JORHAT LEH A CHHEHVEL

Jorhat hi kan awmna Barpathar atanga Km 80 vela hla a awm a ni a. Jorhat District khawpui a niin, Mihring 1.85 lakhs vel an cheng a, a zau zawng hi Sq. Kms 9 a ni.
NE-a khawpui thangchang ber pawl niin, Assamahchuan Guwahati dawttu a ni. Central sawrkar pawhin, “Two sunshine c ities” tiin Guwahati nen hian a sawi thin nghe nghe a ni.

Chhuahvahna hun remchang hi ngah viau mah ila, ka peih vak thin lo a. A tulnain min nan erawh chuan, darkar 20 chuang pawh motor kawngah hun kan hmang leh tho.

JORHAT CHU: Jorhat hi AHOM Lal ram khawpui hnuhnung ber a ni a. kum 1794 khan, Ahom lal Gaurinath Singha chuan, Sibsagar atang hian Jorhatah Ahom Lal ram khawpui ber chu a sawn a. Assamese hnam culture leh history hmun pawimawh tak a ni a, Cultural Capital of Assam tite pawhin an sawi hial thin a ni.
1817-1824 a Burma hoin vawi tam an run avangte, British 1824 a an lo lan avangte khan Jorhat khawpui hi a ram der mai a. British hoin Assam an han thut chhoh atangin mihring an khawsa leh tan a, Jorhat khawpui pawh hi a lo dingchhuak leh ta a ni.

Ni 29.10.2017 khan Hruaitea leh Laldingsanga te chhungkua hruaiin, Jorhatah hian kan va kal a. Dinsanga nupui hi mami a ni a. Fa phir an nei a. Tluanga leh Kima an ni a. Phir mah nise, an inang lo hle. Dizogotyc Twin an ti hang chi kha an ni.
JORHAT SCIENCE CENTRE AND PLANETARIUM: JSCP-ah hian kan kal hmasa ber a. Sikul naupang pawh an tam hle. 2013 atangin Mipui tlawhtheihin an hawng tan a. Jorhat leh a chhevel zirlaite chuan an hlawkpui hlein ka ring.

Planetarium hi Digital Planetarium a ni a. Planetarium-a kan han awm chuan, Tluanga te unau chuan, vana lawn tak tak angah an han inngai a. Lei (Earth) a lo lan chuan, “E, Leiah khian Deepak-a (Driver) kan kalsan daih mai” Kima chuan a ti a. “Apu, kan haw leh angem?” an ti nghe nghe. Planetarium pawna kan han chhuah chuan, “Khawvel chu ava lum ve. Van chu a lo vawt a nih hi” an ti a.
Mizorama district khawpui tina awm atan ka awt khawp mai.

Science Centre atanga kan kalsawn hnuin, Gandhi Park-ah kan kal a. Naupang pahnih khat an lo awm ve a. A fai hle bawk. A enkawl tupain a lo ti fai mek bawk a. Luhman a awm lem lo.

An park ho hi a fai viau mai a. Zu bur ruak, damdawi tihna sulhnu vel a awm lem lo. An enkawl uluk tih hi a hriat. Eng infrastructure pawh nei ila, a pawimawh ber chu a enkawl zuina a ni. Mizote’n kan tlakchham lam tak a ni. Cheng tam tak senga siam leh sak kan Hall, Park, etc hi enkawl mumal loh a ni fo a, reiloteah a tawpin, a chhia a, a hmuhtlak loh fo. Zun in leh ek in bawr hi a tawp zual ngei ngei bawk. Drugs addiction lama an dinhmun ka hre lo a. Park leh Hall vel ti tawp zawnga khawsa an neilo a nih ka ring. An lo nei a nih pawhin an enkawl tha niin ka hria.

 

RAJA MAIDAM: Hetah hian Ahom Lal hnuhnung ber an phum a. Raja Maidam chu Lal Thlan tihna a ni mai. Raja Maidamah hian Naupang infiamna hmun a awm nghal a. lal hnuhnung pahnih an phum a. Chumi entirnan ni ngei tur chu, lei an chhung pawng bawk a. Hnim hring a to a. Dil a lo awm a. Dil kamah chuan, Kel a awm bawk a. Raja Maidam pawh hi a fai viau.

Ahom lal ram hi ram ropui leh chak ve tak an ni thin a. Mughal ho pawhin an vanglai tak pawhin awp tumin vawi tam tak an run a, an hneh hlei thei lo a ni. Mughal leh Ahom ho indona hmingthang ber chu Saraighat Indona kha a ni awm e. General Lachit Borphukan-a hoin Mughal ho kha an lo hneh a. Jorhatah hian General Borphukan-a pawh hi phum a ni a. A thlan in, “Lachit Borphukan Maidam” pawh tlawh theihin a awm nghe nghe a ni.

Mughal Lal ram ropui tak pawhin an hneh hleih theih loh ni ve mah se, anmahni hnam inkarah innghir nghona a lo thleng ta a. Kum zabi 19 na chawhma lamah chuan, Burmese Lal te thuhnuaiah an kun ta hial a. Anglo-Burmese War-ah khan, British hoin hnehna an chan avangin, Treaty of Yandabu hnuaiah, Burmese lal te hian, Ahom lal ram thununna chu British ho kutah an pe a, chu chu 1826 kha a ni a. Assam ram awp tak taka an awp chu 1836-ah chauh khan a ni. British India-a Province pakhatah an ziak lut ve ta a. British-in India a lo chhuahsan pawh khan, india ramah an bet zui ta a. Hei hi ULFA hoin an duh lo em em a. An ideology innghahna a lo ni ta reng a. “Khawvelin india” a tih huangah kan tel ngai lo a, British ho vanga hetiang ni hi kan ni a, India ram hnuaia awm loin, mahni kea ding tur kan ni an ti tlat a ni.

Engpawh nise, hnam anga dingchhuak a, chak a, mahni kea ding emaw, survive tur hrim hrim chuan, tanrual angai, chhungrila innghirnghona neih chi a ni lo.
JORHATA TLAWHTUR DANG AWMTE: Mihring siamchawp ramngaw, Malui Forest a awm a. Jadav Payeng-a, forest Man of India sulhnu a ni. Gibbon Sanctuary a awm bawk a, Kaziranga Golf Resort a awm bawk. Jorhat Gymkhana, British ho din a awm a. Asia rama Golf Course upa ber, khawvela pathumna a awm bawk. Nichina ka sawi tak, General Borphukan-a thlan kha tlawh tur chi a ni bawk.

Jorhat ka awhna chu, Research centre hrang hrang tha tak tak an neih chu thuhran, Eastern Theological College a awm a. Engineering College a awm a, Medical Colege a awm bawk. University pawh pathum lai an nei a, chu chu ka awh em emna a ni.

Keini pawh, Aizawl Baptist kohhranin AICS an han dinte hi ka lo ui rilru thin a. Lungleiah a nih loh pawhin, Lawngtlaiah emaw te han awm sela, kan hnam tan chuan a tha ang mawle, tih ka ngaihtuah thin.

Thanna, Punna, hmasawnna leh kan san zelna pawimawh tak chu zirna hmunpui neih hi a ni.

Kawng a tha a. Rel a lut a. Lawng Chawlhhmun a awm a, Thlawhtheihna tumhmun a awm bawk. Chutiang hmun chu, thang lo thei a ni lo a, thangzel tur a ni bawk.
Khawi khua pawh hi, thang tur chuan, thil dang chu thuhran, a pan awlsam leh pan nuam a nih angai. Power supply thate, Inbiak pawhna thate hi thazelna tur pawimawh a ni a. Kalkawng tha hi kan mamawh. Khawpui thangchak tak a nihna chhan pakhat chu, Jorhat chu a kawng a tha em a lawm. A pan a nuam a, a awlsam bawk.

Hmasawnna te hi insemrual se a tha a, Assam pawh hi hmasawnna a la insem rual tawk lo hle a. Insurgency awmna chhan lian tak chu, hmasawnna insemruallo hi a ni. Hmasawnna lai area-ah mi an kal Khawm lo thei lo a, pensan tawh hmun chu, a thuanawp lo thei lo. Jorhat Hmasawn chak leh hmasawn zel hi chu Assam sawrkar tan chuan thil lawmawm tak a ni ang.

JORHAT TRAFFIC: khawlian deuha kal chuan, an traffic hi ka ngaihven lo thei lo. An Traffic management system hi ka lo chik ve mai mai thin. Electronic signal an hmang nasa a. Mihring dinna lai chu a awm tho. Khawimaw laiah chuan, mihring hmanga control loh theihlohna lai hia awm ve bawk a. chutiangah chuan an lo ding ve phauh phauh. Khawpui lian tak e tilo chuan, traffic jam mup mup a awm lem lo.
Motor an lei chiam chiam lo nite pawhin a lang.

Shopping Mall lar, Big Bazaar, Pantaloons, reliance, Vishal etc a awm vek.

Ka kalna hmun apiangah hian, lehkhabu dawr hi tlawh hram ka tum thin a. People’s Book Stall-ah kan kal a. Tluanga te unauin phur fe hian min zui a, “Apu, kan en pui ang che” an ti a. Kan han lut chu, vaitawng lehkhabu a lo tam deuh a ni ang, “A va vai e” an ti nang nang a. Mipa naupang kum ruk mi chauh pawhin, vai leh mizo chu an lo thliar viau mai. Vai hlang bulah sikul an kal a. Vai tawnga thian kawm an ngai a. An mi hmuh thin tam zawk vai an ni a. Tuma zirtirlohin, lehkhabu pawh la chhiar thiam mumal lo khan, vawi tawng lehkhabu chu an ngaina lo nghal ringawt. Khawvelah hian, hnam hrang hranga awm tur chu kan lo niin alang. The Best of Laxman-The Common Man balances his budget tih ka lei.

Dar 5:35-ah Jorhat atangin kan chhuak a, zan dar 7:53-ah ka quarters ka lut leh ta a ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *