HMANGAIHNA ZUNZAM THLIRNA

Hmangaihna ZunzamBy – VL ZUITHANGA.

A DUH APIANG CHHIAR ATAN – Sabereka Khuangkaih-a tihchhuah tawh a nih avangin a hun lai mila chhiar dan kan thiam mai dawn nia.

“Eng nge ka thlan ang, Tlani?” (Sabereka Khuangkaih, September, 2010) tih ziaktu, F. Vanlalrochana hian hmangaihna hi a tuipui viau mai a; a kutchhuak chhiar thinte chuan kan thlir thiampui awm e.

Kan lehkhabu thlir tur pawh hi a bu hming ang hian hmangaihna lam kaihhnawih a ni ber. Heta hmangaihna kan tih hi nula-tlangval induhna (romantic love) kan tih hi a ni. Thu dang pawh a zep tel a, mahse, chu’ngho innghahna pawh chu hmangaihna tho a ni. He lehkhabu, Hmangaihna Zun Zam hmang hian chhungril hmangaihna min hrilh a, a dinchanpui ang em tih chu chhiartute thutluknaah a innghat.

F. Vanlalrochana lehkhabu, Hmangaihna Zun Zam -ah hian thuziak chi hrang hrang sawmhnih leh pathum lai a awm a. Tawi te te-a ziah niin, thu har pui pui leh tawng ulh tak tak a hmang lo va. A uar mah mah em aw, tih tur khawpa thu uarna tawngkam a hmang hek lo. Thu tluang pangngai leh chhiar nuam takin a bul atangin a tawp thlengin min hruai a. Chhiar laklawh tawh chuan dah leh mai a harsa ve tlat, a chhah lo bawka chhiar zawh mai a awl hle.

Tunlai tihdan (style) kan ti dawn nge, tawngkam bul angreng tak, fun kim tho bawk si leh sentence tawi te te a hmang ber a. Peh hel kual vel lovin a sawi tum chu tlang takin a sawi pawp a. Tawi fel takin a sawi duh chu a sawi charh charh a; James Dokhuma (Fam) leh kan Editor thar, Zara te thuziaka inbual thinte tan chuan a hulin duh khawp ngah a har deuh mai thei e. Mahse, tawi tak, ngaihnawm bawk si-a a chhawp chhuak thei hian tuihnang engemaw chu a pai a ni tih a hriat theih tho.

He lehkhabu hian eng nge min zirtir a tum tih lam ka ngaihtuah thiam ve lo va; nun kawng kaihhruaina tha tak a ni em tih lam pawh ka hmu thiam ve hek lo. Lei kum tam tak chhiar tawh, nu leh pa te leh phan chang tawhte tan chuan han kurpui dup dup theih a ni kher lo mai thei. Nimahsela, nun hlutna bih chianga hringnun khaidiat hrang hrang chhiar keuh keuh thinte tan chuan he lehkhabu pan te, phek 152 lek chhungah hian eng thil eng emaw tal chu kan thur chhuah theih ka ring.

Shillong-a awm tawhte chuan he lehkhabu hi kan tuipui thei ang. Barapani tuipui kama College pakhta, Union Christian College an tih chuan hmun pawimawh tak a chang a. Chu hmunah chuan he lehkhabu ziaktu hian khawvel danglam bik a zuk chen a, far thing ding thelh sung kar atangin zing ni chhuak mawi tak chu thlangtiang kawlah vawi tam tak lungleng em emin a vuiliam tawh thin!Chu tuipui kam atang chuan leilung mawina te, nun duhawm tak takte leh nula chhe lo tak takte chu a kurpui a. Kan tawmpui phak tawk lekin min puan chhuahsak a, keiniho hian hre fuh ve tak ang i maw?

Thuziak hlawm hrang hrangte hi han chip zui tlak vek a ni. Mahse, kan hman lo-ah ngai ila. Thlarau Zahawm erawh hi chu sawi loha kalsan atan chuan a zahawm em a, han kalpah hlek ila. Thangthar thil hre tak takte hian zalenna suala rammute inpekna leh thawhrimna te hi kan hmu he lek lek ta mai a, han sawi hnawm zauh a, puhchhe tawkte pawh kan awm awm e! Hmun ralmuang leh thlamuanna hmun atanga kan duhdana thutlukna kan lo siam ve ngawt thin te hi ngaihtuah a ngai reng a ni. He Thlarau Zahawm hian lei daia zal tawh, kan hnam pasalthate thuruk leh helhkam chu chiang leh fiak takin min phawrh chhuahsak a ni. Pasalthate thlarau chu chawl hahdam mawlh tawh rawh se.

F. Vanlalrochana hian a lehkhabu hmang hian Chhandamtu ke bulah min kuntir a, ngaihtuahna a hruai thui ngei mai. Sual dotute ngei pawh hi kan do sualah kan tlu lut fo thin a nih hi! Pu JAC-a chuan namen lovin zu a do a, a huvang na tak chu zu zuarho tan tawrhhlelhawm tak a ni, tawrhhlelhawm tak! Mahse, chu chu Mizoram chhungah chauh a ni. Shillong-ah a kal a, zu tha leh man to tak tak te chuan an buan thlu a, a thawkkhat pup pup tho nia! Kan lemchanna dawhsan hi a tawi hretin ka hre thin. Mizoram pela kan zin chhuahin kan nihna mai ni lo, kan thlarau nun thlengin mi’n min hmuhsak a, zir tur a vang thin khawp mai!

He lehkhabu ziaktu hian Thutlukna khirh tak maiah min sirtlukpui a tum a. Hnam dang nena inngaihzawn leh a behbawma thil awm thei tam tak engemaw zat min chhawp chhuahsak a, ngaihtuah zui tlak a ni awm e. Kan inhmangaih chuan kan innei tur a ni, tih hi ngaihdan tlanglawn a ni. Mahse, ani chuan a hmangaih leh duh tak, Naga nula, Amenla chu a nei tlat lo!

Hnam dang nupui-pasala neih chungchangah hian inhnialna tawp thei lo a awm ang. Inneia-te chhuanlam ber chu hmangaihna a ni; do zawh a har thin reng lah tak a! He lehkhabu ziaktu ve thung chuan, “Hmangaihna kan tih teh fo hi mi chaklote chhuanlam a ni” a ti ve thung. Hnam dang neih loh chu thutlukna min siampui dan a nih hmel.

Thu thenkhat hi chu lehlin, a remchan dan anga her rem te a ni a. Ngaihnawm ti taka chhiar theih tur vek a ni. A ziaktu hian Style danglam deuh tak a chher a, thenkhat chuan a thuluang a tiulh kan ti thei ang. Entirnan, “Hmangaihna an tih hi a awmzia ka zir tan a, kha sikulah khan” (p. 18). Heti ang hi a tam mai.

Thu kan sawia kan tawngkam hman thin anga tluang pawhin a dah theih ang. Mahse, a ziaktu hman dan a ni a, kan her remsak ngam bawk si lo. Paragraph sei pui pui a siam lo va. Hei hian mit a la a, chhiar a tihahdam a, chhiar zawh mai a awlsam phah. Kan chhiar zawh peih loh lehkhabu chuan thu tam a sawi thei lo. Chuvangin chhiar zawh theih lehkhabu chu a hlu a ni.

Tar lan ka hreh em em, tul tlat si a awm. Chu chu chhutsual awm leh thin hi a ni. Zawm loh tur zawm a awm nual a, zawm tur zawm loh a awm bawk. Heng kawngah hian hmasawnna tur kan la nei.

Kan lehkhabu thlir mek hi lehkhabu chhutu lar tak, Gilzom Offset chhut a ni a, copy 1500 niin Rs 60/- man a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *