HLA PHUAHTU SAIHNUNA, LENG LAL

“Tlang a dang, Lung a leng em mai
Then nan Lal remruat sa a ni” titu Saihnuna hi Fanai hnam a ni a. Leng Lal a ni. 1896-ah a Piang a. 1921-ah Pathian thu awihin, 1924-ah Baptisma a chang a. Mizo Lalte zinga Kristian Hmasa pawl a ni.

Zai a ngainaiin, zai a thiam a. Rual kawm a thiamine a ngainatawm a, a ma khuate bakah, hmun hrang hrang atangin an pan Khawm thin a. A ina lengloin an kal Khawm thin a ni.

Saihnuna hian hla 98 vel a phuah a, 1926-ah hla phuah tannin, a thih dawn 1949 thlengin hla a phuah a ni.

Saihnuna hlate hi hlawm lian tak tak Pathumah a then theih a,
1. Kristian hla
2. Khawhar Hla
3. Hla lenglawng

Amah ngeiin a hla phuah dan chungchang a sawi hi I lo ngaithla the ang

Ka Pa a thih avangin Tirhkoh hna ka zir thei ta lo a. Mahni awmna khuaah Pathian thu sawia a zing azan tin au ziah mai chu mawi lo ka ti bawk si a. Engtin nge Pathian thu ka hril theihna ni be rang tiin ka inngaihtuah reng fo thin a. Kohhran Upa te tanpuiin khawchhungah theih tawpin tangkai dawn ni ila, a tirah chuan, ‘Kan lal nge nge’ an ti anga, min fak hle mai thei a, a tawpah chuan, “Kan Kohran hi lal thu hlr a ni” tiin min rel anga, Kohhran ti buaitu ka lo ni mai ang, tihte ka hlau a. Engemaw ti tala Pathian rana tangkai ve chu ka duh ta a, Ti hian, ka ngaihtuah ta a ni.
1. Hla hi sermon kim tawi a ni
2. Hla hi lehkhathiam lo tan lehkha a ni
3. Hla hi kraws thlirna en tlang a ni
4. Hla hi Vanram leilawn a ni, tiin.

Chhim kil leh hmar kilah, Chhak leh thlangah…Kraws kawng bote leh, Kraws la hmu fiah lote tan pawh entlangah leh, leilawn atan tiin hla hi ka rilru lian ber a ni ta a. Chu chu Pathianin min hman a tumna a nih ringin ka rilrua thil lo awm chu ka ziak a, hlain ka sa chhuak ngam ta a ni”

Ama thuziak ngei atanga kan hmuh angina, a tir lamah chuan Pathian thu puanchhuahna leh Pathian thu hrilnan a phuah ber a. Miin an lo hriat lar takah chuan, Lusun te pawhin phuah sak turin an ngen zel a. An tawn angz ela phuahsakin, a hun hnuhnung lamah phei chuan, a ma lunglen dan ang zelin hla lenglawng te pawh a phuah ta zel a ni.

Engpawhnise, ama tum ang ngein, Pathian thu puanchhuahna leh rawngbawlna a tum ber a nih avangin Kristian hla pangai a phuah ho reng reng chu, a huap zo a, mitin intawm theih thilte pawh a ni reng a ni.

Saihnuna hla te chungchang hi Siamkima chuan uluk taka zir chiangin, heti hian a sawi, “ Thil reng reng hi a lunglen thlak zawngin a thlir a, tichuan, a hlaah te chuan, lunglenna leh vanram te, sakhaw hlui leh thar te a lang kawp a..Sakhaw hlui leh thar a lang kawp a..Rihdil piah ram mitthlaa min hmuhtir chung si a, Jordan lui ral ram lam min thlir tir thei tlat mai si hi a mak ang reng hle a ni. He ram pahnih, la inhre ngai hauhlo, rem tak maia a sawi kawp thei hi a hla hlutna tak pawh a ni” tiin.

Kum 1947 khan Ashtma natna chuan a tlakbuak ta hlauh mai a, leng khuaa kum 22 ro a rel hnuin, Kum 1949 June ni 17 khan
Tunah Lungngaiin kan tap
Khua a lo var hun chuan,
Lalpa ram mawiah khian
Thian kan inthen tawh lawng” tia a lo thlir thin hmunah chuan, “Lal zunleng awia lam” kumkhua turin a chawl ta a ni.

Published by

admin

Ka hunawlah lehkha ka ziak thin.

One thought on “HLA PHUAHTU SAIHNUNA, LENG LAL”

  1. Took me time to read all the comments, but I definitely enjoyed the article. It proved to be Extremely useful to me and I’m sure to all the commenters right here It’s always great when you can not only be informed, but also entertained I’m sure you had fun writing this write-up.VA:F [16e.5_908]pl.ase wait…VA:F [1.6.5_908](from 0 votes)

Leave a Reply

Your email address will not be published. Required fields are marked *