JERUSALEM THARAH LALLIANSAWMA -F. Vanlalrochana

Kristian Thalai Pawla kan inhman tirh lai khan, “Muhilte tho turin, tawtawrawt a lo ri e, Nangni muhil tho ru, In tan khua a tlai hma hian” tih te, “Lal lenna zion khawpui tual nuam” te, “Jerusalem thar” te kha tui takin Gen Conference-ah te khan kan sa thin a.

Hei hi 2014-a kan ina a lo len tuma thla kan lakdun a ni. Conference ti nuamtu a ni thin, Khatiang hla te kha.

Synod High School-a kan kal laiin, Boys Hostel-ah kan awm thin a. Mission Vengthlang kohhran biak inah kan inkhawm thin a. Khami inkhawm tumkhatah khan, Pa Pakhat an din tir a, “T. Upa Lalliansawma, Darlung” an ti a, “Hla Phuah thiam” kha a ni tih ka hre mai a. Chu chu Lalliansawma ka hmuh hmasak ber a ni a. Ral khat atanga hmu ka ni.

KTP a kan han inhmang chho kha, zai nuam kan ti a, tlai fellowship te, Bial KTP conference te, General Conference te kha nuam kan ti thin. Lalliansawma te, T. Romama te, Ramdinthara Sailo hla te khan kan zai a, conference apiangin hla thar lar tak a rawn chhuak a, Kumtluana KTP boruak kha a ti nuam thin. Khati ang hun te kha a liam ta deuhin ka hria a. Lalliansawma te hla phuah vanglai hun a liam a, thangthar ten anmahni thlakzo tur kan la neih leh rihloh vangte pawh a ni ang.

ZONET-ah Rk Lianzuala’n a kawmna kha ka hmu fuh le. Local TV inkawmna en peih lo tak hian, Pu Rka’n mi a kawmna hi chu ka en peih viau a. Lalliansawma a lo ni kher bawk a. Khatiang te kha, a ngaihnawm mang tak e. A kawm tupa lah, KTP hruaitu hlun, Zaipawl hruaitu hlun, a kawm awm takin a kawm a, zawh tur a hria a. A ngaihnawm.

Kha kha Tuikuala kan awm lai a ni a. Pastor Quarters-ah a lo leng a. Chawhma lama thil tul tia chhuak ka ni a. Chawhnu lamah Ina ka han haw chu. Lallliansawma lo thu kha ka hmu a. Ka pa nen an lo inkawm a. Ka pa damlo kan a lo lut a ni a. A hlabu rawn zuar pah a ni ti ila,a thlawnin min pe a, bu khat chu ka lei sak ta tho a. Bu hnih khan Engemaw chen kha ka kawl a. Assama ka chhuk hma zanin ka thianpa David VL Hriatzela hnenah bu khat chu ka pe ta a ni. Khami bute kha, a that dawn the lul nen, a layout leh editing an uluk lo lutuka a uihawm ang reng khawp mai.

Pu Sawma’n a hla phuah dan te, Pathianin a pawl dan leh thlarau hruaia a han awm dan te a han sawi tak tak mai kha chu ngaihnawm tak a ni. A hlate a nun a, kan saktui em em thinna chhan hi nasa taka thlarauin a hruai a, a tur a, a hlate kha a pek a pek a nih thin vang niin ka hria. Zaipawl sak tur kan phuah the ang tih emaw, solo tur kan phuah the ang tih emaw, huhoa sak rem lo tawp huhoa sak luih talh tura siam rem thin hlate hi chuan, mi hi a hneh mawh a, tuipui pawh a har a. Lalliansawma te ho ang chuan ka hre lar thei tawh lo a nih awm hi awm e. Lalliansawma, T. Romama leh Ramdinthara Sailo te hi kan hla Phuahtu ropui hnuhnung an ni mai angem ka ti hial thin.

Tuikual Bialin Tuikual S kohhrana KTP Conference kan hman tumin, Lalthlamuana Ralte hian Inrinna zan inkhawm a hruai a. Lalliansawma hl alar “Chhandamna Hla mawi sain” tih kha thlan a tum a, khami zana zai hruaitu khan a thiam loh avangin kan sa ta lo a, ka ui hle. KTP-a inhmang ho theuh theuh, chanvo nei ho theuh theuh hi, kan tuipui zawng, kan hriat zawng, thiam zawng leh duhzawng hi a lo inang lo thei hle dawn a lo ni.

Pu Sawma kha a nunkhua a har thin hlein ka hria a. Secretariata hna kan thawh lai te khan, secretariat bul kawng pui a khawhar taka a rawn tei ruk ruk tum kha ka hmu fo mai. Khawvelah hi chuan a kim ve ngang lo a, Vanlam kha a inhnemna a ni berin ka hre thin a. A thlamuanna ber pawh kha a niin ka hria. Nunna fate an chawlhna hmun Van Jerusalem kha a thlahlel em em a, Muhil te thawhna tur tawtawrawt rik hunk ha, nghak hlel takin a thlir ngat ngat mai a ni.

Tun hma lama hla lar thin, engemaw chen KTP General Conference hlabu-a an dah tawh loh hnuin, 2000 Kuma Zemabawka Conference neih a nih khan, Lal lenna zion khawpui kha dah thar leh a ni a. Ram pum a deng chhuak tha leh a. Khami tiak hnu Pathianni hmasa berha report pein hla min thlan tir a. Lal Lenna Zion kha ka thlang a. “Ring em ema zai vek tur” ka ti a, Fellowship kal ho kha chu ring em emin kan zai a nih kha. A phuahtu pa berin Beramno Ennaa min kalsan takah kha chuan, ka rilruah a rawn awm thar leh mai mai.

Ramhlun N Kohhran Zaipawlin, Conference hlabua a a chuan tawh loh hnu fehah, 2008 khan, “Jerusalem Thar” tih kha, Ramhlun Venglai kohhran biak Ina conference kan neih tumin, kan sa a. Lp Lalhlimpuia’n a hruai a. He hla hi a nalh dan a ril hian ka hre thin. Thiam taka zir a nih loh chuan sak that a har phian leh nghal a. Kan sa tha em em ta lo bawk. A hla mawina erawh a dan phah chuang lo e.
Kum 70 chuang fe a ni tawh hnuah, kumin kum tir te ta khan Thisen Cancer a vei a ni tih hriat chhuah a ni a. “Inkhawmpui tiak tawh ngailo Lalpa min pea ng che” tia diltu chuan, Ni 8.2.2017 Dar 7:10 khan, “A mawi zia sawi thiam rual loh, a zau zia hriat phak loh, thlir lam a pianga mawi a, Hmangaihna khawpui a ni” tia rinnaa a lo hmuh tawh “Jerusalem Tharah” chuan, “inkhawmpui tiak tawk ngai loa” “A thianghlim e, A thianghlim e” tia Zion Hla Mawi ropui sa turin a kal ta a ni.

Jerusalem Thar chu Nunna Fate chawlhna a ni a. Lalliansawma chu a chawl ta. Kan zingah a awm ta lo a ni. Rammawia Tlansate chuan, Hla phuah thiam dang an neih belh leh ta a. An Phuisui leh ta sawt a ni. Keini erawh kan ruak leh zual a, kan khua a har belh sauh dawn a ni.

“Lalliansawma dam reng rawh se” ka ti anga, “Ni e” inlo ti dawn nia..
“Lalliansawma dam reng rawh se”

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *