GUJRAL DOCTRINE

Kum 1996 Lok Sabha inthlanpuiah khan, Party mal zingah BJP chuan seat an chang hnem ber a. Seat 160 an chang a. AB Vajpayee-a sawrkar a lo ding a, ni 13 hnu lawkah a tlu leh ta mai a. National Front-Left Front chuan sawrkar an siam ta a. Hetah hian reife chu, Prime Minister tur tunge ni ang, tiin an ngaihtuah a. A tawpah Karnataka hi HD Deve Gowda chungah khan, a tlu ta a. Chumi sawrkara Foreign Minister chu, IK Gujral a ni.

IK Gujral-a hnuaiah hian, Foreign Policy thuthlung an duang a. India ram thenawmte nena inngeih chu an thupui ber a ni a. Chu chu Gujral Doctrine innghahna ber pawh a ni ta a ni.

IK Gujral hi 1919 khan, Jhelum khuah a lo piang a. India ram thendarh a lo nih kha, Jhelum hi Pakistan lamah a bet ta zawk a ni. B.Com a zawh hlimin Independent Sualtute zingah a tel chho a. 1964 khan Rajya Sabha Member atan thlan tlin a ni a. A politics zinkawng thui tak chu a zawh tan ta a ni. Russia-ah Ambassador hna a lo thawk tawh a. Indira Gandhi hnuaiah te, VP Singh-a hnuaiah te, HD Deva Gowda hnuaiah te minister lo ni tawhin, 97-98 chhung khan India ram Prime Minister a ni bawk. Mi thiam a ni a. Chancellor a lo ni tawhna Maulana Azad university chuan, “Lover of Language” tiin an sawi a ni. Poetry tuipui em em a ni bawk.

Autobiography, “Matters of Discretion” tih a ziak a. India Prime Minister zinga autobiography ziaktu awm chhun a ni. 2012 khan, kum 92 mi niin a thi.

Gujral Doctrine chuan, innghahna thuthlung panga a nei a:-

1. Bangladesh, Nepal, Bhutan , Sri Lanka leh Maldives te lakah chuan, ‘Ka hnung thka hiat lam I hnung thak ka hiat ang’ tih rilru India-in a pu lo. Rilru that akin puih an ngaihna laiah a pui zel ang.
2. Asia chhim lam ram a mite chuan, an bulhnaia mite thatlohna thlen zawnga an ram leilung leh hmunawl te ram dang an hman tir tur a ni lo ang.
3. Ram dang tualchhung inrelbawlnaah eng ram mah an va inrawlh tur a ni lo.
4. Asia chhim lam rama mite chuan, ram tin te an ramchhunga an thuniehna leh an ram huamchin te an zah sak tur a ni.
5. Harsatna leh buaina an neih pawhin, dawhkan khata thu hoin sawifel an tum tur a ni.

Hetianga Gujral Doctrine an siam na chhan hi chu, Pakistan leh China nena India-in buaina neuh neuh an neih reng vang a ni a. Chutiang buaina hahdam taka hmachhawn thei tur chuan, thenawm ram dangte nen chuan, “Muanna famkim” neih angai a ni, tiin IK Gujral hian a sawi.

Gujral Doctrine-in a huam chu, ram te zawk, SAARC member te nena an inlaichinna a ni.

Foreign Minister a nih chhung leh Prime Minister a nih chhung pawh khan, Gujral Doctrine tih hlawhtlinna tur hian theih tawp a chhuah a

. Gujral Doctrine-in a huam ram te a tlawh a. Telephone te pawhin an inbe fo a ni.
1997 khan, US Congress pawhin, IK Gurala thataka thawhpui tur, tiin resolution an pass a. Gujral-a hian, ka hriat theih chinah kum 50 chhunga a thlen vawikhatna a ni tiin a sawi.

China leh Pakistan ngei nen pawh relationship tha tak neihpui a tum a. Kawng tam takah IK Gujral hi a hlawhtling tho a. Pakistan nena laichinna tha a awm tak tak theihlohna erawh chu, Mipui sawrkar phena awm, Sipai chakna hian Pakistan chhungril thuk tak a awp beh tlat vang a ni, a ti.

IK Gujral-a autobiography hi a ngaihnawm viau mai a. Prime Minister a nih hun chhung kha a reilo em mai a. Chuti chung chung chuan, Zirna sang zawka zir tham sulhnu a hnutchhiah hman tho a ni. Gujral Doctrine hi HD deva Gowda hnuaia a Foreign Minister, India tak chuan External Affairs a ti, laia a bul tan ni mah se, a Prime Minister hun chhung zawng zawng nen pawha belhkhawmin kum 2 chauh a ni. A ngaihna hria, a tum, ngaihtuahna seng chuan, kum 2 chauh chhung pawhin, kum khaw sawi tling tur sulhnu an hnutchhiah hman thin a nih hi. Mi thenkhat, kum 30 zet an Lal chhung pawha an tih loh hlir sawi tur awm te pawh an awm ve bawk awm e.

“1998-a Office ka chhuahsan kha chuan, India ram thenawmte nena kan inlaichinna kha a tha ta a ni mai lo a, inrinhlelhna leh inrinlohtawnna te kha a bo ta niin ka hria” tiin, ama chanchin a ziahnaah hian Gujral-a chuan a ziak a ni.

The Stateman sawi dan chuan, Gujral-a hi India Prime Minister zinga mumal taka diary ziak awmchhun a ni. US President zingah pawh, panga emaw chauhin an President nih lai te pawhin Diary hi an ziak a. Joh Quincy Adams, Harry S. Truman, Ronald Reagan-a te Diary chu a hnuah a buin an ti chhuak nghe nghe. Reagan-a diary chu, thu mawl te te a ziah a ni a, Grammar diklo a tam a, “Naupang diary ni awm tak a ni” an ti a. Amah Raegan-a pawhin a chhuang vak lem lo a. “Tih chhuah leh tura hisap pawh a ni lo a, ka thai mai mai a” a ti. Kahhlum an tum tum a, damdawi ina a awm lai pawhin diary ziah hi a thulh chuang lo a ni. White House a luah hma chuan a ziak ngai lo a, President a nih chiah atang chuan, khelloin a diary hi a ziak ta ziah a ni.

Joh Quincy Adams-a kha chu, a taima ngang mai a. Kum 68 chhung zet a dairy hi a ziak a. Nikhatah darkar 6 zet diary ziahnan hun a hmang thin a ni, an ti. Kum 12 mi a nih atangin a ziak tan a, a thih dawn thlengina ziak a. A hunlaia a thil thleng leh a ngaihtuahna te chipchiar takin a ziak a. History zirna leh thlirna tha tak a tling.

India Today chanchinbu-in, “Gentleman Politician” ti a a sawi, IK Gujral kha, a hlut anga ngaihhlut a hlawh tawkloh thin zia an sawi fo a ni.

Lehkhabu, a autobiography bakah hian,
A foreign Policy for India
Continuity and Change: India’s Foreign Policy
Fann aur Shakshiyat (Urdu)

View Point: Democracy, Civilisation and Foreign Policy
Scrap Book of a Prime Minister
Musamin Gujral (Urdu: Two Volumes) te a ziak bawk.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *