KAN CHANCHIN

A thiannu’n a ” A phone nambar ka pe che anga,Nangmahin i leng ngam mai a ngem?” a ti a. Hmaichhanah chuan kan la inhmu bik chuang lo a.

“Aw, a nambar chu mi han pe fel la”…

A number chu Ka la a.

“Hmanniah ka hmu che a. I hmel tha ka ti lutuk a. In veng thleng ka zui ru che ha. I thiannu ka lo hmelhriat hlauh a. I no min pe a. Ka lo message tawp mai che ni…Ka hming chu F. Vanlalrochana” tih hi ka va thawn ta thawng mai a. Tha deuh hian min lo chhang ve mai a. “Min hre dawn chuang lo a. Chumi vengah chuan kan awm a, ka lo la be leh dawn che nia” te kan ti zui pawp a. Inthup kual lem loa ka insawi mai vang khan danglam a ti deuh a niang, tha deuh deuh hian min chhang a.

A tukah pawh ka message leh a. Min lo chhang ve leh mai a. A nili naah phei chuan, ama’n min be hmasa ta a. Inrinni zan inkhawm banah pawh, “Kan inah band-in hla an rawn zir dawn a” a ti a. Mi rawn be ve ngial a. Chumi zan chuan John Schlitt-a Concert enin lammualah kan thianho kan kalin ka hria. Ka chiang ta chiah lo.

Karkhat a liam hnu chuan, “Zaninah inah ka lo awm ang, lo leng ta che” a ti a. An in pawh ka la hre lo. Kan thianpa an venga mi ka sawm a, an in chu kan zawt chawp a. An in pengah tlangval pakhat hi kan zawt leh a. A u a lo ni nghe nghe a. Kan zu lut a. A hmel chu tha ka tih belh sauh a. Ka thianpa chu hma deuhah a haw nulh pek a. Chumi zan chu American idol final zan a niin ka hria. David Archuleta tih vel emawni zai ta kha le.
A nute an rawn haw a, ka pa an lo hre em em zui a.

A nute chuan eng eng emaw ni an sawi a, ” Pastor F. Laltlanthanga han rau zia chu…” te an ti bial bial a. Reiloteah an mu ta mai a. Kan pahnih chauh chuan kan thu ta ran a. American Idol result an puang a, David Cook emaw ni, ka chiang ta lo, chu zawk chu pakhatna a ni ta a. David pakhat zawka, a pa lo zawk chu pahnihna a ni tain ka hria. Apa lo ka tih thu ka comment hmain, “van pawi” a ti ta a. “Nia, A zaithiam lo zawk pakhatna a nih chu a..ka tan lo daih zawk ” te kan ti ta ngawt a. Chumi zan chu chumi season ka en awm chhun a ni a. Engmah hre der lo chuan kan sawizawm ve ngawt a. American idol te chu min sawi pui tak tak dawn se, American idol dawng hmasa bertu kha Randy travis a mi kha te ka ti nulh mai dawn a. A sawi zui thui ta lo hlauh a.

Programme a tawp a. kan len hmasak ber zan a ni sia. Han len rei vak chi a ni lo tihte chu ka hrethiam ve a. Reilote ka thu zui a. A hmuiah chuan hnawih sen sen vaklo, a mawm chi a hnawih a. Kan pahnih chauhin kan mengta sia. ka fawp pawp mai dawn mawn le te ka ti rilru leh pek a. Em a ka tia, ka insum a. “ka haw tawh mai ang” ka ti a. Mi ui der ve na a, dar 10 a pel tawh a, hma chu ka la ti na a, ka haw lui ta a. “Khawi atang nge i lo kal ” a tia, ka kalna kawng ka sawi a. “Kawng hran min kawhhmuh a, helamah hian kal daih rawh” a ti a. Zan a thiang ang reng a, arsi an lang kalh a. Thla a eng bawk si a. A hmel chu a lang chiang kher mai. A vun a ngo sia, a hmui a no chek bawk sia…Ka awt khawp mai…
Engti lo chuan, “Anih aw” ka tia, hawi let miahloin ka kal ta nal nal a…Ka Man viau hian ka hre thin a…Ka la man viau tho a nih hi ka ti rilru a…

Ka len hmasak ber tukah chuan, “ka lo leng thei angem? Zan dangah te” tih hi ka va thawn tlawng a. “Lo leng ziah rawh. I lo leng duh tawhlo a nih chuan thuhran a nia” a rawn tia. “Min ning ngawt ang” tiin ka chhang let leh a…

Chuan…
Zan li zan nga chu ka leng ve ta a. Kar khat vel chu engemaw thil vangin ka leng lo a. Tlai khat chu, ——————(a veng hming hi sawi a rem thin siloa a buaithlak ngei mai)ah nula pakhat hi ka kalpui a. Engthil nge maw ni kan tih ni, khami ni khan. Ka kalpuinu kha a zei teh hawh em bawk sia, mi danga bula a kal pawh a zangkhai vah mai zel kha a ni a. Ani khan min lo hmu nge ni, zanah mi rawn message a, ” I reh ka ti hle a. I rehna ani maw chhuna i kalpui kha ” a ti a. “Nilo e, khangte chu ka kalpui mai mai nih kha” ka tia, engtin tin emawni ka insawi fiah thei a. Hetiang thilah hian ka insawifiah thei mai zel hrim hrim a. Ka duh a, ka tum phawt chuan awihawm deuh mai hi ka ni ve a.

Ani chuan, “Anih chuan, naktuk zanah i rawn leng thei” a ti a. Inngaizawng deuh tawh, la fel kim chiahlo hi kan ni tawh awm e. Induh ru ve ve pawh hi Inngaizawng tur chuan, step paltlang famkim tur a awm thin hi. Chutiang chu la tihloh vanga kan inngaizawng la ti ngamlo mai mai kan ni tawhin ka hria. Ka hman loh zan a ni tih chu ka hre na a. Ka tihtur chu thulh mai ka tum ta zawk a. KTP week kan hman lai niin ka hre ta, in atang chuan week hmang turin ka chhuak a. Kohhran Hall chhung ka lut ta lo a. An in lam (veng dang daih an ni tih kan lo theihnghilh ange) panin ka kal leh ta daih a.

An in ka luh chuan, a lo inawrh hnawk khawp a. “Ka hritlang a, Class pawh ni hnih ka kal tawh lo” a lo ti a. Hetih lai hian M.A a zir mek a.
“I va sawilo thei ve”
“Mi zawt hlei nem”
“zawhloh pawhin sawi ve la”
“Thil thenkhat hi chu zawh ngai a awm ve a lawm”
Chiang deuhin ka melh a. ka nuih a. A tum deuh bar a. “Anih leh, tun ni hnih chhung class pawh i kal tawh nange?…Engati nge? I damlo ni maw?” kan ti tha leh laklawh a.”sual viau teh suh” a ti hlak a. A lehkhabu chhiar chak deuh mai, a hmaa a sawi a sawi, ka lei sak chu ka pe a. “E! I van fel leh si” a ti a. A nui ta var var a. Mawi tak a ni.

Hmana mi pakhatin min hrilh kha ka la hre reng a. hmeichhia hi i tihlawm dawn a, a duhzawng tak tak i pek dawn chuan, i ngaihsak loh hunlai bera a thil duh a sawi, min pe ang che aw, a tih lemloh kha pe thin rawh a tih kha ka hre reng a. Hetiang huna an thilsawi chhinchhiah tur hi chuan Attention pek hi an ngai a. Kan ngaihsak tak tak chuan an thil duhte hi tum ren run lo pawhin kan chhinchhiah mai a. Kan duh tak tak lohte hi chu an awh zawng leh duhzawng hi kan hre tak tak lo.

A lehkhabu chhiar chak em em mai ka pe chu a lawm khawp mai a. “I van fel. Nachang i van hria…” te a tia. “Ka hming ziak la, i hming ziak tel bawk teh” a ti a. Ka kutziak chhe zet mai chuan ka ziak ta a. A kut chu ka en chiang a. A sei sal a. Zungbun pakhat mah a bun lo a. Zungbun bunna tur atan ka awhsak hle a.

A roomah lehkhabu chu a zu dah tha vat a. “Thingpui in rawh aw. Ka thingpui lum karkhat lai i in tawhlo” a ti a. Thingpui chu a lum a, thingpui lum hi a thiam ka ti thin ngang mai. Chumi zan ka leng rei vak lo. A nuamsam lo bawk nen, ka haw leh ta vat a. Ka haw hnuah rei fe chu kan in text leh tho a.

Zankhat ka leng leh chu, engkim sawifel a hun tawh tih ka hria a. Thil fel sa thlap ang chu ni tawh se, Inngaihzawnna hi chu office procedure ang deuh hi a ni ve a, a thuphungin HOD lam ten lo rem ti tawh mah se, lehkha hmanga phal thu an tih chhuah angai thin ang hian, sawi fel ve hrim hrim angai thin a nih hi.

Ka va leng a. T Shirt dum leh Jeans pawl ka ha a. Tlai ka lu ka meh tir a. Ka in uluk ve nasa mai. In chhung ka luh chuan, “eh! I va nalh ve…i lu meh tur pawh i sawilo” a lo ti a. A lum angreng si a, “bathlarah thu ang” a ti a. An bathlar chu a zau tha ang reng a. dinglam zawngin thla engin min rawn chhun a. Pot an hung tlar dal a, eng pangpar par emawni hi an phun hlawm a. a then chu a par pawl a, a then a senno a. an hming pakhat mah ka hre lo a.

Thil chi hrang hrang kan sawi a. chhunah a class atanga a haw kawnga a thil hmuhte, a rilru a khawih dan te chu a sawi siam siam. zan a rei chho dawn tan a. A nuam chho tan chiah zawk. “Zanin chu ti fel vek law law tawh ang” tia leng kha ka ni bawk a. sawi ka tum ruh khawp mai a. Mahse, engtin nge ka sawi tan dawn ka hrethiam lo khawp a.

Thil hi han sawi mai tur chu ka hre zel a. Ka duhnaah chuan tawngkam pawh hi ka thiam fu a. Ka duhna hmun tak a ni a, mahse, han sawi tan dan tur ka hrethiam lo khawp a. “…….-i heile, zaninah, thil pawimawh tak mai i hnenah hian ka sawi dawn a. Ngun takin lo ngaithla la” han tih chi hi a ni si lo a.

Ka inngaihtuah nasa khawp a. ka lo ngaiw veng veng a niang. “Thii dang i ngaihtuah chiang…hmalam i en veng veng a…” a ti ta a. “thil dang ngaihtuah lo e…Nangmah a lawm ka ngaihtuah” ka ti ta a. “Hei i bula hi ka la awm reng a lawm, ka la thlawk bo hlei nem” a ti ta a. Ka tan thil a awlsam ta sawt a. “I thlawkbo daih ang tih ka hlau a, man beh reng dan che ka ngaihtuah a nih hi” Ka ti ta a.

“Mi man beh reng duh leh duh loh a thu a ni mai a lawm” a ti ve leh a. “Thlawhbo tum miah lo zawk la ka ti…I hre vek a, ka duh hle che tih hi. Ka hmuh vawi khatnaah ka zui ru nghal che a, in veng ka hre nghal a, ka rawn be nghal tawp mai bawk che a.Ti hian ka lo leng ve ta zel a. Lo len chu i la khap bik lo chu a nia” ka ti a.

“Hmana ‘thil thenkhat hi chu zawh ngai a awm ve a lawm?’ Ka tih kha i la hria em?” “Hria e…Engnge ka zawh ang che, ” ka ti leh kher a. “Hah…ho leh tlat thin teh suh”a ti hlak a. Ka nui a…”_____________-i, Nang hian kei hi min duh em?” kan ti ta pek a…A nui a….”I ze danglam tak vang hrim hrim pawh hian ka duh che a lawm…I message ka hmuh hmasak ber atang khan mak deuh maiin ka reply ve zel chak ta tlat che a. I lo leng a…I thianpa lah a danglam. A tei chhuak nulh a, a reh daih zui. I bula ka awm hian ka hlim thin a lawm” a ti ve ta a. Ka va han lawm teh lul. Lalfamkima ka hre chhuak a. Mapuii nen an inngaihzawn tan khan, college playground sira hrilh kha a ni a, “I fawp em?” kan ti a, “Aih ka chibai” a ti pek a. Ka chibai ve nulh mai pek ang tih ka hlau a. Bathlara han fawh ngawt pawh chu a fuh chiahin ka hre lo a. A biangah chuan zawitein ka fawp a. “I va duhawm tak em” ka ti a.A nui var var a…A biang sum a khuar kek a…

“Lut tawh ang. A vawt tep.Thingpui kan in dawn nia” a ti a.

Inchhungah chuan kan lut ta a, khami tuma ka lawmna kha pawisa tam takin lei let thei dawn ila, ka inhlawh ngat ngat peih ang. A thlalak ka la kawl ho ka en let leh te hian, ka lung a leng thar leh thin. Nula duhawm tak chu a ni chiang a lawm.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *