KHUALBUK VENGTU KHA A MAWL (ROKUNGA THLAVANG HAUHNA)

“Hmanah Kaisar Lal Lian rengpui” tih hi Mizo krismas hla hmingthang berte zinga mi a ni awm e. Mi thenkhat an lo inhnial phah mek bawk a.

He hlaah hian Rokunga hian thawnthu a sawi a; chu chu mi thenkhatin an hrethiam lo nite pawhin a lang. Chu Thawnthu a sawi chhan chu, Krismas thuchah puanchhuah a duh vangte pawh a ni bawk. Rokunga hian Bible thawnthu hlain a phuah lo a, Bible thuchah laimu milin Krismas thuchah, ama theology chu Thawnthu hla hmangin a puang chhuak ve mai a ni.

Tun Hma khan Bethlehem Titi tih thawnthu lar tak mai a awm thin a. Pastor Challiana lehlin a ni nghe nghe. Chutah chuan, khualbuk vengtu chu lei leh van lal ber tan hmun lo zuah tura tih a ni a, a nghak chhuak zo lo a, khualbuk pindan chu mi dang a lo pe zo to a ni, tih a awm a. heta Pindan hnuhnung ber a lo pek hi mi hausa tak a ni awm e. He thawnthu hi Rokung te hun laia lehlin tawh a ni a. Hei hian Rokunga hi a hneh viau niin a lang. He Thawnthuah hian Khualbuk Vengtu chu a mawl viau reng bawk a ni.

He hla changkhatnaah hian Kaisara lal laia Khawvel chhiarpui an neih thu leh Isua nu leh Pa ten Mihring te riahna tur hmun Pangaia Riahna an Chan loh avanga Bawng Ina an riah thu Hla phuahtu hian a sawi a. Bible-ah hian Bawng Inah an riak tih reng a awm lo a. A phuahtu ngaihtuahna ani ve mai a ni. Tih tak takah chuan, Khawvel chhiarpui pawh a ni hlei nem. Rom ram awpchin chhiarpui chauh a ni a sin!

Chang hnihnaah hian khualbuk Vengtu mawlna tarlan a ni a. Rokunga rilru hruaitu pawh Bethlehem Titi tih thawnthu hi a nih zia pawh a chiang hle a ni. Khawvel damna tur nausen pindan tur kha a lo hnawhkhat vek mai a ni. Keini pawh Lal Isua tana Pindan kan thinlung Pindan zuah tur kan nih lai hian khawvel ropuina te hmangin kan lo hnawhkhat vek thin a ni.

Chang thumna leh Changlinaah hian Rokunga theology kan hmu ta a. Chang Khatna leh Chang hnihna pawh a rawn sawifiah ta bawk a. “Hmanah Kaisar” tih hlaa Khualbuk Vengtu hi Mihring te zawng zawng hi kan ni. Lal Isua tan kan Thinlung khualbuk Pindan vengtu kan ni a. Hmunlo zuah tur kan ni. Mahse, Khawvel ropuina leh nawmna kan thlakhlehna te hian kan thinlung kan lo hnawhkhata, Lal isua chu pawnah kan lo dah reng a. Chuti chung chuan, Kan thinlung kawngkhar bula dingin, kan mikhual thalo te kan chhuah tira, Amah kan luh tir hun nghakin a ding reng a ni.
Rokunga hian a krismas hla chauh nilo, a hla zawng zawng deuh thaw tawpah hian Pathian thu chah a dah deuh vek a, Chumi chu Io chik tel thin ila, Tih te kan zep tel hram anga.

‘Khualbuk Vengtu kha a mawl lo’ titute hi hian Shakespeare-a’n Richard II te Windsor kawta Indo tirloa London-a a indo tirte pawh kha a ti diklo, an ti duh mai ang chu! History a a Indona lo zawkah Shakespeare-a hian indo tir duhna chhan a nei a, a indo tir mai a ni. Chutiang bawkin, Rokunga hian Khualbuk Vengtu hi chhan neiin a mawl tir a ni. A mawl leh mawl loh aiin, “Enga tinge Khualbuk Vengtu kha suihlung mawl?” a tih, tih zawk hi zawh zawk awm tak a ni.

Hman deuha Poetic license hi eng authority-in nge pe? titu pa, Hotel Odyana zawng chiam tupa te pawh kha ka hrechhuak deuh roh.

Keini pawh hi, Khualbuk Vengtu ang maia mawl kan ni fo, Lal Isua lo piang tur kan hmuahnaah hian kan Thinlung Khualbukah hian Amah ber hi a lenglo fo thin chu a nih hi! Mawl tak kan ni!

Published by

admin

Ka hunawlah lehkha ka ziak thin.

One thought on “KHUALBUK VENGTU KHA A MAWL (ROKUNGA THLAVANG HAUHNA)”

  1. A ngaihnawmin a tha mange,lehkha ziaktute leh hla phuahtute hian zalenna zau tak an nei tih leh, enge an rilruin sawichhuah a tum tih lam ngaihtuahlo a, a bawplawka la a lo ar mit tet khuanpui ve chiam chiam ho hi an khamawm takzet a ni.

Leave a Reply

Your email address will not be published. Required fields are marked *