KHAWNGAIH CHHANDAM HLA KA SA ANG

(Upa V. Thangzama hla thlirna)

Khawvel ngaihdanah chuan kum 70 chu upa tawh tak a ni a. Bible pawhin Kum 70 chu mihring damchhung hun pangai a nih thu a sawi.
V. Thangzama chu Assam civil Service officer te, Mizoram Civil service officer te niin Lunglei DC te, Director te, MPSC Secretary te niin khawvel lamah dinhmun ropui tak a chelh thin a. CYMA Vice President te pawh lo ni tawhin khawtlang thilah pawh mi zah kai leh mi ngaihchan a ni thin.
Pathian rawngbawlna lam a thlah thlam ngai lo a. Kohhran Upa a ni nghe nghe. Heng a dinhmun dang zawng zawng aia miten an hriatna ber chu Hla phuah thiam a nihna kawngah hian a ni zawk awm e.Hla lam a thiam dan hi a thuk hle. A hla thu ropuina chu thuhran ni se, a thluk a rem fuh em em a. Kan Mizo hla phuahtute zingah chuan Music lamah a thuk ber mai awm mange aw, an ti hial thin.
Kum 70 a nih chuan, chu chu kum 2005 khan a ni tawh,  ani pawhin a damlai ni chu a liam mek a ni tih a hria a. Reiloteah a khualzin kawng a zawh tawp mai tawh dawn a ni tih a inhria.Hmun ropuia kai turin a inpeih tawh hle. Mi tam tak chuan an nun chawhnu lamah chuan an hun kaltawhte thlirkir nuam an ti zawk thin a, ani chuan a hmalam hun chu a la thlir zel a, a phur em em zawk a ni.

“Hun Hlimawm ber aa thleng dawn ta
Khawngaih vanga chhanchhuahte tan
Kan lei hun chhiar a kim dawn ta,
Khualzinte lawma kan chawlhna
Kawng tluana min hruaitu ber chuan
Kawng chin a hria, kawng min hawn ang
Ka zin hla hlui a tawp hun chuan
Khawngaih chhandam hla ka sa ang.
Thangzama tan chuan Pathian khawngaihna a ropui ber a. Chu chu a nun hruaitu pawh a ni. Reiloteah Chatuan chawlhna hmun tha zawk a pan dawn tih a inhria a, Chatuana a hla tur, “Khawngaih Chandam hla” sak hun tur chu nghak hlel takin a thlir a ni.
Kan damchhung hun hahthlak takah
Thlipui leh sualna hrang karah
Hlim taka kal a va harsa
Mahse ka hnaihzual hahdamna
Zai la, ka thla, zai kawng tluan la.
Min khawngaihtun min hruai zel e
Chawimawina ni a chhuak dawn ta
Hmachhuan luiral kan kai dawn e.
Sawrkar officer lian a ni a, Khawtlangah YMA Hruaitu sang a ni pha a, Kohhranah berampu ‘Kohhran Upa’ a ni a. MI aia chung vek a ni chungin he khualzin kawng zawh hi harsa a ti ve hle tho. Hlim loh changte, ngui chang te, chak loh changte a nei thin a. Mahse, rinawm takin a kawng chu a zawh tlauh tlauh a. Rimawi lam thiam a ni a, rimawi hian thinlung pik a chhem kiang fo tih a hria a, Vanin a panna kawngah pawh, “zai la ka thla, zai kawng tluan la’ tiin, a thlarau chau leh ngui chu a fuih a, hmuh theih loh a hmuh avangin ram ropui zawk a thir hram hram a, a hnaih tawh hle tih a in hria a, ni thar lo chhuak zel chuan Lallukhum a khum ni a thlen tir thuai dawn tih a hria a, “Hmachhuan luiral ka kai dawn e’ a ti hial a ni.
Kawng tawp a lang thei ri riai e
Hla mahse min hruaitu ka hria
Amah ang thian ka tawng lo’nge
Tu hriatsen loh min hmangaih zia
He kawng zawha hlaim leh tlute
Mttui nena zawh zotute
Hnehtu chanvo an lo pek tur
Krista zarah ka chang ve ang.
Bible chuan Mihringin kum 70 aia rei a dam chuan ‘Chakna” vang a ni tih a sawi a. Thangzama chuan kum 70 a kai takah chuan, hun rei a nei tawhlo tih a inhria a. A damchhung kawng a lo zawh tawh a ngaihtuah let a, a kawng chu thui hle mah se, Amah hruaitu a hriat chian em avangin hliam leh tluin, mittui nen a zawh hram hram a. Amah ang bawk a, hrehawm leh natna, hliam leh mittui nen, khualzin kawng thui Lalpa tana rinawm taka zawhtute nen chuan Hmangaihna enga Khawngaihna nen Khawvel thim atanga Van in thlenga hruaitu Lal Krista zarah hnehtute hnena an pek thin, Lallukhum chu a chang ve ngei dawn a ni tih a hrechiang hle. NUna a indona hnuhnung ber tur Thihna chu Lalpa chuan a hneh sak tawh a, Thi tura nunga chu Chatuana nung turin a thi ang.Thangzama khualzin kawngah chuan Lalpa khawngaihna a eng a. Khawngaihna kutin Lal Isua chuan a hruai a ni.
Lal hmaah kei ka lan hun chuan
Min hriat ang hian Ka la hria ang
Chhandamtu hmel ka hmuh hun chuan
Khawngaih chhandam hla ka sa ang.
Billy Graham-a chuan ama chanchin a ziah, “Just I am” tih chu, heti hian a khar a, ” Vanah chuan Lal Isua hmuh ka chak ber a,  a hmaah ka thingthi anga, ka tana a tih zawng zawngah chuan lawmthu ka sawi anga, Khawngaihna vanga lei hmuna mi hman tangkai ve a vang chuan lawmthu ka sawi ang” a ti a. Thangzama te nen, Khawngaih chhandam hla an la sa ho dawn a ni.Keini pawh, khawngaihna vangin van kan la thlen hunah chuan, Kal hmasa te nen, Khawngaih chhandam hla kan la sa ang. Kawng erawh chu a la thui a ni.
V. Thangzama hi 1935-a piang a ni.