CHHUANA LEH SERKAWN CONCERT

Mizo literature chanchina pawimawh tak pakhat chu Serkawn concert, 1932-1946 chhunga mi kha a ni awm e.

Ruantlanga kan awm lai (1989 chho vel) khan YMA library kha Pu Kungliana te inah a awm thin a. Serkawn Concert hlate tih kha a buin a awm thin a. RL Thanzawna te buatsaih ni tain ka hria.

Serkawn Concert vang kha Mizo thu leh hlaa hla pawimawh tak tak a piang a.Hka thar 100 dawn a lo pian phah a ni. Serkawn Concert chungchang hi chu ni dangah kan la sawi leh turah ngai ila. Serkawn concert hla tur hi zirtirtuten an phuah thin a. Chhuana, Lalmama, Hlunthuama, Hanga, Liandala, Zadala, Selthuama, Darchhunga, C. Saizawna, Nuchhungi leh Zochhawni Pa te an ni.  Serkawn Concert hla tur phuahtu zinga mi Chhuana chanchin hi tawitein i han sawi zui lawk teh ang.

Zadeng hnam chhuana hi 1897-ah Runtungah a piang a. 1915 khan Middle English a zo a. Sap Upa khan Dibrugarh-ah compounder hna zir turin a tir a. Engemaw vangin result a hmu ta chiah lo a ni awm e. Serkawn sikula thawhpahin mission damdawi sem hna a thawk a, naupang damlo enkawltu ber a ni a. Pasaltha leh mi ramvachal tak a ni bawk.

Kum 47 mi chauh a nihin 1944 khan a thi a. A u Pastor Challiana khan a vui a ni. Pastor Challiana nen khan Nu thuhmun an ni. 1907 khan a u Challiana hian serkawnah a chah chho a, Sap Upa leh Pu Buanga te ke bulah a seilian ta a ni.

Kut chhuak angah lutuk lo a. A neih chhun erawh tha tak tak vek a ni. Chhura leh Naa tihte, Kawrnu tihte phei chu hla ropui a tling. Chhura leh Naa phei chu Mizo Ballad ropui ber pawlah a zir mite chuan an chhiar a ni.

Hla thu hman a thiam a, a hlate hi a chhinchhiah tlak bik a ni.

Ni li zet chu ka ke na avangin ka chhuak vak thei lo a. Chumi chu remchangah hmangin a chanchin hmuh tur awm vaklo hla phuahthiam Chhuana leh Serkawn concert chungchang hi tawitein ka han sawi ta a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *