DAMCHHUNG NI CHHIAR DAN 2

JANUARY NI 6
MI DANG CHUNGA THATCHHUAH
Khawvel chanchina lal ropui leh ralhrat hmingthang ber chu Mongol lal ropui Genghiz Khan-a kha a ni awm e. Mongol hnam, Tribal pem pem mai te kha suihkhawmin hnam ropui tak, Lal ram ropui takah a chhuah thei a ni.

Genghiz Khan-a hian a hunlaia an khawvel hriat chanve zet chu a la hman niin an sawi thin a. A hnu daiha India awptu Mughal Lal te chu a thlahte zinga mi an ni. Samuel Taylor Coleridge-a Poem hmingthang tak, “Kubla Khan” tiha Kubla Khan-a ber khan, Genghiz Khan-a tupa a ni. He Poem hi a poem dang pahnih The Rime of ancient Mariner leh Christabel te nen a poem ropui pathumah an chhiar a ni.

Mongol ho hruaitu a han nih tirh khan, Mongol ho nun dan chu a ho em em mai a. An hmanlai nun dan tha te a hloh tial tial a. Mongol ho siamthat leh suihkhawm a tum ta a, “A tul chuan, Mongol hnam chanve pawh ka that mai ang” tiin, Mongol hnam dinchhuahna turin a rilru a siam a. Mongol hnam te chuan, an zawm ngei ngei tur dan a siam a. “Hmeichhia leh Naupang thah ngailoh tur. Mahni thutiam tih hlawhtlin tur ba rulh ngei ngei bawk tur,lal te phatsan loh bawk tur a ni” tihte hi a ni. 1206-ah Mongol zawng zawng chunga Thuneituah an siam a, Temujin-a chu Ghenghiz Khan a lo ni ta a. “Ghenghiz Khan of the Greta steppe” tiin an sawi thin.

Naupangte a nih laiin Harsatna tam tak a tawk a. Tangut Lalin Ghengiz Khan-a chu a man a. A tan tir a. A tan tir lai hian, Buddhist puithiam pakhat hian, Tangut Lal hnenah Genghiz Khan-a chunga that chhuah turin a ngen thin a. Puithiam chuan, Ghenghiz Khan-a hnenah, nakin lama an monastery chu zuah turin a ngen nghe nghe a.

Mi tang Temujin (Ghenghis Khan-a pianpui hming) chuan, Puithiam hnenah chuan, A nupui Borte-I zawng chhuak a, saruh pe turin a ngen a. A nupui chuan a la dam tih a hre thei dawn a ni. Chumi a tih sak chuan, an monastery chu a zuah ang tih a tiam a. Puithiam chuan, harsa takin Ghenghiz Khan-a nupui chu a zawng chhuak a. saruh chu a pe ta a. Puithiam hi a thizui ta nghe nghe a. Borte-I chuan, Ghenghiz Khan-a hi a rawn zawng chhuakin, an tlanbo dun thei a. A hnu lamah, Mongol hotu a lo nih a, ram zauh tura Indonaa a pen chhuaha a beih hmasak ber chu, Tangut Lal ram chu a ni a. Lei atangin chu Lal ram chu a nuai bo hmiah a. Buddhist Puithiamte chenna (Monastery) pakhat chu a zuah thung a. Chu chu tunthlengin a la ding niin an sawi thin.

Puithiam tlawm tak Pakhat khan, Saltang pakhat chungah that a lo chhuah avangin, Buddhist Puithiamte chenna hmun chu a hmelma te chunga nunrawng tak Genghis Khan-a pawhin a zuah phah a ni. Chu chu Midangte chunga that chhuahnain a nghawng chu a ni.

Mi tu pawh ni se, Mi dangte chungah hian that chhuah ila. Kan beisei loh hunah tanpuina kan hmu a. Kan rinlohna lam atangin malsawmna kan dawng anga. Kan vela mite an tah laiin, kan lawm fo ang.
*Mi dangte chunga thatchhuah theihnghilh suh*.


 

JANUARY NI 7
MAHNI HNUAIA MITE CHUNGA THATCHHUAH
Sipai huaisen chawimawina Military Cross dawng pha, Indonaa hnehtu anih avanga Field Marshal nihna an pek, Sam Manekshaw kha, India sipai ropui ber a ni hial awm e. Prime Minister hrohrang na, Indira Gandhi pawh, “Sweety” tia ko ngam ngat a ni.

Sipai General ropui tak leh mi huaisen a sawi tling a ni a. Mi ho Khawm thiam. A hote Gorkha regiment ho phei chuan, an ngainat em em mai, “Sam Bahadur” tia an koh hial a ni.

India ram Khawmual Sipai lal ber a nih laiin, 1971 Indona-ah Pakistan a hneh a. Chu chuan a hming a ti mawi leh zual a ni.

Chutiang sipai chu ni mah se, a hnuaia mite tana tha tak mai a ni a. Sipai hotu tam tak chu, an lal leh lutuk a ni mai lo a, a sual mange aw tih tur khawp hi an ni fo. An hotena an tih hlum tak mai, Tihpalh thilthu anga lang site pawh hi a awm fo a ni. Lushai Scouts ho chanchinah pawh chutiang chu a awm nghe nghe a ni.
Sam Manekshaw-a erawh hi chu, a hnuaia mite tan a tha a. A ardali(orderly) te chungah pawh a tha a, a hmusit lo a, a ti duhdah lo a. chutiang avang chuan a tan pawh an nunna an chan huam hial thin.

Indopui pahnihna laiah khan Captain a ni a. Pagoda Hill-a an inkahnaah, LMG in an kap fuh a, a pumah mu sarih lai a lut a. Thi ngei turah an ngai a ni. Amah lo hmutu Major General David Cowan-a chuan, a damchhuah a rin loh avangin, ama Military Cross Ribbon chu Manekshaw kawrawmah a kilh bet a. “Mitthi tawh hnenah Military Cross hlan theih a ni si lo a” a ti. A hnu lamah, Official takin Manekshaw a Medal dawn hi an puang leh a ni.

Indona silaimu sur karah hian, a orderly Sher Singh-a chuan, a nunna thapin, a pu chu hmun him lamah a hruai a. Australian medical Team ho bulah ke ngata puin a hruai thleng a. Thi ngei tura ngaih Capt. Sam Manekshaw chu a dam chhuak ta a ni.

Australian Surgeon hnena a Singh-a hian a pu ava hruai thlen tirh hian, a lo enkawl duhlo a. A na lutuk a, a thi tho dawn, buai lo law law ang a lo ti deuh a. Sam Manekshaw Oderly Ser Singh-a hian, Doctor chu a pu enkawl turin a ti lui a, a enkawl ta chauh a ni. Thichhawnga a let reng chu a lo harh leh hnu chuan, “Engtia chutiang chu tawk thei nge?” tih doctor chuan a zawh chuan, Manekshaw chhanna chu, “sabengtungin min kheng a lawm” tih a ni.. Doctor nuih chu a za khawp mai a. A zai ta a. A taksa atangin silaimu pasarih a la chuak a. Thla tam a ral hmain, sipai ho zinga Manekshaw hi a awm leh ta nghe nghe a ni.

Manekshaw hi a orderly chungah hian mi tam tak angina lo sualin, lo tiduhdah se, sal ang maiin lo enkawl se chu a pu hmun hima hruai tur hian ama nunna a thap hauh lo ang le. Thi se, pawi a ti hauh lo ang. Manekshaw-a chu a chunga a lo that thin a vangin, a nunna thap pawhin a pu nunna chu chhan a tum ta a ni.
Keini pawh hi. Kan hnuaia thawk, kan peon, kan staff, kan orderly, kan in satu, kan huan samtu, kan huan enkawltu, kan bawnghnute sem, kan dawr nghak. Kan awmpui, kan nau awmtu, kan thawmhnaw sutu etc. te chungah hian that chhuah ila, mihring, mi puitling an nihna angina zahawm takin en ila, kan hnuaia thawk kher lo, kan aia dinhmun chhiate, endawngin, hmusit lo ila, malsawmna ropui tak kan dawng zawk anga. Kan hnuaia mite chunga kan that leh ngilneihna man, kan aia dinhmun chhiate kan lainatna man chu, leiah hian kan dawng let em em ang. Kan beiseilohna hmunah leh hunah kan thatna hi rulh letin a awm em em ang, Gen. Sam Manekshaw ang hian.

*Heng mite ber chungah intih hi ka chunga ti inni*-Isua Krista

JANUARY NI 8
INNGAIHTLAWMNA

Thuziaktu ropui Thomas Hardy kha, a hmingthan vanglai ber khan, chanchinbu te hian a thuziah vangin pawisa tam tak an pe thin a. Engemaw chang chuan, a thuziak leh hlaphuah te kha Chanchinbu Editorte hnena a thawn hian, Envelope ruak, a ma hming leh address inziahna sa, Stamp inbelsa thlap hi a thawn tel thin a; a thuziak chu Editor ten an lo chhuah duhloh hlauh chuan an thawn kir lehna turin a ti a ni. A ropui vanglai ber pawhin a kutchhuak chu an chhuah duhlo mai ang ti khawpin a inngaitlawm a ni.
Far from the Madding Crowd (1874), The Mayor of Casterbridge (1886), Tess of the d’Urbervilles (1891), and Jude the Obscure (1895) tih leh Novel dang tha tak tak te, Short Story leh Drama ziaktu hi Poet lar tak a ni bawk a, 2 June 1840 a piangin, 11 January 1928-ah a thi a ni.

Tunlaiah chuan, tumah hi kan ngai thla tawh lo a. Social Media zarah te hian, tu pawh mai hi kan tluk puiah kan ngai ta a ni ber a. Duh duh kan sawi ve a, kan chap ar vek mai. Mi dang ngaihthlak te hi kan tum lo a, hriat nei tak tak mang siloin sawi ve vak te hi kan tum a. Mi dang te ngaihthlak te hi zirna ropui tak a ni a. Mi dang te ngaithla thei khawpa tlawm theih hi a ngai a ni.

Chapo chuan, hma a sawn theih loh, kan inzir belh thei lo a, kan thlen tur hi kan thleng thei lo a ni. Lian riau, thei riau, ropui riaua inhria, engmah ni silo hi a awm theih viau. Enge maw tal ni ve te hi lo chapo se chu a awm a, hetiang hi a in ngaitlawma hi an ni duhfo leh nghal.

Inngaihtlawmna hi zir theih a ni a, nitina beih ngaite pawh a ni hial zawk awm e. Engtin nge kan inngaihtlawm zel theih ang?

1. Inngaitlawma, chuta awm chhun zawm tur chuan thil nihna tak kan hmuh thiam a ngai a ni. Engang pawhin thil hre zauin hre tam ila, kan hriat loh hi a la tam zawk fe a ni. Thil tam tak kan han niin kan han nei thei a, mah se, kan thlen theih chin hi tlem te tak tak a lo ni zawk. Mi ropui leh pawimawh takah kan inngai a ni thei e; Thihnain min la bo se emaw, kan hna atang chawl ila emaw, nun leh hna chu a dan pangai rengin a la kal zel dawn a ni. Inchhuang thei kan awm lo a ni.

2. Thil thiam tak leh thei tak kan ni thei e, kan aia thei an lo awm zel mai. Chungte nen chuan han inkhaikhin ila. Mi tam tak chuan an aia thiam an hmuh leh hriatin an inthlahrunga an zak ngawih ngawih thin a ni. Musician tam takin vantlang hmuha rimawi tum an sim thak fo. Solomona meuh pawh a ropuina zawng zawng nena a inthuam pawhin, ram tuktin par tluka chei a ni lo a nih kha.

Thomas Hardy a nuna inngaihtlawmna hi kan mamawh hle a ni. Mi chapo te chu an din chhuah hma pawhin an tlu fo thin.

JANUARY NI 9
MAHNI INCHHUNG NUAM TIH
Mi pakhat a awm a, hmanah khan, chhungkaw lakah a hel hle \hin. A hming chu Howard Payne a ni.

A chhungkua chhuahsanin French ram Paris khawpuiah a kal a, tlaikhat chu varanda a\angin Paris khawpui mipui phu mur mur chu a thlir a, nakin deuhah chuan an bo zo ta vek mai a. Khawnge an awm tak tiin a ngaihtuah a, anmahni inah an hawng fel ta dial a ni tih a hria a. Chuta tang chuan chhungkaw pawimawhzia chu a hre chhuak ta uai uai a. New York khaw daifem Long Island-a an in tereuhte, kum kua lai a lo chhuahsan tawh hlutzia chu a hre chhuak ta a. In chhungah a lut a, mittui nen khawvela chhungkaw hla ropui berte zinga tel kumkhua tur chu a phuah chhuak ta a ni:

“To thee i’ll return over burdened with care’
The hearts dearest fale;
Will smile on me there no more from that cottage again i will roam;
Be it ever so humble,
There’s no place like home.
Home, home, sweet home,
There’s no place like home

He hla hi a phuah zo va, kum kua lai a lo chhuahsan tawh Long Island-a Thing In tereuh te chhungkua a neihna hmunah chuan a kir leh ta a ni. ‘Ka kal bosan leh tawh lovang’ a ti a, mahni chhungkua kan chenho hmun tluk hi chu a lo awm lo’. There’s no place like home’ a lo ti hial a ni.

John Howard Payne-a hi kum 1791 khan New York khawpuiah a lo piang a, A dam chhung hun tam zawk a teirawlai a, 1852 khan Tunisia ramah a tar thi. Kum tam tak hnuah Washington Oak Hill Cemetery-ah a ruh ro phum leh a ni.

Mizo te hi, chhungkaw hlutna kan hre tam tawk lo hle niin a lang a. Misual kan tih, Police kut leh court thleng chin tawh te hi, misual hrim hrim an ni ngai lem lo. Chhungkaw dinhmun dik lo leh chhungkaw inrelbawlna tha lo, mahni inchhungkhur nuam ti lo te an ni zel a ni.

Mahni inchhungkhur nuam siam turin kan pawimawh vek a, a bikin nu leh pa an pawimawh zual. In chhung nuam tak, chhungkaw hlim tak nei thei turin theih tawp I chhuah ang u. Mahni inchhung tluk a awm lo a, mahni chhungkua ang reng hi chu a lo awm lo e.

JANUARY NI 10
HUN PEK PHU CHU HUN PEK TUR
Arjen Robben hi khawvela footballer tha ber pawl a la ni reng a. Kum 32 mi a ni ve ta.

A nupui chu Bernadien a ni. A nupui hi Football zirlai (youth footballer ) a nih lai, a tleirawl laia a tawn a ni.

A naupan laia amah hrual thintu coach chuan heti hian a sawi, ” Arjen hi naupang tumruh leh taima em em mai a ni a. A tlai ngai reng reng lo a. Nikhat chu Zirtawpni chawhnu lam erawh chu minute 15 lai hian a rawn tlai ve a. A chhan ka zawh chuan, ‘ Marketah kan awma thian te nen, nuam kan lo ti deuh a lawm le’a ti mai a. A rualpui hmeichhe pakhat a lo hmu a. An lo titi tui deuh a ni awm e. *’Practice tlai phahna tur khop a ni em ni? Chutiang chu a phu em? ‘ ka tih chuan, ‘ Aw, ka pu, a phu’ tiin min chhang a. A hnu kum engemaw zahah a nupui neihnaah kan va tel ve a. A nupui chu khami nia a hmeichhe hmuh kha a lo ni a”* tiin.

Real Madrid-a a khelh lai, 2007 ah a nupui nen hian an innei a. Fa pathum an nei tawh a ni.
A ngaihzawng awm chhun chu Robben hian nupuiah a nei a ni.

Mi tam tak chuan,kan fate, kan nupui/pasal te aiin kan hna te kan ngai pawimawha, Inlaichinna tha aiin pawisa siam leh sum lakluh kan ngai pawimawh thin a. Mi tam takin an ti sual thin a ni. Ngaih pawimawh tur hi ngaih pawimawh thiam tur a ni a. Hun pek phu chu hun pek tur a ni.

Kawppui/ngaihzawng te tana hun nei reng reng lo, fate tana hun nei reng reng lo, thiante tana hun nei reng reng lo hi mi hlim tak leh lungawi tak an ni tak tak thei lo. Chuvang chuan, Ngaih pawimawh tur thliar thiam a, an tana hun pek thiam tur a ni a. Zirtur a ni bawk. Arjen Robben-a ang hian, ngaih pawimawh tul leh phu chu ngaih pawimawh mai tur a ni.

Zirna leh eizawnnaah kan lo hlawhtling hle a ni thei e. Mahse, thil thlu tam tak kan chan thei fo. A tawpa hlawhtlinna tak tak kan tehna tur chu, kan hna ropui leh ropui loh te, kan sum lakluh tam leh tam loh teah a ni lo ang. Kan hlimin kan lungawiin, kan nun a hahdam em tihah a ni fo. Hun pek phu chu hun pe ila, kan nun a hah chawl fo ang.

Sumin a lei theih loh thilte hi, hringnuna hlu ber ber an ni fo.

Published by

admin

Ka hunawlah lehkha ka ziak thin.

One thought on “DAMCHHUNG NI CHHIAR DAN 2”

Leave a Reply

Your email address will not be published. Required fields are marked *