Category: Chawhchawrawi

KOHHRAN CHANCHINBU ENKAWLTUTE HRIATTUR

(2016 khan Pastor Bial pkahatin min ziah tir a. Ka han dah chhuak ve tawh ange)

Mizorama Chanchinbu hmasa ber chu, “Mizo Chanchin Laisuih,” tih a ni a. 1898 daih khan tih chhuah a ni tawh a, kuta ziak a ni a. Chumi hnuah chuan, Mizo Leh Vai chanchin tih a lo chhuak leh a, Nov 1902 atangin, November 1941 thleng a chhuak a. Khawlchut a ni.

Kohhran Chanchinbu hmasa ber chu October 1911 atang khan Kristian Tlangau a lo chhuak tan a. Hemi hnu hian, Sipai Tlangau (1931), Tlawmngaihna (1934) , kohhran Beng (1947) te pawh a lo chhuak ve ta a.

Kohhran Malin chanchinbu a neih hi 1980 chho vel atanga tih chhuah a ni a. Kohhran Thalai Pawlte tih chhuah a ni deuh ber a. Kartin Chhuak emaw, thla khata Vawihnih chhuak emaw, Thla tin chhuak emaw ang tein, Kohhran mal te leh pastor bialte-ah pawh kal pui a ni. Kohhran Thalaite buaipui mah ni se, kohhran pum huap chanchinbu anga kalpui a ni thin.

Kohhhran tam zawk hian Mizoramah chanchinbu kan lo chhuah ta a. Chanchinbu enkawl hi a hautakin taimak angai a, ngaihtuahna sen a tul bawk a. Kohhran mipuite tana thu tul puanchhuahna media tangkai leh tul tak a nih avangin a enkawl tute pawh taimaka, inzir peih a tul a. Kohhran pumpui tana hlawk ber tur enge ni ang tih ngaihtuah ran chunga awm a ngai thin bawk a. Inthlahdah a thiang lo a. A tui lo mite tana enkawl tak tak hleih theih a ni lo a. Inenkawl tui theih a ni bawk a. Kohhran chanchinbu kan enkawl hian kan rilrua thil awm leh kan hriatreng tur thil tul hrang hrang hi a awm ve a. Chung zinga thenkhatte chu lo tarlang ila:-

  1. Kohhran chanchinbu hi chu Kohhran hote kawng hrang hranga ziak hmanga chawmna tur a ni tih hriatreng tur a ni.

  2. Tawngkam pawh a mawi leh zahawm tak, Kohhran tawngkam kan neih te hman hram hram tur a ni. Mizo Tawng ziah dan dik thei ang bera ziah tur a ni a. Mizo Language Committee-in Mizo Tawng ziah dan te pawh hi a buin an ti chhuak a, chutiang chu neih ngei tum ila, chuta tang chuan inzir thin a tha hle a ni.

  3. Kohhran hote tana hriattur tul (information) tarlan nana hman tur a ni. Kohhran Secretary leh Pastor te biak rawn tam a, Kohhran hriattur tul awm tih chhuah turte a awm em tihte zawta, dil thin tur a ni.

  4. Sermon, Article leh thuziak dang reng reng Kohhran thurin leh Inkaihhruaina te kalh leh sawisel zawngin a ni tur a ni lo.

  5. A layout leh design (a hmelhmang leh a thu In rem dan) fel fai leh zahawm takin tih tur a ni a. Chei par chhiai te hi tih loh tur  a ni.

  6. Editorial chu tawifel takin, a hun laia thil thleng leh kohhran boruak milin ziah thin tur a ni. Editorial hi a thupui vuah thin a tha.

    Entirnan: Kohhranin inkhawmpui kan dawng a nih te, Programme kan siam a nih te leh Hun pui a lo thlentein chumi lam hawi chuan Editorial pawh ziah thin tur a ni. Editor ni lo pawhin, Editorial hi ziah theih a ni a, chutiang a lo nih chuan, a ziaktu hming leh a nihna te tarlan tur a ni…

    Liana, Jt Editor tih angtein.

  7. Kohhran programme hi tihsual awm miah loh tura tarlang thei turin uluk tur a ni. Kohhran Chanchinbua Kohhran mipuiten an thlir nasat ber leh an en zin ber chu Kohhran Programme a ni. Kohhran Programme a tihsual a lo awm thin hian, a pawi thin hle a, tihsual awm lo tura fimkhur tur a ni.

    A tha berah chuan, Kohhran Ziaktute hnenah Kohhran programme hi thla tirah dil thin a tha a. Kohhran secretary te hnenah tih danglam a awm a nih chuan, hrilh thuai tura ngen thin tur a ni. Chutiang bawkin, Kohhran hnuaia a peng hrang hrang Inkhawm programme nei hrang thinte pawh tih thin tur a ni.

  8. Sawiselna dawn sawn thiam tur a ni. Thil dang zawng zawng tidik vekin, thu tha eltiang ti chhuak mah ila, hawrawp pahnih khat chauh sawi diklohah sawiselna kan tawng dawn a ni. Sawiselna kan tawh hian, miin kan chanchinbu an chhiar tihna a ni a, lawmzawk tur a ni. Kan sawiselna dawn tam takah hian, inseam thatna leh hmasawnna tur te a tel ve thina, chung chu rilrua vawng rengin chanchinbu kan buatsaih laiin insiam thain, hmasawn tum tur a ni.

  9. Mimal ngaihdan inziahna thu kan tarlang dawn a nih chuan, a ziaktu hming ngei nena tarlan thin tur a ni. Chutianga tarlan a nih loh chuan, Editor ngaihdan leh thuziak anga ngaih a ni thin.

  10. Editorial Board kan nih angin, thu chhuah tur a lo lut a nih pawhin, kohhran hote tana chhiar tura him leh mawiin, a chunga kan sawi takte hre reng khian siam rema, siam danglam thin tur a ni.

  11. Chanchinbua kan thawhpui te leh kan rawngbawlpui te nena kan inkarah pawh inlai china tha siam tum tur a ni a, rawngbawlna peng danga kan rawngbawlpui te nen pawh inlaichinna tha siam tur a ni.

  12.  Tualchhung kohhran tana thu tangkai, Information, Rawngbawlna Programme leh sermon tha te ngaih pawimawh hmasak tur a ni a. Kan kohhran chhinga Rawngbawlna pawimawh chelhtu, Pastor, Upa, Thalai leh hmeichhe hruaitu te chetvelna hi tarlan theih a tha a. A bak chu tarlan sen a ni lo a, intih vuite pawh a hlauhawm a vangin, tarlan loh mai a tha.

    TLANGKAWMNA: Chanchinbu hi Rawngbawlna pawimawh, kohhran kalphung leh chetvelna kan inhrilhna leh kan inzirtirna pawimawh ber te zinga mi a nih avangin inthlahdah a thiang lo a. Taima leh fimkhur taka enkawl angai a. Inzir taimak leh bengvar pawh a ngai a ni.

    Rawngbawlna pawimawh em em, Mi fak hlawhna leh lansarhna ni ngai si lo a nih avangin tan mar pat a tha a. Kohhran tan kan ngaihtuah thiam phak bakin a tangkai a ni tih hre rengin theih tawp chhuah tur a ni.

2021-AH HIAN

  1. 2021-ah hian khawvel hian engnge a rawn her chhuahpui anga, engtin nge kan awm dawn kan hre lo a.Mihring chuan ruahmanna siam thiang a ni a. Duhthusam neih theih a ni a, tum neih theih a ni.
  2. 2021 hian mumal takin lehkha chhiar i tum ang aw. Lehkha chhiar thatna, hlawkna hi kan sawi thin a. A chhiartute pawhin kan tawng vek tawh ang, mimal tak pawhin sawi tur kan hria. Sim chi a ni lo a. Uar telh telh chi a ni.

Hnam anga dinchhuahnan te, Khawtlang nun siamthatnan te lehkhabu chhiar uar hi thui takin a pawimawh.

  1. Diary ziak theuh ang u. Memory tih changtlunna, tih nghehnan pawh a tha. Chumai a ni lo, a hunlaia kan ngaihtuahna te dahthatnan a tha.

Social mediaah kan opinion dengkhawng tak tak kan dah fo mai hi diary-ah ziak lut daih ila. Kan khawtlang, kan hnam, kan rama thil thleng hi chhinchhiah ila. A tul huna referencre a tan. Public Memory is short tih a ni a. Tuten emaw mipui min bum leh mai thin. News-in a sawi bak a hunlaia kan rilru puthmang hi record a tha.

US President paruka John Qyincy Adams khan kum 77 chhung a diary a ziak a. Tun hnu hian a buin an ti chhuak a. America History pawimawh tak pakhat a ni zui ta a ni. Ronald Reagan-a diary pawh a buin a chhuak. Anne Frank-i dairy pawhin khawvel a nghawng hi.

I diary ziak la, mi chhinchhiah loh, i nun, i chhungte nun, in khawtlang nun, in ram nun kha chhinchhiah teh.

  1. In ‘settle’ ila. Eizawnna nghelnghet nei sa kan awm anga, eizawnna nghelnghet la neilo, neih hun tawh si a awm theih bawk ang. Eizawnna nghelnghet neilo pawn nghet taka engemaw vawn tan kumah hmang ila. Kan vawn ngheh theih hmasak a piang vawn ngheh hi a pawimawh.

Hna hniam deuha lang hmusit tlat chite hi kan awm fo a. Hnam hniam leh sang hi zahawmna a ni lo a. A thawktu rilru leh a thawktu thawhdan a zirte hi a ni a. Bultanna sanga bultan hi chu mi tlemte zawk an ni.

Kan thawh theih ang thawh hmasak hi rahbi hmasa, sang zawk kalna tur ke penna hmasa a ni thin.

  1. Kohhran leh khawtlangah nasa leh zual zawkin tel teh ang u. Mahni tan ngawta nun hman hi hlimna a ni vaklo. Mi dangte tana enna thlenturin kohhran leh khawtlangah inhmang vaklo pawhin thahnem ngai leh zual zawkin i tel ve tawh ang u.

Kan khawtlang hi nuam se kan tih chuan, mi tihah dah loin, kan mawhphurhnaah i ngai ang u.

Lehkha kan zir zawhah, hna kan hmuh vek hnuah kohhranah inhmang chauh ila, khawtlangah te hian tel ve chauh ila.

Mizo hnam hi tu kutah nge a awm ang le!

Tunah phei chuan Mahni eizawnna thulh hi kan sawisel nasa si a. Kan eizawnna a kan hun hman zawhah chauh mi dangte tan leh kohhran leh khawtlang tan kan hun hi pe bawk chauh dawn bawk ila.

Eng hnamah tak chuan chhuak ang i maw..

Hnam hlim lo tak, hnam him lo tak, hnam inkawm ngeih lo tak, hnam mahni hmasial tak kan ni leh zual ngei ang.

Tunah hian kan tha em em lem lo a. Chutianga kan awm chuan, tun ai hian kan thasawt chuang hek lo ang.

Politics te hi mi dang kutah kan dah tlat a, mi dangte siamthatturah kan dah a. A chhunga lutte ring bawk silo, lut tharte ngaisang chuang silo, mahni luhtum bawk siloin kan awm a. Tu tih atan nge ni kan tih thin ni?!

Mi dangte tana hun hmang a, Pathian biakna hun insiam a, kohhrana rawngbawlna a te tangkai tum ila, kan hnaah theih tawp chhuah bawk ila. Hnam tana hun hmang theiin hun hmang bawkin, khawtlang tana tangkai thei tangkai bawk sela…

Hnam duhawm zawk kan nih ka ring e…

PUITLINNA TUR KAWNG HNIH

Mizote hi kan hnam a la naupan ang aiin khawvel tukverhah kan dak hmain, kan thlir zau viau a. Kan hnam la naupang tak tih dan kalpui la nei rei lo leh kan khawhmuh zau insual chuan kan hnam nun thui takin a nghawng niin a lang.

Intehnana kan hman hnamte chu kum 900 vel kal tawha in ropui tak tak lo sa thei, chung an insakte chu vawiin thlenga la dingte a la ni hlawm a.

Kan kalpelh tawh sulhnu hi a inthlau lutuk deuh hret a ni.

Mimal emaw, hnam ang emawa puitlinna tur hian kawng zawh tur tam tak kan nei a. Kawng hnih chauh i han sawi teh ang.

  1. Chhuah vah tam: Kan chhuak vak tam lo. Mahni veng sakei kan tam.

Section YMA ah kan inhmang a.Hruaitu kan ni a.Mahni vengah, kohhranah kan inhmang a. Kum tluana veng dangah zan khat pawh riak lo hi kan tam viau ang.Kan ngaihtuahna hian kan veng a pel tam lo thin.

Zin chhuaha mi chi hrang hrang tawn loh chuan hriat belh a tam lo duh ang reng. Mi fing, thluak nel leh fim kan tih reng reng hi. Zin tam emaw, hmun danga hnathawk tam, hna ngai pat nilo, hna nihphung nei hran thawkmi an ni duh fu.

Chutiang mi emaw, inhmanna diverse deuh hlek mi, mi chi hrang interact pui tam emaw an ni fo thin.

Thut hmun atanga khawvel rorel tum hi chu, a khirh mah mah.

Ka pa khan, Kohhran, Kohhran thalai, YMA a inhmang lo pawh Sports associationah tal inhmang rawh se a ti thin. A lo dik khawp mai. Inhmanna neilo, mahni room atanga khawvel thlir thinte an pun hnu hian kan heti zo ta a nih hi.

Mahni veng atanga hnathawh tum, awmna ngaia awma,hmuh ngai hlir hmu, che chhuak loah chuan thanna (growth) hi a awm mawh.

Aizawla mi hausa hlun pawh hi an khua atanga chhuk tawp, Burma rama chumi han phur tihte an ni thin. A awmsa ei tum leh kawng awmsa zawh ngawtah chuan kan kang thei lo.

Changkan tum na leh class ringawt khelhna hian engmah min nih tir thin lo

Khawvela hnam daih rei ho hi en ula…explorers, adventurers, sea fairer etc an nih vek hi. America ram an daidar chhoh dan pawh jedidiah smith…Kit carson etc ten mingo ho daidar loh ram an daidar a…journal an ziak a…lehkhabu an ti chhuak a…an hnung a lo kal leh zel tur tan kawng an siala. Charlie Goodnight-a bawng khalh kawng vanga sumdawnna lo inhawng zaua ram lo thrang ta te, Goodnight-loving trail (texas atanga colorado/denver/wyoming) kawng an sah hawn zawha bawngvulha sumdawnna lo thrangin american economy a chawisan dan etc sawi tur leh chhiar tur, a tam ang.

Ka’n sawi chhan chu, hnam anga kan than a thutna chu mahni inchhung lum kan lawm em mai, experience a zau thei lo a, finna tam tak kan chan bawk.

Kan thawnthu paw’n chhawrthlapui eng hnuaia tlangval lungleng stage a pelh mawh em hi.

2. Lehkha chhiar:

A dang leh chu, lehkha kan chhiar tlem em em a ni

Ngaihdan tlemte kan nei a. Thil tlemte kan hria a. Kan hriat bak hi dikloah kan ngai fo. Kan la hmuh loh chu awm lo, kan la hriat loh chu dikloa ngai hi kan tam. A ni lo nasa si.

Lehkha chhiar tam hi a tha a. Miin lehkha ka chhiar hman lo an tih hian ka awih lo thin. Ka pawm vaklo. Tum chuan a chhiar theih. Thil dang pawh a tih theih vek. Chhiar tam dan hi chu kan chhiar chak dan (reading speed) a zir a ni.

Lehkhabu hi civilization lungphum pawimawh tak a ni a. Lehkhabu chhiar uar hnam hi hnam damrei leh hnam daih rei an ni. Ram ropui hruaitu ropuite hi lehkha ziakmi leh chhiar mi an ni thin. Egypt ram ropui taka siamtu Ptolemy-a khan Alexandria hmunah library ropui tak a siam a. Lehkhabu pawh a lehlin tir teuh a nih kha. Septuagint te thlengin. Vawiinah Bible kan lo neih phahna kawng pawimawh tak a lo ni ta a ni. Julius Ceaser-a pawhin Gaul rama a campaign (indona) chanchinte pawh a ziak a, a ngaihnawm viau nghe nghe.

Hnam puitling leh hnam damkhawchhuak ni turin lehkha i chhiar uar ang u.

“Often I hear people say they do not have time to read. That’s absolute nonsense. In the one year during which I kept that kind of record, I read twenty-five books while waiting for people. In offices, applying for jobs, waiting to see a dentist, waiting in a restaurant for friends, many such places. I read on buses, trains, and planes. If one really wants to learn, one has to decide what is important. Spending an evening on the town? Attending a ball game? Or learning something that can be with you your life long?”-Louis L’Amour

Lawng Suam Hmang (Pirate)

      Pirate tih awmzia dik tak hi chu ‘Tuipui khualzin’ tihna a ni tih hre hmasa phawt ang.

      Pirate te hi mihringte’n tuipui sumdawnna kalkawnga hman an chin tan tirh ata lo awm tawh an ni a. Pirate ho chanchin ziaka awm hlui ber nia lang chu  BC Kum zabi 13-na laia tuipuia chetla thin hote’n  Aegean leh  Mediterranean tuipui an tih raltit vek chu a ni awm e. Chanchin ziakna hluiah chuan,  Illyrians leh  Tyrrhenians hote chu pirate tia hriat an ni a, Greek leh roman zingahte pawh pirate hi an awm ve bawk awm e.   Lemnosthliarkar chuan greek ho tha chak tak mai chu hun rei fe dangin  Thracian pirate hotan hmun duhawm tak, kum tam tak chhung chua  ni reng a.   Phoenician hote pawh engemaw chang chuan tuipui an kzin tumin pirate-a han tan zawk zawk chang chu an nei a, mipa naupang leh hmeichhe naupangte an man a, sal atan an hralh leh thin a ni. BC kum zabi pakhatna lai velah te khan,  Anatolia Vaukam velah te chuan pirate hlauhawm tak tak mai an awm thin a,  Roman ho sumdawnna a ti ralmuang lo zo vek a ni.

      Kum BC  75 naa Aegian tuipuia a zin tumin  Julius Caesar pawh kha Cilician pirate ten an man a,  Pharmacusa-a  Dodecanese thliakar-ah an tan tir nghe nghe a ni. A hnuah ceaser hian heng pirate te hi a that leh vek a ni.

      Rom  Senate chuan BC 67 khan pirate ho thenfai kawngah thuneihna pumhlum chu Pompey-a kutah an hlan a,  Pompey hian thla thum chhungin tuipuia hlauhawm chu a thianfai thei a ni.

I                       Kum zabi  3-na lai vel khan Pirate ten Anatolia a khawpui pakhat Olympos an bei a, hei hian thil thar nasa tak a thlen nghe nghe a ni. HMasang lawng suamhmangte zingah chuan  Illyrians ho, khawthlang Balkan peninsula luahtute chu an langsar ber awm e.  Adriatic Sea tuipuia lawng te an suam thin a, Illyrian te hian Roman Republic chungah pawh harsatna an thlen zing hle. BC 68 khan Rom hoin  Illyria an la a, ram bung khatah siamin, hlauhawm an tireh thei hram a ni.

      Kum  258 AD daihtawh khan,  Gothic-Herulic  lawng rualte chuan  Black Sea leh  Sea of Marmara kama khaute chu an lo suasam chiam tawh a. Hemi hnu lawk hian Aegean vaukam pawhin hetianga suasamna hi an tawng ve leh bawk a ni. AD  264 khan  Goth hoin  Galatia leh  Cappadocia an thleng a, Gothic pirate te pawh   Cyprus leh  Crete-ah te pawh an inlar nghe nghe. Hemi tum hian Goth ho hian rosum tam tak an la a, sal tam tak an hawn bawk a ni.

      AD 286  khan Gaul hnam thisen kai  Rom sipai hotu  Carausius, chu  Classis Britannica kaihruai tura ruat a ni a, ani hi  Frank leh Saxon pirate ho,  Armorica vaukam leh  Belgic Gaul vaukam suam thintute tih chimit hna chu a kutah an pe a ni. Rom ho awp  Britannia (Britain)-ah pawh  Saint Patrick chu  Irish pirate ten an man a, an tan tir nghe nghe.

       Hmasang Polynesian ralhratte chuan tuipui leh luipui kam khua te chu an bei thin a. Tuipui chu an hmang thiam em em a, tuipui atang chuan an bei thut a, an insa seng leh thuai thin a -Inbeihnaa che chhe zawka an tan pawhin tuipuiah chuan an insaseng daih thin a ni.

Hun lai hawl atang kum zabi 19-na thleng:

      Hunlai hawl Europe-a pirate zinga hriat hlawh leh thleng thui ber chu   Viking ho an ni awm e. An ni hi Indomi leh suam hmang an ni a, Scandinavia atnag lo chawr chhuakin, kum 783 atanga 1066 chu an hran zual lai a ni a, Hun lai hawl tirlam a Viking Age an tih kha a ni. Tuipui kam leh Europe khawthlang lam khawpuite chu an run a,Seville te pawh AD  844 khan an zu thleng a ni. Vikingho hian   Africa hmar lam leh  Italy vaukam te pawh an run a.  Baltic Sea vaukam an rawk fai leng a,  Europe khawchhak lam luite leh  Black Sea bakah  Persia te pawh an han thleng. Hun lai hawla Europe khawmual pui sawrkar chak tak an van avangin pirate te hi an ngampa hle  a ni.

      Hetih lai hian  Muslim pirate te chu  Mediterranean Tuipuiah an lo vawk lal len ve thung a. Kum zabi  9-na tawp lamah khan, Muslim pirate hmunpui chu  France ram chhim lam vaukamah leh  Italy hmarlam vaukamah te chuan an siam a. Kum 846 khan Muslim te’n  Rome an run a,  Vatican phei chu an ti chhe nasa hle. heng hun lai kum zahnih bawr vel chhung hi chuan muslim pirate te an hrang hle a ni.

       Slavic hoin kum zabi pa 5 na leh pa 6-na inkar a  Balkan peninsula an run hnu khan, kum zabi pasarihna tir lam atang khan Slavic hnamte chu Dalmatia leh Zachlumia inkara Pagania ramah an khawsa thin a. Heng  Slav te hian Illyrian ho chin dan hlui, lawng suam hna chu an rawn ti nung leh a,  Adriatic tuipui chungah phei chuan suam loh a hleih an nei ngai lo. Kum 642  khan Italy chhim lam an run a, Benevento- hmuna Siponte te pawh an rawk fai leng a ni. Adriatic tuipui-ah an han che tak tak chu, chuta kal ngam khualzin pawh an awm ta lo hial a ni.

       “Narentines”, tia sawi an ni thin a,  Venetian Navy te raldo-a an chhuah bo hlan phei chuan, an che nasa leh zual thin a. Adraitic tuipuia  Venetian lawng rual an lo kir leh chiah chuan,  Narentines te hi an han tawmim a, Venice-ah pawh inremna te an ziak a, an hotupa pathian awm ring lo pawhin baptisma changin kristianah a inlet a ni. Kum 834 emaw,  835 emaw zawk zawk khan inremna thuthlung an bawh chhia a,  Neretva lawng suam hmangte hian  Benevento atanga rawn kir leh Venetian sumdawng te chu an lo suam leh chiam mai a,  Venice-in Siapi tha chakna hmanga lawng suam hmangte hrem tura  839 leh  840 vela hma a lak pawha  hlawhchham thak a. A hnu phei chuan,  Venetian te chu an bei nasa leh zual a. Kum 846 phei kha chuan Narentine te hian   Venice an lut thleng nghe nghe a,  Kaorle khawpui an rawk kaw dawk mai. Kum 870 march thla lai hawl vel khan Roman Bishop palai, Constantinople-a kohhran khawmpui hmang lo haw leh chu an lo man  a. Hei vang hian Byzantine Sipaiten an rawn bei ta a, a tawp atawpah chuan kristianah an inpe ta hlawm a ni.

      Kum  872 bawr vel khan Arab hoin Adriatic vaukam an suam a,  Imperial Navy te an tawlh kir phah a. Hei vang hian  Narentine te pawh   Venetian tuipui chungah an rawn inlar leh tan ta a.Kum 887-888 bawr khan italian ho nen buaina an nei chho leh ta a ni.  Narentine pirate ho hi Serbia a an khawsak lai chuan ngiahsan an hlawh hle a,  serbia puiin an sipai tha ber an ni.  Venetian ho pawhin kum zabi 10na leh 11-na inkar khan an theih ang tawk tawkin an lo bei ve a ni.

      AD 937 khan  Irish pirate te chuan  Scot te, Viking te, Pict te, leh  Welsh te lamah tangin  England runnaah an tel ve a, Athelstan chuan an lo um kir thei a ni.

       Baltic Sea-a Slavic hoin  lawng suam an chinna chu  Danish hoin 1168-a rani hmunpui arkonia an lak takah khan a lo tawp ta  a ni. Curonian   te chuan kum zabi 12-na lai khan scandinavia khawthlang lam tuipui kam te chu an suam cham chi a.  Oeselian te  Baltic Sea chhak lam vaukam te chu an suam ve thin bawk a. Kum zabi  13na leh  14-na inkar te khan  pirate te hian  Hanseatic lawng kawng te chu an ti ral ti hle a, tuipui sumdawnna te chu an ti chhe pumhlum tep a ni.  Kum  1440-na vel thleng kha chuan North Sea leh   Baltic Sea vela tupui sumdawnna chu pirate te vangin a ralmuang lo hle a ni.

      H Thomas Milhorn a sawi dan chuan lawng suamhmang zinga  lawng suam chin vanga thiam loh chantir hmasak ber leh khaihlum a, tuipuia chiah a, a hnua hmun lia a taksa tan bun hmasak ber chu  English pa pakhat  William Maurice a ni a, Kum1241khan thiam loh chan tir a ni. Hei hian, khatih laia lal Henry III lawng suam chin hia  duhloh zia a ti lang awm e.

       Ushkuinik te chu  Novgorodian pirate an ni a, kum zabi 14-na lai vel khan Volga leh Kama lui chheh vela khawpuite chu an suam thin a ni.

      Byzantine hunlai daih tawh khan, Greek ho zinga kawlhrawng ber pawl  Maniots te chu  pirate tia hriat an ni a.  Maniots te hian an retheih em avangin pirate nihna chu thil tha loah an ngai lem lo a, an sum lakluna ber a ni zui ta a ni. Maniot pirate te kuttuar nasa ber chu   Ottoman lalram a ni a, hetih rual hian europe ram lawngte chu an suam tho a ni.

      India ram tuipui chheh velah te pirate hlauhawm tak tak hi an awm ve a, an hrang hle thin a ni.

Asia khawchhak lamah:

Kum zabi  13-na lai vel khan Japana awm hmun khuar  Wokou te chu  Asia khawchhka lamah an rawn lang tan a, heng pirate te hian kum zathum vel zet chu heng lai hmun hi an chenchilh a  ni.

       Asia khawchhak lama Pirate lawng rual chak ber chu  mid-Qing dynasty hun laia chinese lawng suam hmangte ta a ni. Pirate lawngte hi kum zabi 18-na tir lama khan an chak leh zual hle. Hun engemaw chen chu chinese pirate te hi an hlauh awm em em mai a, amaherawh chu, kum 1820-na bawra China rama harsatna chi hrang hrang lo thleng avangin pirate te dinhmun hi a tlahniam a, ngai an awh thei tawh lo.

 Europe khawchhak lamah:

      Kum zabi 16 leh 19 inkar khan  Europe-ah pirate republic pakhat a awm a, chu chu Zaporizhian Sich. Phai zawl biru takah a awm a, an pute lak ata tlabo  Ukrainian lo nei mite, dan pawna hnawh chhuah mi chi hrang hrangte, mi tenawm ve hrim hrim te, Turkish indo lawng atanga sal tlan bote an pungkhawm a. A hmun hi a bihruk em avangin bei lettu tur tan pawh rem chang a awm mang lo. Zaporizhian Sich-a khawsa ho  “Cossacks” tia insawi thin te’n an beih ber thin chu Ottoman Empire chhunga mi black sea vaukam hausa tak mai te leh Crimean lalram te a ni. 1615 leh 1625 inkar khan , Zaporozhian Cossacks te chuan  Istanbul chheh vel khaute an han suasam chiam nghe nghe a, Ottoman Sultan pawh a lal in tlanchhiatsan ngaiin a awm ohah a ni. Stenka Razin kaihhruai  Don Cossacks te pawhin persian vaukam te an suam nasa hle bawk.

 Africa hmarah:

Barbary pirate te chu  Africa hmarlam lawng chawlhna  Tunis, Tripoli, Algiers, Salé atangte leh  Morocco a lawng chawlhna atangtein an che thin a, Mediterranean tupui khawthlang lama lawng kal te chu Crusader ho  hun lai atang tawh khan an lo bei thin a, Kum zabi 19-na tira Asia lam kal tuma Africa a kal kual thin lawngte pawh an lo suam thin a ni.  Italy leh Spain-a vaukam khua te leh  Mediterranean ithliarkarte chuvawi tam tak an run a. Italy leh spain vaukam thui takte chu a mi chengte’n an ruahsan kim lek lek tep a ni. Kum 1600 bawr vel khan  Barbary pirate te chu  Atlantic tuifinriat-ah an chetla ve thung a,  Iceland an va thleng hial a ni. Robert Davis -a sawi dan chuan kum zabi 16na leh 19-na  inkar khan  European maktaduai khat atanga maktaduai khat leh a chanve inkar te chu Barbary pirate te hian an man a, sal atan an hralh leh thin a ni. Barbary pirate te hi Muslim an ni a, an zingah hian Kristian muslim-a inlet ta pawh an awm bawk.

 Caribbean lamah:

       Carribean-a Pirate hun ropui tak mai chu kum 1560 vel atanga intanin kum 1720 tir lam thleng kha a awh a ni. Kum 1700 atanga 1730 bawr chho thleng kha pirate te hlawhtlin vanglai ber a ni awm e. Carribean-a pirate tam zawk hi spanish an ni. Spain-in indona hrang hrang a hmachhawn chhoh lai velin carribean hi an pan a, pirate an ni zui ta a ni.  Pirate ho innghana hmun lar deuh deuh te chu Bahamas-a  New Providence, kum  1715 atanga  1725 chhunga siam, Tortuga 1640 vela siam, leh  Port Royal  1655 vela siam. ‘Pirate of the carribean’ kan en chaun heng hmingte hi chu kan hre thin awm e.  Caribbean pirate te zingah chuan Edward Teach,  “Hmuihmulduma” an tih bawk leh  Henry Morgan te chu an lar ber awm e.

Pirate nun chu:

      Tun laia mi tam ber suangtuah dan chuan, hmanlai huan pirate te chu luhlul leh fing, leh zalen tak an ni a. Lawng an suam dawn pawhin an Jolly Roger-flag chu an tar chhuak kher thin anga tarlan an ni. Jolly roger hi european leh american ho puanzar hman thin hming a ni a, pirate te chhinchhiahna langsara  ni. Film leh naupang inawmlemna thil siam tute pawhin an hmang uar hle  a ni.

      A tak takah erawh chuan, Pirate tam tak chu an rethei khawp mai a, bahla ringawt ringte’n an khawsa a; a then erawh chu hausa fe fein an chawr chhuak a, tam tak chu kum naupangte niin an thi

 RO

      Pirate te hian lawng tam tak chu an suam ngei mai a, amaherawhchu, ro lo phum tawk an awm a nih pawhin, a tlem zawk an ni ang. An “Ro” ruk zawk fo chu, chaw te, Tui te, zu te, Ralthuam leh,thawmhnaw te a ni tlangpui. An thil lak dang leh chu inchhung thil ang chi, sahbawn tih ang te, Hmanrua, hruizen leh thir chakai angte a ni fo. A chang chuan an lawng suam te chu an nei zui bawk a, heng hi a then chu an hralh a, a then chu an lawng aia a that zawk avangin an hmang zui bawk a. A thil lak thin tam zawkl hi nakin a la hman tangkai tur aiin tuna an hman mai theih tur a ni tlang pui. Hei vang hian ‘ro’ an phum kher hi a ngai lem lo a ni. Pirate te hian lawnga chuang te hi an that ve fo a, a chang erawh chuan, an lo inpek mai chuan lawnga mite chu an that kher lem lo. Pirate te chuan tumah an zuah dawn lo tih an hriat chuan, lawng danga mite chuan a tawp thlengin an lo bei thin a. Pirate te pawh an buai ve thin hle. Amaherawhchu, lawng chu an pek mai chuan a chhunga mite chu an zuah vek dawn tih an hriat chu an lo bei kher bik lem lo.

KAPHLEIA NI (NOVEMBER NI 13) PUALIN

TLANGVAL KAPHLEIA

“Thihna chu ka hlau lo a, Thlan thim chu ka hlau hek lo, ” titu chu Vawiin ni ang kum 80 kal ta khan, Nung turin a thi a, Chatuan lawmnaah a lut ta.

A thlanlung a pain a phunah chuan, heti hian a inziak a

“Kan fapa neih chhun

Kan thlamuanna ber thin” tiin. Kaphleia chanchin hre chiang apiangin a nu leh pa rilru natdan tur hi a hriatthiam pui anga, Mizo hnamin a chan ropui zia an hriatthiam chuan, Chalchingvunga leh Chuaizovi te tluk bawkin an thinlung a na ang. Kaphleia chu Mizo hnam thlamuanna ber thin pakhat chu a ni si a.

He hnam hi, mawl tak a la nih laiin, Vai ramah lehkha zirin a awm a. Hnam pumpuiin an thlir rawn a nih laiin, Natna tihbaiawm takin a man a. “Mihringte hi engkim duh a, engkim hmu tlak lote kan ni, kan chan chheteah kan lawm mai tur a ni” a la ti cheu thei a ni.

Mahni hlawkna theuh um , kan buai chhoh mep mep laiin, Mahni aia Ram leh hnam dah pawimawh hmasa, Pathian dah hmasa zel tute chuan he ram tana tih tur la ngah em em a inhre chungin ram tha leh zual zawk an lo pan tawh a.

1940 a piangte chu putar an ni tawh. 1940 khan Tlangval pakhat a thi a, Mizo hnam tan channa ropui tak a ni. A hunlaia natna tih baiawm ngawr natnain a tlak buak a, Calcutta lam a a lehkha zirna atanga lo hawin, “Thi turin ka lo haw e” a ti hial a ni.

Chu tlangval ngaihah chuan, Mizo hnam chu a ropui ber a. Ram leh hnam leh Pathian rawngbaawl chu kan tihtur awm chhun ni hialin a hria a ni. “Kan tih leh kan sawi engkm mai hi, Pathian leh kan ram tan ni se” a ti hial a ni.

A huaisen khawp mai, “Thihna lo thleng tur chu ka hlau lo a, thlan thim pawh ka hlau hek lo” a ti hial a.Ram leh hnam tana tihtur nei kuhtul chunga mual a liam tur chu na a ti em em a, “fapa hrin man awmlo” a inti hial a ni.

Mizo Essay hmasa ber, “Thlirtu” a ziak a, Short Story, “Chhingpuii” a ziak baawk a, hla ropui, ” Zoram ka ram” tih te a phuah a, Hla pui hmingthang, “Jerusalem ka in ropui tih hi a leh lin a ni bawk.

Kaphleia kha Government High School. Shillong-ah a kal thin a. Chu chu Khasi Nationalist hoin an din a ni a.1880 khan an din a ni. Hemi hnu reilote hian Kaphleia te sikul dintute tho hian Khasi ho press hmasa ber pawh an din leh a ni. Kaphleia te High School kal kha chu an fel tawh viau a. A diary atanga en pawhin a high School kallai khan a lehkhabu chhiar pawh a puitling tawh hle a ni.

A hnuah Calcutta-ah lehkha a zir leh a. Bengali ho an vanglai a ni ber ang chu, chutih hun lai chu!

Khawvel inlum leh hunlai a ni a, khawvel ram hrang hrangah pawh ram leh hnam hmangaihna kawngah mipuite an thang harh a. Khawvel indopui pahnih inkar cheh hunah an awm a, hun danglam takah chuan Kaphleia chu lehkha zirin a awm a. Hetih lai hian India ramah pawh Gandhi-a kaihhruaina hnuaiah zalenna sualin an vanglai tak an thleng chho a. A lehkha zirna hmun Calcutta chu Indian Nationalist ho kulhpui pakhat a ni a, Indian National Movement-ah period tam zawk chu calcutta hi a hmunpui ber a ni hial awm e. National Movement leader tam berte hi Bengali an lo ni bawk a. Chung hun vang lai, Civil Disobedience Movement velte a lar chhoh laia lehkha zir chu kaphleia kha a ni. Chungte chuan Kaphleia hi nasa takin a nghawng a ni tih a hriatthiam theih awm e.

A lehkha zirna boruak leh a hun tawn te han en hian Nationalist a ni hi a awm viau a ni. Mizo Hnam tana zalenna duhtu a rawn ni a, Vai hoin India ram zalenna an duh ang bawkin, Kaphleia chuan Mizo te zalenna chu a duh a, independent ram kan nih chu a duh ve a ni. Politics rilru chhiain a ti buai lo a, hnam hmangaihna thinlung diktak a pu a. India miah a in ngai ngai reng reng lo a, a ni ngai miau hek lo a!

Kaphleia hun lai khan Mizo leh British Indo atang khan kum 40 bawr emaw chauh a la inher liam a, kha Indona chanchin pawh kha a tel ve ate ngei ka atang pawhin a dawngin a rinawm a. Mizo hnam a ngaihhlut zia te kan sawi tawh a. Chu mizo hnam chu tu thuhnuaiah mah kun lo se, ama kein ding se, tih chu a duhthusam a ni.

A twngtaina pawh hetiang hi a ni
“Aw chung Pathian
Hnam tin khawngaihtu thin;
I fate bawk kan ni
Mi hnuaia kan kun bik phal suh la.
Hnehchhiah leh bumna min dopui la
Kan innghahna thutak ni se;
Kan tih leh kan sawi apiangte
Pathian leh kan ram tan ni se”

“Aw chung Pathian
Mahnia ding turin,
Thudik leh fel zawmin
Chakna, finna min zuk pe la…”

Kaphleia thinlungah chuan Mizo chu hnam (nation) a ni a. Ama kein a ding tur a ni tih hi a ni. Keini pawhin Mizo hnam hi nation a ni a, a tawpkhawka kan nihna tur chu tuma hnuaia kun loh hi a ni, tih hi kan theihnghilh loh angai a, heta tang hian kan identity pawh kan din a tul a ni. Chu chu h khawvela kan dinchhuahna tur pawh a ni ang.

Kum 78 kal ta khan, “Kan dam rei leh reiloh te hi, Kum te, thlate hian a hril ber lo, kan thu leh kan thiltihin a hril ber zawk a ni” ti tu, fapa hrin man awm, Kaphleia chu kum 30 mi chauh niin a thi.

Kaphleia chu a thi tawh a, Kaphleia chu a dam reng ang.

“Ar ang ka vaihna tlang zawng zawng hi

Ka zua Lal hnenah ka hrilh hun chuan

Hmangaih banin min pawm ang;

Engmah reng ka hlau lovang,

Aw, Chatuan lawmna ka chang tawh ang” tia a lo thlir hmun, JERUSALEM a IN ROPUI-ah chuan lawmna leh muanna chang tawhin min lo nghak a ni.

“Aw Lalpa, Kaphleia min pek avangin kan lawm e”

MIZOTE LEH HUMAN TRAFFICKING

-F. Vanlalrochana

A Awmzia: A awmzia chu Mihring tawlh/bungrua ang maia mihring tawlh tihna a ni deuh mai.

  • A chhan: Human trafficking lo awmna chhan chu, an mihring phurh/tawlh a te kha sumdawnna atana an hman thin vang a ni.

Nawhchizuar atan te, Nupui a neih luih a tan te, sal atan te leh an taksa bunghrang laksaka hralh (organ harvesting) atante a ni ber.

Mihring sumdawnna hi a hlawk em em a. International Labour Organisation chhut dan chuan, 2014 daih tawh pawh khan mihringa sumdawnna-ah pawh, hna thawk tura hralh bik chauh (taksa bung hrang laksak emaw, Sex kaihhnawih pawh nilo) –ah  a titute hlep belhkhawm hi US Dollar tlulehdingawn 154 a tling pha a ni.

  • Human Trafficking Lo thlen tawh dan:
  • Bible-ah kan hmu a, Josefa ngei pawh sala sumdawngte hnenah hralh a ni.
  • Mizo Thawnthuah a nuin Thailungi a hralh daih bawk.
  • British hoin sal an hralh thin a, Khawngaihna Mak phuahtu John Newton-a ngei pawh Sala sumdawng thin a ni.
  • America rama an sal neih dan leh sal chhuahna thu vanga America rama tualchhung indona chhuahdan kan hre fur. Abraham Lincoln-a hunlai a ni a, Lincoln-a kan hriatna ber pawh a ni awm e.
  • Tunlaia phei chuan a nasa em ema, khawvela sum dawnna hlawk ber a ni.
  • Human Trafficking an kalpui dan: Human Trafficking an kalpui dan han tih hian, kan tana pawimawh chin, Mizote pawhin kan lo tawrh ve tawh dan atanga kan hriattur leh kan fimkhurna tur chin kan sawi mai dawn a ni.
  • Hna hmuhsak tura intiamna: Phaiah hna hmuhsak tura intiamna ang hmangin bum kan tawk nasa. Hman zan lawkah pawh Lunglei khaw mi ngei pawhin harsatna a tawk. Phai agency lamin min bum a awm a. Mizoramah Agency indina mizo ngeiin an bum kan bawk.
  • Naupang hralh: Hmanni deuhah naupang rukbo a lar chiam a. Mizoramah chuan a thleng hauh lo a. Ruk tumna pawh a awm lo a. thu vuvuk kan insawithaih a ni. Chutih rual chuan, naupang hi chu rukbo fo an ni. Chuvang chuan, tunah thleng rihlo mah se, nakina thleng theilo a ni lo. Kan fate chin kan hriat angai.
  • Nawmchenna thila inhralhna: Hetah hian, a hranpa mihring va ruk bo kher a ni chuang lo a. Tu emaw nawhchizuar ang maia amah kawptu tur zawn sak a, an inkawp man lo lak ve hi Human Trafficking chhunga mi tho a ni a. Lungleiah ngei pawh chu thil chu a thleng tawh a ni.
  • Kan Invenna Tur
  • Kan fate chin hriat tur. Naupang tei mai mai, pawna tla leh awm mai mai ang chi hi a him tawh lo a. Human Trafficking thil ai pawhin Mizoramah chuan, sex laka an himna atan a pawimawh zawk a ni.
  •  Phai leh Foreign-ah hna kan zawng nasa tawh a. Hna tul tul kan thawk a. Agency hrang hrangin hna hmuhsak thei tiin an intawk tarh a, Mizo zingah tisual an tam ta hle. Hna him leh him lo, agency him leh him lo ngaihtuah miah loin kan bawh pawp pawp a. Foreigna kal hrim hrim chakna a awm thin bawk a. Foreigna kal tam zawk hi, mi awmpui an ni a. A nuam lem lo bawk. Human Trafficking victim nihna chance a sang em em bawk a. Phaia spa thawk tih ang phei chuan kan fate kal tir tawp loh a tha.
  • Hmun danga hnathawh thu reng rengah Police emaw, tu emaw mi dang rawn hmasak thin a tha.
  • Company rintlak emaw, sawkar hna a nih loh chuan, Mizoram chhuahsana hna bawh hi a himlo hle a ni.
  • Passport lem siam an tam. Tunah pawh harsatna tawk China-a tangkhang te, Tihar jaila tang pawh an awm.
  • Kan kalna tur kha eng ang nge, a hna kalphung engnge, Mizo Thawk an lo awm taw hem? Tihte pawh chhut hmasak a tha.
  • Mizoram chhuahsan, India ram chhuahsan hi chak riau leh changkang ta riaua hriatna a awm thinte pawh hi a ang a. Kan vachhuahna tam zawk, kan hna va thawh hi Hnam hniam te te, mi chhiah hlawlh/awmpuite a ni thin. Nikhata darkar 10 ding chunga hna thawh ngaite a ni. Mi pawhin an en hniam em em a. Chug hna hniam tete chu kan duh tak zet em? vai ramah phei chuan en hniam tak an ni. An hmusit zia chu thuk tak an ni. Hmun danga an hnathawh anga rim thawh a, hna zahawm zawk thawh tur hi Mizoramah a la awm a. Chhungkaw chawmna tling hna a la awm a ni. Rim taka thawh dawn chuan, hna pangai mizoramah thawh mai zawk tur. Tin, mi awmpui ang chia rim taka hnathawh hi kan tlin meuh lo. Hna hniam/ kan va kalna societyte hmuhsit em em va thawh hi, Mizote hi awmpui hnam angah min hria ang tih a hlauhawmna chente pawh a awmin ka hria.

Hna hnuaihnung leh kan va kalna society ten an hmuhsit hna a nih avangin, kan va kalnaah khan, tumahin min ngai pawimawh lo sa dawn tih pawh hriat tur a ni.

Chung zawng zawng hrehloa kan kal a nih chuan, kan thu a ni.

  • Agency rintlakin an tirh zingah pawh an va thawhnaah an hah avangin, hna awlzawk zawnga insawn an awm thin. Chung chuan, harsatna an tawk thin. Chu chu anmahni tirtu agency thiam loh pawh a ni tawh lo.
  • Hmun danga hnathawk/a bikin phaia hnathawk tam tak, an chhungten an thawh ber an hriat loh an awm thin, Nuam ti awm taka zu thawkte an ni thin. Tlang taka sawi chuan, mahni inzuar an ni. An zu awm rei phei chuan, manager dinhmun ang luah phate an awm. Mizorama an mizo pui nge rawn sawm a, hruaithlak dan zawng an awm a. Chutiang ngei pawh chu a thleng a. An thu an awih chuan, harsatna an siam sak lo a. An thu awih lo te chu nasa takin harsatna an siam sak thin.

Sihhnip chi deuh chuan, an tih angin an awm ve mai a. Tlema sihhnip lo deuh chuan, an lo duhlo a. Buaina a awm fo. Mahni thenawm nula ngei pawh bum duh an awm thin. Kan hmelhriatte an nih avang khan an rintlak loh tihna a nih chu.

Tiang thilte hi kan fimkhur em emna tur a ni.

  • Mi lehkhathiam leh ningkhawng hria, tawng thiam bawk si hi Human Trafficker ho hian an target mang lo. Lehkhathiam vak lo, tawng thiam mang lo, rualawt ve si hi an target tlangpui a ni.
  • TLANGKAWMNA
  • Mizo zingah human trafficking hi chi hrang hrangin a thleng ta fo. Pawisa um leh changkan chakna rilru avanga thlemthluk kan ni thin.
  • Kohhran leh khawtlanga inzirtirna tha, chhungkaw inkaihhruaina leh inzirtirna tha a pawimawh.
  • A dik leh tha, thianghlim leh zahawm hi nunkawngah zawn hram hram tur a ni. A tlo ber.

THU HNUHNUNG

Mi tam tak chuan an thih dawnin thu hnuhnung an nei fo hin. Khawvel mi lar leh ropui thenkhatte thih dawn an thu hnuhnung hi lo thlir ho dawn ila. An thusawi thenkhat hi chu a thlamuan thlak duh khawp ang. Kan theihnghilh loh tur erawh chu, an thih dawna thu an sawi kha a thlamuanthlak em avangin Vanram an kai tura dah ngawt chi a ni lo va, eng teh ual an sawi loh avangin an kai lo tura dah ngawt chi a ni lem bawk lo.

Pathian awm ring lo thuziak thiam George Bernard Shaw-a kha mahni intihlum a ni a, a thih hmain kawngkaah he thu hi a lo tar, “Tukin zing lam dar 2 khan thu leh hla hmanga khawvel awi thintu George Bernard Shaw chu thlamuang takin a chawl ta” tih hi ! An ti!

English poet ropui Lord Byron-a chuan, “Tunah chuan ka muhil ve tak tak tawh ang” a ti a. Karl Marx ve thung chuan, ”Thurochhiah tih ang rengte chu an dam laia an tih tur ti zo ve hman lo mi a te sawi tawk a ni,” a ti thung a. Historian leh Essayist hmingthang Sir Thomas Carlyle chuan “Hei hi maw thihna chu, a tha e..” a ti.

British Playwright Noel Coward chuan, “Duhtakte u, Mangtha ule, naktukah kan inhmu leh dawn nia” a tih laiin Voltaire chuan, “Thlamuang takin min thih ir hram teh u,” a ti thung. American essayist Henry Thoreau khan, “He khawvel hi inchhirna pakhat mah nei lovin ka chhuahsan a ni” a ti.

Lord Buddha khan, “Engkim hi an la tawp vek ang” tiin a thi a. Roman Emperor Vespasean a chuan, “Pathian ka ni tawhin ka hre hial” a ti thung. Roman Emperor vek Caligula kha chuan, “Ka la nung reng a ni” tiin a thi a.

France lal Charlemagne-te, Lady Jane Grey-te, Catherine af Aragon-te chuan, “Lalpa, I kutah ka thlarau ka kawl tir e” an tih theuh laiin Alice in Wonderland ziaktu Lewis Carroll chuan, “Heng lukhamte hi chu la bo tawh rawh u, ka mamawh tawh lo ve” a ti thung.

Italy ram hruaitu Machiavelli chuan, “Ka ram leh hnam hi ka thlarau ai pawhin ka hmangaih zawk a ni” tiin a thi a, Edison-a chuan, “Khi lam chu mawi ropui tak a ni” a ti.

Nancy Astor chuan, “Ka thi a? ka birthday zawk niin ka hria” a ti a, Darwin-a chuan, “Thih hi ka hlau lem lo e” a ti a. Queen Victoria chuan, “Thlamuanna lo thleng tur chu” a tih laiin President Roosevelt chuan, “Ka lu a na kher mai” a ti.

King George V chuan, “Ka lalram chu a dinhmun a tha maw?” tiin a la zawt talh talh a. Music phuah thiam Franz Schubert kha chuan, “Hei hi ka tawpna a ni” a ti a. Novelist Sir Walter Scott chuan “Pathianin malsawm che u rawh se, ngai ka awh leh tan ta” tiin a thi.

Pathian mite thusawi hnuhnung hi a ropui hlawm a sin:

Martin Luther – Ka Pathian hi pathiante Pathian a ni a, Amahah chuan he thihna hi ka bihruk san dawn a ni.

John Knox – Ka nunna, Kristaa ka nunna chu, he thihna tih baiawm tak mai hian a ngam loh avangin hlauh reng reng ka nei lo ve.

John Calvin – Lalpa, thihnain ka nunna chim mahsela, I kuta ka awm ni atang khan ka lung a awi tawk tak zet a ni.

Charles Wesley – Lalpa, nangmah anna famkim neia ka nung ve dawn ta hi ka lung a va awi em! Lungawina, lungawina chu a lo thleng ta e.

Richard Baxter- Natna zawng ka nei na meuh mai, nimahsela, ka nunna a khawih buai lo, muanna, muanna chu a kim ta.

Dr. Preston – Ka thi dawn lo va, Pathianin ka awmna hmun a thlak thung mai dawn a ni zawk e. Chumi hmun pan chuan Pathian nen kan kal dawn a, a hnenah thlamuangin ka chawl hlen tawh ang.

Samuel Rutherford – Ka thinlung hi hlimnain a luangliam a, Van lam manna a chawm a ni si a. Ka kut hi amah pawm turin ka phar a, Anin min lo lawm ang.

I thih dawnin eng thu nge i sawi ve tak ang le? Dwight Lyman Moody-a thu hnuhnung ber chu, “Lei hi a tawlh hla tial tial a, Van a rawn hnai zual telh telh a. Hei hi maw thihna chu, lallukhum ka khum ni a ni,” tiin.

Ni e, ringtute chu leiah thil ropui ti turin kan lo piang a. Thihnate hi kan tan chuan malsawmna a ni zawk a, chatuan chawlhna hmun hlun zawk a kan luhna, ropuina ropui zawkah lallukhum kan khum ni a ni.

“KAL LA, TISUAL LEH TAWH SUH” (Johana 8:11) central jaila ka thusawi

Mihring thanlen dan leh kan khawvel tawn hi a inang lo khawp mai. Kan thanlenna chhungkua a zir leh kan thian kawpte avang hian dinhmun inang lo tak takah kan ding thin. Vawiina helai hmuna awmte hi induh reng vanga tang in awm lo. Tan loh hram hram duh in ni. In tanna chhan pawh hi in tum luih ngawih ngawih a ni mang lo a. In tum ve reng anga lang pawh hi a nihna takah chuan, in ngaihtuahna kaihhruai dik lotu engemaw vang a ni fo zawk.

In thil lo tih tawhah inchhirna nei in awm anga, inchhirna reng reng neilo pawh in awm mai thei. Kan dinhmun a inang lo hlawm khawp ang. A then chu damchhunga tang tur in ni anga, a then chu karleh lawka chhuak turte pawh inni ang. In mamawh, keini pawhin kan mamawh erawh a inang vek a ni.

Pathian hmangaihna te, a ngaihdamna te leh Sual a hremna te chu. Vawiinah hian kan rilruah awm se ka tih leh, nakin thlenga awm reng se ka tih chu, ‘Kal la, ti sual leh tawh suh’ tih hi a ni.

Helai Johana 8;1-11 thu hi kan en chuan, Pathian hian uirenu hi second chance a pe a ni. Keini pawh hi, Pathianin second chance min pe tih kan hre reng tur a ni.
1. Pathianin thiam loh min chantir ve kher lo a ni.
Mihringte hi a huhoa thate tea awm tlang tur kan ni a. Chumi kan awm tlanna tur atan chuan khawvel dan hi zam a ni. Engemaw dan kan lo bawhchhiat avangin man kan tawk a. Tan ina khung kan ni fo. Khawvel dan chuan thiam loh min chantir ngei mai. Thiam loh chan tir awm kan ni ve bawk ang. Pathian erawh chu a hmanhmawh ve lem lo. Thiam loh chantir mai loin, a lam kan hawi hun a nghak fo. A hranpain engin min chhun thlu ve kher dawn lo a nia. Khawvel danah thiam loh chang mah ila, tan inah dam chhunga tang tur ka nih pawhin, ka sualte avanga ka in chhir chuan, Min la ngaidam duh a ni.

Tan inah tang lo ta ila, tute emaw kutah ka thi ve mai thei. Pathian hnena inlam let hman loin ka thi ve thei. Khung hrana kan awm hi Pathian khawngaihna avang a ni thei fo.

Johana ziaka Uirenu bawk hi, Pharisai leh lehkhaziaktuten thiam loh an chantir hi Isua hian thiam loh a chantir ve mai lo. A thiam tihna erawh a ni chuang lo. A khawngaih a ni. Keini pawh, Pathianin min khawngaih a, thiamloh min chantir ve nghal mai lo.

Continue reading “KAL LA, TISUAL LEH TAWH SUH” (Johana 8:11) central jaila ka thusawi

KHUSHWANT SINGH-A TITI HLIM TAKA REI TAK DAM THEIH DAN KAWNG

Kum 98 mi a nihin, Khushwant Singh-a khan, Khushwantnama The Lessons of my life tih a ti chhuak a. Chuta a thuziak pakhat ‘Hlim taka rei tak dam theih dan’ tih chu mizo tawngin ka han dah chhuah a ni.

1. Infiamna engemaw tal ti rawh. Tennis a ni emaw, squash a ni emaw, badminton a ni emaw, Golf a ni emaw. Insawizawi thlahthlam lo la. darkar chhut kawnga chak deuh hleka kal emaw, tui hleuh emaw, tlan emaw pawh a tha vek mai.

2. A chunga mi khi engmah i ti thei lo a ni pawhin, Massage tal ti ang che. Nikhatah vawi khat tal. Taksa atanga lu thlenga kut tha chaktakin min han khawih vel hian thisen kal vel a siam tha a ni.

3. Chaw ei tlem la, zu in tlem la. Khawng takin chaw ei dan kalpui than nei ang che. dar 6:30-ah Tukthuan ka ei a. Chhunlai takah chaw chhun, zan dar 7:00-ah zu ka in a, zan riah dar 8 ka ei. Zingah thei tui engemaw in thin la. Guava tui hi a tha ber.

4. zanriah i ei hmain, ‘Tlemte ei ang che’ tiin in hrilh thin la. Mahni a ei a, ngawi renga ei hi a tha.

5. Sa leh thlai ei bik nei ang che.

6. Pum nuam lo leh ti teuh tohin awm miah lo ang che. I pum tih nawm na tur a nih chuan, laxatives leh thil dang pawh hman mai tur.

7. Pawisa hman loh, hman theih reng tur dah tha reng a ng che. Bank-ah balance mumal takin awm sela. Vaibelchhe tela neih angai lo e. Hmalam huna mamawh thuta hman tur, hriselna lohna leh harsatna lo thleng thut theia hman tur neih reng tur a ni.

8. I thin butut ti chhuak lo la. A tam thei ang ber nui ang che,

9. Dawt sawi suh.

10. Thil phal la, mi dangte hnenah thil pek ui ngai suh. I rilru hahdamna a pe ang che.

11. Hobby tha tak nei ang che, pangpar chin emaw, Rimawi tum emaw, tanpui ngaite puihte pawh a ni thei. I hun hmang tha la. I ngaihtuahna leh i kut chawlh tir suh ang che.

A ziah zawng zawng leh a ziah dan ang ngau ngauin ka dah chhuak lem lo a. Mizo nun ze mil leh kan tana tangkai tur chin ka han dah chhuakin, ka siam rem a ni.

Kum 95-ah The Sunset Club tih novel a la ziak thei a. Delhi khawpuia Lodhi Garden-ah putar pathum tlai ni tlak dawnin an titi ho thin a ni. Kum 98-ah pawh lehkhabu ngaihnawm tak a la ziak thei a ni. Hriselna leh damreina chungchang a sawi hi, a pawmawm thawkhat tur a ni.

HNAM DINCHHHUAHNA

Kan hnam hruaitute mamawh tak chu Nation building lama hriatna thuk tak a ni.

India ramin min awp mah se, hna kan thawh that duh phawt chuan hnam anga zalenna thui tak kan nei a. India ram chhunga awm siin mizo hnam ropui tak kan siam thei a ni. Chutiang tur erawh chuan a fawng chelhtuten an duh a, an tum a, an beih erawh angai a ni.

Beih a, tih kan tum loh fo thin avang hian Political mandate pawh kan nei zolo fo bawk a. Political Mandate nei pawhin tumna an nei lo emawni tih tur a ni thin.

Europe ram leh America ram dinchhuah dan te leh nation builder ropui tak tak an nei dante pawh sawi tur a tam a. Chhiar tur pawh a tam mai.

Khawchhak lam hi kan culture, values leh hmel pawhin a mil zawk a. Khawchhak lamah Asia mi nation builder ropui tak tak kan nei. Lee Kuan Yew, General Park Chung Hee, leh Deng Xiaoping. Denga te pawh hi Chairman Mao hnu mah nise, tunlai china dinchhuahna chu amah hi a ni thui hle.

Lee Kuan Yew-a phei chuan Nation building kaihhnawih a ziak a. Ama chanchin ni tel bawk. From Third world to First tih a ni a. Paragraph khatnaah pawh insak dan hrilh thei che leh engine siam dan hrilh thei che lehkhabu chu a awm. China, British India leh Dutch Eats Indies atanga pemkhawm te atanga Hnam din dan chu a bu la hmu lo a. Eizawnna pa chhe tak atanga mipuite chawm dan bu pawh ka la hmu lo tiin a ziak nghe nghe. Chutiang dinhmun atang chuan vawiin Singapore hi a hruai thleng a ni.

Mizo fate pawh hi kan duh phawt chuan hnam ropui tak kan ni thei a ni. Kan duhlo erawh a ang thin. Hnam corrupt tak, ruihhloin a tih buai hnam, mipui zaa sawmnga hna hmulo awmna atang pawhin hruaitu tha a lo chhuak thei a. Hnam tha leh zahawm takah a chhuah thei. Chutiang chu kan nih ve theih lohna chhan tur a awm lo.

Hnam tha leh ropui takah kan indin thei a. A man erawh kan pek ve kan inhuam angai.