Category: Chanchin

MIHRING THA

1965-ah Singapore hi Malaysia in a pet chhuak a. Singapore chuan engmah an nei lo. Natural resources an nei lo a. Mihring 1.9 Million zinga a chanve chu hna nei lo an ni bawk. CHutiang dinhmunah chuan Lee Kuan Yew-a chu a mittui a tla hial a ni, a mangang chu an ti.

Mahse, khawvel ram hrang hrang tih dan an en a, an hnam tana tha ber turin an hre rem zel a. An hotu ber, a dikin a rinawm bawk a. An indan tirha Corruption leh drugs in a tih buai hnam te hian kum 50 chhunga an thlen chin hi a ropui hle.

System thalo kara mihring tha ten, system tha siamin hnam ropui tak an din a nih chu.

Lee Kuan Yew-a hian, “System tha chu kan nei ngei mai. Mahse, system tha ai hian mihring tha an pawimawh zawk a ni, Mihring thalo an lo lal vaih chuan, system tha kan neihsa chu an ti chhe vek mai dawn a ni” a ti a. Mihring tha, hruaitu tha nei reng turin Singapore hi an tang mar pat reng a ni. Good Men vrs Good System tih hi Governance in Singapore tih subject-ah point pakhatah kan ngaithla nghe nghe a ni. Society tha nei tur chuan Mihring tha an pawimawh a, mihring tha nei reng tur chuan society tha an pawimawh a ni.

System thalo atang mihring tha an lo chhuak theiin, an lo chhuak fo a. Mihring thalo erawh chuan system tha sa pawh a ti chhe zawk thin.

Kan duh phawt chuan mihring tha hi kan ni thei vek a ni. A system kan puh a, an lo tih tawh thin dan kan puh a, that tum chuang loin, mi lo khawsak tawh dan ang kan va zawm zawk fo.

Kan khawtlang, kan ram leh hnam chuan mi tha- Mi rinawm, dik, danglam ngam, ruahmanna siama bawhzui thin, hmalak tum, hmalatu, teirei peih, mahni indahtha ngam, chan ngam,hloh ngam, hmala ngam a mamawh a ni. Chutiang mi chu kan ni thei vek a ni.

An lo tih tawh dan zawma, mi pangai sa pawh thalo sawt zawk loin, tih dan tha zawka ti ngam, tih pui ngam kan nih ngam a ngai. Keimahni zawn theuha, kan theihna ang zelin chutiang chu kan ni thei theuh a ni.

LAL ISUA ZUI MAN (the cost of discipleship – Bonheoffer thlirna)

“Tupawh a nu emaw, a pa emaw keimah aia hmangaih zawk chu, ka mi ni tlak a ni lo; tupawh a fanu emaw, a fapa emaw keimah aia hmangaih zawk pawh, ka mi ni tlak a ni lo. Tupawh a kraws pua mi zui lo chu, ka mi ni tlak a ni lo. Tupawh a nunna hmu chuan a chan ang a; keimah avanga a nunna chan chuan a hmu ang.” Mathaia 10:37-39

The Cost of Discipleship, Dietrich Bonhoeffer-a ziah hi a ngaihnawm em em mai a. Lehkhabu ropui a tling. A ziaktupa chanchin pawh a ngaihnawm. A hunlai kohhranin Hitler-a an do ngam lo te kha diklo a ti a. London atanga hawin, Hitlera do ngam kohhran awm chhun, Confessing Church pawh a din hial a. Lal Isua zirtirna anga sual a do avangin a nunna thlengin a chan phah ta hial zawk a ni. The Cost of Discipleship lekhabu hi tawitein I han thlir teh ang.

A BU CHHUNG THU TLANGPUI:

Mitinin hnathawh hrang hrang kan nei a, a then chu, sumdawng, a then sipai, a then kut hnathawk, a then roreltu- Lal Isua zui, a thu zawm tih hian kan tan engnge awmzia a neih ang. Tunlai khawvelah hian Lal isua khan eng angina nge awm se min duh ang? ‘Tlangchunga thusawi’ behchhan khan, Dietrich Bonhoeffer-a khan a chung a zawhna te khi he lehkhabuah hian a chhang a, a ngaihnawm hle.
Lal Isua zui man to zia sawiin, Lal Isua’n mi a kohin, “Lo kal la, thihna hmachhawn rawh” a ti a ni, tiin a ziak hial a ni.

He lehkhabu hi hlawm liah then a ni a, Hlawmkhatna chu ‘Khawngaihna leh zuitu nun’ a ti a. Hetah hian ‘Cheap grace’ leh ‘Costly Grace’ chungchang a sawi a. Cheap Grace chu simna tello inchhirna, Kohhran Inthunnuna ngai pawimawh miah loa kohhrana tel vena, Lal Isua zui tak tak tumlohna, kraws pu lo khawngaihna, Lal Isua thihna leh thawhlehna leh keimahnia a chenna tello khawngaihna, a nuam, hahdam leh keimahni mil zawnga thil herremna hi a ni a. (p. 45). Kum 80 vel bawr kal taa ziah ni mah se, vawiin thleng he thu hi a la dik a ni. Mizo Kristian tam takte chan pawh hi Cheap Grace hi a ni. “Chhandam tawh chu chhandam a ni reng” tih hmangsualin, zuitu nun hahdam kan thlang a. Kohhrana kan ngaihdan leh kohhran pawnlama kan ngaihdan a inletling thawk a. Kohhrana lucky ticket duhlo tuin, YMA-ah chuan, mihring ngai thoin lucky ticket kan buaipui leh tho si. “Costly grace” erawh chu, “Leia ro phum ruk; chumi chang tur chuan miin a neih zawng zawng a hralh phahna. Lungman tam, chumi man atana sumdawngin a bungrua a tihral vekna. Lal Isua thu zawm tlukna, Titlutu mit chu kher chhuahna, Lal Isua kohna avanga a sangha manna len lawng miin a kalsan chu a ni”, Bible-in khawngaihna a sawi tak tak, tuar tura kohna a ni ve thung. Mahni nun hial chan ngai a ni.

Chumi zawh chuan, Bonhoeffer-a chuan, Tlangchunga thusawi chungchang a khel chho zui ta a ni. Tawngtaina chungchang pawh sawiin, Pathian chu kan mamawh hre vektu a ni tih hrereng chunga dil tur a ni a ti (p. 165) Kristian nun chu, Thlarauin hmanraw awm thei ang zawng zawng hmanga tisa thilte a dona a ni, a ti. (p. 171). Chu induna chu hautak hle mah se, chutiang tura min kohna a nih avang chauh chuan, hnehtu kan ni thei a ni.

A then tawp ber dawttu hi “Thuchah kengtu”, tih a ni a. Matthaia 9:35-10:42, a sawizauna a ni a. Chanchintha hriltura kan mawhphurhna a chaina a ni. Pathian ringtu, Lal Isua thu kengtu kan nihna anga kan tawrh tur chu, chiang kek kawk takin a ziak a, “Nikin ni thlenga huat kan ni anga” “Sakhaw atchilh. Remna leh muanna tichhetu a sawi kan ni ang” (p. 215). Kan tawrh tur ang zawng zawng karah pawh, Bonhoeffer-a chuan, mihring chu hlau lo turin min ti a, Mihring kan la hlauh che u chuan, Pathian kan hlau tawk lo tihna a ni a, Pathian tih tak tak chuan, mihring a hlau tawh lo a ni a ti.

A thentawp berah chuan, kohhran chungchang sawiin, Ringtu mimal tinin Lal isua kan zuina kawnga kohhran mawhphurhna leh tihtur a sawi a. Kohhran chu Leia Lal Isua taksa hmuh theih a ni tih sawiin. (p. 259), he a ngaihdan vang hian kohhran inrelbawlna leh inthunna a dahsang em em a, Thu emaw thiltih emawa rinnaa kan unau a lo tlu a nih chuan, kohhranin thununna leh zilhhauna a lekkawh ngei tur a ni, a ti a ni. (p. 290). Kohhran chuan khawvel thilte a do ngam tur a ni a, ringtu kal dik lo, ram hot ulu ber pawh nisem a thununin a sawisel ngam tur a ni a ti a ni.

A ZIAKTU: Dietrich Bonhoeffer-a kha German pastor a ni a, rawngbawltu ropui leh huaisen zet mai a ni. Theologian thiam chungchuang a ni a, nazi vanglai hunah huaisen takin a dodalin a sawi sela, man a tawk a, an tihlum ta nghe nghe a ni. A lehkhabu ziak leh ama nun pawh hi a inhmeh hle a ni.

Bonhoeffer-a an tih hlum laia a mit lo hmutu chuan, hetia hian a sawi, “ Pastor Bonhoeffer-a chhuata  thingthi a, a thinlung leh tih tak zeta a tawngtai lai chu ka thlir reng a..CHu mihring duhawm tak mai tawngtai lai chuan, ka thinlung chhungril a fan vang vang mai a ni. Pathianin a tawngtai kha a lo ngaithla a ni tih amah khan a hrechiang e mem a ni Amah an tihhlumna hmunah pawh chuan, dawhsan a lawn hmain tawite a tawngtai leh a. Chumi hnu chuan, kailawnah chuan a pen chho a, zam hmel reng reng hi a pu lo a, muang dam dapa ke penin a hlau hauhlo a ni tih chu a chiang em em a ni. Reilote hnuah a thihna chu a lo thleng a. Kum 50 chhunga daktawr hna ka thawh chhungin, Chutiang reng renga Pathian kuta innghat pumhlum chunga thihna hmachhawntu chu ka hmu hauh lo a ni” tiin.

A thusawi hnuhnung ber chu, “Hei hi chu tawpna chu a ni ngei mai, ka tan erawh bultanna chuah a ni e” tih a ni.

Lal Isua kan zui avang hian kan neih, ro sum leh pai leh kan nunna hial pawh kan chan a tul thei a ni.

“I kristian nun khan, Ringlotute pawh Pathian an rinlohna a rinhleh tir hial tur a ni”

RAWNGBAWLTU ROPUI REV.DR. RK NGHAKLIANA

Kan Naupan pan lai khan, “Isua neih ka duh zawk” tihte, “Khawngaihna mak” tihte lettu, Dr RK Nghakliana chuan, Durtlanga daktawr hna bansanin missionary-ah a in pe an tih hi ka hre thin a. A chanchin ka ngaihven fo nain hriat chhunzawm tur a awm lem lo a. A passport size thlalaka kha ka hmu tawh a. Pa hmeltha leh zahawm tak mai a niin ka hria a. Tun hnuah a nau Upa Dr LN Tluanga thuziak leh Pu Rk Lianzuala thuziak atangtein a chanchin ka han hriatbelh leh a.Ka peih ang chin tawk ka han ziak chhuak ve leh dawn a ni.

A hming pum diktak chu Lalnghakliana a ni nain, a hnu lamah chuan RK Nghakliana a inti ta a. Hla lama a sulhnu chu Kristian Hlabu-ah hian hmuh theihin a awm nual.

Mi rilru nghet, mahni inring tawk leh luhlul tak mai a ni a. Rimawi leh infiamna lam pawh a ti thei hle. 1949-ah Matric-a pass a. St. Anthony’s College-ah I.Sc a zir chhunzawm a. 1951-ah a pass a. Presbyterian Kohhranin vellore-a MBBS zir a, thawk zui nghal tur a zawng a. Chumi atan chuan In pein, Christian Medical College, vellore-ah a zir chhunzawm a. A zir chhungzawng hian Mizoramah haw miah loin a awm a. 1957 khan MBBS a zir chhuak ta a ni.

MBBS a zir kum hnihnaah hian John Moody-a rawngbawlna kaltlangin Piantharna a chang a. Doctor hna chu a thawh tur niin a hre ta lo a. Synod Hotute hnenah, Chawlhsana Missionary-a chhuah a dil a. Pi Puii chuan, “Nghak-an a zir zawm dawn loh chuan, thawk tur an awm lo ang. Damdawi In khar mai angai ang” a tih avangin a zirna chawlhsan an remti ta lo a. A zir zo thak a. Kum 12 chhung Doctor dang an awm ve leh hma chu durtlng damdawi Inah a thawk zui a. Doctor dang an rawn awm ve hnu, 1969-ah doctor hna bansanin Missionary turin a chhuak ta chauh a ni. A nghak rein, a dawh thei hle mai. A entawn tlak tak zet. Tiin a nu leh pa a chhanga; mahse, thuawih takin, Pathian Fapa meuh ni mah se, a hun a thlen hma chuan, an thu hnuaiah a intu lut hmiah mai a, an thuneihna pawmin an thu a zawm a ni. Lal Isua hnung hi ka zui ve tur tih Pathianin min hriattirin ka hria” a ti a ni. Hetah ngawt pawh hian zirtur tam tak kan nei awm e. Tunlai mite hi chu engkawngah pawh hian kan hmanhmawh thin a, kan hun a thlen hun tur kan nghak theilo thin a. Kan chesual thin.

1957 khan Durtlang damdawi inah daktawr hna a zawm a. Mizo daktawr zinga Durtlanga thawk hmasa ber a ni. A zirna chawlhsana Missionarya chhuah a dilna phalsak a nih loh thu a hriat kha a lungawi lo hle a. Synod hotute pawh a dem lek lek a. A tawngtai hu chuan, a rilrua Pathian thu lo thleng chu, Luk 2:5, “An thu zawmin a awm a” tih kha a ni. Amah Dr. RK Nghakliana tawngkam ngei hi han la chhuak ila, “ A hma lawkin, ‘Ka pa in aka awm tur hi in hre lo em ni?’

Kum 13 chhung Missionary evangelist hna a thawk a. 1985-a an nupaa Scotland-a rawngbawla an kal laiin, a cancer a ni tih hriat chhuah a ni a. A hnu reiloteah kum 56 mi chauh niin a thi zuita mai a ni. A uiawm hle a ni.

Tuna kan Kristian Hlabu hman mekah hian a hla lehlin 10 a awm a. Chungte chu No 161-na “Ka nunah danglamna mak tak mai a thleng ta”, 165-na “I sual ritphurh tihbona I duh em?, 184-na “Engtin nge ni ka chhandamtu”, 261-na “Isua neih ka duh zawk”, 292-na “Chhandamtu nung rawng ka bawl”, 337-na “Nunna hrui thlung r’u, Tuifawn hlauhawmah” , 415-na “Hriatchianna hlu ber, Isua ka ta”, 432-na “Khawngaihna mak, mawi leh duhawm”, 450-na “Lalpa, I thu ni zel rawh se”, leh 494-na, “ Isua hnenah ka him a” tihte a ni. A hla lehlin thenkhat, Kristian Hlabu-a chuang ve chiah lo ho pawh hi hla lar tak tak a ni hlawm. Isua ka tan engkim a ni, Sual thuk taka pil tawh hnu, Rorelna ni ropui. Chawngzawng pawh a hawisan lo, Ka phur Isuan min chhawk a, I Chantur chu ka thian I dawn tawh em? Tihte a ni. Hla lama a sulhnu min hnutchhiate hi a thain a mawi hlawm em em mai.
Dr RK Nghakliana rawngbawlna kha han sawi zui leh lawk ila. 1969-1971 inkarah Singapore-ah Discipleship Training Centre-ah a zir a. Hemi kar lakah hian, Shillong leh Zoram pawn hmun hrang hrangah rawngbawlin hun a hmang bawk a. Singapore atanga let hnuin Synod Mission Board tirhin, BMMF Internationalah a thawk zui a. Lucknow leh Delhi-ah te awm thin a ni.

1979-a Bungkawn Kohhran Biak Ina KTP Silver Jubili lawman leh General conference hman tumah khan speaker a tan hman a ni a. A thupui chu, “Kal ula” tih a ni a. Hemi tuma a rawngbawlna nghawng chhuah missionary tam tak an awm niin an sawi. 1984 harhna lai khan dawrpui Biak In-ah campaign speaker atan hman a ni leh bawk.

A Pianthar danah khan han kir leh lawk ila. A ngaihnawm phian mai a. Vellore-ah chuan, College zirlai leh zirtirtute chu tawngtai leh Bible zir hoin an lo inhmu khawm thin a, Dr. John Moody-a hoin an ti thin a. RK Nghakliana pawh chu a tel ve chho ta a. Hetianga an inhmuhkhawmna atang hian, “Misual, Pathian pawm tlak loh” a nih zia a inhre chhuak ta a. John Moody-a hnenah chuan, “Kei misual hi engtin nge Pathian thianghlim nen kan inzawm theih ang?” tiin a zawt ta a. Moody-a chuan, Isua kraws zarah Pathian nen kan inzawm dan chu a hrilhfiah a. Amah pawh chu, chiangta kuar hian a inhria a. Chutah chuan, ngaihthatna tak tak a la nei chiah lo deuh a. Amaha Rinhlelhna awm chu, a la tlafai chiah lo deuh a ni.

Moody-a bawk chu a pan leh a, Nghakliana hnenah chuan, “A nih leh arsite khi inrem felin Liana chuan Isua a rin avangin Chatuan Nunna a nei tawh tiin inziak sela I ring angem?” a ti a. “Chutiangah meuh chuan ka ringhlel tawh lo ang” tiin a chhang a. Moody-a chuan, Johana bung 5:24 leh Matthaia 24:35 a chhiar tir a. “Arsi remkhawm a inziak vana lo lang I ring dawn a nih chuan, arsi chu ral tur a ni a. Pathian thu ral lo tura inziak hi ringla, pawm la, thlamuanpui mai ta che” a ti ta a. Nghakliana chu, thlamuang taka awmin lawmnain a lo khat ta a ni. A hnu lamah pawh Mizorama a haw chhoh pawhin miin titi dang an sawi chuan, a ngawi tlat a, Pathian thu an sawi erawh chuan hlim takin a titi thin a ni. Hei pawh hi zirlai ropui tak niin ka hria.

Agape camping Centre, Durtlang ami pawh khi Rev. Dr. Nghakliana’n, ama ram a thlawn liau liau-a a pek a ni. Pathian ram tana a thahnemngiahna hi ropuiin a chhinchhiah tlak hlawm hle a ni.

Pu RK Lianzuala khan , 21 March 2015-a FB status-ah ‘Tumkau ni sabengtung” tih a ziak a. Chutah chuan, Dr RK Nghakliana leh midang chanchin a hnuaia mi ang hian a ziak lang a ni. “Heng kan mi huai chhuanawmte hian engkim chàn huamin Lalpa rawngbawl an thlang a, engkim neitu-in a vûr thung. …….. Dr. RK Nghakliana khan zunthlum leh thisen sang nena Lalpa rawngbawl tura a pên chhuah hnuah, Glasgow khawpuiah a sermon hnuhnung lam a sawi a nih kha. ….

An chanchin hi Mizoram rawngbawlna chanchinah hian a dum fiah bikin, Bold letter-a ziah a ni tawh ang. Mihring mihrinna-ah kan ngaisang a ni ngawt lo, Tumkau Ni-a sabengtung ang khan, an chunga chuang, Isua avangin kan fak a, “Amah a lan hun apiangah ropuiin an lang ve” a ni chauh zawk.

Kan Pastor rual te, kan Evangelist hote hi en ila, an huat thu suhah, hman ni lawka tuihâwk luan kawra mu ve mai te, lehkha zir laia ngawng ve fe-te pawh an ni ang, mahse tunah chuan ar bawp an khel séng lo a nih hlawm hi! An zawng lo, an ûm lo, an phût lo, sabengtung an nih vang a ni” Mi dang ho bik kha chu ka tarlang tel ve ta rih lo mai.

Rev. Dr. RK Nghakliana chanchin hi ka lo zawn thin leh ka lo ngaihven reng thin a ni a. Ka han hmuhnual hnuah pawh ka ziak ang ka ti a. Ka ziak lo leh reng a. Thil dang tih thulhin zanin (13.10.2019) hian ka han ziak ta a ni.

Rev. Dr CL REMA, LEI LALTE AIA VAN LALPA THLANGTU CHU

Rawngbawltu duhawm tak, Pastor Thanzinga khan fapa chhuanawm tak tak a nei a. CL Rema, CL Hminga leh CL Ruala te an ni. Pakhat IAS a ni a, a bansan a, Missionary-in a kal a. Pakhat chu pastor niin, Mizo Bible letlingtu zinga mi a ni a, Mizorama remna awm theihna tura tha thawhtu a ni a, pakhat chu Politician niin, MP te pawh a ni.

January ni 3, 1925 ah Lunglei District-a Thiltlang khua-ah a lo piang a. A pa hi dika a hriat leh dik lova a hriat chu huai taka sawi lang nghal zel mi a nih avangin Thiltlang lal khan a ngaithei lo viau a. A fa tir a pian chuan Thiltlang lal chuan a zu en a, “A pain lal a tai a, a hmingah Laltaia ka sa e”, a ti a. Mahse a pa chuan “Lalberte Lalber nen kan inrem a, a hming chu Lalrema a ni zawk”, a ti ve thung a. Chhangte hnam niin Lalrema tih chu a pu ta zawk a ni.
ZIRNA LAM: Kum 1934-ah chuan Serkawnah Primary Exam a bei ve a, 12-na a ni a, 1935 chuan Middle Vernacular ṭan a ni a, batch hmasa berah a tel ve ta a. Final Exam 1938 kuma an neihnaah pakhatna an ni a. Middle English a zir zawm leh a, mahse Final Exam hmain The Prince of Wales Technical School, Jorhat-ah sawrkar Scholarship hmuin a zir ta a. Kum 3 course ṭha takin a zir zova, record a siam. Jorhat Christian High School-ah American Baptist Mission chawmin a zir zawm leh ta a. 1947 chuan Calcutta University hnuaiah Matriculation, First Division-ah a pass ta a. Serampore College-ah zir zawmin 1949 khan Intermediate of Arts, 1st Division-ah a pass a. St. Paul College, Calcutta-ah B.A Honour English, lst Division-ah a pass leh a. MA. English zir zawmin 1954 chuan M.A. a pass leh ta a.

HNATHAWH: Pu Lalrema kha, IAS first Batch zinga tel theihna remchang nei thei tur a ni a. St. Paul College Principal-in duhsak takin, “Sawrkarin ICS thlakna turin IAS an siam dawn a, dil ve turin ka duh che. English-ah chuan examiner pakhat ka ni dawn a, ka ṭanpui thei ang che,” a ti a. Mahse IAS chu eng nge anih pawh ngaihtuah lovin a dil ta. 1954 aṭangin Multipurpose Community Project-ah Project Executive Offlcer (PEO) hna a thawk a. Mizoram chu District pakhat, Sub Division pahnih a la ni a. Aizawl Sub Division huam chhungah an thawk a. Heta a thawh lai hian, an fiamthu pakhat chu, “Pu C.L.Rema te chu Aizawl nula ho pawhin an khawih thei lo. Project Officer a nih lai te khan Bible hi a zakzeh run zel aa buaithlak an ti e” tih a ni. 1 956 tawp thleng a thawh hnuin Lunglei Sub-Division-ah PEO hna thawkin a insawn. He Project hian Agriculture, Communicative Health leh Education a huam a ni.
IAS A ZAWM: Rev DR CL Rema kha Direct IAS anga sawi an awm leh thin a. Direct IAS chu a ni lo. PEQ hna a thawh lai hian sawrkar hnathawk laite tan IAS hna dil theihna Special Recruitment an hawng a, Mizo Officer eng emaw zatin an dil a. A vannei a, an zinga tling chhun a ni a. 1958 khan IAS a zawm ve ta a. Sawrkar hna kum 4 a lo thawh tawh zatve kum 2 IAS Service-a chhiar sakin 1956 batch-ah dah a ni.
Assam cadre pek a ni a. Kum 1968 thlengin IAS hna a thawk a. North Lakhimpur SDO-in a awm a. Jorhat District DC-in a awm a leh a, hei hi Postingah rau rau chuan an ngaihhlut a ni. Jorhat DC a nih lai hian chutih lai a Assam Chief Minister B.P Chaliha a han zina chaw chhun an ei dawnin lawmthu sawina ṭawngṭai nei turin a ding ta mai a, Chief Minister pawh chu a maimitchhing ve mai. Secretariat lamah Mizoram buai lai khan Tribal Areas Department Joint Secretary a ni a. Assam sawrkara a hna chelh hnuhnun ber chu Director of Community Project a ni. Central Government-ah Defence Ministry-a Deputy Secretary Appointment pek a ni a. A Department-a a thawhpuiten an thlah fel hnuin a hna thar zawm lovin full-time-a Pathian rawngbawl hna thawk zawk turin a bang.
IAS-AIAH MISSIONARY :Assam sawrkara Director of Community Project a chelh laiin, Cemtral sawrkarin defence ministry-ah Deputy Secretray turin a dah a. Hetiang dinhmun pek a nih hian a entir chu. Pu lalrema khan hna a thawk tha a, a hming tha hle a, IAS-ah pawh a hmabak eng pawl tak a ni tihna a ni. Central sawrkara secretary puitling leh a bak dang pawh a ni lo ang tih a sawi theih loh.
1967 khan, North Bank Baptist Mission, American Baptist Missionary te India ram chhuahsan tura an hriattir avangin Pu Lalrema chu anmahni puia, an rawngbawlna chu IAS ni chunga chhunzawm dan kawng dap turin an sawm a, Chu an sawmna chu Pathian kohnaa ngaiin, a hna chu 1968 khan, a ban san a, hun pum a rawngbawl turina chhuak ta a ni. A kohna dan dan hi a ro ang reng hlein a hriat. A pa rep rep viau. Bannaa theh luh hian Assam Chief Secretary chuan, “You must think a hundred times before you submit this,” a lo ti a. “Sir I have done it,” ti-a a chhan hnu chuan a laksak ta a ni.
MISSIONARY CL REMA: CL rema chu, Missionary a luh hnu hian India ram leh khawvel pum huap rawngbawlna chanvo pawimawh tak tak chelhin ropui takin Lalpan a chawisang ta zel a ni. Medical (Hospital pahnih), Kohhran leh Literature Education te chu a enkawl a. Mission ram Pass mumal nei lo te pawh Pass a Siam fel a, Hospital pawh ṭha takin a enkawl chho a ni. Wisconsin, America-ah Pathian thu kum khat an zirtir a. Tezpur Baptist Church Pastor atan Ordain a ni a. Pastor hnaah hi chuan, hlawh a nei lo.

A hna pangai bakah EFI-ah te Office Bearer a ni a, EFICOR leh NEICORD dintu zingah a tel bawk. WEF-ah Committee member-ah a ṭang tawh a, BWA-ah BWAID leh E&E ah Committee member a ni. Heng rawngbawlna hrang hrang avang hian khawvel ram tam tak a tlawh a, Consultation on Evangelism Asia Pacific, Singapore-ah 1968, Global Consultation on World Evangelization, Pattaya Thailand,1980 ,International Consultation on World Evangelization 1974, Lousanne Switzerland; B WA General Council Meeting, Singapore, 1986;BWA Congress 1990 Seoul;BWA Congress 2000 Melbourne Australia, Israel , Europe.America pawh a tlawh tam.

Rawngbawlna kawnga a hna chelh, a sulhnu leh chawimawina a dawnte chu tlar thluai lo mai ila, a ropui ber Vanlallukhum a khum tawh bawk a. Thil chhinchhiah tlak tak chu, 1955-56 khan Central KTP committee member a lo ni tawh a, KTP General Conference hmasa ber 1954 a neihah khan Inrinni zanah thupui a sawi a. A thupui chu, “The End of Salvation-Saved to serve” tih a ni.

Mizo rawngbawltu chhuanawm, sawrkar hna tha tak bansan vetu tho Dr LN Tluanga hian a tia lawm, Kolkata a lehkha zir tur a thlen tirh khan, a mah lo buaipuitu Pu Lalrema, MA zirlai kha, lawmthu sawinan Cinema enpui a tum a, a ni chuan, a lo inkhawmpui ta zawk a ni.

August ni 3, 2016 khan Engkim zawng aia a thlan Lalpa hnenah a chawl ta.

MAFA-A KHA!

Mafa-a kha tih mai tura min kalsan ta hi hriatthiam a la har hle mai. Mizo Literature tana a hlutna hi a zira zir fe tham a tling a. Thangthar thuziak mi tam zawk hi Sabereka Khuangkaih vanglaia a cho phur leh a nawr kalte an ni hial ang tih tur a ni. Mafaa ‘Influence’ ropui zia hi amah kan ngaisang lo lui ve hrim hrima nih ngawt loh chuan, hmuhhmaih leh sawi hmaih thei a ni lo.

Mak ka tih erawh chu, Zirlaibute a Mizo Literature chanchin an ziah leh zirnaa a hming lam harsa an ti tlat thin hi a ni.

Ka thian ti ngam tur khawpin kum 20 vel zet zawt chu a hnung kan zuiin kan ngaisang ta a! A lar vanglai ber pawh khan, keini naupangte mai kha min kawmin min fuih peih a. Landline Telephone khan vawi tam tak ka bia a, phur takin min titi pui peih reng mai.

Chawlhna Tuikam vang khan poetry tam tak ka ziah phah a. Sabereka Khuangkaih-a tih chhuah tur khan ka thawn nual a. A ti chhuak nual a. Tihchhuah loh pawh a nei nual. Tumkhat kan titi dun tumin, “I poetry zawng zawng kha ka la kawl tha vek. Nakinah a buin kan la siam ang” tiin a sawi! Chumi tum chuan, Poetry lam pawh kan sawi chuang lo a, titi kar lakah a sawi chhuak a ni. Chutiang mi chu a ni, Mafaa kha!

Lehkhabu tih chhuah chhoh a tum dan te pawh mi hrilh fo. A tum dan ang khan a indawtin a ti chhuak chho ta phoh phoh reng a. Lehkhabu a ti chhuak muang leh kutchhuak a ngah tawk lo kha a bulah ka sawi fo. A lehkhabu tihchhuah tum thenkhat kha chu, a lehkhabu hawi zawng ang kha miin an lo tih chhuah hmasak avanga up leh rihte pawh a ni ve bawk.

Amah ngaisangtute tana biak a nawm ziate, amah purtute leh zawhna zawt tute a puih peih dan leh a hawihawm dante kha entawn tlak a tling. Tihtak zetin tute pawh kha a biain a chhang peih a. Social Media a han hman ve hnu pawh khan, chutiang chu a ni tho. Mi tam takin, Social Media kan hmang thiam lo a.

Facebook-a a thuziak leh a thiltih pawh ngeiawm fe fe a lo comment an awm thin a. A thlarau a thawh changa an ‘key’ lak mila a han chhang lah a ngeiawm thiam na rawh!

Thil ka hriat rei thin avang leh ka hriat tawh chu ka hriatchian thin avang khan, Sabereka Khuangkaih ‘Editor Thu Leng Lam’ te kha a chhuah thla leh a thuziak ngai ang chiah chiah hian titina-ah ka sawi chhuak leh thin a. A lawm thin hle. A fapa Ramthanmawia pian thla-a a ‘Editor Thu Lenglam’ te, Pu R. Lalthazuala’n, ‘Poetic License hi tu pek nge?’ tih a zawh tuma a chhanna te angte kha ka sawi chhuak thin a, a ngaihnawm lah tak a. Kutchhuak tam tak a nei a, a ngaihnawm vek rualin, ngaihnawm zual bik erawh a awm a ni.

A Hlahril phuah zawng zawng zingah chuan, ‘Hmangaihna Zarah’ tih hi a tha ka ti ber a. 2001 kuma Kolasib Diakkawn Branch-in ‘Vohbik Khawthlir’ tih bu an tih chhuahah khan chu chu a chuang a. Mafaa thuziak chhiar chakin a hlahril ka han hmu kha ka beidawng ang reng a. Ka han chhiar erawh chuan, vawiin thlengin ka hre ta reng thung a ni. Hemi kumah vek hian a bulah pawh a tha ka tih thu ka sawi a, “ka lawm hle mai. Tumahin khami chungchang kha min la hrilh lo a” a ti. A chang tawp ber chu hei hi a ni,
“Dam chhung phurrit tak chuan ka ko uaiin,
Phei tleu mahse – lei rem rap thiam lovin,
Thihna lui rala Hmangaihna aw nem chuan,
“I phur rei tawh lo’ng,” tiin min lo muan.” 2004 khan a english poetry pakhat, ‘our last rendezvous’ tih behchhan hian Thawnthu Tawi ka ziak a. Chumi thla la la chuan, Sabereka Khuangkaih-ah a ti chhuak nghe nghe a. College kan kal lai a ni a. College pana kan kalna kawngah hian kan zirlai pui pakhat hian, “Our Last rendezvous tih ziaktu kha I ni em?” mi rawn ti ve nawlh mai a. Rilru a hlim hle.

Sabereka Khuangkaih a enkawl lai tho hian, SK Sister Publication, Chhunrawl kartin chanchinbu enkawltuah khan ka tel ve a. Athens Olympic lai khan, “Athens Olympic-ah vai hoin kan ram min ti zak” tih kha ka ziak a. A tukah office kan han kal a. Nui kur kur chung hian, ka thuziakin a tih hlim thute leh zan mutnaah a chhiar a, a nuih nasat thute kha a sawi a, keini tan chuan a lawmawm thin hle. Chhunrawl tho hian, Love Song hi sual a ni em? Tih opinion poll kan la a. Chumi result tih chhuahna Issue-a ziah atan chuan zaithiam thenkhat ngaihdan kan la tel a. Mafaa hi chumi issue mil chuan thuziak turin ka ngen a. Ngaihnawm em em hian a rawn ziak a. A thuziak kharna-ah pawh, Khawnge Bob Dylan-a hla, If not for you tih kha ka han ngaithla teh ang tihte a ni. A thuziak zinga tha ber pawl a ni ang, kha pawh kha.
Kristian Hlabu edition thar ber a lo chhuah khan, Review rawh kan ti a. A lehkhabu duh leh mamawh kan lakkhawm sak a. Kristian Hlabu Edition hlui, solfa awmlohna te kha, ka put a kan kawlzui a awm a. Khangte kha ka pe tel a. A theihnghilh zui a. Ka theihnghilh zui bawk a. A ruang ni khan ka hrechhuak. Chumi tuma Kristian Hlabu a review te chu ngaihnawm tak a ni. Pathian thu te, Fakna hla te pawh a tui zia leh a duh uluk zia a lang chiang hle.

Continue reading MAFA-A KHA!

KA SIKUL NAUPANG HRIAT VE TE

Taiwan ramah kan zin a. Ni e, kan zin ve miau. Sawi tur tam tak ka nei. An ram thingthlang khaw pakhat, Smangus khuaa sikul naupangte chauh kha ka han sawi teh ang.

Chumi hmain, Smangus khaw chungchang tawite. Tayal hnamte khawsakna hmun a ni a. In 35 chauh an ni a, mihring 100 chuang awrh an ni. 1924 vel atangin an khua hi a awm tawh a. Pa leh thei rahte an zuar a. 1995 atangin Motor a lut a. Pawnlamah eizawnna an zawng lo thei lo a. An thalaite an vak chhuak a. An hnam zia an hloh zel a. An lal chuan ngaihtuahna pakhat a nei a, an hnam ze humhimna leh an khaw tan, an khua chu Eco Tourism lam a kalpui ta a. Tunah chuan kum khatah an khuain Us Dollar nuai 7-an la lut pha tawh.

An khuaah hian naupang an awm ve nial a. An khaw thenawmah sikul an kal thin a. Nikhat kal a ni. Chumi avang chuan, an sikul chu thawhlehniah an tan thin. Kein an kal mai thin a. Inrinni-ah an khuah an haw leh thin a. Inrinni tlaiahte a lian deuh tawh chuan, restaurant-ah hna thawkin an sikul senso te an intuak bawk thin a ni.
Inrinni tlaiah an khaw restaurant pakhatah pawh, naupang kum 8 mi bawr vel awm hi thleng seng leh khualzinte ei tur dawhkana va chhawpin an tei ve reng a. Engnge a chhan kan han zawh chuan, “ An sikul zirna senso tur an phak ang tawkin an intuak ve a nih hi,” an ti.

An khuaa mi kum 18 tling tawh chin chuan, hna an thawk vek a. An thawhtur an insem vek a. Tumah an awl lo. An sum lakluhte hi zat leh zatin an insem vek. An khaw lal pawh a awl bik lo a, hna thawkin a hah ve em em reng a ni. An khaw lal hian, Taiwan sawrkarin Dollar maktaduai 50 pek a tum chu a hnawl thak ngam a ni. “Min ti chhe mai mai ang” a ti.

Tlangchhipa restaurant-ah zanriah kan kil a. Naupang pakhatin, Chinese tawngin mi lo bia a. Chinese tawng ka thiam lo e, English-in min be ta che ka tih chuan, “E! Chinese I thiam turah ka lo ngai a” a ti vei thlap a. “Khawi atanga lo kal nge I nih?” tiin min zawt zui a. “India atanga lo kal ka ni e” ka ti a. A nui hak hak a. “India atanga lokal I ni tih ka hre lo a lawm. Helai mi tho ni turah ka lo ngai che a” a ti vei reuh a. Min betu pa chu, a sikul senso tuaka inhlawh zinga mi a ni.

Keini chuan, kan fate, kan zirlai te hi engkim kan tihsak a. An thawh hma kan phal meuh lo han ti ila, kan peih loh vang a ni zawk ang. Kut Hnathawh hlutna te, mahni thawhchhuah ngei hlutna leh hlimawmna te zirtir leh zirchhuak loin kan kaihhruai a, Keini hian thil tam tak chan ta ni berin ka hria.

Engkimah hliahkhuh kan tum zawk a. Tulloah kan buai nileng a. kan fapa te aw te hi a no zo vek ta niin ka hre mai. Kan fate hian, an kum mil tawk khawvel hmachhawn sela. Khawvelah hian kan tlu thin a, kan khupte kan ti pilh a, kan hnarte a thi a, kan ban ruh te a pelh thin. Mahse, kan tho leh a, kan khup pilh a dam a, kan hnar thi a reh a, kan ban ruh pelh te pawh a dam leh mai a ni tih an zirte hi a ngai a.

Engkim tihsak thana seilian an nih chuan, khawvel hian engkim an tihsak tur emaw an ti a. Engtikah emaw anmahnia khawvel an hmachhawn hun a lo thleng lo thei lo a. Chungah chuan, an buai thin. An phun a, an rilru a na a. An hrehawm thin.

Ka sikul naupang hriat vete erawh kha chu, kein an sikul pan turin nilengin an kal a. Kartawp hunawlah pawh an sikul zirna senso tur an phak ang tawkin an tuak ve thin. An nu leh pate khan an senso tur kha an nei lo a ni lo a, an pe phal lo a ni hek lo.

KRISTIAN LEHKHABU ROPUI MERE CHRISTIANITY THLIRNA

Kristian Sakhaw kaihhnawih lehkhabu ropui sawi ni khua chuan, CS Lewis-a lehkhabu ropui bera chhal ngam, Mere Christianity tih hi kan sawi hmaih thiang lo. Mere Christianity, tih buah hian a tawi zawnga kan sawi chuan, C. S. Lewis a hian, Kristianna rintlak zia a chai ber a, kristian sakhaw sawiseltute hnialna thu a ziak a, Kristian nun chu engang chiah nge a nih ang tih chu chipchiar takin a chai a ni.

A BU ZIAKTU CHANCHIN: Mere Christianity ziaktu Kristian chhungkua a seilian a ni na a, kum 15 a nih chuan Pathian awm ring lotu a ni t a der mai a. Amah hian, “Pathian chungah chuan a awm loh avangin ka thinrim em em a ni” a ti.

Hetia a tleirawl chhuaha Kristianna a kal san a, Pathian awm te an rin loh chhohna chhan chu, kristianna leh kohhran rawngbawlna chu ‘ Ninawm leh inphutna nasa,’ anga a ngaih vang a ni a. Dawi leh thil dang neuh neuh te a tuipui chho ta a. Mahse, zawi zawiin a inhmu chhuak a, Pathian thu niloin ama ngaihtuahna leh duhthusam a lo zui nasa lutuk a, mi dangte a lo teh nasa lutuk te chu ainhre chhuak chho ta zel a. Pathian a hmuh lehna kawngah hian George Mac Donald-a lehkhabu, ‘Heaven’ tih chuan a pui nasa hle. Kristiannaah hian a kir leh mai duh bik lo. Hnar luih tlat dan a zawng char char a. Mahse, Pathian hmangaihna ata chu a bibo hlen bik thei ta lo a ni.

Kristianna leh sakhaw dang hi nasa takin a khaikhin a. Nunna Thuchah kengtu sakhua chu kristianna chauh hi a ni tih a hmu chhuak a. Lalpa hnenah a kir leh ta a ni. Lalpa lama a kir lehna tur hian a thiante an tangkai em em a ni. 1931-ah chuan Lalpa lamah a kir leh ta a ni. Hetah hian a thianpa J.R.R. Tolkien-a a tangkai hle. (The Lord of the Rings ziaktu). A pianthar dan chanchin hi Surprised by joy tih buah a ziak.

CS Lewis hi a hming pum chu Clive Staples Lewis a ni a. 29 November 1898 -ah piang a. 22 November 1963 a thlir thin ramah chuan a kal ve ta a ni.A thiante chuan “Jack”, tiin an ko thung a. Ren tin daih an tih ang chi hi a ni a, thiam loh pawh a nei mang lo e an ti hial thin.
Tlangval senior tak a nih hnuah nupui a nei chauh a. A nupui nena an inhmangaihna hi khawvela hmangaihna chanchin ropui berte zingah an chhiar tel fo thin. Nuthlawi pakhat thu pawh ziak ve thin Joy Gresham-i chuan CS Lewis hi a ngaisang em em a. Joy-i hi american a ni a. Fa pahnih nei a ni. A pasal chu zu ruih hmang leh amah tiduhdah deuh mai a nih avangin a achhuah san a. Lewis nen hian lehkha an inthawn tawn thin.

Joy Gresham-te England-a an han zinin a takin an inhmu a. An inkawm ngeih em em a. Atir takah chuan inhmangaih taka in ngaizawng, in hmel duh pawh an ni lo a, Joy hi nu fing leh in chhiar zau tak mai a ni a, amah a chu nupui a neih a duh vang hrim hrim niloin Joy-i chu kawm zui zel a duh avangin England-ah cham zui zelse a duh a, nupuiah sawrkar dan (Civil contract marriage)-in a nei ta a.

Lewis-a unaupa Warnie chuan ti hian a ziak a: ” Jack tan chuan a tir chuan Joy-i a ngainatna chu a fin em vang chauh a ni. Joy chu a hmeichhe tawnte zingah chuan ama thluak ang han tluk pha ve, ngaihtuahna zau kawngah te, hriat ril kawngah te, fiamthu duhkawngah te a ma kawmpha awm chhun a ni” (Haven 2006). Amaherawh chu, reilote hnu chuan Joy-i malpui-ah chuan na a lo awm a.Terminal bone cancer a lo ni a, Chu chuan an inzawmna chu a ti danglam ta a, an thinlung a lo inpawh a, kristian dan pangaia innei theiah an lo in ngaita hial a. Nuthlawi a nih avang chuan England kohhran te hian hetiang inneihna hi an hrethiam lutuk lo a, Mahse, an thian tha the Rev. Peter Bide, chuan Hopital-a Joy-i mutna khumah March 1957 Lewis leh Joy- te chu a inneih tirta a ni.

Continue reading KRISTIAN LEHKHABU ROPUI MERE CHRISTIANITY THLIRNA

GARIBALDI -F. Vanlalrochana

 

“Hlawh ka tiam thei lo che u a, Chenna hmun ka tiam theilo che u a, chaw pawh ka tiam thei lo che u. Riltamna, Tuihalna, Peihloh chunga hmalam pan luih tirna, Indona leh Thihna chu ka tiam thei teh meuh mai che u .A hmu ni lo a, a thinlunga a hnam hmangaihtu chuan mi zui rawh se.”

Mizo fate kan inpumkhatna tur leh kan in unaua kan insuihkhawmna tura Brig.T.Sailo hma lo lak tawhna te, ZORO te thleng pawhin ka ngaihtuah chhuak fo a. Chutiang erawh chu ka ziah tum a ni lem lo. MZP-in ZOfest a buatsaih thinin a thil nghawng hrang hrang a taka hmutu ka ni a, a hlutzia pawh ka hmufiah viauin ka hria. North Eastern Police Academy-ah mizo hnahthlak unaute Manipur atangte an Police service a lut a, rawn training ve te an awm ve a. Chungte nen chuan, kum khat zet kan training ho a, Passing out parade ah te pawh “Cheraw Kan” kha show angai  a. A khawng tur mipa kan indaih loh avangin, lawm takin an rawn khawng ve mai a. An titiah pawh, Zofest a an tel ve thu te sawiin an tuipui hle thin. Chutiang zawng zawngte chu ziah ka tum lem lo a.

Italy ram insuihkhawm leh dan chanchin te, Germany insuihkhawm dan chanchin te hi a ngaihnawm em em mai. Garibaldi-an Italy insuih khawmna tura hma a lak dan te hi a ngaihnawm hi ka ti thin. Garibaldi-a chanchin hi han sawi ka duh a ni.

A CHHEHVEL THU: Rom Lal ram ropui tak mai kha, ram pahnih, Khawchhek lal ram leh khawthlang lal ramah te an inthen darh a. Khawthlang Lal Ram a lo tluk chhiat hnu chuan, Ostrogoth ho hnuaiah te, Lombard ho hnuaiah te, Byzantine ho hnuaiah te an kun chho a. A hnuah chuan Frank ho hnuaiah te pawh an kun chho ta zel a. Italy ram chu lal ram te takte, Khaw pakhat lek lek ang deuhin an lo tla darh ta a. Austria Lalna hnuaiah an kun a. Italian Independence War tum hnih (1848-49 leh 1858ah) an bei a. Heng hun lai hian Garibaldi a hi rawn lang tan ta a ni.

Hetia Italy ram an han tlakdarh tak nuaiah hian, an hnam dinhmun chu a tha lo ta hle mai a. An thu leh hla thiam ten theih tawp chhuahin, Ram leh hnam hmangaihna chungchang an han au chhuah pui tan ta a.  Dante Alighieri, Petrarch, Boccaccio, Niccolò Machiavelli leh Francesco Guicciardini te hian an thawhhlawk hle. Machiavelli hian, a lehkhabu “Prince’ tihah pawh khan, Italy ram suihkhawma, Hnam hrawmhraw te laka chhandamtu tur an mamawh thute pawh a ziak a ni.

Heng an thu leh hla thiamte thu tlangaupui avangte, an ram hruaitu Nationalist ruh tak tak te avangin a chunga kan sawi tak war of independence te hi a lo chhuak chho a. Mi thahnemngai ten an han beih tak tak chuan, 1861 chuan Italy ram mumal tak a lo ding leh thei ta a ni.

Heng zawng zawngah hian Garibaldi chu a thawhhlawk hle a ni.

Garibaldi hi  July 4, 1807 in Nice, France-ah a lo piang a. An chhungkua hi sangha mantu leh tuipui kama sumdawng thin an ni a, a ni pawh kum 10 zet chu sangha mantuah a tang a. 1833, khan  Piedmont-Sardinia lalram lawng sipaiah a tang a. Russia Ram pana lawnga an zinnaah Mazzini zirtirna a tuipui tan a. Democratic-Republican sawrkar din a, Italy ram insuihkhawmna chu a damchhunga a tuipui ber a lo ni ta a ni.

South America rama tualchhung indonaah te a zu tel ve zak zak hnuin, 1846 chuan Italy ram boruak vang chuan Italy ramah a let leh ta a. Hetih lai hian Italy ramah chuan Nationalism meipui a vung chhoh tan lai mek a ni.

Lal neih duh lo(Republic) mah ni se, 1848 a Italian Indepdence War-ah chuan, Sardinian Lal, charles Albert chu theihtawp chhuahin a pui a. Ama mimal duhdan chu dah boin, Lal chu a puih chuan, Italy ram chu an insuih Khawm hma zawk dawnin a hria a ni. Heti Laia Garibaldi a nun atanga kan zirtur pawimawh tak mai chu, a ma mimal duhdan leh thuvawn (Principle) chu Lal neih loh (republic) a ni a. Mahse, Italy ram a hmangaih a, Italy chu insuihkhawm se a duh avangin Sardinia Lal lamah chuan 1848 Indonaah pawh a tang a ni. Keini chuan kan ram leh hnam ai chuan kan mimal duhdan leh lawmzawng hi kan dah hmasa thin a. Keimahni hi kan indah tha phal thin lo.

1848 Indonaah hian Garibaldi te lam hi an chakloh avangin Garibaldi chuan Italy ram chu a lo chhuahsan leh ta a. USA ah kalin New York ah a khawsa a. Hemi pah hian Tuipuia sumdawnna hrang hrang a buaipui.

1854 chuan, Italy ramah a kir leh ta a. Hun engemaw chen chu Lo neiin a hun hmang a. 1858-ah Italy zalen nana Indo tum hnihna a lo chhuah leh takah chuan, Garibaldi chu Major General atana ruat a ni a. Alps tlangah awmhmun an khuar a.

Hemi indonaah pawh hian, ama mimal duhdan chu Republican rilru, lal neih duhlohna rilru mah ni se, Italy ram a hmangaihna avanga insuihkhawm a duhna chuan, ama mimal duhdan a dahthat tir a, Lal te lamah a tang leh ta a, Sardinia lal Victor Immanuela chu a pui a ni.

1860 chuan Volunteer Sipai tlemte nen Sicily lal ram a hneh thei a. Chu chuan, a hming a chher hle a. Khawvel huapa ngaihsan a ni ta a ni.

Sicily a hneh hnuin, Italy ram chhungril zawk a luh chilh ta a. A kalna a iangah chuan Mipuiin an lo lawm hle zel a. Naple lal ram a hneh leh a. Rom khawpui pana, Italian republic din hia a rilruah awm mah se, ama dinhmun leh a sipai te dinhmun a ngaihtuah a, piedmont sipai tam tak mai chu a innghahna an ni bawk a. Rom lam chu pan zel loin, October ni 26, 1860 chuan, Victor Immanuela hmaah a ngunhnam dahin, Italy Lal angina chibai a buk a.

“Pathianin Italy ram chu  Victor Emmanuel-a a pe ta a ni. Italian zawng zawngin amah chu an tan tur a ni a. Victor Immanuela kiangah chuan kan innghirnghona zawng zawng kan paih boa ng” tiin a sawi nghe nghe a ni.

A hnu lamah pawh Democratic Republic sawrkar din tumin, Italy-ah te, USA-ah te, France ah te a bei zel thung a. Heng te hi a chhinchhiah tlakna lai chu a ni. Democratic-Republic sawrkar neih tuma a nunna thap si chuan, Italy ram a hmangaih em avangin, an ram dinchhuahna leh insuihkhawmna atan chuan Lal neih hi a tha zawka a hriat avangin Charles Alberta te, Victor Immanuela te a pui leh tlat si a ni. 1860-ah a duh chuan, Lal thutthleng pawh chuh ve thei reng siin, A hmangaih Italy ram tana tha ber nia hriain, Italy ram enkawlna chahbi chu Italy ram bung pakhata te ber maia an lal Victor Immanuela kutah a dah leh hmak si a ni.

Garibaldi kha mi rinawm leh nun tlang tak, hmingthanna, larna, ropuina leh thuneihna duh reng reng loa sawi a ni thin a. Hemi a mizia leh indona a hnehnate chuan mi tam tak ngainat a hlawhtir a. A thiltiha a tih tak takna te chuan, mi tam tak Italy insuihkhawmna tuipui turin an rilru a hneh a ni.Ral rel thiam chungchuang, Indo mi thei tak mah nise, Indona nghawng thalo te chu a hmuh chian avangin, a hun tawp lamah phei chuan, indona reng reng hi a duh ta miah lo a ni.

Garibaldi a te hi an ropui mange. A hmangaih Italy tan chuan amah a indahtha thak a, A duhdan a dah tha hmak a. Italy tana tha tur bera a hriat angin a theih tawp a chhuah a. Ama duhdan kalhin hialin a che a ni.

Mizo hnam insuihkhawmnan hian Garibaldi te ang hi kan mamawh a ni. Mizo hnam insuihkhawmna dah pawimawh tu ber kan mamawh. Mahni Politik kailawn atana hman tum, mahni ngaihdan leh duh dan paihbo tum miah loa tang tung te nen chuan Insuihkhawmna hi kan hlawhtlin pui hauh lo ang.

1882 khan kum 75 mi niin a thi a. Camillo Carvour, Victor Emmanuel II leh Giusieppe Mazzini te nen, Fathers of The Fatherland tia sawi thin an ni.

ZIAKTU HLAWHTLING JAMES PATTERSON-A CHANCHIN

A lehkhabute hi copy maktaduaih 300 chuang an hralh tawh a. Lehkhabu ziaktu zinga hlawh hnem ber te a ni thin a. A sum laklawh tawh ngawt pawh hi US Dollar maktaduai 700 zet a tling!

Patterson hi March 22, 1947 khan Newburgh, New York hmunah a lo piang a. Vanderbilt University atangin MA (English) a zir zo a ni.

Phd a beih chhoh tan laiin, Advertising lamah hna a hmu a. A thawk zui ta zawk a. 1996 khan a hna chu chawlhsanin lehkha ziak lamah hun pumin a inhmang ta a ni.

1976-a a novel hmasa ber a chhuah atang khan lehkha a la ziak ve ta ngar ngar a. NY Times-ah pawh kar 114 chhung chu a lehkhabu ziakte hian hralhtha pakhatna an lo hauh tawh a. Ber kaina dang dang pawha nei nual a ni.

Award tam tak a dawng a. Naupang thawnthu leh puitling thawnthu a ziak kawp a. A changtu ngai channa novel a ziak nual a. Ptivate series, Alex Cross series etc. Mi dang nena thawkhoin lehkhabu an ziak nual bawk a. US President hlui Bill Clinton-a nen pawh, “The President is missing” tih an ziak dun nghe nghe a ni.

Naupang lehkhabu chhiar peih lo te a vei em em a, James Patterson PageTurner Awards, Readkiddoread website te a buatsaih a. Sum tam tak a seng a. Naupang leh thalai zawkte’na a tam thei ang bera lehkha an chhiar theihna turin a sum leh pai leh a tha leh zung a seng thin a ni.

He thil hi kan hnam pawhin kan mamawh em em a ni ve awm e. Thangtharte hian lehkha kan chhiar tlem em em a. Lehkha chhiar tlem hian ram leh khawtlang inrelbawlna kawnga a fawng kan chelh chhoh hunah chuan, kan hnam hian a tuar ngeiin a rinawm. Thangthar zawkte hian lehkha an chhiar peihna turin eng kawng emaw zawng taka theihtawp chhuaha hma kan lak ngei hi chu angai niin a lang.

Patterson hian zirna in hrang hrang tan ama pawisa tam tak a seng a, America ram chu lehkha chhiar peih tak an nih zel theihnan theih tawp chhuahin ama pawisa maktaduai tam tak a seng a ni. Hei hi a chhinchhiah tlakin a entawn tlak hle.

Mimal ang pawhin a hnuaia Award te hi a dawng tawh a ni:-

National Book Foundation’s 2015
Literarian Award for Outstanding Service to the American Literary Community

National Parenting Publications Honors Awards

International Reading Association’s Young Adults’ Choices Booklist
American Library Association “Teens Top Ten” Pick

London Times Book Sense Children’s Pick

2011 Nickelodeon Kids’ Choice Award, Nominee
Children’s Choice Book Awards

Author of the Year 2010 for Max

Nominee, 2011 Teen Choice Book of the Year (Fang) and 2012 Author of the Year (Middle School: The Worst Years of My Life)

Sum tam tak an sen tawh dang chu lo dahtha ila, America rama college 24-ah pawh The Patterson Family Foundation hian Us Dollar maktaduai 7 zet an sem ral tawh a.

Ama lehkhazir chhuahna college leh University hnenah pawh USD maktaduai 26 emaw zet chu a chhung lut leh tawh a ni.

Higher Education leh US a lehkha chhiar an taimakna tura hmalakna chu a ngai pawimawh em em thin a ni.

James Patterson-an lehkhabu a ziahpui ho hi chu novelist tha tak tak an ni a. Bill Clinton-a erawh hi chuan novel a ziah vawikhatna a ni.

The President is missing hi a bu a chhah khawp mai a. 2018 June thlaa tih chhuah a ni a. President thah an tum a, hmun biru atangin an beihlet dan a ni ber mai a. Cyber Attack lampang a tel bawk a. President hi Special forces hlui, Gulf War veteran a ni a. Amah thah tumtute hian an beisei angin an that thei ta mai lo a ni. US President lo ni tawh nena he lehkhabu hi ziak an ni bawk a, A ziaktu pakhat Clinton-a hian, President ngaihtuahna leh hnathawh dan a taka hria a ni bawk a, a ngaihnawm dan a thuk hle a ni.

Zarkawta Zoram Book Stall-ah hian, hman deuh khan Private Vegas tih bu ka hmu a. Ka lei a. Ka chhiar lawk lo nghe nghe a. Ka han chhiar takah chuan a ngaihnawm phian a. James Patterson-a lehkhabu te hi ka lei ta nual a. Mimal tak chuan David Baldacci leh Lee Child te hi ka la duhzawk tho tho thung.

Aizawl, Guwahati, New Delhi leh Dimapur lehkhabu dawrte atangin James Patterson-a lehkhabu te hi ka lei tawh a. Nagaland hrim hrim hian lehkhabu dawr tih tlak vak an nei lem lo. Kohima lehkhabu dawrte atang hian lei tur ka hre lo. Aizawl pawh hi duhthu a sam lo hle nain, Nagaland ai chuan zia tak kan ni.

Online shopping a lo awm sam ta a. Kan duhzawng kan chah nalh thei ta hlauh zawk a ni.

 

(Phone atanga ti vel ka ni a, Thlalak ka upload thei hlek lo mai)

PEMA KHANDU LEH ARUNACHAL PRADESH

Assam ka awm lai khan, remchangah la in, NE States hrang hrang hi ka tlawhkual a. Sikkim te ka han thleng hial a.

Arunachal Pradesh chanchin hi tuipui riau na chen ka nei a. Kan rual chiaha state a hlankai ni ve bawk an ni a. Kawng tam tak min phalo hle a. Mihring hawiharhna kawngah chuan min phalo hle.

Chutih lai chuan tunhnaiah hian nasa takin an tan kawl a eng chho dawn niin a lang!

2016 kum tawp atanga chauha an state chief minister rawn ni, a CM tirha CM naupang ber ni thei Pema Khandu hnuaiah hian lei rem an rap tan mek chu a ni e.

1979 a piang, Dorjee Khandu a fapa Pema Khandu hi Hindu College, Delhi atanga Graduate a ni a. Fa pathum a nei tawh. Japan, Macau, Sri Lanka, USA, Canada, South Africa leh Bhutan ramah te lo zin tawh a ni a. A ram hmuh zauna hi nasa takin a CM nihna kawngah a hmang tangkai tih a hriat theih a ni.

Pawl hrang hrangah a inhmang nasaa, Bodhi Language and Literature Promotional Society ah chuan chairman a ni a. Games ans Sports lamah a inhmang nasa hle bawk. Football, Cricket, Volleyball leh Badminton a tuipui hle.

Arunchal Pradesh ram hrim hrim hi sawi hmasa ila, Pema Khandu that riauna hi a ti chiang viau dawn nain, a hnathawh thenkhat chauh han sawi ta mai ila:-

1. Airport:- Arunchal Pradesh hian airport an nei ngai lo a. Kumin kum tir lam khan Pasighat Airport chu an hmang tan ta a. Thlawhtheihna a service tan der tawh a ni.

Greenfield Airport, Hollongi a siam turin an kalpui leh mek a. Hna tan thuai an tum.

2. Kawng:- Trans Arunchal Highway an buaipui mek hi Two-Lane tur a ni a. US dollar ang zawng pawhin Dollar 1.5 Billion an seng dawn a ni. Km 1559 zet a sei a ni dawn.

3. Hna lak: Fair taka hna lak a duh a, a tang khawp mai a. Arunchal Pradesh Public Service Commission in Combined Civil Service exam an buatsaih pawhin, Prelims exam laiin internet a off tir vek a ni.

Group C post laknaah duhsak bik an awm lohna tur leh hna lak a fair theihna turin Staff Selection Board an din thar bawk.

4. Lo neitute ngaihsakna:-

Lo neitute a ngaihsak em em a. Thlai chi hrang hrang chingtute leh a hlawhtlingte buaipuina tur hi budgetah an dah dul mai a ni.

Kiwi chingtute tan 2018 Budgetah pawh 7. 5 crore a dah hrang hrang a. Re imbursement system te, Subsidy rate a siam bawk a. Orange chingtute tan a dah hrang teuh a, Cardamom chingtute buaipuina tur pawh rs 20 crore a dah hrang. Thlai chin bik nei leh hlawhtling bikte buaipuina tur kha budgetah a telh leh mai a ni

5. Ramri hrula awm ve lote tan:- Ramri hrula awmte ngaihsakna tur pawisa chu a awm thin avangin, ramri hrula awm velo assembly constituency te tan rs 1 crore theuh a dah hrang

6. Inkalpawhna dang: Pasighat leh Dibrugarh a suihzawm der tawh a. Lei ni bawk, rel kawnga hman theih bawk chu an hmang tan der tawh a. Amah pawh relah a chuang tawh nghe nghe. Compartment naran takah a chuang ve maia.

7. Thildang:- Chutiang chuan, nasa takin hma a la a. Corruption tihrehna tur CM dashboard a siam, sawrkar hnathawk te vil reng na tur te, An medical college class an tan der tawh maite, CM Insurance Scheme a siam te pawh hi ngaihsanawm tak a ni vek mai. An state chhunga CBSE results a chhiat pawhin zirtirtu a ko khawma, a titi pui maite hi ngaihsanawm ka ti riau a ni.

Nikum lam khan Kristian Missionary te sikul din tanpuina tur Rs 50 lakhs lai chu a thehchhuak.

Tin, an hmalakna reng reng a hmunah a en peih zelin a va hmu zel bawk si a, hnathawktute tan chuan inthlahdah a har thin hian ka ring a ni.

An sawi dan chuan, a zin pawhin, CM charge a hlan chhawng tawh ngai lo a. E-File hmangin decision a siam mai zel a. A tablet hi a hum deuh reng mai a. CM awm lo a, file a tang tih hi a awk tawh lem lo a ni awm e.

Hmanni lawkah pawh Himachal Pradesh-ah leh Japanah thusawi tura sawm a ni nghe nghe. Ngaihsan leh ngaihhlut a hlawh sawt hle. A kiahhruaina hnuaia Arunachal Pradesh an la awm rei loh nen, an hmasawnna hi a hmuhnawmin a ngaihnawm.

La naupang veh vawh, harh tha leh veng va tak, tuipuirala mi thiamte zinga thusawi tura sawm tlak, literature, Sports leh Music ngaina-in AP ho chu a hruai a. An hmuhnawmin an ngaihnawm ta viau mai.