MAFA-A KHA!

Mafa-a kha tih mai tura min kalsan ta hi hriatthiam a la har hle mai. Mizo Literature tana a hlutna hi a zira zir fe tham a tling a. Thangthar thuziak mi tam zawk hi Sabereka Khuangkaih vanglaia a cho phur leh a nawr kalte an ni hial ang tih tur a ni. Mafaa ‘Influence’ ropui zia hi amah kan ngaisang lo lui ve hrim hrima nih ngawt loh chuan, hmuhhmaih leh sawi hmaih thei a ni lo.

Mak ka tih erawh chu, Zirlaibute a Mizo Literature chanchin an ziah leh zirnaa a hming lam harsa an ti tlat thin hi a ni.

Ka thian ti ngam tur khawpin kum 20 vel zet zawt chu a hnung kan zuiin kan ngaisang ta a! A lar vanglai ber pawh khan, keini naupangte mai kha min kawmin min fuih peih a. Landline Telephone khan vawi tam tak ka bia a, phur takin min titi pui peih reng mai.

Chawlhna Tuikam vang khan poetry tam tak ka ziah phah a. Sabereka Khuangkaih-a tih chhuah tur khan ka thawn nual a. A ti chhuak nual a. Tihchhuah loh pawh a nei nual. Tumkhat kan titi dun tumin, “I poetry zawng zawng kha ka la kawl tha vek. Nakinah a buin kan la siam ang” tiin a sawi! Chumi tum chuan, Poetry lam pawh kan sawi chuang lo a, titi kar lakah a sawi chhuak a ni. Chutiang mi chu a ni, Mafaa kha!

Lehkhabu tih chhuah chhoh a tum dan te pawh mi hrilh fo. A tum dan ang khan a indawtin a ti chhuak chho ta phoh phoh reng a. Lehkhabu a ti chhuak muang leh kutchhuak a ngah tawk lo kha a bulah ka sawi fo. A lehkhabu tihchhuah tum thenkhat kha chu, a lehkhabu hawi zawng ang kha miin an lo tih chhuah hmasak avanga up leh rihte pawh a ni ve bawk.

Amah ngaisangtute tana biak a nawm ziate, amah purtute leh zawhna zawt tute a puih peih dan leh a hawihawm dante kha entawn tlak a tling. Tihtak zetin tute pawh kha a biain a chhang peih a. Social Media a han hman ve hnu pawh khan, chutiang chu a ni tho. Mi tam takin, Social Media kan hmang thiam lo a.

Facebook-a a thuziak leh a thiltih pawh ngeiawm fe fe a lo comment an awm thin a. A thlarau a thawh changa an ‘key’ lak mila a han chhang lah a ngeiawm thiam na rawh!

Thil ka hriat rei thin avang leh ka hriat tawh chu ka hriatchian thin avang khan, Sabereka Khuangkaih ‘Editor Thu Leng Lam’ te kha a chhuah thla leh a thuziak ngai ang chiah chiah hian titina-ah ka sawi chhuak leh thin a. A lawm thin hle. A fapa Ramthanmawia pian thla-a a ‘Editor Thu Lenglam’ te, Pu R. Lalthazuala’n, ‘Poetic License hi tu pek nge?’ tih a zawh tuma a chhanna te angte kha ka sawi chhuak thin a, a ngaihnawm lah tak a. Kutchhuak tam tak a nei a, a ngaihnawm vek rualin, ngaihnawm zual bik erawh a awm a ni.

A Hlahril phuah zawng zawng zingah chuan, ‘Hmangaihna Zarah’ tih hi a tha ka ti ber a. 2001 kuma Kolasib Diakkawn Branch-in ‘Vohbik Khawthlir’ tih bu an tih chhuahah khan chu chu a chuang a. Mafaa thuziak chhiar chakin a hlahril ka han hmu kha ka beidawng ang reng a. Ka han chhiar erawh chuan, vawiin thlengin ka hre ta reng thung a ni. Hemi kumah vek hian a bulah pawh a tha ka tih thu ka sawi a, “ka lawm hle mai. Tumahin khami chungchang kha min la hrilh lo a” a ti. A chang tawp ber chu hei hi a ni,
“Dam chhung phurrit tak chuan ka ko uaiin,
Phei tleu mahse – lei rem rap thiam lovin,
Thihna lui rala Hmangaihna aw nem chuan,
“I phur rei tawh lo’ng,” tiin min lo muan.” 2004 khan a english poetry pakhat, ‘our last rendezvous’ tih behchhan hian Thawnthu Tawi ka ziak a. Chumi thla la la chuan, Sabereka Khuangkaih-ah a ti chhuak nghe nghe a. College kan kal lai a ni a. College pana kan kalna kawngah hian kan zirlai pui pakhat hian, “Our Last rendezvous tih ziaktu kha I ni em?” mi rawn ti ve nawlh mai a. Rilru a hlim hle.

Sabereka Khuangkaih a enkawl lai tho hian, SK Sister Publication, Chhunrawl kartin chanchinbu enkawltuah khan ka tel ve a. Athens Olympic lai khan, “Athens Olympic-ah vai hoin kan ram min ti zak” tih kha ka ziak a. A tukah office kan han kal a. Nui kur kur chung hian, ka thuziakin a tih hlim thute leh zan mutnaah a chhiar a, a nuih nasat thute kha a sawi a, keini tan chuan a lawmawm thin hle. Chhunrawl tho hian, Love Song hi sual a ni em? Tih opinion poll kan la a. Chumi result tih chhuahna Issue-a ziah atan chuan zaithiam thenkhat ngaihdan kan la tel a. Mafaa hi chumi issue mil chuan thuziak turin ka ngen a. Ngaihnawm em em hian a rawn ziak a. A thuziak kharna-ah pawh, Khawnge Bob Dylan-a hla, If not for you tih kha ka han ngaithla teh ang tihte a ni. A thuziak zinga tha ber pawl a ni ang, kha pawh kha.
Kristian Hlabu edition thar ber a lo chhuah khan, Review rawh kan ti a. A lehkhabu duh leh mamawh kan lakkhawm sak a. Kristian Hlabu Edition hlui, solfa awmlohna te kha, ka put a kan kawlzui a awm a. Khangte kha ka pe tel a. A theihnghilh zui a. Ka theihnghilh zui bawk a. A ruang ni khan ka hrechhuak. Chumi tuma Kristian Hlabu a review te chu ngaihnawm tak a ni. Pathian thu te, Fakna hla te pawh a tui zia leh a duh uluk zia a lang chiang hle.

Kan pawm emaw, pawm lo emaw, Mafaa kha kum 2000 hnulama Thangthar zinga thu leh hlaa tuina tuhtu leh thangthar ziakmi tam tak hringtu chu Mafaa hi a ni. Mizo poetry ti thangtu a ni a. English poetry ziah kawngah pawh a ma tawngkam takin a kut hmui berte zinga mi a ni a. Mi tam tak tih hmuhtu a ni. Sap tawnga hla hril a phuahte hi a bua siam a, Khushwant Singh-a thuhmahruai ziah tir tura lehkhathawn a tum thu kha min hrilh thin a. A tak a chang zo ta lo a ni.

Criticism lama mizote min kaihharh thar lehtu leh awmze neia thu leh hla min chhiar a, min thlir tirtu a ni a. A thuziak ngaihnawm bik zia te, thu chheh mawi leh hriatna tipung zawnga a thuziak hausak ziate hi amah bawk khan sawi se kan fiah berin ka ring. A talent leh a hriatna zawng zawng nena phumbo a han ni mao tur hi a pamhmai mange.

Mafaa chanchin kan sawi a, kan sawi hmaih fo thin chu, nationalist a ni a. Zofate Insuihkhawmna tuipui em emtu a ni bawk tih hi a ni. Hemi kawngah pawh hian kan hre reng tur a ni ang.

Tute maw tih danin sawi ve dawn ila chu, amah hi Poet, Essaysist, critic, Short-Story Writer, Journalist a ni ang. Tumkhat kha chu, “lehkha ka zir leh ang, Phd thlenga zir ka duh a ni” tiin ka bulah a sawi a. Chu erawh chu a ti hlawhtling ta lo. Amah ti ‘Mafa-a’ tu atan khan Phd chu a mamawh hauh chuang lo thung. Tuten emaw Mafaa-ah hian Phd erawh an la hmu ang.

2004-a ‘Zawlaidi’ tih lehkhabu kan tih chhuah tum khan, Introduction kan ziah tir a. Chuta a thuziak zinga thenkhat chu ka han tarlang teh ang.

“Kum zabi sawmhnihna hmawrtawp lamah Mizo Thalaite zingah Thu leh hla lama harhtharna tui a lo fawn a, chu harhtharna chuan thu leh hla phuah thiam tha tak tak engemaw zat a rawn vawrh chhuak a. Tun hma lama pa chalchang leh rual u zawkte chauh inhmanna tur emaw kan tih thinah chuan, thalai khup ruh no zawkte an han liluh chhova, a hunlaia thawhhlawk tak mai ‘Sabereka Khuangkaih’ journal pawhin ngaihhlut a hlawh hle. Mi thar engemawzat a rawn theh chhuakin, ziaktu chawrno tha tak tak an lo lang a. Thenkhat phei chu vawiin thlenga kan thu leh hla lama hming nei tak tak an ni zui tar eng a ni”. Hemi ka han tarlan chhan pakhat chu, kum zabi 20 tawp lam leh kum zabi 21 naa mizo Literature-a Mafaa thathawh a tarlanga ka hriat vang a ni. Ama ziah a nih avangin, a ziak nep lui deuh mai mai zawk a ni ber. Ka han lakchhuah chin atang pawh hian a ngaihruat thiam theih mai awm e. A hnu lama kan chungchang a ziah zuina te hi chu tarlang zui lo mai ila. “Kan pumchhuak tehchawk an chan avang hian he lehkhabua ‘Introduction’ ziak tura min han ti pawh hi a phurawm danglam hlein ka hria” tiin thu hlawm dangah a ziak zui bawk a ni. Amah pawh hian a chherchhuah ka ni tih a pawm a. Keipawhin ka ngaihdan reng a ni. 2010-a Ka thawnthu tawi bu pante mai, “Hmangaihna Zunzam” kan tih chhuah pawh khan, amah leh Paul Lalremruata leh Lalrammawia Ngente pualin ka hlan (dedicate) a ni. Anni hi Thu leh hla-a ka mentor-te an ni. Mafaa leh Paul-a chuan, tlansate zingah min kal hmasak khalh ta thung a ni.

Keini pawh hi kan dam anga, kan la thi ve dawn a ni. Nung chunga Chatuan khawvar kan nghak thleng hlauh te a ni loh chuan. Nakinah chuan, Mafaa ten nen hian, rammawia tlansate zingah George Younce (Cathedral Quartet) te kiangah chhandamtu fakin kan la bass ho ang chu.

“George Younce-a hian vanram min ngaihtirin min thlakhleh tir thei tak tak a sin” titu khan George Younce-a pawh a han hmu tawh ngei ang. Ka pualin ilo chibai dawn nia aw, Thianpa.

I’ll meet you in the morning by the bright riverside
When all sorrow has drifted away
I’ll be standin’ at the portals when the gates open wide
At the close of life’s long dreary day
I’ll met you in the morning with a ‘How do you do?’
And we’ll sit down by the river and with rapture, auld acquanitance renewed
You’ll know me in the morning by the smile that I wear
When I meet you in the morning by, in the city that is built four square

Published by

admin

Ka hunawlah lehkha ka ziak thin.

2 thoughts on “MAFA-A KHA!”

  1. Mafaa Chanchin han chhiar hi chuan thinrimna in ka in sawh leh thin…..a hun lo em a ni …..min kalsan mai hi zofate tanhian…..a hlu dawn chauh si….I ziak tha e

Leave a Reply

Your email address will not be published. Required fields are marked *