KRISTIAN LEHKHABU ROPUI MERE CHRISTIANITY THLIRNA

Kristian Sakhaw kaihhnawih lehkhabu ropui sawi ni khua chuan, CS Lewis-a lehkhabu ropui bera chhal ngam, Mere Christianity tih hi kan sawi hmaih thiang lo. Mere Christianity, tih buah hian a tawi zawnga kan sawi chuan, C. S. Lewis a hian, Kristianna rintlak zia a chai ber a, kristian sakhaw sawiseltute hnialna thu a ziak a, Kristian nun chu engang chiah nge a nih ang tih chu chipchiar takin a chai a ni.

A BU ZIAKTU CHANCHIN: Mere Christianity ziaktu Kristian chhungkua a seilian a ni na a, kum 15 a nih chuan Pathian awm ring lotu a ni t a der mai a. Amah hian, “Pathian chungah chuan a awm loh avangin ka thinrim em em a ni” a ti.

Hetia a tleirawl chhuaha Kristianna a kal san a, Pathian awm te an rin loh chhohna chhan chu, kristianna leh kohhran rawngbawlna chu ‘ Ninawm leh inphutna nasa,’ anga a ngaih vang a ni a. Dawi leh thil dang neuh neuh te a tuipui chho ta a. Mahse, zawi zawiin a inhmu chhuak a, Pathian thu niloin ama ngaihtuahna leh duhthusam a lo zui nasa lutuk a, mi dangte a lo teh nasa lutuk te chu ainhre chhuak chho ta zel a. Pathian a hmuh lehna kawngah hian George Mac Donald-a lehkhabu, ‘Heaven’ tih chuan a pui nasa hle. Kristiannaah hian a kir leh mai duh bik lo. Hnar luih tlat dan a zawng char char a. Mahse, Pathian hmangaihna ata chu a bibo hlen bik thei ta lo a ni.

Kristianna leh sakhaw dang hi nasa takin a khaikhin a. Nunna Thuchah kengtu sakhua chu kristianna chauh hi a ni tih a hmu chhuak a. Lalpa hnenah a kir leh ta a ni. Lalpa lama a kir lehna tur hian a thiante an tangkai em em a ni. 1931-ah chuan Lalpa lamah a kir leh ta a ni. Hetah hian a thianpa J.R.R. Tolkien-a a tangkai hle. (The Lord of the Rings ziaktu). A pianthar dan chanchin hi Surprised by joy tih buah a ziak.

CS Lewis hi a hming pum chu Clive Staples Lewis a ni a. 29 November 1898 -ah piang a. 22 November 1963 a thlir thin ramah chuan a kal ve ta a ni.A thiante chuan “Jack”, tiin an ko thung a. Ren tin daih an tih ang chi hi a ni a, thiam loh pawh a nei mang lo e an ti hial thin.
Tlangval senior tak a nih hnuah nupui a nei chauh a. A nupui nena an inhmangaihna hi khawvela hmangaihna chanchin ropui berte zingah an chhiar tel fo thin. Nuthlawi pakhat thu pawh ziak ve thin Joy Gresham-i chuan CS Lewis hi a ngaisang em em a. Joy-i hi american a ni a. Fa pahnih nei a ni. A pasal chu zu ruih hmang leh amah tiduhdah deuh mai a nih avangin a achhuah san a. Lewis nen hian lehkha an inthawn tawn thin.

Joy Gresham-te England-a an han zinin a takin an inhmu a. An inkawm ngeih em em a. Atir takah chuan inhmangaih taka in ngaizawng, in hmel duh pawh an ni lo a, Joy hi nu fing leh in chhiar zau tak mai a ni a, amah a chu nupui a neih a duh vang hrim hrim niloin Joy-i chu kawm zui zel a duh avangin England-ah cham zui zelse a duh a, nupuiah sawrkar dan (Civil contract marriage)-in a nei ta a.

Lewis-a unaupa Warnie chuan ti hian a ziak a: ” Jack tan chuan a tir chuan Joy-i a ngainatna chu a fin em vang chauh a ni. Joy chu a hmeichhe tawnte zingah chuan ama thluak ang han tluk pha ve, ngaihtuahna zau kawngah te, hriat ril kawngah te, fiamthu duhkawngah te a ma kawmpha awm chhun a ni” (Haven 2006). Amaherawh chu, reilote hnu chuan Joy-i malpui-ah chuan na a lo awm a.Terminal bone cancer a lo ni a, Chu chuan an inzawmna chu a ti danglam ta a, an thinlung a lo inpawh a, kristian dan pangaia innei theiah an lo in ngaita hial a. Nuthlawi a nih avang chuan England kohhran te hian hetiang inneihna hi an hrethiam lutuk lo a, Mahse, an thian tha the Rev. Peter Bide, chuan Hopital-a Joy-i mutna khumah March 1957 Lewis leh Joy- te chu a inneih tirta a ni.

Gresham-i cancer chu a han zia deuh a, nunphung pangaiin an han nung ve a, mah se, reiloteah cancer chu a lo lang leh a,1960 khan. Hemi kum hian Greece leh Aegean thliarkarah chawlh an hmang a. Lewis hian ke a kal nuam a ti em em a, mahse, zin chhuah erawh a ngaina ngai lo.Hei hi 1918 hnu lama English Chennel a pelh awm chhun a ni. 1960 hian Lewis chu Joy hian a thihsan a. A thih hnu hian CS Lewis chuan Joy fate hi e enkawl zui a ni. A Grief Observed tih buah a lusunna chheh vel hi a ziak a, a tir chuan hming lem N.W. Clerk hmangin a ti chhuak a.Amah nena an chhui zawm kha a duh lem lo a ni A thian tam tak chuan a lusunna inhnemnan leh amah tanpuina a nih beiseiin ama lehkhabu ziah ngei chu chhiar turin an rawn thin!Ama ziah a ni tih chu a thih hnuah puan chhuah a ni.

1961 June thla tir khan hrisel lohnain a tlak buak tan a, a kal lam a dik lo tih hmuh chhuah a ni a, blood poisoning a nei bawk a.A hnu kha chuan a hriselna te a han tha deuh a. 1963 June thla tirah hrisel lohna dangin a han tlak buak leh a. 22 November 1963 khan Lewis chu ama mut pindanah tlai dar 5:30 pm-ah a nikhaw hre loin a tlu a, minute reilote hnuah a thi zui ta a ni, Holy Trinity Church, Headington, Oxford thlan mualah phum a ni. A hmangaih em em Joy Gresham-in a thihsan hnu kum thum emaw chauhah CS Lewis-a hian a Lalpa hnen a pan veta a ni.

A BU CHHUNG THU TLANGPUI: A bu chhung hi thenli-ah a then a, chuta a thil sawi tlangpui chu a hnuaiah hian han sawi chhawng dawn ila, a tlangpui han tihah pawh a sawi tam tak chu ka sawi kim dawn chuang lo a ni.

THENKHATNA: A lehkhabu thenkhatnaah hian, “Mihring nunphung thununtu dan” chungchang a sawi a. Mihring history han thlir hi chuan, hnam tin mai hi a bulthutah chuan, kan lo inang viau, tha leh thalo kan tehna tlangpui pawh hi a inang viau a ni. Lewis-a chuan, moral law chu mihringin a siam chawp a ni ringawt lo a, a tak a, hunbiin a huam ve lo a; Engkimtitheia, Khawvel hmun leh hunin a tuam phak piahlama awm, Mihring thatna dan hmanga rawn inlar thinin a pek a ni, tiin a sawi.

THENHNIHNA: A bu thenhnihnaah hian Pathian nihna chungchanga ngaihdan chi hrang hrang awmte chu a sawi ve leh thung a. Sakhaw pawl thenkhat, Pantheist-te chuan, Engkimtithei Pathian chu, a tha lo hran lo a, a tha hran lo bawka tiin an sawi. Pantheist te chuan, Universe pumpui hi Pathian a ni tawp maiah an ngai a, chumi awmzia chu, khawih theih khawvel leh van lamah pawh, engkim mai hi Pathian a ni vel vek maiah an ngai. Sakhaw pawldang Muslim, Judate leh kristian rindanah erawh chuan, Pathianin lei leh van a siam a,pathian erawh a thil siam lak ata chu a hrang tho si a ni; Pathian hi a tha a, lei leh van hi a lo that zawkna turin mihringten theihtawp an chhuah turah an ngai bawk. Kristiante chuan, Sual tawpkhawk-Setana/Ramhuai awm an ring bawk. Sual leh tha hi a intluk lo a, sual chu, tha- lo chhe ta hi a ni. Kan chhevel pawh hi lo thlir ta i la, thil tha reng si, thaloa lo tlachhe ta hlir hmuh tur a awm a ni.

Thenhnihna tawpnaah hian, Kristian sakhaw innghahna, Isua Krista chu a sawi lang ta a. Thatna tak tak nei tur chuan Lal Isua rawngbawl chauhin a neih theih a ni. Kristian pawl hrang hrang awm mah se, Lal Isua nihna an pawm tlan vek avangin Chhandamna an chang vek thei a ni tiin Lewis-a hian a sawi bawk.

THENTHUMNA: Thenthumnaah chuan, Lewis-a chuan Kristian tha tak nunphung a sawi ve leh thung a. Lewis-a hian, Thatna (morality) chuan, thil pathum a huam a, a ti: Mihringte inkara inremna, mahni mimala inremna leh hahdamna, leh uluk taka nun hmana, chhandamna channa te hi. Sual kan tih zawng zawng hian heng thil pathum zinga a engmaw ber chu a kalh vek a ni. Mihringin nun tha taka nung tura kan neih ngei ngei tur thil pali a sawi a—Finna, zu in loh, dikna leh huaisenna/chhelna te, Nun dan thaa nung tura he’ng thil palite pawimawhna hi a sawi bawk.

Lewis-a chuan sual zawng zawngah a thalo ber chu, Chapona hi a ni a ti a, mihringte chu Pathian chungah a indah tir fo a ni, a ti.

Kristian nundan tha pathum tia Lewis-an a sawi chu, Mipat hmeichhiatnaa invawn thianghlimna/nupui pasal te chauh mutpui, beiseina leh rinna te a ni, kristian nuna chona lian ber pawl chu, Rinna a nih thu a ziak bawk a. Pathian chhandamna chankawnga rinnaa dinngheh tlat hi thil harsa ber pakhat a ni a ti a. Ringtu tha ber ber hian inrinhlelh chang an nei fo. Chutiang inrinhlelhna karah pawh chuan, ringtu tha chuan, Pathian rinchhan luitlatin, hmalam pan turin chakna a nei thei thin a ni a ti. Ringtu tha chuan, Pathian kuta an hmalam hunte dahin, mitha thei ang ber ni turin theih tawp an chhuah zel tur a ni a ti bawk.

THENLINA: A bu then lina leh a tawpnaah chuan, Lewis hian Theology deuh ngun lamah a lut a, “science” of God tih mai mai tur, Trinity chungchang a sawi ve leh ta thung. Pa leh Fapa leh Thlarau Thianghlim (Trinity) leh Hupthuk Lung (die) hi a tehkhin a. Square side pa ruk amah hian a awm a, chutih rual chuan, dimension pathum a nei tho bawk. Pathian pawh Amahah minung Pathum awm siin, Pathian Pakhat a ni tiin a sawi.

Lewis-a hian Lal Isua kaltlangin mihringte chuan Pathian fate nihna an lo chang ve thei niin a sawi a. Keimahnia kan nihna tha thei ang ber ni phak tur chuan Lal Isua hnung kan zui chauhin kan ni thei dawn a ni. Lewis-a hian, Kristian chuan, Kristian ni tak tak tur chuan, a khawvel duh zawng leh chak zawngte a kalsan ngam tur a ni a, chutah chuan, Lal Isua a hmu anga, Vanah chautuan lawman changing a cheng thei ang a ti.

KHARNA: Mere Christianity bu hi 1941-1944 Inkara BBC radio-a CS Lewis-a thusawi thin behchhana siam a ni a. 1945 hnulama Kristian lehkhabu ropui berah te pawh an thlang hial. Oxford leh Cambridge University-ah English Literature a zirtir thin a, mi thiam chungchuang a ni. Pathian ram tana mi thawhhlawk ber pawl a ni zui ta reng bawk a. Kan thiamna leh theihna te hi Pathian tana kan hman a tul a, kan thiamsan poh leh kan tangkai leh zual thei a, Ringtu leh rawngbawltu chuan thiamna sang ber ber nei turin tan kan la bawk tur a ni ang.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *