KAPHLEIA NATIONALISM

Kaphleia Memorial Society-intiin, mi tlemtein pawl kan kalpui a. Pawl thahnem lo tak mai kan ni a. Kan han hmanlo thei hlawm em em thin khawp a. Art and Culture Department lam tanpuina hmangin kan pawl hian tunah hian a lung kan dawh tha mek a, kan chairman Sawma (Dr. Malsawmliana) hian a hah fal phah em em mai.

Kan pawlah hian Asst Secretary hmasa ber ka ni ve a. Kan indin tirh hian Inte Thawveng tih bu kan buatsaih a, kan hralh zo ve deuh vek nghe nghe a. A kawma milem kha Zodina kan ziah tir nitain ka hria. Zara leh Kei leh Taitean kan buaipui a. A hnuah, kan Chairman Paul Lalremruata, Kaphleia te nena Chawlhna hmun duhawm zawka lo chawl hota lehkhabu Kaphleia sulhnu chhuina kan ti chhuak leh a. Nikum lam khan Mizo Essay Platinum Jubilee puala lehkhabu tih chhuah kan rawt a. Taitea nen kan kutah commitee-in a dah a. Enge maw chen hma kan han la tawh tihin, Eizawnna thilah ka kalbo rih angai a, Taitea a pha zui bawk a. Tonsona kutah dah a ni ta a.

Chuta chuang tur chuan Kapleia Nationalism siamtu chungchang hi ka ziak ang ka ti deuh a. Ka duh hunah ka ziah hman loh avanginthu dang daih ka ziak ta zawk nghe nghe a.

Ka thuziah tum chu ziah miah loha dah atan chuan a uihawmin ka hre ta si a. Chhui zui belh rih lem loin tawitea han ziah that leh ka tum ta a ni. Zirlai te leh Kaphleia chungchang research beite an la rawn awm pawhin an tan thil ti awlsam tuah tawitein ka ziak tha leh ta a ni.

Kaphleia kha Government High School. Shillong-ah a kal thin a. Chu chu Khasi Nationalist hoin an din a ni a.1880 khan an din a ni. Hemi hnu reilote hian Kaphleia te sikul dintute tho hian Khasi ho press hmasa ber pawh an din leh a ni. Kaphleia te High School kal kha chu an fel tawh viau a. A diary atanga en pawhin a high School kallai khan a lehkhabu chhiar pawh a puitling tawh hle a ni.

A hnuah Calcutta-ah lehkha a zir leh a. Bengali ho an vanglai a ni ber ang chu, chutih hun lai chu!

Khawvel inlum leh hunlai a ni a, khawvel ram hrang hrangah pawh ram leh hnam hmangaihna kawngah mipuite an thang harh a. Khawvel indopui pahnih inkar cheh hunah an awm a, hun danglam takah chuan Kaphleia chu lehkha zirin a awm a. Hetih lai hian India ramah pawh Gandhi-a kaihhruaina hnuaiah zalenna sualin an vanglai tak an thleng chho a. A lehkha zirna hmun Calcutta chu Indian Nationalist ho kulhpui pakhat a ni a, Indian National Movement-ah period tam zawk chu calcutta hi a hmunpui ber a ni hial awm e. National Movement leader tam berte hi Bengali an lo ni bawk a. Chung hun vang lai, Civil Disobedience Movement velte a lar chhoh laia lehkha zir chu kaphleia kha a ni. Chungte chuan Kaphleia hi nasa takin a nghawng a ni tih a hriatthiam theih awm e.

A lehkha zirna boruak leh a hun tawn te han en hian Nationalist a ni hi a awm viau a ni. Mizo Hnam tana zalenna duhtu a rawn ni a, Vai hoin India ram zalenna an duh ang bawkin, Kaphleia chuan Mizo te zalenna chu a duh a, independent ram kan nih chu a duh ve a ni. Politics rilru chhiain a ti buai lo a, hnam hmangaihna thinlung diktak a pu a. India miah a in ngai ngai reng reng lo a, a ni ngai miau hek lo a!

Kaphleia hun lai khan Mizo leh British Indo atang khan kum 40 bawr emaw chauh a la inher liam a, kha Indona chanchin pawh kha a tel ve ate ngei ka atang pawhin a dawngin a rinawm a. Mizo hnam a ngaihhlut zia te kan sawi tawh a. Chu mizo hnam chu tu thuhnuaiah mah kun lo se, ama kein ding se, tih chu a duhthusam a ni.

A twngtaina pawh hetiang hi a ni
“Aw chung Pathian
Hnam tin khawngaihtu thin;
I fate bawk kan ni
Mi hnuaia kan kun bik phal suh la.
Hnehchhiah leh bumna min dopui la
Kan innghahna thutak ni se;
Kan tih leh kan sawi apiangte
Pathian leh kan ram tan ni se”

“Aw chung Pathian
Mahnia ding turin,
Thudik leh fel zawmin
Chakna, finna min zuk pe la…”

Kaphleia thinlungah chuan Mizo chu hnam (nation) a ni a. Ama kein a ding tur a ni tih hi a ni. Keini pawhin Mizo hnam hi nation a ni a, a tawpkhawka kan nihna tur chu tuma hnuaia kun loh hi a ni, tih hi kan theihnghilh loh angai a, heta tang hian kan identity pawh kan din a tul a ni. Chu chu h khawvela kan dinchhuahna tur pawh a ni ang.

Heng thute hi uluk taka ziah ka tum a, Kc-a tawngkam takin, “research mumal tak neia, ziah tum ka ni a”; ka hun neih leh ka taimaknain a tlin ngang rihlo a ni.

Published by

admin

Ka hunawlah lehkha ka ziak thin.

One thought on “KAPHLEIA NATIONALISM”

Leave a Reply

Your email address will not be published. Required fields are marked *