MIHRING THA

1965-ah Singapore hi Malaysia in a pet chhuak a. Singapore chuan engmah an nei lo. Natural resources an nei lo a. Mihring 1.9 Million zinga a chanve chu hna nei lo an ni bawk. CHutiang dinhmunah chuan Lee Kuan Yew-a chu a mittui a tla hial a ni, a mangang chu an ti.

Mahse, khawvel ram hrang hrang tih dan an en a, an hnam tana tha ber turin an hre rem zel a. An hotu ber, a dikin a rinawm bawk a. An indan tirha Corruption leh drugs in a tih buai hnam te hian kum 50 chhunga an thlen chin hi a ropui hle.

System thalo kara mihring tha ten, system tha siamin hnam ropui tak an din a nih chu.

Lee Kuan Yew-a hian, “System tha chu kan nei ngei mai. Mahse, system tha ai hian mihring tha an pawimawh zawk a ni, Mihring thalo an lo lal vaih chuan, system tha kan neihsa chu an ti chhe vek mai dawn a ni” a ti a. Mihring tha, hruaitu tha nei reng turin Singapore hi an tang mar pat reng a ni. Good Men vrs Good System tih hi Governance in Singapore tih subject-ah point pakhatah kan ngaithla nghe nghe a ni. Society tha nei tur chuan Mihring tha an pawimawh a, mihring tha nei reng tur chuan society tha an pawimawh a ni.

System thalo atang mihring tha an lo chhuak theiin, an lo chhuak fo a. Mihring thalo erawh chuan system tha sa pawh a ti chhe zawk thin.

Kan duh phawt chuan mihring tha hi kan ni thei vek a ni. A system kan puh a, an lo tih tawh thin dan kan puh a, that tum chuang loin, mi lo khawsak tawh dan ang kan va zawm zawk fo.

Kan khawtlang, kan ram leh hnam chuan mi tha- Mi rinawm, dik, danglam ngam, ruahmanna siama bawhzui thin, hmalak tum, hmalatu, teirei peih, mahni indahtha ngam, chan ngam,hloh ngam, hmala ngam a mamawh a ni. Chutiang mi chu kan ni thei vek a ni.

An lo tih tawh dan zawma, mi pangai sa pawh thalo sawt zawk loin, tih dan tha zawka ti ngam, tih pui ngam kan nih ngam a ngai. Keimahni zawn theuha, kan theihna ang zelin chutiang chu kan ni thei theuh a ni.

KA CM HUNAH CHUAN

High Schoolah te, Hna zawnna leh Essay inziah siak thenkhatah khan, Chief Minister ni ta ila tih thupui hmang khan kan ziak thin a. Chief Minister ni ta ila, tih thupui mil pui tho khan ka CM hunah chuan tiin kan essay ziah thin ang deuh kha ka han ziak leh chhin a nih hi.

1. AGRICULTURE: Leilet zawl kan neih ho- Champhai, Vanlaiphai, Chemphai, Buhchangphai etc. a ram, leileta siam theih ho hi sawrkarin a hnuaiah la vek se (hawhin), hengah te hian Kudam sa vek se, Kum 10 chhung vel tur Project siamin, leileta siam theih tur siam vek se, a neitute pawh an duh phawt chuan ruai nghal se la, a enkawl turin, BSC/MSC (Agri) rual hi contract atan kum 10 chhung vel atan ruai se, mumal taka ruahmanna siamin heng zawl tinah hian Manager, Managemant a master Degree rual la se, agriculture department hi Nodal department angin awm se, direct-a control loin.

Vietnam hian kum khatah buh vawithum an thar tawh a. Keini hi chuan vawi hnih thar tum ila, a kar lakah thlai dang ching ila.

Hei hi Leilet bikah a ni.

Tlangram lo neih pawh mumal zawkin a kalpui theih ang.

2. THINGTLANG TIH HMASAWN:

Khawvel hmanraw changkang, Khawpuia i hman thinte tel loin, leilung hriatna atangin i ‘survive’ ve thei angem?

Anni chuan, thlai chin hun te, a lei a zira chin turte, sik leh sa awm dan atanga chin turte, eng lehkhabu atang maha zir loin an hria a, ramhnuaiah an kal a, an damkhawchhuahna tur an hmu a; thenawm in mamawh tawn an nih avangin, mihring inlaichinna hlutna an hria a, mihring te mihring an la nih zelna hmun chu thingtlang hmunah a ni.

Khawpui hi civilization pholangtu a ni mai thei; Thingtlang hi civilization chelh dingtu a ni.

Thingtlang mi mahni inti hlum ai chuan khawpui mi mahni intihlum an tam fe a; rilru paukhauhna leh tawrhchhelna chu an dam khawchhuahna a nih avangin, an duh angin thil kallo mah se an bei tauh tauh thin.

Deng XiaOping-a han sawi leh ila.

1976 chho atang chuan China ram rorelna chu Deng Xiaopinga kutah hian a lut ta a. Mao Tse Tung-a ‘Cultural Revolution’avangin China ram chu an hnufum phah em em a. Deng-a ngaihdan chuan, ” Generation (chhuan) khat laiin an hnufum phah” a ni.

Economic Reform ropui tak a kalpui a, an kanh dawrh mai.

A economic reform a a angaih pawimawh tak chu Lo neih a ni a. Thingtlang lam enkawlna kawngah Thuneihna a sem zai (decentralized) bawk. A awm zia ber chu, China tih chaknan Thingtlang a ngai pawimawh a ni. Khawpui hi chu a thang tho tho a. Tin, Thingtlang lam thawhchhuah a pun hian indutrial activity a ti pung a, khawpuia ti hmasawn zawk tho tho. Ram hmasawnna a ti khairual.

Kum 6 chhung lek pawhin Deng Xiaopinga hmalakna vang chuan China a kang dawrh mai a ni.

Gen. Park Chung Hee-a hnuaia S. Korea hmasawn chiam na ‘Miracle on the han river’ an tih lo awmna chhan bulpui pakhat chu Saemaul Undong Project a kalpui pawh kha a tawi zawnga sawi chuan Thingtlang tih hmasawnna a ni ber mai.

1961 ah General Park Chung Hee hian sipai chakna hmangin an sawrkar lai chu a paihthla a. 1963 atangin Korea president a ni a. A thih thlengin chu nihna chu a chelh ta a ni.

General Park Chung Hee-an thuneihna a chan tirh lam hian S. Korea chu N. Korea aiin a hnufum daih zawk a. An per capita income pawh US dollar 72 chauh a ni! An ram a rethei a, an dinhmun a hniam em em bawk.

General Park-a hmalakna hmasa chu a project pakhat Saemauol undong tih a ni a. Thing tlang tih changkanna leh tih hmasawnna a ni ber mai. A hna hmasa ber atan chuan korea ram Thingtlang mite ei leh bar zawnna tih changkan leh tih hmasawna, tih ngheh a ni.

Saemaul Undong Project hi chi thumin an then a, Rilru, chetdan leh chhehvel tih hmasawnna tiin. Rilru lam huangah hian thenawmte nena in lai chinna, an hnam nunze vawn thatna te a tel a. Chet dan huangah hian mipui vantlang khawsak dan leh rilru puthmang te, dan zahna te, Khawlaia zu ruih loh tihte a tel a, chhehvel huangah hian faina te, chenna hmun ulukna te a tel a. Hetiang hmanga hma a han lak meuh chuan 1974 chuan Thingtlang mite chuan khawpui mite thawhchhuah an khum ta der mai a ni!

Gandhi-a khan, “India hmalam hun chu thingtlang khuaah te a innghat a ni” tiin a sawi a. Chu chu Urbanist hoin an hnial tak nain, Hmasawnna in buk tawklo avanga India ram harsatna thlen dan en chuan Thil kal fuhlo lian tak a awm tih a chiang reng a.

Mizote pawh hian hmasawn leh dinchhuak tak tak kan duh chuan thingtlang lam ngaihsakna leh hmasawnna inkhuangrual taka thlen tir dan tur kan zawng tur a ni ang.

Ka chief Minister hunah chuan hei hi ka hna hmasa tur a ni ang.

3. ZIRNA SIAM THAT:

Time chanchinbu vela thuziak thin Amanda Ripley hian lehkhabu ngaihnawm zet mai, “The Smartest kids in the world ans how they got that way” tih a ziak a.

PISA test atangin Khawvela zirna system tha chu Finland, Korea, Poland etc a ni a.

Chu chu a hmunah kal chilhin a zir a.

Zirna a sum senso ringawt lam hi a nilo…Zirtirtu, nu leh pa leh zirlai te tan hona leh effort a pawimawh.

Thil ngaihtuah thiamna a pawimawh ber.

Economic hmasawnna leh Zirna (PISA test score,) a kal kawp. Economic hmasawnna hi A work force te inzir belh thiamna, suangtuah thiamna leh insiam rem thiamnaah a innghat. US economy tlakhniam chhan pawh chu chu a ni pakhat

Hnam hmasawnna hi single generation ah a thleng thei (ie, Finland).

Mc Donald CEO sawi dan chuan, American mi, duh ang zat rawih tur an hmu lo. in chhiar peih, problem solved thei, mi dangte hrilhfiah/communicate thiam etc an neilo.

Findlandah chuan naupang an zalen a, thil ngaihtuah thiamna lamah an thang nasa. Korea erawh an ultra competitive a.Sawrkarin study break a siam hial

German ho pawhin an education an chhuang em em a. PISA score ah an che chhe ta sia.

Zahthlak an ti khawp mai. An in thlak danglam phah.

Kan zirna dinhmun siam that angai.

4. HMEICHHIATE DINHMUN THA ZAWK PEK: Mizo hmeichhe fel leh mi thiam tak tak han tling kan ngah mai. Mizo hnam tana an tangkai dan tur angin kan hmang tangkai ang. Politics huang chhungah, a rorel khawlah te, a policy duangtuah leh ngaihtuahna sengtuah kan hmang ang. Chung mite chu Competitive exam kaltlanga lak ang niloin an thiam leh theihna hmuh chian ngei chin an ni ang.

society-ah hian hmeichhe participation a san poh leh hmasawnna a chak zawk a ni.

5. KAWNG THA: Kawng tha hi hmasawnna bulpui a ni. India ram state hmasawn kan tih ho hian kawngpui tha tak tak an nei a. US hian inter-state Highways an nei a. Gen. David Eisenhower-a hunlaia an siam a ni. China ram hmasawnna chak chhan chu. thingtlang khawtin kawngpui thain a pawh avang a ni a. Chutiang bawkin S. Korea pawh a ni tho.

Mizoram chhungah hian National Highway

1. National highway 54- Km 850 a sei
2. National Highway 154- Km 180

hengte hi Mizoram sawrkar enkawl a ni a.

State Highway hi hetiang hi a awm bawk a,

1. Champhai – North Vanlaiphai Road
2. Keiṭum – North Vanlaiphai
3. Lunglei-Thenzawl road
4. Tlabung-Borapansury Road
5. Kawlchaw -Tongkolong Rd.
6. Aizawl-Mamit-Vanghmun-Kumarghat Rd
7. W.Phaileng to Marpara
8. Kawnpui to Hortoki road
9. Saitual-Phullen-Suangpuilawn Road
10. Khawzawl-Sinzawl-Thanlawn Road
11. Kawlkulh-Ngopa-Mimbung Road

State Maintenance Fund atang kawng enkawl awm zat chu :-
(a) Black-topped : 2744kms
(b) Unsurfaced : 1919kms
TOTAL : 4663kms

Khaw 65 emaw hi mumalin motor kawngin a la pawh lo a awm bawk a. Kawng hi a that loh zia kan hre bawk a.

Mizoram kawng tam tak hi a kual zawnga zawn luih emaw tih tur hi a ni bawk a. Kawng hi chhe hman mang loa enkawl theih a ni tih hi ka ngaihdan a ni. Kawng te hi a kual lutuk loin a la siam theih ang tih hi ka pawm.

Khawtin hi kawng hian pawh vek se, kawng hi tha se, tlan zung zung theih nise, Mizoram khua hi nikhata ban hman loh hi a awm mang lo ang. Khaw tam tak nileng kal hi chawhma kalah a chhuak thei ang. Chawhma kalin dar kar 2-3 kalah. Chung chuan hmasawnna a rawn thlen dan tur chu kan ngaihtuah thiam vek awm e.

He’ng kawngte hi a tha thei ang bera enkawl leh hman tlaka awm reng tura siam theih dan tur ruahmanna chu a tul leh kan la sawizawm leh ang chu.

6. ENERGY MAMAWH LEH TUAKNA KAWNG:

Tunah hian peak hour laiin, kan power supply hman hi 110-115 MW a ni a. Serlui leh Mini Hydel Project neuh neuh kan neih nen, Tuirial a hmanchhoh thei tan a, hmun dang atanga a leinana kan sum sen hi tunhma ai chuan tlahniam tawh turah ka ngai a.

24 MW Tuirini hydro-power plant hi ka CM chuan kan khuap puitling thuai ang. Nakina kan power consumption lo sang zel tur hisap leh kan revenue hmuh ve na tur hisapin , Ram tih chhiat belh loh zawngin, hma kan la ang. 210 MW Tuivai hydro power project hi a hma atang ruahmanna lo awm tawh kalpui mek a ni a, hengte hi environmental Impact enin apawilo tur a nih chuan kan khuap anga. State sum bawm kan la tih khah belh thei dawn a ni. Sikkim hian nikhatah 95.70 MW mamawhin, an inchawm zo a, Tripura, hian nikhatah 285 MW, mamawhin an inchawm zo a ni mai lo a, 2016 march thla atang khan Tripura hian Bangladesh hnenah 160 MW lai power hi an halh a, tunah hian 40 MW an hralh belh leh tawh hial mai thei.

Renewable sources of energy dang. Solar, wind te pawh a hmun a zir nasa zawka hman tangkai dan kan zawng zel dawn a ni.

He’ngte pawh hi sawi zau zel dawn chuan, a thui lutuk dawn avangin Energy mamawh tuakna lam pawh hi hemi thleng hian sawi phawt ilangin a tha mai awm e.

(INTODELH)

‘Leng dang mi chu Lal lai par tlanin,
Min ngailote’n hlimin an leng si’

Kum 16 emaw kal ta thil han sawi kir lawk ila. Tun hnaia data ka neih mai loh avangin chu chu ka han sawi dawn a ni. Thil nihna tak a ti chiang tho awm e.

Economics and Statistics Department chhut dan chuan 2002 January-December chhung khan Buhfai, Tel ei chi, Chana, Alu, Chhangphut, Thingpui fe, Purun, Chini, Chi (salt), Artui, Dal, Bawnghnute powder, Sangha hring, Sangha ro, Sangha tin lakluh nan hian Cheng vaibelchhe 36 leh nuaih sawmnga pakua leh sing sarih sang riat (36,59,78,000.00) Mizoramin kan seng a ni. AMFU phei chuan, Cheng vaibelchhe 43 chuangin an chhut. Tun dinhmuna a zat hi ka hre mai lo a. A tam hle dawn a ni tih chu a chiang a. A tlem berah pawh kum khatah Cheng nuaih 6000 hi chu a ni hrim hrim dawn tih a hriat theih.

He’ng kan lakluh tam zawk hi kan rama kan thar chhuah ve theih leh kan thawnchhuah theih reng a ni zawk.

Kan mamawh chu intodelhna nghialnghet a ni. Chutiang chu engtin nge kan neih tak ang? A then a zar han sawi ila:-

1. Kut hnathawktute pual leh an hman tur budget tam tham tak mai dah a, a kal hmang rengah pawh an hlawkpui ngei tura dah.

2. Sawrkarin a rawn awmte rawnin, khawvel ram danga an hlawhtlinpui tawhte zirin kan ram mil thei ang ber turin ruahmanna siam a ni anga. Chu chu sawrkar department mai nilo, Third party (NGO/civil society) te nen tang hoin a hlawhtlin thlenga vil zui a ni ang.

3. Sum leh paite hian kut hnathawktute hnen a thlen ngei theihna turin Transparent delivery system siam a ni ang.

An hnathawh meka an mamawh, khawl emaw, lei tha emaw, thlai chi emaw, thil dang reng reng anmahni nena thawkhoin a tha ber ber lei a ni anga. Thlam emaw, in sak ngawi pawh a chak nena lakkhawm pui vek an ni ang.

4. Kan ram awmna leh inkalpawhna dinhmun enin mizoram ngeia thawnchhuah tlaka siam (finished product) buaipui a ni ang.

5. A dahthatna (cold storage preservation) tha tak siam a ni ang.

6. Market system mumal takin kalpui a ni ang. Hlep tam zawk hi lo neitute kutah a lut ang. Market price control a ni ang. Mizorama kan thlai chin ve ang reng reng chu, hmun dang atanga lakluh (import) pawh control/restrict a ni ang.

7. Leilung hi kan hman tangkai dawn avangin a lo hlu leh zual dawn a. Kan leilung enkawlna dan (land act) hi siam that angai dawn a. Land reform kan kal pui ang.

Mi thenkhat, ram to hun nghak mai mai te chhiah chawi tur kan ti pung anga, a taka hmang tangkaite chhiah chawi tur kan ti hniam ang.

Mi pakhat tan ram zau lutuk neih phal a ni lo anga. Ram lei leh hralh thuah pawh duh duh lei leh duh duh man chhiar a ni lo ang.

8. Sawrkarin helama hma a lakna viltu commission din a ni ang a. Chak taka thuam niin, mi hrem theihna power hial pek a ni anga. Chief Minister hnuaiah direct in a awm ang.

CM ka nihna anga thuneihna ka hmansualna lak ata min vengtu turin Lok Ayukta Act kan siam tha anga. Ka tih dikloh phawt a, chumi chu puhna emaw, vantlang hriata thu a awm phawt chuan, Anmahni thuin min chhui nghal thei bawk ang.

CM atan chuan min thlang duh dawn lo hian ka hre ta lawm mawle!

TLABUNGAH INTHLAN

Tlabung bial hi Assembly Constituency ang zawng chuan, West Tuipui tih a ni a. Hemia Zonal officer tur hian Ni 26.11.2018 chawhnu lamah ka driver K. Malsawma leh ka PSO Lalhmingmawia nen kan kal a. Tlabung lam hi a tu amah kan la kal ngailohna a nih avangin kan zawt chawp thla a. Phairuang kai te chu Lungsen emaw te kan ti thla a. Tlabung peng kan hai avangin, Chhumkhum atangin peng ta lo chuan kan tlan tlang a. Lalnutui khua kan va thlenin, “Hei hi khawi khua nge?” te kan han ti he haw a. Tlabung lo lamah kan tlan tih min hrilh avangin kan let leh a. Hetiang velah hian darker hnih dawn chu kan paih awm e. Kawng an lo lai zal zau tha nasa si a, la metal lo mah se, kan lo tlan deuh vuk vuk mai a. Chawngte kan thleng lo chauh a ni ber mai e.

Lungsen peng kan va thlen leh chuan, congress ruaitheh haw hi motorah a khat tan tan hian an rawn in phur chho a. Sumo chungahte pawh an chuang. Khua a thim tawh si a. An accident ang tih pawh a hlauhawm fu. Lungsen thleng chu kawng chhia rau rau-ah a la zia hle. Lungsen atanga Tlabung lam kan tlan thla chu kawng a chhe tawh hle. Tuichawng kan han tlan pel chu ka rilru a na hle a ni. Chakma ho khawlaiah an lo vei sup sup a. Party flag lo intar tuarh a. Khawlaiah an lo awm khawm tulh tulh a. Engnge an tih ang tih chu a ngaihruat thiam theih. Chung chu lunglei atanga hnai te mai an ni. Chakma lo inhawngbi tup tup na chu.Kan ram dinhmun ka ngaihtuah a. Ka mittui a tla hial.Kawng chhe theihnghilh thaka ka rilru a han nat chu!

He hnam hmangaih hi a va han hahthlak em! A Beidawnthlak ngawih ngawihin ka hria.Mahse, he hnam tan hian tuin nge thawk chuang ang le.Ka fanu hi he rama thil thate ei a, he leilunga thlamuang taka seilian a, a chanvote chang tura ka duh si avangin he hnam hmangaih hi ka bansan thei si lo.Ka thlahte hian chhuang taka kan ram tihtur an la neihnana ka buatsaih angai si.

Km 30 chauh chu darkar hnih leh a chanve kan kal a. Tlabung chu dar 9-ah kan thleng thla a. Tlabung SDPO BM-a te inah chaw kan ei hnuin, kan riahna tura a lo tih fel sa, Forest Rest house lamah kan phei a. Zan kan riak a. Boruak a reh raih mai a. A nuam phian mai. Tlabung boruak lumin thlasik a hmuh tawh avangina lum tawh lem lo a, a nuam hle.

CHAKMA HO KA ZILH

Ni 27.11.2018 chuan Silgur, Diblibagh leh Tlabung Dintharah kan kal a.

Silgur kan kalna chhan hi, Critical Polling Station ECI-in a tih zinga mi a ni a. Tlabung atangin kan han zawt chawp leh pek a. Kawng an lo lai zau leh hluai mai a.Helai bialah hian nakinah nasa takin hmasawnna a la awm dawn tih a chiang a. Foreigner an pun hluai lohna turin sawrkarin hma a lak ngei chu a ngaiin ka ring. Silgur kal tur kha, Kawrpuichhuah kan zu thleng hial. Kawrpuichhuahah hian silgur khaw chakma pa a lo awm a, a lo chhoh ve duh avangin leh kawng kan hriat loh avangin kan phur tlang a.

Continue reading TLABUNGAH INTHLAN

SERKAWNAH ZORAMTHAR

(Thlalak post ka tum ngial a, a theih der loh mai)

Christian Hospital, Serkawnah ka fanu a piang a. Ni 26.8. 2018 atang khan damdawi inah kan la awm ta ngar ngar a!

Ka fanu hi ni 27.8. 2018 zing dar 6:35 a piang a ni a. A hming atan Abigail Malsawmzuali Fanai kan sa a.

Ka pa hi Fanai a ni a. Ka pa nu pawh fanai a ni a. ka nu hi Khawlhring a ni a. Ka nu nu hi Fanai tho a ni a. Mafeli (Abigail-i nu)hi hlawnchhing a ni a, Mafeli nu hi ralte a ni. Mafeli pa nu hi khiangte a ni a. Mafeli nu nu hi Pachuau a ni. Tichuan, ka fanu Abigail-i chu Fanai chu ni mah se, Hlawnchhing, Khawlhring, Khiangte leh Pachuau thisen a kai tihna a nih chu. Kan pute leh zelah chhut phei chuan, chubak pawh chu a awm teuh ang. Mizo fate hi chibinga inla hrang tur kan awm lem lo hle a ni. Mara hnam thenkhatin Hlawnchhing pa Lalah an sawm a. Chumi thlah kal zelte, hlawnchhing ve thote chu Hlychho an ni e, te pawh an ti a ni. Mizo hnam anga a hlawma awm tawp mai hi kan hmalam hun zel atan chuan a that zel ka ring.

Ni 30.8. 2018 ah Damdawi in pawnah ka va teichhuak a. Serkawn damdawi in epah hian Baptist Kohhran Hmunpui a awm a. Baptist Bookshop lian vak lo hi a hmunpui hungchhung nisiloah chuan a awm a. Hmunpuia kohhran lehkhabu dawr awm si hi, lehkhabu an nei ngah loin, an nei thalo ang reng. Chuta lehkhabu va en tura ka kal lai chuan, chumi bookshop sirah chuan mi 30 rual vel hi aurinna hmanrua nen hian an rawn inchhawp a.

Zaichhawna Hlondo leh a hote an lo ni a. Nikum lam atang khan state assembly inthlan thlirin hma an lo la chho ve lauh lauh a. Aizawl Bazar area hrang hrangah pawh ka hmu fo. Pun lam erawh chu an la pan thei meuh lo niin a lang.

Zaichhawna Hlawndo hi Synod hnuaia Missionary thin a ni awm e. Mi fel leh mi biang biak thiam tak mai a ni a. An sawi dan chuan, a missionary na hmunah pawh a thianten Cycle an khalh laiin, Bike etc a nei pha zel a ni.

Synod tirhin England-ah Phd a zir a. Haw tura an tih hunah haw loin a awm tlang a ni awm e. Helai vel boruak tak hi chu kim changin ka hrelo a. Ka zawh belh lo bawk a. Chumi hnuah 2017 khan an chhungin an lo haw a. Zoramthar buaipuiin, Inthlanna te pawh chuh ve an tum niawm tak a ni. Mizoram an rawn let meuh chuan, Rev. Zaichhawna Hlawndo a rawn ni ta!

An fakawmna riau chu, Zaichhawna chauh hian a buaipui lo a. A chhungte hian a hnung an dawl char char a ni. Serkawnah pawh hian a fanu pakhat chu a zai ve nghe nghe.

Mi dang an zai nual bawk a. Tuai dam leh, Lalzawnliana pawh a zai a. Lalzawnliana hi a fakawm khawp mai a. Pathian khawngaihnain mihring nun a thlak danglam theih zia ti chiangtu a niin ka hria. Zaithiam lo zawk zawk pawh a lo ni lo. Tunhma chuan Jojona a inti a, mak pui puia a inchei thin kha!

Inthlan dawn a piang hian zawlneite, Party tharte, Politician tharte kan nei thin. Tam tak chu an sincere loin, an serious lem lo a. Mipui vantlang rawngbawlnaa ngai tak tak lem lo, Lalna leh thuneihna duh vanga lut pawh an awm nual. J. Lalsangzuala kha chuan, “Service to God through mankind”-ah ka ngai a ti thin a. Mi dang ken hun pawh a hria. 1998 kha chuan, ka lo chawl tawh ange a ti a, zahawm takin a chawl mai a nih kha!

Mizote hi kan hmanhmawh thin.

Mi ngaihsan, mi ngaihzawn nihte kan chak a. Kan quality phak baka ropui kan tum fo!

Naupangte a langsar leh dinhmun sanga ding tur chuan tih fuh bik te, pianna dik leh seilenna dik te hi a ngai ve deuh.

Khawvel pum huap pawha mihring dingchhuak leh ropuite hi kan thlir ka thlir al, ka zir ka zir chuan kum 50-70 inkar hi an ni fur mai.

Politics ah hian kum 45 te hi naupang a la ni tlat. Chu chu a ni ve dan reng pawh a nihna chen a awm bawk.

Society leh hnam pum anga langsar tur chuan finna tam tak leh tawnhriat tam tak a lo inkhawl khawm ve angai thin a. Chutiang dinhmuna kan din meuh chuan, naupang te chu a nih theih vak tawh lo.

Mizo chu kan inzir peih lo fo a. Kan hna, kan subject kan hre chiang lo fo a. Kan thiam ngei ngei tura ngaih kan thiam lo a. Lansarh leh pawimawh kan khel hma leh thin si a.

Hausak te hi kan chak a, kan hmanhmawh thin a. Tih loh tur kan ti a. Dik taka tia hausa tur chuan tih fuh angai thin.

Mi ngaihsan nih kan chak naah hian, mi nuihsawh kan hlawh fo. Kan tih tur tha takin ti ila, kan hna tha takin thawk ila. Ngaihsan tlak kan nih chuan, khelh vak angai lo ang!

Kan hmanhmawh thin a.

Society hian a tuar fo mai.

Politics te hi hmanhmawh lutukna chi a lo ni lo. Politics loah pawh, hmanhmawh vang hian sual kan ti fo zawk.

Zaichhawna te hi vote hui vak chi an nih hmel loh viau a. A pun lah hi an pun chak loh hmel khawp!

Ram leh hnam tana ngaihtuahna seng a, veitu, hloh leh chan leh hmuhsit pawh huama pen chhuak an nihna erawh an ngaihsanawm hle a ni.

PEMA KHANDU LEH ARUNACHAL PRADESH

Assam ka awm lai khan, remchangah la in, NE States hrang hrang hi ka tlawhkual a. Sikkim te ka han thleng hial a.

Arunachal Pradesh chanchin hi tuipui riau na chen ka nei a. Kan rual chiaha state a hlankai ni ve bawk an ni a. Kawng tam tak min phalo hle a. Mihring hawiharhna kawngah chuan min phalo hle.

Chutih lai chuan tunhnaiah hian nasa takin an tan kawl a eng chho dawn niin a lang!

2016 kum tawp atanga chauha an state chief minister rawn ni, a CM tirha CM naupang ber ni thei Pema Khandu hnuaiah hian lei rem an rap tan mek chu a ni e.

1979 a piang, Dorjee Khandu a fapa Pema Khandu hi Hindu College, Delhi atanga Graduate a ni a. Fa pathum a nei tawh. Japan, Macau, Sri Lanka, USA, Canada, South Africa leh Bhutan ramah te lo zin tawh a ni a. A ram hmuh zauna hi nasa takin a CM nihna kawngah a hmang tangkai tih a hriat theih a ni.

Pawl hrang hrangah a inhmang nasaa, Bodhi Language and Literature Promotional Society ah chuan chairman a ni a. Games ans Sports lamah a inhmang nasa hle bawk. Football, Cricket, Volleyball leh Badminton a tuipui hle.

Arunchal Pradesh ram hrim hrim hi sawi hmasa ila, Pema Khandu that riauna hi a ti chiang viau dawn nain, a hnathawh thenkhat chauh han sawi ta mai ila:-

1. Airport:- Arunchal Pradesh hian airport an nei ngai lo a. Kumin kum tir lam khan Pasighat Airport chu an hmang tan ta a. Thlawhtheihna a service tan der tawh a ni.

Greenfield Airport, Hollongi a siam turin an kalpui leh mek a. Hna tan thuai an tum.

2. Kawng:- Trans Arunchal Highway an buaipui mek hi Two-Lane tur a ni a. US dollar ang zawng pawhin Dollar 1.5 Billion an seng dawn a ni. Km 1559 zet a sei a ni dawn.

3. Hna lak: Fair taka hna lak a duh a, a tang khawp mai a. Arunchal Pradesh Public Service Commission in Combined Civil Service exam an buatsaih pawhin, Prelims exam laiin internet a off tir vek a ni.

Group C post laknaah duhsak bik an awm lohna tur leh hna lak a fair theihna turin Staff Selection Board an din thar bawk.

4. Lo neitute ngaihsakna:-

Lo neitute a ngaihsak em em a. Thlai chi hrang hrang chingtute leh a hlawhtlingte buaipuina tur hi budgetah an dah dul mai a ni.

Kiwi chingtute tan 2018 Budgetah pawh 7. 5 crore a dah hrang hrang a. Re imbursement system te, Subsidy rate a siam bawk a. Orange chingtute tan a dah hrang teuh a, Cardamom chingtute buaipuina tur pawh rs 20 crore a dah hrang. Thlai chin bik nei leh hlawhtling bikte buaipuina tur kha budgetah a telh leh mai a ni

5. Ramri hrula awm ve lote tan:- Ramri hrula awmte ngaihsakna tur pawisa chu a awm thin avangin, ramri hrula awm velo assembly constituency te tan rs 1 crore theuh a dah hrang

6. Inkalpawhna dang: Pasighat leh Dibrugarh a suihzawm der tawh a. Lei ni bawk, rel kawnga hman theih bawk chu an hmang tan der tawh a. Amah pawh relah a chuang tawh nghe nghe. Compartment naran takah a chuang ve maia.

7. Thildang:- Chutiang chuan, nasa takin hma a la a. Corruption tihrehna tur CM dashboard a siam, sawrkar hnathawk te vil reng na tur te, An medical college class an tan der tawh maite, CM Insurance Scheme a siam te pawh hi ngaihsanawm tak a ni vek mai. An state chhunga CBSE results a chhiat pawhin zirtirtu a ko khawma, a titi pui maite hi ngaihsanawm ka ti riau a ni.

Nikum lam khan Kristian Missionary te sikul din tanpuina tur Rs 50 lakhs lai chu a thehchhuak.

Tin, an hmalakna reng reng a hmunah a en peih zelin a va hmu zel bawk si a, hnathawktute tan chuan inthlahdah a har thin hian ka ring a ni.

An sawi dan chuan, a zin pawhin, CM charge a hlan chhawng tawh ngai lo a. E-File hmangin decision a siam mai zel a. A tablet hi a hum deuh reng mai a. CM awm lo a, file a tang tih hi a awk tawh lem lo a ni awm e.

Hmanni lawkah pawh Himachal Pradesh-ah leh Japanah thusawi tura sawm a ni nghe nghe. Ngaihsan leh ngaihhlut a hlawh sawt hle. A kiahhruaina hnuaia Arunachal Pradesh an la awm rei loh nen, an hmasawnna hi a hmuhnawmin a ngaihnawm.

La naupang veh vawh, harh tha leh veng va tak, tuipuirala mi thiamte zinga thusawi tura sawm tlak, literature, Sports leh Music ngaina-in AP ho chu a hruai a. An hmuhnawmin an ngaihnawm ta viau mai.

WORLD CUP LEH RUSSIA RAM

2018 FIFA World Cup thlengtu Russia ram khan, an World Cup thlen kha engang chiahin nge an hlawkpui? Tawitein i lo sawi zui teh ang.

 

Football World Cup hi khawvela infiamna inkhawmpui zingah chuan ngaihhlut leh ngaihven hlawh ber a ni hial awm e. Vladamir Putin-a hoin Russia ramin an thleng a. Inkhel chhehvel leh result te chu kan hriat tlangpui a nih avangin sawi kher tawh lo ilangin.

Russia hian US Dollar Tluklehdingawn 14 World Cup buaipui na atan hian an seng a. World Cup thlengtu tawh zawng zawngah an la inseng nasa ber a ni. 2014-a thlengtu Brazil-in a sen let thum zet an seng a ni.

Cold War a tawp a, USSR a han kehdarh a, Russia ramin economy lamah harsatna a han tawk chho a. International Relations lamah Russia a tlahniam em em a. Chu chu Putin-a hian a vei em em a. Tan pawh a la nasa a. Crimea ram, 2014 a Russia in an rama an rinluh te kha, khawvel ram hrang hrangin an hremna avangin kawng tam takah an la tuar bawk nen. Tun hnaiah pawh boruak hrang hrang, Syria kaihhnawihah te pawh kan hriat hi. US election thlengin, inrawlh anga sawikai a nih hi.

World Cup an thlenah pawh, an tum pakhat chu, khawvel mithmuha Russia ram pholan sarh thar leh, Economic lama hlawkna tel a ni ber.

2010 a World Cup thlen phalna an dawn atang kha, Official Budget pawh vawi 10 zet an siamtha a. An hlawkpuina hmasa ber erawh chu, Infrastructure lamah a ni thung.

World Cup kha, Russia ram khawpui 11-in an thleng a. Stadium 12 an sa thar. Transport leh infrastructure lamah hma an sawn phah a, tax revenue pawh an hmuh tam phah dawn a. Hmasawnna ruhrel tam taka tan Russia sawrkarin, insen zui angai dawn lo bawk a. Chutih rual chuan, St. Petersburg khawpui leh hmun thenkhatte chu a nghawng zui ve bawk a, a thalo zawngin.

Tourism lamah kawng a inhawn zau belhin, 2022 chuan tourist hi 4 pc tala world cup thlen hma aia ngah tawh zawk an inring a ni.

Economics lama mi thiamte sawi dan chuan, GDP hi WC zawh hnu kum hnih thleng chu, 5 PC in a san belh anga, chumi bak chu, economics lama hlawkna awm mang lo turah an ngai a. Russia ram tan, “Inchhuanna” a tling e tih lohah chuan, hlawkpuina lutuk tur a awm thui lo viau dawn niin an sawi. World Cup avang hian kum 10 lo la awm leh turah USD tluklehdingawn 31 hmuh belh tura an inchhut chu, tumahin an pawmsak lo. Invest, Tourism leh thil dang kaltlanga pung hluai turah an ngai a. A nih chiah loh hmel.

FIFA erawh chuan, World Cup lo inher chhuah leh hmain, USD Tluklehdingawn 6 zet hmu a, Dollar maktaduai 100 tal hlep thei turah an inngai a ni. World Cuyp buaipuina ngawr ngawr hi FIFA chuan a tum a, a thlengtu ramin, inkalpawhna leh infrastructure tul leh thildang an ngaihtuah thung.

Economics lam bikah chuan, an hlawkphah lutuk lo chu a ni a. Kawng danga an tan lakna leh, thlen an tum chhan pakhat chu, khawvel mithmuha Russia ram chu, ram him leh ram zalen an nihna lan tir chu a ni a. Khawvelin vawiin thlengin an la hmu mak ve deuh bawk nen, chumi paih chu an tum ber a ni a. Tutan pawh an ram chu a himin zinna leh khawsakna tlak a nih zia tarlan kha an tum ber a ni a. Police Co-operation cetre te dinin hma an la a, World Cup chhung hian, himna lam thilah harsatna lian tham an tawk lo a. Hemi kawnga an tum chu a hlawhtling khat a, khawvel mit hmuhah pawh Russia ram hi a lang mawi thawkhat viau a tih theih awm e.

Russia hi thlengtu atana thlan an nih khan, sawiselna a nasa a. An foreign Policy avang a ni bawk a. Ram 31 zet mai an han kal Khawm a. Official lal tak tak inkarah indawrna a lo awm lo thei lo a. A hawnna leh a kharnaa an ram hruaitu sawm zawng zawng nen, Russia ram leh khawvel ram dangte inlaichinna pawh tha sawt turah an ngai a. Hemi hi Russia pawhin World Cup thlen an Dilna chhan pakhat pawh kha niin a lang.

TI HIAN SAWI ANG:-
1. World Cup thlengtu ram reng rengin an dilchhan pakhat chu, economics lama hlawkna an neih belh theihna tur an zawn avang a ni.

Tourism avangte, Investment lo awm belh thei avangte etc.

2. Ram dang nena an inlaichinna siam that leh inkawmngeihna boruak siam thar nan.

3. An ram leh hnam hming tihmawina leh hmel tihthatna atan.

4. World Cup chauh nilo, International events hrim hrim, Olympics, etc te leh Regional events Euro, Copa America, Commonwealth Games, Asian Games, SAARC Games etc thleng pawhin kan sawi taka ng hlawkna hi an thlir vek a ni.

5. Khasi ho hian Kohhran inkhawmpui lian remchang hi thlen an tum hram hram zel a. Thingtlang khuaah an nghat tlangpui bawk a. Sawrkar a inrawlh lo thei lo a. Infrastructure- Kawng etc ah hlawkna an ngei ngei ngei a ni.

6. Keini pawh hian, inkhawmpui emaw, eng thil pawh, ramchhung huap thil a ni pawhin, fing zawk leh inhawng zawka thlen zel tum a tha zawkin a rinawm. India ram huap thil engemaw pawh thlen ve zel tum ila, rilru zau leh ngaihtuahna thleng thui tak neih a hun viau a ni.

AB VAJPAYEE LEH ABDUL KALAM

India mi ropui hming sawilan dawn chuan, Prime Minister hlui AB Vajpeyee leh President hlui APJ Abdul Kalama hming hi a tu amahin kan lam hmaih ngai awm lo e.

Abul Kalama titi ka han sawi chhawng teh ang:-

“May 1996 a ni a. Khami kum khan Inthlanpui neih a ni a. Inthlan result puan hma lawkah khan PV Narasimha Rao nen kan inhmu a. “ Kalam, I pawlte nen khan lo inring ula. Nuclear test kan nei dawn a nia. Tirupati-ah ka kal dawn a. Ka phalna lo nghak tawp mai rawh u. DRDO-DAE team pawh che thei turin an inreng ring tur a ni,” a ti a.

Tirupati a zinna chhan pawh chu, Inthlan result tha tgak an neih theihna tura vPathian malsawmna va dil kha a ni a. Result a han chhuah erawh chuan a beisei ang result a hmu ta lo a. Congress chuan seat 136 chauh mai an la ta a. BJP leh an thawhpuite chuan sawrkarna an siam ta a. An sawrkar erawh chu kar hnih chhung chauh a ding a. Chumi hnu chuan Third Front-in sawrkar, HD Deva Gowda kaihhruai chu a lo ding ve ta thung a ni. Kar hnih chauh 1996 a Sawrkarna a kalpui lai khan, Nuclear Test kha Vajpayee khan neih hman hram a tum thung.

Zan dar 9 a ni a. 7 Race Course Road atangin call ka dawng a. Prime Minister thar leh a kal chhuak tur, Rao-a hmu thuai tura koh ka ni a. Rao-a chuan, Nuclear Programme chungchang chu kim chang taka Vajpayee-a hrilh fiah tura mi tih angina ka hrilh fiah ta a. Sawrkar programme kalpui lai chu, tluang leh mam taka inhlanchhawn a nih theihna atana chutiang chu Pu Rao-a chuan min tih tir a ni.

Chung hun atang chuan kum 2 a liam a, 1998 a lo nih chuan, Vajpayee-a chuan sawrkarna a rawn siam leh ta a. May ni 15, 1998 a ni a. Zanlaiah Vajpayee-a chuan mi rawn call a. A minister tur a thlan fel tawh thu leh, minister zinga mi lakluh a duh ve thu hi a rawn sawi a. Inngaihtuahna hun tlem ka mamawh thu ka hrilh chuan, a tukzing dar 9-a amah hrilh turin min ti ta a. Zan lai laiah chuan ka thiante ka ko Khawm a. Cabineta tel ve chu a tha ang nge thalo tih chu zing dar thum thlengin kan sawi ho ta a. Kan ngaihdan tlangpuiah chuan, ram pum huapa thil pawimawh tling pha thil pahnih buaipuitu zingah ka tel ve mek a, a tawp kan thleng tep tawh a, chungah chuan hlawhtlinna tha tak kan neih theihna turin Politics lama ka luh loh chu a tha zawk ang tih a ni.

A tuk zingah chuan, 7 Safdarjung Road, PM awmnaah chuan ka kal a. A thut muan pindanah mi lo dawngsawng a. Ama siam chithlumte min lo pe bawk a. Ti hian ka hrilh ta a, “ Kei leh ka naute hi Project pawimawh tak pahnih kan buaipui mek a. Pakhat zawk chu Agni Missile tih puitlin leh Nuclear Programme tih puitlin a ni a. Heng thil pahniha ka hun pum ka hman hian hnam tana thil tha zawk ka tih theih ka inring e. Ka chhunzawm zel min phal sak mai rawh” ka ti ta a.

Vajpayee- chuan, “I ngaihtuahna chu ka hrethiam e. I chhunzawm zel dawn nia, Pathianin mal a sawm ang che” a ti ta a. Ka hna ngai ka chhunzawm a, Agni Missile hlawhtling takin kan test a. Nuclear Bomb pawh vawi nga kan test bawk a. India chu Nuclear Weapon nei ram a lo ni ta a ni.

Politics luh chilh loha ram leh hnam tana ka hnathawh kha a lo hlawk hle zawk a lo ni”

Vajpayee-a hi a ngaihsanawm hle. Kalama thiamna a hria a, ram leh hnam tana hman tangkai a tum a. Kalama pawh a ngaihsanawm a. Politics aia a tangkai leh zualna zawk tur a hria a, thlemna duhawm tak a tawng chung pawhin chutah chuan a awm zui ta a, India-in thil ropui tak a tih zui phah thei ta a ni.

An pahnih chanchin hi sawi zui duah ngai lo a, kan hriattlan vek a ni a. AB Vajpayee hi Parliamentarian ropui, India PM ropui bera mi tam takin an ngaih, Bharat Ratna dawng pha, Poet ropui a ni a. Kalama hi, India President ni thei, Missile/nuclear Scientist, mi ropui tak mai a ni a, Bharat Ratna a dawng ve tho bawk a ni.

2018-19 MIZORAM BUDGET

2018-19 Mizoram Budget chu Finance Minister Lalsawta chuan March ni 15, 2018 khan House-ah a pharh a. A tlangpuiin heti hian lo tarlang ila:-

I. Revenue Receipt
1. State sawrkar sum hmuhna pui ber te chu Tax Revenue leh NonTax Revenue te a ni. Kum 2018-19 chhung hian State puala Tax leh Non-Tax revenue aţanga sum hmuh beisei zat chu Rs. 807.19 crore a ni. Kum hmasa nen a khaikhinin 16.2% a pung tura ruahman a ni. Tax Revenue aţang hian Rs. 483.34 crore hmuh beisei a nih laiin, Non-Tax Revenue aţanga hmuh beisei zat hi Rs.323.85 crore a ni.

2. Fourteenth Finance Commission ruahmanna anga kum 2018-19
chhunga Devolution of Taxes & Duties aţanga sum hmuh beisei zat chu Rs. 3625.32 crore a ni a, hetah hian GST aţanga dawn tur pawh a tel a ni. Hemi bakah hian Post Devolution Revenue Deficit Grant aţangin Rs. 2588.00 crore hmuh beisei a ni a, State Disaster Response Fund aţangin Rs. 18.00 crore leh thildang aţangin Rs. 10.10 crore hmuh beisei a ni bawk. Urban Local Bodies Grant hnuaiah Rs. 27.41 crore hmuh beisei a ni a, Rs. 21.35 crore hi ULB-Basic Grant niin, Rs. 6.06 crore hi ULB-Performance Grant hnuaia dawn tur a ni
ang. ULB sum hi Municipal Corporation te hnathawh nan a hman tur
a nih angin, Aizawl Municipal Corporation hnuaia ruahmanna hrang
hrang hnathawh nana hman tur a ni.

3 . Sawrkar laipui aţanga ţanpuina, Grants for States/Union Territories hnuaia Block Grants aţangin Rs. 444.60 crore hmuh beisei a ni a, hei hian EAP te, NLCPR te, BADP te, NSAP te leh PMKSY hnuaia hmalakna tur hrang hrang te a huam. Central Road Fund, RKVY leh adangte aţangin Rs. 55.18 crore hmuh beisei a ni bawk.

4. Centrally Sponsored Scheme hnuaiah Ministry hrang hrang aţangin Rs. 1210.99 crore hmuh beisei a nih bakah, Schemes for NEC aţangin Rs.122.64 crore hmuh beisei a ni.

5. . Kum 2018-19 chhunga Revenue Receipt hnuaia sum hmuh tura beisei chu Rs. 8909.43 crore a ni. Heng sum hmuh tura beisei zinga ULB Grant te, SDRF te leh Block Grants aţanga sum hmuh beisei te hi a hmanna tur ruatlawk (tied-fund) a ni a. EAP te, NLCPR te, NEA te leh CSS aţanga sum hmuh beisei zat chiah chiah hi hmuh a ni kher lo ang.

II. Capital Receipts: Capital Receipt chuan State sawrkarin a hmalakna tur atana a sum puk te, sawrkar laipui aţanga Block loans a lak te leh State in loan a lo pekchhuah aţanga a rulhna sum tlingkhawm te a huam a. Kum 2018-19 chhunga Capital Receipt aţanga sum hmuh beisei zat chu Rs. 763.22 crore a ni a, hemi chhungah hian, Open Market Borrowings aţangin Rs. 550.00 crore te, NABARD hnuaia RIDF loans aţangin Rs. 150.00 crore te, NCDC aţangin Rs. 5.97 crore te leh RBI hnuaia W&MA aţangin Rs. 0.03 crore te beisei a ni.
Continue reading 2018-19 MIZORAM BUDGET