“KAL LA, TISUAL LEH TAWH SUH” (Johana 8:11) central jaila ka thusawi

Mihring thanlen dan leh kan khawvel tawn hi a inang lo khawp mai. Kan thanlenna chhungkua a zir leh kan thian kawpte avang hian dinhmun inang lo tak takah kan ding thin. Vawiina helai hmuna awmte hi induh reng vanga tang in awm lo. Tan loh hram hram duh in ni. In tanna chhan pawh hi in tum luih ngawih ngawih a ni mang lo a. In tum ve reng anga lang pawh hi a nihna takah chuan, in ngaihtuahna kaihhruai dik lotu engemaw vang a ni fo zawk.

In thil lo tih tawhah inchhirna nei in awm anga, inchhirna reng reng neilo pawh in awm mai thei. Kan dinhmun a inang lo hlawm khawp ang. A then chu damchhunga tang tur in ni anga, a then chu karleh lawka chhuak turte pawh inni ang. In mamawh, keini pawhin kan mamawh erawh a inang vek a ni.

Pathian hmangaihna te, a ngaihdamna te leh Sual a hremna te chu. Vawiinah hian kan rilruah awm se ka tih leh, nakin thlenga awm reng se ka tih chu, ‘Kal la, ti sual leh tawh suh’ tih hi a ni.

Helai Johana 8;1-11 thu hi kan en chuan, Pathian hian uirenu hi second chance a pe a ni. Keini pawh hi, Pathianin second chance min pe tih kan hre reng tur a ni.
1. Pathianin thiam loh min chantir ve kher lo a ni.
Mihringte hi a huhoa thate tea awm tlang tur kan ni a. Chumi kan awm tlanna tur atan chuan khawvel dan hi zam a ni. Engemaw dan kan lo bawhchhiat avangin man kan tawk a. Tan ina khung kan ni fo. Khawvel dan chuan thiam loh min chantir ngei mai. Thiam loh chan tir awm kan ni ve bawk ang. Pathian erawh chu a hmanhmawh ve lem lo. Thiam loh chantir mai loin, a lam kan hawi hun a nghak fo. A hranpain engin min chhun thlu ve kher dawn lo a nia. Khawvel danah thiam loh chang mah ila, tan inah dam chhunga tang tur ka nih pawhin, ka sualte avanga ka in chhir chuan, Min la ngaidam duh a ni.

Tan inah tang lo ta ila, tute emaw kutah ka thi ve mai thei. Pathian hnena inlam let hman loin ka thi ve thei. Khung hrana kan awm hi Pathian khawngaihna avang a ni thei fo.

Johana ziaka Uirenu bawk hi, Pharisai leh lehkhaziaktuten thiam loh an chantir hi Isua hian thiam loh a chantir ve mai lo. A thiam tihna erawh a ni chuang lo. A khawngaih a ni. Keini pawh, Pathianin min khawngaih a, thiamloh min chantir ve nghal mai lo.

2. Nun ruak

Sual kan tihna chhan tam tak hi chu nun ruak a ni. Seilenna inchhung fuh lote, thian kawm fuh lote, ngaihzawng fuh loh te, damdawi leh sual bawih atan avanga thil thalo tih zuina te. In nun a ruak ngawih ngawih anga, in nun a ruak tih erawh achang chuan, in inhre lo fo ang.

Tan Inah Pathian pawlna lo nei a, inhmu chhuak te pawh in awm anga. A then chu, chumi hnu chuan chhuah zalen te pawh in ni ang. A then chuan, sual khawih leh in lut leh mai thei bawk. Chutiang lo tawng tawh chu in awm ang.

Kan thiltih hi kan duh reng avanga ti kan ni kher lo kan tih tawh kha. Kan hneh loh sual kan buan a ni. Kan Nuna ruak a, a chhungkhattu Pathian pan loa zu leh ruihhlo dang leh nawmsipbawlnaah kan kal a. Chu chuan, tan inah min hruai lut fo a ni.

Rukrukna thlen chhan tam tak hi damdawi hmansualna avang a ni fo. Damdawi tih duh si, a leina neih loh avangin a remchang a piang lak mai kha a awl thin a ni. Chutiang lo pawh kan thil tih a chhan sawi tur hrang hrang a awm ang. Chutiang ti thei loin khungbo kan ni a. Kan nun ruak em em hnawhkhattu atan hian tunge kan duh le?

Hmanlaiin kum 100 chuang fe kaltaah khan, Mi pakhat Oscar Wilde an tih chu a awm a. Mi talent tha fe mai a ni a. A khawsak danin a zir loh avangin tan Inah te pawh khung a ni ta hial a ni. A zalenna a thlang sual a. A duh duh tih a chak avanga chesual a ni ber mai. Ravi zacharias-an, Sense and sensuality tih a ziak a, Isua nena an titi na niawm takin a ziak a, a ngaihnawm viau mai leh nghal a. Mi talent tha leh a mi chungchuang tak ni mah se, rethei takin a thi a ni. Tan In atang erawh chuan Pathian a hmu a. A thusawi pakhat chu, ‘Every saints has a past and every sinners has a future’ tih a ni. Mi thianghlim, mi tha leh fel kan tihte pawhin sulhnu pawr an nei ve vek, mi sual kan tihte pawhin hmabak duhawm an nei ve vek tho tihna a ni. Kan ngaihtuah zui atan ni phawt sela.

Calvin Newton-a chanchin ka han hrilh teh ang che u. Gospel singer-a ni a. A hunlaia zaithiam group lar ber ber, Blackwood Brothers te, oak ridge Boys-ah te a zai thin a. A hmel a tha a. A pian a nalh a. A lar a, a zaithiam a, a luck bawk si a. Rawngbawltu mah nise, a nun a lo inthlah dah ta a. Chak taka motora tlan vak vak te chu nuam a ti a. Drugs a ei chi han tih mai te a ching chho ta a. A hnuah chuan, Rukruk ah te inhnamhnawihin, pawisa lemte a siam a. Pathian lak ata chu bo hla tak a ni. Tan Inah kum tam tak a tang a. Pathianin a zawn chhuah leh chuan, kum 70 a ni tawh. Gospel Concert pakhatah an zai tir ve a. Mittui tla zawih zawhin, “Atthlak takin kum tam tak hun kan lo khawh ral a, hawi kir la, hawi kir la, Lalpan a ko che” tih hla a sa a. Mi tam tak rilru a hneh a ni. Pathian khawngaihna thuk takin a chang a. Kum 80 a chuan tawh hnu pawhin a la zai mawi em em mai.

3. Tan Inah zalenna

A tawi zawnga sawi chuan, kan zalenna kan hman sual avangin tan ina khung kan ni. Hmun zalen lo berah hian zalenna kan hmu thei thung. Lalpa Isua khawngaihna in chan tawh chuan, khungbo ni mah ula zalenna ropui ber thlarau zalenna inchang tawh a ni.

Shane Taylor-a chu Britain rama jail tang zinga hlauhawm ber leh sual ber an tih thin a ni a. Kan hriatthiam theih dan tur zawng chu, a case neih ho hi a buru hlawm hle. Rukruk, tualthah tuma mi khawih leh thil tam tak a ni a. Kan sawi vek lo anga. ‘Britain rama mi tang zinga hlauhawm ber tih thin a ni’ tih lai hi lo chhinchhiah ta ila. Jaila han lut a, a tanpui te leh Jail vengtute khawih a ching a, “ A sual ber leh khirh ber nih ka tum tawp mai a ni. Damchhunga tan te chu engah mah ka ngai lo” a ti. Jail-ah buaina nasa tak a chawh chhuah avangin kum li dang tan belh tir a ni ta nghe nghe a. Britain rama Jail hrehawm leh khirh ber berah kum 5 chhungin vawi 13 sawn kual a ni. Jail chhunga a chet dan chu sawi vek lo ilangin.

2006 khan, A tanna Jail pakhatah, Robert Bull-a nen an titi a, Isua Krista chanchin hi rei deuh mai hi min sawipui a, a ti. “A a niin ka hria a. Amaherawh chu, a thil sawi pakhat chuan ka ngaihtuahna a luah ta tlat mai a. Chu chu, jail ata hi a chhuak ngai dawn lo a, mahse, a rilru leh thlarau erawh chu a zalen a ni tih thu a sawi chu.

Chutih lai chuan a thilsawi awmzia chu ka man mai lo a. Khung hran ka han nih leh takah chuan, Robert Bull-a Kristian chu ka rilruah a lo lang fiah ta em em mai a. Lehkha thawn ngei ngei ka duh a. ka ziak ta a. Rang takin min rawn chhang ta a. ‘Pathianin I mit tih men sak che a duh a, I la hrethiam lo mai mai a ni’ a rawn ti a. Robert-a chu a a takzet niin ka hre leh a a tia lawm.

Long Lartin tan inah Shane-a chu an sawn leh ta a. Mi tam tak thattute, Terrorist te, Mi pawngsual chingte. Drug zuar lal te, leh mi sual ah pawh hardcore rual awmna a ni a. Chumi tan Inah chuan Alpha Course an tih hi a awm a. Chu chu tuna Prison Ministry ang deuh hi a ni mai. A tira a tel ve chhan chu a thlawna cake leh biscuit a dawn theih van mai mai a ni zawk mah a. Alpha course-ah chuan, an tawngtai thin a. A tir lamah chuan, jail ata a chhuah theihna atan a dil satliah ve mai mai thin a. Nikhat chu, a hnena Pathian inlan a, a hnen a inpuang turin tih tak zetin a dil ta a. Chumi tum chuan, Jail Chaplain nena tawngtai an ni a. A han tawngtai zawh chuan, thalrau in a pawl a. dan rual lohin a mittui a luang a, A nunah danglamna mak tak mai a lo thleng ta a ni. Misual tawrawt em em maia kha a nun a inlet tat hawk a. Robert Bull-a angin tan inah zalenna a hmuta zawk a ni. Tharum thawh a chin zia leh a sual zia an lo hre sa tawh a. A nun a inthlak danglam ta daih mai chu mak an ti em em a. Mi tam tak chuan, tan in ata a chhuah hma theihna atana inti fel chawp chawp mai mai niin an ngai a ni.“Sawisak, nuihsawh, relphar leh rinhlelh ka hlawh a. Mahse, engah mah ka ngai lo. Ka rinna chan tharah chuan fiahna ka tawng niin ka hria a ni” a ti. Kum 8 tang tur pawh kum 6 leh a chanve a tan hnuin an chhuah ta nghe nghe.

Middlesborough hmunah a khawsa mek a. St Agnes biak inah a testimony leh Pathian thu a sawi thin a. Pathianni zan dar 6:30-ah an inkhawm thin a ni.

Shane Taylor-a chanchin lo pawh hi sawi tur a tam mai. Shane Taylor-a chanchin bika kim chang lo takin kan han sawi ta a. Shane Taylor-a ka han sawi bik kherna chhan chu, ‘Britain rama jail tang zinga hlauhawm ber’ an tih thin pawhin Pathian khawngaihna changina nun a inthlak danglam a ni. Keini pawh kan ni thei theuh a ni.

4. Sual Hneh zelna chu

Tun hi hun thaah hmang rawh u. Khung bo nichunga zalenna remchang a ni. Vantlang lak ata khung bo leh hrem kan ni chung pawhin Pathian khawngaihna chuan min zui zel a nih hi. I thawk tawp thlengin a zui ang che. I damchhunga I chhang lo a nih chuan, I chan tur chu a ho khawp ang.

A then chu, I la zalen leh ang. Lalpa Pathian chu zawng rawh u, inhmu nghal ang. A ti thlawn lo ang che u. Tunah hian Pathian awmpuina in hmu a, lawman in chang mek niin ka hria. Ka lawm hle mai. Mahse, sual hian a nel laklawh tawh che u a nia. Setana hian a zuam laklawh tawh che u a ni. Thlemna tawklo hi tumah kan awm lo. Pastor thlemna tawh leh kan thlemna tawh chu a inang dawn lo a ni.

Heti zawng hian ngaihtuah teh u, Tuten emaw hmusit riau cheu in in inhre thin ang. In ngaihsan miah loh te khan an nuihzat che u in hre fo ang. Chutiang bawk chuan, setana chuan a nuihsawh che u, a hmusit viau che u a ni.
Ti zawng hian ngaihtuah leh teh u. Mi pakhat nen in insual dawn a, Insual thiam chungchuang I ni a, Kut phuarin insual ang a ti che a. I kut I phuar tir a, a ni chuan, a lo phuar der mai mai a. I inrin hmain a khawih hmasa thut che a, khawih let leh hlei thei loin, dim lo baksak loin a sawi sa che a. Ruh mawih leh tliak leh pem phungin I awm a. I ruh a dam hma, I hliam a dam hmain a rawn khawih zek zel che a. A ngeiawm duh ngawt ang. In ngei ngawt ang. Chutia a tih ziah che u chuan, a tawpah phei chuan, in taksa khawimaw lai kha in lo tina lawk duh mai thei. Hetianga in awm chhan chu, a tira a bum vang che u a ni.

Setana hi haw rawh u, a nuihzat lutuk che u. “Hei a tawngtai hluah a, Bible a chhiar a. A inkhawm a. a inrin loh hlanin, a ngaihtuah mang loh lain ka thlem anga. Thil hote te ka tih tir ang.” A ti a ni. A then te Pathiana Lawmna changa chhuakte pawh, Chutiang chuan, a zuam laklawh tawh che u a, ho tetein a thlem leh dawn che u.

Sual hian nasa takin thlemin a bei zel dawn che u tih theih nghilh suh u.
Chuti chuan, a nih leh engnge kan tih ve tak ang le

1. Pathian chhungte zingah tel zel tur. Tan In chhungah pawh Pathian khawngaihna change nun danglam neite zinga tel zel tur. Kan chhuah hunah pawh Ringtute inpawlkhawmna kohhran belh zel tur.

2. Bible chhiar reng tur. ‘Reng tur’ tih lai hi chhinchhiah bik tur. Bible chhiar tam na na na chuan, Pathian thu a hre tam a. A hun teah Pathianin a rilruah hna a thawk mai thin.

3. Tawngtai reng tur. Tirhkoh Paul-a hian, Bang loin tawngtai rawh u, a ti. Ka thinrim em em pawhin ka tawngtai a, mi chunga ka lungawiloh em em pawhin ka tawngtai a. Ngaihtuahna tha lo ka put hial dawn pawhin ka tawngtai a. Sual lakah Lalpa Pathianin min veng thin a ni.Tawngtai zel rawh u. Engpawh in tih dawnin tawngtai rawh u.

4. Lehkhabu tha dang chhiar tam tur a ni. Mi ropui tak tak Jail-ah an tang fo. Lehkha chhiarnan te hun an hmang a, a then chuan ziahna atan te hun an hmang a. Kristiana vanram kawng zawh hi chu kan hre theuh ang, hetiang te hi John Bunyan-an Jail-a atan laia a ziah a nih hi. Tan ina tang chung hian ngaihtuahna tangkai a hman theih a ni.

Pathian tan theihloh a awm lo:-
In hre ngaiin ka ring lo a. Mahse, ka han sawi anga, in hrethiam vek ang. Kum tam tak kaltaah khan, America rama Celebrity lar tak mai hi a awm a. Stuart Hamblen-a a ni. A lar em em mai. A nun erawh a hmang uluk lo hle. Pathian khawngaihna changing a inhmu chhuak ta hlauh mai a. A inhmuh chhuahna leh Pathian mi a lo nih takna chu a lar em em mai a. Tam tak chuan an awih lo a ni.
Tumkhat chu, khawlaiah a thianpa Pakhat nen an inhmu a, “Stuart, I Pianthar thu an sawi hi tak tak em ni?” a ti a. Stuart-a chuan, “Ni e, Pathian tan hian tih theih loh reng reng a lo awm hlei nem” a ti a. Hla mawi tak mai a phuah ta nghe nghe a.

Kan hun kal tawh chu engpawh nise, Pathian tan hian kan chungah tih theih loh hi a lo awm reng reng hlei nem. Stuart Hamblen-a hla thunawnah chuan, “Mi dangte tana a tih sak chu, nang pawh a tih sak ve ang che. A ban pharin a lo lawm duh reng che a ni, Lalpa tan hian tih theih loh reng reng a awm lo a ni” tih a ni. Mi dangte ngaidamtu Pathian hian a ngaidam duh reng che u a, Amah in pan hun nghakin ban pharin a lo nghak reng che u a ni.

“Krista rawn pan la, Bo rei duh lovin
Lalpa aw nem chuan a ko che ngai teh
Chhandam tur leh tih faiin a zawng che
Rawn pan thuai ang che, bo rei duh loin”

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *