TAGORE-AN MARK 4 A HMU

Hindi tawnga thuziaktu langsar tak, Padma Shri te hial pawh dawng pha Shivani kha, Tagore-a sikul Visva-Bharati University-ah lehkha a zir thin a. Lehkha thiam thei tak mai a ni a. Tluk loh pakhat a nei a. Tamil zirlai pakhat hi a tluk lo a ni.

Tumkhat chu, an zirtirtu Dr. Aronson-an homework a pe a. Shivani-i chuan, Tamil zirlai pa chu tlukloh a duh lo a. Tagore-a hnenah chuan ziah sak turin a ngen a. An inziah sak a. Shivani ngaihdanah chuan, a tha em em a. Tagore-a kuthnu dangte ang bawka tha a ni.

Mark an han pe a. An mark hmuh zat an han hmuh chuan, tagore-a thuziak chuan mark 4 chauh a hmu pha ta a. Tamil pa chuan, mark 6 a hmu!

Shivani chuan, Tagore-a a han hrilh chuan, Tagore-a chuan, “Ka ziah a ni tih tumah hrilh reng reng suh,” a lo ti a!

Tagore-a te meuh pawhin, miin mark an han pek chuan, mark 10-ah mark 4 a hmu pha hram. Nobel Prize hial han dawng pha kha a ni a.

Mi tehnaah buai duh suh. An tehna che kha, i nihna leh hlutna a ni lo. Theihnghilh ngai loh tur a ni hei hi.

Miin an hnawl che pawhin, i laktlak loh avang a ni kher lo. A hnawltute quality san loh vang zawk pawh a ni daih theih.

I chheh vel thilte vangin buai lo la, nangmaha a tha thei ang ber nih tum ang che.

mipuite mamawh hrilh vrs Mipuite hriat chakzawng fah…

Mihringte hian hriat chak zawng kan nei ve hrim hrim a. Chung chu kan tana tangkai a ni kher lo bawk!

Mihringte bengzatna hi khawvel thila finna emaw, thlarau lama thanna emaw, a ni vak lo fo. A tukah engmah ni tawh lo tur chanchinah hian kan buai nasa thin.

Tunah phei chuan social media hrang hrang kaltlangin sum a lak luh theih a. Hengah hian ngaithlatu, thlirtu, chhiartu ngah duh avanga thudik a nih leh nih loh finfiah lohte, thudik a ni lo ang tih hriatreng pawh pholan hreh lo mai nilo phur em em kan ngah thin. Hengte hi mizo hnam than zelna atana thil tha a ni lo.

Hnam thang mek kan ni a. Chuta tana tangkai lo chu mipuite a fah vak hi thil tha ber a ni lo.

Traditional media emaw, social Mediaa inhmangte pawhin chu chu an hriat angai a. Mipuite ngaihven zawng hi kan siam sak, kawihher sak thei a. Chu chu kan hnam thanzelna atan a tul hle.

Khawvel hian thil chi hrang hrang min hlui dawn. Mizo tawng bak chhiar lo leh ngaithla lo te chhiar tur leh ngaihthlak tur hi kan uluk a tul hle.

Mi duhzawng hi kan siam sakin kan kaihhruai thei a. Hnam tana tha tur zawnga mi duhzawng siam hi kan mawhphurhna a ni tih i hria ang u.

THINGSERH THLIRNA TAWI

-Ramlawt Dinpuia

Kum liam ta kha kum ṭha lo leh kum malsawm lo niin kan ngai tak nain, a ṭha zawnga chhinchhiahna tur erawh a awm ve nual a. Mizo hnam anga a ṭha zawnga kum pawimawh a nih theihna tur lian ber pakhat chu hripui leng vanga thil dang tih theih loh kara lehkhabu chhiar leh ziah lama hma kan sawn viau hi niin ka ring. Lehkhabu tlangzarh inkhawm a awm hlei thei lo chungin lehkhabu ṭha tak tak a chhuak nual a. Chu’ng zingah chuan kum tawp dawn te tak taka chhuak, ‘Thingserh, Ram leh Hnam din chhuahna’ F. Vanlalrochana ziah, Fraser Media and Publication-in an chhuah hi a ṭha ber zinga mi a ni ang.

Vawiinah khan ka order a lo thleng ve a, tlai lam aṭanga chhiar ṭanin khup mai mai a lo harsa deuh hlek a, ka chhiar zo thuai. A chhung thu luh chilh hma hauh aṭanga mi hip zar thei lehkhabu hi Mizo ṭawnga chhuak tawh lehkhabu ka chhiar ve phak chin zingah chuan a class ber pawl a nih rih ka ring – ka la chhiar tlem em mai pawh a!

Ram leh Hnam din chhuahna tih a nih ruih avang hian lehkhabu puithu run, chhiar har zet ang kha mitthla lo ula. ‘…khawthlir leh hmathlir min siamsak thei tur chi, tha thar min pe thei tur chi ni mah se inzirtirna lam erawh a ni lo a, “Ti rawh, ti suh” tia infuihna bu a ni lo. A ziaktu hian a chhiartute min fuih fawk fawk lo a, min zilh khur khur lo. Zirlaibu ang maia hlu, zirlaibu anga khawng si lo hi a ni a, rilru sukthlek dik neih theihna tur khawp, ṭang ṭeuha chhiar ngai ni si lo a ni.’ tia duhsakna thuhma ziaktu Lalhruaitluanga Chawngte sawi hian a tichiang.

Lehkhabu chhiar hrim hrim hi a ṭha a, lehkhabu ṭha chhiar phei chu a ṭha leh zual. He Thingserh hi lehkhabu ṭha zinga khung loh theih loh chi a ni a, mi zawng zawngin chhiar thei ila tia duhthusam khum tlak a ni bawk. Kan uar mah mah ti an awm a nih pawhin, keimahah chuan mahni chauha chhiar atan chuan a uiawm ka ti a, duhsak zawngte kawhhmuh leh present chi a ni ka ti.

Famkim lohna khawvelah kan la awm miau avang erawh chuan a famkim bik hauh lo a. Chhut sual palh a awm zeuh zeuh hi, a lehkhabu paper, kawm etc ṭhatzia ngaihtuahin a awm ang lo a, mit a tikham zual! Mi ropui tak tak chanchin a lam chhuah zinga Bobby Kennedy chanchin kim chang deuh zawk a awm ve lo hi ka lo ui. A thusawi ropui chungchang erawh a awm tho a.

Ka vawi khat chhiarnaa min hneh ber lai chu Mizo Sipaite Football Final khelh thu hi a ni a, Mizo hnam hming tiṭha tura kan pute’n ‘Mahni bi tum chhuah loh tur. Tihtluk reng reng tur’ tih thuvawn nei chunga thih ngama football final an khelh chanchin hian hnuk a tiulh thei! Kha khelmual kha Mizo hnam tana indona mual a ni miau a.

Pu H.K Bawihchhuaka chungchang a sawina ‘A Pathian thu awihna chu politics field-ah pu lutin, Politics field-ah a takin a ringtu nihna a tilang a. Biak inah a sawi ṭhin thung.’ tih hi a va han tawk tak. ‘Western values-a kan inchawm nasat poh leh kan hnam chu kan buai zawk.’ tih thu pawh hi ngaihtuah zui ngai tak a ni bawk.

Chutiang chanchin ngaihnawm leh mi cho thei tak tak te, khawvel ram ropuite din chhuah dan ngaihnawm tak tak te, hnam tana inhlan ral mi hmingṭha tak takte chanchin leh kan hnam tana zir tur zirlai, thiam leh ngaihnawm taka sawina lehkhabu hi chhiar a, zir tluk tluk tham a ni.

PA THIL HREZAU THAROOR-A

Indian Politician, UN diplomats thin, Thuziak thiam ni bawk Sashi Tharoora hian thil a han hre khawp a. A hre thukin a hre ril a. Eng thil pawh sawi se, Facts and figures zawng zawng nena sawi thlap thlap thei, sawi ngaihnawm thiam bawk si a ni.

You Tube-ah a thusawi hi ka en in ka ngaithla fo a. A hmuhnawmin a ngaihnawm tel bawk. A thil sawi hi a hrechiang em em thin bawk. Amah hi Google kal thei a ni ringawt.

US Secretary of Defense Gen. James Mattis pawh hi mahni subject hrechianga sawi a ni a. A hna kaihhnawih hi chu a kum kar, kil leh khawk rawk ami pawh, “Chu chu chutiang chu a nia” ti nalh nalh thei a ni. Gen Stanley McChristal pawh lehkhabu pahnih chhiar kawp reng a ni.

Tharoor a te ang, Living Encyclopaedia, Library kal thei, Google Nung ang chi hi an hmuhnawm a, an ngaihnawm, ngaihthlak an nuam a. A lehkhabu reng renga a thuziakte hi a chiang thei thin fek fawk khawp mai. Mizo Thuziak thiam lar tak pakhat lehkhabu ka chhiar kha chuan, a lehkhabu dang zel chhiar zui chakna a bo lek lek mai! A hriat pawlh nasa lutuk a. Mi pakhat lehkhabu ziak chungchang a sawi a. A sawipa khan bu hnih chauh, hawi zawng inang lo lutuk leh nghal a ziak a. Ani kan pu khan a han hriat pawlh tlat mai a. A bu hming ngawtte kha a sep rawtui nasa em em mai a. A thil sawi lah a ni lo bak si a. A chhiar zau lemloin ka hriat phah ta!

Mihring hian kan ngaihven a, kan peih phawt chuan thil hi a lo hriat theih khawp mai. Edmund Burke-a khan Paradise Lost a sawichhuak thei vek! Dan lam kaihhnawih hnathawktu zingah pawh a section kil kar, a article biru ru nen pawh chawp leh chilha thilthleng kaihhnawiha sawi thei an awm thin.

Thil hre zau, hre ril, hre kil, hrechiang Tharoor-a hi 9 March 1956 a ni a. Mahni hriat lam hriat chianah chuan, Justice Rohinton Nariman-a hi a tluk lo hret mai awm mange aw, ka ti deuh. Chu chuan Rohinton Narimana hriatna chungchuan dan san zia a tilang ang. Tharoor-a meuh ai pawha thil hria chu. Londona piang niin, India ramah a seilian a. St. Stephen’s, Delhi atanga BA zir zo a ni a. Fletcher school atangin internaltional Relations a zir zo leh a. Hun reife UNO-ah a thawh hnuin, a bansan a. Politics luh chilhin MP A ni chho zui ta a ni.

Lehkha ziak mi a ni a. Thawnthu leh thu lo a ziak a. A thuziak hi a ngaihnawm viau zel. A thusawi ang thoa ngaihnawm a ni. Mak tih khawpa saptawng thiam a ni a. A hriatna rilna leh a sawichhuah thiamna hrim hrim pawh hian pa ropui takah a siam ve reng reng.

Tharoor-a in zir peih leh hriatna ril, kut chhuak nei tha hi kan hnam tan awhawm tak a ni.

CHHIAR SEN LOH CHHIAR THEITU CHU

Kum 32 chauh he khawvelah a dam a. A thihna pawh kum 1920 daih tawh kha a ni.

Srinivasa Ramanujan-a kha khawvela mathematician ropui berah mi tam tak chuan an ngai a ni. ‘The man who knew infinity’ tiin an sawi thin.

Tamil Nadu-ah rethei taka tei mai mai kha eng tin tin emaw a kut chhuakin Cambridge a thleng a. Amah pawh Cambridge-ah pawh an la chho ta hial reng a. A hun laia solve theih loh Mathematics zawhna tam tak kha awlsam deuhin a chawk chhuak zung zung a.

Mathematics a a ngaihdan tam tak an la zir a. A dik a ni tih tun hnaiah pawh an la hriatchhuah belh zel chauh a ni. “The lost notebook” an tih mai, Mathematics lam kaihhnawih a ziahna note bu kha 1976 khan an hmu chhuak a. An zir luih luih mai a ni. A thil sawi te pawh an proof zung zung theilo. A thiam rilin, a thiam thuk em em a. A mathetical equation ho kha an hrethiam chho leih leih chauh a ni.

Cambridge a Mathematics professor te pawhin “Kan aiin a thiam zawk e”, an ti thin. Trinity College, Cambridge atangin BSc a zo a. A dam rei zui lutuk ta lo a. Damrei deuh se, engangin nge Mathematics khawvel hi a tih danglam ang tih hi ngaihtuah phak a ni lo.

A specialised na hi analytic number theory, elliptic integrals te a ni. Analytic Number theory chu Number theory peng pakhat a ni a. Mathematic dana thil zirchianna method te hmanga integer (number pum/puitling…1, 2, 3 ang chi…9.75, 10 1/2 ang hi integer a ni lo) a chawh chhuah ngai (problem solving) chhawhchhuahna a ni. Elliptical integral chu Integral calculus chhunga thil pakhat a ni, ti mai ang. Mathematics a pawl sawm piah lam zir tan lo chuan a fiah dawn chuang lo.

The Ramanujan Journal tih a awm bawk a. Ramanujana kaihhnawih mathematics lam zir zauna thuziak an ti chhuak thin.

Middle School kan kal laiin Ramanujan-a chanchin hi Pu Rk Malsawma khan a sawi thin a. Chanchin ngaihnawm tak, khawngaihthlak leh lung ti leng lawi si a ni.

Jorhat science Centre and Planetarium kawtah amah chawimawina lim, awm chin chunglam zawng hi an lo siam a. Ramanujana lo pawh an lo ti nual.

A chanchin hi Movie-ah an siam a. Dev Patela a chan kha.

“Equation te hian Pathian ngaihtuahna an puan chhuah loh chuan ka tan awmzia a nei lo e” a ti a. A damreilo ta em a. A damchhung huna sikul kl mumal lo si kha, a chhiarkawp thiam dan lutuk kha, Pathianin min pek a ni, a tih kha a pawmawm leh zual em em a ni.

CRITIC THA KAN MAMAWH…

Mizo literature thandan han en hian, a thatna thukzawng niloin, a zat chhiara tam zawngin a thang ni hian a lang a. Literature tha nei tur chuan critic tha kan mamawh hle a ni. Mizo literature chanchin han chhiar hian critic tha, kan literature chawisang zawttu hi kan ngahlo hle si!

Critic tha chu tunge a nih? tawitein han sawi ila

Thil sawi thiam: Mi hnehtheihna riau nei leh tawngkam bungraw ngah, sawi tul sawi chhuak fiah thiam

Mi dang hriatthiamna nei mi: Mi dang hriatthiamna nei nih loh chuan, critic tha a nih theih loh. A ziaktu thlirna anga thlirpuite, a chhiartu thlirna anga thlirpuite, thawnthu a nih chuan a changtute khawvela chen thiamna te

Thil ngaihtuahna thiamna leh thu leh hla thukphum khehchhuah thiamna: Mi tam tak chuan, criticism han tih hian, mi kutchhuak sawiselna ngawr ngawr emaw an ti fo! Sawisel loh theih loh chu sawisel tur chu a ni mai. Sawiselnaah pawh mi dang chawisang zawng, ziaktu leh phuahtute chawisang zawng a awm. Eng hi nge thu leh tha tih kawhhmuh kha critic hna a ni a. Thu leh hla thaah chuan, a phenah enge awm? Eng finthuril nge an phum tihte pawh hai chhuah kha critic hna a ni bawk.

Mimal ang leh hnam ang pawha hmasawn tur chuan

  1. zir tam
  2. chhiar tam
  3. ziah tam
  4. sawi tam
  5. rilru inhawng a pawimawh..rilru inhawng loah chuan thrang tura theihna (potential) a awm lo. Mi thiam,thahnemngai,mi ngaihsan, hmasawnna duh mi leh chumi kawnga ke pen tur chu kan mamawh tihna a nih chu Thah thiang lo (untouchable) anga kan ngaih tur, a sawi kan lem duak tur mi an awm angai. An awm loh pawhhin chumi persona tak chu siam chawp mai tur. A sawisel emaw, kawng kawhhmuh a kawh hmeh emaw, kan zawh duh tur leh a fakna kan hlawhchhuah chak tur hi kan neih a ngai. A kamliam kan chan tur, a sawi chuan dik kan tih riau tur an awm angai.

Han sawichhun zawm ta zel ila. Prosody Lam zirtir thiam miah loin, poet tha deuh a nih theih mai thei. Rhetoric hmanraw hrang hrang sawi thei loin a hman thiam ve viau theih mai thei. Critic tha a bikin, poetry thlir tur chuan hriat hneh hle angai ang. A term hming hriat ngawt a nilo, a inhnaih hlawm si, hriat chian, hriat hneh, hriat bel, hriat ngheh a tul. Rhetoric and prosody han tih hian hmai hnawih a ni lo a. Make up chikhat hmingte hi a nih duh hmel riau maia

Book review ka ziah ve zauh zauh ho kha, ziak tha leh ila, Ka ngaihdan a dang nual tawh ang. Ka ngaihdan hmasa kha a dik talo tihna a ni chuang lo a. Ngaihdan dang awm ve thei a ni. Chhungril chaknaa ka telh dawn pawh khan, pakhat mah khawih danglam loin ka telh ta tho a. Kan ngaihdan kha awm anglo lutuk nilo a nih lem loh chuan, literature chhunga ngaihdan chi hrang hrang awm thei zinga ding ve tura, din tlang tir tur a ni

Criticism hi ziakin lo tam sela. Kan literature thanna tur chu a ni ang. Chawisan tur chawisan ngam a, paihthlak tur paihthlak ngam a ngai a. Critic-in paihthlak tur a tih hi hun fiahna a paltlang hnua thu leh hla tha a ni ve thei bawk a…

Literature-ah hian school of thought hrang hrang a awm ve theiin, a awm thin a. Mizo literature-a kan pawl neih te hian chu chu a pawm em? ka va hre lo. Novel tha kan tih pawh a inang thei lo ang. Novel thalo kan tih erawh a inang tlangpui tur a ni mai thei.Chetan Bhagata novel te novel tha em ema ngaitlat kan awm chuan, kan diklo deuh a ni mai thei..

Didactic literature ngaina leh ngaisang leh ngaisang em em lo a awm theih a. chutiang zel chuan, a dang pawh a ni ang. Mahse, critic chuan thlir kim angai ang reng.Lalhmingliana saiawi kutchhuak thlirtu pakhat chuan didactic literture a ngaina lo tiin a sawi a..” A non-fiction ho a chhiar lo a ni ang”, tih kha ngaihdan ka lo nei.A non-fiction ho kha Didactic literature chhunga mi vek a ni…

Ngaihnawm lai hi kei ka ngaih pawimawh ber lai a ni. Thu leh hla thlirfimna kan ziah pawhin ngaihnawm tur a ni tih hi ka theory a ni. Tin, chhiartute, an chhiar tawh sa kan sawipuina a nih bakah la chhiar lo te keu tir tum angai. Chu chu critic tha hna pawimawh a ni ang.

Character siam, Plot rem dan, settings thlan zawng zawng. Tight leh felfai taka rem hi novelah kan duhthusam a ni mai thei. a awm lutuk a A themthiamte hnen atang chuan, chutianga duhthusam lo deuh siin novel tha tak a chhuak thei tho. Yehudi mehuninan violin hrui kim loin rimawi mawi tak a la tum chhuah theih tho thu an sawi anh deuh kha a ni…Chutiang pawh hmu thiama, chawimawi thiam critic kan mamawh.

Death of the author han tih pawh hian a ziaktu biographical background hriat loh chuan thlirfiah loh a awm ve thei tho. Nunna kawngthuampuiah tihah te pawh kha. Zikpuii pa autobiographical element tam tak kha hmuhsak angai…Ka sawi tum chu, biographical element/autobiographical element inzep awm thin hi hmuh tel fo loh chuan, thlir fuh loh theih fo
theory hrim hrim hi 100 pc a zawm theih loh a ni ang chu. An kutchhuak dang atanga chhuidawn theihte, an mimal chanchin atanga chhuidawn theihte, an diary atanga chhuidawn theihte a ni ang. Kaphleia ‘Thlirtu’ te kha, a thuziak ngau ngau pawh a hlu. A diary nena thlir kawpin a chiang zual. Barthes a khan a sawi pakhat chu a ziaktu leh a thuziak a in zawm lo a tihah khan an biographical element nena thlir loh lam kha a sawi tel ve a. “The author argues against the method of reading and criticism that relies on aspects of the author’s identity to distill meaning from the author’s work. ” Hei hi barthesa essay ka hriatthiam dan pakhat a ni.

Engpawhnise, “A ziaktu pa hian ganja a rui emawni le” tih em emte kan ziak ve a nih loh chuan, criticism ah pawh hian ngaihdam sak ngai an tam ang, inthlahrun loh a tha. Critic tha kan mamawh kan tih tur rual hian, critic tha nei turin kan in peih em? Robert Bridge-a an sawina ang deuh a…”Engtin nge amah aia talent nei tha daih hetia a tih ngam mai le” min ti ve ang tih erawh hlauhawm deuh a nia. Thuziaktute hian kan mamawh critic te hi kan zo meuh angem?tih hi zawhna awm thei tak a ni.

DETECTIVE DENGA-HOHNA PHENA TAKNA


Lehkhabu Hming : Detective Denga – AWIH LOH AWIH LOH
Ziaktu : Thuamtea Khawlhring
Chhuah kum : 2020

Detective Denga hi a bu meuha a chhuah leh, Detective Denga rawn dinchhuah inkar chu a hla hle. Kum 15 vel zet a ni awm e. A bibo rei ngar ngar teh a. A rawn inlar leh a, pui tak a ni! Pui tak! New York, London leh Tiau a han hrut tak tak mai. A ho si, a tak ang reng si. A lem si, a thuk ang reng si.

Detective Denga hrelo Lal dang an lo lan treuh tawh hnu, Detective Denga lo lan hmasak laia piangte an nulat tlangval ur ur tawh hnuah, thawnthu puitlingin, Detective Denga kan hmu ta nawlh mai! Mi a rawng deng deuh dawt a. Kan ngaihtuahna mu hnu a kai harh leh a. Sudden Muanga hnua Mizo Literature chanchina, Character turu buru ber mai, DD chu kan zingah a lo leng leh ta!

Thuamte Khawlhring ziah a nih tawh chuan, a ngaihnawm ve hrim hrim dawn bawk tih hi a chiang a. Essayist, Poet, Critic tha a ni a. Short Story a ziah pheuh pheuh ho te pawh hi a tha em em thin a. ‘Phul hmun cham diai’ tih ang te kha. A thuziak dangah pawh An college kal lai a ziahnaa wasted sunset nena an sawi zawm chho te kha, a ngaihnawmin a lunglen thlak thin. Thawnthu sawi thiam ‘Story teller’ tha a tling a, Fiction kan tih mai, thawnthu phuahchawp lamah erawh sulhnu a ngah tawklo erawh ka ui thin. Thuamtea themthiamna lo lang chiang tak mai pakhat chu, literary term pakhat han hmang ve lawk ila, ‘Detective Denga’ han tih mai te leh, ‘Awih loh awih loh’ han tih mai ang chi, a kawma lo lang nghalte hi ‘Alliteration’ an tih huang chhunga khung tur chi a ni a. Alliteration an tih awm zia tak hi chu, Pu L. Malsawma Colney-in khaw pakhat a hauhnaah, “Anni B. Com mai mai in lo ngai sang a. An thil zirte chu book keeping tihte a nia. Lehkhabu rem tihna a ni mai. Keini zirte chu an idea that can change the world tihte a sin. A awmzia ka hrilh tawh rih lo ang che u’ a tih ang deuh khan, a awmzia chu ka hrilh lo mai ang che u.

Detective Denga hi fiction kan tih huang chhunga mi a ni a. Novel a ni a. Fiamthu leh thu ho ang reng takin a thawnthu hi a bawlphuan chiam a. Bung 1-na pawh ‘Bekang Buaina’ tih a ni. Bekang Buaina tih bunga thumal hmasa pahnih chu, ‘Us President’ tih a ni thung, Heta tang ringawt pawh hian, Detective Denga thawnthu hi a pui dawn a ni tih chu a chiang khawp mai. He ‘Awih loh awih loh’ tih buah hian, Ringa sailo a awm a. Ani hi a pui! ‘Khaw fing seh chattu tur a ni a, a seh hmaloh chuan khaw fing chu a chat ringawt thei lo’ a pui hem hem a nia!
America rama an hotel pakhata an bekang char chumi kaihhnawih kal zelah chuan, America rama an intelligence agency tha ber ber pawhin ti ngaihna an hre ta tlat lo mai a. Mizo Tlangval ngei mai,Detective Denga an pun ta a nih kha! Pui tak an ni! An manganna a chin fel sak a. America khua leh tui nihna an pe. A hnuchhui na kawnga a thawhpui, Miss Angelina phei chuan, a ngaisang viau nghe nghe. Pasal atan pawh a iai lo. America ram hotute hi a chunga an lawm em avangin, a duh dil turin an ti a. Mizoram tuam hlawm a, Mizoram hmasawnna hna thawhsak turin a ngen a. A ngenna hi an tih hlawhtlin sak nghe nghe. Chumi hnuah, British ho a pui leh a. An buaina a chinfel sak leh a. Anni pawh a chungah an lawm hle. Mizoram harsatna pawh a ching fel a. Mizoram ti chhe pawl hotupa, Khuangawrh chu a ti hlum a. A thlanah pawh, ‘EIRUK CHING KHUANGAWRHA’ tih zawng a in ziak a. Heti hian detective denga thawnthu hi a tawp a ni.

He thawnthu ho em emah hian thutak a inphum a, thupui pawimawh tak tak a in thukru bawk a. Heng a thu thuhruk hi nitina langsar taka kan sawi khawlh khawlhte hi a nit ho a. A tu amah hian, barah kan khawn tawh lem chuang loin a lang a. A chian the felh fawlh thin em avang pawh hian a ni mai thei e. Pahnih khat lek han sawi ila, thil dang zawng zawng aia Mizo hnam leh ram dah pawimawhna te, Mizoramin hmasawnna ruhrel tha kan mamawh thin zia te leh Mizoramin kan nih tur ang kan nih thin lohna chhan chu, eirukna avang a nih tih hi chiang takin a pholang a. Ho em em phena hetiang hi, Chiang kulh si, ning loa chhiar zawh theih turin Thuamtea Khawlhring hian, a bilh lut chiai a ni.
Detective Denga hrim hrim hi, a mizo em em mai a. Sap nula Angelina-in, a han beisei ve deuh pawhin, ‘Kangvara mang khawh I thiam dawn em ni?” a ti hem mai a ni. Mi tam takin America khua leh tui nih chaka dan dik mangloa an beih laiin, Denga chu a pekin an pe a. Angelina-I, amah lo beisei vet u khan, a han lawmpui pawh khan, DD chuan, “Min lawmpui suh. Miin an chakzia chu ka hria e, Kei chuan a si them pawhin ka chaklo. He in ram mawizia leh nawmzia hi ka hria e, Engkim hi duhthusam a ni. Long island pawh a nuam tih ka hria e. Nimahsela, heng thil ropui tak tak hi thlakhlelh hleihtheihah ka ruat lova, kan rama retheihna nasa lutuk khi um bo a nih hma loh chuan, kan ram khi ka kalsan thei lo ang” a ti tlat mai a ni. DD hi ram vei mi a ni a. ‘Heng hausakna leh ropuina zawng zawng ai hian kan ramah rethei taka chimchawk chawrrno chawa rin mai mai pawh ka thlang zawk a sin” a la tin gal ngal thei a ni. DD hi nationalist dik tak a ni.

Khawvel Literature chanchinah hian, 1920-1930 inkar chho kha, ‘Golden age of detective fiction’ an ti a. Khatih lai khan Detective thawnthu ropui deuh deuh leh character ropui deuh deuh a chhuak a. Tun hnu hian detective leh chumi lam hawi character ropui deuh deuh an lo awm leh nual bawk. Thawnthua detective hmingthang deuh deuhte chu, Edgar Allan poe-a ‘Auguste Dupin te, Arthur Conan Doyle-a ‘Sherlock Holmes’ te, Agatha Chrisrie ‘Hercule Poirot’ te, David Baldacci-a ‘John Puller’, ‘Amos Decker’ etc te, Lee Child-a ‘Jack Reacher’ leh mi dang tam tak aiin, Thuamtea detective denga hi a pui daih zawk!

Detective Denga kha, Lengzem chanchinbuah rawn inlarin, mi zawng zawng ngainat leh ngaihven hlawh khawpa ho a ni a. Hohna phena takna erawh chu, he Detective Denga channa novel hmasa ber, ‘Awih loh Awih loh’ tih buah hian kan hmu tel thung a ni e.

Ka insawi tui dawn, duhtawk ang.

ZIRNA UAR

CYMA-in 2020 Kum puan atan “ZIRNA UAR” a thlang a. Covid 19 hripui avangin zirna in te kan khar ta thuap thung a. Leilung hian Zirna hi Sikulah chauh a nih loh zia min zirtir a tum zawk emawni tih tur a ni. Kohhran leh khawtlang activities a chawl thuap a. Zir belh, thiam belh neiloin a awm viau theih thung ang.

YMA Kumpuan kaihhnawih hian thil thenkhat han sawi hmasa ila:-

  1. YMA in zirna Uar Kumpuan kan han nei leh ta hi a lawmawm hle a ni.
  2. Zirna uar han tih hian, lehkha zir vak vak mai niloin, thiamna tak tak nei tura lehkha zir a ni a. zirlaibu bak lehkhabu dang a tam thei ang ber chhiar tur. khawvelah hian zirlaibu nilo atanga zir tur hi a tam mah zawk.
  3. Kan hnam hian mi thiam a mamawh. YMA sawisel,bei ngar ngar, hmusit, kohhran bei ngar ngar zawnga zir sang hi chu kan mamawh vak lo. YMA leh kohhran kan beih ngar ngar hian YMA leh kohhranin A represent nun tha leh hlu hi kan bei tel tihna a ni. Vawiina kan khawtlang nun tlahniam ta viau pawh hi chumi nghawng chu a nihna chen a awm ang.
  4. Zirna hi Mizo values chawi sang, Mizonaa chianna zawnga a kal angai
  5. Sawrkarin tih tur tam tak a nei a. Sawrkar tih bakah pawh YMA hian tih theih tam tak kan nei a ni.
  6. Library din a tha. Ngaihtuahna i hmang ang u. Thiamna leh Finna hi classroom pawnah a tam. Zirna uar kan tih hian chu chu huam rawh se.
  7. Zirnaa tan la tur hian kan khaw tet leh len leh chhungkaw dinhmunah chhuanlam tur kan nei lem lo.

Zirna chungchang thudang han sawi leh ta zel ila.

Mi ram Zirna kalpui dan hi ka awt fo thin a. An Zirna In Graduation Day ah te hian, Mi hlawhtling, sipai hotu te leh mi dang etc an sawm a, Nun hmachhawn dan sawiin, Leadership chungchang te lecture te an pe thin a ni.

US Army a an General Hmingthang ber pawl, Secretary of State hlui Robert Gates-an, “”perhaps the finest warrior and leader of men in combat I ever met.” a tih mai, “Modern Day Paton” an tih bawk thin te General Stanley Mc Christal te hi, a sipai hna atanga a pension hnuin, Yale University-in faculty atan an la a, International Relations a zir tir thin.

Operation Desert Shield, Persian Gulf War, War in Afghanistan
Iraq War etc velah a lo tel tawh a. Joint Special Operations Command (JSOC)-ah an commander a ni thin a. Pakistan, Afghanistan, Iraq, Somalia, Syria, Yemen tih velah te Operation an lo nei tawh thin a ni.

1976 a West Point graduate a ni a, a hnu lamah Ranger Regiment-ah te a awm leh bawk a. Amah hi a in vawng khawp a, 7 to 8 miles (11 to 13 km) nitin a tlan a, Chaw vawi khat a ei a, darkar li chauh a mu a ni. A pension hnu pawhin a la fit vang reng mai a ni.

A hranpain, International relations-ah degree a nei hran lo a. mahse, a taka tawngtu a ni a. Chutiang mi chu Zirtirtu atan Yale University te chuan an la ta a ni. Mi ram chu changkang leh dinhmun sang lo thei lo an ni thin, an practical thin em a ni.

Yale University Mai bakah hian, Stanford Graduate School of Business-ah te pawh hian, Leadership Lecture an pek tir thin a ni.
Interntional Relations bakah Yale-ah hian Jackson Institute senior fellow leadership series an tiha thusawi thin zingah a tel bawk a ni.

London School of Economics pawhin, MSc course on women, peace and security tih an hawng thar a. chuta zirtirtu tur chu Lemchan thiam Angelina Jolie te, British Foreign Secretary hlui William Hague-a te an ni daih a ni. Anni bakah hian, Jane Connors, director of international advocacy,Amnesty International Geneva, leh Madeleine Rees, secretary general of the Women’s International League for Peace and Freedom. te chu Zirtirtu tur atan an ruat bawk a ni.

Field Marshall Sam Manekshaw te pawh kha, College tha ho chuan leadership lecture pe turin an ruai thin a ni. St. xaviers, Mumbaia a thusawi te phei chu Leadership chungchanga thu sawi ropui ber pawla ngaih a ni. Silver Jubilee series on leadership tiha thusawitu pakhat a ni.

Chutiang chuan, Zirna hi a pawimawh a, degree leh certificate ngawt ni lo, mi tak tak chher chhuah hi a pawimawh ber a ni.

Zirna hi kan ngai pawimawh tak tak a nih chuan, Thangtharte hi engtin nge lo thang se kan duh tih ngaihtuah angai hle a ni.

Kan zirna hi kan hnam mil hian kan siam rem tawklo thin ni hian ka hre thin a. Education hi Concurrent List a mi a ni bawk a. kan hnam, kan khawtlang mil hian engatinge zirna hi kan duan loh le?

Zirna hi kan ngaih pawimawh a hun ta tak zet a. Hmun dang atang example tha tak kan nei bawk a ni. Mi ram te hi chu lo ropui lo thei an ni lo e.

Titi tam takah, Mi tupawh an tuinaah kal se a tawk mai, lehkha zir zir angai lo e kan ti thin a. Kan ti sual zel ang.

Miin eng thil pawh tise, lehkha zir hi chu a ngaihthah thiang lo a ni.

Footballer Ander Herrera hi, 2016-a Man U TV in an interview naah chuan, footballer nih tum sikul la kal mekte tan fuihna thu hnuchhiah turin an ti a, chuta a sawi chu

“Ka sawi duh chu, mi tlem te chauh footballa eizawnna tak tak hmu an awm. Chu chu an hriat angai. Chuvangin, lehkha zirah thahnem an ngaih angai a, nasa taka an zir angai a ni. A chhan chu, dam chhung hun thui tak atan an inbuatsaih angai a ni. Professional footballer nih hi thil awiai a ni lo, i thiam a i tha a nih chuan, bei fat fat rawh. Amaherawhchu, a hmasa zawk chu zirna a ni. Chu chu a pawimawh ber a ni” tiin.

Zirna hi hna hmuhna degree/certificate mai a ni lo. Nun thiamna min petu, khawvel hmachhawn thiamna min petu a ni.

Zir i uar ila, i bei fat fat zel ang u.

Book review : A HO LO HLE

Lehkhabu hming : A Ho tlat
ziaktu. : Dr C. Lalhrekima

Dale Carnegie, Norman Vincent Peale, Zig Ziglar, Stephan Covey, Napolean Hill, Robin Shar adt…lehkhabu ziah hi i chhiar tawh ngai em? Jay Shetty, Dhar Mann te video tawi hi i en thin em? Nun dan an sawi ber, rilru puthmang dik leh hmalam panna kawng min kawhhmuh an tum a. M. Scott Peck lehkhabu ‘The Road Less Travelled’ i chhiar chhuan, mahni nuna harsatna tawkten amah an eawn thinna leh an harsatna an hmachhawn dan chungchang a ziak a. Huaisen taka mahni harsatna hmachhawn thinten hnehna an chan thin dan leh an nunkawng zawh a dik zawk dan a ziak a ni.

Mizo society han thlir ila. Nun dan thiamba leh rilru puthmang dik hi kan mamawh viau a ni. Chumi kawnga min kaihhruai thei thusawi, thuziak chu kan la ngah lo hle. Hetiang kawngah hian Dr. C. Lalhrekima hi a fakawm ka ti thin.

A hmain Thuruk 90 a lo ti chhuak tawh a. Lehkhabu tha tak a ni. An nunkawnga harsatna tawkten amah an rawnna leh chumi kawnga puihna lam kaihhnawih behchhana ziak a ni. ‘A ho tlat’ tih lehkhabu hi Thuruk 90 ai khan a tha daih zawkin ka hria a. Mipui vantlang mamawh pawh a hawl kim zawkin ka hria.

Nundan kan thiamna turte, kan thinlung a hahchawlhna turte, hmalam kan pan theihna tur leh kan khawthlir a dikna tura kan mamawh hrang hrang chu ‘A ho tlat’ lehkhabuah hian a chai a. A ho lo hle.

Psychiatrist a ni a. Helama harsatna tawkte tana thawk a ni a. A Ho tlat tih erawh chu a hnathawh lam kaihhnawih ngawr ngawr a ni lo a. Mihring nun pumpui atana thil tha a ni. A lehlamah chuan, a hnathawh hian mihring nun pumpuiah hian kaihhnawih loh a hleih a nei lo e, te pawh kan ti thei tho awm e.

Sawrkar hnathawk tam tak leh mi thiam tam tak hi Mipui vantlang tan ‘direct’-in an tangkai lem lo a. Tangkai an tum lem lo bawk te pawhin a hriat a. An tan chuan, mipuite hi ‘hlep’ mai kan ni fo. Dr. Hrekima hi chutiang chu a nih loh zia hretu kan ni a. A Ho tlat tih bute hi a hlu ka tih riauna chhan a ni.

Thil a sawi thiam a. A fiahin hriatthiam a awl em em a. A Ho tlat tihte pawh hi chhiar laklawh a awl. Dah mai phal chi a ni lo. Hetianga a mamawhtute hriatthiam awl tak tur a a sawithiamna hi inthlahchhawn thilte a ni ve deuh bawkin ka hria a. Chutih rual chuan, kohhrana a rawngbawlna leh kTP-a kha leh chen a lo telna khan a pui ve bawk niin ka hria. Engtik atangin nge thu hi a ziah tan ang? tih chu ka hrelo a. Mission Vengthlang branch KTP Silver Jubilee-1993 (?) souvenir kha a ziahna hmasa pawl tak a ni awm e ka ti.

Mi dang thlirna atanga thil thlirpui thiam tij hi A ho tlat buah hian a sawi. Damlo pakhat, khuma mu chunga serthlum tam tak hmu tlat. Damdawi an in chawh hman lek lek a. Damlo mutna khum atanga a thlirpui chuan kawngpuia an serthlum zawrh kha darthlalangah chuan a lo hmuhtheih reng lah taka! Mi thlirna zawn atanga thlirpui thiam hi a tul. An thlirna a lo dik leh pawmpui ve mai, a lo dik loh leh a dik zawk kawhhmuh mai ila, kan khawvel hi a tha leh zual zawk ang

Cowboy hunlai khan, Eastern america lam ho (New York) etc ho chuan Red Indian ho khawngaih thlak zia leh an dinhmun an sawi cham chi…West lam kan tih ho, Cowboy ho nen erawh chuan nitin deuh thaw indo thin an ni.

“Folks back east have a sight to say about the poor Indian but they never fought him. He was a fighter by trade and because he naturaly loved it, mercy never entered his head” (Louis L’Amour, “The Daybreakers p 44)

East ho chuan red Indian ho indona/inkahna hmunah an hmachhawn ve ngai lo a…West (Wild west) lam chuan, silai nen an hmachhawn a, surive tumin an bei thin…America ram ve ve ami pawh, an thil tawn in ang lo tak avangin thil in ang reng an thlir dan a inang ngailo hle…

Mitinin ngaidan kan nei theuh a…A then chuan experience atangin ngaidan kan nei a…A then chuan, mi sawi atangin…

Kan environment a zirin kan khawvel thlir (World view) a inang lo thin a…

Mi ngaihdan hi va pawmsak lo ngawt tur a ni lo a, va nuihzat ngawt tur pawh a ni lo…ram leh hnam tana hma kan lakna kawngah pawh chu chu hriat reng a tha hle…Thudik kan tihte pawh hi a in ang lo thei hle…A hmun leh a hun leh a mihring a zirin a dik ve ve thei fo!

Kan intihbuaina tam tak, tul loa kan inhnialna tam tak, kan tha leh zung, kan hunk an paihna tam tak hi, Mi thlirna zawnah va thlirin, an tukverhah han dah sak ve ila, kan inhrethiam tlang ang.

Sawtna awmsiloin, kohhran leh khawtlang,Politics leh hnam thilah kan inhnialin kan buai a. Mi thlirna atangin thlir ve thiam ila. A taka tawngtute ngaihdan te ngat te, a zira zirte ngaihdan te ngaithla thiam ila. Kan Hun tawn a zirin kan rilru thlak a tul a nih pawhin, rilru thlak zir ila. Nun phung dik hrim hrim, a vawna kan vawn tlat tur, a hun leh a hmun a zir pawh danglam ngailo chu vuan nghet ila. Chutiang nilo thilah chuan, a hun leh a hmun leh kan thil tawn a zirin insiam rem kan zir a hunin a tul ta hle.

Kan awmna hmun, kan seilenna boruak leh kan thil tawn azirin kan ngaihdan leh thlirna a inang thei kher lo. Kan thlirna anga miin an thlirloh avanga va huat emaw, hnial dank her tum kan ching thinte hi sim a hun ta a ni.

‘A ho tlat’lehkhabu hian khawvel thlir dan leh hmachhawn dan min kawhhmuh a. Kan hnam ze milin kan mamawh min hrilh a ni. Chungchu a tira lehkhabu ziaktute leh video siamtute nena an danglamna chu a ni.

Book review: SUMDAWNGTE CHHIAR MAKMAWH LEHKHABU

Lehkhabu hming : ZORAM RAHBI entrepreneueship lamtluang

Ziaktu : Joseph L. Ralte

Edition : First Edition

Year. : 2000

Covid hripuiin khawvel a ti buai a. Khawvel pum economy a nghawng a. Hun han kal deuh ta sela, a nghawng hi tun ai hian kan tuar leh zual zawkin a rinawm. Khawvel economy a nghawng dan lam chu sawi zui lo ila. ‘Entreprenuership’ lam erawh kan uar deuh deuh a tul dawn tih erawh chu chiang takin a sawi ngam a. Chumi lam hawia kan lehkhabu mamawh tak mai chu mizo tawng ngeiin chhiar theihin a lo awm ta.

Lehkhabu ka chhiar hian, A lehkhabu nihphung a zirin a ziaktu ka en fo. A ziaktu tawnhriat engnge ni a, engnge a zir thlen a, a in chhiar zau em?, a zin zauin a khawhmuh a zau em tihte ka en fo. ‘Zoram Rahbi’ ziaktu Joseph L. Ralte hi pa khawhawi zau leh vak zau tak mai, lehkha chhiar zau a ni a. A chhiar leh a zir leh a tawn a te hi ‘Entreprenuership’ lam hawi a ni hlawm a.

Hongkong, Vietnam, Gujarat, China etc -ah pawh entrepreneurship lama finna zawnga lo tei kual tawh a ni a. A zinna rah chhuah hi Social Mediaa thlalak post ngawt, a bak tutan maha chhawr na tur awm zui lo ang hi a ni ve lo a. ‘Zoram Rahbi’ lehkhabuah hian hmuh tur a awm a. A chhiar zauna pawh tangkai takin a hmang a. Tute emaw anga, chhiar zim si, sawi zau si a ni lo.

Entreprenuer tha ni tura mamawh hrang hrang a awm a. Chung chu a lehkhabu thenhnihnaah hian a luh chilh a. Detail Project report siam dan thlengin a pho chhuak a. Mahniin a taka hman nghal mai theih a ni. Mi thenkhatin mi dang DPR an ziah sak a. Cheng nuai chuang fe ziah manah an laksak thin. Sawrkar hnathawkte pawhin DPR ziah dan hi hriat ve a tha khawp mai. Tute emaw ziah tur lova, mahnia ziah ve mai theih a ni. Sum luangrual tur tam tak kan veng him bawk a ni.

Eizawnna bultan turin engnge hriattur, Kan thil siam chhuah te hralhna tur lo zir chian lawk leh hriatchian lawk chungchang, khawl leh thil danga lo inruahman lawkna chungchang, thutlukna dik siam, thil man bithliahna leh hralhchhuah chungchang, sum leh pai vawnfai leh ziah fel (Commerce zirlai hoin ‘Book Keeping’ an tih thin kha), thil siam chhuah fun mawina chungchang leh sundawng leh sumdawng tur tana hriattur tam tak a. awm. Nu leh pa ten bul an tanpui theih avanga dawr hawng ve ngawt a, reilote a titawp leh ta maite kan tam viau. Sumdawnna khawvel hi tih mai mai a ni lo. Idea engemaw neih ringawt a tawk lo a. Phur thuta hmalak nghal ngawt a rem vek lo. Hriattur leh zir tur tam tak hlamchhiah chung chuan, hlawhtlin leh hlawhtlin rei a harsa. ‘Zoram Rahbi’ hian i mamawh tam tak a hrilh thei ang che.

Dawrnghak/sumdawng tam tak, tum hmuk mai, min melh tha peih lo reng reng an awm thin. Dawr an chakawm loh. Kan chhungkua pawh hian dawr duh tawh loh kan nei. Sumdawng mizia hi a awm ve. Mizo sumdawng tam tak chu, competition an neih loh avanga la tlachhe lo mai mai an nihna chen a awm. Khawvel thangzelah mihring kan pung a. Intlansiakna a sang zel anga. Mizo sumdawng tam tak chu, an la zuih ral ang. Thil dang tam takah fing fel mah se, an mize dikloh vang te pawh a ni ang. Zoram rahbi-a ‘Sumdawng mizia’ tihte hi chhiar an mamawh a ni.

A ziaktupa hi a hlawhchham zingin a che chhe zing. Printing lamah bul tanin DTP luhchilh hmasa pawl a ni a. Mau lama sumdawnna a kalpui a. Computer sumdawnna luhchilh hmasa a ni bawk. Chhan hrang hrang vangin a hlawhchhamin, a mumal lo zui nual. Hlawhchhamna leh hmathar lakna kawng pawha tawnhriat ngah tak a nih avangin mahnia sumdawn tumte chuan he lehkhabu hi chhiar makmawh a ni.