DAMCHHUNG NI CHHIAR DAN 4

JANUARY NI 16

MAHNI INDAHTHAT

Italy ram insuihkhawmna tura thawhhlawk ber tih theih hial tur Garibaldi kha July 4, 1807 in Nice, France-ah a lo piang a. An chhungkua hi sangha mantu leh tuipui kama sumdawng thin an ni a, a ni pawh kum 10 zet chu sangha mantuah a tang a. 1833, khan Piedmont-Sardinia lalram lawng sipaiah a tang a. Russia Ram pana lawnga an zinnaah Mazzini zirtirna a tuipui tan a. Democratic-Republican sawrkar din a, Italy ram insuihkhawmna chu a damchhunga a tuipui ber a lo ni ta a ni.

South America rama tualchhung indonaah te a zu tel ve zak zak hnuin, 1846 chuan Italy ram boruak vang chuan Italy ramah a let leh ta a. Hetih lai hian Italy ramah chuan Nationalism meipui a vung chhoh tan lai mek a ni.

Lal neih duh lo(Republic) mah ni se, 1848 a Italian Indepdence War-ah chuan, Sardinian Lal, charles Albert chu theihtawp chhuahin a pui a. Ama mimal duhdan chu dah boin, Lal chu a puih chuan, Italy ram chu an insuih Khawm hma zawk dawnin a hria a ni. Heti Laia Garibaldi a nun atanga kan zirtur pawimawh tak mai chu, a ma mimal duhdan leh thuvawn (Principle) chu Lal neih loh (republic) a ni a. Mahse, Italy ram a hmangaih a, Italy chu insuihkhawm se a duh avangin Sardinia Lal lamah chuan 1848 Indonaah pawh a tang a ni. Keini chuan kan ram leh hnam ai chuan kan mimal duhdan leh lawmzawng hi kan dah hmasa thin a. Keimahni hi kan indah tha phal thin lo.

1848 Indonaah hian Garibaldi te lam hi an chakloh avangin Garibaldi chuan Italy ram chu a lo chhuahsan leh ta a. USA ah kalin New York ah a khawsa a. Hemi pah hian Tuipuia sumdawnna hrang hrang a buaipui.

1854 chuan, Italy ramah a kir leh ta a. Hun engemaw chen chu Lo neiin a hun hmang a. 1858-ah Italy zalen nana Indo tum hnihna a lo chhuah leh takah chuan, Garibaldi chu Major General atana ruat a ni a. Alps tlangah awmhmun an khuar a.

Hemi indonaah pawh hian, ama mimal duhdan chu Republican rilru, lal neih duhlohna rilru mah ni se, Italy ram a hmangaihna avanga insuihkhawm a duhna chuan, ama mimal duhdan a dahthat tir a, Lal te lamah a tang leh ta a, Sardinia lal Victor Immanuela chu a pui a ni.

1860 chuan Volunteer Sipai tlemte nen Sicily lal ram a hneh thei a. Chu chuan, a hming a chher hle a. Khawvel huapa ngaihsan a ni ta a ni.

Sicily a hneh hnuin, Italy ram chhungril zawk a luh chilh ta a. A kalna a piangah chuan Mipuiin an lo lawm hle zel a. Naple lal ram a hneh leh a. Rom khawpui pana, Italian republic din hia a rilruah awm mah se, ama dinhmun leh a sipai te dinhmun a ngaihtuah a, piedmont sipai tam tak mai chu a innghahna an ni bawk a. Rom lam chu pan zel loin, October ni 26, 1860 chuan, Victor Immanuela hmaah a ngunhnam dahin, Italy Lal angin chibai a buk a.

“Pathianin Italy ram chu Victor Emmanuel-a a pe ta a ni. Italian zawng zawngin amah chu an tan tur a ni a. Victor Immanuela kiangah chuan kan innghirnghona zawng zawng kan paih boa ng” tiin a sawi nghe nghe a ni.

A hnu lamah pawh Democratic Republic sawrkar din tumin, Italy-ah te, USA-ah te, France ah te a bei zel thung a. Heng te hi a chhinchhiah tlakna lai chu a ni. Democratic-Republic sawrkar neih tuma a nunna thap si chuan, Italy ram a hmangaih em avangin, an ram dinchhuahna leh insuihkhawmna atan chuan Lal neih hi a tha zawka a hriat avangin Charles Alberta te, Victor Immanuela te a pui leh tlat si a ni. 1860-ah a duh chuan, Lal thutthleng pawh chuh ve thei reng siin, A hmangaih Italy ram tana tha ber nia hriain, Italy ram enkawlna chahbi chu Italy ram bung pakhata te ber maia an lal Victor Immanuela kutah a dah leh hmak si a ni.

Garibaldi a te hi an ropui mange. A hmangaih Italy tan chuan amah a indahtha thak a, A duhdan a dah tha hmak a. Italy tana tha tur bera a hriat angin a theih tawp a chhuah a. Ama duhdan kalhin hialin a che a ni.

Keini pawh, Chhungkua, Khawtlang, Pawl, Sorkar, ram angtea dinchhuah kan duh chuan, mahni indahthat hi a ngai fo dawn a ni.

JANUARY NI 17
TUANG TIH CHHAH HUN A AWM

India sipai hotu ropui bera chhal ngam, Gen. Sam Manekshaw kha, Five star General lai a han kai phak a. Sipai officer an nih tan tirh, Lieutenant an nih laiin, an Battallion CO hmaah an va in lan a. Ani chuan, a confidential report a lo hmuh tir thin a. An CO chuan, “He officer, nilo, he tlangval hi engtikah emaw chuan officer ni tlak reng a la nih mahna” tiin a lo ziak a. Chu reportah chuan an hming an sign ve angai thin a ni.

Manekshaw-a hnunga rawn chhuak chu, Khaled-a a ni a, Pakistan Indan hnuin, Governor te, Foreign Minister te a ni zui ta nghe nghe a. Manekshaw chuan, “Khaled, entin nge a ziah che?” tia a lo zawh chuan, “He officer hian, a mawhphurhna ngaihthah a ching” tiin a ziak, Khaleda chuan a ti a. Manekshaw chuan, “A thalo hle mai a” a tih chuan, Khaled-a chuan, “Nikum te chuan, ‘mawhhurhna a nei tih a inhre lo hrim hrim’tiin a sin a ziah” a lo ti liam ve mai bawk a.

Hemi chungchung hi National Defence College, Wellington-a thu a sawi tumin Manekshaw chuan, a sawi chhuak a. Keini hunlaia chuan, Khatianga min lo ziah chhiat kha engah mah kan ngailo a ni. Tunlai hunah chuan, CO-in mawhphurhna ngaihthah mi tiin ziak sela chu, a ziah officer khan, President hnenah zual koin, amah aiin mawhphurhna ka ngaihsak zawk a ti duh ang”tiin a sawi.

Chu chu tunlai a mite nena an danglamna a ni tih sawiin, ama tawngkam ngei hi han dahchhuak ila, “We simply did not give a cuss”

Tunlai mite hi kan no tial tial nite hian a hriat a. Chhungkuaah, khawtlangah, Kohhranah, Hnathawhnaa-kan pute leh naute nena kan inlaichinna te, hna kalphung leh transfer thuah te, thian hoah, Indawr tawnnaah, social media inkawm honaah thleng hian, kan zuaua ta lutuk a, kan phun nung nung reng a. Ngaih hoh mai theih, en liam mai theih, kal kan mai theih te hi kan sawi kur luk a. Tuang tih chhah huna a awm a. Mahni inkhawngaih vel a, tlawmngai kual vel lo a, tih thak huna tih ve thak mai na chang te hriat a, tum pawh tum ve tur a ni. Engpawh tawk ila, social media zual ko te kan ching a. A hnu lamah, “Ngaihdam” kan dil leh duk duk a. Sawi chhuah tul kan ti a nih pawhin, a sawina hmun dikah, a sawina hun dikah sawi mai tur a ni.

Tuang tih chhah hun hi a awm a ni.

 

JANUARY NI 18
CHAPO CHHUAH HUN THA A AWM
Ram ropui tak thin, France ram kha Indopui Pahnihnain a han sawp chuan chau ve ngang ngang tak mai a ni a. General Charles De Gaulle-a hoin sawrkar an han indin thar a. Harsatna tam tak an tawk a.

Tual chhung buaina leh Politics harsatna hrang hrang an tawk a. Ram dang puihna tel lo chuan,indopui Pahnihna zawh hnu kum 20 chhung kha France ram hi a kal thei meuh lo. Ram dang puihna leh ram dang chaknaah an innghat a. Ram dang, Britain leh ram chak zawk hrang hrangte khan an tung ding zel a ni ber a.
Chutiang hunlaia an hruaitu lu, Charles De Gaulle-a kha, an ram an chaklo a, Tutee maw tawngkam takin, “Delhi drip ringa nung” tih ang deuh khan, Khawthlang ram democracy ram chak ho drip ringa nung ngar ngar si kha, ani kha a luhlul em em mai a. A thu a duh si a, Mi puihnaa innghat si khan, a thu angina thil a kalpui tlat thin a.

A thuihhruaite pawhin Gen. De Gaulle-a chu an hau nghe nghe. “Hetiang hi kan ram dinhmun a ni a. Ram dang hruaitute thu hi awih ve la, an tih angte hian awm la. Tlawn ve deuh hlek la” an tih pawhin, a duh der lo. “An thu anga kan awm chuan, France ram hi mi hnuaiah a kum kum khua a ni mai” a ti tlat mai a ni. “Politics of Grandeur” tih a kalpui tlat avang hian, NATO atang pawhin France chu a inhnuhdawh tir a. Chapo tih hial hlawh khan, a ram mipuite chu, dinhmun chhia leh hnuaihnung em em atang Chapo theiah a siam leh thei a ni.
1969-a France ram President a nihna a chawlhsan meuh chuan, an ram chu dinhmun tha leh ropui takah a dah hman a, 1970-ah a thi zui ta a ni.
Mihring zahawmna diktak chu, ama nih dan tur a ni phak em tih hi a ni pakhata. Mi dang tlawn reng reng, mi dang duhsakna dawn duh reng renga, tute emaw uite a nih hi, tih theih khawpa mi hnuaia intuk luh hi, dinhmun leh chanvo tha thenkhat chan theihna a ni na a, tumahin an zah lo a, an ngaisang hek lo.
Chapo chu a tha lo a, mahse tute emaw tlawn kum khua, an kephah sil khawpa an duhsakna uma patling awm chu a tha lo a, a diklo a, a zahawm lo a ni. Chhungkua khawtlang, pawl,leh sawrkara kan hnathawhnaah te leh nun kawng dang reng reng a, mahni Induh leh mahni thu a din chin, mahni zahawmna hloh loa invawn chin hi neih a ngai a ni.

Kan Miziain a phu a, kan nun dan a dik a, kan rinawm a, kan tihtur tha taka kan tih phawt chuan, khawvel hian kan chanvo hi min hup beh sak rei thei lo, min zah zawk daih dawn a ni.

JANUARY NI 19

MI DANGTE NUN/BORUAKA BUAI LOH

1066 AD khan, Vikings hoin England ram an run a. Hei hi, Edward The confessor-a, England Lal ni mek chu, aiawhtu neiloa a thih thut avanga, a Lalthutthleng luah theitu hrang hrangin an inchuhna a ni a. William of Normandy chuan, England run tumin, hetih lai hian, Normandy vaukamah a inchhek ve mek bawk a ni.

Lal Edward-a thlaktu hi, Harold Godwinson a ni. Heng hunlaiah boruak (Saxon leh Norman inhuatna) hi Robin Hood a te thawnthu behchhan pakhat a ni. Lalber Harold-a hi, William of Normandy hian a hnuah a rawn hneh nghe nghe a. Norman Lal ten England ramah ro an rel ta a ni.

Stamford Bridge ral leh lam kai hmasa ho an kai chiah tihah chuan, Saxon hoin Vikings ho chu an lo bei ta thut mai a. An che chhe nasa ta mai a. Vikings tam zawk kha, Mel engemaw zaha hlaah an la awm a. a kal hmasa ho kha saxon ho chuan an lo bei thut ta mai a ni.

Stamford Bridge an kal kai chuan, ral leh lama Vikings tam zawk te chu an inrin hmain Saxon ho chuan an nangching thut anga, an che thei der dawn lo. Chutih lai chuan, Stamford Bridge leh lamah tawpah chuan, Vikings pasaltha pakhat hi a ding tlat mai a. An hnam Indona hrei hmingthang tak chu a keng a. Saxon sipai te chuan an su tlang thei ta reng reng lo mai a.

English Army pumpui chu a mahin darkar khat dawn a dang bet a. Mi 40 lai a thah tawh avangin saxon ho mangang chuan, Lei hnuaiah chuan lawng an kal tir a. A hmalama mite a beih buai laiin, Hnuailam atangin fei in an khawh a. A ti hlum thei ta hram a ni.

Hetih hun chhung hian, Vikings sipai ho, saxon hoin an beih thut avanga mi tam tak hloh tawh, chiai tak te chu an lo insiam remin an lo mumal leh hman a. English sipai ten Lei an paltlang theih meuh chuan, sipai rual awm dan tur mumal takin an awm leh theih phah ta a ni. Mumal takin English sipai ho chu Indonaa inhmachhawn dan tur angin an lo inhmachhawnpui leh thei ta a ni.

He Stamford Bridge Indona hi Viking Hun Tawpna tia sawi a ni thin.

He Viking pasaltha pakhat, a hming pawh hriat tawh loh hian, “E, Mi dang zawng zawng pawh an buai zo a. Kei pawh hi, insa seng ila, kal ve daih teh ang, Sipai rual heti zah keimaha lo dan ngaihna a awm lo e” ti se, tan lo khawh lo se, Viking Pasaltha dangte chu English ho hian an thah mang vek thei ang chu. A vela mite buai tak karah, a ni chuan, an kal chhan, a damchhan, a pasaltha nih chhan ang kha theih tawp chhuahin a nunpui a. A thian te, a pasalthatpui, a sipai pui, a pawlte chu an lo insiamthat leh theih phah a ni.

Keini pawh mi nunah hian buai lo ila. Mi an eiruk avanga phun a, eiru ve mai emaw, mahni lama diklo ve mai loin, inkhawm thin thenkhatte an fel teh chiamloh avanga inkhawm sawi chhia emaw, inkhawm loha tlak zui ve mai hi ching lo ila.

Kan vela boruak, kan vela mite nun dan chu eng pawh nise, keini chuan, kan nitin nunah theih tawp chhuaha mi tha thei ang ber ni turin nun hmang ila.Kan chhungkua, kan pawl, kan kohhran, kan sawrkar, kan ram a tha lo nia kan hriata siamthatna hna thawh vak kan theih loh pawhin, “kei tal hian, a tha berin ka bei ang, chutih lai chuan, mi dang pawh an lo insiam tha ve anga, min rawn beih pui ve leh mai ang” tih rilru puin kan nun kan hmang zawk tur a ni ang.

Mi dangte nun, boruak, kan chhehvel inlum leh danah hian I lo buai lo ang u.
(English kan tih leh Saxon kan tih hian, ka sawitum a inang reng)

JANUARY NI 20
HUNAWL HMAN TANGKAI

United States President 35-na, John F Kennedy, JFK an tih mai thin kha, a mipuite ngainat berte zing a mi a ni a. Hun reilo te chhung President a ni na a, a ram miuite thinlung nasa taka hnehin a kaihhruai a Cold war Politics-ah pawh a chet danin a nghawng a thuk hle a ni. Term hnih pum han hmang ta se, thil ropui tak a ti theiin an ring thin.

Thusawi thiam a ni a, Thuziah thiam tak mai leh Inchhiar zau, President thuk leh ril tak, ngaihsanawm tak a ni.

US Navy-ah a tang a. Indopui Pahnihna laia a chet dan avangin Navy and Marine Corp medal, Purple Heart Medal, American Defense Service Medal, American Campaign Medal, Asiatic-Pacific Campaign Medal with three  3⁄16″ bronze stars leh World War II Victory Medal te a dawng nghe nghe a. Indopui pahnihnaah hian hliam na tak a tuar a. Chuta a hliam tawrh leh, a hmalama Hnungzang na benvawn a lo neih tawh avang chuan, Politics a luhchilh hnuin a buai fo a. A na avangin hun tam tak damdawi leh In lamah a inenkawl a. A tana tawngtaina hun hnuhnung te pawh an hmang thin hial a ni.

Senator a nih tawh hnuah, October 1954 khan a spinal Cord an zai a. Chutia zaipui tawka thil dang ti theiloa a awm lai chuan, lehkhabu a chhiar ta vak a. Library of Congress lehkhabu tam tak a hawh a. A lehkhabu ropui leh hmingthang ber mai, “Profiles in Courage” tih bu kha a ziak ta a ni.

He a lehkhabu-ah hian American Politician hrang hrangin, mahni indahtha a, an bial mipuite dah tha a, An ram pumpui tana tha thei ang ber tura huaisennna nena an hmalakna chanchin a ziak a. Inthlan lehah an tlak phah dawn a, an dingchhuak leh tawh dawnlo a ni tih inhre chung pawha an ram tana engkim hlana beitu Politician te chetdan leh an thusawi a ziak a. A ngaihnawm mai niloin, lehkhabu ropui a tling a ni. He lehkhabu vang hian Putlizer Prize a dawn phah nghe nghe.

Kennedy hi a hnu kum nga emaw lekah US President atana thlan a ni ta nghe nghe a. A hnung zanga na avanga a buai a, thil dang ti thei loa Khuma a muta, a chet sawn theih tawk tawk laia a lo in chhiar vak leh a lo inzir vakna khan nasa takin a pui a. President a nih chhohna kawngah pawh nasa takin a pui a. A thusawi a ngaihnawm a, a che vel a hmuh nawm a, a ngaihtuahna a ril a ni. Chung chu a pian tirh ata a neih a ni lo a, a hunawlah, a inchhiar a, a inzir a ni. A hunawl loah pawh a chhiar tho bawk.

Kennedy ang hian, Natna vanga thil dang tih theih loh hun lai kan nei thei, engemaw vanga awl lai pawh kan nei thei, kan hunawl te hi ho lam mai maia hmang loa a tangkai thei ang bera hman kan tum tur a ni. Kan hmalam hun atana tangkai tur atana inzir leh inchhiarna hun a tan kan hunawl te hi kan hmang tangkai tur a ni ang.

Hna leh buaina neisa kan nih pawhin, Inchhiarna leh inzirna hun hi chu insiam hram hram tur a ni bawk. A nih loh chuan, mihring mihrinnaah thangin, hma kan sawn thei lo a ni.

JANUARY NI 20
HARSATNA HMACHHAWN
_“Nun hi awlsam tak tura duan a ni lo. Kawr ruam thuk tak leh khawk rawk paltlang ngai te paltlang thei tura theihna keimahniah hian a awm”_- *M. Scott Peck*

US Army a Lt. Colonel pakhat, Psychiarist hmingthang tak M. Scott Peck-a chu Army Medical Centre, Okinawa-ah Chief Of Psychology a ni thin a, Washington DC-ah assistant chief of psychiatry and neurology a ni thin bawk a. New Milford Hosital Mental Health Clinic-ah Medical director a nih thin bakah, New Milford, Connecticut-ah Private-in a practice thin a.

Sikul tha, Phillip Exeter Academy-ah te pawh lut pha ni mah se, a kum thum awm kum chuan, a chawlh hmang chu a haw duh ta tlat lo a. Chu chu Kum 15 mi a nihin a ni. A hel ve ngang ngang thin hle. Psychiatrist te a chhungten an han entir chuan, depression te pawh a lo nei nghe nghe. Nupui a neih hnuah pawh ngaihzawngte neiin a nun a belebut ve thin, harsatna a tawk nasa ve hle thin,

Thil tam tak a tawngin, a experience a zauin a ropui hle a ni.

Chutianga a sipai hotu nihna leh rilru lama a thiamna damdawi In hrang hranga a lo hman thin naa a thil tawn te leh hmuh thin te atanga lang chiang tak chu, Mitin mitang, tumah bangle hian Harsatna leh rilru hrehawmna tawklo hi kan awm lo reng reng a. Mahni zawnah, kan buan tawk tur harsatna leh phurrit hian mitin hi min bawm vek a ni.

Chutiang buaina nei, leh harsatna nei mi hrang hrangte chuan amah an pan thin a, sipai nupui te, sumdawng liante, Mi hausa leh hna sang tak tak thawk te, sum leh pai enkawlna lama mi thiam te leh chhungkaw nu ni a, inlama enkawl te thlengin mi tinin an pan a.

Chutiang ho buaina tam ber chu an harsatna tlanchhiatsan leh bihruksan an tum thin chu a ni.A tirah chuan, engtin tin emaw an hel thei a. a tawpah erawh zawng a lo inhnawh tawng a. Hel sen loh harsatna leh buainain a luh chilh hnu chuan harsatna thuk zawkin a tlak buak a, mahni intihhlum duhna hial an neih phah fo a, an chhungkua an kehdarh phah fo.

Harsatna hmachhawn a, paltlangna hi a hahthlak a, a hrehawm a, tuar angai a ni. Chumi kan paltlang erawh chuan, hma kan sawn a, kan thang a, lawmna leh hlimna kan chang thin. Chumi tlan chhiat tum chuan, kawng dang kan zawn chuan, rei a daih lo.

Chuvang chuan, buaina leh harsatna kan tawh chuan, huaisen taka hmachhawna sut tlang mai a tha a ni. Chutiang mite chuan lawmna kum hlun zawk an chang thin a ni.

Kan sawi takte hi M. Scott Peck-an a hna a thawhnaa a ami enkawl leh kaihhruai tawh hrang hrangte nun atanga a hmuh a ni a, chu’ng chu Lehkhabuah ziakin, “The Road Less Travelled” a ti a, lehkhabu lar leh hralh tla berte zinga mi a ni a, a hmingchherna ber pawh a ni ta nghe nghe.

Zirlai nihlai hian, Lehkha zir a peih awm loh thin hle, chak zawng, nuam zawng tih chakna a awm a. Lehkha zir aia chutiang tih hmasak erawh chuan, zirnaa hlawhchhamna leh damchhung hun rei zawka duhzawng tih theihlohna a thlen. Lehkha zir hun chhung kum rei vakloa hrehawm tuarna leh insum theihna chuan lawmna rei zawng, hun rei zawk chhunga mahni duhzawng leh chakzawng tih theihna a thlen thung a ni.

Mitinin harsatna leh buaina kan tawh hrang hrang a in ang lo a. Mi thenkhat an nuna buaina an neih chu, mahni hna han tih mai loa khawlkhawm ang chite hi a ni thin a. Ti mai loin an khawl Khawm a, a tawpah an buai nuaih thin. Hamleta pawh khan, a phuba lak tur kha a tawlh zing lutuk a, a hunah a ti lo a, thih tul lo tam taka an thih phah a, Denmark lal chhungkua an mang a, Fortinbrass-a, Norway kuta Denmark Lal thutthleng kha a awm ta ringawt a nih kha.

Kan Harsatna leh buaina hi a inang lo thin a, Kan bula miten an hmachhawn dan anga lo hmachhawn ve ngawt theih chu a ni lo a, keimahni milin, kan harsatna ang zela hmachhawn tur erawh a ni.

Engpawhnise, harsatna kan tawh ang hi huaisen taka hmachhawn phawt mai tur a ni.

JANUARY NI 22
MI DANG CHAWIMAWI

Indopui Pahnihna hunlaia African Campaign-a Tangrual sipai te ching nektu, Desert Fox an tih hial German Sipai Hotu ropui Field Marshall Erwin Rommel-a kha, a hnampuite, a sipai te leh a hmelmate pawhin an ngaihsan a ni a.
A hmelma lama General thei tak tak mai, Claude Auchinleck, Archibald Wavell, George S. Patton, Bernard Montgomery te pawhin an dahsang em em a, an chung en hial thin niin an sawi. Yom Kippur Indona hnehtu Israel sakeibaknei an tih thin General Ariel Sharon-a pawhin, Rommel-a tactic hman te, Bernard Montgomery Tactic aia chungnung zawkah a ngai a ni.
Mililary Merit Order, Iron Cross, Pour le merit leh sipai huaisen chawimawina chi hrang hrang a dawng a. German Hnam pasaltha a ngaih a ni a, an chhuang em em thin a ni.
20th July Plot an tih maia, 1944-a Hitlera Thah tumnaah Rommel-a chu inhnamhnawiha puh a ni a. Hitler-a hian, German Hnam Pasalthaa ngaih a nih avangin langsar taka tih hlum a duh lo a. Mahni intihlum turin a ti a, amah a intih hlum chuan, a chhungte zawng zawng nunna zuah a tiam a ni.
General Rommel-a chu amah a inti hlum a. Normandy hmuna tangrual pawl sipaite nena an inbeihnaa a hliam tuar loa thi anga puan zar a ni thung. State Funeral pek a ni a, a phu ang ngeiin ropui tak leh zahawm taka vuiliam a ni.
Rommel-a kha Hitler a tihhlum tuma phiarruknaah a tel ngei em tih finfiahna tak tak a awm lo a. Tela puh a ni a. A sipai chhuan ber chu a hmelma, amah tihhlumtu zinga tel nia ngaih a lo ni ta a, Hitlera pawhin a la nah le niin an sawi thin. A hmelma ni tawh mah se, General Rommel-a chu Hnam pasaltha a nihna a la bo chuang lo a, mualpho taka tihhlum chu duhloin, a ruk thei ang bera dahthat dan a la zawng talh a. A han thih takah pawh thih pangaia a thiha a chawimawina dawn leh vui tur ang zawng zawnga vuiliam a ni. Amah an puhna ang dinhmunah chuan, mualpho taka thlana liam tir awm tak a ni a, chutiang chu Hitlera chuan a duhlo a ni.


Keini zingah hi chuan, Mi chhuanawm, faktlak leh chawimawi tlak kan nei a. Kan han in chawimawi ve dawn a, “A chute khati,” “chutiang te chu a ni thin”, “Chutiang mai mai chu a lawm” kan lo ti talh a. Kan Mi chhuanawm tak te chhuanawmna laia chawimawi mai ta lo chuan, a nilo zawnga lo sawi leh beih tlat hi kan ching thin.
Mi chawimawi tlak chu chawimawi mai tur a ni a. Zir kan ngai hle. Chutih rual chuan, thil ho lutuk thlenga fak tlak anga inchhuah a, inchawimawi deuh talh hi a awm thei lawi si angem tih erawh chu a ngaihtuah theih tho mai.
Mi tinin hian tlin tawklohna lai leh chak tawklohna lai kan nei theuh mai. Chutiang vanga an chawimawina leh faktlak an nihna laia chawimawi leh fak thulh phahnana hman hi chu mi mal leh khawtlang, hnam anga kan than zelna atana thil hrisel tak a ni lem lo e.
General Erwin Rommel-a hun tawp hi I hre reng ang u.

JANUARY NI 23
TIBUAITU NEIH TLEM

Cricket a khelh tirha, Batsman tha pangai tak, Cricketer tha pangai tak kha, 2017 a lo
thlen chuan, mi tam tak ngaihdana tha ber a lo ni ta hian, T20I, ODI leh Test Cricket-ah Virat Kohli chu India National Team Captain a lo ni ta hial a ni.
Engtik emaw hunlai kha chuan, a mum deuh kang a,fit satliah pangai a ni a, Batsman tha pangai tak a ni ve ringawt a. 2012 atang kha chuan, Khawvela tha ber nih ka duh chuan, theih tawp ka chhuah angai a, ka fit chuangchuan a ngai a ni, tiin a fitness lamah tan nasa takin a la ta a. Punjabi chhungkua atanga lo chhuak a ni a, ei leh in lama tui ti taka ei thin khan, a thil ei dan a han thlak a, “Zanah te hian, ka ril tam lutuk hian, ka puan sin lai te chu ei mai chakna ka neih deuh thaw hial thin a ni” tiin a sawi nghe nghe a. Chutianga theihtawp a chhuah avang chuan khawvela cricketer fit ber ti hialin an sawi nghe nghe ta a ni.
Record tam tak a khumin a siam belh chho a, a la khumin a la siam belh zel turah ngaih a ni a. A tum angina khawvela cricketer tha leh rintlak ber te zinga mi a ni ta nghe nghe a. Cricket legend tam tak pawhin, “Khawvela tha ber a ni” an ti ta mek a ni.
Chutiang hlawhtlinna chu a awm mai mai avang leh a tih tur a tih pangai mai vanga lo thleng a ni lo a. A hun leh a thahrui leh a chak zawng tam tak tiloin Cricketer tha ber ni tura tih tur hrang hrang te chu, a tram zawk chu hrehawm leh ninawm ni mah se, a tiin a tuar hram hram a, a tum ram chu a thleng thei a ni.
England Cricket Captain hlui Nasser Hussain-an amah a kawm tumin a hlawhtlinna chhan pakhat nia Virat Kohli hian a sawi chu, Thian a kawm tlem vang tih a ni. “Thian ka kawm tlem a, ka rilru la peng tu a tlem a, ka thil tum leh tih mekah ka insawr bing thei a ni. Biak tur, kawm tur kan ngah lutuk chuan, kan hun kan hman thiam loh phaha, kan nih tur ang kan nih loh phah a ni,” tiin Virat Kohli hian a sawi.
“Cristiano Ronaldo of Cricket” tih hial a lo hlawh chho ta a ni.
Mizo te chu thian ngaina mi, thian kawm tam mi kan ni a. A taka kan inkawm loh pawhin tunah phei chuan social media-ah kan inkawm nasa. Thian kawmte hi tih loh tur chu a ni lo a, ti lo tura intih chi pawh a ni lo, mahse, a awm tawk hriat leh thliar thiam chu angai khawp mai.
Mimal anga mi tha ber ni turte hian rilru la pengtu a tlem thei ang ber neih angai. Chhungkaw enkawlnaah te, Kan lehkha zirnaah te, kan sumdawnnaah te, Thuziah kawngah te, Kan Hnathawhna hrang hrangah te, ram leh khawtlang kan kaihhruainaah te zawng zawng hian mizo fate chu kan rilru la pengtu leh kan tana tangkai kher loa inrawlhna kan ngah lutuk a. Mimal, chhungkua, Kohhran, khawtlang leh sawrkar angte pawhin kan nih tur ang hi kan ni pha lo nasa thin hle a ni.
Tibuaitu a tlem thei ang bera neia kan tih apianga a tha thei ang ber ni thei turin theih tawp I chhuah ang u.

JANUARY NI 24
MAHNI CHAWRCHHUAHNA HRIATRENG

January 2005 Issue hmasa ber ah Outlook chanchinbu chuan, Mi chi hrang hrang hi an nun khawihtu te chungchang thu tawi te te an ziah tir a.
Ziaktu Pakhat chuan, a pu, Indian Army-a Brigadier Pension chanchin hi a ziak a. A pu chu a pension hnuah pawh thil dang buaipui zuiin, mi hausa leh khawsak nuam tak a ni zui a, Brigadier lai a nih avangin a kalna a piangah mi zah a kai bawk thin.
Chutiang dinhmun sang taka ding chu ni mah sela, kar tawp a piangah hian, dumah sangha hman turin a kal a, hmun rem changah nghakuai a chiah ziah bawk a. Chutianga harsa taka a man sa te chauh lo chu sangha chu an chhungkua chuan an ei ngai miah lo a ni. Engvanga sangha tha ber ber lei a, ei mai theiin chutianga harsa taka man kher a tum thinna chhan a zawh chuan, Brigadier chuan, “Rethei taka lo chawr chhuak ka ni a. Ka dinhmun a lo that a, ka nun a nawm hnu hian, ka bul tanna leh ka chawrchhuahna ka theihnghilh mai lohnana min hriat chhuah tir leh turin harsa taka ka sangha man sa kher chauh hi ei ka duh thin a ni” tiin a chhang a ni.
Brigadier pension a ni tawh a, a nun chawhnu lam a ni tawh. Chuti chung chuan, a chapo palh a hlau a, Nun dan a theihnghilh a, awmdan a thiam loh palh a la hlau cheu a, chutiang laka veng tur chuan, a chawrchhuahna a hriatreng theihna turin a harsa a harsain sangha a man lui ve talh talh thin a nih chu.
Mi thenkhat chu, hlawhtlinna kan han chang a. Kan din chhuah dan kan theihnghih a, kan chawrchhuahna kan hlam chhiah a. Thiante chu sawi loh, nu leh pate ngei hransan te pawh an awm thei. Mi dingchhuak tam tak chu, nun dan an hloh fo. An chawrchhuahna an theihnghilh thin vang a ni.
Dinhmun thatna leh chanvo duhawm, sum leh pai thleng hian a thlawna neih tak tak a awm lo a. Kan awm mai mai vanga pek kan ni lo a. Hotea atanga bul tan deuh vek kan ni. Mahni bul tandan leh chawrchhuahna theihnghilh chuan kawng an bo a reiloteah an neih zawng zawng an hloh thin a ni.
Nun dan thiam a, nun kawng hloh loh kan duh a nih chuan, Kan chawrchhuahna, kan chawrchhuah dan hi kan theihnghilh thiang lo a ni.

JANUARY NI 25
MAHNI NIHNA ANGA LAN

English Literature-a hunpui then pakhat, Victorian Hunlai an tiha ziakmi langsar Oscar Wylde-a khan, Novel pakhat chauh a ziak a. The Picture of Dorian Gray (1890) tih a ni.

He novel hian mi dang te hmuha kan inlar tir dan leh chhungrila kan nihna diktak danglam si zia a tarlang chiang hle a ni.Tlangval hmeltha leh la naupang tak a nih lai chuan Dorian Gray-a chuan a lem a ziah tir a. Hemi hnu hian tar upat chu a hlauta hle mai a. Chutah chuan, duhthu a sam ta a. A mah tak aiah a ma lemziak chu tar ve thung se tiin.

A duhthusam chu a thleng dik tih a hrethuai a. Milemah chuan a sualna zawng zawng a inpho lang vek a, a nuna thil thalo lang chhuak thei zawng zawng chu milemah chuan a lang a. A ni chu tlangval hmeltha leh fai veng mai angin a lang ta reng a nih kha.Thil sual hrang hrangte a ti thin a. Chung a thiltihte chu a ma lem an ziah sakah zawk zel chuan a lang a, amah tak chu him pialin, fai vang leh fel em emin a lang thin a ni. A thil tihsual te chu a proof na a awm thin lo a. Miin an chungah engmah an ti let thei thin lo. A thil tih thalo tin reng te chu milemah zawk zel chuan a I innem kai thin a ni.

Mahse, a tawpah chuan a sualna te chuan a rawn um pha ta a. a sualna pawh chu sim tum ta lo chuan, a thiltihsualtea Evidence awm chhun, a ma lemziak chu tih chhiat a tum a. A lemziak a han tih chhiat chuan, amah zawk chu a thi ta a. A tawpah a lemziak chu a tira a ziaktu pa ziah angina a aw leh ta a ni.

Film-ah pawh siam nual a ni a. Mizorama kan hriat lar ve deuh tur chu, League of Extraordinary Gentlemen-ah khan, stuart Townsend-an Dorian Gray-a lem hi a chang.

Mahni nihna lo ang hian rei fe a lan chhuah theih a. Sual zep ruk te pawh a neih theih reng mai. Pawn lamah chuan, dinhmun sang, tha, duhawm ta kanga in lan tirin, kan inthup ve reng thei. Mahse, hun rei tak inthup tak tak theih a ni lo a. Kan sual zep ruk te chuan min rawn um phak hun a nei tho tho thin.

Mizote hi, mahni nihna lo ang hian kan lang nasa ve fe awm e a tih theih. Mahni nihna angina lang chhuak ila, mahni dinhmun mil hian khawsa ila, kan buaina tam tak hi kan pumpelh awm mange a tih theih thin.

Entirna fiah deuh pakhat chu, kan hmuh phak ve renga Mi hausa fapa te inneihna anga inneih ve kan tum a, kan tlin loh pui pui thil tih kan tum thin a. kohhran Thalai Pawl te pawhin, inneih tih hautak loh tihte nasa takin an tlang au pui phah a. An duhthusama mawi leh thaa ti thei te kha, a nei ve lo mahse, nei anga lan tumte nen hrut rual vek kan tum thin.

Mahni nihna anga kan lanchhuah thin loh avangin duhamna sualah kan lut a. Mahni tlin tawka in chei kan tum lo a, kan phak tawk aia sang Phone leh Tv te neih kan tum a. Mi tam tak kan chesual thin a ni. Engtikemaw lai khan, top Up thun sak theitu laka inzuar an awm an tih hial thin kha.

Mahni nihna anga lank an hreh avang hian, kan nihlohna anga lan tumin kan bei a. Kan chhung lam leh pawn lama a inmil lo a. Kan nihlohna anga kan lan tlat avangin, kan nih tur ang kan ni pha lo a, kan thlen tur ang kan thleng pha lo a, kan ta turn i thei ngei pawh kan chan phah fo. Kan nihna ang hian langchhuak ila, Kan nih chak a awm a nih pawhin, a tak taka ni thei tura beiin I thawk rim zawk ang u.

Mimal, chhungkua, Kohhran leh Khawtlang te pawh hi kan nihna ang hian langchhuak ila, a tha leh zual zawk ni thei turin bei ila. Mi tha zawk, chhungkaw tha zawk, kohhran tha zawk, Khawtlang tha zawk, hnam tha zawk kan ni ang.

Kan nihna ang ang hian huaisen takin I lang chhuak phawt ang u. Chu chu Hmalam panna kailawn a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *