Mizo Essay Kum 75-Na Pual Lehkhabu

hnahthelHNAHTHEL

Kaphleia Memorial Trust-in Mizo Essay Platinum Jubilee puala kan lehkhabu tih chhuah tur chu Press-ah a awm ta vung mai le. A tirin committee in a buaipui turin kei leh Taitea min ruat a.Hma kan han la tran tihin thil trul dang avangin hmundanga ka kal angai a, Taitea a hmanlo chho bawk a. Tonsona kutah a lo tla ta a. Nov 13, Kaphleia Nia tih chhuah hman turin ruahman a ni ta a ni.

Thuziak hrang hrang dahkhawm a ni a, chung thuziak leh a ziaktute chu, (hei hi Editor hnen atanga ka dawn ang angin ka lo pho chhuak a ni)

Kaphleia Hringnun
C. Lalnunchanga

Thuziak avanga Zoram khawvelin a hriat a ni a, a thawnthu phuah Pasalthate Ni Hnuhnung chu Mizo Academy of Letters (MAL) Book of the Year atan 2006 khan a thlang. Kaphleia Memorial Trust-ah hian committee member a ni.

Natna khirh tak leh damchhuah beisei awm lo tuar Kaphleia’n khawhar taka nun a hman dan tur leh chutiang dinhmun beidawn thlakah pawh a tlawm mai chuang lo a ni.

Thingtlang hmasawnna duhtu Kaphleia
Laldinpuia Tlau

Lawngtlai District-ah Chief Judicial Magistrate a ni a, thuziakmi aiin thubuai remtu (judge)-a hriatlar ni mah se chanchinbuah hian a thuziak hmuh tur a awm zauh zauh thin. Lehkhabu pakhat Rorelna Dik-ah hian a thuziak \henkhat chu tihchhuah a ni.

Kaphleia chuan thingtlang a ngaipawimawh hle a, thingtlang a tih hian Mizoram a sawina a ni pakhat bawk. Thlirtuah hian Mizoram a hmangaihzia a hmuh theih a, kum 75 chuang liam taa thingtlang hmasawnna chungchang a lo tuipui leh buaipui hi Kaphleia danglamna tak a ni awm e.

Thlirtu (Bihchianna)
H Lalbiakzuali

Government T Romana College-ah Mizo zirtirtu a ni a, Kaphleia Memoria Trust-ah committee member, \hahnemngai leh inpe zo tak a ni.

Essay tha nihphung nia sawi chu Thlirtuah hian hmuh theihin a awm a, kum 75 chuang liam taa ziak mah ni se a chul thei lo a ni. Thlirtu essay zirchianna kawnga chhiar manhla tak tur a ni.

Thlirtu thlirna
Rohmingthanga Ralte

Aizawl North College-ah Mizo zirtirtu niin ram leh hnam veimi a ni a, a thuziak hi hmuh tur tam lo mah se a awm leh zauh thin. Thu leh hla khawvelah a mikhual lo viau.

Kaphleia, Thlirtu mai nia inngai chuan ram leh hnam a dah pawimawh hmasa ber a, a that lohna leh chak lohna lai pawh a hmu hmaih lo. Chumi avang chuan a hnual lo a, a fuih sauh zawk a ni. A essay-ah khan fapa hrin manhla lo nih a hlau em em a, fapa hrin man hla tak a ni. Hnahthel ro ang maia tlak bo a hlau em em a, a tla bo na sa si a nih hi.

Mi nunkhawhar – Kaphleia
(Ram leh hnam hmangaihtu)
CVL Fakhlamawia

Chanchinbu hrang hrangah a thuziak hmuh tur a awm leh zauh thin. Ram leh hnam veimi a nih bakah Kaphleia sikul kal \hinna Sialsuk khawmi a ni.

Kaphleia’n a naupan laia lehkha a zirdan; Thlirtu essay atanga ram hmangaihtu a nihzia leh a nunkhawhar leh lungleng taka a hman dan lo lang theite he thuziakah hian kan hmu.

Kaphleia leh Inhrilhhriatna
Ruatfela Nu

Mizo-ah chuan thu leh hla ngah ber pawl a ni awm e. Human rights tlangaupuitu a ni a, thuziak hi a hmanrua ber pawh a ni.

Kaphleia hian awareness a ngaipawimawh a, a pawimawh bawk a ni. Thingtlang mite hian thil an hre tawk lo fo va, an dinhmun pawh Kaphleia hun lai ang thoin an inhmufiah thin loin an hre tawk lo. Chuvang chuan khawpuia mite leh mi thiltithei leh mi liante hian bum fo a ni.

Kaphleia Thufing Sawm hnih pakhat
Dr Malsawmliana

Government T Romana College-ah History zirtirtu a ni a, Kaphleia Memorial Trust-ah a khaipa ber leh chairman a ni. YMA Chanchinbu editor a ni a, research paper hrang hrang awmna Social, Economic and Political History of the Mizo an lo edit tawh bawk.

Kaphleia thu leh hla atanga hriat reng tlak thufing lawrkhawm 21.

Hmeithai leh Theihai
PB Lalrammawia

Nitin chanchinbu, The Aizawl Post-ah joint editor a ni a, Kaphlei Memorial Trust dintute zinga mi a ni. The Adventures of Robinhood letlingtu a ni.

Hmeithai pakhat a awm a, thingtlanga a zinnaah he thuziaktu nen hian an intawng a ni. Chu hmeithai chu a felin finkherek a nei lo. A theihai leisak a tum a, thianghlim takin an indawr a ni. Kha hmeithai dinhmun khan a ziak rilru a khawih hle a, Kaphleia anga thingtlang mite vei ram hruaitu nei ila chuan hmeithai pitarte chuan harsa taka ei an zawn a ngai lo ang a, tar enkawlna hmunah an hun tawp chu taksa hahdamin an hmang mai ang tih thlengin a ziaktu ngaihtuahna chu a kal nghe nghe a ni.

Chhumpui nasa tak ang Thlirtu
Zodin Sanga

Toonlaini leh Postoon cartoon hi mipui nawlpuiin kan hmelhriatna tur chu a ni awm e. Saptawng nitin chanchinbu Newslink-ah editor a ni a, news agency hrang hrangah Mizoram chanchin a thawn thin bawk.

Kum 75 chuang liam taah khan Kaphleia khan thingtlang mite dinhmun a vei em em a, mahse, tunthleng pawhin kan thingtlang dinhmun chu a veiawm em em reng tho si chu a nih hi.

Mitthi tawh Kaphleia zara kan chanvo
Lalnuntawma Fanai

Nitin chanchinbu Vanglainiah thil chhui chianna a ziak thin a, Zonet programme Zoram Kalsiam enkawltu a ni bawk.

Kaphleia hian thu min van hnutchhiah ropuiin a va hlu em!

Mi damrei Kaphleia
H Laldinmawia

Pachhunga University College-ah Mizo zirtirtu a ni a, Zoram Today chanchinbu, kartina a chhuah thin lai kha chuan editor-in-chief a ni.

A thu leh hla atanga Kaphleia mizia zirchianna a ni ber

Fa hrin man awm: Kaphleia, Mizo tlangval
F Vanlalrochana

Mizoram Police Service a ni a. Thuziak a taima a, facebook leh a blog http://roafanai.blogspot.in/ ahte chhiar turin a awm. A thuziak eng emaw zat chu Hmangaihna Zûn Zâm-ah a buin chhuah a ni bawk. Mizote chanchin mimal thleng pawhin a hre hle a nia. Kaphleia Memorial Trust-ah committee member a ni. He a thuziak hi November 13, 2012-a Kaphleia Memorial Lecture, I& PR Auditorium-a mi kha a ni.

Mizo hnam rilru pianchhuah dan
Dr H Vanlalhruaia

Mizoram University-ah History a zirtir a, Mizo zinga history tuimite zingah chuan a mikhual lo viau. He thuziak hi November 13, 2012-a Kaphleia Memorial Lecture, I& PR Auditorium-a mi kha a ni.

Mizo hnam rilru (nationalism) lo chhuahnaah hian Kaphleia chu a bul pakhat a lo ni ve reng mai.

Mizorama Sikul Hmasa Ber, 1890
Lalhruaitluanga Ralte

Synod Press-ah manager a ni a, technical lammi tih tur chu a ni awm e. Mahse, Mizo print culture history-ah chuan ani tluk tur an awm kher lo ang. Zoram Var\ian leh Thangliana (TH Lewin) te ziaktu a ni.

Sikul hmasa emaw kan lo tih thin, missionary te din kha a lo ni chiah lo. Hawrawp eng tawng atanga kan lak nge?

Mizo Patriotic Song Pahnih
C Vanlallawma

Government Hrangbana College-ah Mizo zirtirtu a ni a, Mizo thu leh hla khawvelah hian pa langsar pawl a ni. Tun kum za chhunga : Mizo hnam puipate (1894-1994) leh Kum 500 Chibai: John Calvin leh Rawngbawltu dangte te hi a lehkhabu ziak lar a ni awm e. Article leh research paper a nei nual bawk. Kaphleia Memorial Trust-ah Patron a ni. He thuziak hi Govt.Aizawl West College buatsaih, State Level Seminar on ‘Mizo Poetical Words,’ Dt 12-13. 2. 2014, I & PR Auditorium-ah present a ni.

Ram leh hnam hmangaihna hla hmasa, hriat zui hlawh ta lutuk lo, mahse, pawimawh si pahnih.

Pi pute hnungtawlhna leh hmasawnna
B Lalthangliana

Mizo History hi a tel lo chuan a zir chuan a zir theih âwm loh e. Literature-ah pawh history ang thoin a thawhhlawk a ni. Kaphleia leh mi hmasa dangte an chanchin lo ngaihven hmasa a sulsutu pawimawh tak a ni. Government Hrangbana College-ah Mizo a zirtir thin a, tunah chuan a chawl tawh. Kaphleia Memorial Trust-ah Patron a ni.

Mizo pipute hian engtin nge silh leh fen an lo ngaihtuah a, an lo neih le?

Hmasawnna leh tihdan nghet
F Vanlalrochana

Hmasawnna nge kan thlan ang tihdan nghet?

Buai laia rammuho titi
Dr C Lalawmpuia Vanchiau

Literature-ah doctorate a ni a, Kaphleia Memorial Trust-ah secretary a niin Journal of MIELS-ah editor a ni bawk. Mizoram University-ah Mizo a zirtir \hin a, he lehkhabu kan buaipui lai hian Centre for North East Studies/Heinrich Boll Foundation hnuaiah Mizoram rambuai chungchang zirchianna project a khawih mek. Lehkhabu pahnih Tapchhak Theory leh Rambuai Literature te a ziak tawh.

He a thuziak hi rambuai lai chanchin nuihzatthlak leh a hlimawm zawng zawnga titi a lak khawm a ni a; indonaah hi chuan propaganda leh tactic nuihzatthlak a awm fo \hin. Mizote rilru huaisenzia leh midang kan chungen mai lohzia he thuziakah hian i hmu thei ang.

Fa Hrin Manhla Kâphleia
Mafaa Hauhnar

A tir atang rengin Kaphleia Memorial Trust mi tangkai a ni a, Trust hi din a nih tir khan college hrang hrangah Kaphleia Memorial Lecture neih a ni a, September 17, 2010-a Pachhunga University College-a a lecturer a rawn siam rem leh hret a ni. Mizo thu leh hlaa thawhhlawk tak, Comedian Search inelnaa judge lar tak thin kha a ni.

Kaphleia hi insit tur a lo ni lo, fa hrin man hla ber alawm le a lo nih le

Kaphleia leh Mizo History
Dr Rohmingmawii

Mizo hmeichhe historian taima a ni a, Pachhunga University College-ah history zirtirtu a ni a, Mizorama Naupang Khawih chingpen zirchianna, Mizo Narratives: Accounts from Mizoram, Orality and Folk Literature in the Age of Print Culture: India’s Northeast Experience, An Insight into Phulpui leh A Study Guide to the History of India upto Post-Mauryan Period te hi a kutchhuak an ni a, an college-in a siam Senhri (Journal of Multidisciplinary Studies) editor a ni bawk. Kaphleia Memorial Trust-ah Treasurer a ni.

History hi eng nge a nih a, Chhingpuii hi eng tianga chhiar tur nge? Kaphleia chungchuanna i hmu thei ang.

Kaphleia thawnthu tawi Chhingpuii
Dr Zoramdinthara Khiangte

Pachhunga University College-ah Mizo zirtirtu a ni a, Mizo literature chanchinbu lar Thu leh Hla joint editor niin Mizo Academy of Letters-ah joint secretary a ni.

Kaphleia thawnthu tawi Chhingpuii hi short story tha a lo ni.

Published by

admin

Ka hunawlah lehkha ka ziak thin.

Leave a Reply

Your email address will not be published. Required fields are marked *