liam tawh a. Kan Criticism chanchinte hi mumal taka kan zira kan ziah a hun tawh a. University thlengin mizo literature a zir theih ta a. Mizo literature-ah Professor hial kan lo nei vet a. Ham kan sawn chho zel torah ngai ila. University lam pawhin awmze neia helam zirchianga chhinchhiahtu tur bik te nei hial se a duhawm hle a ni.

Kan thutawp na chuan, hunengemaw chen ka lo sawi ve ta, mizo literature-in a mamawh ber chu critic tha hi a ni tih hi. Creativity leh originality chungchangah mai pawh kum zabi sawmhnih pakhatnaah tawh pawh kan la inhnial chiam mai a. Critic tha tak tak lo chhuak se, mizo literature inseam rem mek hi khalh kaltu lo ni se, mumal taka kan literature te hi a lo inseam rem theihnana puitu leh mit ti vartu lo chhuak thei se a duhawm hle. Tuna kan dinhmun dik tak hi chu, zirlaibua kan zir tam takte angte  hi chu duhthu an la sam lo hle tih hi a ni. A dang a la awm miau lo a, kan zir a. Hei hian mizo Literature dinhmun chiang takin a sawi lang bawk awm e.

Criticism lama kan than dan ang zelin kan literature hi a thang ang.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *