TLABUNGAH INTHLAN

Tlabung bial hi Assembly Constituency ang zawng chuan, West Tuipui tih a ni a. Hemia Zonal officer tur hian Ni 26.11.2018 chawhnu lamah ka driver K. Malsawma leh ka PSO Lalhmingmawia nen kan kal a. Tlabung lam hi a tu amah kan la kal ngailohna a nih avangin kan zawt chawp thla a. Phairuang kai te chu Lungsen emaw te kan ti thla a. Tlabung peng kan hai avangin, Chhumkhum atangin peng ta lo chuan kan tlan tlang a. Lalnutui khua kan va thlenin, “Hei hi khawi khua nge?” te kan han ti he haw a. Tlabung lo lamah kan tlan tih min hrilh avangin kan let leh a. Hetiang velah hian darker hnih dawn chu kan paih awm e. Kawng an lo lai zal zau tha nasa si a, la metal lo mah se, kan lo tlan deuh vuk vuk mai a. Chawngte kan thleng lo chauh a ni ber mai e.

Lungsen peng kan va thlen leh chuan, congress ruaitheh haw hi motorah a khat tan tan hian an rawn in phur chho a. Sumo chungahte pawh an chuang. Khua a thim tawh si a. An accident ang tih pawh a hlauhawm fu. Lungsen thleng chu kawng chhia rau rau-ah a la zia hle. Lungsen atanga Tlabung lam kan tlan thla chu kawng a chhe tawh hle. Tuichawng kan han tlan pel chu ka rilru a na hle a ni. Chakma ho khawlaiah an lo vei sup sup a. Party flag lo intar tuarh a. Khawlaiah an lo awm khawm tulh tulh a. Engnge an tih ang tih chu a ngaihruat thiam theih. Chung chu lunglei atanga hnai te mai an ni. Chakma lo inhawngbi tup tup na chu.Kan ram dinhmun ka ngaihtuah a. Ka mittui a tla hial.Kawng chhe theihnghilh thaka ka rilru a han nat chu!

He hnam hmangaih hi a va han hahthlak em! A Beidawnthlak ngawih ngawihin ka hria.Mahse, he hnam tan hian tuin nge thawk chuang ang le.Ka fanu hi he rama thil thate ei a, he leilunga thlamuang taka seilian a, a chanvote chang tura ka duh si avangin he hnam hmangaih hi ka bansan thei si lo.Ka thlahte hian chhuang taka kan ram tihtur an la neihnana ka buatsaih angai si.

Km 30 chauh chu darkar hnih leh a chanve kan kal a. Tlabung chu dar 9-ah kan thleng thla a. Tlabung SDPO BM-a te inah chaw kan ei hnuin, kan riahna tura a lo tih fel sa, Forest Rest house lamah kan phei a. Zan kan riak a. Boruak a reh raih mai a. A nuam phian mai. Tlabung boruak lumin thlasik a hmuh tawh avangina lum tawh lem lo a, a nuam hle.

CHAKMA HO KA ZILH

Ni 27.11.2018 chuan Silgur, Diblibagh leh Tlabung Dintharah kan kal a.

Silgur kan kalna chhan hi, Critical Polling Station ECI-in a tih zinga mi a ni a. Tlabung atangin kan han zawt chawp leh pek a. Kawng an lo lai zau leh hluai mai a.Helai bialah hian nakinah nasa takin hmasawnna a la awm dawn tih a chiang a. Foreigner an pun hluai lohna turin sawrkarin hma a lak ngei chu a ngaiin ka ring. Silgur kal tur kha, Kawrpuichhuah kan zu thleng hial. Kawrpuichhuahah hian silgur khaw chakma pa a lo awm a, a lo chhoh ve duh avangin leh kawng kan hriat loh avangin kan phur tlang a.

Continue reading TLABUNGAH INTHLAN

SERKAWNAH ZORAMTHAR

(Thlalak post ka tum ngial a, a theih der loh mai)

Christian Hospital, Serkawnah ka fanu a piang a. Ni 26.8. 2018 atang khan damdawi inah kan la awm ta ngar ngar a!

Ka fanu hi ni 27.8. 2018 zing dar 6:35 a piang a ni a. A hming atan Abigail Malsawmzuali Fanai kan sa a.

Ka pa hi Fanai a ni a. Ka pa nu pawh fanai a ni a. ka nu hi Khawlhring a ni a. Ka nu nu hi Fanai tho a ni a. Mafeli (Abigail-i nu)hi hlawnchhing a ni a, Mafeli nu hi ralte a ni. Mafeli pa nu hi khiangte a ni a. Mafeli nu nu hi Pachuau a ni. Tichuan, ka fanu Abigail-i chu Fanai chu ni mah se, Hlawnchhing, Khawlhring, Khiangte leh Pachuau thisen a kai tihna a nih chu. Kan pute leh zelah chhut phei chuan, chubak pawh chu a awm teuh ang. Mizo fate hi chibinga inla hrang tur kan awm lem lo hle a ni. Mara hnam thenkhatin Hlawnchhing pa Lalah an sawm a. Chumi thlah kal zelte, hlawnchhing ve thote chu Hlychho an ni e, te pawh an ti a ni. Mizo hnam anga a hlawma awm tawp mai hi kan hmalam hun zel atan chuan a that zel ka ring.

Ni 30.8. 2018 ah Damdawi in pawnah ka va teichhuak a. Serkawn damdawi in epah hian Baptist Kohhran Hmunpui a awm a. Baptist Bookshop lian vak lo hi a hmunpui hungchhung nisiloah chuan a awm a. Hmunpuia kohhran lehkhabu dawr awm si hi, lehkhabu an nei ngah loin, an nei thalo ang reng. Chuta lehkhabu va en tura ka kal lai chuan, chumi bookshop sirah chuan mi 30 rual vel hi aurinna hmanrua nen hian an rawn inchhawp a.

Zaichhawna Hlondo leh a hote an lo ni a. Nikum lam atang khan state assembly inthlan thlirin hma an lo la chho ve lauh lauh a. Aizawl Bazar area hrang hrangah pawh ka hmu fo. Pun lam erawh chu an la pan thei meuh lo niin a lang.

Zaichhawna Hlawndo hi Synod hnuaia Missionary thin a ni awm e. Mi fel leh mi biang biak thiam tak mai a ni a. An sawi dan chuan, a missionary na hmunah pawh a thianten Cycle an khalh laiin, Bike etc a nei pha zel a ni.

Synod tirhin England-ah Phd a zir a. Haw tura an tih hunah haw loin a awm tlang a ni awm e. Helai vel boruak tak hi chu kim changin ka hrelo a. Ka zawh belh lo bawk a. Chumi hnuah 2017 khan an chhungin an lo haw a. Zoramthar buaipuiin, Inthlanna te pawh chuh ve an tum niawm tak a ni. Mizoram an rawn let meuh chuan, Rev. Zaichhawna Hlawndo a rawn ni ta!

An fakawmna riau chu, Zaichhawna chauh hian a buaipui lo a. A chhungte hian a hnung an dawl char char a ni. Serkawnah pawh hian a fanu pakhat chu a zai ve nghe nghe.

Mi dang an zai nual bawk a. Tuai dam leh, Lalzawnliana pawh a zai a. Lalzawnliana hi a fakawm khawp mai a. Pathian khawngaihnain mihring nun a thlak danglam theih zia ti chiangtu a niin ka hria. Zaithiam lo zawk zawk pawh a lo ni lo. Tunhma chuan Jojona a inti a, mak pui puia a inchei thin kha!

Inthlan dawn a piang hian zawlneite, Party tharte, Politician tharte kan nei thin. Tam tak chu an sincere loin, an serious lem lo a. Mipui vantlang rawngbawlnaa ngai tak tak lem lo, Lalna leh thuneihna duh vanga lut pawh an awm nual. J. Lalsangzuala kha chuan, “Service to God through mankind”-ah ka ngai a ti thin a. Mi dang ken hun pawh a hria. 1998 kha chuan, ka lo chawl tawh ange a ti a, zahawm takin a chawl mai a nih kha!

Mizote hi kan hmanhmawh thin.

Mi ngaihsan, mi ngaihzawn nihte kan chak a. Kan quality phak baka ropui kan tum fo!

Naupangte a langsar leh dinhmun sanga ding tur chuan tih fuh bik te, pianna dik leh seilenna dik te hi a ngai ve deuh.

Khawvel pum huap pawha mihring dingchhuak leh ropuite hi kan thlir ka thlir al, ka zir ka zir chuan kum 50-70 inkar hi an ni fur mai.

Politics ah hian kum 45 te hi naupang a la ni tlat. Chu chu a ni ve dan reng pawh a nihna chen a awm bawk.

Society leh hnam pum anga langsar tur chuan finna tam tak leh tawnhriat tam tak a lo inkhawl khawm ve angai thin a. Chutiang dinhmuna kan din meuh chuan, naupang te chu a nih theih vak tawh lo.

Mizo chu kan inzir peih lo fo a. Kan hna, kan subject kan hre chiang lo fo a. Kan thiam ngei ngei tura ngaih kan thiam lo a. Lansarh leh pawimawh kan khel hma leh thin si a.

Hausak te hi kan chak a, kan hmanhmawh thin a. Tih loh tur kan ti a. Dik taka tia hausa tur chuan tih fuh angai thin.

Mi ngaihsan nih kan chak naah hian, mi nuihsawh kan hlawh fo. Kan tih tur tha takin ti ila, kan hna tha takin thawk ila. Ngaihsan tlak kan nih chuan, khelh vak angai lo ang!

Kan hmanhmawh thin a.

Society hian a tuar fo mai.

Politics te hi hmanhmawh lutukna chi a lo ni lo. Politics loah pawh, hmanhmawh vang hian sual kan ti fo zawk.

Zaichhawna te hi vote hui vak chi an nih hmel loh viau a. A pun lah hi an pun chak loh hmel khawp!

Ram leh hnam tana ngaihtuahna seng a, veitu, hloh leh chan leh hmuhsit pawh huama pen chhuak an nihna erawh an ngaihsanawm hle a ni.

WORLD CUP LEH RUSSIA RAM

2018 FIFA World Cup thlengtu Russia ram khan, an World Cup thlen kha engang chiahin nge an hlawkpui? Tawitein i lo sawi zui teh ang.

 

Football World Cup hi khawvela infiamna inkhawmpui zingah chuan ngaihhlut leh ngaihven hlawh ber a ni hial awm e. Vladamir Putin-a hoin Russia ramin an thleng a. Inkhel chhehvel leh result te chu kan hriat tlangpui a nih avangin sawi kher tawh lo ilangin.

Russia hian US Dollar Tluklehdingawn 14 World Cup buaipui na atan hian an seng a. World Cup thlengtu tawh zawng zawngah an la inseng nasa ber a ni. 2014-a thlengtu Brazil-in a sen let thum zet an seng a ni.

Cold War a tawp a, USSR a han kehdarh a, Russia ramin economy lamah harsatna a han tawk chho a. International Relations lamah Russia a tlahniam em em a. Chu chu Putin-a hian a vei em em a. Tan pawh a la nasa a. Crimea ram, 2014 a Russia in an rama an rinluh te kha, khawvel ram hrang hrangin an hremna avangin kawng tam takah an la tuar bawk nen. Tun hnaiah pawh boruak hrang hrang, Syria kaihhnawihah te pawh kan hriat hi. US election thlengin, inrawlh anga sawikai a nih hi.

World Cup an thlenah pawh, an tum pakhat chu, khawvel mithmuha Russia ram pholan sarh thar leh, Economic lama hlawkna tel a ni ber.

2010 a World Cup thlen phalna an dawn atang kha, Official Budget pawh vawi 10 zet an siamtha a. An hlawkpuina hmasa ber erawh chu, Infrastructure lamah a ni thung.

World Cup kha, Russia ram khawpui 11-in an thleng a. Stadium 12 an sa thar. Transport leh infrastructure lamah hma an sawn phah a, tax revenue pawh an hmuh tam phah dawn a. Hmasawnna ruhrel tam taka tan Russia sawrkarin, insen zui angai dawn lo bawk a. Chutih rual chuan, St. Petersburg khawpui leh hmun thenkhatte chu a nghawng zui ve bawk a, a thalo zawngin.

Tourism lamah kawng a inhawn zau belhin, 2022 chuan tourist hi 4 pc tala world cup thlen hma aia ngah tawh zawk an inring a ni.

Economics lama mi thiamte sawi dan chuan, GDP hi WC zawh hnu kum hnih thleng chu, 5 PC in a san belh anga, chumi bak chu, economics lama hlawkna awm mang lo turah an ngai a. Russia ram tan, “Inchhuanna” a tling e tih lohah chuan, hlawkpuina lutuk tur a awm thui lo viau dawn niin an sawi. World Cup avang hian kum 10 lo la awm leh turah USD tluklehdingawn 31 hmuh belh tura an inchhut chu, tumahin an pawmsak lo. Invest, Tourism leh thil dang kaltlanga pung hluai turah an ngai a. A nih chiah loh hmel.

FIFA erawh chuan, World Cup lo inher chhuah leh hmain, USD Tluklehdingawn 6 zet hmu a, Dollar maktaduai 100 tal hlep thei turah an inngai a ni. World Cuyp buaipuina ngawr ngawr hi FIFA chuan a tum a, a thlengtu ramin, inkalpawhna leh infrastructure tul leh thildang an ngaihtuah thung.

Economics lam bikah chuan, an hlawkphah lutuk lo chu a ni a. Kawng danga an tan lakna leh, thlen an tum chhan pakhat chu, khawvel mithmuha Russia ram chu, ram him leh ram zalen an nihna lan tir chu a ni a. Khawvelin vawiin thlengin an la hmu mak ve deuh bawk nen, chumi paih chu an tum ber a ni a. Tutan pawh an ram chu a himin zinna leh khawsakna tlak a nih zia tarlan kha an tum ber a ni a. Police Co-operation cetre te dinin hma an la a, World Cup chhung hian, himna lam thilah harsatna lian tham an tawk lo a. Hemi kawnga an tum chu a hlawhtling khat a, khawvel mit hmuhah pawh Russia ram hi a lang mawi thawkhat viau a tih theih awm e.

Russia hi thlengtu atana thlan an nih khan, sawiselna a nasa a. An foreign Policy avang a ni bawk a. Ram 31 zet mai an han kal Khawm a. Official lal tak tak inkarah indawrna a lo awm lo thei lo a. A hawnna leh a kharnaa an ram hruaitu sawm zawng zawng nen, Russia ram leh khawvel ram dangte inlaichinna pawh tha sawt turah an ngai a. Hemi hi Russia pawhin World Cup thlen an Dilna chhan pakhat pawh kha niin a lang.

TI HIAN SAWI ANG:-
1. World Cup thlengtu ram reng rengin an dilchhan pakhat chu, economics lama hlawkna an neih belh theihna tur an zawn avang a ni.

Tourism avangte, Investment lo awm belh thei avangte etc.

2. Ram dang nena an inlaichinna siam that leh inkawmngeihna boruak siam thar nan.

3. An ram leh hnam hming tihmawina leh hmel tihthatna atan.

4. World Cup chauh nilo, International events hrim hrim, Olympics, etc te leh Regional events Euro, Copa America, Commonwealth Games, Asian Games, SAARC Games etc thleng pawhin kan sawi taka ng hlawkna hi an thlir vek a ni.

5. Khasi ho hian Kohhran inkhawmpui lian remchang hi thlen an tum hram hram zel a. Thingtlang khuaah an nghat tlangpui bawk a. Sawrkar a inrawlh lo thei lo a. Infrastructure- Kawng etc ah hlawkna an ngei ngei ngei a ni.

6. Keini pawh hian, inkhawmpui emaw, eng thil pawh, ramchhung huap thil a ni pawhin, fing zawk leh inhawng zawka thlen zel tum a tha zawkin a rinawm. India ram huap thil engemaw pawh thlen ve zel tum ila, rilru zau leh ngaihtuahna thleng thui tak neih a hun viau a ni.

2018-19 MIZORAM BUDGET

2018-19 Mizoram Budget chu Finance Minister Lalsawta chuan March ni 15, 2018 khan House-ah a pharh a. A tlangpuiin heti hian lo tarlang ila:-

I. Revenue Receipt
1. State sawrkar sum hmuhna pui ber te chu Tax Revenue leh NonTax Revenue te a ni. Kum 2018-19 chhung hian State puala Tax leh Non-Tax revenue aţanga sum hmuh beisei zat chu Rs. 807.19 crore a ni. Kum hmasa nen a khaikhinin 16.2% a pung tura ruahman a ni. Tax Revenue aţang hian Rs. 483.34 crore hmuh beisei a nih laiin, Non-Tax Revenue aţanga hmuh beisei zat hi Rs.323.85 crore a ni.

2. Fourteenth Finance Commission ruahmanna anga kum 2018-19
chhunga Devolution of Taxes & Duties aţanga sum hmuh beisei zat chu Rs. 3625.32 crore a ni a, hetah hian GST aţanga dawn tur pawh a tel a ni. Hemi bakah hian Post Devolution Revenue Deficit Grant aţangin Rs. 2588.00 crore hmuh beisei a ni a, State Disaster Response Fund aţangin Rs. 18.00 crore leh thildang aţangin Rs. 10.10 crore hmuh beisei a ni bawk. Urban Local Bodies Grant hnuaiah Rs. 27.41 crore hmuh beisei a ni a, Rs. 21.35 crore hi ULB-Basic Grant niin, Rs. 6.06 crore hi ULB-Performance Grant hnuaia dawn tur a ni
ang. ULB sum hi Municipal Corporation te hnathawh nan a hman tur
a nih angin, Aizawl Municipal Corporation hnuaia ruahmanna hrang
hrang hnathawh nana hman tur a ni.

3 . Sawrkar laipui aţanga ţanpuina, Grants for States/Union Territories hnuaia Block Grants aţangin Rs. 444.60 crore hmuh beisei a ni a, hei hian EAP te, NLCPR te, BADP te, NSAP te leh PMKSY hnuaia hmalakna tur hrang hrang te a huam. Central Road Fund, RKVY leh adangte aţangin Rs. 55.18 crore hmuh beisei a ni bawk.

4. Centrally Sponsored Scheme hnuaiah Ministry hrang hrang aţangin Rs. 1210.99 crore hmuh beisei a nih bakah, Schemes for NEC aţangin Rs.122.64 crore hmuh beisei a ni.

5. . Kum 2018-19 chhunga Revenue Receipt hnuaia sum hmuh tura beisei chu Rs. 8909.43 crore a ni. Heng sum hmuh tura beisei zinga ULB Grant te, SDRF te leh Block Grants aţanga sum hmuh beisei te hi a hmanna tur ruatlawk (tied-fund) a ni a. EAP te, NLCPR te, NEA te leh CSS aţanga sum hmuh beisei zat chiah chiah hi hmuh a ni kher lo ang.

II. Capital Receipts: Capital Receipt chuan State sawrkarin a hmalakna tur atana a sum puk te, sawrkar laipui aţanga Block loans a lak te leh State in loan a lo pekchhuah aţanga a rulhna sum tlingkhawm te a huam a. Kum 2018-19 chhunga Capital Receipt aţanga sum hmuh beisei zat chu Rs. 763.22 crore a ni a, hemi chhungah hian, Open Market Borrowings aţangin Rs. 550.00 crore te, NABARD hnuaia RIDF loans aţangin Rs. 150.00 crore te, NCDC aţangin Rs. 5.97 crore te leh RBI hnuaia W&MA aţangin Rs. 0.03 crore te beisei a ni.
Continue reading 2018-19 MIZORAM BUDGET

BUDGET BAWK

2018 Union Budget chungchang kha chu kan sawi tawh a, khata kan sawi chin pawh kha a kim chang lo hle. Khami lam kha chu duhtawk hrih ila. Budget chungchang hrim hrim hi I han titi chhunzawm lawk teh ang.

1. EXPENDITURES AND RECEIPTS: Budget-ah hian hlawm hnih pawimawh tak a awm a. Chu chu Expenditure leh Receipts a ni. Plan leh Non-Plan Expenditure head a then thin kha, September, 2016 a Cabinet Meeting-in tih tawp a rel a, 2017 Budget atang kha chuan hman zui a ni ta lo a ni. Railway Budget a hranga pharh thin pawh, nikum atang khan tih tawp a ni bawk a, kum 92 zet an lo kalpui tawh chu an ti tawp a ni.

Expenditure hi Capital Expenditure leh Revenue Expenditure-ah then a ni a. Capital Expenditure chu ro tling thil kawng siamna te leh Loan puk rulhna atan te a hman a ni a. Revenue expenditure chu, Inrelbawlna leh Hlawh atana hman a ni thin.

Receipts pawh hi Capital Receipts leh Revenue Receipts-ah tho then a ni thin a. Capital Receipts chuan, ramchhung leh ram pawn atanga pawisa pukte, State sawrkarin an leiba an rulhna te, Sawrkarin Company a enkawl thinna a sumsen a tih tlem/tih bo (disinvestment) te te a huam a. Revenue Receipts chuan, chhiah atanga sum hmuhte, sawrkar enkawl company atanga a sum hmuh te leh Telecom license fee atanga a sum hmuh te (service provider ho atangin percentage bituk awmin chhiah lak a ni thin. Eg:-Airtel atangin an sum hmuh help atangin cheng chute zah chu an pe ang etc)

Heng hi Full Budget-a hmuh tur awm chin a ni a. 2018 Union Budget hi tun NDA sawrkara Full Budget hnuhnung ber a ni ang. Election kumah chuan, Election hmaa hman turin sum ruahmanna an pharh a, Vote on Account a pass a ni thin a. Sum hmuhna telloin a hmanna tur chauh pass a ni thin a ni.

2. FISCAL DEFICIT TARGET: Budget-ah hian thil pawimawh tak pakhat awm chu Fiscal Deficit target a ni a, Gross Domestic Product atangin za zelah (in percentage)-a chhut a ni thin.

Fiscal Deficit tih awmzia chu, Sawrkar sum hmuh leh hmanna inthlauhna a ni. Hetah hian Puk atanga sum hmuhna an chhiar tello thung.

3. BUDGET PHARH HUN: 2016 thleng kha chu, Budget an pharh hian, February chawlhkar hnuhnung berah an pharh thin a. 2017 atang chuan, Fenruary thla ni hmasa berah an pharh ta thin a ni.

Tun hma chuan, Tlai dar 5-ah Budget hi an pharh thin a. Yashwant Sinha hunlai atangin chawhma dar 11-ah Budget hi pharh a ni ta thin a ni.

February thla khera Budget an pharhna chhan chu, Sawrkar kum thar April thla atanga harsatna awm miahloa lo in peih hman a nih theihna turin a ni.

4. BUDGET RUAHMAN A NIH DAN: Budget Ruahmannaah hian a buaipuitu ber chu Finance Ministry an ni a, pa chanchang a an buaipui angai a ni. Sawrkar kumthar a lo thlen hma thla 6 velah, September-October thla velah Administrative Ministry hrang hrang (Home, HRD, Defence etc) hnenah Kum thara an sum hmantur ruahmanna te thehlut turin an ti a. An niin uluk ataka an lo ruahmana an thlir hnuah, Finance Minsitry-ah an theh lut a. An niin uluk takin an lo thlir a, administrative Ministry te nena ngaihdan inang lo an lo neih chuan Administrative Ministry lampang hian Union Cabinet-ah an theh lut a, anni thutlukna chu thu tawp a ni. Chumi hnu chuan, Finance Ministry chuan, sum hmanna tur chungchanga ruahmanna tawp an siam ta a. Sum hmanna tur mil hian hmuhna tur an ruahman leh a. Chhiah kaihhnawih thil a nih chuan, chhiah lam pang buaipuitute Central Board of Direct Taxes etc te nen an inrawn tlang thin. Budget an peih fel hnuah Cabinet hmaah an pharh a. Cabinet-in an pawm hnuin, Parliament-ah Budget hi pharh a ni ta thin a ni.

5. BUDGET HMAN THEIH A NIHNA TUR A KALKAWNG: Finance Minister chuan Budget a pharh rikngawt hian a hman nghal theih ngawt lo a. Paltlang tur tam tak a la nei a ni.

Finance Minister-in a pharh a a. Chumi hnuah sawi ho a ni. Parliament in hnihah sawi ho a ni a. hemi hian ni li ni nga chu a awh a. Chumi hnuah an han chawl a. An chawlh chhungin Parliamentary standing Committee hrang hrangin ministry hrang hrang sum hman duhdante chu an han thlir lehin, an zir chiang a. An thlirna chu an ziak a. Parliament in hnihah an thlen leh a. Parliamentary Standing Committee hi 17 a awm.

Departmental Standing Committee thlirna eng atang chuan, Demand for Grants (Sum hman phalna leh hman zat tur) chungchangah Vote an thlak ta thin a. Hemi Vote thlakna hi chu Lok Sabha chanpual liau liau a ni a, Rajya Sabha chuan an ti ve thei lo a, an sawiho ringawt thei a ni. Demand tin hi sawi ho a ni a. Sum hman tur ti tlem tur pawhin member ten an phut thei a. Chu chu ‘Cut Motion’ an ti. Cut Motion hi chi thum a awm leh a. Disapproval of Policy Cut Motion, Economy Cut Motion leh Token Cut Motion te.

Demand for Grants atana vote pek hun chhung hi ni 26 a ni.

Appropriation Bill pass leh a la ngai a, sum hman phalna tihna a ni mai. President-in a hming a sign hnuin, appropriation act a lo ni thin. Hemi hnu hian Finance Bill angina a kal leh a. Chu chu an pass hnuin Budget chu hman theih a lo ni ta a ni. Appropriation Bill hi chu sum hman phalna tiin sawi ila, Finance Bill hi chu hmuhna tura hmalak phalna tiin sawi ila a fiah mai awm e.

6. BUDGET TOBUL: Saptawng thumal hlui, ‘Bougett’ tih atanga lo kal a ni a. British Chancellor of Exchequer-in sawrkar kum thar lo awm tur atana pawisa hman tur ruahmanna a siamna lehkha khainan savun Ip a hmang thin a. Chumi sawina chu a ni a. Sum hman tur ruahmanna ziahna lehkha sawinana hman a ni chho ta a ni.

KHARNA: Chidambaram-a 1997 Budget kha, ‘Dream Budget’ an tih hial a ni a. Fak a hlawh em em laiin, reiloteah United Front sawrkar kha a tlu leh ta mai a. A nghawng tur tha ang pawhin a nghawng hman ta lo a ni. Economy lama thang tur chuan Politics lama ram dinhmun a ngheh hi a pawimawh em em a ni.

Mizote hian Budget hi kan ngaihven lo a. Kan hre lo a. Union Budget kan ngaihven lo hi chu thuhran ni se, State Budget kan ngaihven lo em em mai bawk a. Chumai a ni lo a, kan hre lo em em bawk. Politics ngaihven, tuipui, a chhunga cheng tam tak pawhin kan ngaihven lo a, kan hre tawk lo.

Sawrkar inrelbawl dan te, a kalphung te hi kan hriat ve angai. Sum leh pai a hlawk zawnga hmang turte, dan tha leh chhen fakawm siam a, kalpui turte chuan, helam inhmangten an hriat em em angai a. Intellectual te pawhin an ngaih ven angai a, Chanchinbu hlei hleiin an ngaih ven a, an hriat angai.

He’ng kan han sawi tak te hi a kim lo hle a. Ka sawi fiah thiam tawk lo bawk a. Chhiartuten kan lo tuipuina tura bul tanna te a nih tak mialin, thahnem ngaihna thilah thiam ang angin ka han sawi zau ve deuh a ni e.

(Kan ngaihdan kan sawi zui theih chuan a lawmawm hle ang)

2018 UNION BUDGET

February ni 1, 2018 hian Union Finance Minister Arun Jaitley chuan 2018 Union Budget a pharh.

Kumin Buget-in a hawi ber chu, Agriculture leh Health Care lam a ni. GST council hnuaiah Indirect Tax chu a awm avangtin nghawng a nei hran lutuk tawh lo anga, Direct Tax lamah erawh chuan nghawng a nei nual tura ngaih a ni thung.
Kumin Buget hi Loneitute, Health Care lam buaipuitute, Transport Company, Consumer Company, Tlereuh zuar (jewellers) etc ten an hlawkpui tura ngaih a ni a. Apple, Samsung, Bond Investor, Financial sector, defence sector te tan a hlawklo deuh thung turah ngaih a ni.

Ujjwala Yojna Scheme kaltlangin hmeichhe retheite tan a thlawnin gas connection vaibelchhe riat pek a ni dawn. Flagship Programme thar National Healthcare Protection Scheme siam thar a ni a, Health insurance Rs nuaih nga thlenga chhungtin tuam thei tur duan thar a ni bawk. He National Healthcare Protection Scheme hian, chhungkaw rethei zual vaibelchhe 10 a huam dawn a ni. Hei hi khawvela Health Care Scheme lian ber a ni. Agriculture market tih changtlunna atan Rs vaibelchhe sanghnih dah hran a ni bawk. Saubhagya Yojana hnuaiah Power Connection hi a thlawnin vaibelchhe li pek chhuah a ni bawk ang.
Mahatma Gandhi Piancham lawmna turin Rs Vaibelchhe 150 dah hran a ni.

President hlawh tihpun a ni a, Rs Nuaih nga a hlawh tawh dawn a, Vice President-in Nuiah li, Governor-in nuaih thum leh singnga an hlawh ang.

Smart City Programme hnuaiah khawpui 99 thlan chhuah a ni a. Senso atan Rs 2.09 lakh Crore dahhran a ni. Digital India Programme atan Cheng vaibelchhe sangthum sawmsarih Pathum dah hran a ni. Telecom Infratructure lamah Rs 10,000 Crore dah hran a ni.

Zirna lamah pawh ruahmanna engemawzah pharh a ni a. Pre-nursery atanga Class 12 thlenga hmun khata dah tumna te, Zirtirtute atana Integrated B.ed Programme te leh Blackboard kal san a, Digital Board-a zuan luh tumna te pawh budget-ah hian a tel a ni.

Government Medical College 24 din thar tum a ni a. Parliamentary Constituency pathumin Medical College pakhat zel an intawm theihna turin ruahmanna siam a ni.

National Livelihood Mission tan Rs. 5,750 crore dah a ni a, Rs. 2,600 crore chu groundwater irrigation scheme a tan dah hran a ni bawk.

Finance Minister chuan, Agriculture leh Rural Economy chu kumin Budget-in a thlir ber a nih thu a sawi a. Chunglamah hian chu lam hawi chu tlem a zawng kan sawi tawh a. Minimum Support Price (thlai leh loneih atanga thar chhuah tlawm thut loneituten an tawrhna tur laka venna) pawh tih pun a ni a. A let khat leh a chanve a tihpun a ni. Organic Farming lampang uar tum a ni bawk. Mau lam thilsiam chhuahna tih hmasawnna turin Cheng vaibelchhe 1290 zet dah hran a ni bawk.

2022 chuan, loneitute sum lakluh hi a leta a pun theihnan ruahmanna an siam thu, Finance Minister chuan a sawi bawk.

Hlawhnei(salaried employee) te tha thawh pawh Budget hian a tarlang (recognise) a. Chhiah an pek zat ringawt pawh Rs 1.44 Lakh Crore a ni.

Tun NDA sawrkarah hian Indian Economy thanna chu, 7.5 Percent a ni a. USD 2.5 Trillion Economy a ni ta bawk a, Khawvela Economy lian pasarihna a ni a, “Pangana-a kai thuai kan tum a ni” tiin Finance Minister chuan a sawi bawk.

Continue reading 2018 UNION BUDGET