LAL ISUA ZUI MAN (the cost of discipleship – Bonheoffer thlirna)

“Tupawh a nu emaw, a pa emaw keimah aia hmangaih zawk chu, ka mi ni tlak a ni lo; tupawh a fanu emaw, a fapa emaw keimah aia hmangaih zawk pawh, ka mi ni tlak a ni lo. Tupawh a kraws pua mi zui lo chu, ka mi ni tlak a ni lo. Tupawh a nunna hmu chuan a chan ang a; keimah avanga a nunna chan chuan a hmu ang.” Mathaia 10:37-39

The Cost of Discipleship, Dietrich Bonhoeffer-a ziah hi a ngaihnawm em em mai a. Lehkhabu ropui a tling. A ziaktupa chanchin pawh a ngaihnawm. A hunlai kohhranin Hitler-a an do ngam lo te kha diklo a ti a. London atanga hawin, Hitlera do ngam kohhran awm chhun, Confessing Church pawh a din hial a. Lal Isua zirtirna anga sual a do avangin a nunna thlengin a chan phah ta hial zawk a ni. The Cost of Discipleship lekhabu hi tawitein I han thlir teh ang.

A BU CHHUNG THU TLANGPUI:

Mitinin hnathawh hrang hrang kan nei a, a then chu, sumdawng, a then sipai, a then kut hnathawk, a then roreltu- Lal Isua zui, a thu zawm tih hian kan tan engnge awmzia a neih ang. Tunlai khawvelah hian Lal isua khan eng angina nge awm se min duh ang? ‘Tlangchunga thusawi’ behchhan khan, Dietrich Bonhoeffer-a khan a chung a zawhna te khi he lehkhabuah hian a chhang a, a ngaihnawm hle.
Lal Isua zui man to zia sawiin, Lal Isua’n mi a kohin, “Lo kal la, thihna hmachhawn rawh” a ti a ni, tiin a ziak hial a ni.

He lehkhabu hi hlawm liah then a ni a, Hlawmkhatna chu ‘Khawngaihna leh zuitu nun’ a ti a. Hetah hian ‘Cheap grace’ leh ‘Costly Grace’ chungchang a sawi a. Cheap Grace chu simna tello inchhirna, Kohhran Inthunnuna ngai pawimawh miah loa kohhrana tel vena, Lal Isua zui tak tak tumlohna, kraws pu lo khawngaihna, Lal Isua thihna leh thawhlehna leh keimahnia a chenna tello khawngaihna, a nuam, hahdam leh keimahni mil zawnga thil herremna hi a ni a. (p. 45). Kum 80 vel bawr kal taa ziah ni mah se, vawiin thleng he thu hi a la dik a ni. Mizo Kristian tam takte chan pawh hi Cheap Grace hi a ni. “Chhandam tawh chu chhandam a ni reng” tih hmangsualin, zuitu nun hahdam kan thlang a. Kohhrana kan ngaihdan leh kohhran pawnlama kan ngaihdan a inletling thawk a. Kohhrana lucky ticket duhlo tuin, YMA-ah chuan, mihring ngai thoin lucky ticket kan buaipui leh tho si. “Costly grace” erawh chu, “Leia ro phum ruk; chumi chang tur chuan miin a neih zawng zawng a hralh phahna. Lungman tam, chumi man atana sumdawngin a bungrua a tihral vekna. Lal Isua thu zawm tlukna, Titlutu mit chu kher chhuahna, Lal Isua kohna avanga a sangha manna len lawng miin a kalsan chu a ni”, Bible-in khawngaihna a sawi tak tak, tuar tura kohna a ni ve thung. Mahni nun hial chan ngai a ni.

Chumi zawh chuan, Bonhoeffer-a chuan, Tlangchunga thusawi chungchang a khel chho zui ta a ni. Tawngtaina chungchang pawh sawiin, Pathian chu kan mamawh hre vektu a ni tih hrereng chunga dil tur a ni a ti (p. 165) Kristian nun chu, Thlarauin hmanraw awm thei ang zawng zawng hmanga tisa thilte a dona a ni, a ti. (p. 171). Chu induna chu hautak hle mah se, chutiang tura min kohna a nih avang chauh chuan, hnehtu kan ni thei a ni.

A then tawp ber dawttu hi “Thuchah kengtu”, tih a ni a. Matthaia 9:35-10:42, a sawizauna a ni a. Chanchintha hriltura kan mawhphurhna a chaina a ni. Pathian ringtu, Lal Isua thu kengtu kan nihna anga kan tawrh tur chu, chiang kek kawk takin a ziak a, “Nikin ni thlenga huat kan ni anga” “Sakhaw atchilh. Remna leh muanna tichhetu a sawi kan ni ang” (p. 215). Kan tawrh tur ang zawng zawng karah pawh, Bonhoeffer-a chuan, mihring chu hlau lo turin min ti a, Mihring kan la hlauh che u chuan, Pathian kan hlau tawk lo tihna a ni a, Pathian tih tak tak chuan, mihring a hlau tawh lo a ni a ti.

A thentawp berah chuan, kohhran chungchang sawiin, Ringtu mimal tinin Lal isua kan zuina kawnga kohhran mawhphurhna leh tihtur a sawi a. Kohhran chu Leia Lal Isua taksa hmuh theih a ni tih sawiin. (p. 259), he a ngaihdan vang hian kohhran inrelbawlna leh inthunna a dahsang em em a, Thu emaw thiltih emawa rinnaa kan unau a lo tlu a nih chuan, kohhranin thununna leh zilhhauna a lekkawh ngei tur a ni, a ti a ni. (p. 290). Kohhran chuan khawvel thilte a do ngam tur a ni a, ringtu kal dik lo, ram hot ulu ber pawh nisem a thununin a sawisel ngam tur a ni a ti a ni.

A ZIAKTU: Dietrich Bonhoeffer-a kha German pastor a ni a, rawngbawltu ropui leh huaisen zet mai a ni. Theologian thiam chungchuang a ni a, nazi vanglai hunah huaisen takin a dodalin a sawi sela, man a tawk a, an tihlum ta nghe nghe a ni. A lehkhabu ziak leh ama nun pawh hi a inhmeh hle a ni.

Bonhoeffer-a an tih hlum laia a mit lo hmutu chuan, hetia hian a sawi, “ Pastor Bonhoeffer-a chhuata  thingthi a, a thinlung leh tih tak zeta a tawngtai lai chu ka thlir reng a..CHu mihring duhawm tak mai tawngtai lai chuan, ka thinlung chhungril a fan vang vang mai a ni. Pathianin a tawngtai kha a lo ngaithla a ni tih amah khan a hrechiang e mem a ni Amah an tihhlumna hmunah pawh chuan, dawhsan a lawn hmain tawite a tawngtai leh a. Chumi hnu chuan, kailawnah chuan a pen chho a, zam hmel reng reng hi a pu lo a, muang dam dapa ke penin a hlau hauhlo a ni tih chu a chiang em em a ni. Reilote hnuah a thihna chu a lo thleng a. Kum 50 chhunga daktawr hna ka thawh chhungin, Chutiang reng renga Pathian kuta innghat pumhlum chunga thihna hmachhawntu chu ka hmu hauh lo a ni” tiin.

A thusawi hnuhnung ber chu, “Hei hi chu tawpna chu a ni ngei mai, ka tan erawh bultanna chuah a ni e” tih a ni.

Lal Isua kan zui avang hian kan neih, ro sum leh pai leh kan nunna hial pawh kan chan a tul thei a ni.

“I kristian nun khan, Ringlotute pawh Pathian an rinlohna a rinhleh tir hial tur a ni”

CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA

Kohhran Siamthatna kawnga thawhhlawk tawp thang, Kristian khawvela a hming hriat loh thianglo John Calvin-a khan, Lehkhabu ropui tak mai, “The Institute of Christian religion” tih a ziak a. A saptawng bu hi 2013 ni ta-in ka hria, OM Bookstore atangin ka lei.

He lehkhabu ropui hi tawitein I han thlir teh ang:
He lehkhabu 1536 khan Latin tawnga tih chhuah a ni a, 1541 khan French tawnga tih chhuah a ni.Hei hian, a hunlaia French literature khawvela an thuziah dan thuk takin a nghawng a ni. Tawng dang tam tak a lehlin a ni tawh a, Kristian khawvela lehkhabu chul theilo leh nep theilo a ni.

Institute hi bu liah then a ni a. Bung 80 a awm bawk. Siamtu, Tidamtu, Thlarau leh Kohhran tiin a then a. Pathian chungnunna, a khawngaihna leh Phulo misual a chhandamna chungchang a chai a ni ber tiin sawi ila a dik ang.

A BU TUM: Institue bu-a Calvin-a sawi hmasak ber hian, a bu thu hi a khaikhawm mai theih awm e. Mihring finna zawng zawng inthlunkhawmna chu, Pathian hriatna leh keimahni kan inhriatnaah hian a ni, tih hi. Pathian hriatna tak tak chu, Pathian thu chhiar leh zir atang chauhin kan nei thei a ni, tiin a sawi bawk.

THUPUI DANGTE: Pathian lehkhabu a thlir dan chu a chungah kan sawi tawh a. Pathian rorelna chungchang leh a kaihhruaina a sawi bawk a, Pathian chuan khawvel hi a enkawl a, kiltin a en vek a; Pathian hriatpui lohin engmah a thleng lo. Mihringte hian Pathian hnathawh dan hi kan hre fiah famkim tak tak ngai dawn lo. Mihring hian tha lam kawng a zawh emaw, sual lam kawng a zawh emaw, a tawpah chuan Pathian rorelna fing tak maiah chuan an lut tho tho dawn a ni a ti.

Adama avangin sual a lo awm a, sualin mihringte a bawhbet ta tlat a, chhandam ngai kan lo ni ta a, Lal Isua atang chauhin chhandamna hi kan nei thei a ni. Total DePravity-ah kan sawi zui ang.

Tlanna chungchang chu chipchiar zawkin Limted Atonement-ah kan sawi zui ang. Pre-destination pawh TULIP ah tawitein kan sawi zui ang.
Calvin-a hian Kohhran leh a rawngbawlna leh a thuneihna leh sakramen chungchang a chai bawk. Chip chiarin sawi lo ila, a hrilhfiahna leh thil dang chu, sakramen pahnih, Baptisma leh Lalpa zanriah a pawm tih sawi hram ila a tha awm e.

TULIP: Calvin-a zirtirna hi TULIP ti a khaikhawm thin a ni a, tawite tein kim chang lo takin lo sawi chhawng ila. Synod of Dort-in TULIP (Five points of Calvinism) hi a duan chhuah a ni a. Calvin-a zirtirna zawng zawng a ni lo a, a zirtirna tlangpui a ni, TULIP hian a ken.

TOTAL DEPRAVITY: Total Depravity hi chhe vek tawh, sual let der tihna ang deuh a ni. Calvin-a chuan a lehkhabu Insitute of Christian Religion chu “Pathianin a tira mihringa tha a dah/pêk chu sual avang chuan a chhia (corrupted) a, Amahin a thilpek (supernatural gift) pawh mihring atang chuan hlih fai leng (stripped) a ni” toon. “Supernatural gift hi rinna, felna, Pathian hmangaihna, thianghlim duhna te a ni a, hengte hi mihring chhungrilah hmuh tur a awm tawh lo a, a kuangbâng erawh tlêm a zawng a la awm hram a ni” tiin a sawi bawk. Finna leh thuthlukna siam kawngah pawh theihna tlem a la nei a, chungte pawh chu a chaklo em em mai a, thimah chiah a ni bawk. Mihring hriatthiamna te chu a chhe vek lo deuh a, tih chak loha a awm a, a then chu tihchhiat vek a ni, tiin Calvin-a hian a sawi bawk.A sawi zel dan chuan, Mihring duhthlan theihna chu tisa châknain a thunun a, mihringin a tha tihzawng tipuitling thei turin a chak tâwk tawh lo a ni, a ti bawk.

Bu  2-na, Bung 2-na, Then 6-naah chuan khawngaihnain mihring a pui a nih loh chuan chhia leh tha hriatna ringawt atangin mihringin thil tha a ti thei lo a ni, a ti a, thlante chuan khawngaihna bik (special grace) avangin siamtharna (regenaration) kaltlangin an ti thei a ni, a ti.

Continue reading CALVIN-A LEHKHABU ROPUI, ‘THE INSTITUTE OF CHRISTIAN RELIGION’ THLIRNA

DOCTRINES THAT DIVIDES

Erwin Lutzer-a’n lehkhabu ngaihnawm tak mai, ‘Doctrines that Divides’ tih hi a ziak a. Mite thenhrangtu thuhrin tihna a ni mai. A bu kawm hnungah chuan, he thu hi an ziak a

“Thurin hi kristian nuna pawimawh tak mai a ni a, Chutiang a nih lai chuan, thurin thenkhat chuan kum za tam kohhran a lo thenhrang tawh a ni. Tunlai hian mi tam tak chuan, Pathian thu pawmdana danglamna chi hrang hrang awm chu hmuhkanin, inunauna an tlangau pui a. Lutzer-a chuan, chung ngaihdan inkawkalh leh inkawlkalh tak tak te chu thlirnawnin, engvanga chutiang ngaidah inang lo chu lo awm nge a nih a, engnge a awm a tulna chhante chu a rawn sawi chhuak a ni” tih hi.

Kristianna Chanchin kan thlir kir chuan, Isua thih hnu reiloteah khan, Zirtirna chi dangin kohhran hmasa kha a tibuai nghal a. Chanchintha Bute ziaka an dahna chhan pawh kha, chu chu a ni ve pakhat. Isua mihrinna paihthla thakte, Isua Pathianna paihthla thakte leh ngaihdan hrang hrang a tam khawp a. Zirtirte an han thi zo a, a hnu lawkah Isua-a inchhal ta maite an lo pung a. Mizoramah pawh Isua-a inchhalta maite thlengin kan nei ve a nih hi. Hun inher ang zelin zirtirna hrang hrang a lo chhuak a. A then chu a reh leh mai a, a reh leh lem lo, a elpui zirtirna nena kalthiangta reng pawh a awm bawk. Chumi avang leh thil dang avangin kohhran hrang hrang a lo chhuak thin bawk.

Chung Kristian thurin langsar zual leh inhnialna langsar zualte chu, Lutzer-a chhuikirin, he lehkhabuah hian a chai ta a ni.
He lehkhabu-ah hian Bung 13 a awm a, chungte chu
1. Isua kha Pathian a ni tak tak em?
2. Isua kha mihring a ni tak tak em?
3. Mari Kha Pathian Nu a ni em?
4. Peter-a kha pope hmasa ber a ni em?
5. Thiamchantirna: Rinna hmangin, sakramen hmangin, a pahnihin?
6. Engvanginnge Lalpa Zanriah chungchangah kan inlungrual theih loh?
7. Engvanginnge Baptisma chungchangah kan inlungrual theih loh?
8. Bible-ah hian lehkhabu engzat nge awm?
9. Ruatlawk nge Zalenna duhthlan: Augustine vrs Pelagius
10. Ruatlawk nge Zalenna duhthlan: Luther vrs Erasmus
11. Ruatlawk nge Zalenna duhthlan: Calvin vrs Arminius
12. Ruatlawk nge Zalenna duhthlan: Whitefield vrs Wesley
13. Chhandamna bo thei nge bo thei lo?
A bung maltete han en pawhin, a thuchai pawimawh zia leh puithu tur zia chu a hriatthiam theih awm e. Vawiin thlenga ringtu kohhran hrang hrangte kan la inhnial luih luihna a ni hlawm.

Continue reading DOCTRINES THAT DIVIDES

THLAMUANTU THLARAU THIANGHLIM LEH KRISTIAN HMASATE

Lal Isua khan, a zirtir te hnenah, Khawvel a chhuahsan anga, Thlamuantu tur an lo kal dawn a ni tih kha a hrilh a. Chu chu thlarau thianghlim a sawina a ni. John 14:16, 26; 15:26; 16:7-ah te hian Thlarau Thianghlim chungchang thu chu kan hmu a ni.

Thlamuantu Thlarau Thianghlim tirh a nih tur hi, Joahna 13:3-Johana 16:28 inkar thuah hian kan hmu a. Fapa chu Pa atanga lo kal a , zirtirte hnena a awm ang bawkin, Thlarau thianghlim pawh Pa atanga lo kalin, zirtirte hnenah a awm ve bawk dawn a ni. Thlarau thianghlim Hnathawh chu, chaklote fuih harh a, mamawhtute tanpuia, thlamuantu a ni.

Thlarau thianghlim Nihna hrang hrangte lo sawi hmasa ila:
1. Thlarau thianghlim hi mi nung a ni a. Grik Tawng Thuthlung Thar buahte phei chuan Thlarau Thianghlim sawina atan hian mipa sawina tawngkam hman a ni.
2. Thlarau Thianghlim chu mihring anga mize nei a nih thu Bible hmun tam takah kan hmu. Mihring hnathawh leh thiltih angte ti ve a sawi a ni bawk.
3. Thlarau Thianghlim chu minung a ni satliah mai lo a, Pathian a nih thu Bible-in min hrilh.
4. Thlarau Thianghlim chu Pa leh Fapa ata lo chhuak a ni. Lal Isuan, “Thlamuantu, Thlarau Thianghlim, Pain ka hminga a rawn tirh tur” Johan 14:26 tih emaw, “Pa Hnen ata thlamuantu in hnena ka tirh tur, Paa chhuak Thlarau dik tak chu” Johana 15:26 tihte Bible-ah kan hmu a. Hemi chang behchhan hian, Constantinople Inkhawmpuiin, “Thlarau thianghlim chu Pa ata lo chhuak a ni e”, tiin a rel ta bawk a ni. Hemi hma hian, Khawchhak kohhran phei chuan a lo pawm daih tawh a ni.

THLAMUANTU THLARAU THIANGHLIM HNATHAWH:
1. Sual thu leh fel thuah thiam loh a chantir ang.
Sual thuah thiamloh a chantir ang tih hi mi sual an nih a hriattir anga, an simlohva, an rinloh chuan thiamloh an chang ang tihna a ni.

Thuthlung Hluia hman dan lar takah chuan, ‘Fel’ emaw, ‘felna’ emaw tih chu, Pathian nena inzawmna dik sawina tawngkam a ni. Isua Kraws chu mihringte tana Pathian rorelna hmun a ni a. Mihring-in a thiamloh zia a hriatchianna ber chu Isua kraws-ah a ni. Thiam a chan leh theihna hmun awm chhun a ni bawk. Kraws chu Isuan mi sualte tana felna kawng zawng zawng a hlen chhuahna hmun a ni a, mi sualten Pathian hnen an thlen theihna kawng awmchhun a ni bawk. Chumi hmu thiamte chuan Pathian chhandamna an chang thin a ni. Heng zawng zawng hi Pathian Thlarau Thianghlim hnathawh vek a ni.

2. Rorel thuah thiam loh a chantir ang.Rorelna hnuhnungah chuan Pathian thu awihlote’n thiam loh an chang. Krawsa Pathian hmangaihna lo lang hmu thiam apiang chuan thiam an chang ang. Kraws hmuthiam lo chu tun thlengin thiam loh changin an la awm zel a ni. Kalvari tlanga kraws zara thiam channa hi Thlarau Thianghlim hnathawh zara kan neih a ni.

3. Thu Taka hruailutin Krista a chawimawi ang. Thlarau chu thutak puang chhuaktu a ni a. Thlarau Thianghlim min hruailuhna tur chu Isua Krista-ah a ni. Thlarau eng pawh, eng anga thiltithei leh ropui pawh nise, Isua Krista hnena min hruaithleng lo chu, Thlarau Thianghlim a ni lo. Lal Isuan uar tak maiin, “Thutak zawng zawngah a hruai lut ang che u” a ti a ni.

KOHHRAN TIAK TIRA TANA A HLUTNA
1. Chanchin Tha a darh. Pentikos ni atang khan ringtute nunah Missionary rilru a lo awm a, a lo thianglian zelin kohhran hmasa tinungtu leh ti chaktu pawimawh tak a lo ni ta zel niin a lang. Pentikos nia Thlarau Thianghlim harhna lo thleng kha Jentail-te zingah Juda Kristian ten an kengdarh. Hetianga Thlarau Thianghlim hnathawh jentailte zinga lo thleng ve ta zel an hmuh hian ringtu hmasate chuan missionary rilru an pu nghet sauh sauh a, kar loah Rom lalram pum puiin Chanchin Tha an lo dawng thei ta a ni.

2. Kohhran leh a rawngbawlna a thang. Thlarau Thianghlim hi kohhran leh a rawngbawlna tinungtu leh nasa taka tihmasawntu a nih avangin kohhran tiak tir tan a hlu em em a ni. Pentikos harhna rah kohhranho lo pun zel dan hi ngaihnawm takin Luka chuan Tirhkohte Thiltih buah khan a ziak a ni. Vawiin thlenga kohhran rawngbawlna thuang thum, thuhril, tihdam leh zirtir hna hi Thlarau thianghlim leh Tirhkohte lungphum chunga inrem a ni.

Pentikos niah pawh, mi 120 emaw chauh inpawlkhawm thin kha, a sangtelin an lo pung ta thut mai a. A hnuah pawh vahchap kang ang duai duaiin ram a zau ta zel a nih kha.

3. Pathian thu hriatna leh nghehna. Pathian thu hriatna leh rinna kawnga nghehna leh thanzelna hi Thlarau thianghlim hnathawh a ni. Pentikos harhna chuan ringtu hmasate chu Pathian thu hriat chakin a ti tuihal a, an hriatte puanchhuah chakna a neih tir bawk. Lal Isua thuhril ngaithla thinte khan an hril chhawng ve ta zel a, an thucchah laimu ber pawh Lal Isua leh a chanchin a ni. Tirhkohte chuan fiah leh awihawm taka an sawi zel avangin, Pathian thu an hriatthiam dan pawh a lo thang ve zel bawk a ni.

4. Ringtute a ti huaisenin a ti pumkhat. Lal Isua an man leh Pentikos ni inkarah kha chuan Ringtu hmasate kha hlau reng rengin an khawsa a. Pentikos a lo thlen meuh chuan tih huaisenin an lo awm ta a ni. Kohhran hote pawh ringtute huaina atana tawngtaiin, harsatna leh tihduhdahna hnuaiah pawh huai takin, thihthlengin Pathian tan an rinawm thei ta a ni.

References:
1. Zairema. Chanchintha Johana ziak hrilhfiahna. Aizawl: Synod Bookroom, 1974
2. Tlanghmingthanga, Rev.Dr. Thlarau Thianghlim. Aizawl: Synod Literature and Publication Board, 2015.
3. Vanlalauva,H. “Thlarau thianghlim hi engnge ni?” Didakhe 13/3 (may-June, 1984):2-12
4. Hendrickx, Herman. The Johanine Community. Theology Annual vol. 12 1990-1991 p.167-180