MIZO TE KALVARI LEH VAN RAM

Ni 14.12.2014 Synod Inkhawmpui vawi 91-na Chawhnu inkhawmah KHB 223 na, “Lalpa’n Min hmangaihna chu” tih hla hi kan sa a. Mizo te hian Bethlehem leh Kalvari chu kan lo hmu fiah ber mai awm mange..

“Lalpa’n Min hmangaihna chu
Van rangkchak ram kalsanin
Sual fate min zawng turin
A tuar Lalpa Isuan”

Sual fate min zawng turin Van rangkachak ram kalsanin Lalpa Isuan kan tan a tuar. A ropuiin a fiah mange maw, “Lalpa’n Min hmangaihna chu, Van rangkachak ram kalsanin” han tih fel et mai hian, a fun kim em em mai.

Thlir ninawm loh Lal Isua
Misual tana Kraws chu puin
Kalvari Lam pan turin
A chau a ni ka Lal.

Krawsa Khenbeh nih chu, Thihna rapthlak leh tihbaiawm ber, Mualphona tawp khawk a ni. Chung zawng zawng chu kan tan, Lalpa Isuan a tuar a. Chau chung chungin, Tlu tawl tawl khawpin kan tan Kraws a pu a.

Pathian fapa thisen vangin Hmangaihna engah kan leng ta a. Chhandamna Hmun ralmuang atanga thlir let chuan, Tawrhna rapthlak ber chu Ennawm duhawm ber a lo chang a, Pathian fapa meuhin kan tana a tuar chu, a lo hmuhnawm ta em em zawk mai.

Aw Ka tana Tuar zoin
Kalvari tlang thing kraws chungah
Ka sual zawng zawngin phur chungin
Min tlan ta Lal Isuan.

Chatuana Kan sual man bat kan rulh zawh loh tur chu, Van ropuina kalsanin Pathian fapa meuh chuan Kalvari tlang thing kraws chungah Min tuar tlei tlak sak ta a. zalen kan ni ta. Misual ber, Bat ngah em em, sual sal tang kha, Lal Isua chuan min tlan ta a ni.

Mosie Lister-a te, Ira Stanphill-a te, Stuart Hamblen-a te, Bill gaither leh Gloria Gaither te, Marvin P. Dalton-a ten hla za tam taka an sawi a, an chai a kha Kaplianchhunga (1901-1951) he khawvela kum 50 chauh a cham hnua Van rangkachak rama Lalpa isuan Kalvari tlanga min tlannna vanga lawi ta khan hla Chang li lekah fiah em emin min pho lan sak ta a ni.

Kapzinga khan keimahni tih ve tur lam nen a lo chhun zawm a, a mawi em em mai

He khawvelah hian
Vakvai, rethei te min rawn zawng ta
I ang chhung muanna ka thlen hma loh chuan
Ka rawn zawng zel che, aw, ka chhandamtu

a lo ti a…

Rokunga phei chuan, a sawi thui leh zual a, Thlarau chawlhna ram a kir leh dawna a hlaah khan heti hian a lo ti a

Ka thla chau a chawl ta
I thisen luangah chuan
A ropui dawn mange
I chhandamna hmun ralmuanga
Ka chawl kumkhua tur chu…

Mizo Lawm teh u…

Published by

admin

Ka hunawlah lehkha ka ziak thin.

One thought on “MIZO TE KALVARI LEH VAN RAM”

  1. A ţha hle my! Keipawn ka ţawmpui e

    Kan mi hmasate kha, Lalpan a va’nlo hruai nasa bik em em! Ka tun dinhmun aanga ngaihtuah let chuan, Ka thîk ţhin a ni

Leave a Reply

Your email address will not be published. Required fields are marked *