DAMCHHUNG NI CHHIAR DAN 5

JANUARY NI 26

A HRE ZAWKTE THU NGAIHCHAN
1939-a Khawvel indopui Pahnihna a lo chhuah khan, USA kha a tel ve nghal mai lo a. December ni 7, 1941-a US Navy hmunpui pakhat, Pearl Harbor Japanin an beih atang chauh khan, khawvel indopui Pahnihna-ah an tel ve ta chauh a nih kha.
Pearl Harbor beihnaa a thluak bur ber, a ruahmanna siamtu ber kha, Yamamoto Isoroku, Commander in chief of Japan’s Combined Fleet a ni a. Japan naval Academy atanga inzir chhuak a ni a. 1926-27 khan, Naval attache niin, Washington DC-a Japanese embassy-ah a awm thin a. A hnu kum 15 chhung chu a kaisang chho zelin, Lawng Sipai hotu lu a lo ni ta a ni.
Indopui pahnihna kal mekah khan, Italy leh Germany nen an thawh ho avangin, Japan leh US inkar chu a chhe hle a. Japan Sawrkar hotute’n US do an sawi pawhin,Commander yamamoto hi chuan a hnial char char a. Kum khat aia rei US nena an indo vaih chuan, Japan chu a chaklo dawn a, a tuar hle dawn a ni tih nasa takin a sawi thin a. A thu chu an ngaithla duh si lo a, Prime Minister Tojo Hideki chuan, US  beihtur a ti ta bur a. Chutianga a tih tak siah chuan, an inrin loh laia beihthut chu a tha ang ber a ni, tiin Yamammoto chuan Thlawhna atanga Pearl harbor beih dan tur chuuluk leh kim takin a duang ta a.
December ni 7, 1941 khan Pearl harbor chu an bei ta a. US Indo Lawng te an tih chhiah bakah, Indo Thlawhna 180 an ti chhia a, mi 3400 zet an thi bawk a. He thil hian United States chu indonaah a hnuklut ta a. Kum 4 zet a liam leh chuan, Japan chuan atom Bomb rapthlak tak tuarin Commander Yamamoto sawi ang chuan, an tlawm a, an tuar ta hle bawk a ni.

Japan khan, an Commander-in-Chief, USAah pawh ram palaia lo zu awm tawh, a aia hre tur awm chuang lo thu kha awihin, US kha lo bei loin, Indopui pahnihnaah lo hnuklut lo se, en gang boruak nge khawvel khan a tawn ang a hriat loh a, Japan History leh khawvel history hi chu tun ang pawh hi a ni lo ang tih a chiang a ni.
Pearl harbor Japan-in an beih hnu hian, US sawrkar chuan, Douglas Mc Arthur-a an ko kir a. Japan ral nawr turin Asia lamah an tir chho ta a. Douglas Mc Arthur-a hnenah hian, 2 september, 1945 khan Japan hian Officiala an in surrender-na chu an hlan ta a ni. Gen. Douglas Mc Arthur-a hian, 1951 thleng Japan insiamthat lehna a buai pui zui a. Japan-in khawvel pum huapa dinhmun sang tak an luah leh theihna hi Douglas Mc Arthur-a vang hi a ni thui hle.
Japan sawrkar hotu lian khan Yamamoto thu an ngai chang lo kha nasa takin an tuar a, vawiin thlengin an hnamah ser a lo awm phah ta a ni.

Thangtharte hian, a hre zawk te thu ngaihchan hi kan hreh hle. Kawng kan zawh sual ta fo bawk.

Mimal nunah, chhungkaw inkaihhruainaah, Khawtlang rawng kan bawlnaah, kohhrana rawng kan bawlnaah, pawl ho hmalaknaah, kan hnathawhna kawng hrang hrangah, sawrkar inkaihhruainaah leh kawng dang dangah, a hre zawkte thu ngaihchan hi kan hreh a, a tlawm ngaihthlakah te pawh kan ngai a ni zawk thei. Chutianga a hrezawkte thu kan ngaih chan loha, kan ngaihsakloh thin avag chuan kan che sual fo a. Tulloah buaina leh harsatna khurah kan in hnuklut thin.

Keimahni zawn theuhah hian, a hre zawkte thu hi ngaichang ila, chumi mila thutlukna siamin nun te hi I hmang ang u.

JANUARY NI 27

DUHSAK BIK NEIH LOH

 

Sam Manekshaw nena India sipai General zinga Field Marshall ni thei awm chhun, India mite zinga Commander In Chief Hmasa ber Gen. KM carriapa kha, Mi dik leh rinawm, mahni thuneihna hmang sual ngai lo, duhsak bik nei lo a ni a. C-I-C a nih lai hian, INA mi leh sate sipaia thun a phal lo a, chu chuan Indian Army chu politics lakah a ti fihlim a. SC leh ST Quota dah bik chu, a remti lo a. A tha berte lak an nih loh chuan, India sipaite quality a tihniam ang tiin a tang tlat a ni.

 

1965-a Pakistan nena indonaah khan, a fapa KC Carriapa thlawhna chu kahthlak a niin, Pakistan lamin an man a. Jailah a tang a. Gen. Ayub Khan-a, carriappa te nena British Army-a lo aw mho tawh chuan, chu chu a hriat a, Carriapa a han phone a, a fapa chu a lo chhuah tur thu a sawi a. Gen. Carriapa chuan, “Indonaa in mi man (Prisoner of war) zawg zawngte kha ka fate vek an ni e. An vaia I chhuah dawn loh chuan, a ni kha rawn chhuah bik suh” tiin Gen. Ayub Khan chu a chhang a ni.

 

Sal tang a chhuah hnu hian, Gen KM carriapa fapa,KC carriapa hian, a hna (Thlawhna sipai) a chhunzawm zel a. Air Marshall dinhmun hial a han chelh pha a ni. Air Marshall hi Khawmual sipaia Lt. General tlukpui a ni.

Gen. Carriapa hia  rinawmna leh dikna vanga ngaihsan a ni a. Ama sipai pui, a General nin puite pawhin an ngaihsan khawp a ni. Ama fapa ngei pawh, a saltanna ata  chhuak thei tur pawh,sipai dangte an la tan avangin a chhuah bik theihna kha a pawmlo hiala ni.

 

Keini chu kan induh sak chungchuang lutuk a. Hna lakna kawngah te, Hnathawhna kawngah te, Hna thawhna hmun semrual (transfer)ah te, Kawng hrang hrangah ka induhsak lutuk a. Hrem ngei tur pawh hrem lohna khawpin kan induhsaka, kan khawtlang leh kan rama buai zo a. Chu chuan, chhungkua leh mimal hi min ti buai leh a. Kan duh aia thuiin kan buai ta vek a nih hi.

 

Kan phu ang ngei chanvo kan chan chu a thiang a. Kan phu ang chanvo kan chan loh pawhin kan fight a thiang a. kan phu lo chunga duhsakna uchuak kan chan erawh chuan, hnar kan tum leh chuang bik miah lo. Kan chanvo ngei tur kan chan loha kan lungawiloha, chumi vanga mi dang leh khawtlang leh sawrkar te kan ti buai hial thin a nih chuan, kan ta ni chiah lo tur, kan chanvo nipha lo,kan phuloh thil te hi chan tuma um talh hi a dik bik hauh lo ang.

 

Mi an phulo chunga duhsak bik talh hi a dik lo a. Ram tihbuaina a ni a, chutiang tura min nawr pawhin kan tang tlat zawk tur a ni ang.

 

Mi duhsakna kan um chuan, an lakah bat neiah kan insiam tihna a ni bawk a. Mahni phu angngei ni turin bei ila, chutianga kan tih ngat chuan, kan nun a zalen bawk dawn a ni.

 

Tumah hi an phu lohin duhsaka chawisan ching lo ila, an phu ang ngeia chawisan erawh kalpui ila. Chu chu keimahni zawnah kan ti thei theuh. Kan phu tawk hamthatna chauh dawng phal ve bawk ila.

 

JANUARY NI 28

MI RAWN VANG NILOA SAWISEL NGAR NGARTU NIH LOH

 

Roman catholic te’n Mi thianghlim (saint) an puan dawn hian, Puan an phu zia sawitu an awm a, Puan an phulohna sawi ngar ngartu an awm bawk a. An phulohna lam sawi ngar ngartu chu Devil’s advocate an ti thin.

 

Heta tang hian Devil’s Advocate tih tawngkam hi a lo chhuak ta a ni. Chuta tang chuan, Mi thlir dan pangai lo deuh a thil thlir, thil tih dawna a fuhlohna tur leh a hlawhtlin lohna lam tur leh, thlirna kil hrang hrang lo rawlhtute hi Devil’s Advocate tih an ni ve ta thin a.

 

Commitee naah te pawh, Agenda tan zawnga thusawi an awm a, Agenda fuh tawklohna lai te, a famkim lohna te, fimkhur angaihna lai te lo sawi an awm thin. Thil kalphung pangai hnial kalhte hian an ngaihdan ang a ni vek kher lo a. An ngaihdan ni miahlote pawh an tan lat fo a. chu chu pawl emaw, huho thilah an tangkai em em fo.

 

Social Networking site te a lo tam a, FB te kan hman uar em em hnu hian Devil’s advocate role play ve ni awm tak, nisilo, mizo zingah kan tam ta hle. FB group hrang hrangah hian sawisel hrim hrim tur zawng a, mumal leh kawngkal nei em em lo, ngaihdan mawl mang ve tak tak au chhuah pui a; ngaihdan sawhsawn tum miah lo kan pung ta hle.

 

Mahni thlirna zawn zim te atanga khawvel thlir a, thutlukna nghet tak siam a, ngaihdan l;o nei ve bur mai, chumi millo chu sawisel biah biah mai chi hi kan tam ta em em a ni.

 

Tu nge a nih pawh kan hriat meuh lo te hian, ” Ka ngawi rei ta, ka’n sawi ve ange” te hi an rawn ti v leh hlawl hlawl zel.

 

Sawiselna hi atang kai fo; a sawisel tuten an zir chuan. Thatna leh fimkhurna duh vanga sawisel an nih chuan.

 

FB a sawiselna thu chhakchhuaktu tam tak hi chuan an va sawisel tak pawh hi an hre chiang ngai meuh lo. Englaimah a nunphung pangaia mi ngaihthlak ni ngai lo leh rawn pawh ni ngai lo, sap tleirawl film ang hoa Loser deuh ang chi hian, FB kaltlanga rem chang an han neih hian, an lo tlak chham thin ang kha inphuhruk leh inhnawh khah an tum ta a, Rual an pawl a, miin an ngaihthlak ve na nia an hriat avangin an huaisarin an pawngpawrh ta viau a ni mai em?, tiin a ngaihtuah theih. A hman hmanin kan hman hman kan sawi sel ta hman hman mai a ni ber e. Mi thenkhat te chuan, an thil sawisel te Spelling ngei pawh an hre leh si lo…

 

Rawtna tha zawk kan hriat chuan si loha, kan hria a nih pawha kan sawiin sawtna a neih dawn chuan siloh chuan, lo pawngpaw phun chiar ve hi a sawt lem lo a, bula mite tan pawh a ninawm duh. Mi diklohna leh thil diklo zawng zawng sawi ve vek tum te, miin fakna an dawn lai leh lawmpuina an dawn laia an tlinlohna lo sawi talh tum te, Miin min rawn miahlohnaa lo inrawlh talh te, mahni tha ber anga mi dang dem biah biah te, a sawi ringawta duhtawk te hi ching lo ila. Kan theih tawk a tlem a nih pawhin, kan hmazawna kan theih ang angain siamthatna hna thawk ila, Mahni lamin diktakin nung bawk ila.

 

Engkim sawisel tum vek mai hi a ninawm a, a ngaithlatu tan a sawt hek lo. Min ruat a nih ngawt loh chuan, sawiselna lamah hian I ram tang lutuklo teh ang u.

 

JANUARY NI 29

CHHUNGKAW INAWPNA NGAIHPAWIMAWH

 

Maya Civilization ropui tak maiah khan, hmasang greek ho ang thoin mahni khua te te a ro in relin lalram pakhat angina khaw khat kha an awm thin a. Kha Civilization ropui tak mai kha, hun rei fe chu ropui taka par a chhuan niin a chuai ta thut mai a ni.

 

Kum tam tak chhunga Civilization ropui tak lo nei thin te khan, AD 1200 vel chuan Copan valley-ah chuan, chu chu Tunlaia Honduras khawtlhlang lamah hian, mihring 1000 pawh an cheng tling tawh lo a ni. Thawk leh khata tlachhia an ni lo a, AD 300 vel atanga tlachhe tan an nia ngaih a ni a. AD 450-na lai khan Copan Valley Valleyah hian mihring 28000 an la cheng tling a ni.

Kha Civilization chuaina chhan khan, mi thiam hrang hrangin an zirin a chhan niawma an ngaihte an sawi thin a. A tlakchhiatna chhan nia an sawi pakhat leh pawmawm tak mai chu, khatianga khawtlang nun dinhmun a han san hnu khan, chhungkaw inawpna lam an ngaihthah a. An changkan tak tak hmaa chhungkua an inawp dan leh an inkaihhruai dan khan la inkaihhruai reng a tum a. Khawtlang inkaihhruainaah pawh chutiang tho chuan an tum thin a ni.

 

An khawtlang a changkang nasa tawh mai si a. Thiam thilah leh theihnaah sang tak an thlen tawh laiin, Chhungkaw inawpna leh inkaihhruaina an hlamchhiah a. Chu chuan an khawtlang a nghawng a. Chumi nghawng kal zel chu, an chakna hnar ber chu a ei chhia a. Chuti chuan, Mayan Civilization ropui taka parchhuang chu a lo chuai ta ruai ruai mai a ni. Thawk leh khata tla chhe thut an ni lo a, tlachhe ruai ruai an ni chung si khan, insiamthat a, an chhungkua leh khawtlang inawpna siamthat tumna kha  an nei lo bawk reng reng a ni.

 

Hei hi an tlakchhiatna chhan lian tak nia an sawi pakhat a ni a.

 

Chhungkaw inawpna hi a pawimawh hle. Mimal mizia a siam a, khawtlang mizia pawh a siam a. Ram kal dan thlengin a nghawng a ni.

 

Mizote zingah chhungkaw din ve ringawt, chhungkaw inawpna tha leh inkaihhruaina tha hlamchhiah leh an tam hle. Misual kan tih tam tak hi, kaihhruaina tha dawng lo, chhungkaw inawpna mumalloa seilian an ni tam hle. Pa tam takin, Pa an ni a, an pawimawh tih an inhre lo a. Fa enkawl leh kaihhruai kawngah leh chhungkaw nunah pa an tel tlem fo. Nu tam takin Nu an ni tih an inhre lo fo bawk. Chung chuan Mimalah pawh kan nih tur ang ni phaloin min siam a. Misual te pawh hi a tur aia tam an lo chhuak fo a ni.

 

Mimal anga kan nih tur ang ni chhuak a, chhungkuaa hlima hlawhtlinga , khawtlang anga mumal taka inkaihhruai tur chuan, chhungkaw inawpna tha leh inkaihhruaina tha hi kan hriata, kan ngaih pawimawh angai hle. Kan zawn hlawhtlinna, hlimna tam tak kan hmuh lohna chhan hi chhungkaw inawpna tha kan hlamchhiah vang a ni tih pawm a tha.

 

Mitinin chhungkuaah tih tur kan nei vek, Chhungkaw inawpna tha leh inkaihhruaina tha nei turin tan I la theuh ang u.

JANUARY NI 30

MAHNI NGEIA THIAMNA HLAWHCHHUAH

January ni 27, 2017 khan India Rama University zahawm tak pakhat Bangalore University chuan, Convocation an nei a. Khami an convocation-ah khan, Banglore khaw pa Cricketer ropui, Rahul Dravid-a chu Honorary Doctorate degree pek an tum a.

Hemi an Doctorate Degree hlan tumna hi, Rahul Dravid-a chuan a lo hnar a. Research te tih ve tak tak a, Sports lama doctorate degree a academic research beihna, hlawha hlawh chhuah ka tum zawk e, tiin a hnar a. University pawh hian, thuchhuah siamin, Rahul Dravid chuan, Inngaitlawm leh thuhnuairawl takin, Doctorate degree hlan an tumna chu a hnar thu an sawi a ni.

Degree sangpui pui nei a, mahni degree phu thiamna pawh paw chhuak zolo a awm theih a, an awm fo tawh awm e. Hmun danga an thiamna degree neih ang pawl phalo deuh pawh kan hmelhriat leh kan mi hmuh zin deuh zingah pawh an awmin a rinawm.

Chutiang chu a nih mek lai chuan, Doctorate degree khawi atang emaw dawng nawlh nawlh mai hi an awm reng mai bawk a. Engnge a dawnna chhan ber pawh hriat loh leh, an dawnna university pawh chu rinhlelhawm tak mai te hi a ni fo bawk a.

Mahni thiamna hi chu a leia lei emaw, mahni hlawhchhuah leh mahni chim chin aia sang daih mai degree neih chak tlatna te, mahni thiamna phuloa in lan ropuina tura Degree ropui zawn te pawh a awm thei hial ang.

Kan hnam hian, mi thiam dik tak, mi thiam ril leh thuk tak a mamawh a. Nun kawng hrang hranga kan mamawh chhanna min pe thei tur mi thiam chi hrang hrang kan mamawh a ni. Chutiang chu an van hmel fu hian a lang fo mai. Zirna sang zawk bei a, an hun te hmante zingah pawh, an thiamna tur chin chin niawma kan ngaih han phalo hi an awm thin.

Mi lehkhathiam tak mai, mi smart , ril leh thuk tak te chevel hi chu a hmuhnawm a. An thuziak chhiar a nuam a, a bengvarthlak a. An titi a ngaihnawm a. Anmahni hi entertainment an ni ve hrim hrim a ni. Chutiang mite chuan, eng thla emawni pawh la se, a la hmuhnawm bik cheu a ni. Chutiang mi chu, Rahul Dravid-a a anga mahni thiamna a bei a bei a, a hlawhchhuak mi, degree te incheinana hmang lo mi hi an ni thin.

Taima takin, kan degree neihte phu ngeia thuk leh ril turin, mahni thiamna hi kan hlawhchhuak tur a ni. Photoshop siam dan tihbu ziaktu khan, a lehkhabu kawm kha, Photoshop hmang vekin mi dangin an design sak a, an design sak man chu a chawi nghe nghe. A lehkhabu ziah chu engang chiaha rintlak nge ni ang tih a ngaihtuah theih fu mai thei a ni.

Mi thiam tak tak ni turin inzir ila, kan degree te kan hlawhchhuah hnuah pawh, inzir leh inchhiar I bansan lo ang u.

JANUARY NI 31

A TAKA TIH

Senior Sergeant Mikhail Kalashnikov-a chu Khawvel Indopui pahnihna laia Inbeihna hmun pakhat, Bryansk-ah hliam a tuar a. A hliam tuar chung chuan, Ke-in Damdawi In a kal thleng thak a. Damdawi thiamna hmanga an enkawl hnuin, damna a lo chang chho leh ta a ni. Chutianga enkawlna a dawn lai chuan, a thil tawn tawhte chu a ngaihtuah let a. An sipaiten ralthuam an neih chhiat vanga an tawrhna te chuan a mah chu a vit ngut ngut a.

Ralthuam tha zawk chu neiin, an Rifle te chu lo tha ve deuh hlek se chu, German ho zawk chu an ching chau hrep thei dawn a. German sipaite silai chu a that fal zawk em avangin an han indo pawhin an ngam ta mang lo thin a ni.

Damdawi In Khuma mu reng chung chuan, an ram sipai hotute, an ram hruaitute, an ralthuam siamtute chu dem loin, amahin, silai tha zawk siam a tum ta a.”German ho umkir thei tur Rifle” chu siam a tum ta a ni.

1942  atangin Rifle chu a siam ta a. Hman theih tur taka a peih chu 1947-ah a ni a. Silaimu 7.62X39 mm hmangin, semi-automatic, Long stroke piston, Gas operated Rifle chu a siam chhuak ta a. 1949-ah Soviet Sipaiten an hmang tan ta a ni. 7.62X39 mm Kalashnikov Rifle tia hriat lar a ni ta a ni.

Mikhail Kalashnikov-a khan,  American M1  Rifle leh German StG44 Rifle-a a tha lai lai lakhawmin AK-47 hi a siam chhuak ta a. A zang a, a hman a awl a, a him phian bawk avangin silai lar leh ngainat hlawh tak a ni chho ta zel a. Russia rawm pawhin, huasakna tam tak neih belh phahnan a hmang chho zui ta bawk a ni.

Ak-47 hi Metre 300 vela hla atanga mihring lu leh a kawng inkar kap nalh nalh thei tura tha tawk pangai ngaih a ni a. Silai kap thiam ber berte chuan, Metre 800 a hla atang kap se, bawk chunga an kahin mu kah chhuahah, mu khat tal chuan, an kap fuh thei turah an ngai a ni.

Mikhail Kalashnikov-a khan, a damlohna khumah khan, an ram hruaitute, an sipai hotute, an ralthuam siamtute kha, an rifle that tawklohnaah khan, dem vak vak se, a that leh zualna tura rawtna emaw, tha tawh tum miah lo se, Russia-in ralthuam lama an hmasawnna kha a tlai dawrh dawn tih a chiang reng a ni. Sawiselna lai tur a hriat chu, pawngpaw sawisel loin, a aia tha zawk siam tumin a dam ve leh a hun a hmang tan nghal a. Kalashnikov-a chuan, Rifle tha leh chhuanawm tak a siam thei ta zawk a ni.

Kan hnam te zingah hian, thil hi sawisel reng kan tum a, a lo that zawkna tur erawh chuan, mi dangin tha thawh se kan ti ni ber hian a hriat thin. A aia tha zawk tur sawi tur hre lo a, thil sawisel chiam chiam hi a sawt lo a. Mimal, chhungkua, Khawtlang, Kohhran leh ram angtea insiam that kan tum a, kan duh a nih chuan, sawiseltu ringawt nilo; Mahni hun, hmun, tha leh zung, sum leh paite seng huama a tha zawk nei thei tura tha thawhtu tur kan mamawh a. Chutiang mi chu kan awm angai a, chutiang mi chu kan nih angai a ni.

Mikhail Kalashnikov-a ang hian, a takin I ti ang u.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *