DOCTRINES THAT DIVIDES

Erwin Lutzer-a’n lehkhabu ngaihnawm tak mai, ‘Doctrines that Divides’ tih hi a ziak a. Mite thenhrangtu thuhrin tihna a ni mai. A bu kawm hnungah chuan, he thu hi an ziak a

“Thurin hi kristian nuna pawimawh tak mai a ni a, Chutiang a nih lai chuan, thurin thenkhat chuan kum za tam kohhran a lo thenhrang tawh a ni. Tunlai hian mi tam tak chuan, Pathian thu pawmdana danglamna chi hrang hrang awm chu hmuhkanin, inunauna an tlangau pui a. Lutzer-a chuan, chung ngaihdan inkawkalh leh inkawlkalh tak tak te chu thlirnawnin, engvanga chutiang ngaidah inang lo chu lo awm nge a nih a, engnge a awm a tulna chhante chu a rawn sawi chhuak a ni” tih hi.

Kristianna Chanchin kan thlir kir chuan, Isua thih hnu reiloteah khan, Zirtirna chi dangin kohhran hmasa kha a tibuai nghal a. Chanchintha Bute ziaka an dahna chhan pawh kha, chu chu a ni ve pakhat. Isua mihrinna paihthla thakte, Isua Pathianna paihthla thakte leh ngaihdan hrang hrang a tam khawp a. Zirtirte an han thi zo a, a hnu lawkah Isua-a inchhal ta maite an lo pung a. Mizoramah pawh Isua-a inchhalta maite thlengin kan nei ve a nih hi. Hun inher ang zelin zirtirna hrang hrang a lo chhuak a. A then chu a reh leh mai a, a reh leh lem lo, a elpui zirtirna nena kalthiangta reng pawh a awm bawk. Chumi avang leh thil dang avangin kohhran hrang hrang a lo chhuak thin bawk.

Chung Kristian thurin langsar zual leh inhnialna langsar zualte chu, Lutzer-a chhuikirin, he lehkhabuah hian a chai ta a ni.
He lehkhabu-ah hian Bung 13 a awm a, chungte chu
1. Isua kha Pathian a ni tak tak em?
2. Isua kha mihring a ni tak tak em?
3. Mari Kha Pathian Nu a ni em?
4. Peter-a kha pope hmasa ber a ni em?
5. Thiamchantirna: Rinna hmangin, sakramen hmangin, a pahnihin?
6. Engvanginnge Lalpa Zanriah chungchangah kan inlungrual theih loh?
7. Engvanginnge Baptisma chungchangah kan inlungrual theih loh?
8. Bible-ah hian lehkhabu engzat nge awm?
9. Ruatlawk nge Zalenna duhthlan: Augustine vrs Pelagius
10. Ruatlawk nge Zalenna duhthlan: Luther vrs Erasmus
11. Ruatlawk nge Zalenna duhthlan: Calvin vrs Arminius
12. Ruatlawk nge Zalenna duhthlan: Whitefield vrs Wesley
13. Chhandamna bo thei nge bo thei lo?
A bung maltete han en pawhin, a thuchai pawimawh zia leh puithu tur zia chu a hriatthiam theih awm e. Vawiin thlenga ringtu kohhran hrang hrangte kan la inhnial luih luihna a ni hlawm.

Pre-Destination leh Free will chungchangah hian Augustine-a leh Pelagius-a te, Luther-a leh Erasmus-a te, Calvin-a leh Arminius-a te, Whitefield-a leh Wesley-a te kha an inep tlat mai a ni.

Whitefield-a leh Wesley-a phei chu engemaw lai phei chuan an tualthu a chhe lek lek hman a ni. A tira rawngbawlna bul tan dun an ni. Eternal election, Final Perseverence leh Sanctification chungchangah an ngaihdan a inang lo. (Eternal Election, Final Perserverence, leh Sanctification hi Theology tawngkam a ni a, a ngai ngai ang hian ka dahzui mai). Mi dang Augustine, Calvin etc te mi dang nena an inhnial dan hrim hrim pawh a ngaihnawm a, an chanchin pawh a ngaihnawm. Lutzer-an a sawi dank an hriathmaa lo hriat sain a ngaihnawm leh zual awm e.

Heng thute hi a har em em a. Pathian hrim hrim hi a makin hriatthiam a har a, thilsiamte hi chuan Siamtu hi kan hrefiahin kan hrethiam famkim ngai dawnlo a ni. (Joba 36:26)

A chhung thu han la chhuak ila, “I have learned never to let a person tell me that he believes in Christ without asking, “Which Christ?”. Albert Schweitzer, the humanitarian, believed in a Christ who was essentially insane; Rudolf Bultmann, the German theologian, believed in a mythological Christ; Immanuel Kant, the German philosopher, believed in a human Christ; many modern cultist believe in a created Christ.” Hemi ngawt han chhiar pawh hian, a bu chhunga a thuchai ngaihnawm tur zia a hriat awm e. Miin Isua ka ring, a han tih ngawt hian, “Engang Isua maw?” han ti ila, chhanna hi a inang lo nuk fo awm e. Albert Schweitzer, Rudolf Butmann, Kant leh tunlaia ho hran nei hoin Isua an sawi hi a inang lo nuaih mai a ni. Vanawia pawlte Isua sawi leh Thangfala pawlte Isua sawi pawh a inang lo.
Pathian Thu zirna te, hriatna te hi rau lo riau leh diklo takte hian kan ngai thin a. Kan sawi fo bawk a. A chhiara chhiar, a zira zirte hi kan sawi ‘offside’ fo. Bible chhiar mang lo a, Thlarau pawla leh hriaa insawi lah kan nei leh teuh thin. A himloin, a fuhlo hle. Bible atang hian Hriatna pawimawh zia lak chhuah tur a tam mai. Hriatthiamna pawh Hriatna atang lo chuan a lo awm thei lo. Chhiar lo, zir lo chu Thlarau-in a hrilhfiah tak tak thei lo.

Lutzer-a hian, Kohhran dingtir atanga Kristian Philosophy hrang hrang inhnialna lo awm leh, a hnulam zeal ngaihdan inkalh lo awm chho a chhui a, engemaw zah hi chu na taka inhnialna a la ni, vawiin thlengin. History thlirna atanga thlirin, a ziak a, a lehkhabu dangte ai chuan chhiar uluk angai deuh. Inhnialna tin mai a chainaah hian a hawl kim thawkhat viua a, Ruatlawk leh Duhthlanna thuah chuan, a kim tawk lo deuh. Thu laila taka intarlan a tumnain, Ruatlawk a tuipui deuhna hi a lang leh thin. Calvinistic/Reform side a nihna a lang deuh hlek.

A ziaktupa hi Pastor a ni a, lehkha ziakmi a ni a, lehkhabu 30 chuang a ziak. A lehkhabu ziak zingah chuan, Hitler’s Cross tih bu vang hian Evangelical Christian Publishers Association-in Gold Medal an pe. One Minute After You Die: A Preview of Your Final Destination. Tih hi lehkhabu hralhta ber be rte zingah a tel a. The Da Vinci Deception tih, Dan Brown-a Novel da Vinci Code a review (criticize)-na chuan Kristian leh tian lo zingah lehkhabu hralh tla a tling bawk.

Lutzer-a hi 1941-a piang a ni a, Pathian Thu zirna lamah M.Th a ni a. Phd a zo lo. 1980-2016 chhung khan, Chivago khuaa Moody Church-ah Senior Pastor hna a chelh a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *