HRINGNUN THLIPUI

Khawvel thil thlengah hian kan thu lo viau mai. Kan nunna leh kan hun hi kan ta emaw kan ti fo a, thu em emin kan inhria a, ni a kan hriat dan anga her vel mai maiah kan ngai fo. A ni teuh si lo. Kan thu hauh lo. Kan duh loh danin thil thleng a, nilo se ka tih a ni a, ni se kan tih a ni lo a. Chutiang ni chung si chuan, hun hi kan ta emaw kan ti fo, kan ti sual thin.

Muang taka kan awm laiin hringnun thlipuiin min han nuai a, min han sawp zet zawngin kan nun hi kan thu a nih loh zia a chiang thin. Hringnun thlipuiina mi a sawp hnu a, kan thutlukna chuan min ti ropuiin, min ti chhe thin.

Thawnthuah te leh, thuziak tam takah te, Mihring nun kawng hi tuipuia khualzin anga tehkhin a ni thin. Ringtu thlarau nun kawng leh tuipui khualzinna hi tehkhin a ni fo bawk. A chang chuan tluang takin, tuipui dam dup maiah kan zin a, hriat loh karin tuifawn a lo so but a, a chang leh thlipui a lo tleh thut a, a chang chuan hmar arsi hmu miahloin kan then kan then a. Hringnun tuipui zaua kan khualzin kawngah ringtute kan vanneihna chu kan Lawnga Lal Isua a lo tel ve hi a ni. A buaithlak ber chu Lal Isua chu ngaihsakloin kan lawngah chuan thil dang kan ti a, khaw dang kan lo hawi a. Kan lo ngaihthah a, Lal Isua pawh thlamuang takin a lo chawl a. Hringnun thlipui a lo thawk a, kan lo auh ngailoh avangin kan hre chhuak mai lo a, kan buai fe hnuah kan hre chhuak a, kan au chauh thin.

Kan tunlai khawvel hian Amah theihnghilhna remchang min siam sak nasa tawh khawp. Hman raw changkang ber ber a lo chhuak a, engkim a lo awlsam a. Kan mit chak zawng, kan beng zatna zawng, engpawh mai hi hmehkhep pahnih khat hmeha neih theih a ni ta fur mai. Pathian bia a, a rawngbawlna chu hun khawhralnaa ngai khawpin, mahni leh mahni kan inawm tlei tan ta. Tiau dupa in sa ang kha kan ni, Lal Isuaa kan sak loh chuan. Thlipui leh tuifawn a lo lan hma chuan, in nuam leh duhawm tak a ni. Lal Isuaah kan sak miau loh chuan, tuifawnin a len vek thin a. Khawvelah hian duhthlan tur leh belh tur pawh nei tawh loin kan inhre ta thin a ni. Tiau dupa tuipui fawnin kan nun min len bo sak lai pawhin Lal Isua chuan A chuanna lawnga lut turin min la au reng a. Kan luh leh luh loha kan thutlukna chuan Chatuan a hawlh ta thin a ni.

Fak hla phuahtu ropui berte zinga mi Mosie Lister-a hla pakhat, “Till the storm passes by” tih kha ka hre chhuak fo thin. Zan thim takah thlipui a tleh laiin thla barin ka awm a, khawpui ri dur dur te chuan lung a muan lo kher mai, Lalpa duhtak, ka auhna che hi chhang la, thlipui a reh thlengin min hum ang che, tiin bul a tan a.

A thunawn hi a mawi ka ti zual thin.
Till the storm passes over
till the thunder sounds no more
till the clouds roll forever from the sky
hold me fast let me stand
in the hollow of thy hand
keep me safe till the storm passes by,
Khawpui ri a tawp a, Thlipui a reh thlengin , I kut chak chuan mi chelh la, thlipui a reh thlengin min hum ang che.

When the long night has ended
and the storms come no more
let me stand in thy pressence
on that bright peaceful shore
in that land where the tempest never comes
Lord may i dwell with thee
till the storm passes by.
Thlipui a reh a, zanthim a liam hunah, i kiangah mi hruai la, vaukam mawi takah, thlipui reng a tleh tawh ngailohnaah chuan.

Many times satan tells me
theres is no need to try
for there is no end of sorrow
there’s no hope by and by
but i know thou art with me and tomorrow ill rise
where the storms never darken the skies.
Setana hian vawi tam tak ka ngaihtuahna a ti buai a, tlanchhiat san tum buai suh, i lungngaihna hi a tawp dawn chuang lo, beisei tur i nei tawh lo min thin a; Nang ka kiangah I awm tih ka hria a, ni eng mawi zawkah ka tho leh anga, thlipui engmahin van khi a ti thim tawh ngai lo ang.

Mosie Lister-a hmingpum hi Thomas Mosie Lister a ni a, September 8, 1921-ah a piang. Gospel music history-a mi ropui dangte ang bawkin kristian chhungkua, music tuipui takah a seilian a. 1939 khan Vaughan School of Music , Tennessee-ah a zir. Hetah hian zai lamah a inhmang chho a, quartet-ah te a tel chho a. 1940 tir lam khan Lister Sunny South quartet bul tantu zingah a tel a, he quartet hian zaimi ropui, Jim “Big Chief” Wetherington, John Mathews, Horace Parrish, Lee Kitchens, leh JD Sumner a vawrh lar a ni.

Melody Master-ah te a tel leh hnuin, Quartet ropui ber pawl, The Statesman quartet bul tantu zingah a tel leh a, an zaitupa ber a ni nghe nghe a. Jake Hess-an a rawn thlak a, Jake Hess-a chu fak hla satute zinga ropui ber pawlah a inhlang kai chho ta a ni.

Hemi hnu hian hla phuah lamah a in hmang chho ta a. Quartet hla a phuah hnem ber a. A hla te hi a lar hlawm hle. Mizo tawng pawhin lehlin a ni nual a, lehlin loh ho pawh kan hriat lar a tam hle. “How Long Has It Been” (1956), “Happy Rhythm” (1953), “Goodbye World Goodbye” (1952), “He Knows Just What I Need” (1955), “I’ve Been Changed” (1959), “Till The Storm Passes By” (1958), “Where No One Stands Alone” (1955), “The King And I Walk Hand In Hand” (1954), and “While Ages Roll” (1970) tihte pawh hi kan hre awm e. A hla zinga pakhat , His Hand In Mine chu Elvis Presley a Gospel album hming putu hla a ni ta nghe nghe. Gospel Music Hall of Fame hrang hrangah dah luh a ni a. Fak hla phuahtu ropui ber ber te chhiar dawn ila, a hming hi kn lam hmasak ber turte zing a mi a ni ang. Amah Mosie Lister a ngei pawh hi, hringnun thlipuiin a nuai nasa thin hle. Lalpa a au thin a, anin hringnun thlipui lak ata a chhanhim thin a ni.

Amah Lal Isuan hmaichhana a thlan te ngei pawh khan a takin hringnun thlipui hi an lo tawk tawh a ni. Nikhat chu kan Lalpa khan dil kamah a zirtir a. Nilengin. A zirtirna ngaithlatute hnenah chuan tehkhin thu hrang hrang hmangin a zirtir a. Hemi tum hian a tehkhin thu hmingthang tak mai pakhat “Buh chi theh” tehkhin thute pawh kha a sawi a ni. Tlai lam a lo nih chuan, dil ral leh lamah chuan i kai ang u a ti a. Lawngin a kal ta a. Lawnga an chuan lai chuan thlipui na tak mai a lo tleh a, tuifawnte pawh chu lawngah chuan a lo fawn lut hlawp hlawp mai a. Tuite chuan lawng chu a lo khat dawn ta mai a. Lal Isua lah chuan lukham khamin, lawng mei lamah chuan tui tak hian a lo muhil a. An va kai tho a, an hlauh thu an hrilh a. Ani chu a lo tho a, thlipui leh tuifawn te chu, “Ngawi la, awm hle hle rawh” a han ti a. A lo thiang ta vek mai. A zirtirte chu, “Enga tinge chu ti em em a in hlauh ni le, rinna reng in nei lo em ni?” tiin a kamkhat hial. A zirtirte chuan mak an ti hle a, “He mi tunge ni le, thli leh dil lam pawhin a thu an awih hi” an ti a. A zirtirte hian an la hre chiang tawk lo hle a ni. Amah an zui nitin a, a thilmak tih tam tak an hmu a, an zirtirna an ngaithla nitin a, chuti chung chuan, “Hemi hi tunge ni le?” an la ti chauh mai. Kan chunga a thatna zozai kan hmuh hnuah pawh, “Hemi hi tunge ni le?” tih fo hi thilawm thei tak chu a lo ni.

Galili dilah hian thlipui hi a thawk thut thut thin a. Boruak pangai a awm lai te hian kawl a lo phe a, thlipui a lo thawk thut a, tuifawn a lo in chhawk nghawl nghawl a. Dil chunga lawnga kal mekte inring lo lai te pawh a ti buai leh thut thin. Hringnun Galalili-ah pawh muang taka lawnga kan tawlh del del laiin thlipui na tak a lo thawk thut thin a ni. Galili-a Lal Isua nena lawnga ral leh lam kai tum a zirtirte kha Lal isuan thlipui a hau reh sak a. Keini pawh he khawvel tuifinriat zaua kan khualzinnaah hian thlipui leh tuifawnin min nuai se, Amah kan auh chuan min hauh reh sak dawn a ni.

Hringnun sak leh khirh ber, tuipui fawn phul bulh bulhna karah, hringnun thlipuiin min nuai lai pawhin, Lal Isuaah chuan thlamuanna kan chang thei a. Thinlung muanna min pe thei a ni. Lal isua khan hringnun thlipui lak ata engtin nge min muan thin le?

Thihna vanga lungchhiatna leh tawrhna lakah thlamuanna min pe. Thihna vanga Lungchhiatna leh tawrhna thlipuiin min nuai laiin, kan lalpa chuan thlamuanna duhawm tak min pe a ni. Lungngaihna thlipui a lo tleh lai chuan, lo tleh thin tur pawh a ni a, Nunna lo awm tur ropui tak chanchin min hrilh a, min thlamuan thin. Thihna thim tak mai chu Chatuan nunna engin min thlak sak a ni. Pathian hmangaihna ropui tak chanchin chu min hriattir thin. Thawnthu hlui pakhat a awm. Pangpar huan enkawltupa chanchin chu. Pangpar huan enkawltupa chuan a huanah chuan pangpar duh em em mai a nei a. Nikhat chu, chu pangpar a duh em em mai chu a lo bo ta daih a. A lungawi loin, a phun nasa hle. Nakinah chuan Huan neitupa chu a lo kal a, Pangpar mawi tak chu , “Ka duh a, ka thliak ta mai a ni e” tiin a rawn hrilh fiah ta a. Thihna vanga lungngaihna leh tawrhna thlipuiin min nuai laiin Kan Lalpa chuan, kan duh tak kal tate chu, rammawia tlansate zinga par vul turin Pathianin a hruai ta a ni tih min hrilh a, engtikah emaw chuan Chatuan Engah kan la tawk leh hlawm dawn a ni tiin min thlamuan thin a ni.

Hringnun harsatnain rinhlelhna, buaina leh hrehawmnaa min hnuhluh laiin Lal Isua chuan muanna min pe. Engtik hun lai emaw chuan, tih ber tur hriat loh, duhthlan thiam loh hun lai kan nei thin. Hringnun lam peng thuamah kan ding a, kawng zawh ber tur hreloin kan buai fo thin. Hetih huna A lam kan hawi a, “Lalpa, khawi nge ka thlan dawn le?” kan tih chuan, engkim a lo veng fel kuar thin. A lungchhiat thlak lai chu, hetiang hunah hian kan tih tur kan hre lo a ni lo a, Lal Isua hnena kan inpe pumhlum thin lo hi a ni. Engnge ti se min duh zawt ila, min duh ang chu ti ila, hetiang thlipui hi a lo reh anga, muanna kan nei dawn a ni.

Rilru hahna thlipuiin min nuai laiin, muanna min pe thin bawk. Thlamuanna hmelma ber chu Lungngaihna a ni. Keimahni kan inngaihtuah buai a, kan hmalam hriat lawkloh ngaihtuah buaiin kan lungngai a, kan mangang a, kan hmangaihte kan ngaihtuah a, kan lungngai fo. Lal Isua chuan, Pa, Ama fate tulloa mit tui luan tir ngailo tur chanchin min hrilh. Hmangaihna tawpchin nei lo, keimahni leh kan hmangaihte pawhin kan bosan theih loh tur chanchin te chu min hriattir a. Lungngaihna leh manganna, rilru buaina karah Pathian Hmangaihna leh thlamuanna duhawm tak chu min hriattir a ni.

Kan rinna ngei pawh hi thlipui hrang hrangin a han nuai a, kan nghing fo thin. “Ngawi la, awm hle hle rawh” tia Galili dila thli leh tuifawn te hauh reh tu kha Kan Lalpa hi a ni. Rinhlelh tur a awm lo e.

Ram leh hnam hmangaihna hla te, Mizoram mawina puan chhuahna hla a phuah te a ropui hlawm em avanga zofate’n kan theihnghilh ngailoh tur Rokunga khan fakna hla mawi tak tak a phuah tho a. Kan hre lar ve vek kher lo thung. Kohhran Upa a ni a, a rawngbawlpui te leh a eizawnna a a thawhpui ten sawiselna tur an hre lo an ti hial. Ani meuh pawhin, “Sualin bo mah ila” (1969), tiin a thihdawnah a testimony a puang chhuak hial. Hringnun thlipui hian a nuai ve viau thin a ni. A hla te zinga kan hriat lar em em loh pakhatah chuan, ” Aw,ka damlai tuipui fawn, sual thlipui hrang karah hian, boralin ka pil mai dawn, aw, Isu min kai ang che” a lo ti hial a ni. “Khawdur leh thlipui hlauhawm, tuipui fawn inchhawk ri nen, i hnen lam ka rawn pan e; Aw, Isu min kai ang che ” tiin a tawngtai a. A kharna phei hi chu a mawi mange,
“Dam lai tuipui Galili
Tuifawnin min khuh mah se
Ka chhungah van lal a mu;
A tawk e, Lalpa, nang nen” Lalpaa thlamuanna neitute thu khar dan hi chu a dang bik thin a ni.

Margaret Alva khan thawnthu mawi tak mai a sawi thin. Tlang pang a khaw te tak te pakhatah hian sikul pakhat hi a awm ve a. An zirtirtu chuan a naupangte chu Lal Isua thlipui hauh reh chanchin hi a hrilh thin a. Nikhat chu vur thlipui hi a tlehchiam mai a. Sikul khar alo ngai dawn ta a. Thlipui karah chuan Zirtirtu chuan a naupangte chu hmun him lamah harsa takin a kalpui a. Chutih lai chuan, naupang te pakhat chuan, ” Kha pa Isua kha chuan heng hi a ti kiang vek ang” a ti a. He nau hian a ti dik a ni, an zirtirtu chu zirtirtu ropui tak a ni ngei mai. He thawnthu atanga kan zir tur chu, hringnun thlipuiin kan chhungril thlenga dim baksak lo a min nuai laiin kan tan Lal Isua chu a awm a, Ani min awmpuina karah chuan thlipui hlauhawm berah muanna kan nei thei a, chu chu eng thlipui mahin min len bo sak ngai lo ang.

Aw Min hum rawh Chatuan Lungpui
I hmelmawi ka hmuh hma chuan,
Dam chhung thlipui ka tuar laiin
Chatuan Lungpui min hum rawh.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *