KAN IN HI MALSAWM ANG CHE

Kum 12 mi ka ni, khatih lai khan Pathianni chawhnu inkhawmah “Kan in hi Malsawm ang che” tih hla  kha kan sa a. Ka bengah hian a ri a va mawi tehlul em! khatih lai khan chhungkua hi ka ngaihtuah lo hrim  hrim a. “Tukverh hi faifim tlang se, Van lal eng lo lut rawh se” tih kan sak lai te phei kha chu ropui ka ti hle!

Tunah chuan khawvel thil tam tak ka  hmuin ka  hre ve ta a, eng emaw chang chuan ka hmu hnem tawh mah maha inhriat chang ka nei a. He ram, a thilfim te nen min chawm liantu hi nin riau chang ka nei thin.

Kristianna hi chhuanlamah kan hmang a. Keimahni leh  keimahni kan inti chhe tawn niin ka hria a. Chhungkua leh chhungkua kan indo a, hlawkna umin Pathian thu kan tuipui viau thin, nuam tawl kan duh avangin mi tam zawkin Pathian thu kan buaipui chhan chu; Pathian ram tana  thahnemngaih vang tak tak ni lovin mahni nawmna zawnna thilah, mahni nihna inhrikthlak nan kan hmang fo.

Mihring hian zawn a nei a, amah aia ropui zawk engemaw awmin a hria a. Chuvanga sakhuana hi lo awm a ni a. Miin Drugs a tih chhan a ni a. Mahni Kohhran inkhawm ngaipawimawh loa Pathian phena hmanga mahni nuam tih ang anga chet a au vel theihna hmunah te a kal phah \hin bawk a. Mihring chuan amah a lo indah pawimawh ber tak chiah chuan Kohhranah phun chiarna tur a hmu tam a, Kohhran hruaitute a lo hmu ro zo a, Kohhran inkhawm te chu a ho a ti ta thin! A chhan chu, a duh duhin a khawsa thei tlat lo.

Hei hi kan ram a dam lo kan tih fo \hin a, a dam lohna kawng khat mai a ni. Kan ram hi tisa leh thlarauah lo dam lo nasa viau tak tak ni se, a hrik chu keimahni hi kan ni. A damna pawh Pathian a ni tih kan hre \heuh va,  a damdawi pawimawh tak pawh chhungkua hi a ni ngei ang. Chuvang chuan alawm, “Tukverhte faifim tlang se, Van lal eng lo lut rawh se” tih nawn leh thin kan mamawh ni.

Mizote hian chhungkua kan ngaipawimawh tawk lova, mahni inchhung kan ngai hlu tawk lo, nu leh pa ten fate hnena zirtirna peka chhungkaw inkawm hlimna aiin Pathian thu te Politics te chhuanlam a, zankhaw tairek thleng thleng pawn lama hun hman kan ching. Mahni inchhungkhur pawh ngaihthah mi hi Pathianin a pawl tak tak pawh ka ring thei  hauh lo.

John Denver an hla mawi tak mai ‘Good to be back home again’ tih a phuah a, ‘Its the little things that makes a house a home’ tih hi chu hlaah chuan a awm. Ni e, thil hote avang hian HOUSE hi HOME a ni thin. Chuta tang chuan ram leh hnam ropui a lo chhuak thin a ni.

Thalaite pawh chhungte nen hun kan hmang tam tawk lo fo. Thalai, mahni inchhunga kawl hahthlak kan awm fo niin a lang. Mizorama kan harsatna lian tak pakhat chu thalaite’n pawn lam kan ngaina lutuk hi niin a lang. Kristian |halaite pawh hi mahni inchhungkhurah hian tun ai hian awm tam ta ngat ila kan rawngbawlna hian awmzia a nei zawk ngei ang tih ka ring.

Tunlaia kan khawtlanga harsatna lo thlen chhan lian tak pakhat chu chhungkua kan ngaihthah vang a ni tih hi mi pangngai chuan kan hmu thiam ang. Zilh ngailoh fa kan tam ta a, kan society moral-in a tuar a, kan value system a tla chhia a. Zep lova sawi chuan kan sakhuana thlengin nasa takin a nghawng a ni.

Chhungkaw member-te ngeiin chhungkua kan ngaipawimawh tlat lo! chhungkua kan in din \hat leh a ngai. Chenna in chu kan nei,  “House” a ni, chu chu home a ni em?

Mi pakhat a awm a, hmanah khan, chhungkaw lakah a hel hle \hin. A hming chu Howard Payne a ni.

A chhungkua chhuahsanin French ram Paris khawpuiah a kal a, tlaikhat chu varanda atangin Paris khawpui mipui phu mur mur chu a thlir a, nakin deuhah chuan an bo zo ta vek mai a. Khawnge an awm tak tiin a ngaihtuah a, anmahni inah an hawng fel ta dial a ni tih a hria a. Chuta tang chuan chhungkaw pawimawhzia chu a hre chhuak ta uai uai a. New York khaw daifem Long Island-a an in tereuhte, kum kua lai a lo chhuahsan tawh hlutzia chu a hre chhuak ta a. In chhungah a lut a, mittui nen khawvela chhungkaw hla ropui berte zinga tel kumkhua tur chu a phuah chhuak ta a ni:
“To thee i’ll return over burdened with care’
The hearts dearest fale;
Will smile on me there no more from that cottage again i will roam;
Be it ever so humble,
There’s no place like home.
Home, home, sweet home,
There’s no place like home

He hla hi a phuah zo va, kum kua lai a lo chhuahsan tawh Long Island-a Thing In tereuh te chhungkua a neihna  hmunah chuan a kir leh ta a ni. ‘Ka kal bosan leh tawh lovang’ a ti a, mahni chhungkua kan chenho hmun tluk hi chu a lo awm lo’. There’s no place like home’ a lo ti hial a ni.

John Howard Payne-a hi kum 1791 khan New York khawpuiah a lo piang a, A dam chhung hun tam zawk a teirawlai a, 1852 khan Tunisia ramah a tar thi. Kum tam tak hnuah Washington Oak Hill Cemetery-ah a ruh ro phum leh a ni.

Kei ngei pawh hian ka dam phawt chuan, engtikah emaw chhungkua ka din a la tul ve ang a, ka nupui te, ka fate tan chuan an chenna in turte pawh ka din a la tul ang, chu in (house) chu home-ah ka siam thei ang em? ka hre lo le.

“Chhungkaw lungrual Kristian chhungkua
Kan nih theihnan Lalpa,
Lo cheng ang che Krista nang ngei,
Kan in kan thinlunga’n” tiin

Kohhrante hian Pathianin kan au ngai em? Chhungkua engzatin nge hetiang hian Pathian au thin? Khawvelah hian eng hnam pawh eng mihring pawhin a tawp khawkah chuan chhungkua chu chhungkua nge nge an lo ti thin a ni.

“Lo cheng ve la, kan run chhungah” (KHB 592) te “Kan in hi malsawm ang che” (KHB 593 te hi Zoram Kohhrante hian kan sa khat ta hle. Chu chuan kan ram dinhmun pawh a tarlangin ka hria.

Tukverhte faifim tlang se,
Vanlal eng lo lut rawh se,
Kan mei ding leh a khu zam,
Tawngtai ang hi malsawm la,
Rin tumte zawng malsawm la,
Sual lakah thianghlim rawh;
I hnena kan chen theih nan,
Min hruai zel rawh, aw Lal Pathian.

Published by

admin

Ka hunawlah lehkha ka ziak thin.

3 thoughts on “KAN IN HI MALSAWM ANG CHE”

Leave a Reply

Your email address will not be published. Required fields are marked *