CHAPO TAKA TLAWM…

Mizo ten Social Media kan hman thiam loh thu kan sawi fo a, kan la hmangthiam tak tak chuang lo a nih hi.

Engemaw thil thleng leh issue hlekah, dengkhawng leh lei kuai thei berin thu kan han post pawp a. Huaisen leh dikna duh nihna emaw kan ti thin nite pawhin a lang a, thenkhat chuan lansarh an khelh vangte hi a ni thin. Tunlai phei chu Youtuber an pung nasa a, an tihlan(Content) tur an uluk si lo. Mipui, ngaihthlatu leh entute tana tha leh tangkai leh hnam tana him a ni em? tih lah an ngaihtuah si lo. Eizawnna awlsam tak nia ngaiin, an monetize a. Thu mak leh danglam emaw hmanga thlirtu hip an tum a. Kan hnam ngaihtuahna hi sumdawnna satliah anga ngaih a ni ta a. A tha lo tak zet.

A then lah, an saruak thlalak lo post te, an mipat hmeichhiatna hmang lai, FB lama lo live ta mai thlengin kan nei ta!

Phone leh hmanraw dang, medium tha kan neih tak avang hian, duh duh sawi ve theiah kan inngai a, kan sawi te chu miin ngai pawimawh hiam hiam turah te pawh kan ngai bawk niin a lang thin bawk a.

Ram hruaitute lo bei ngar ngar mai te, kohhran lo bei ve ngar ngar mai te, YMA leh khawtlang thatna duhtute lo bei ve ngar ngar mai mai te hi kan awm kum tluan a. Thudik tluantling lo deuhte hi uar deuhin kan han bawlphuan a. Kan sawi lo tuipui tawk te te hi chu kan hmu ve zel bawk a. Social Media khawvelah hian kan so ve bulh buh mai thin.

Mimal demna leh khawtlang hruaitute chet dan te leh Damdawi In thawkte chet dan etc demna han post hluai te hi huaisen leh dikna duh miin min tise tih vanga han post hluai ching hi kan awm a. Rin ang ngei ngeiin, FB ah te, Whats app-ah te, Chanchinbu-ah te Ngaihdam dilna an chhuah leh hna hna thin.

Ropuia kan inngaih ang ai hian kan ropui lo a. Keini aia Force chak leh lian zawk hi a lo awm zel a. Chapo tak hian kan tlawm leh zal zal thin a. A hma lawka Pa em em mai khan, “Ngaihdam” kan dil leh hna hna thin.

Dik lo kan hmu tak zet a nih chuan, a beihna tur dik zawk leh a siamthatna tur kawng mumal zawk hi a awm. Khawvel hi kan ngaihdan angin a kal vel dawn lo a. Kan ngaihdan lo anga thil thlengte hi a dik lo vek tihna lah a ni hek lo.

Nung ho tur chuan mi dangte kan mamawh a, Khawtlang inhruaina hnuaia kan kun te, sawrkar thu kan zawm te, kohhran kaihhruaina kan zah te hi a ngai thin.

Thu hnu dawn lek loin kan han phul ve chiam a, Ngaihdam dil leh hna hna hi a ngai thin. Mi an hlim em em laia lo thinrim em em mai, Mizote thiltih apianga phunna tur lo hmu ve zel mai te hi nih loh tur. Thih hnuah ruh a mawih chak bik thin.

Mihring hian discipline te hi kan mamawh a. Mi dangin min rawn discipline hi chu nghah loh tur, a zahthlakin a tlawm thlak a, inti pa tak maiin, chapo taka ngaihdam dil angai thin. Mahni in discipline mai hi a tha.

Social Mediaa kan tel ve vang te, Smart Phone kan hum a, whats app leh FB a mi lian leh mi ropui ber ber te kan pawl ve phak avang hian anmahni ang kan va ni ve ta e tihna a ni lo a. Tia pui en a han en a, mi lian tak nia kan inhriat chiah phei hi chuan, kan che sual thin. Chapo taka tlawm leh vawng vawng angai thin.

19th Century American Folk Hero Davy Crockett kha Tennessee lam mi a ni a.  Tennessee congressman te pawh a ni nghe nghe.

Texas in zalenna sual an tum tih a hriat khan Texas a pan a. Alamo indona hmunah khan a thi ta a ni.  Santa Anna chaw chhumin a sawi dan chuan,  Davy Crockett a ruang chu mexican sipai 16 ruangin a hual a,  mexican zinga pakhat ruangah chuan Davy Crockett a chemte a la invit bur va va bawk!

Davy Crockett hian a sawi uar deuh pakhat chu,  “Always be sure you are right and then go ahead” tih a ni!

Mizo social media hmangtute hian hei hi kan mamawh hle!  Sawi tawh angin, Tute emaw sawiselna te hi kan han post pung pung a,  a tawpah ngaihdam dilna kan han post leh a!

Kan dik ngei a ni tih tih chiana,  chumi zawhah kan tihtur tul tih hi chin thin a tha.  Social mediaah kan dik tih puan kher a tul vek lo bawk a.  Mi dik lohna pawh puan kher lah a tul lo thei bawk.

Dik inti em ema khawsak a ngai chuang lo a,  dik taka nun a tawk mai.

Bible in kan thinlung vengtha turin min ti a.  Kan thinlung kan ven that chuan,  kan lei leh kan kutzungtang kan thunun thei ang.  Kan sawi loh tur tam tak kan sawi thin hi kan sawi tawh lo ngei ang.  Kan tih loh tur tam tak kan tih thin hi kan ti tawh lo ngei ang.

“Sawi tur i hriat loh pawhin,  sawi loh tur tal hre rawh”

-Chinese Thufing.

Published by

F Vanlalrochana

Ka hunawlah lehkha ka ziak thin.

One thought on “CHAPO TAKA TLAWM…”

Leave a Reply

Your email address will not be published. Required fields are marked *