DAMCHHUNG NI CHHIAR DAN

Thuhma: Thianho awmkhawmna, Whats app group thenkhata post atan kumin chu nitin, thu tangkai, ngaihnawm tel si, ngaihtuahna kaihhruai thei, Pathian thu ngun ni silo, kristian zirtirnaa innghat si hi ka post thin teh ang ka ti a.Ka la ti hlawhtling thei zel a. Chuta tang chuan, January ni 1-January ni 5 chhunga ka post tawh te ka rawn pho chhua
k a ni e.

January ni 1
ZIRNA NGAIH PAWIMAWH

Mi tupawh an tuinaah kal se a tawk mai, lehkha zir zir angai lo e kan ti thin a. Kan ti sual zel ang.

Miin eng thil pawh tise, lehkha zir hi chu a ngaihthah thiang lo a ni.
Ander Herrera hi, Man U TV in an interview naah chuan, footballer nih tum sikul la kal mekte tan fuihna thu hnuchhiah turin an ti a, chut a sawi chu
“Ka sawi duh chu, mi tlem te chauh footballa eizawnna tak tak hmu an awm. Chu chu an hriat angai. Chuvangin, lehkha zirah thahnem an ngaih angai a, nasa taka an zir angai a ni. A chhan chu, dam chhung hun thui tak atan an inbuatsaih angai a ni. Professional footballer nih hi thil awiai a ni lo, i thiam a i tha a nih chuan, bei fat fat rawh. Amaherawhchu, a hmasa zawk chu zirna a ni. Chu chu a pawimawh ber a ni” tiin.

Zirna hi hna hmuhna degree/certificate mai a ni lo. Nun thiamna min petu, khawvel hmachhawn thiamna min petu a ni.

January ni 2
HLAWHTLIN DAN THIAM

Movie/TV star lar tak, Hotshot, Two and a half man a chang thin Charlie Sheen-a hian, _”Hlawhtlina awm dan kan inzirtir thin lo a. Hei hi a pawi hle. Hlawhchhama awm dan chu kan inzitir a. ‘Bei la, bei nawn rawh,’ te kan ti a”_ a ti. Amah hi, hlawhtlina awm dan thiam lo ber pawl a ni awm e. Tunah phei chuan AIDS a vei ta hial a.

Mizo te pawh hian hlawhtlina awm dan kan inzirtir viau hi angai awm mange ka ti thin.

Han hlawhtlin ve dek dek a, nun dan thiamlo riau mai. Nun hloh ta, zu leh nulaa talbuai ta mai te hi sawi tur kan tam leh em em thin.

Mi dangte mamawh lo leh thei em emin kan inhre zui a. Kan dinhmun hi reilotea phet zui mai thei a nihna te hi kan ngaihtuah zui lem lo.
India ram university tha ve deuha research a tih ve avanga a classmate hlui, hostel awmpui thinte hre tha duh ta tlat lo thlengin an awm.

Engpawhnise, kan lo hlawhtlin hian mihring tho kan la ni tih hriat tur. Kan mihringpui te kan la mamawh reng a. Kan hlawhtlin avang hina Pathian kan nih chuan loh avangin Pathian kan la mamawh bawk

January ni 3
LAR KHELH LOH

Khasi Pa, Prof David Symlieh-a chu UPSC Chairman thar atana ruat a ni a. Ani hi Member ni lai a ni. 1992-96 chhung khan Khasi nu Rose Kharbuli chu Chairman a lo ni tawh.

Rose Kharbuli hi nu ropui leh ril tak mai, mahse, mainstream media vela lar khel lem lo, mi quality sang tak mai a ni a. Hmeichhe zinga UPSC chairman hmasa ber a ni ta nghe nghe a.

David Syiemleh-a hetia ruat a han nih hian, Media lamah chuan, NE atanga hmasa ber lo ti tawk te pawh an awm leh pek a. Mahse, Pi Rose Kharbuli hi a hmasa zawk a ni.

Chutiang chu Pi Kharbuli-I hi Mipui nawlpui zinga hriat a hlawh loh dan chu a ni. Dinhmun sang leh pawimawh tak tak a chelh a. Chung dinhmun a chelh theih chhan te chu, amah hian, “A thawhrimna leh rinawmna” vang a nih thu a sawi.

India rama Award langsar Padma Award te hi a dawng ve hauh lo na a. a dawngtu tur thlangtu committee-ah vawi tam tak a awm a. Award hi a dawngtu nih nge ropui anga, a dawngtu tur thlang theitu tih hi ngaihtuah theih tak te pawh a ni ve awm e.

Rose Kharbuli-in dinhmun ropui leh sang tak tak, pawimawh tak tak a chelh theih chhan chu a hrechiangtute pawhin ama quality vang a nih thu an sawi. A khelh vak vang a ni lo.

Kan hnam zingah hian, thil khelh vaka dinhmun sang chelh tum hi an tam hle mai. Miin dik leh rinawm min ti se, tia khel ngar ngar pawh an awm thei awm e. An hna lamah an quality chu a lo hniam leh fu thin lawi a.

Rinawm tak leh dik taka hna hi thawh tur a ni a. Mahni hna chu thiam tur a ni a. Ril tur a ni bawk. Khelh vak vanga lar leh langsar te, an politics thiam riau vanga nun kawng peng hrang hranga thleng sangte hi an daih rei lo a. An mualpho leh fo.

Lar khel lo, lansarh khel lo, mi ngaihsanna khel chuang lo a, mahni hna taima leh rinawm taka thawk a, mahni line-a ril em em mai te hi a tawpah chuan chawisanin an awm tho tho thin a ni. Pi Rose Kharbuli-I te ang hian.
Low Profile deuhin, quality tak siin aw.

JANUARY 4
MAHNI HNA TLIN TAKA THAWH

Khushwant Singh-a thian tha tak mai, Pratap Lal-a chu 1969-ah Indian Airforce-a hotu ber, Air Chief Marshal atana ruat a ni a. 1971 War hnehtu a ni zui ta nghe nghe.

Dec 3, 1971 khan Pakistan Airforce chuan India an bei thut a. Chumi chu Operation Chenghiz Khan an ti a. India hian an bei let leh nghal a, Pratap Lal-a kaihhruaina hnuaiah hian. Canberras of the No.35 Squadron leh No.106 Squadron, bakah No.5 leh No.16 squadron a tuk zanah Pakistan an lut nghal a. Western Pakistan khawthlang lam Thlawhna tumhmun Murid, Mianwali, Sargodha, Chander, Risalewala, Rafiqui, Masroor. Amite chu an bei chiam a. A hnu phei chuan Pakistan Indo thlawhna te chuan, Taxi kawng atang an thlawhchhuah angaih phah a ni.

Pratap Lal-a strategy vang hian East Pakistan (Tuna Bangladesh) boruakah Pakistan Thlawhna te an tangkai thei ta lo a, lei lamah India sipaiten harsatna tawk miah loin, Dhaka an pan theih phah ta a ni.

Pratap Lal hian, Sipai huaisen chawimawina, Mention-in-despatch leh Distinguished Flying Service bakah, Padma Bushan a dawng a. indona-a a huaisen mai bakah, Mi dik leh rinawm tak mai a ni. 1950 chho vel khan, London-ah Fighter aircraft lei turin an tir a. Defence Minister Krishna Menon-a chuan, duhsak bik company a lo nei sa a. Pratap Lal-a hian, Mi thiam bik rawih belha, thlawhna te a han en dik chuan, Krishna Menon-a duhsak bik company te thlawhna quality chu tha a tih loh avangin a hnawl hmiah mai a. Defence Minister chu a thinrim ta a. Thawlhna sipai hotu lal tak a nih tawh hnuah chuan, a chawlh tir ta a. A chawlh chhung hian, JRD Tata khan ama company-ah a lo ruai hmak thung a ni.

1962-a India leh china Indonaa India a mualpho khan, Menon-a a bang a. Hemi hnu hian, Pratap Lal hi an ko kir a. 1965 Indo-Pak War-a a chet that avangin Padma Bushan an pe a. Air Chief Marshal ni chhoin, 1971 War hnehtu a ni ta hial a ni.

Amah tak chu pa nunnem tak mai leh ze zawi tak mai hi a ni a. Sipai rorum tak nia mawi pawh hi a ni lo. Mahse, India rama Sipai (khawmual, Lawng, Thlawhna) awm tawh zinga a huaisen leh ropui berte zinga mi a ni zawk a ni.
A lo thih khan Khushwant Singh-an a sunna pawh, Shakespeare-a lemchan ziah pakhat, Julius caeser-a thu thenkhat hi a la chhuak a,
“His life was gentle.
And the element was so mixed in him,
That nature itself would stand up and say
To the world: This was a man” tih a ni.

Pratap Lal-a pa ze zawi leh nem tak chu indona ropui ber ber hnehtu a ni a. Indopui pahnihnaah hnehtu zinga mi niin huaisen chawimawina pahnih a dawng a, 1965 leh 1971 Indona hnehtu a ni bawk a. Defence Minister-in duhsak bik nei taka tute emaw a tihna tur pawh hnial ngam khawpin, a dikin a huaisen a. A hna atang an ban a. A hna atanga ban hlen phalloh khawp a ni thung. Chung chu Pratap Lal-a hian, rinawm leh huaisen taka a hnain a phut anga a tih tur te a tih mai vang a ni. A chan leh hloh tur a chhut lo a. A hnain a phut angina a ma mizia nen chuan inmil lo tak pawh a ti mai a, a ropui phah ta a ni.

Keini pawh hi, Pratap Lal-a ang hi kan ni thei a ni. Eng hna pawh thawk ila, en gang mizia pawh pu ila, mahni hna tlin takin thawk ila, rinawm leh huaisenin dingnghet tlat ila, Tumahin min duhsak lo hlen thei lo a, tumahin min rapbet hlen tak tak thei lo. Kan Thawhna pawlah min mamawh hun a lo her chhuak tho tho dawn a, kan phu tawk tawk hamthatna kan chan hlen dawn chuang lo a ni. Chutiang tur chuan, Mahni hna tlin tlaka thawh phawt mai tur a ni. A zahawm ber a, a tlo ber bawk.

JANUARY NI 5
THUAWIH

USA a Texas State hi tunhma chuan, Mexico ram chhungah a awm thin a. Ram thar ngang a ni a. Europe atanga pemlutte pawh an awm ve zel a. Hetih lai hian, Red Indian ho Commanche leh karankawa hoin an ram lo humhim an tum ve bawk a. Stephen F. Austin-an Texas Ranger a din chho bawk a.
1835 khan Texas chuan Mexico atangin Independent an sual ta a. Chutah chuan, Mexican general chu Santa Anna a ni a. Texas sipaite General chu Sam Houston-a a ni.

Texas Revolution hian October 2, 1835 – April 21, 1836 chhung a awh a. Texas revolution hun laia an indona pakhat chu Alamo indona a ni.Alamo-ah hian Texas sipai 100 vel an awm a. General sam Houston-a chuan, Jim Bowie chu Alamo kulh-ah hian a tir a. Jim Bowie hi Bowie Knife lo chhuahna hi a ni. A thupek chu, “Laipui an neih ho zawng hmun himah an kalpui anga, laksawn theih loh zawng leh anmahni chu hmun himah an insa seng ang”. A hmuna lo awm sa te chuan, Col. Jim Bowie hi an lo hmin a. Tawlh sawn lo a, Alamo-a lo inkulh a, Indo an thlang ta zawk a. Col. WB Travis leh Davy Crockett leh mi tlem te va theng mah se, Alamo-ah chuan sipai 100 vel bak an awm lo a. Ralthuam leh mihring an indaih lo nasa a ni.

Texas la kir tura lo kal Gen Santa Anna ho chuan, Alamo Kulh chu an bei ta a. Gen Santa Anna ho hian, Mexican ral hrat sipai 1500 zet an awm a ni. An in tam hleih lulai bawk a. Ni 13 zet an tan hnuin, Texan sipai lam chu an tang zo ta lo a. Mexican ho hian an la ta a. Tang pakhat mah la loin, an that vek a ni. Hei hi February 23 – March 6, 1836 chhunga thil thleng a ni. Hetiang bawk hian Texan sipaiten Goliad hmunah General Sam Houston-a thu hi an awih lo bawk a, Mexican Sipai ten an that leh vek bawk a ni.

An huaisenna hi ropui hle mah se, Sam Houston-a thupek an awih lohna avang hian Texas Sipai te nasa takin an thuanawp phah a. Thlak hat dang Sam Houston-a chu a tawlh leh a ngaih phah ta a ni. A sipai tha ber ber a chan phah bawk a Ralthuam tha engemaw zat a chan phah bawk.

General Sam Houston-a sipaite hian a thupek chu awih se chu, sipai nunna 300 vel an chan chu chan manglo thei tur an ni a. San Jacinto Indona thlen hma daihin, Sam Houston-a te hi an chak thei hial ang.

Sam Houston-a hian Ruahmanna (Military strategy) fel taka neiin, thupek a. A sipai thenkhatin a thupek an awih loh avangin, An tawrh tur aia nasa in an tawrh phah a. Nunna an chant ur aia tam daih an chan phah bawk.
Thu hi awih mai ila. Kan tihtura beisei hi that akin ti mai ila. Nu leh pa te, leh an thu kan awiha, kan ngaihthlak turte thu hi awihin ngaithla mai ila. Kan Buaina tam takah hian kan buai lo ang. Dan te hi kan himna tura siam a ni a. Zawm mai ila. Kan thatlang zel zawk dawn a ni.

Ngaihtuahna mumal nei chuang lo, tum dan mumal nei chuang lo, Nun dan mumala nung chuang silo hian, an thu kan awih turte thu hi kan awih lo leh tlat thin a. Kan tawrh tul lo thil tam tak kan tuar a, kan nih tur ang hi kan ni phalo nasa fo.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *