MI THAWVENG LUNGLENG

Khawvel hnam hrang hrang hian thu leh hla ziaktu hrang hrang an nei a.Chu’ng ziaktu ho chu Novelist te, essayist te, playwright te, Poet te an ni hlawn a. Novelist tha tak kha Essayist tha tak a ni kher lo a. Poet tha tak kha Playwright tha tak a ni kher lo thei.

Sap lemchan thawnthu ziak tak George Bernard Shaw-a pawh kha Novel lamah chuan a hlawhchham chiang hle. Novel bu nga emaw zet chua  ziak ve tak naa, tu khawkha hriatzui a hlawh vak ta hlawm lo a ni.

Kan mizo ziaktu ho zingah chuan Zikpuii Pa kha Novel, Essay, short story, poetry te thlenga thiam a ni a. C. Thuamluaia pawh khan kutchhuak a ngah hman vak lo naa chutiang mi chu a ni. James Dokhuma pawh khan thu leh hla peng hrang hrang kha a luh chilh thuk hle. Tunlai ziaktu zingah chuan Lalrammawia Ngente pawhin Poetry tih loh chu rawn luhchilhin, chhuanawm khawpin thu leh hla peng hrang hrangah sulhna a rawn nei chho bawk a ni.

Novelist ang chauha kan lo hriat thin, Novel bu nga zet lo ziak tawh, ‘pasalthate Ni hnuhnung’ hmanga MAL Book of The Year, kum 2006-a dawngtu C. Lalnunchanga chuan a huang a rawn zauh dawn a. A thuziak hrang hrang, Critical Essay te, Short Story te, Humour leh  Satire te a dahkhawmna bu, ‘Lunglenna Thawveng’ tia a vuah bu chu a ti chhuak dawn hnai ta. A Novel dangte ang bawkin a chhiar tlak angem??

A chunga zawhna khi Sabereka Khuangkaih chanchinbu chhiar thin i nih chuan a chhanna i nei nghal. Tun hma pawhin C. Lalnunchanga hian essay te leh thutluang hrang hrangte a lo ziak tawh thinin, Radio drama te pawha  lo tuipui viau tawh thin a. A Novel ziahte kan hriat lar tak hlawm em avangin thutluang ziah thiam tak a ni tih hi mi tam takin kanhre tel lo mai mai a ni.

‘Lunglenna Thawveng’ bua i hmuh hmasak ber tur chu, ‘Zawltling vawnnat’ a ni. ‘Old Flames’ te pawh i chhiar anga, ‘When you go home’ te, i lunga  leng raih ang. ‘Ramhuai-1’ leh ‘Ramhuai-2’ erawh hi chuan i lung erawh a len kher lo ang. Ramhuai chhaira lungleng tur khawp chuan ‘Pa’ viau angai dawn a ni. Sipai hel chanchin ‘Andrew 2nd battalion’ te thlengin chhiar turin a lo awm zel dawna  ni. He’ngte hi a ziaktupa chuan, ‘Ka lunglenna’ a tia, pa reu reu tak a ni. ‘SMS leh Lunglen’ tih i chhiar chuan a ziaktupa hi a lungleng thin hle tih i hre thei anga, top-up a heh viau dawna  ni tih pawh i hrethiam awm e. Rel chawlhhmun-a vai pakhat nena an inbawlna chanchinte i chhiar thlen chuan Taite-a a fiamthu duh zia i hre thei ang.

He lehkhabu-a a telh,a  thuziak engemawzatah hian C. Lalnunchanga lunglen theihzia leh titi thiam zia i hmu a nga. A thuziak paruk velah ramhuai leh thlahrang chanchin thui deuh deuh i hmu ang. Lalhmachhuana Zofa hi ‘Lasi zawl’ a ni a.C. Lalnunchanga hian ‘thlahrang farm’ a nei ve thung a ni. Taite-a taimak zia leh mi titia  chhinchhiah peihzia pawha hriatthiam theih awm e. Ani aia ramhuai chanchin hre daih zawk pawh kan ni mai thei, mi sawi kan lo ngaithla hnem daih zawk pawh a ni mai thei, ani chuan a ziak chhuak thlap a. taima takin heti hian a lo chhinchhiah a, a fakawm hle  a ni.

A thuziak reng reng hi han chhiar la, a fel thlap anga, a dik zaih ang. Chutiang bawka titi pawh thiam, a thuziak ang thlapa felfai leh mam ziah maia tawng thkap thlap tura i ngai a nih chuan i tisual lo ang. A hmel ila hmu lo a nih chuan, a thuziak chhiarah duhtawk rawh. “E! Hei chu, thalhranga vana hmuh hnem tawh hmel ve” i ti mai palh ang, a hmel i hmuh hlauh chuan.

Tun laiah thuziak thin, an talent ni miah lo, thiam pawh thiam uk lo, engtin tin emaw an vawrh lar, an kut chhuak lah chhiar tak tak tlak loh kan hre thin ang. Kan hre lo mai thei, an awm! Mizote chaun chung mite chu thuziak thiam emaw kanti tlat leh nghal a. Victorian Era-a England ram thu leh hla awm dan ang deuh kan ni. Tunlaia keini ram ang tho hian chutih laia England-ah chuan lehkhabu tha mang lo leh thuziak tha teh chiam lo a lar chiam a. Thuziak mi dik tak leh thuziak tha tak tak te’n ngaihsak an hlawh leh si lo. Matthew Arnold-a pawhin ‘The Functions of Criticismat the Present Time’ tih a lo ziah phah hial a ni.

Novelist C. Lalnunchanga hi thuziak lama talent ropui nei a ni a. ‘Lunglenna Thawveng’ lo chhuak tur hi lei la. Chhiar rawh. I tisual lo ang. ‘Pasalthate Ni hnuhnung’ tihte kha lei leh chhiar zet hnua inchhir leh ta an thu sawi tur ka la hre lo a. Tuna  a lehkhabu hi literature tehfunga teh a, a hniam leh san thu lam ka sawi lo a, keia lo sawi tehchiam tur pawh a ni kher lo ang. Hei erawh ka sawi hram duh, Engatinge thu leh hla hi mi’n an ziah thin a? Engngatinge keini hian lehkhabu kanchhiar thin? Mihring hian chawlh hahdamna kan mamawh a. Thu leh hla hi chawlh hahdamna pakhat a ni. ‘Lunglenna thawveng’ hi lehkhabu chhiar man hla  tak  a ni ang.

Pawi ka tih deuh mai chu, mizote hian engthil emawah chuan pawisa kan ui loh viau lai hian lehkhabu leinan chuankan kawm leh tlat thin. Lehkhabu hi to kan ti hma tlat! Kan harh a hun ta, khawvelah hian lehkhabu ngaisang lo hnam an ding chhuak ngai lo. Khawvel chanchin hlui thlir kir ila, hnam ropui lo awm tawh te leh awm mek te hian, literature ropui tak te,library ropui takte an nei a. An thu leh hla ziaktute pawh an ngai ropui em em thin.

Mizote hi chuan kan thu leh hla ziaktute kan ngaisang lo a, kan ngaihlu lo khawp mai. Hetiang kawnga kan harh thar hunah kan hnam chuan hma a sawn anga, ropuina kawngah a kal ang. British history thlirkir ila, an ropuina innghahna chu thu leh hla a ni. An ram awp thin zawngte an chan hnuah pawh an thu leh hla chu keini ram thleng thlengin kan lo la zir zel a, an ropuina dang zawng zawngin a kian san hnuah pawh an shakespeare-a te chu helai kilah pawh kan la sawi bang thei lo chu a nih hi!Thu leh hla hi chuan chatuan a daih miau a, a ziaktute an thih hnuah pawh an thu leh hla te hmangin an dam reng thin a nih hi! Chuvangin, ‘Lunglenna Thawveng’ bute hi lo nghakhlel hle teh u.

Laisuih Zirbing Run lumtu, fur laia kangchat thin dil pawh hretu (phek 104-na, 2nd para) K.C. Vanlalruata reng hian Taite-a kutchhuak te hi chu a  ngaisang a nia. Mi zingah erawh zawng, ‘Engmah tak tak a ni lo e’a ti leh daih thin mai pawh a.

Phek 91-naa zan vah ching Mamawia hi ka hria! Buai lai taka mi miss-call te, Pathianni chawhnu inkhawm kal vel lai taka SMS zahmawh tak thawn te a  ching! Tunah thingtlangah pastor-in a awm mek a. Scooter tawng tawh tak mai a nei. A vanglainite, kawla inher liam tan mek chuan a lung a tileng ve ngei ang. ‘Lunglenna Thawveng’ bu te pawh a ala chhiar anga, a nunhlui te pawh ala ngai ve mah na.

‘Lunglenna Thawveng’ bu lei tur zawng zawngin in ban han phar vek teh ule. In ban ding lam, sang takin.

“A lawmawm e. Dahthla leh tawh mai r’u. In ban a kham ang. In tam hle mai.”

(Taite-a lehkhabu ‘Lunglenna Thawveng’, tih chhuah a nih hmaa Evening Post-a ka ziah a ni.)

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *