LAL ISUA ZUI MAN (the cost of discipleship – Bonheoffer thlirna)

“Tupawh a nu emaw, a pa emaw keimah aia hmangaih zawk chu, ka mi ni tlak a ni lo; tupawh a fanu emaw, a fapa emaw keimah aia hmangaih zawk pawh, ka mi ni tlak a ni lo. Tupawh a kraws pua mi zui lo chu, ka mi ni tlak a ni lo. Tupawh a nunna hmu chuan a chan ang a; keimah avanga a nunna chan chuan a hmu ang.” Mathaia 10:37-39

The Cost of Discipleship, Dietrich Bonhoeffer-a ziah hi a ngaihnawm em em mai a. Lehkhabu ropui a tling. A ziaktupa chanchin pawh a ngaihnawm. A hunlai kohhranin Hitler-a an do ngam lo te kha diklo a ti a. London atanga hawin, Hitlera do ngam kohhran awm chhun, Confessing Church pawh a din hial a. Lal Isua zirtirna anga sual a do avangin a nunna thlengin a chan phah ta hial zawk a ni. The Cost of Discipleship lekhabu hi tawitein I han thlir teh ang.

A BU CHHUNG THU TLANGPUI:

Mitinin hnathawh hrang hrang kan nei a, a then chu, sumdawng, a then sipai, a then kut hnathawk, a then roreltu- Lal Isua zui, a thu zawm tih hian kan tan engnge awmzia a neih ang. Tunlai khawvelah hian Lal isua khan eng angina nge awm se min duh ang? ‘Tlangchunga thusawi’ behchhan khan, Dietrich Bonhoeffer-a khan a chung a zawhna te khi he lehkhabuah hian a chhang a, a ngaihnawm hle.
Lal Isua zui man to zia sawiin, Lal Isua’n mi a kohin, “Lo kal la, thihna hmachhawn rawh” a ti a ni, tiin a ziak hial a ni.

He lehkhabu hi hlawm liah then a ni a, Hlawmkhatna chu ‘Khawngaihna leh zuitu nun’ a ti a. Hetah hian ‘Cheap grace’ leh ‘Costly Grace’ chungchang a sawi a. Cheap Grace chu simna tello inchhirna, Kohhran Inthunnuna ngai pawimawh miah loa kohhrana tel vena, Lal Isua zui tak tak tumlohna, kraws pu lo khawngaihna, Lal Isua thihna leh thawhlehna leh keimahnia a chenna tello khawngaihna, a nuam, hahdam leh keimahni mil zawnga thil herremna hi a ni a. (p. 45). Kum 80 vel bawr kal taa ziah ni mah se, vawiin thleng he thu hi a la dik a ni. Mizo Kristian tam takte chan pawh hi Cheap Grace hi a ni. “Chhandam tawh chu chhandam a ni reng” tih hmangsualin, zuitu nun hahdam kan thlang a. Kohhrana kan ngaihdan leh kohhran pawnlama kan ngaihdan a inletling thawk a. Kohhrana lucky ticket duhlo tuin, YMA-ah chuan, mihring ngai thoin lucky ticket kan buaipui leh tho si. “Costly grace” erawh chu, “Leia ro phum ruk; chumi chang tur chuan miin a neih zawng zawng a hralh phahna. Lungman tam, chumi man atana sumdawngin a bungrua a tihral vekna. Lal Isua thu zawm tlukna, Titlutu mit chu kher chhuahna, Lal Isua kohna avanga a sangha manna len lawng miin a kalsan chu a ni”, Bible-in khawngaihna a sawi tak tak, tuar tura kohna a ni ve thung. Mahni nun hial chan ngai a ni.

Chumi zawh chuan, Bonhoeffer-a chuan, Tlangchunga thusawi chungchang a khel chho zui ta a ni. Tawngtaina chungchang pawh sawiin, Pathian chu kan mamawh hre vektu a ni tih hrereng chunga dil tur a ni a ti (p. 165) Kristian nun chu, Thlarauin hmanraw awm thei ang zawng zawng hmanga tisa thilte a dona a ni, a ti. (p. 171). Chu induna chu hautak hle mah se, chutiang tura min kohna a nih avang chauh chuan, hnehtu kan ni thei a ni.

A then tawp ber dawttu hi “Thuchah kengtu”, tih a ni a. Matthaia 9:35-10:42, a sawizauna a ni a. Chanchintha hriltura kan mawhphurhna a chaina a ni. Pathian ringtu, Lal Isua thu kengtu kan nihna anga kan tawrh tur chu, chiang kek kawk takin a ziak a, “Nikin ni thlenga huat kan ni anga” “Sakhaw atchilh. Remna leh muanna tichhetu a sawi kan ni ang” (p. 215). Kan tawrh tur ang zawng zawng karah pawh, Bonhoeffer-a chuan, mihring chu hlau lo turin min ti a, Mihring kan la hlauh che u chuan, Pathian kan hlau tawk lo tihna a ni a, Pathian tih tak tak chuan, mihring a hlau tawh lo a ni a ti.

A thentawp berah chuan, kohhran chungchang sawiin, Ringtu mimal tinin Lal isua kan zuina kawnga kohhran mawhphurhna leh tihtur a sawi a. Kohhran chu Leia Lal Isua taksa hmuh theih a ni tih sawiin. (p. 259), he a ngaihdan vang hian kohhran inrelbawlna leh inthunna a dahsang em em a, Thu emaw thiltih emawa rinnaa kan unau a lo tlu a nih chuan, kohhranin thununna leh zilhhauna a lekkawh ngei tur a ni, a ti a ni. (p. 290). Kohhran chuan khawvel thilte a do ngam tur a ni a, ringtu kal dik lo, ram hot ulu ber pawh nisem a thununin a sawisel ngam tur a ni a ti a ni.

A ZIAKTU: Dietrich Bonhoeffer-a kha German pastor a ni a, rawngbawltu ropui leh huaisen zet mai a ni. Theologian thiam chungchuang a ni a, nazi vanglai hunah huaisen takin a dodalin a sawi sela, man a tawk a, an tihlum ta nghe nghe a ni. A lehkhabu ziak leh ama nun pawh hi a inhmeh hle a ni.

Bonhoeffer-a an tih hlum laia a mit lo hmutu chuan, hetia hian a sawi, “ Pastor Bonhoeffer-a chhuata  thingthi a, a thinlung leh tih tak zeta a tawngtai lai chu ka thlir reng a..CHu mihring duhawm tak mai tawngtai lai chuan, ka thinlung chhungril a fan vang vang mai a ni. Pathianin a tawngtai kha a lo ngaithla a ni tih amah khan a hrechiang e mem a ni Amah an tihhlumna hmunah pawh chuan, dawhsan a lawn hmain tawite a tawngtai leh a. Chumi hnu chuan, kailawnah chuan a pen chho a, zam hmel reng reng hi a pu lo a, muang dam dapa ke penin a hlau hauhlo a ni tih chu a chiang em em a ni. Reilote hnuah a thihna chu a lo thleng a. Kum 50 chhunga daktawr hna ka thawh chhungin, Chutiang reng renga Pathian kuta innghat pumhlum chunga thihna hmachhawntu chu ka hmu hauh lo a ni” tiin.

A thusawi hnuhnung ber chu, “Hei hi chu tawpna chu a ni ngei mai, ka tan erawh bultanna chuah a ni e” tih a ni.

Lal Isua kan zui avang hian kan neih, ro sum leh pai leh kan nunna hial pawh kan chan a tul thei a ni.

“I kristian nun khan, Ringlotute pawh Pathian an rinlohna a rinhleh tir hial tur a ni”

CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA

Kohhran Siamthatna kawnga thawhhlawk tawp thang, Kristian khawvela a hming hriat loh thianglo John Calvin-a khan, Lehkhabu ropui tak mai, “The Institute of Christian religion” tih a ziak a. A saptawng bu hi 2013 ni ta-in ka hria, OM Bookstore atangin ka lei.

He lehkhabu ropui hi tawitein I han thlir teh ang:
He lehkhabu 1536 khan Latin tawnga tih chhuah a ni a, 1541 khan French tawnga tih chhuah a ni.Hei hian, a hunlaia French literature khawvela an thuziah dan thuk takin a nghawng a ni. Tawng dang tam tak a lehlin a ni tawh a, Kristian khawvela lehkhabu chul theilo leh nep theilo a ni.

Institute hi bu liah then a ni a. Bung 80 a awm bawk. Siamtu, Tidamtu, Thlarau leh Kohhran tiin a then a. Pathian chungnunna, a khawngaihna leh Phulo misual a chhandamna chungchang a chai a ni ber tiin sawi ila a dik ang.

A BU TUM: Institue bu-a Calvin-a sawi hmasak ber hian, a bu thu hi a khaikhawm mai theih awm e. Mihring finna zawng zawng inthlunkhawmna chu, Pathian hriatna leh keimahni kan inhriatnaah hian a ni, tih hi. Pathian hriatna tak tak chu, Pathian thu chhiar leh zir atang chauhin kan nei thei a ni, tiin a sawi bawk.

THUPUI DANGTE: Pathian lehkhabu a thlir dan chu a chungah kan sawi tawh a. Pathian rorelna chungchang leh a kaihhruaina a sawi bawk a, Pathian chuan khawvel hi a enkawl a, kiltin a en vek a; Pathian hriatpui lohin engmah a thleng lo. Mihringte hian Pathian hnathawh dan hi kan hre fiah famkim tak tak ngai dawn lo. Mihring hian tha lam kawng a zawh emaw, sual lam kawng a zawh emaw, a tawpah chuan Pathian rorelna fing tak maiah chuan an lut tho tho dawn a ni a ti.

Adama avangin sual a lo awm a, sualin mihringte a bawhbet ta tlat a, chhandam ngai kan lo ni ta a, Lal Isua atang chauhin chhandamna hi kan nei thei a ni. Total DePravity-ah kan sawi zui ang.

Tlanna chungchang chu chipchiar zawkin Limted Atonement-ah kan sawi zui ang. Pre-destination pawh TULIP ah tawitein kan sawi zui ang.
Calvin-a hian Kohhran leh a rawngbawlna leh a thuneihna leh sakramen chungchang a chai bawk. Chip chiarin sawi lo ila, a hrilhfiahna leh thil dang chu, sakramen pahnih, Baptisma leh Lalpa zanriah a pawm tih sawi hram ila a tha awm e.

TULIP: Calvin-a zirtirna hi TULIP ti a khaikhawm thin a ni a, tawite tein kim chang lo takin lo sawi chhawng ila. Synod of Dort-in TULIP (Five points of Calvinism) hi a duan chhuah a ni a. Calvin-a zirtirna zawng zawng a ni lo a, a zirtirna tlangpui a ni, TULIP hian a ken.

TOTAL DEPRAVITY: Total Depravity hi chhe vek tawh, sual let der tihna ang deuh a ni. Calvin-a chuan a lehkhabu Insitute of Christian Religion chu “Pathianin a tira mihringa tha a dah/pêk chu sual avang chuan a chhia (corrupted) a, Amahin a thilpek (supernatural gift) pawh mihring atang chuan hlih fai leng (stripped) a ni” toon. “Supernatural gift hi rinna, felna, Pathian hmangaihna, thianghlim duhna te a ni a, hengte hi mihring chhungrilah hmuh tur a awm tawh lo a, a kuangbâng erawh tlêm a zawng a la awm hram a ni” tiin a sawi bawk. Finna leh thuthlukna siam kawngah pawh theihna tlem a la nei a, chungte pawh chu a chaklo em em mai a, thimah chiah a ni bawk. Mihring hriatthiamna te chu a chhe vek lo deuh a, tih chak loha a awm a, a then chu tihchhiat vek a ni, tiin Calvin-a hian a sawi bawk.A sawi zel dan chuan, Mihring duhthlan theihna chu tisa châknain a thunun a, mihringin a tha tihzawng tipuitling thei turin a chak tâwk tawh lo a ni, a ti bawk.

Bu  2-na, Bung 2-na, Then 6-naah chuan khawngaihnain mihring a pui a nih loh chuan chhia leh tha hriatna ringawt atangin mihringin thil tha a ti thei lo a ni, a ti a, thlante chuan khawngaihna bik (special grace) avangin siamtharna (regenaration) kaltlangin an ti thei a ni, a ti.

Continue reading CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA

And quiet flows the don (Don luiluang damdiai)

And Quiet Flows the Don emaw Quietly Flows the Don (1934) hi ‘Don epic ropui’ an tih thin zinga then hmasa ber a ni a, Mikhail Sholokhov a ziah a ni. Kum 1928 leh 1940 inkar khan chanchinbu-ah a indawta tih chhuah a ni a. Saptawnga he thawnthu lehlin chanve chu tuna a bu hming pu hian 1934 khan tih chhuah a ni.

Thawnthu Tlangpui:He thawnthu hian kum zabi 20 na tir lam, kum 1912 bawr vel, indopui pakhatna chhuah hma hreta , don luipui phai ruama khawsa thin Cossacks hnam ho chanchin a tarlang ber a. A thawnthu ruhrel hi Tatarsk-a Melekhov chhungkaw chanchinah a inthlungkhawm ber a, Anni chhunga hi an thlahtute cossack-te’n mi tam tak mak tih khawpin crimean war hunlaia Turks” tih hminglem an vuah sak nghe nghe. Hetiang a ni chung hian Tatarsk mipuite zingah chuan mi zah an kai hle thung. An fapa upa ber dawttu, Grigori Panteleevich Melekhov, chu sipia tha zet mai hi a ni a, an chhungkaw thian Tepan Astakov-a nupui Aksinia chu a ngai zawng ta tlat mai a. Anni nupa chu an inhmangaih miah lo a, stepan chuan a sawisa fo thin a. Grigori leh Aksinia te chu an ingai zawng satliah mai a ni ta lo a, an tlan dun ta nghe nghe a. Chu chuan a pasal leh malekhov chhungkaw inkarah inhuatna thuk tak a thlen tir a.He an inngaihzawnna boruak leh, Khawvel indopui leh tual chhung buaina lo chhuak chhoin Cossacks tlangval tha tha Russia rama indopui rapthlak ber pahniha a hnuhluh chhoh dan te chua thawnthu innghahna a ni. A thawnthu a changtute chettlatna chu Austro-Hungarian front ah a peng chho a, hetah hian Grigory chuan Stepan-a nunna chu a chhanchhuak nghe nghe a; heti chung hian an inhuatna chua reh chuang lo a ni. Grigory chuan a pa nawrna angin nupui atan Natalya a nei a, mahse, Aksinia chu a la hmangaih tlat avangin a hlim chuang lo a ni.

Grigory Melekhov hi Veshenskaya-a cossacks pa pahnih, Pavel Nazarovich Kudinov leh Kharlampii Vasilyevich Yermakov te, Upper don a Bolshevist laka helnaa mi pawimawh tak tak te nun behchhanin solokhov hiana din a ni.

He novel hian 1941 khan Stalin Prize a dawng a, a ziaktupa hian 1965 khan Nobel Prize a dawng nghe nghe. He novel hi tum thum zet filma siam a ni tawh nghe nghe. A film hmasa ber phei chu 1931 khan tih chhuah a ni daih tawh a ni. Thenkhat erawh chuan, he novel hi Tolstoy-a ‘War and peace’ atana Solokhov-a’n a entawn an ti a.

Mizo tawng pawhin kan nei a, ‘Don Lui luang dam diai’ tia lehlin a ni a, a bu hi hmuh tur a awm tawh lo thung niin a lang.

He thawnthu ziaktupa Mikhail Aleksandrovich Sholokhov hi May 11 1905 khan a lo piang a, February 21, 1984 khan a thi. Russian Novelist hmingthang ber te zinga mi a ni a, kum 1965 Nobel Prize in Literature a dawng.Amah hi Cossacks ho chenna hmuna piang leh sei lian a ni a, a thawnthuteah pawh hian cossacks hnam te nunphung leh an chenna ram chanchin chu a tarlang nasa hle nghe nghe a ni.A kut chhuak ropui ber And Quiet Flows the Don, khawvel huapa lar tirtu chu amah ngaina lotuite chuan 1920-a thi ta, cossack mi dik tak, Fyodor Kryukov, Anti-Bolshevik ni bawk ziak a ruk niin an sawi a, hei hi a dik lo a ni tih finfiah a ni leh ta tho.
Don Luipui chu: Solokhov-a thawnthu hmingputu Don hi Russia rama luipui lianberte zinga mi a ni a. Moscow chhim chhak, tula khua atanag chhim chhak lam km 60-a hla Novomoskovsk -ah hnar a nei a, Km 1,950 zeta thui a luan hnuah Azov tupuiah a luang lut ta a ni.

Mikhail Aleksandrovich Sholokhov : Russian thawnthu ziaktu ropui Mikhail solokhov-a kha May 11 1905 khan a piang a, February 21, 1984-ah a thi. Kum 1965 Nobel Prize in Literature a dawng a. Cossacks ram chhungah, Rostov-on- Don huam chhuanga piang a ni. Rostov-on-don hi Don luipui kam a khaw lian bera ni. Virgin soil upturned tih kum 28 chhung zeta ziah chuan Lenin Award a hlawhchhuah sak bawk.Cossacks hnam chungchangah thawnthu tam tak a izka, Don luipui behchhan thawnthua nei nual bawk. Russia rama thuziaktu a hrinchhuah ropui berte zinga mi a ni. Politics lamah pawh a inhmang thin hle a, President Kruschev-a zin pawh a zui fo a. Association of Soviet Writers-ah vice president te pawh a lo ni tawh thin. A kutchhuakte hi film-a siam a ni nual hlawm a, hlawhtling tak tak a awm.

Don thawnthu hi ka thawnthu chhiar tawhah chuan ka lung ti leng ber pawl a ni.

MIZO LEHKHABU THAR- LAISUIH BU HNIHNA

Lehkhabu Hming: Laisuih Bu hnihna (Essay on Criticism)

Ziaktu: F. Lalzuithanga

Chhuah Kum: 2016

'Laisuih Bu hnihna' by F. Lalzuithanga
‘Laisuih Bu hnihna’ by F. Lalzuithanga

 

Vawiin (19.3.2016) Chhunah Chanmari, Aizawlah ka nau F. Lalzuithanga nen kan inhmu hlauh mai a. A lehkhabu thar “Laisuih bu hnihna” hi min pe ta a, ka lawm hle mai.

Ama sawi dawn takin hemi lehkhabu hi, “Critical Writing hlang” a ni.

A lehkhabu hi then thumah thenin, thenkhatah hian Thuziak panga zel a awm a, a vaiin Thuziak 15 a awm tihna a nih chu.

Hetiang hian a lehkhabu chu a thendarh a…

Then Khatna: Ngaihdan (Theory and Criticism)

  1. Literature Khawvel
  2. Literature Kawtchhuah
  3. Critic leh a hna (Pilat & Gabatha Theory)
  4. Mizo Literary criticism leh book review
  5. Literary Criticism hnathawh leh Mizo Literature a a pawimawhna

Then Hnihna: Thlirna (Poetry and Criticism)

  1. Hlakungpui Awithangpa
  2. R.L. Kamlala hla thlirna
  3. Lalzuahliana Poetry thlirna
  4. Objective Correlative leh Rokunga ‘Chhawrpial Run’
  5. Escapism in Zikpuii Pa, Zirsangzela Hnamte & R.L. Thanmawia’s Poetry

Then Thumna: Bihchianna (Fiction and Criticism)

  1. Zikpuii Pa ‘ Nunna Kawng Thuampuiah’
  2. James Dokhuma ‘Khawhar In’ nge ‘Luahloh Lungdi’ zawk?
  3. Zara ‘Kan Thirsakawr’ bihchianna
  4. Lalpekkima ‘Taunu Zawlaidi’ bihchianna
  5. C. Thuamluaia ‘Utopian Novel’ bihchianna