KHUM RUALLOH C. KHUMA


L. Biakliana ziah, Hawilopari tih kha mizo novel ziah hmasak bera pawm a ni nain, khawlchhuta a bua tih chhuah hmasak ber a ni lo a. Maymyo Sanapui tih Challiankhuma, Capt. C. Khuma ziah kha khawlchhut chhuak hmasa ber a ni. 1950 khan tih chhuah a ni.

A ziaktu Capt C. Khuma chanchin hi tun tum chu kan sawi dawn a ni.

Kan mi hmasate chanchin hi kan sawi fo a, kan sawi fo a tul chhan chu, zui tur awmloa mahnia kawng inzawn chawpa, kan hnam tana mellung pawimawh tak tak lo phun a, rahbi thar min kaipuitu an nih thin vang a ni.

Capt.C. Khuma kha 1914 ah Ailawng khuaah a piang a. Reiekah a seilian thunh. 1934 khan Burma Sipai a zawm a, kum 38 atan hnuin 1972 khan a pension a. Sipai lumum atanga tanin Captain hial a han kai hman a ni. A chhinchhiah tlak hle.

Amah kan hriatrengna tur erawh chu Thu leh Hla lama a kuthnute kha a ni

1944 khan HMANGAIH THIAMNA tih bu a ziak a. Hei hi, relationship/sex education lam kaihhnawih a ni. Mizoin heti lam lehkhabu kan neih hmasak ber a ni a, vawiin thleng pawha heti lam lehkhabu kan la ngah lo dan ngaihtuah chuan, Capt.C. Khuma ngaihtuahna lo san hma zia leh a lo ngaihtuah thui zia a lang thei awm e.

Kan hriat lar ber Maymyo Sanapui tih hi Mizo novel zinga khawlchhut hmasa ber a ni a, a kawmah pawh lemziak a lo chuang daih tawh a, lehkhabu kawma lemziak chuanna hmasa ber a ni. Chu chu 1950 kha a ni tawh a. A chhuanawm hle a ni. A ngaihtuahna kha a advance in a ngaihsanawm hle a ni.

Maymyo Sanapui hi Maymyo Khawpui khawlaia Purcell Tower-a sanapui awm a ni a. Hei hi Gillete and Johnson Company, England a miten an san siam tlemte zinga mi a ni a, King George V a rorel kum 25 hriatrengna atana an siam a ni. Chu chu 1934 a ni a, Capt.C. Khuma kum 20 mi nia Reiek atanga Burma rama kala sipaia a tan kum a ni. Maymyo chu tunah hian hming hran a nei tawh a, Pyin Oo Lwin/Pyin U Lwin tih a ni tawh a. Mandalay bial chhunga awm a ni a. Mandalay atanga km 67 a hla a awm a ni. Ft 3510 a sang, khaw hmun mawi tak a ni a, 2014 khan mipui 255,000 an awm. British ho khawpui din a ni a. Sipai outpost atana an din a ni. 1857 Indian Revolt veteran Colonel May-a hmingchawiin Maymyo tia vuah a ni a. Burma sipai sawrkarin a hnu lamah a hming hi a thlak a ni. Burma Nipui khawpui thin a ni a. Tunah pawh hian Defense Service Academy, leh Defense service Technological Academy a la awm a ni.
Ziaktu lar Animal Farm, 1984 tihte a ziah avanga hriatlar hlawh, Eric Arthur Blair, George Orwell tih hming hmanga thuziak thin pawh kha Capt C. Khuma’n Burma a luh chhoh hma deuh hian kum engemaw zah chu Maymyo khuaah hian a khawsa thin a ni.

Capt.LT. Vuta nen, Khawtlang lunglen hla, ram awih hla leh lengzem hla 128 an la khawm a. Mizo Tlangzaibu an vuah a. Chu chu heti lam hawiah chuan a bua khawlchhuta chhuak hmasa ber a ni bawk.

I In chu ka in a ni tih a ziah chu Pathlawi leh nula hnahkhat inngaihzawn chanchin a ni a. Fahrah Nun tih a ziak bawk a. Chu chu Fahrah nun lam a thlur bingna a ni bawk.

Chhingkual Lungdi bu erawh chu a chhuah hmain a thi ta hlauh a ni.

Cancer natnain a tlak buak chho a, sipai lumum atanga Captain a kai thei, Mizo fate tana thu leh hla lama sulsutu hmasa, kawng thar sattu, pa khawhawi zau tak mai, Challiankhuma, Capt.C. Khuma tia hriat zui ni ta zel chu September 27, 1990 khan Rangoon-a ama chenna In atangin Jerusalem thar a pan ta a ni.

Hetiang khawpa pa hawi zau leh nachang hria, kawng thar sat ngam hi kan hrereng tur a ni ang. A eizawnna kawngah a chhuanawm nate, a tuina kawnga kan hnam tana rahbi thar min kaipuitu a nih theihna te hi min fuih thartu ni rawh se.

Published by

admin

Ka hunawlah lehkha ka ziak thin.

3 thoughts on “KHUM RUALLOH C. KHUMA”

  1. Capt. C. Khuma tunu ka ni a, ka pu hi Reiek a piang leh seilian niin an unau leh ka pi (Capt. C. Khuma nupui) te unau pawh Reiek khua a piang leh seilian vek an ni a. Ailawng khua din anih khan ka pu chu kum 5 leh thla 11 vel niin a pian seilenna hmun Reiek ah a awm. A pianna khua hi a chhuangin a ngai ve thin em em a, min siam that sak theih chuan ka lawm viau ang.

    Ka pu chanchin min hlut sak a, kan lawm takzet a ni.

    1. Biak pawh theihna che ka van duh tak em! Pu C. Khuma chanchin leh a thuziakte hi ka research mek a. A chanchinah Ailawnga piang angin an ziak ka hmu a. Nangin Reieka piang leh seilian i ti si a. Quotation atan hian i thuziak ngei hmuh ka duh bakah chiang zawka hriat ka duh e.

Leave a Reply

Your email address will not be published. Required fields are marked *