KA SIKUL NAUPANG HRIAT VE TE

Taiwan ramah kan zin a. Ni e, kan zin ve miau. Sawi tur tam tak ka nei. An ram thingthlang khaw pakhat, Smangus khuaa sikul naupangte chauh kha ka han sawi teh ang.

Chumi hmain, Smangus khaw chungchang tawite. Tayal hnamte khawsakna hmun a ni a. In 35 chauh an ni a, mihring 100 chuang awrh an ni. 1924 vel atangin an khua hi a awm tawh a. Pa leh thei rahte an zuar a. 1995 atangin Motor a lut a. Pawnlamah eizawnna an zawng lo thei lo a. An thalaite an vak chhuak a. An hnam zia an hloh zel a. An lal chuan ngaihtuahna pakhat a nei a, an hnam ze humhimna leh an khaw tan, an khua chu Eco Tourism lam a kalpui ta a. Tunah chuan kum khatah an khuain Us Dollar nuai 7-an la lut pha tawh.

An khuaah hian naupang an awm ve nial a. An khaw thenawmah sikul an kal thin a. Nikhat kal a ni. Chumi avang chuan, an sikul chu thawhlehniah an tan thin. Kein an kal mai thin a. Inrinni-ah an khuah an haw leh thin a. Inrinni tlaiahte a lian deuh tawh chuan, restaurant-ah hna thawkin an sikul senso te an intuak bawk thin a ni.
Inrinni tlaiah an khaw restaurant pakhatah pawh, naupang kum 8 mi bawr vel awm hi thleng seng leh khualzinte ei tur dawhkana va chhawpin an tei ve reng a. Engnge a chhan kan han zawh chuan, “ An sikul zirna senso tur an phak ang tawkin an intuak ve a nih hi,” an ti.

An khuaa mi kum 18 tling tawh chin chuan, hna an thawk vek a. An thawhtur an insem vek a. Tumah an awl lo. An sum lakluhte hi zat leh zatin an insem vek. An khaw lal pawh a awl bik lo a, hna thawkin a hah ve em em reng a ni. An khaw lal hian, Taiwan sawrkarin Dollar maktaduai 50 pek a tum chu a hnawl thak ngam a ni. “Min ti chhe mai mai ang” a ti.

Tlangchhipa restaurant-ah zanriah kan kil a. Naupang pakhatin, Chinese tawngin mi lo bia a. Chinese tawng ka thiam lo e, English-in min be ta che ka tih chuan, “E! Chinese I thiam turah ka lo ngai a” a ti vei thlap a. “Khawi atanga lo kal nge I nih?” tiin min zawt zui a. “India atanga lo kal ka ni e” ka ti a. A nui hak hak a. “India atanga lokal I ni tih ka hre lo a lawm. Helai mi tho ni turah ka lo ngai che a” a ti vei reuh a. Min betu pa chu, a sikul senso tuaka inhlawh zinga mi a ni.

Keini chuan, kan fate, kan zirlai te hi engkim kan tihsak a. An thawh hma kan phal meuh lo han ti ila, kan peih loh vang a ni zawk ang. Kut Hnathawh hlutna te, mahni thawhchhuah ngei hlutna leh hlimawmna te zirtir leh zirchhuak loin kan kaihhruai a, Keini hian thil tam tak chan ta ni berin ka hria.

Engkimah hliahkhuh kan tum zawk a. Tulloah kan buai nileng a. kan fapa te aw te hi a no zo vek ta niin ka hre mai. Kan fate hian, an kum mil tawk khawvel hmachhawn sela. Khawvelah hian kan tlu thin a, kan khupte kan ti pilh a, kan hnarte a thi a, kan ban ruh te a pelh thin. Mahse, kan tho leh a, kan khup pilh a dam a, kan hnar thi a reh a, kan ban ruh pelh te pawh a dam leh mai a ni tih an zirte hi a ngai a.

Engkim tihsak thana seilian an nih chuan, khawvel hian engkim an tihsak tur emaw an ti a. Engtikah emaw anmahnia khawvel an hmachhawn hun a lo thleng lo thei lo a. Chungah chuan, an buai thin. An phun a, an rilru a na a. An hrehawm thin.

Ka sikul naupang hriat vete erawh kha chu, kein an sikul pan turin nilengin an kal a. Kartawp hunawlah pawh an sikul zirna senso tur an phak ang tawkin an tuak ve thin. An nu leh pate khan an senso tur kha an nei lo a ni lo a, an pe phal lo a ni hek lo.

TLABUNGAH INTHLAN

Tlabung bial hi Assembly Constituency ang zawng chuan, West Tuipui tih a ni a. Hemia Zonal officer tur hian Ni 26.11.2018 chawhnu lamah ka driver K. Malsawma leh ka PSO Lalhmingmawia nen kan kal a. Tlabung lam hi a tu amah kan la kal ngailohna a nih avangin kan zawt chawp thla a. Phairuang kai te chu Lungsen emaw te kan ti thla a. Tlabung peng kan hai avangin, Chhumkhum atangin peng ta lo chuan kan tlan tlang a. Lalnutui khua kan va thlenin, “Hei hi khawi khua nge?” te kan han ti he haw a. Tlabung lo lamah kan tlan tih min hrilh avangin kan let leh a. Hetiang velah hian darker hnih dawn chu kan paih awm e. Kawng an lo lai zal zau tha nasa si a, la metal lo mah se, kan lo tlan deuh vuk vuk mai a. Chawngte kan thleng lo chauh a ni ber mai e.

Lungsen peng kan va thlen leh chuan, congress ruaitheh haw hi motorah a khat tan tan hian an rawn in phur chho a. Sumo chungahte pawh an chuang. Khua a thim tawh si a. An accident ang tih pawh a hlauhawm fu. Lungsen thleng chu kawng chhia rau rau-ah a la zia hle. Lungsen atanga Tlabung lam kan tlan thla chu kawng a chhe tawh hle. Tuichawng kan han tlan pel chu ka rilru a na hle a ni. Chakma ho khawlaiah an lo vei sup sup a. Party flag lo intar tuarh a. Khawlaiah an lo awm khawm tulh tulh a. Engnge an tih ang tih chu a ngaihruat thiam theih. Chung chu lunglei atanga hnai te mai an ni. Chakma lo inhawngbi tup tup na chu.Kan ram dinhmun ka ngaihtuah a. Ka mittui a tla hial.Kawng chhe theihnghilh thaka ka rilru a han nat chu!

He hnam hmangaih hi a va han hahthlak em! A Beidawnthlak ngawih ngawihin ka hria.Mahse, he hnam tan hian tuin nge thawk chuang ang le.Ka fanu hi he rama thil thate ei a, he leilunga thlamuang taka seilian a, a chanvote chang tura ka duh si avangin he hnam hmangaih hi ka bansan thei si lo.Ka thlahte hian chhuang taka kan ram tihtur an la neihnana ka buatsaih angai si.

Km 30 chauh chu darkar hnih leh a chanve kan kal a. Tlabung chu dar 9-ah kan thleng thla a. Tlabung SDPO BM-a te inah chaw kan ei hnuin, kan riahna tura a lo tih fel sa, Forest Rest house lamah kan phei a. Zan kan riak a. Boruak a reh raih mai a. A nuam phian mai. Tlabung boruak lumin thlasik a hmuh tawh avangina lum tawh lem lo a, a nuam hle.

CHAKMA HO KA ZILH

Ni 27.11.2018 chuan Silgur, Diblibagh leh Tlabung Dintharah kan kal a.

Silgur kan kalna chhan hi, Critical Polling Station ECI-in a tih zinga mi a ni a. Tlabung atangin kan han zawt chawp leh pek a. Kawng an lo lai zau leh hluai mai a.Helai bialah hian nakinah nasa takin hmasawnna a la awm dawn tih a chiang a. Foreigner an pun hluai lohna turin sawrkarin hma a lak ngei chu a ngaiin ka ring. Silgur kal tur kha, Kawrpuichhuah kan zu thleng hial. Kawrpuichhuahah hian silgur khaw chakma pa a lo awm a, a lo chhoh ve duh avangin leh kawng kan hriat loh avangin kan phur tlang a.

Continue reading TLABUNGAH INTHLAN

KHUALZIN TITI

 

Khawvel hmasawnna reng reng hi, miin a inlum a chhuahsan a, a hriat ngailoh ram a chaun te, a ngaihtuah ngai loh a ngaihtuah te, ni danga a tih ngailoh a tih tharte hian a lo thleng chawk.

Mizote chuan Mizoram hi nuam kan ti khawp a. A nuam ve reng bawk a. Mahni inlum kan ngaina a, kan chhuak vak tam lo. Kan chhuah vah pawh hian, finna zawng turte hian kan chhuak tlem emaw a tih theih thin. A tam thei ang ber zin ila, ram pawnah hna thawk ila, mi titi ngaithla ila, kan ram chhungah kan hriatna leh kan tawnhriat leh hmuh te hawn ila, kan ngaihtuahna zauh belhin hma hi sawn ila ka ti thin.

Kei hi a chhuak vak tlem pawl tak ka ni a. Pawisa neih loh avangte, hun remchang neih loh vangte a ni thin. Ka remchan phawt chuan hmuh ngai loh hmuh a, hriat ngailoh hriatthar hi ka tum hram hram thin.

Sikkim leh West Bengal ( a bikin Darjeeling leh Siliguri)a kan zin thu ka sawi dawn a ni. A thui hma thin avangin tawite tein kan sawi dawn a ni.

Darjeeling: Guwahati Airport-ah kan naute’n motorin min lo lam a. Tlai dar 4 velah darjeeling kan pan a. Guwahati atang hian darjeeling hi km 500 chuang a ni a. Darkar 10 vel kal a ni. Kawng a tha tlangpui a. Darjeeling tlangram kan luhin kawng a tein, a kual a,  a chhe lai a awm nual. Chuti tih loh chu, kawng chu tha tak a ni.

Kan Mizoram kawng hi hetiang hi ni se, a ni ve thei reng bawk a, kan hmasawnna hi a zuanin a zuang ang. Darjeeling hi khawvar dawnah kan lut a. Darjeeling kan thlen hian zing dar 3 vel a ni a. Hotel kan han zawng ngial a, pakhat mah kan hmu lo. Lo booked sa tur a ni a, booked loa pakhat tal kan hmuh ka rin vei nen, pakhat mah a awm lo. Kawng sirah kan ding a, motorah kan muhil ta ringawt a.

Zing dar 6:00 velah kan harh a. Darjeeling-a hmun tlawh rem chang chang kan tlawh nghal a. Dawr tak hi an hawng har khawp mai a. Zing dar 10:00-ah pawh dawr hi an la hawng mumal lo a ni.

Darjeeling Tea Estate te, Himalayan Mountaineering Institute-ah te kan kal a. Himalayan Mountaineering Institute hi Edmund Hillary nena Mt Everest lawn chhuak, tenjing-a din kha a ni.  Darjeeling Himalayan railway, UNESCO world Hertigate Site kan tlawh bawk. 1879-1881 inkatra siam a ni a, New Jaipalguri leh Darjeeling inkarah a tlan.

Khawchhung kawng a zimin a chhuk chho hle a. Motora han tlan vel pawh a tlan ve ngailo tan chuan, buaithlak ve deuh tak chu a ni.

Darjeeling hian tlawhtu an ngah thin hle  nain, 1980 chho leh 2000 chhoa Politik lama an hmalakna leh buai leh innawr rup rupna thleng thin avangin tlawhtu an tlakhniam phah hle. Tun hnu erawh hi chuan a rawn kang leh ta deuh a, 2015 te phei chu, India ram tourist destination zinga google tu tam lamah pathumna a ni pha leh tawh a ni.

British hmun hlui a ni a, a boruak a thiang nuam ang renga tih lohah chuan tlawhtu a tam viau mai hi miin an ngainat laklawh vang mai mai niin ka hria.

Sikkim: Sikkim hi nuam kan ti hle. Teesra lui kamah kawng a kal zai zai a. A kawng a thawvengin a nuam. Kawng a lian lo na a, a tha a. Gangtok khawchhung tak erawh chu, a kawng a tein, traffic a Jam nasa. Ka hmuh phak ve chinah chuan, Mizoram tluka traffic discipline thatna hi a awm lo mai thei a ni.

Khualzin hip dan an thiam a, Sikkim hi khualzin pawh an ngah hle. Sikkim kan panna kawngah hian, Jharkhand atanga Sikkim pan tura road trip rawn neia chhungkua a rawn kal pawh kan hmu tel nghe nghe a ni.

Hotel Parasol-ah kan thleng a, kan haw dawn chuan a neitute hian thla min lakpui nghe nghe a ni.

Gangtok-ah hian he’ngte hi kan tlawh a

  1. Enchei Monastery– Buddhist monk ho awmna a ni a. 1840-a din a ni.
  2. Himalayan Zoological park: sahuan bul atang hian Motor lem, fan, bag, luhkhum, chemte, pen leh thingpui chhawpna ka lei.
  3. MG marg- Hetah hian motor luh an phal lo a. gangtok-a a pui lai ber a ni. MG marg kan luh tirh hian, hindu puithiam naupangte hian lehkhabu a lo zuar a. Meditation tih ka lei. A hnu lamah dawr pakhat atangin Sikkim: requiem for a Himalayan Mountain Kingdom tih leh The Book of Joy tih ka lei. Ka leina hi Kondoika a ni a. Sikkim thil an zuar nual khualzin tana
  4. Rope way-ah kan chuang
  5. Ganesh Tok- Hindu Temple
  6. Ban Jhakri Falls– hei hi tui kawhthla te takteah park nuam deuh mai sawrkarin a siam.

 

Sikkimah hian cham rei kan hman loh avangin kan duh ang pawh kan tlawh hman lo a. Kalkawnga UPC biak in thlenga hmuh tur a han awm kha, he state hi Buddhist state mah nise a lawmawm ve hrim hrimin ka hria. Sakhuana an tuipui bawk a, Ecclesiastical Affairs Department an nei ngat a ni.

Casino pawh a awm ve ngat a. Kan kal ta chiah lo na a, pawna duty te a kalphung erawh kan zawt chiam thung.

Sikkim-a an khualzin hmun tam tak hi anmahniin an siam chawp a ni. A boruakin mi a hip ve hrim hrim a. Tlawhtur an han siam belh bawk nen, an sum hnar tha tak mai a lo ni thei ta a ni. Mizote pawh hian hei hi kan theihlohna chhan tur hi a awm lo a, kan ngaihtuah peih tak tak lo nge mawni te ka ti thin. A ram leilung leh sik leh sa hi Sikkim hi zinchhan tlak a ni a. Ngaihtuahna seng thiam ila, khualzin kan hip lohna chhan tur hi ka hre biklo.

Siliguri: Gangtok atangin siliguri kan pan a. Coronation Bridge thlen hmain reife Traffic a jam. Kan siapi hruai Choudhury-an a ching fel.

Siliguri-ah hian ka pa Pro pastor thin, Rev.T. Lalthafamkima te an awm a.An awmna hmuh hi hatiadanga a ni. Ruah a erawh a sur nasa hle.  Haw pahin kan tlawh a, an inah zanriah kan ei a, kan ei khamin Rev. Tha-a a tawngtai a, Guwahati panin kan chhuak a. Tha-a te in kan chhuahsan hian zan dar 9:00 a ri tawh a ni.  Kawng peng atam lutuk avangin Google map-a kan en fe chung pawhin kan bo hrep mai.

 

A hnulamah Supply phur truck lian tam em em mai hi kan hmaah an tlan a, leh pelh sen pawh hi an ni mang lo hian a hriat. An tlanlohna lam kan la fuh hlauh a, harsatna nei lo leh tikhawtlaitu nei mang loin kan tlan tluang ta a ni.

Zing dar 7:45-ah Guwahati kan thleng leh. Ni 4.06. 2018-Ni 8.06. 2018 chhungin Guwahati-Darjeeling-Gangtok-Siliguri-Guawahti-Barpathar kan tuam hman a ni. Kilometre sang hnih chuang chu kan tuam tihna a nih chu.

KHAIKHAWMNA

  1. Tourism hi Darjeeling te, Sikkim te tana innghahna tak tak a tling. Khualzin hip tur leh hip reng turin hma an la a. An ram pian ken hrim hrim chauh thlir chuan, heti khawpa tlawhtu ngah tur an ni bik lem lo a. Tlawhtu ngahna turin hma an la thiam a. Darjeeling te pawh, Ni chhuah ruala Kanchengja thlir theihna lai tithe an tih lar a. Chutiang deuh chuan, Gangtok-ah pawh Bhan Jhakri Falls te pawh an siam chawp. Keini pawhin Mizoramah kan ti ve thei reng a ni. ILP chungchang pawh hei aia awlsam hiana tih theih.
  2. Kawng tha a pawimawh. Sikkim hi kawng a lian lo na a, kawng a tha viau.
  3. Hindi leh English-in an biak theih a, khualzinte tan a awlsam em em a ni. Titi pangai taka titi thei tura Hindi leh English lama tan kan lak deuh pawh a pawimawh a ni.
  4. Sikkim-ah hian sakhuana an la thutak hle. Ecclesiastical affairs Department an nei.
  5. Darjeeling hi zun in a tawp. An thingpui fe leh Tenjing Norgay-a avangin ka ngaina ve deuh mai mai niin ka hre ta ber. Gangtok erawh chu inhmun neih a, khawsak main an a chakawm khawp mai. Wineshop an nei ve tho. Hmeichhe zu lei lai pawh kan hmu. Zalen takin zan thimah hmeichhia mahniin an kal nelh nelh kan hmu.
  6. 16th May, 1975-a India rama lut ve chauh si, an Indian em em mai hi a mak ka ti ang reng a. Indian lutuk lo ho ka kawm fuh lo pawh a ni mai thei. An Indian han tih hian, India ram miah an inpawm nghet a, an nun zia erawh an hloh lo hle niin a lang.

 

Sawi zau tur tam hle mah se, a tlangpui zawr zawrah hian duhtawk teh ang. Hriatrengna atanga a bo pil mailohna turin ka han ziak leh hnuhnawh a ni. A sawi zau tur dang hi chu phur hun atan khek tawh mai ang.

DIMAPUR LAM

Mizote hian Dimapur hi kan chhehvel hnai State-ah chuan kan khaw hriat lar pawl tak a ni awm e. Tun hma phei chuan sumdawng bungraw la tam tak an kal thin a, tun thlenga la kalte pawh an awm ve bawk a. Dimapur-ah hian Mizo Kohhran Biak In te pawh a awm a. Tunhma atanga lo khawsa tawhte leh tun hnia deuha pem lutte nen, Dimapura Mizo inbengbel hi engemaw zah an awm ve reng reng a ni.

Nagaland-ah mizo fate hi thahnem ang reng tak an cheng a. Thado-Kuki leh Gangte an tam ber. Leileta eizawng an ni ber. Mizo fate chenna Mualvawm, Mauva, Hanima, Chaspani, charkot te hi a langsar an ni. Mizohnahthlak khaw 15 a awm a. Tlangramah 10 leh phaizawlah 5. Kum 1981 chhiarpuiah chuan Nagaland-ah Mizo fate hi 9,839 an awm. Dimapur leh Kohima thlengin Mizo kohhran Biak In hi a ding ve bawk a ni. MLa pahnih an nei thin a. An hming erawh ka hre mai lo.

Kan awmna Barpathar atang hian Km 46 vel a ni a. Rel hian a din zin deuh avangin darkar khat dawn kal a ni a. Motor chuan motor kawng hi a thui deuh hlek a. Km 60 vel a ni a. Darkar hnih velah hahdam takin kan inkhung thei a ni.

Nagaland ram khawpui ber hi Kohima mah nise, an khawlian ber chu, Dimapur hi a ni a. Dimapur-ah hian rel leh thlawhna tum hmun a awm a. Chu chu Nagaland ramin rel leh thlawhna tum hmun an neih chhun a ni a. Assam ramri chet a awm a ni a, Pen nga lekah Karbi –Anglong District a ni nghal a ni. A nihna takah chuan, Dimapur pawh hi Assam ram ta a ni a. 1961-a Nagaland State siam a nih khan, Nagaland hian Assam hnen atangin kum 99 chhung atan an hawh a ni.

Khawpui hlun leh upa tak a ni a. Hmanlai Dimasa-Kachari lalram ropui tak khawpui thin a ni a. Dimapur pawh hi Dimasa tawnga, Tuipui lian tihna a ni. Tuipui lian Khawpui tihna a nih ber chu. Dhansari luikama awm a ni a. Ka awm mekna khua Barpathar pawh hi Dansiri lui bul lawka awm ve tho a ni bawk.

Dimasa-Kachari lalte chuan Ahom Lalte an ngam loh zui tak avangin Ahom Lal thuhnuaiah a hnu lamah chuan an awmzui ta nghe nghe a. Khawpui chhungah hian Dimasa-Kachari Lal In ram tawhte leh an sulhnu thenkhatte chu hmuhtheihin a la awm.

An eizawnna pui ber leh an larna ber pawh sumdawnna a ni. Hong Kong Market, Central Plaza, New Market, Bank colony (Super market area) leh Circular leh NL road te hi sumdawnna hmunpui lian leh lunlai a ni. Hongkong Market-ah hian Thailand, China, Burma leh hmun dang atangta bungraw lakluh an zuar ber a, Dimpaur tlawhtute bazar duhna hmun ber a ni. KL Sethi Market Complex, Jasokie Market vel, GS Road atangin Buhfai leh chawhmeh dang lei tur a awm thin. Nichina kan sawi tak, Dimasa-Kachari Lal in hluite bakah, Kali temple, Green park, Aqua Mellow park, Zoological Garden, Science Center, Stone park, Hazi park, Agri Expo site, Rangapahar forest, Triple Falls, Shiv Mandir etc te hi khualzinte tana tlawh man hla deuh ber chu a ni awm e.

Continue reading DIMAPUR LAM

JORHAT LEH A CHHEHVEL

Jorhat hi kan awmna Barpathar atanga Km 80 vela hla a awm a ni a. Jorhat District khawpui a niin, Mihring 1.85 lakhs vel an cheng a, a zau zawng hi Sq. Kms 9 a ni.
NE-a khawpui thangchang ber pawl niin, Assamahchuan Guwahati dawttu a ni. Central sawrkar pawhin, “Two sunshine c ities” tiin Guwahati nen hian a sawi thin nghe nghe a ni.

Chhuahvahna hun remchang hi ngah viau mah ila, ka peih vak thin lo a. A tulnain min nan erawh chuan, darkar 20 chuang pawh motor kawngah hun kan hmang leh tho.

JORHAT CHU: Jorhat hi AHOM Lal ram khawpui hnuhnung ber a ni a. kum 1794 khan, Ahom lal Gaurinath Singha chuan, Sibsagar atang hian Jorhatah Ahom Lal ram khawpui ber chu a sawn a. Assamese hnam culture leh history hmun pawimawh tak a ni a, Cultural Capital of Assam tite pawhin an sawi hial thin a ni.
1817-1824 a Burma hoin vawi tam an run avangte, British 1824 a an lo lan avangte khan Jorhat khawpui hi a ram der mai a. British hoin Assam an han thut chhoh atangin mihring an khawsa leh tan a, Jorhat khawpui pawh hi a lo dingchhuak leh ta a ni.

Ni 29.10.2017 khan Hruaitea leh Laldingsanga te chhungkua hruaiin, Jorhatah hian kan va kal a. Dinsanga nupui hi mami a ni a. Fa phir an nei a. Tluanga leh Kima an ni a. Phir mah nise, an inang lo hle. Dizogotyc Twin an ti hang chi kha an ni.
JORHAT SCIENCE CENTRE AND PLANETARIUM: JSCP-ah hian kan kal hmasa ber a. Sikul naupang pawh an tam hle. 2013 atangin Mipui tlawhtheihin an hawng tan a. Jorhat leh a chhevel zirlaite chuan an hlawkpui hlein ka ring.

Planetarium hi Digital Planetarium a ni a. Planetarium-a kan han awm chuan, Tluanga te unau chuan, vana lawn tak tak angah an han inngai a. Lei (Earth) a lo lan chuan, “E, Leiah khian Deepak-a (Driver) kan kalsan daih mai” Kima chuan a ti a. “Apu, kan haw leh angem?” an ti nghe nghe. Planetarium pawna kan han chhuah chuan, “Khawvel chu ava lum ve. Van chu a lo vawt a nih hi” an ti a.
Mizorama district khawpui tina awm atan ka awt khawp mai.

Science Centre atanga kan kalsawn hnuin, Gandhi Park-ah kan kal a. Naupang pahnih khat an lo awm ve a. A fai hle bawk. A enkawl tupain a lo ti fai mek bawk a. Luhman a awm lem lo.

An park ho hi a fai viau mai a. Zu bur ruak, damdawi tihna sulhnu vel a awm lem lo. An enkawl uluk tih hi a hriat. Eng infrastructure pawh nei ila, a pawimawh ber chu a enkawl zuina a ni. Mizote’n kan tlakchham lam tak a ni. Cheng tam tak senga siam leh sak kan Hall, Park, etc hi enkawl mumal loh a ni fo a, reiloteah a tawpin, a chhia a, a hmuhtlak loh fo. Zun in leh ek in bawr hi a tawp zual ngei ngei bawk. Drugs addiction lama an dinhmun ka hre lo a. Park leh Hall vel ti tawp zawnga khawsa an neilo a nih ka ring. An lo nei a nih pawhin an enkawl tha niin ka hria.

 

RAJA MAIDAM: Hetah hian Ahom Lal hnuhnung ber an phum a. Raja Maidam chu Lal Thlan tihna a ni mai. Raja Maidamah hian Naupang infiamna hmun a awm nghal a. lal hnuhnung pahnih an phum a. Chumi entirnan ni ngei tur chu, lei an chhung pawng bawk a. Hnim hring a to a. Dil a lo awm a. Dil kamah chuan, Kel a awm bawk a. Raja Maidam pawh hi a fai viau.

Ahom lal ram hi ram ropui leh chak ve tak an ni thin a. Mughal ho pawhin an vanglai tak pawhin awp tumin vawi tam tak an run a, an hneh hlei thei lo a ni. Mughal leh Ahom ho indona hmingthang ber chu Saraighat Indona kha a ni awm e. General Lachit Borphukan-a hoin Mughal ho kha an lo hneh a. Jorhatah hian General Borphukan-a pawh hi phum a ni a. A thlan in, “Lachit Borphukan Maidam” pawh tlawh theihin a awm nghe nghe a ni.

Mughal Lal ram ropui tak pawhin an hneh hleih theih loh ni ve mah se, anmahni hnam inkarah innghir nghona a lo thleng ta a. Kum zabi 19 na chawhma lamah chuan, Burmese Lal te thuhnuaiah an kun ta hial a. Anglo-Burmese War-ah khan, British hoin hnehna an chan avangin, Treaty of Yandabu hnuaiah, Burmese lal te hian, Ahom lal ram thununna chu British ho kutah an pe a, chu chu 1826 kha a ni a. Assam ram awp tak taka an awp chu 1836-ah chauh khan a ni. British India-a Province pakhatah an ziak lut ve ta a. British-in India a lo chhuahsan pawh khan, india ramah an bet zui ta a. Hei hi ULFA hoin an duh lo em em a. An ideology innghahna a lo ni ta reng a. “Khawvelin india” a tih huangah kan tel ngai lo a, British ho vanga hetiang ni hi kan ni a, India ram hnuaia awm loin, mahni kea ding tur kan ni an ti tlat a ni.

Engpawh nise, hnam anga dingchhuak a, chak a, mahni kea ding emaw, survive tur hrim hrim chuan, tanrual angai, chhungrila innghirnghona neih chi a ni lo.
JORHATA TLAWHTUR DANG AWMTE: Mihring siamchawp ramngaw, Malui Forest a awm a. Jadav Payeng-a, forest Man of India sulhnu a ni. Gibbon Sanctuary a awm bawk a, Kaziranga Golf Resort a awm bawk. Jorhat Gymkhana, British ho din a awm a. Asia rama Golf Course upa ber, khawvela pathumna a awm bawk. Nichina ka sawi tak, General Borphukan-a thlan kha tlawh tur chi a ni bawk.

Jorhat ka awhna chu, Research centre hrang hrang tha tak tak an neih chu thuhran, Eastern Theological College a awm a. Engineering College a awm a, Medical Colege a awm bawk. University pawh pathum lai an nei a, chu chu ka awh em emna a ni. Continue reading JORHAT LEH A CHHEHVEL

NAGALAND ZIN THU

Khawdang, ram dang han tlawh a, an awmdan leh khawsak dan han hmuh hi ka thil chak pakhat a ni a. Zirna hlawk leh pawimawh tak niin ka hre thin a. Lehkhabu chhiar tluk deuh thawa zirna pawimawh niin ka hre thin. Mihring hi inzir zel tur, damchhunga inzir tur kan ni a. Kan lehkhabu chhiar a zir leh kan zin/tlawh chin/hmuh chin a zirin kan rilru puthmang a dang a, kan ngaihtuahna a pawh a then a zimin, a then a zau ta mai thin niin ka hre thin. Mahni veng chhuahsan tlem a iang hi kan khawhawi te hi a tawi zual emawni aw a tih theih thin.

NAGALAND CHU:- Nagaland hi December ni 16, 1963 khan India ram state 16-na a ni tan a. Khawthlang lamah Assam nen an inri a. (Helaia an inrinna bawr hi ka awmna a ni a) Khawchhak lamah Burma nen an inri a, Hmar lamah Arunachal Pradesh leh Assam ram thenkhat nen an inri bawk a. Chhim lamah Manipur nen an inri a ni.

A state pumpui zau zawng hi 16,579 square kilometres (6,401 sq mi) a ni a. Mihring erawh 2011 chhiarpuiah chuan 1,980,602 an awm a. India rama state te ber pawl an ni. Nagaland bikah hian hnam chi hrang hrang 16 an awm mek.

Angami, Ao, Chakhesang, Chang, Kachari, Khiamniungan, Konyak, Kuki, Lotha, Phom, Pochury, Rengma, Sangtam, Sumi, Yimchunger, and Zeme-Liangmai (Zeliang) te an ni.

1950 vel atang khan insurgency-in a tibuai tan a. Chi leh chi inkara buaina an nei ve deuh reng bawk a. Tun hnaia kum 10 bawr atang hian tharum thawhna leh buaina an han tawng tlem chhoa, nasa takin an thang ta thung a ni.

KAL KAWNG: Barpathar atangin Sarupathar kawng lamah kan kal a…Naojan-ah lutin Bokajan kan kaltlang a. Dimpaur kan thleng a. Dimapur hi Nagaland ram chin a lo ni tawh a. Choumukedima pelh, Patkai Christian College peng pelh deuh atangin Nagaland tlangram chin hi chu a intan a ni ber mai. Kukipadong khua, Medzhiphema khua leh Sechu(Zubza) khua tih loh chu Dimapur leh Kohima inkara kawngpui dungah khua a awm lo a, a khawhar thlak ang reng hle.

Nagaland tlangram chin han luh chu a boruak a dang zar thung a. Kawng erawh a kual a, a chhe tan bawk a, Mizoram hi a ang khawp a. Kan Mizoram kawng ang em ema kual erawh a ni lo thung! Boruak a vawt nuam a, kan dai sawng sawng thung. A ram leilung leh ram ngaw leh tlang inkhawh dan a inang a. A nuam viau mai.

Kawng sirah hian an thlai thar an lo zuar ve a, Mizoram khaw kar kawnga dawr a lo awm dal thin ang kha a ni.

KAWNG CHHIA: Nagaland ram chhung han luh atang hian kawng a chhe deuh nghal mai a. Dimapur khawchhung kawng pawh a chhe viau. Kohima kan hnaih tulh tulh a, a chhe tulh tulh a. Kohima khawchhung kawng pawh a chhe viau. Opposition lam pawhin sawrkar laka an lungawilohna awmchhun chu kawng chhia chauh emawni tih turin, kawng chungchanga lungawilohna poster hlir a in tar.

Chutih rual chuan, kawng siam tumna chu a awm niin a lang a. Kawng tluan mai khan an lai zau en un a. Hna an thawk deuh map map a. Tha taka an siam a nih chuan, kawng tha tak an nei thei dawn niin a lang.

Medziphema khaw daiah pawh thenawm khawveng insawm Khawm hnatlang ni ve awm ang tak hian kawng chhia leh khuar an lo hnawh ve laih laih.

DIMAPUR: Dimapur hi Nagaland khawpui lian ber a ni a. An sumdawnna hmunpui a ni bawk a. A history atang rengin a naga lutuk lo thung. Hmasang Dimasa-Kachari ho Lalram khawpui thin a ni a. Dimapur tih a, Dima tih pawh hi kachari tawng a ni a, Tui lian/Tam/Lui lian tihna a ni. Kachari Lalte hmun hlui pawh a khawchhungah hian hmuh tur a la awm a ni.

1963-a Nagaland a lo indan khan, Assam sawrkarin kum 99 chhung atan Nagaland sawrkar hnena a hawh tir a ni.

Dimapura veng pakhat kan tlan pelhah chuan banner pakhat hi a intar a. Naga hnam zirlai pawl pakhat chuan naga zirlaite tan Civil service coaching an hawng hi a lo ni a. Kan zirlai pawlte pawh hian, Civil service coaching emaw, medical entrance coaching te hi an hawng chiah lo anih pawhin, zirlai beisei awmzual 10 vel te sponsor thei se chu kan hnam tan a tha ngawt ang tihte ka ngaihtuah a.

KOHIMA: Kohima hi Kehiwara tia hriat thin a ni a. Mihring 267,988 an cheng mek!Angami ho ram thin a ni.

Kohima hi a hmun a nuam a, a thawveng a. A mawi viau laiin, khawchhung a bal a. Khawpui veng laili deuhah pawh, kawng sirah bawhhlawh te an paih ur mai. Khaw chhung kawng a chhe em em a. A khu bawk a. NE India-ah chuan PHQ tha ber a ni ang tih tur an nei a, fait akin War Cemetery an enkawl reng bawk a, Mary’s help of Christians cathedral, mawi leh fai tak a awm reng bawk a, hmun dang pawh a fai em em tho. Infrastructure tha tak tak an neih laia an khawchhnung kawng chhia te, an khawlai hrim hrim bal lutuk te kha chu a fuh lo. An duh chuan an fai thei reng tih erawh a chiang khawp mai.

War Cemetery kan tlawh a. Thlak an la nual a. War Cemetery chungchang hi chu chipchiar zawka la sawiah khek ta ilangin. Brigadier leh sipai bel kai lo te pawh a indawtin an phum a, thlan design inang rengin. Thihna hi chuan mitin hi min lo hrut rual khawp. Hriatloh sipai thlanlunga “Known unto God” tih kha a thuchah a thangkawk ring ber chuan ka hre thung. Miin min lo hre lo mah se, kan hnathawh hi hre lo mah se, Pathianin min hriat chuan a tawk viau a ni.

Mary’s Help of Christians Cathedral kan tlawh bawk a. Angami Tradition behchhana sak a ni a. A mawi hle. Japan mipuiten, Battle of Kohima-a an hnampui nunna chante hriatrengna tura an pawisa thawhkhawm hmanga sak a ni.

In leh lo sak phungah keini aiin an la hniam zawk a. Kohima khawpui lailiah pawh rangva in te tak te, a bang dap hmuh tur a la awm. Assam Type in sake maw, RCC in sak pawh kan tih dan a inang thui viau. Keini aiin an RCc in sak a te hret thung.

An fakawmna chu an insak emaw, an thil phun emaw, eng pawh, an ti naga thiam riau.

TRAFFIC POLICE: Dimapur leh Kohima hmuna Traffic stand a Traffic Police duty hi hmeichhia hlir an ni. Officer chin (ASI chin) khawimaw laiah an lo awm ve zauh zauh a. Officer lo chin hian Mizorama traffic Police inthuam ang hian an inthuam vek a. ASI chin chu traffic duty pawh khaki an ha thung.
Taxi chi hnih an nei a. Local Taxi leh Zonal Taxi. An local taxi chu tunhmaa Mizorama taxi tih thin dan angina a dum leh a eng a ni a. Maruti an ni tlangpui. Zonal Taxi chu a eng hlang a ni ang. Sumo ho an ni leh tlangpui thung. Naga Taxi chu sumo a nih chu.

Tin, Vai dawr a tam ve viau bawk mai. Keini aiin chhungril takah chuan, an buaipui ru zawk daih mai thei, Dimapur chu Assam ram atanga an hawh hrih a ni a, ngaimawh tak tak theih a ni lo a. An hawhna chhan pawh hi connectivity vang a ni awm e. Rel leh Thlawhna a lut a, chumi avanga hawh chu an ni. An khawpui ngei ngeiah pawh vai dawr a tam em em mai.

TI TAWP ANG: A tlangpui zawr zawrin ka han ziak a. Chipchiar zawka han ziah pawh a chakawm viau na a, a thui hma thin a. Heti hian ti tawp phawt ila a tha awm e. Pathian zarah vanneihthlak takin, kan hmuh ngai tura kan rin lem loh hi harsa lo takin, tum leh beih tang tang ngailoin kan hmu kan hmu ve ta a.

Zin kual na a ka ngaih pawimawh ber chu, zir zauna leh hriatbelhna a ni. Keimahniaah thil tam tak kan la lut al ngaihtuahna thar, ngaihdan thar kan neih belh a. Thil kan hmuh belhin kan hriat belh a. Hnam dangte khawsak dank an hriat belh a, inrintawkna thlengin kan neih belh thin.

A hranpa chu thui tak Nagaland ram chhung chu ka lut peih tawh kher lo ang, an kawng a chhe ve em mai.