FAHRIN MANAWM KAPHLEIA – MIZO ESSAYIST HMASA BER

(Kumin hi Mizo Essay Platinum Jubiilee a ni)

Mihring hi engnge kan nih? Engkim duha engkim hmu tlak si lo te kan ni, thil ho mai mai umin kan inti buai a, kan chan chheteah hian kan lawm mai tur a ni tih ka lo hre chhuaka” titu Kaphleia hi he khawvelah hian kum 30 chauh a dam a, a lei kum te rei lo mah se, a dam rei ta hle chu a nih hi.
1910 January ni 10 khan Kaphleia hi a lo piang a, a pa chu Chalchhingvunga a ni a, a nu chu Chuaizovi a ni a, Thiak khuaa piang a ni. 1927-ah Tachhip khuaah an pem a, hetah hian an inbeng bel ta a ni.
Shillong-ah 1931-34 chhung a awm a, Shillong atang hian Matric a zo a ni. 1935 atang Calcutta-ah I.A a zir zawm a, Final Year a zir lai, 1937-a Exam tura a inbuatsaih lai chuan natna tihbaiawm, a hun laia an hlauh em em, T.B natna chuan a man a, “Tunah beidawngin, engmah ti lova liam leh mai tur ka lo nih hi Pathianin ka tih ve a tul lo a ti em ni ang aw, ka ti a” tia inngaihtuah khawpin a natna hian beidawnna a pe a. “Ka thinlung chu vawkhniah zawn thla ang chunin a pik a…” a ti hial a ni.

Ram leh Pathian tana thil tam tak tih tumin, natna a han vei a, rei a dam tawh dawn lo tih a inhriat chuan pawi a ti em em a, a damchhan te chu luah zo lo dawn hle hian a inhria a, “Tu pawh keimah anga mahni leh midang tana thil tha tih tum lova, ral thlir mai mai chu a ram tan a fapa tlaktlai lo, hrin man awm lo a ni ang” a ti hial a, chu chu a thuziak, ka ngaihdana Mizo Essay ropui ber ‘THLIRTU’ khar nan a hmang nghe nghe.
A rilrua a lo ruahman ang zawng zawng ti theilo a in ngaih avang hian, “Fapa hrin man awm lo” –ah a inngai pawh a ni mai awm e. Chutih rual chuan, Mizo fa  piang tawh zingah Kaphleia aia fa hrin man awm hi an awm bik awm lo e. Vawiinah pawh hian Kaphleia hi fa hrin man awm a ni a, amah ang bawk hian fa hrin man awm nih tum tur leh ni turin, kan theihna zawng zawng te kan hmang tur a ni a, kan ngaihtuahna te kan seng tur a ni tih hi kan ngaihtuah ho dawn a. Kan ngaihtuah pui ber tur chu Kaphleia mizia a ze duhawm hrang hrang kan hmuhte hi Mizo tlangval mizia tur dik tak a ni a, chu chu tunlai thangtharten kan la chhawng tur a ni, tih hi a ni ang. A mize tha tam tak kan hre kim lo a, a diary atang leh a thu leh hla kan la hmuh theih chhun chhun atangte hian chungte chu kan zir ho dawn a ni.
  1. KAPHLEIA THU LEH HLA TE: Thu leh hla lamah hian 1932 atang a inhmang tan a, a sulhnu hnuhnung ber chu a kut chhuak ropui ber THLIRTU hi a ni awm e, Thlirtu ziahnan hian a hun a duh rei viau a, April 1939-a a ziah tan chu, Nov 1939-ah a duhthusamin a zo fel chauh a ni.
Thutluang (Prose) hi 35 emaw lai a ziak a hriat a ni a, hmuh theih chin erawh chu 3 chauh a ni. Chungte chu, KURTAI (Feb, 1936), UI (Dec, 1937), THLIRTU ( April 11, 1939-Nov 10, 1939)
Thawnthu Tawi pakhat, CHHINGPUII  a ziak bawk (October 4,1938-April 11, 1939).
Hla phuah leh lehlin hi 18 a nei a, Chung zinga 10  chauh chu kan hmu thei a, chung chu a hun hnuhnung  lam ami te vek a ni. Hla lam pawh hi a thiam em em a, chu erawh chu kan umzui lo anga. Kan zeh tel hram duh erawh chu, ‘Jerusalem Ka in ropui’ tih hi Kaphleia lehlin anga sawi ngar ngar a ni thin a,tunhnaiah Biakliana lehlin anga han sawi thar ta an awm a. Kei chuan Kaphleia lehlinah ka chhiar zel dawn a. Sawi buai pawh ngaiin ka hre lo. A hla lehlin mawi tak pakhat chu, “Ka nu Hmangaihna awm nem chu” tih hi a ni.
Kaphleia thu leh hla kan la hmuh theih chhun chhun hi a hun hnunung lam a mite deuh zel a ni a, a tha tial tial nite pawhin a ngaih theih a. Mi thenkhat, ram tana thil tha tih tumna nei chuang silo te angin dam reng se chu tun ai hian Thu leh hla lamah pawh Mizo te hi kan hausa zawk ngei anga, kan khawthlir a changkang zawk ngei bawkin a rinawm.
A kut chhuak kan hmuh chhun te hi a tha em em a. Thutluang ziah kawngah pawh a tha, a thu inrem dan a thain, a sawi mial mial mai a, chutah chuan thuril tak tak a fun tel thung si a, tunlai huna thuziaktu nise kan ngaina ngawtin a rinawm.
A thu leh hla te hi kan thlir ber tur a nih loh avangin kalpui thui lo ila, THLIRTU bik erawh hi chu a hranin kan thlur zui leh ang.
  1. THLIRTU: Thlirtu hi April 11, 1939-ah a ziak tan a, Sept ni 24,1939-ah a ziak zo a, Nov 10, 1939-ah a ennawnin a  chul mam leh a. THLIRTU hi Mizo essay hmasa bera ngaih a ni a. Tichuan, kumin hi Mizo essay kum 75 tlinna a ni a, a platinum Jubilee a nih chu.
Khawvelah hian hun rei a nei tawh lo tih a inhriat hnu a a ziah a ni a, a hma kum hnih kal ta vel, a natna a vei tan hnua a diary te enkirin a ziak niin a lang bawk.
A tawngkam hman pawh a tluang thain, thu thluai thlum vak tum loin a sawi tum chu tlang takin a sawi a. A thu rem chhoh dan hi chhinchhiah awl tak a ni.
Kaphleia lunglenna te, a khawharna te, a suangtuahna te, a thahnemngaihna te, a thil tha duhna te, ram leh hnam leh khawtlang tana a duhthusam leh a ruahmanna te chu THLIRTU essay-ah hian kan hmu a ni.
  1. RAM LEH HNAM HMANGAIHTU: Mizote tana Kaphleia a hlutna ber chu a Thu leh Hla te a ni a. Chung Thu leh hla ziak tura nawr chhuaktu chu Mizo hnam a hmangaihna chu a ni.
A Essay, ‘THLIRTU’-ah te leh a hla, ‘ZORAM KA RAM’ tih leh hla dang dangah te pawh ram leh hnam a hmangaih zia hmuhtheihin a awm a.
Lehkhathiam hmasa a ni a, a hnam pum pawhin an thlir rawn a ni, C. Rokhuma pawhin, Kaphleia te chungchang hi sawiin, “Hetih lai hian Zoramin lehkhathiam a la nei tlem hle a, kutzungtang thliaka chhiar tham lek an la ni. An nu leh pa te chang lo pawhin, mipui leh kohhran te pawhin phai lama kan zirlaite hi Zoram nghah fak an ni a, kan chhuang a, hmangaihnaa kan thlun zawm reng te an ni” a ti a. Chutiang chuan, mizo hnam la mawlmang ve tak, Motor kawngpui pawhin a la luh chhuah ve loh ami te chuan an thalai zirlai tlem a zawng phai lama zirna sang zawk zira awm mek te chungah chuan an rinna an nghat a. Mizo Hnama enna thlentu ni turin an lo thlir reng a ni.
Amah pawhin hnam tana thil tha tih chu a tum a, theihna pawh a nei tih a inhria a. “Kan ram leh Pathian tan thil tih tur tam tak a awm a, dam ila theih ang tawk te te han tih ve pawh ka tum bawk a, kan tum phawt chuan hmanraw engemaw chu kan nei sa reng a ni, ka ti a” a ti a ni! Chutiang nisi a, thi mai tur dinhmuna a han ding chu pawi a ti em em mai. A rilru lam pawh nasa takin a nghawng tih a lang chiang hle a. A natna vanga a tihtur ang ti thei loa a awm lai chuan, thil tha tih tur hria, ti lo hrim hrim angahte a in ngai deuh a, “Ka ralbang a ni” te a ti hial a ni.
Ka ram hi engnge ka hnutchhiah ang?” tihte a inzawt a, “Tunlai hnam tin inel leh kan hnam pawh a insiam lai tak hian a thatzawkna leh hma a sawnna tur hria chuan mahni theih tawk theuhah beih awm a ni a” te a ti a, chutiang chuan eng lai mai pawh chuan hnam tana thil tha tih dan tur leh tihtur ringawt ngaihtuahin a hman hlel a. A thupui ber pakhat chu, ‘Kan ram tan ni se’ tih hi a ni!
He khawvelah hian kum 30 chauh a dam a, chung zinga kum 4 chu natnain a tlakbuak a ni. Mi thenkhatte angin dam rei se, anni ai hi chuan mizo hnam hian kan thatpui daih zawk ang.
Kaphleia ram leh hnam hmangaihna thu pawh hi a hnua kan la sawi leh turah te pawh hian kan zep tel zel ang.
  1. KAPHLEIA ‘MIZO’: Tunlai Mizo tam tak hi, ‘Mizo’ la in tiin, mizo tawng la hmang mah ila, kan mizo lo sawt ta hle. Keimahni hnam chanchin leh nunphung te chu kan hmusit em em mai emawni le, a tih theih hial mai.
Kaphleia thinlungah chuan Mizoram a hlu ber a, mizona chu a lian ber a ni. British sawrkar ropui vanglaia seilian a ni a, a hun lai hian Zoram pumah pawh mingo chu an dah sang em em a ni.
Hetih lai hian Mizorama zirna sang ber chu pawl ruk a ni a, a bak zir tur chuan Mizoram pawna kal angai a, chu pawh lawng kawng zawh a kal angai a ni. Kaphleia chu mi dai zau hmasa zing a mi a ni a, Shillong te leh Calcutta atang tein zir thiamna a zawng a, a hunlaia thil ropui ber ber a hmu vek a, rel, Cinema, motor leh Lawng lian te pawh a hmu vek a. British ram awp ropui taka lehkha zir a ni a, amah lehkha chhiar zau a lo ni a, “Ram nitla seng loa roreltute” sulhnu te chu a hmu ve vek chungin,
Riakmaw angin kawl pawh vel ila,
Sappui tual nuamah pawh leng ila;
Ka muanna thingthiang i ni
Ka rinpui leh ka chuan i ni” a ti thlawt mai a ni.
A thenin Africa, a thenin vur ram
A thenin tuifinriat thliarkar kan ngai e;
A thenin phaizawl, a thenin tlangram,
Kei ka chan Zoram ka ngai bang thei lo ve” tiin, Mizoram chu a tan chuan a hlu ber a, a aia ngaihawm leh ropui zawk a awm ve reng reng lo a ni. Keini hunah chuan Sap ramah te khawsak hlen kan tum ta talh thung a.
  1. KAPHLEIA ‘Pathian mi’: Kaphleia hi kristian tha leh Pathiana innghat mi a ni a, Pathian kutah kan awm vek a ni tih pawh a pawm chiang hle a ni.
A Pathian rindan hi pui tak a ni. Tunlai hunah chuan, Pathian hi Hotel room service ang lekah hian kan ngai tawh a. Thil kan chah a, min rawn petu ang maiah hian kan ngai fo. Kan duh anga thil a thlen loh chuan Pathian lakah kan vui ta tun tun mai bawk.
Kaphleia erawh zawng chutiang a ni ve hauh lo. Thihna kut vawtin a man mek lai pawhin Pathian lakah chuan a vui reng reng lo. ‘Ram leh Pathian tana thil tha tih tum’ a inkau reng a nih laia a hunlaia natna tihbaiawm takin a han man te chu Pathian lakah te vui a, mahni inkhawngaihnaa khah awm tak hi a ni a, Chutiang chu  Kaphleia chu a ni ve hauh lo, “Kan chan chheteah hian kan lawm mai tur a ni” a ti hlauh zawk a ni. Thihna ang chhunga a tawlh luh riai riai lai chuan mihring nun chu a hmufiah fe zawk a ni ngei ang le.
A thu leh hla kan hmuh ang chhun chhun atang pawh hian Pathian a rin zia leh, Pathian ram tan pawha hna thawh a tum zia pawh kan hmu thei a. Lalpa Pathian chu a inhumhimna leh a chakna a ni a, rilru baihvai leh khawhar tak maia a natna vanga amah chauha khunghran a nih lai pawha a inhnemna leh a beiseina chu Lalpaah chauh a ni.
Thi turin ka lo hawng e” titu hian a thiante a rilrua a thlahna chu, Vanramah ka lo hmuak ang che u, tih a ni. Hmalam hun eng tak a neih laia thihna ang chhunga a tawlh lut ta riai riai chu hriat thiam har a ti hle a. Chuti chung chuan, “Kan chunga thil thleng tur kan hriat lawk theihlohna hi Pathian thilpek ropui a ni” a la ti thei cheu a ni.
Pathian ring tak taktu tan lo chuan, Vanram beisei hi a theihloh a. Thih hnu piahlama lungduhte nena intawhkhawmna hi a thlir lawk theih loh a ni. Kaphleia erawh chuan, “Ni e, Luiralah kan intawk leh ang” tiin Chatuan chawlhna hmun duhawm zawkah a lo han kal hmasa a ni.
Kristian te hi ram leh hnam leh Pathian tana thawk a, thil tha tia nung tur kan ni a, chu chu Kaphleia rilru zawng zawng khaikhawmtu a ni bawk,
Kan tih leh kan sawi apiang te
Pathian leh kan ram tan ni se
“Kan rilru leh kan chakna te
Pathian leh kan ram tan ni se” a lo tih hi Ama nun leh a sulhnu zawng zawng khaikhawmna pawh a ni awm e.
  1. KAPHLEIA ‘A tiha ti mi’: Tunlaiah mitin mai hian kan ngaihdan sawi chhuahna rem chang kan nei ta deuh vek mai. Social Networking site a tang te leh Chanchinnbu lamah te, TV-ah te chenin  Mizoramah chuan a tu a te pawh hian lan chhuah, au chhuah leh dinchhuahna, kan ngaihdan sawi theihna remchang kan nei ta a. Kohhran, khawtlang leh sawrkar hi kan insel siak luih luih hi a nita mai a. Hengah te hian a sawi thintute hian a chet chhuah lam
erawh chu mi dang kutah kan dah leh vek si em ni, a tih theih thung.
Kaphleia erawh chuan Ram leh Pathian tana chet chhuah a, tha thawh a, a tih a tih a duh a, natna tihbaiawm takin a man a, a duh ang han ti thei rualin a awm ta lo a. Chu chu pawi a ti em em a, na pawh a ti a, Tha thawh ve lo a, a lo en tu maia a tang ta chu a diklo te pawh a ti viau a ni, “Thil tha tih tur hre reng si a, ti si lo chu, hre lova ti lo aiin a leh hniha hrem tur a ni” te a ti a, THLIRTU essay-ah hian a tha thawhtu leh fawng vuantu a ni hleithei ta silo chuan a rilru a tihnat zia hmuh tur a awm teuh a ni, kan tarlang veklo mai anga.
THLIRTU essay pawh hi a ‘tih a tih’ vek a khat a ni, a mah hian a ti thei ta lo mai pawh a. Mahse, THLIRTU hmang pawh hian thil tha dam rei tak tur a ti a ni.
  1. KAPHLEIA ‘Hnam chanchin hre mi’:
Mizo te hian Mi thiam tih tur ang hi kan nei ve ngei thin a. University te thleng pawhin kan nei tawh a. Heng kan mithiam te hi hnamin hun harsa a tawhlai te hian an ngawi tlat thin hian a lang a. Mipuiin kai hruaitu  an mamawh lai tak te hian engmah an sawi ngailo nite hian a hriat theih thin.
Kan Mithiamte zinga hnam leh khawtlang kalphunga tawngchhuak awm chhun te pawh hian, mizo hnam hi an hmusitin, kan social institution zawng zawngte hi engahmah an ngai lo vek a, anmahni mimal ngaihdana chu min barh ta mai thin emawni chu aw a tih theih thin.Heng kan hnam chungchanga tawng chhuakte hian Mizo history an hre tawk lo a, hriat tak tak tum pawhin an inzir ngai lo a, kan khawtlang kalphung, kan sociology pawh an hre lo a. An lehkha chhiar zauna leh an ram fan leh hmuh tawh tea mihringte awm dan an mitin pawnlam lang thei china an hmuh atangtea kan hnam hi min tehin, kan culture leh kan psyche  atanga teha mipui vantlang tana tha ber tur ni lem lo, anmahni ngaihdan ang leh an duhdan ang chu mizote awmdan tur anga sawi ta mai thinte an ni fo thin a ni.
Kaphleia erawh chu chutiang mi a ni lo a. 1939-a a phuah, Zoram Ka ram tih atangte khan Mizo History a hriatzia a hriat theih a. THLIRTU essay atang hian a hunlaia khawtlang nun a hriatchianzia a lang chiang bawk a. A hunlaia mite awm dan, a that tawklohna leh hmasawn a ngaihna laite chu a hmu chiang em em a, chungah te pawh chuan hmuhsitna lam rawngkai miah loin, hmangaihna aw ka a ni tih hriat takin, hmasawnna tur kawngte nia a hriat te chu a chhawp chhuak a ni. Tunlaia kan mi thiamte leh kan mi ropui thenkhatte hi chuan nun dan tha leh dik zawk min kawhhmuh loin kan nun dan chu min sawisel sak buaih buaih a, chutah chuan an duhtawk mai fo.
Louis L’Amour-a Novel pakhat, The Man Called Noon-ah khan, ” I hun kaltawh i hriatloh chuan hmalam hun i nei lo e” tih a awm a, an history kan hriat chian loh lutukna hian min ti chhe mek a ni.
  1. KAPHLEIA ‘Philospher’: A essay THLIRTU hi inngahna ber atan kan hmang zel lo thei lo a. Kaphleia hi Philospher ropui tak a ni a. Mihring nun thlirna pawimawh tak tak chu he essay-ah hian a kuh tul mai a ni. A thu chheh hrang hrangte hi sawi zui a, chai zui a, ngaihtuah zui tham fe mai a ni fur a. A tawngkam ang ngau ngauin, tlem a zawng I han chhwp chhuak teh ang:-
“Kelte, minit khat leka amah thattu tur kuta chi a liaka, a zuang zek zek angin kan tawp dawn thlenga hlim taka kan awm theih chuan malsawmna ropui tak kan dawng a lo ni. Chuvangin, kan chunga thil thleng tur kan hriatlawk theih lohna hi Pathian thilpek ropui a ni”
“Engvangin nge kan lung a len thin? Kan awmdanah duhtawk kan ngahloh vang a ni”
“Mihring hi engnge kan nih?  Engkim duha engmah hmu tlak silote kan ni, thil ho mai mai umin kan inti buai a, kan chan chheteah hian kan lawm mai tur a ni tih ka lo hre chhuak a”
“Khawvel hi englai pawhin siam that angai reng a, that lutuk tikni reng a nei lo ang. Mi fing thu leh, mi tha leh taima thiltih hian a vawng tha hram hram a ni”
“Kan dam rei leh rei loh te hi kumte, thlate hian a hril lo ve, kan thu leh kan thiltihin a hril ber zawk a ni”
“Mi fing leh mahni ram tana thil tha titute erawh chu khawvelah hian nung reilo mah se, an thih hnu pawhin an nung reng ang-Chu chu a ni dam rei chu”
Heng  lo pawh hi thur chhuah tur a la awm nual a. Hemi chinah hian duhtawk mai ila. Heng kan tarlante hi a thukzia chu kan ngaihtuah thiam ang.
  1. KAPHLEIA leh Independent: A chung lama kan sawi tawhah hian sawi telrem channa deuh deuh a awm a. Amaherawhchu, a hrana han sawi hram ka duh a.
Kaphleia chu 1930 chhoah Shillong leh Calcutta vela lehkha zir chho a ni a. Khawvel inlum leh hunlai a ni a, khawvel ram hrang hrangah pawh ram leh hnam hmangaihna kawngah mipuite an thang harh a. Khawvel indopui pahnih inkar cheh hunah an awm a, hun danglam takah chuan Kaphleia chu lehkha zirin a awm a. Hetih lai hian India ramah pawh Gandhi-a kaihhruaina hnuaiah zalenna sualin an vanglai tak an thleng chho a. Chungte chuan Kaphleia hi nasa takin a nghawng a ni tih a hriatthiam theih awm e.
Mizo leh British Indo atang khan kum 40 bawr emaw chauh a la inher liam a, kha Indona chanchin pawh kha a tel ve ate ngei ka atang pawhin a dawngin a rinawm a. Mizo hnam a ngaihhlut zia te kan sawi tawh a. Chu mizo hnam chu tu thuhnuaiah mah kun lo se, ama kein ding se, tih chu a duhthusam a ni.
A twngtaina pawh hetiang hi a ni
Aw chung Pathian
Hnam tin khawngaihtu thin;
I fate bawk kan ni
Mi hnuaia kan kun bik phal suh la.
Hnehchhiah leh bumna min dopui la
Kan innghahna thutak ni se;
Kan tih leh kan sawi apiangte
Pathian leh kan ram tan ni se
Aw chung Pathian
Mahnia ding turin,
Thudik leh fel zawmin
Chakna, finna min zuk pe la…”
Kaphleia thinlungah chuan Mizo chu hnam (nation) a ni a. Ama kein a ding tur a ni tih hi a ni. Keini pawhin Mizo hnam hi nation a ni a, a tawpkhawka kan nihna tur chu tuma hnuaia kun loh hi a ni, tih hi kan theihnghilh loh angai a, heta tang hian kan identity pawh kan din a tul a ni. Chu chu h khawvela kan dinchhuahna tur pawh a ni ang.
TLANGKAWMNA: Sawi tur a la tam mai a. Ka sawi tak hote pawh kha a tlangpui zawr zawr ka sawi chauh a ni a. Ka rilrua a awm ang chuan sawi vek dawn ila chu lehkhabu zahawm pangai tak ka tlin thei deuh der dawnin ka inhria.
Kaphleia Ngaihtuahna ropui zia te, ram leh hnam a hmangaih zia te, Thil a taka tih duh mi a nih zia te, Pathian a rinzia te, mizo hnam tana a suangtuahna ang a tih theih loh vanga a rilru natzia te, mizo hnam chanchin leh dinhmun a hriatchian zia te, a ‘mizo’ zia te, Philosophy lama pawh a thukzia te, Mizo hnam te mahni kea kan din a, kan independent hun thlirtu a nihzia te kan sawi tawh a.
Kan la sawilan telloh chu Kaphela hian a diary uluk takin a ziak thin a, chuta tang chuan a lehkha chhiar zau zia te leh Pathiana beiseina nghat tlat mi a nih zia te, a natna chu tihbaiawm hle mah se, a eng zawnga thil thlir hram hram mi a nih zia a hmuh theih a ni. Chu chu Kaphleia chanchina thil chhinchhiah tlak tak pakhat a ni.
Kaphleia hian sumdawnna kawnga hma kan sawn dan turte, thingtlang mite dinhmun leh hma an sawn theih dan turte pawh a vei em em a. Tunlai hun chu ni se, Policy Planner tha tak a ni thei awm e. Chu’ng an hmasawnna turte pawh chu an dinhmun dik tak uluk tak a thlir hnua chumi mila an hmasawn theih dan tha nia a hriat a ni. Chungte chu chai fe tham awm mah se, kan umzui tawh lo ang.
Kaphleia Pathian rin zia hi ropui tak a ni. A thinlung lam Pau khauh dan te hi a namai lo hle. “Mitin pumpelh theihloh thihna chu ka hlau lo va; thlan thim pawh ka hlau hek lo”a ti a ni.
Tu pawh keimah anga mahni leh midang tana thil tha tih tum lova, ral thlir mai mai chu a ram tan fapa tlaktlai lo, hrin man awm lo a ni ang” ti mah se, Kaphleia hian a ral thlir loh zia chu THLIRTU atang hian kan hmu thei a, fapa hrin man awm berte zing a mi a ni a, Mizo fate zinga fapa ropui ber pawl a ni.
Chatuan Chawlhna hmun duhawm ber chu, Hnahthel ro anga tlak bo mai inhlautu chuan, Chatuana nung turin 1940 November ni 13 zan dar 10 khan Tachhip atangin a pan ta a ni.
Mizo Hnam awm chhung chu a dam reng ang.
A thlanlung  a pain a phunah chuan, heti hian a inziak a
Kan fapa neih chhun
Kan thlamuanna ber thin” tiin. Kaphleia chanchin hre chiang apiangin a nu leh pa rilru natdan tur hi a hriatthiam pui anga, Mizo hnamin a  chan ropui zia an hriatthiam chuan, Chalchingvunga leh Chuaizovi te tluk bawkin an thinlung a na ang. Kaphleia chu Mizo hnam thlamuanna ber thin pakhat chu a ni si a.
Ar ang ka vaihna tlang zawng zawng hi
Ka zua Lal hnenah ka hrilh hun chuan
Hmangaih banin min pawm ang;
Engmah reng ka hlau lovang,
Aw, Chatuan lawmna ka chang tawh ang” tia a lo thlir hmun, JERUSALEM a IN ROPUI-ah chuan lawmna leh muanna chang tawhin min lo nghak a ni.
Thulakna te:
  1. CTEB  Publication, AINAWN, Gilzom Offset, Aizawl (2006)
  2. Kaphleia Memorial Committee, INTE THAWVENG, Rd Printech, Aizawl (2010)

Published by

admin

Ka hunawlah lehkha ka ziak thin.

One thought on “FAHRIN MANAWM KAPHLEIA – MIZO ESSAYIST HMASA BER”

  1. Ka chhiar chhuak leh dap mai. A tawp I khar dan erawh hnuk a ti ulh dawn dawn mai….

    Suangtuaha lipui ah min pil tir vang vang thei khawpa thu ngaihnawm min hlui zel teh khai

Leave a Reply

Your email address will not be published. Required fields are marked *