CHATUAN NUNNA ROHLU KA CHHAR TA

Tuna kan Kristian hlabu hman mek a no 411 na, ‘Chatuan Nunna rohlu ka chhar ta’ tih hi mizo Kristiante zingah chuan hla langsar leh mite thinlung hneh ber pawl a ni awm e.

Baptist Kohran Pastor fel tak mai, Rev.H. Hrangena chu Baptist kohhran hruaitu hlun leh Baptist kohhran tana pa chan chang thin a ni a. 1962 khan PUC, Lunglei College atangin a zir zo a, chumi hnuah Jubilee Bible School-ah a han lut leh ren rawn a.

1964-1967 Inkarah khan Cherra Theological College-ah L.Th a zir a. Chuta Pathian thu a zir lai chuan ram a lo buai ta a. Chutih hunlai chuan, mihring nunna hlut loh vanglai tak a ni a, mahni hnampui ngeite pawh thu ho te teah nunna inlaksak hun lai a ni. Inhekte, inrinhlehna te leh inhuatna naran mai mai vanga inthah a hluar hle thin a.
A hnampuite chuan zalenna sual chhuah tumin silai an lek a, ralthuam chawiin, Khawvela hnehna chan tumin ram hnuaiah an riak bo a, Thihna, tahna, thisen chhuahna , inthenna a thleng a.

India sipai an lo lut a, Aizawl khawpui Bomb a han ni a, Mizoram hmun hrangah hrangah nunna chan, pawngsual tawk leh hrehawm tuarin mipui an rum a.

Ama hnam pui, a pian leh seilenna hmun a thil thleng leh an tawrhnate chuan Rev. Hrangena thinlung chu a khawihna ém ém thin a. Mizo Kristian-te chu khawvel hneh tura koh kan ni a, khawvel chu Krista tana siam tura koh kan ni. Tharum hmang chuan khawvel hi a hneh tak tak theih loh a. Silai leh mihring ban tha chakna hmang chuan khawvel hi kan la tak tak thei ngai dawn lo a ni.

Khawvelah chuan Indona hi a bang dawn lo a, Tharum thawhna hi a reh tak tak dawn hek lo. Hun enge maw chhung atana hnehna chu tharum thawhna chuan a thlen ve theih chauh a ni.

Chutiang hun harsaah chuan Hrangena chuan hnehna tha leh dik, khawvel hnehna thutak hi a lo phuah chhuak a.
‘Thenkhatten tawlailirte ringin,
Ralthuam famkim ring mahse la,
Kei erawh chuan Lalpa hming ka ring a, Nungin ka tho, hnehtu Lalzarah’ a lo ti chhuak ta a ni.

Thihna tur chu min fan chatuan dawn lo a, Thlan thim chuan keimahni chu kan hneh tawh zawk dawn a ni tih chiang takin a hmu a.

Hei hi a ni, khawvel hneha ngamna chu,
Kan rinna hi;
Hei hi a ni, khawvel hneha ngam chu,
Kan rinna hi.
Aw thihna, khaw nge i tur chu?
Aw thlan, khaw nge i hnehna chu?
Nun tawp lovin chatuan ram ka leng ang,
Haleluia! Hnehtu Lal lian, ka fak a che.”
Tiin A hnam pui te rumna vanga a hrehawmna kar atang chuan Cherra khawpui chum zin chuk maina, ruah a far rengna hmun atang chuan Engkim Hnehtu Lalpa Pathian fakin a au chhuak ta a ni.

10.10.1942 khan a piang a,an unau hi an rual khawp mai a, mipa 13 leh hmeichhia pathum an ni. 1968 khan Nemngheh a ni a. Sunday School secretary te, AGS i/c Admin te leh General secretary te a lo chelh tawh thin a.Literature-a mi tui em em a ni a, Chatuan nunna rohlu ka chhar ta tih bakah hian , ‘AW Hmangaihna a va thuk em’ tihte, ‘Boralte zawng turin’ (KHB 340) tihte pawh a phuah a ni. Pathian thu hrilhfiahna bu a ziak a, lehlin a nei bawk a, Ecology lam pang hawi lehkhabu ziah te pawh a nei bawk a ni.

BCM Assembly General Secretary a nih lai hian India ram pawnah pawh BWA inkhawmpui hmangin a zin chhuak thin a. BWA Inkhawmpui South Korea a hmang tura a kal chu Visa a hmuh theih tak siloah chuan a haw leh ta a, a haw leh lam chu Zobawk daiah a chuanna Motor a accident ta hlauh mai a. 12.8.1990 khan nun tawp loa leng turin Chatuan ramah a haw ta a ni. A hming leh a hnathawhte a lo rin thin Lal Isua hnenah a chawlta a ni.

Mizo Kristian hla phuahtu zinga langsar pawl tak Dr. Ramdinthara Sailo hian ringtu nunkawng a zawh theihna te, hla heti zozai a phuah theihna te chu Rev. Hrangena leh a ‘Chatuan nunna rohlu ka chharta’ vang niin a sawi thin.

He hla hi kan zavai hla a ni; chatuan nunna rohlu chhar tawh zawng zawng tan. Ni e, keini chuan he hla hi kan sa thei a ni:

‘Rorelna lo thleng tur ka hlau lo’ng
Thiamchan lawkan ka neih vangin,
Tu nge ka lal hmaah min hek ang?
Ka ta a ni, a ta ka ni si’

Published by

admin

Ka hunawlah lehkha ka ziak thin.

5 thoughts on “CHATUAN NUNNA ROHLU KA CHHAR TA”

  1. “Aw, Hmangaihna a va thûk êm ”
    He Krismas hlâ hi ka duh êm êm, a phuahtu ka hriat thawi țhin chu Rev. H. Hrangena phuah ngei a nih min ti chiang a, ka lawm hle.

  2. A van tha em! Mittui parawl khawpa kan chhiar chu le.
    Tunlai C-19 vanga miruang bawihsawmtu pawh neilo bawlhhlawh ang mai a paih mitthlaah alo lang.
    “Aw thihna khawnge i tur chu,Aw thlan khawnge i hnehna chu,”
    Rilruah avan thar tak em!

Leave a Reply

Your email address will not be published. Required fields are marked *