“LAL KA THLANG” LALTHANKIMA, Engkim zawng aia Isua thlangtu

Mizo pa ropui tak pakhat, zirna tha dawng siloa sap tawng thiam ber pawl, CKTP OB hmasa berte zinga mi, Kohhran Upa leh Pathian thu sawi thiam Lalthankima kha, Hmangaihnain a ti buai ve em em thin a.

Rawlthar la nauangte a nih laiin, lungrun takin ngaihzawng a nei a. Kum 15 mi lek a nih laiin amah aia kum 4 a upa ngaihzawng a nei thin a. A ngai em em thin. A ngaihzawng khan pasal a neihsan ang tih a hlau a, Nupui nei rual pawh a la ni lo chung khan,
“A parmawi vul lai thliah hmain
Khuandimin mi liamsan ka hlau,
Dil chhin ila, a rem lawm ni
Kan hel lai, dar biahnem” a ti vawng vawng mai a ni.

Zirtirtu tha a sawi tling, Lushai Hills district Council-a MDC te pawh lo ni hial tawh a ni a, Zikpuii pa te nen khan a in kawm bul hle.

A hranpaa zirna a nei lo nain Pathian thu thiam a tling a, thusawi a thiam a, a ziak thiam bawk a. Mam leh fel fai leh dak thlarh maiin, fun kim tak siin thu a ziak thiam a. Hla awh a phuah tam lo na a, a hla phuahte chu an tha hle. sawilar hluai si lohah chuan Solfa thiam a tling bawk.

Mi thil chikmi leh ngaihtuah nasa a ni a. Thihna chungchangte hi rapthlak a tih avangin a ngaihtuah ngam ngai lo a. “Pathian hi awm eng vangin nge maw a lo awm le…Awm lo se la, keni pawh awm lo ila” titein a ngaihtuah thin a. Mihring nun bul a ngaihtuah a, hahthlak a ti a, ngaihtuah tur tam a ti a. Natna te, tawrhna te, thihna te chua  ngaihtuah a ti buai a. A nun chuan chawlhna a mamawh a, a thlarau vakvai chuan vawn tur nghet a zawng a ni.

Chutia nun buai taka a awm lai chuan, 1950 khan Pathian khawngaihna leh thlamuanna chu amahah a lo thleng ta a. Chhandam nih inhriatna lawmawm tak chu a lo chang ta a. A nun vakvai chuan chawlhna a lo hmuh takah chuan,

“Kraun hlu ber chu ka ta ni se
Ka Isua ka khum tir ang;
Nunna lalah ka thlang ta e,
Lal dang rawng ka bawl lo ang” a ti chhuak ta a. Heta tang hian Lalpa lam atan chu a vakbo ta ngai lo a. Mizo Kohhran chanchinah pawh sulsutu zingah a tel chhoin, KTP dintute zingah te telin, Kohhran berampu rinawm tak niin Chatuan chawlhna a pan ta a ni.

Isaac Watts-a hla ropui, “Isua kraws mak tak chungah khan” tih ai hian a ropui zawk hialin Mizo mi thiam thenkhat chuan an ngai a ni.

” Ram zawng zawng hi ka ram ni se,
Isua lal nan ka pe ang;
Chhak, thlang, chhim, hmar, tlang leh phai te,
Ama tan ka pe vek ang” tiin Lalthankima hi a au chhuak a, Isaac  watts-an a pek phal ai hian Lalthankima pek phal hi ropui zawkah an ngai hial a ni.

Mizo Hla pariat a phuah a, sap hla engemaw zat a phuah a, chung zinga panga chu kawl that a ni a, sweet hour prayer tihte pawh kha mizo tawngin a letling bawk a. Kristian Hlabuah hian a kut chhuak hmuh tur a awm ve a ni.

Mizo hla ropui pahnih, “Muan, Muana kim” tih leh, “Damlai tuipui fawn piah lamah chuan” tih sap tawngin a letling a, Duhtak chawl ta James Dokhuma novel, “Gabbatha” tih kha sap tawngin a letling bawk.

Tunah chuan engkim zawng aia a thlan a Lal Isua hnenah a chawl ta.

(Lalthankima hi 1923-ah a piang a, 2005 khan a thi.)

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *