Engngahnge KRISTOFFERSON kher?

Kris-Kristofferson-177860-1-402

Zaithiam, hla phuahthiam leh lemchan thiam Kris Kristofferson hi tet te atanga dinglam leh vei lama peng lo, mi piangthar tha tak kan tih ang hi a ni ngai lem lo. Thlahtute lam atanga sipai an ni bawk a, sipaiahte a han tang ang zawk zawk a. Nupui pawh tum thum zet a nei tawh a, Rita Cooligde nen te pawh an innei tawh a, zaithiam awm tha duh lo Janis Joplin te, Barbra Streisand te pawh a lo kawp fe tawh a. A ‘tlangval’ ve hle thin. Fa pawh pariat ngawt a nei.


Kris hi June 22, 1936 khan Brownsville, Texas-ah a lo piang a. Collge a kal laiin Rugby, football, leh track and field lamahte pawh a lar hle thin a. Lehkha pawh a thiam thei a, Oxford-ah Admission a hmuin, Rhodes Scholarship pawh a dawng pha hial a ni. English Literature-ah B.Phil degree a nei pha ngat a ni. Sipaiah pawh Captain a han kai a. Kris Kristofferson hian a tih lam chu a hneh hle. Zai lamah a hming thang chho a, film lamah a inhmang a,a   hlawhtling leh viau bawk a. Cowboy film hlawhtling tak takah a changtu a ni nual bawk. A hlate zingah chuan ‘Help me make it through the night’, ‘Me and Bobby Mc Gee’, ‘Sunday Morning Coming Down’ te hi chu kan hre ve awm e. Songswriters Hall of Fame, Nashville Songswriter Hall of Fame, leh Country Music Hall of Fame-ah te a  hming hi a chuang vang tawh nghe nghe. A tawi zawnga sawi chuan, mizote’n kan awh ang hi chu a  ni vek!
Kristofferson chu 1970 chho khan country music hmunpui  Nashville -aha  ni aia lar leh mi ngaihsan an awm awm lo e tihtur hi a ni a, a hlaphuah chi hrang hrang, a bikin “For the Good Times,” “Me and Bobby McGee,” “Sunday Morning Coming Down,” “Help Me Make It Through the Night” te chu an lar em em mai a. Amah ngeiin a sak,  “Loving Her Was Easier (Than Anything I’ll Ever Do Again).” tihte lah chu a lar em em mai bawk a.
Chutia a lar a, sum tam tak a hai luh lai chuan amah kim lo a awm hian a hre ta tlat a. Mamawh nei hian a inhria a, rilru leh thlarau lamah a chak lo em em mai a. Zan khat chu Rev. Jimmie Rogers Snow-a thusawi ngaithlain a inkhawm a. Chu inkhawm chuan a nun zawng zawng a chawk danglam ta a ni. Inkhawm an han bang a, pawnah chuan van lam a han thlir a. Pathian ropuina hmaah chuan tlawm ta em em hian a inhria a, ‘Lalpa, Kei hian engnge maw ka tih a, hetiang nawmsakna chi hrang hrang hi ka tawn le? Hetiang hi dawn phu turin engthilnge ka tih le? I tan engthil nge ka tih a, hetiang thatna zozai hi ka chungah i rawn leihbuak le?’ tiin a Pathian hmaah chuan a inbun ruak ta a. Khawvela hla mawi leh ropui ber te zinga mi ‘Why Me Lord’ tih hla hi a lo piang chhuak ta a ni.
Kristofferson chuan a nun a han en a, kum hlu tam tak a khawh ralte chu a  han thlir kir a. ‘Isu, hun tam tak ka khawhral a. Nangmah hre loin ka lo tlan thin a. ka mamawh em em che a ni, min pui ang che’ mittui nen a ti chhuak ta a.
‘Lalpa, i hnen atang thil tam tak ka dawng a, engmah ka ti ngai si lo. I laka ka bat zozaite kha a rulh dan tur kawng mi kawhhmuh ta che? Kei ang bawka mi bote ka puih thei dan kawngte a awn a nih chuan puih dante ka zawng anga, nangma hnen ka lo thlen leh dan kawngte hi ka hrilh ve ang’ tiin Kris Kristofferson a chu tlawm tak tein a tlawm a. Inngaihtlawmna leh thuhnuiarawlhna nen Pathian lamah a kir leh thei ta a ni. Mi chapo, awh reng reng nei lo khan, ‘Lalpa, kei ang te hi engtia i malsawmna dawngtlaka min ngaih le?’ a ti ta zawk a. ‘Why Me Lord?’ hmangin Pathian hnenah mi tam tak a hruai zui ta a ni.
1973-khan he hla hi tih chhuah a ni a, a hnu lawka a nupui ni zui ta Rita Cooligde leh amah ai maha zai leh hlaphuah lama hlawhtling zui ta zawk, Larry Gatlin-te’n an pui a. A hla sak zawng zawng a lar leh hlawhtling(Hit) ber a ni zui ta a ni. (Why me Lord original hi kan ngaithla duh a nih chu ka nei a. Ami hneh dan a dang hle) Khawvela kristian hla lar ber pawl, ‘One day at a time’ pawh hi Mary John Wilkin nen an phuah dun a ni. Remchangah he hla an phuah dan hi kan la tarlang leh dawn nia.
Khawvela mi ropui ber berte chuan Pathian tel lo hian an nun a kim lo a ni tih an inhria a, Pathian khawngaihna an dawng ve chu mak an ti a, lawmthu an sawi thin. Keini hi engnge kan nih ve le?

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *